Zhoze Murinjo ka qenë një mes “VIP”-ve të pranishëm në Çmimin e Madh të Monte Carlos, gara e djeshme për Formula 1, e cila pa Ferrarin të fitonte, madje të vinte të dyja makinat në dy shkallët e para të podiumit.
Trajneri i Mançester Junajtid, i freskët nga fitorja e Ligës së Europës, nuk ka mundur që t’u shmanget gazetarëve italianë të pranishëm, të cilët kanë dashur që t’i marrin një opionin në lidhje me finalen e madhe kontinentale, Ligën e Kampioneve.
“Juventus-Real Madrid? Do të jetë një finale e bukur, e gjitha për t’u shijuar mes dy ekipeve që kanë qenë më të fortat të turneut. Juventusi kërkon tripletën si Interi im? Do të ishte bukur, sepse të fitosh gjithçka në një sezon është diçka që nuk ndodh gjithmonë.
Pavarësisht se kanë qenë rivalë, unë ia uroj që ta përjetojnë atë emocion. Dhe më pas i pres në Superkupën e Europës për t’u përballur së bashku”, u shpreh portugezi.

Gonzalo Higuain ka bindjen se Juventusi do të arrijë të fitojë Ligën e Kampioneve, që i ka munguar prej vitesh klubit, por edhe atij personalisht, pasi argjentinasi nuk ka mundur ta bëjë të tijën me fanellën e Realit e aq më pak me atë të Napolit.
“Kjo është ndeshja më e bukur që mund të luajë një futbollist”, tha Higuain sot para gazetarëve. “Po stërvitemi në mënyrën e duhur, pasi duam ta mbyllim këtë sezon, duke fituar Ligën e Kampioneve, që do të ishte diçka e jashtëzakonshme. Pres një ndeshje shumë të komplikuar, sepse ata janë mësuar të luajnë sfida të tilla”.
Argjentinasi ka qenë për disa vite pjesë e madrilenëve, por tani ëndërron që t’i mundë ata. “Unë kam qenë për 7 vite atje dhe e di mirë se si luajnë, por shpresoj që të arrijmë të sjellim në shtëpi këtë trofe që Juventusi po e ndjek prej shumë vitesh. Alegri ka thënë që është momenti ta fitojmë Ligën e Kampioneve dhe jam dakord, pa dyshim që ka ardhur momenti i duhur.
Prej 10 muajsh po punojmë për këtë objektiv, shpresojmë që të gjitha këto sakrifica të shpërblehen me një fitore. Do të jepja gjithçka për një gol në finale. Deri tani kemi fituar dy tituj, por shpresojmë të sigurojmë pas pak ditësh edhe një tjetër shumë të bukur”, theksoi Higuain.

