PS ka vendosur një poster gjigant në qendër të qytetit të Elbasanit me logon dhe slloganin e Partisë Socialiste, duke sfiduar ligjin për partitë. Ligji për partitë ndalon flamujt dhe posterat partiakë për fushatën e 25 Qershorit dhe u miratua në bazë të marrëveshjes mes kryeministrit Rama dhe liderit të opozitës, Basha. Postera gjigantë të PS janë vendosur edhe në rrugët kryesore të qytetit të Elbasanit. Vendosja e posterave ka ngjallur reagime të ashpra jo vetëm nga partitë politike, por edhe nga qytetarët, ndërsa policia nuk guxon të ndërhyjë edhe pse vendosja e posterave të partive politike në qytet dhe rrugë është e ndaluar me ligj.
Por PS nuk është e vetmja që shkel ligjin, duke ekspozuar slloganet dhe simbolet e partisë në qytet. Flamujt e Partisë për Drejtësi, Integrim Unitet të Shpëtim Idrizit valëviten anës një prej rrugëve, prej disa ditësh, por pavarësisht ankesave të partive të tjera, policia nuk guxon të ndërhyjë.
Bëhet e ditur se edhe në disa qytete të tjera janë vendosur postera gjigantë të Partisë Socialiste. Vendosja e posterave të Partisë Socialiste bëhet në ato bashki që drejtohen nga e majta. Ndonëse në kundërshtim me ligjin, drejtuesit e Bashkisë lejojnë vendosjen e posterave të PS, ndërsa policia jo vetëm që nuk ndërhyn, por është vënë në ruajtje të tyre. Për vendosjen e posterave janë përdorur mjetet e Bashkisë, edhe në këtë rast është shkelur ligji.

Makina e Bashkisë e mbushur me flamujt e “Rilindjes”

Administrata qendrore dhe vendore vazhdon të jetë aktive në fushatën e PS. Edhe pse ka një VKM të Qeverisë për mospërdorimin e mjeteve shtetërore dhe burimeve njerëzore në fushatën e partive si dhe janë vendosur 7 ministra teknikë pikërisht për këtë gjë, administrata po përdoret nga Rama për fushatë.
Dje në disa portale u publikua një foto që tregonte kamionçinën e Bashkisë së Kavajës të mbushur plot e përplot me materiale propagandistike të PS-së. Bëhet e ditur se, materialet propagandistike janë shpërndarë nëpër fshatra me makinat e Bashkisë së Kavajës. Ndërkohë punonjësit e Bashkisë kanë vendosur postera me logon dhe slloganin e Partisë Socialiste, në qytet dhe në disa rrugë. Bashkia e Kavajës po bën gati mitingun e PS në shkelje flagrante të ligjit. Më 25 Qershor kavajasit votojnë për deputetëtm por edhe për kryetarin e ri të Bashkisë.
Parlamenti miratoi para disa ditësh një paketë ligjore që ashpërson në Kodin Penal shit-blerjen e votës, vendos rregulla të reja në ligjin e partive për financimin e tyre dhe përcakton me saktësi transmetimin mediatik të fushatës. Përdorimi i mjeteve publike, veprimtarisë shtetërore apo i burimeve financiare ose njerëzore, për zgjedhje, do dënohet vetëm me burgim, nga 1 deri ne 4 vjet. Ashpërsim të dënimeve për të gjitha veprat e tjera penale në fushën e zgjedhjeve, duke i parashikuar të gjitha si krime.
Të gjitha këto masa dhe ndërhyrje, bëhen për të garantuar qytetarët shqiptarë nga presionet dhe shitblerja e votës dhe garë të ndershme për partitë politike në fushatën zgjedhore.

