Pas 11 vjet qeverisjeje me Maqedoninë, ka rënë pushteti i Nikolla Gruevskit të VMRO-DPMNE-së i përballur me akuza të shumta si nga brenda ashtu edhe jashtë vendit, për qeverisjen autoritare me vendin, e në veçanti për ngjarjet e fundit të dhunshme në Kuvend.
Me 62 vota pro, 5 abstenime dhe 44 vota kundër, Kuvendi i Maqedonisë ka votuar qeverinë e re që do të drejtohet nga kryeministri, Zoran Zaev.
Qeveria e re përbëhet nga tri subjekte politike, Lidhja Sociale-Demokrate, Bashkimi Demokratik për Integrim dhe Aleanca për Shqiptarët. Partitë shqiptare do të drejtojnë shtatë ministri, ndërsa do të kenë edhe dy poste të zëvendëskryeministrave, si dhe kryetarin e Kuvendit.
Zgjedhjes së kabinetit të ri qeveritar i ka paraprirë një debat i ashpër dyditor mes deputetëve të shumicës së re dhe VMRO-së opozitare të ish-kryeministrit Nikolla Gruevski.
Kreu i ri i qeverisë, Zoran Zaev, tha se kabineti i tij do të punojë për kthimin e normalitetit në vend, sundimin e ligjit dhe të shtetit ligjor, zhvillimin ekonomik, si dhe integrimin euroatlantik të vendit.
“Me zemër të hapur dhe besim të madh do të punojmë të gjithë së bashku, në interes të të gjithë qytetarëve, në interes të Maqedonisë tonë të përbashkët. Unë dhe kabineti im do të punojmë për bashkimin dhe jo ndarjen e popullit, do të punojmë për jetë më të mirë, për kthimin e besimit të qytetarëve në institucionet, për të ardhme më të mirë për të gjithë”, ka deklaruar Zaev.
Ndërkohë, ish-kryeministri Nikolla Gruevskit në paraqitjen e tij para votimit të qeverisë drejtoi kritika të ashpra ndaj kabintetit të ri të Zaevit, duke e vlerësuar si rrënues të asaj që është arritur në Maqedoni gjatë qeverisjes së partisë së tij.
Gruevski kërkoi edhe zgjedhje të parakohshme parlamentare meqë siç tha është shkelur vullneti i qytetarëve që e nxori partinë e tij fituese të zgjedhjeve të 11 dhjetorit të kaluar.
Ai foli edhe për raportet ndëretnike duke thënë se VMRO-ja dhe ai personalisht asnjëherë nuk kanë bërë ndarje etnike duke i quajtur pretendimet e tilla si perceptime të gabuara.
Gruevski tha se pas presioneve të shumta nga populli, Zaev u detyrua që para se të merrte mandatin të jepte garanci se do të heqë dorë nga ajo që njihet si “Platformë e Tiranës”.
“Është mirë se ai nënshkroi se nuk do të mbështesë Platformën e Tiranës. Dua të përgëzoj edhe popullin, i cili plot 80 ditë protestoi kundër saj me qëllim që të ruajë unitarizmin e shtetit. Askush nga ne nuk luftonte që t’i shkurtohen të drejtat shqiptarëve pasi ata sikur edhe në të kaluarën ashtu edhe në të ardhmen do të kenë avancim të përdorimit të gjuhës së tyre”, u shpreh Gruevski.
Në emër të grupit parlamentar të Bashkimit Demokratik për Integrim, deputeti Artan Grubi, tha se me zgjedhjen e qeverisë së re po përfundon edhe kriza politike në Maqedoni dhe se dëshmi për këtë sipas tij është programi qeveritar që ofron mirëqenie për qytetarët.
“Nuk ka mënyrë më të mirë të përfundimit të kësaj krize kaq të thellë se sa me një program të tillë qeverisës kaq premtues, program i cili premton integrimin në NATO dhe BE, me një program i cili premton sundimin e së drejtës, një program i cili premton rrumbullakimin e Marrëveshjes së Ohrit, nëpërmjet arritjes së barazisë gjuhësore në përputhje me Kushtetutën e Maqedonisë”, ka deklaruar Grubi.
Lëvizja Besa, që do të jetë opozita e re shqiptare votoi e përmbajtur me arsyetimin se edhe ky kabinet qeveritar, e në veçanti partia maqedonase nuk ka treguar gatishmëri për mbylljen e shumë çështjeve të hapura shqiptare.