Xhanluixhi Bufon ëndërron që të ngrejë të vetmin trofe që i mungon karrierës së tij, të shtunën e ardhshme, në Kardif. Portieri i Juventusit është një legjendë, por Champions-i do të plotësonte palmaresin e tij, përveçse do ta shenjtëronte si një prej kampionëve dhe fituesve më të mëdhenj që ka parë historia e futbollit.
“Më ka shpëtuar dy herë ky trofe nga duart, shpresoj që këtë herë të jetë i imi”. Në një intervistë për “Daily Star”, numri 1 i bardhezinjve tregon disa nga emocionet e kësaj pragsfide dhe karrierës së tij. “Gjëja që më transmeton më shumë sodisfaksion dhe emocion, duke bërë rolin e portierit është ajo ndjesia e të transmetuarit qetësi te skuadra. Ata e dinë se në fund, edhe pas tyre ka gjithmonë një tjetër që do të mbrojë edhe goditjen e fundit dhe kjo është diçka që u jep forcë të gjithë shokëve të mi. Ne jemi një skuadër shumë e qetë sivjet dhe me një mentalitet të fortë. E dimë tashmë, se cilat do të jenë vështirësitë me të cilat do të përballemi. Instinkti im në fushë? Shpeshherë bëj atë që ndiej për momentin, sepse jo të gjitha ndeshjet të japin të njëjtën adrenalinë dhe të përfshijnë”, u shpreh Bufon.
Në lidhje me aventurën e tij në këtë sport, 39-vjeçari është i lumtur. “Jam me fat që kam pasur një karrierë kaq të gjatë. Kam pasur për detyrë që të marr shumë vendime dhe të gjitha i kam marrë, duke u bazuar te gjendja ime emocionale dhe mënyra e të jetuarit. Prandaj, rikthimi në një finale të Champions-it së bashku me skuadrën dhe tifozët, është diçka vërtet fantastike dhe këtë herë dua të fitoj. Nuk më mjafton më të marr pjesë”.
Fakti se Reali i Madridit ka humbur vetëm dy finale të Champions-it, ndërsa Juventusi gjashtë, kjo nuk e frikëson Bufonin. “Një avantazh fakti i të mos qenit favorit? Nuk e di… Ndoshta të jep më shumë sodisfaksion fitorja, duke u etiketuar si i tillë, por edhe të qenit favorit të bën të ndihesh mirë.
Me pak fjalë, nuk kam preferenca në lidhje me këtë aspekt. Çfarë fjalësh do t’u them shokëve të ekipit përpara se të zbresim në fushë? Të shohim, tashmë jam një ekspert i të tilla monologëve (qesh)… Fakt është që të gjithë sivjet kemi vetëbesimin e duhur, njohim forcën dhe limitet tona, prandaj do t’i përdorim të gjitha këto për të fituar”, përfundoi Bufon.

Diego Costa do ta linte Chelsea-in vetëm për Atleticon e Madridit. Në  muajt e fundit është folur shumë për një kalim të mundshëm të sulmuesit brazilian që luan për përfaqësuesen spanjolle në kampionatin kinez, por vetë bomberi 28-vjeçar i ka mbyllur duart një transferimi në Lindjen e Largët në këtë fazë të karrierës. Diego Costa, i cili mbajti peshën e sulmi te Chelsea i Antonio Contes në këtë sezon, duke ndihmuar Blutë e Londrës të fitonin titullin në Angli me golat e tij, në një intervistë ka deklaruar se ai do të largohej nga ishulli vetëm nëse Atletico e Madridit do të kërkojë ta rikthejë në Primera Division.
“Është vetëm një skuadër që mund të largojë nga këtu, është vetëm një deklaroi fillimisht Diego Costa në një intervistë për mediat. Kam dhe dy vite kontratë me Chelsea-in dhe ndihem shumë mirë te ky klub, por për nëse Atletico do të interesohej për mua, do të isha i gatshëm ta largohesha për t’u rikthyer te Los Colchoneros, shtoi 28-vjeçari.  E gjithë bota e di që Atletico e Madridit është skuadra e zemrës për mua nënvizoi në përfundim Diego Costa. Nuk do të ishte aspak çudi, nëse këtë verë do të ishte pikërisht sulmuesi i përfaqësueses spanjolle goditja e madhe e Los Colchoneros në merkato.

Shkëlzen Gashi sërish përcaktues në Major League Soccer. Për meritë edhe të futbollistit shqiptar Colorado Rapids  mori një tjetër fitore të rëndësishme. Këtë herë, Gashi nuk arriti të realizonte një dygolësh siç ndodhi në derbin shqiptar ndaj  San Jose-së së Jahmir Hykës, por dha asistin e golit të fitores 1-0 për Coloradon në sfidën ndaj Sporting Kansas City-it. Gashi, i cili këtë sezon aktivizohet në rolin e mesfushorit të krahut të djathtë e ka disi më të vështirë të shkojë rregullisht te goli, megjithatë kuqeziu është padiskutim frymëzuesi i çdo aksioni sulmues të skuadrës së trajnerit Pablo Mastroeni. Në minutën e 11-të, Gashi me një harkim perfekt nga një goditje standarde gjeti të lirë në zonë, Ford, i cili me kokë realizoi golin e suksesit për Colardon që me fitoren ndaj Kansas City-it u ngjit në kuotën e 10 pikëve, por për momentin, Rapids pozicionohen ende në vendin e fundit të Konferencës së Perëndimit. Nuk mundi të evitonte dot humbjen e skuadrës së tij Jahmir Hyka. Shtatshkurtri shqiptar luajti titullar në sfidën mes San Jose Earthquakes dhe Los Angeles Galaxy. Në derbin kalifornian ishin miqtë ata që triumfuan me shifrat 2-4, me Hykën që nuk arriti të linte shenjë në këtë sfidë.