R.POLISI

Vazhdojnë shkarkimet nga ministrat teknikë të Bashës për përfshirjen e administratës në fushatë zgjedhore. Ministria e Shëndetësisë ka vendosur dje të pezullojë drejtoreshën e Qendrës Shëndetësore numër 1 Lushnjë, e cila jo vetëm që ka marrë vetë pjesë në fushatën zgjedhore të PS, por ka detyruar edhe mjekët e infermierët që të dalin në fushatë. Pezullimi është bërë deri në sqarimin e plotë të situatës. Shkarkimi është bërë nga ministrii Shëndetësisë Arben Beqiri pas emisionit investigativ “BOOM”, në RTV “Ora News”.
Në njoftimin për shtyp thuhet se, Ministria e Shëndetësisë, pasi ka ndjekur emisionin investigativ “BOOM”, në RTV “Ora News” që paraqet dëshminë e përdorimit të administratës publike (personelit të Qendrës Shëndetësore numër 1 në Lushnjë) në fushatën zgjedhore, ka vendosur:
1- Pezullimin e drejtoreshës së Qendrës Shëndetësore numër 1, deri në sqarimin e plotë të situatës.
2- Ngritjen e një grupi pune për verifikimin e situatës në terren (përkatësisht në Qendrën Shëndetësore numër 1, Lushnjë).
Po dje ministri i Shëndetësisë, Arben Beqiri, ka thirrur në një mbledhje të gjithë drejtorët e spitaleve rajonale dhe të Tiranës për risjelljen në vëmendje të respektimit të urdhrit të Kryeministrit për mospjesëmarrjen në fushatë elektorale. “Marrë shkas nga kjo ngjarje ministri i Shëndetësisë, z. Arben Beqiri ka thirrur sot në një mbledhje të gjithë drejtorët e spitaleve rajonale dhe të Tiranës për risjelljen në vëmendje të respektimit të urdhrit të Kryeministrit nr. 65, datë 12.05.2017”, thuhet në njoftimin për shtyp të Ministrisë së Shëndetësisë.
Emisioni investigativ “BOOM”, në RTV “Ora News” ka bërë një vëzhgim të pjesëmarrjes së administratës në fushatën zgjedhore. Grupi i xhirimit ishte në Qendrën Shëndetësore nr.1 në Lushnje, ku ditën e premte stafi i këtij institucioni brenda orarit të punës kishte shkuar në një takim elektoral të Partisë Socialiste në qytetin e Fierit, ku ishte i pranishëm edhe kryeministri Rama. Në fakt, jashtë orarit të punës kjo është një gjë mëse e pranueshme dhe normale, por ajo që është shqetësuese është se, drejtoresha ka urdhëruar mjekët dhe infermierët të shkojnë në fushatë brenda orarit të punës.
Orari zyrtar i punës në këtë Qendër Shëndetësore është deri në orën 20:00 të mbrëmjes, por në orën 18:00 aty nuk kishte asnjë punonjës. Ndërkohë, kryeministri Rama ka nxjerrë një urdhër, sipas të cilit ndalohen burimet njerëzore të administratës publike të çdo niveli të marrin pjesë në fushatën zgjedhore të qershorit. Por nga një kërkim i bërë në rrjetet sociale, rezulton se disa prej titullarëve të institucioneve kanë postuar disa nga aktivitetet elektorale, një pjesë e të cilave janë zhvilluar në orarin zyrtar të punës.
Të shtunën, gazeta publikoi një lajm se si punonjësit e Spitalit të Lushnjës dhe punonjësit e shkollave me urdhër nga lart ishin nxjerrë për t’u transportuar drejt Fierit, ku Rama kishte hapjen e fushatës elektorale të PS. Kryetari i degës së PD Lushnjë publikoi në rrjetin social Facebook edhe fotot e autobusëve që transportonin mjekë e infermirë nga Lushnja për të marrë pjesë në mitingun e Ramës.
Parlamenti miratoi para pak ditësh me shumicë të cilësuar votash ndryshime të reja në Kodin Penal, të cilat sanksionojnë për herë të parë masa të rrepta të ndëshkimit për cilëndo që përfshihet në fushatë. Përdorimi i mjeteve publike, veprimtarisë shtetërore apo i burimeve financiare ose njerëzore, për zgjedhje, me ndryshimet e reja në Kodin Penal, dënohet vetëm me burgim, nga 1 deri në 4 vjet. Ashpërsim të dënimeve për të gjitha veprat e tjera penale në fushën e zgjedhjeve, duke i parashikuar të gjitha si krime.