Kjo parti kishte ofruar një dokument me disa kërkesa për ridefinimin e shtetit, si kusht për të qenë pjesë e qeverisë, por refuzimi i saj nga LSDM-ja sipas liderit të Lëvizjes Besa, Bilall Kasami dëshmon se politikanët maqedonas ende nuk janë të gatshëm për një fillim të ri në Maqedoni.
“Nëse nuk kemi vullnet që ta ridefinojmë Maqedoninë, atëherë do të na ndodhë që në çdo dhjetë vjet të vihet në pikëpyetje ekzistenca e këtij shteti. Duke mos e njohur këtë ne arritëm në pikën më të keqe në të cilën ndodhemi sot, të kemi parti të pasura siç janë VMRO dhe BDI, por shtet të dobët dhe qytetarë të varfër”, theksoi Kasami.
Qeveria e re u votua më shumë se pesë muaj pas mbajtjes së zgjedhjeve parlamentare më 11 dhjetor. Fituese e zgjedhjeve ishte VMRO-ja me dy deputetë më shumë se LSDM-ja, por lideri i saj Nikolla Gruevskit nuk arriti të formojë qeverinë për shkak se nuk gjeti partner tek partitë shqiptare, por edhe për shkak të rezultatit të ngushtë zgjedhor.

Ish-ministri i Shëndetësisë i Maqedonisë, Nikolla Todorov, është qëlluar me armë zjarri përpara Ministrisë së Shëndetësisë në Shkup. Lajmin e ka konfimuar policia dhe Ministria e Punëve të Brendshme.
Sulumesi është arrestuar dhe policia e ka dërguar në stacionin policor ku është marrë në pyetje.
Policia është duke punuar për të zbardhur rastin dhe do të kërkojë për më shumë informacione rreth të incidentit që ka ndodhur.
Ministri i ri i Shëndetësisë, Arben Taravari, në një deklaratë për Radion Evropa e Lirë ka thënë se ai nuk ka qenë në punë dje, pasi ishte informuar rreth incidentit. Taravari ishte planifikuar të takohej me kabinetin ministror në orën 12:30.
Todorov ka qenë ministër i krahut të djathtë të qeverisë paraprake VMRO-DMPNE, të udhëhequr nga ish-kryeministri Nikola Gruevski. Burime jozyrtare nga partia e Todorovit kanë thënë se ai nuk është plagosur.
Burime policore u kanë thënë mjeteve të informimit se sulmuesi Lupço S. (1957) nga një fshat i Velesit kishte shtënë dy herë me revole ndaj ish-ministrit, por në incident nuk pati të lënduar. Sulmuesi është kapur menjëherë nga truprojet e z. Todorov dhe ai ndodhet në një prej stacioneve të policisë në Shkup. Ministria e Punëve të Brendshme thotë se ende nuk dihen motivet e sulmit.
Zoti Todorov po shkonte në ministri për t’ia dorëzuar zyrën ministrit të ri të Shëndetësisë, Arben Taravari.
Qeveria e re e Maqedonisë u miratua me 62 vota pro, 44 kundër dhe pesë abstenime pas një debati prej dy ditësh në Parlament.
Formimi i qeverisë së re pritet t’i japë fund krizës politike që e ka mbajtur vendin pa qeverisje funksionale që nga viti 2015. Pas krizës që pasoi një aferë përgjimesh të qeverisë së ish-kryeministrit Nikola Gruevski. Partia e këtij të fundit ishte në pushtet që nga viti 2006.

Një ditë pasi formalisht dha dorëheqjen nga posti i kryeministrit të Serbisë, Aleksandër Vuçiç, dha të mërkurën betimin në postin e presidentit duke u zotuar për të punuar për paqen e qëndrueshmërinë në rajon, ndërsa po punon për fuqizimin e forcave të armatosura të Serbisë.
Një ish-ultra nacionalist që pohon të jetë shndërruar në një reformator pro evropian, Aleksandër Vuçiç shënoi një fitore të thellë në zgjedhjet presidenciale që u mbajtën më 2 prill. Partitë opozitare që e kanë akuzuar atë për parregullsi në zgjedhje, planifikojnë protesta të mëtejshme, kundër siç thuhet, sundimit autokratik të tij.
“Ne duhet ta bëjmë rajonin të tillë që dallimet të jenë përparësi dhe jo themel i përleshjeve”, tha ai gjatë fjalimit përurues në Parlamentin serb, gjatë të cilit iu referuar luftërave të viteve të ‘90-ta gjatë të cilave ai kishte luajtur një rol aktiv si mbështetës i idesë së zgjerimit të kufijve të Serbisë.