Te Milani mëngjesin e të shtunës u zgjuan me çështjen Donnarumma pas deklaratave të menaxherit Mino Raiola, por për të ulur disi tonet dhe për të qetësuar tifozët kuqezinj ka menduar trajneri Vincenzo Montella që disa orë më pas, në konferencën për shtyp përpara ndeshjes ndaj Cagliarit i ka siguruar të gjithë se, portieri i talentuar do të vazhdojë të jetë pjesë e Milanit. Në krahun tjetër Mino Raiola menaxheri i lojtarit ka nënvizuar se me parametër zero ai nuk largon askënd, duke shtuar gjithashtu se kurrë nuk ka thënë që Donarumma nuk dëshiron të rinvojë me Milanin, rinovim që sipas trajnerit Montella do të vijë.
“Gigio është një pasuri për klubin dhe mbi të gjitha një pasuri dhe një siguri për skuadrën. Donarumma është një lojtar i pashitshëm për ne. Shpresoj që djaloshi të rinovojë sa më shpejt në mënyrë që të shkojë i qetë me pushime”.
Për të ardhmen e tij, Montella nuk ka dyshime, pasi ka marrë konfirmimin nga drejtuesit që do të jetë ai trajneri i Milanit edhe sezonin e ardhshëm. Me vendin e 6-të matematikisht të arritur, trajneri italian i bëri edhe një bilanc sezonit të kuqezinjve.
“A kisha frikë se nuk do ta arrinim dot kualifikimin në kompeticionet europiane? Jo aspak, madje përpara disa javësh kisha bindjen se do ta përfundonim sezonin në vendin e 4-t. Mendoj se kemi zhvilluar një sezon pozitiv. Kemi patur një grup të bashkuar dhe futbollistë që kanë dhënë shpirtin në fushë.

Manchester City gjen pasuesin e Claudio Bravo. Në fillim, Citizens kishin vendosur në qendër të vëmendjes portierin e Milanit, Gianluiggi Donnarumma, por tashmë kuqezinjtë mund të rrinë të qetë, pasi skuadra angleze ka arritur të transferojë gardianin e portës së Benficës, Ederson. 23-vjeçari ka mbërritur në Angli dhe pritet të zhvillojë vizitat mjeksore e më pas do të bëhet dhe zyrtarizimi nga ku do të merren vesh detaje nga kontrata e tij.
Në arkat e klubit portugez do të shkojnë 50 milionë euro, një shifër rekord kjo për brazilianin, që e përfshin atë në listën e portierëve më të paguar. Pasi arritën të transferonin Bernardo Silva nga Monaco, kjo është goditja e dytë  në merkato për Man.City edhe pse dritarja e transferimeve ende nuk është hapur. Pep Guardiola kërkon ta mbyllë sa më shpejtë çështjen e përforcimit të skuadrës në mënyrë që të nisë fazën përgatitore me të gjithë organikën në dispozicion.
Transferimi i Ederson konsiderohej mëse i domosdoshëm, pasi Claudio Bravo nuk i ka përmbushur pritshmëritë e teknikut katalanas, kjo për shkak të gabimeve të shumta nga ana e kilianit dhe me Joe Hart që pritet të vazhdojë aventurën e tij tek Torino. Edhe pse rreziku i Man.City për të rrëmbyer Donnarummën ka kaluar, Milani vazhdon të qëndrojë në gjendje ankthi, pasi ekipi tjetër i Manchesterit, United pritet t’i largohet gjatë verës gardiani i tyre, David De Gea dhe emri që ofron më tepër garanci për “Djajtë e Kuq” është ai i portierit të kuqezinjve.