Ministri Beqiri takim me të gjithë drejtorët e spitaleve

Ministri i Shëndetësisë, Arben Beqiri thirri dje në një mbledhje të gjithë drejtorët e spitaleve rajonale dhe të Tiranës për risjelljen në vëmendje të respektimit të urdhrit të Kryeministrit për mospjesëmarrjen në fushatën zgjedhore.
Pas takimeve me drejtuesit e spitaleve, ministri i Shëndetësisë po dje zhvilloi rreth mesditës në Elbasan një mbledhje me të gjithë shefat e “Qendrës Spitalore “-“Dr.Xhaferr Kongoli” ku u ka rikujtuar se duhet të repsektojnë urdhrin e Kryeministrit për mospjesmarrjen në fushatën zgjedhore.
Sipas njoftimit për shtyp, ministri Beqiri “i ka inkurajuar drejtuesit e reparteve të QS të Elbasanit për të punuar sa më shumë në shërbim të nevojave të pacientëve”. Gjithashtu ministri i Shëndetësisë ka kërkuar që të ketë angazhim të jashtëzakonshëm në çdo orë dhe çdo kohë për nevojat e pacientëve.
Ndërkohë, jashtë kamerave ministri Beqiri komentoi edhe pezullimin e drejtoreshës së Qendrës Shëndetësore numër 1 në Lushnje. “Kemi kërkuar ngritjen e një grupi pune për verifikimin e situatës në terren (përkatësisht në Qendrën Shëndetësore numër 1, Lushnje) dhe shumë shpejt gjithçka lidhur me këtë rast do t’i përcillet publikut me transparencë të plotë në faqen zyrtare të Ministrisë së Shëndetësisë”, ka sqaruar Beqiri.

R.POLISI

Prokuroria kërkon ndihmën e autoriteteve gjermane për helmimin kimik në mitingun e çeljes së fushatës së PD. Në Shqipëri nuk ka asnjë laborator, i cili të mund të përcaktojë brenda një kohe të shkurtër shkakun e helmimit të 140 pjesëmarrësve në mitingun hapës të fushatës së Partisë Demokratike. Për këtë arsye, Prokuroria e Tiranës ka kërkuar ndihmën e autoriteteve gjermane.
Burime nga akuza e kryeqytetit thonë se, analizat e personave të helmuar, si dhe të dhëna të tjera të përfituara nga këqyrja e Bulevardit do të dërgohen në një laborator në Gjermani. Laboratori i Mjekësisë Ligjore nuk ka mundësi dhe kapacitet për të kryer veprimet, të cilat do të përcaktojnë saktë shkakun e helmimit të pjesëmarrësve në miting, brenda një kohe të shkurtër.
Janë rreth 32 mijë helme ose substanca kimike, të cilat duhet të kalojnë në sitën e ekspertëve. Laboratori jonë duhet që t’i marrë këto lloj substancash një e nga një, në mënyrë që të përcaktohet shkaktari. Ndërsa në Gjermani me anë të një aparature të veçantë, kjo procedurë kryhet në kohë rekord.
Prokuroria është duke hetuar këtë rast për pengimin e subjekteve zgjedhore për të zhvilluar normalisht aktivitetin e tyre. Paraprakisht u dyshua se helmimi mund të ketë ardhur nga prozhektorët e ndriçimit, por nuk përjashtohet që të ketë qenë një akt i qëllimshëm.
Burime nga organi i akuzës së kryeqytetit kanë bërë me dije, se ndryshe nga sa ishte referuar nga policia për ndotje të mjedisit, ngjarja do të hetohet për akuzën e caktuar nga Prokuroria. Një tjetër pistë që po hetohet është edhe ajo e konkurencës mes kompanive që ofrojnë shërbime për eventet, pas dyshimeve se mund të kemi të bëjmë edhe me një sabotim të kësaj natyre.
Gjithsesi, hetuesit janë në pritje të analizave dhe ekspertimeve te tjera për të vijuar më pas me procedurat hetimore.
Ngjarja ndodhi mbrëmjen e 27 majit. Më shumë se 140 pjesëmarrës në mitingun e opozitës, përfshirë dhe kreun e PD-së, Basha u paraqitën gjatë orëve të mëngjesit të së shtunës (28 maj 2017) në Spitalin e Tiranës me shenja helmimi.
Që të gjithë kishin të njëjtat simptoma si skuqje, kruarje dhe djegie të syve apo dhe irritim në fytyrë dhe në pjesën e qafës. Disa prej tyre, kanë shfaqur edhe vështirësi të lehta në frymëmarrje. Vetëm një numër i vogël është mbajtur për kujdes të mëtejshëm, ndërsa pjesa tjetër ka lënë brenda një kohe të shkurtër spitalin.