Aleksandër Vuçiç ishte pjesë e Partisë Radikale serbe të drejtuar nga ultra nacionalisti Vojislav Sheshel. “Derisa bisedojmë me të gjithë, ne po ashtu duhet të forcojmë mundësitë tona mbrojtëse”, tha ai, duke theksuar qëndrimin se “Serbia nuk do t’i bashkohet NATO-s apo ndonjë aleance tjetër ushtarake. Betohem se të gjitha fuqitë e mia do t’ia kushtoj ruajtjes së sovranitetit dhe tërësisë tokësore të Serbisë, përfshirë edhe Kosovën si pjesë përbërëse të saj…”, tha ai gjatë betimit.
Serbia vazhdon të kundërshtojë pavarësinë e Kosovës të shpallur në shkurt të vitit 2008, por është përfshirë në një proces normalizimi në shkëmbim të afrimit me strukturat e Bashkimit Evropian. Si kryeministër ai ishte përsëritur se anëtarësimi në BE është synim strategjik i Serbisë. Në të njëjtën kohë ai ka forcuar lidhjet me aleatin tradicional, Rusinë, e cila do të furnizojë Beogradin me avionë ushtarakë dhe tanke, duke nxitur shtim tensionesh në Ballkan.
Ai shkurtimisht përmendi dje integrimet evropiane duke theksuar se “askush nuk duhet të dyshojë në rrugën evropiane të Serbisë”. Ai tha se Serbia do të ruajë lidhjet me Rusinë e Kinën, por njëkohësisht do të përmirësojë lidhjet me Shtetet e Bashkuara.
Duke folur para mbështetësve të tij të mbledhur para Parlamentit, ai u zotua për “ruajtjen e paqes dhe qëndrueshmërisë dhe të së ardhmes së fëmijëve tanë”.
Posti i presidentit është më shumë ceremonial në Serbi, por të mërkurën ai la të kuptohet se synon të luajë rolin udhëheqës në politikën serbe. Aleksandër Vuçiç, pasoi në këtë post ish-shefin e tij Tomislav Nikoliç, i njohur për qëndrimet e tij pro ruse.

Teksa ministri i ri i Kulturës në Maqedoni lajmëroi ndalimin e plotë të rinovimit të kryeqytetit të njohur si Shkupi 2014, arkitektët thonë se shpresojnë që disa nga ndërtesat historike që morën fasada të reja, të kthehen në gjendjen fillestare.
“Duhet ta ndalojmë menjëherë Shkupin 2014 sepse çdo ditë, si nga kutia e Pandorës, prodhon monumente të reja, skulptura, rrugica dhe kolonada që askujt nuk i duhen, por ne të gjithë paguajmë një çmim të lartë për këtë”, tha ministri i zgjedhur i Kulturës Robert Alagjozovski për agjencinë e lajmeve “Makfax”.
Alagjozovski lajmëroi një rishqyrtim të plotë të projektit.
“Ne do të organizojmë një konferencë ndërkombëtare rreth projektit me synimin e zhvillimit të skenarëve të ardhshëm rreth tij. Do të jemi të kujdesshëm me zgjidhjet”, tha ai.
Projekti i madh i qeverisë që transformoi pamjen e Shkupit ishte ide e ish-qeverisë së drejtuar nga Nikola Gruevski. Ai përfshin dhjetëra ndërtesa të reja, qindra fasada, monumente gjigante, ura dhe vepra të tjera zbukurimi, frymëzuar kryesisht nga stilet artistike të Antikitetit.
Projekti është kritikuar gjerësisht për mungesë transparence dhe ka shtuar dyshimet se është bërë një mënyrë për të vjedhur paratë nga buxheti i shtetit. Nga çmimi i shpallur fillimisht prej 80 milionë eurosh, kostoja e pamjes së re të kryeqytetit tani është rritur në mbi 670 milionë euro, sipas një baze të dhënash nga “BIRN”.
Ish-kreu i Shoqatës së Arkitektëve maqedonas, AAM, Sanja Regenoviç-Jovanoviç tha se tani nevojiten disa rregullime. Ashtu si arkitektë të tjerë, ajo sugjeron të fillohet me kthimin e pamjes ish-moderniste të ndërtesës së qeverisë.
Ndërtesa e vitit 1970 krijuar nga arkitekti i njohur Petar Mulickovski mori një pamje radikalisht të re në vitin 2014, kur u mbulua me kolona të rreme, një timpanum, si dhe dritare dhe çati të dizajnuara për t’i ngjasuar Shtëpisë së Bardhë në Uashington. Ajo kushtoi më shumë se 16 milionë euro, sipas të dhënave.
“Padyshim, kjo ndërtesë duhet të kthehet në gjendjen normale”, tha Regenoviç-Jovanoviç.
Ajo tha se pritej që të duheshin para dhe kohë për të korrigjuar disa gabime, “por ne nuk kemi zgjedhje tjetër nëse duam të tregojmë maturi dhe shtet”.
Ndërkohë, puna për projektin e nisur në vitin 2010 vazhdon edhe sot. Një rrotë gjigante po ndërtohet ende në një urë për këmbësorë në lumin Vardar në Shkupin qendror. Autoritetet kanë filluar së fundmi ndërtimin e Bankës së re Qendrore, pavarësisht se ky institucion ka tashmë një seli të ndërtuar gjatë viteve 1970.
Pranë tij, autoritetet e udhëhequr nga qeveria e përkohshme e Emil Dimitriev, i cili i takon partisë së Gruevskit po përfundojnë selinë e re të Agjencisë Kombëtare të Pronave të Patundshme. Javën e kaluar, fasada u zbukurua me statuja gjigante bronzi të shenjtorëve.
Më 22 maj, elita e ish-partisë qeverisëse mori pjesë në një hapje gala të Filarmonisë së re maqedonase, e cila kushtoi pothuajse 40 milionë euro dhe është vetëm një nga disa ndërtesat me pamje moderniste që janë pjesë e projektit.
Kryeministri i zgjedhur Zoran Zaev, paralajmëroi se çmontimi i disa monumenteve gjigante dhe heqja e fasadave të reja nga ndërtesat historike do të ishte e kushtueshme dhe kërkoi durim deri në një analizë të plotë përpara veprimit.

Drejtori i shkarkuar i FBI-së, James Comey, planifikon të dëshmojë publikisht në Senatin e Shteteve të Bashkuara, për të konfirmuar, siç thuhet, deklaratat e mëhershme se presidenti Donald Trump i ka kërkuar të mbyllë hetimet mbi ish-këshilltarin e tij për siguri kombëtare. Michael Flynn po hetohet për lidhje të dyshuara me Rusinë.
Mediat amerikane raportojnë se Comey do të dëshmojë përpara Komitetit të Senatit për Inteligjencë javën e ardhshme.
Ky komitet është duke hetuar raportet midis bashkëpunëtorëve të Trumpit dhe Rusisë, gjatë fushatës së zgjedhjeve presidenciale në SHBA, vitin e kaluar. Hetime të ndara po bën edhe FBI.
Vendimi i Trumpit për të shkarkuar Comey-n, muajin e kaluar, shkaktoi trazira politike dhe bëri që Departamenti amerikan i Drejtësisë të emërojë një këshilltar të posaçëm për të mbikëqyrur hetimet e FBI-së në administratën Trump.

Ish-këshilltari i Sigurisë Kombëtare i Presidentit amerikan Donald Trump, Michael Flynn, ka rënë dakord të bashkëpunojë me Komisionin e Zbulimit të Senatit, duke i dorëzuar dokumente që lidhen me hetimin e tij mbi përpjekjet e Rusisë për të patur ndikim tek zgjedhjet presidenciale të vitit të kaluar.
Zoti Flynn më parë pati refuzuar kërkesën për t’u paraqitur para komisionit dhe avokatët e tij patën dhënë si argument se kërkesa ishte shumë e gjerë. Komisioni i Senatit i dorëzoi një kërkesë më specifike zotit Flynn për t’u paraqitur. Ai pritet të dorëzojë disa dokumente personale dhe ato që lidhen me dy biznese të tij deri javën e ardhshme.
Komisioni i Zbulimit i Kongresit është duke kryer një hetim të veçantë për këtë çështje dhe të martën avokati personal i zotit Trump, Michael Cohen, nuk e pranoi një kërkesë për të dhënë informacione, duke thënë se ajo ishte shprehur “me fraza të varfëra, ishte tepër e gjerë dhe se ishte e pamundur për t’iu përgjigjur”. Departamenti amerikan i Drejtësisë ka caktuar ish-drejtorin e FBI-së Robert Mueller, si këshilltar special për të zhvilluar një tjetër hetim, mbi mundësinë e bashkëpunimit të zyrtarëve të fushatës së zotit Trump me Rusinë.
Presidenti Trump i ka mohuar të gjitha këto akuza dhe ai nuk e pranoi vlerësimin e komunitetit amerikan të zbulimit se Presidenti rus Vladimir Putin ka urdhëruar që Rusia të ndikojë në fushatën e zgjedhjeve të nëntorit, me dëshirën për të ndihmuar që ato t’i fitojë zoti Trump.