Prokuroria e Krimeve të Rënda ka kërkuar që në gjyqin kundër Emiliano Shullazit të thirret si dëshmitarë ish-ministri i Brendshëm, Saimir Tahiri dhe ish-ministrja e Arsimit, Lindita Nikolla, për t’u pyetur lidhur me kërcënimet ndaj Mynyr Konit dhe Dhori Kules.
Në gjyqin ndaj Shullazit do të thirren 38 dëshmitarë dhe në mesin e tyre, përveç ish-ministrit Tahiri dhe ish-ministres Nikolla, Prokuroria ka thurrur edhe drejtorin e Përgjithshëm të  Policisë së Shtetit, Haki Çako, ish-drejtorin e Policisë së kryeqytetit Ervin Hodaj, dy profesorët Dhori Kule e Minir Koni si dhe avokatin e njohur Neshat Fana. Veç këtyre dëshmitarëve, Prokuroria kërkoi që të pyetet dhe ballafaqohet me të pandehurit edhe dëshmitari i mbrojtur i Prokurorisë, biznesmeni Ylvi Beqja. Ky i fundit ka akuzuar direkt të pandehurin Shullazi dhe pjesëtarët e bandës së tij për kërcënime, ku është detyruar të paguaj në formën e gjobës rreth 500 mijë euro.
Në sallën e gjyqit, dy prokurorët Elisabeta Imeraj dhe Ened Nakuçi, veç emrave të dëshmitarëve lexuan edhe kërkesën për gjykim në ngarkim të 5 të pandehurve, të cilët do të gjykohen për 9 vepra të ndryshme penale. Përfaqësuesit e akuzës, renditen kronologjitë e ngjarjeve ku është përfshirë Shullazi me cilësinë e drejtuesit të organizatës kriminale dhe të dyshuarit si pjesëtar të bandës së tij.
Në dosje thuhet se, Emiliano Shullazi dhe banda e tij, kanë vendosur dhe marrë në formën e gjobës shuma të mëdha parash nga 3 biznesmenët. Veç Ylvi Beqjas, të pandehurit i kanë vendosur eksploziv biznesmenëve Adriatik Kërçuku dhe Jani Zaka, në formë presioni për të paguar gjobat e kërkuara. Të pandehurit përveç gjobava, ata kanë kanosur për shkak të detyrës edhe dy profesorët Dhori Kule dhe Mynyr Kone me qëllimin e vetëm që të tërhiqeshin nga gara e zgjedhjeve në Universitete.
Në sallën e gjyqit të pandehurit nuk folën për akuzat, ndërsa avokatët kërkuan kohë të kundërshtojnë provat e Prokurorisë, kërkesë që ju pranua nga Gjykata, duke caktuar datën 6 qershor si ditën e vazhdimit të procesit gjyqësor.

Me kërkesë të Prokurorisë së Vlorës, Gjykata ka vendosur nën sekuestro dy parcela tokë me sipërfaqe totale 52.000 m2 në zonën e Zvërnecit, të dyshuara se janë përfituar në bazë të dokumentacionit të falsifikuar. Prokuroria e Vlorës ka nisur kryesisht hetimin për këtë rast, në bazë të të cilit, deri në këtë fazë ka rezultuar se:
Dosja gjyqësore që i përket vendimit civil nr. 3805, datë 23/12/1996 të Gjykatës së Rrethit Gjyqësor Vlorë, si dhe dosja gjyqësore që i përket vendimit civil nr. 147, datë 24/12/1997 të Gjykatës së Rrethit Gjyqësor Vlorë, janë falsifikuar dhe futur në kundërshtim me ligjin në arkivën e Gjykatës së Rrethit Gjyqësor Vlorë. Ky fakt është provuar nga akti i ekspertimit tekniko-grafik. Rezulton e provuar se përmes vendimit civil nr. 3805, datë 23/12/1996 të Gjykatës së Rrethit Gjyqësor Vlorë, i cili është tërësisht i falsifikuar, është pasqyruar fakti sikur i janë kthyer në natyrë shtetases Shqiponjë Eminaj (Kamberaj) dy parcela të lira, njëra 30.000 m2; dhe parcela e dytë me sipërfaqe 22.000 m2, pronë e cila ndodhet në bregdet në zonën e Zvërnecit, Vlorë.
Rezulton e provuar se edhe vendimi civil nr. 147, datë 24/12/1997 i Gjykatës së Rrethit Gjyqësor Vlorë është tërësisht i falsifikuar, ku përmes së cilit është pasqyruar fakti i rremë, sipas të cilit është lëshuar urdhëri i ekzekutimit për vendimin nr. 3805, datë 23/12/1996 të Gjykatës së Rrethit Gjyqësor Vlorë.
Nga hetimi është provuar se pasuria e mësipërme me sipërfaqe 52.000 m2 është regjistruar më datë 21/03/2013, pranë Zyrës Vendore të Regjistrimit të Pasurive të Paluajtshme Vlorë. Regjistrimi i kësaj pasurie është kryer mbi bazën e dokumenteve të falsifikuara, e konkretisht dy dosjeve të mësipërme gjyqësore. Pas regjistrimit të kësaj pasurie, e cila kap vlerën e mbi 2 milionë euro, janë kryer veprime juridike mbi këtë pasuri, e konkretisht ndarje, shitje dhe dhurime, me qëllim fshehjen e paligjshme të origjinës së kësaj pasurie. Mbi bazën e kërkesës së prokurorit, Gjykata e Rrethit Gjyqësor Vlorë, ka vendosur caktimin e masës së sigurimit pasuror “sekuestro preventive”, për pasuritë e paluajtshme me sipërfaqe 52.000 m2.

Një operacion policor i ngjashëm me një skenar filmash aksion ka ndodhur mesditën e djeshme në Tiranë. Një mjeti “Touareg” i është bërë shenjë nga Policia Rrugore që të ndalojë, pasi ka qenë duke ecur në kundravajtje, por mjeti nuk i është bindur policisë dhe ajo është vënë në ndjekje të tij.
Në ndihmë të policisë kanë ardhur dhe Forcat Operacionale. Për t’i shpëtuar ndjekjes, në zonën e “Zogut të Zi”, “Tuaregu” ka përplasur qëllimisht 3 mjete në lëvizje, duke shkaktuar kaos në trafik. Pas rreth 30 minutash ndjekje, policia ka mundur ta bllokojë mjetin “Tuareg” në zonën e quajtur “kupola” pranë Drejtorisë së Doganës, ku është detyruar të qëllojë dhe në ajër për të neutralizuar drejtuesin e tij.
Drejtuesi i mjetit është vënë në pranga dhe pas kontrollit fizik, atij i është gjetur edhe një armë zjarri, e cila u sekuestrua nga policia. Pas verifikimit, policia ka dyshime se i arrestuari është një person i rrezikshëm, i dyshuar për vepra të rënda kriminale dhe “gjobëvënie”. I arrestuari me origjinë nga Lekbibaj i Tropojës, u shoqërua në Policinë e Tiranës ku po merret në pyetje për të zbardhur plotësisht ngjarjen.

Makina e shefit të Policisë së Burgut të Rrogozhinës, Besnik Kaptelli është djegur gjatë natës së djeshme. Burime nga vendi i ngjarjes bënë të ditur se, makina është djegur pothuajse plotësisht. Dyshimet e para të policisë janë për një zjarrvënie të qëllimshme.
“Makina tip “Volkswagen Golf” në pronësi të Besnik Kaptellit është përfshirë nga flakët rreth mesnatës në lagjen “S.Libohova””, thuhet në njoftim, ndërsa kanë nisur hetimet për zbardhjen e shkaqeve dhe autorët e mundshëm. Shefi i Policisë së Burgut të Rrogozhinë ka mbajtur poste drejtuese në disa institucione të shlyerjes së dënimit.

Një ekonomiste e një firme private ka rënë pre e grabitjes në kryeqytet. Ngjarja sipas policisë është regjistruar rreth orës 12:30 të së hënës në rrugën “Memo Meto”, tek ish-“Restorant Durrësi”.Tre persona të paidentifikuar, i kanë dalë para automjetit tip “Volksvagen”, me drejtues shtetasin T. M 31 vjeç, dhe shtetases A. P 33 vjeçe, ekonomiste në një firmë private, të cilës i kanë marrë me dhunë shumën monetare prej 1.000.000 lekë. Policia bëri të ditur se po punon për identifikimin dhe kapjen e autorëve.
Po ashtu, një 56-vjeçar ka rënë pre e grabitjes me armë në orët e mbrëmjes së të hënës. Ngjarja ka ndodhur rreth orës 23:30 në Unazë të Re, në rrugën “Loni Ligori”, ku dy persona të maskuar, të cilët dyshohet të kenë patur me vete një armë zjarri, i kanë vjedhur me dhunë 7.000 lekë dhe një orë dore të markës “Omega” shtetasit I. H, 56 vjeç. Vjedhja ka ndodhur ndërsa 56-vjeçari po qëndronte jashtë automjetit të tij tip “Skoda”. Materialet iu referuan Prokurorisë për hetime të mëtejshme.

Një 20-vjeçar në fshatin Kurdari të Klosit është gjetur i vrarë me armë zjarri. Viktima, Julian Çeliku, është gjetur i pajetë nga familjarët e tij në njërën nga dhomat e banesës ku jetonin. “Rreth orës 13:40, jemi njoftuar nga Specialisti i Zonës i Stacionit të Policisë Klos se në fshatin Kurdari-Klos, dyshohet se është vetvrarë me armë gjahu një shtetas. Menjëherë kanë shkuar shërbimet e policisë në vendin e ngjarjes, ku kanë konstatuar se në njërën nga dhomat e banesës dyshohet se është vetvrarë me armë gjahu teke shtetasi Julian Çeliku, rreth 20 vjeç, banues në fshatin Kurdari-Klos”, informon policia.
Policia bëri të ditur se, arma e gjahut me të cilën dyshohet të jetë vetëvrarë i riu është me leje në emër të babait të tij. Nga veprimet e para të kryera në vendngjarje nga grupi hetimor dyshohet se, vetvrasja ka ndodhur si pasojë e depresionit. Problemet e viktimës me depresionin i kanë pohuar edhe familjarët. Grupi hetimor në vendngjarje po vijon veprimet për përcaktimin e plotë të rrethanave të ngjarjes.
Ndërkohë, një 53-vjeçar nga Fieri ka humbur jetën në spital, pasi u vetëplagos me çifte. Ngjarja ka ndodhur sot rreth orës 16:00, në lagjen “Sheq i Madh”. Sipas policisë është vetplagosur me çifte në banesë shtetasi F.M, 53 vjeç, i cili më pas ndërroi jetë në Spitalin Rajonal Fier në sallën e operacionit. Grupi hetimor po kryen veprimet për zbardhjen e kësaj ngjarje.