UEFA shpërndan rreth 333 mijë euro për klubet shqiptare. Përfitimet janë pjesë e fondit të solidaritetit me vlerë 150 milionë euro që Konfederata Europiane i ka shpërndarë klubeve të 54 vendeve pjesëmarrëse në kualifikueset e Kampionatit Europian “Francë 2016” dhe në fazën finale të turneut. Partizani është skuadra që arkëton më tepër, rreth 129 mijë euro. Të ardhurat janë përfituar nga grumbullimet e portierit Alban Hoxha me kombëtaren. Skënderbeu pozicionohet e dyta përsa i takon të ardhurave me afro 120 mijë euro, të përfituara nga prezenca në skuadrën kuqezi e portierit Orges Shehi.
Shifra e përfituar nga Partizani dhe Skënderbeu përbën pjesën më të madhe të përfitimeve, sepse dy portierët përveçse kanë qenë pjesë e ekipit të De Biasit në kualifikuese ishin edhe të vetmit lojtarë të kampionatit shqiptar, që morën pjesë edhe në finalet e Euro 2016. Tirana përfitoi diçka më tepër se 46 mijë euro nga UEFA, prej grumbullimeve të ish-kapitenit Ervin Bulku, ish-mbrojtësit Debatik Curri, ish-portierit Stivi Frashëri dhe kapitenit aktual Erando Karabeci.
Skuadra e katërt shqiptare që siguroi fonde nga Kampionati Europian është Flamurtari. Vlonjatët përfituan rreth 38 mijë euro nga ish-sulmuesi Nikoloz Gelashvili, që gjatë aktivizimit me kuqezinjtë ishte i angazhuar me përfaqësuesen e Gjeorgjisë në kualifikuese. Në total UEFA shpërndau 150 milionë euro, me shifrën që u rrit me 50 milionë euro në krahasim me Euro 2012. 100 milionë euro u përfituan nga klubet që kishin lojtarë në fazën finale të turneut, ndërsa 50 milionë euro mes skuadrave, lojtarët e të cilëve ishin grumbulluar gjatë kualifikueseve. Nga programi i pagesave të solidaritetit përfituan një numër rekord prej 641 klubesh europiane.
Klubet angleze janë ato që kanë përfituar më tepër, duke ndarë plot 38,3 milionë euro të ardhura nga UEFA. Në vendin e dytë pozicionohet Gjermania me rreth 18,5 milionë euro, e ndjekur nga Italia me afro 16 milionë. Vetëm në vendin e katërt Spanja me 10,4 milionë euro përfitime për klubet, që ndiqet nga Franca me 7,2 milionë euro.
UEFA jep 333 mijë euro për 4 klube shqiptare
Hysaj mes Realit dhe Barcelonës
Elseid Hysaj shuan 23 qirinj. Mbrojtësi shqiptar festoi për herë të dytë ditëlindjen te Napoli, me një dedikim special të klubit të Serisë A në faqet zyrtare në rrjetet sociale. Urimet për lojtarin që është një titullar i padiskutueshëm i kombëtares së drejtuar nga Gianni de Biasi dhe absolutisht një prej yjeve kuqezi, nuk munguan as nga Federata shqiptare e Futbollit.
23-vjetori i Hysaj ishte një ditë speciale, jo vetëm për festën, por edhe për momentin që po përjeton djaloshi i lindur në Shkodër. Protagonist i padiskutueshëm në dy sezonet e fundit të Napoli dhe një prej elementëve më të rëndësishëm të trajnerit Sarri, ai është konfirmuar si një lojtar i nivelit botëror dhe interesimi nga klubet më të mëdha europiane nuk mungon. Pas Chelsea-t dhe Arsenal-it në Premier League, që cilësohen si skuadrat angleze më të favorizuara, në garën për Elseid Hysajn janë edhe dy gjigantët e La Liga-s spanjolle.
Vetëm pak orë më parë Barcelona riktheu interesin për lojtarin shqiptar, sepse prej largimit të Dani Alves klubi katalan po vuan që të gjejë garanci në krahun e djathtë të mbrojtjes. Kuqeziu ka nxitur edhe një duel me rivalët e përjetshëm të “blaugranave”, pasi Hysaj figuron edhe në listën e dëshirave të Realit të Madridit.
Megjithatë, për momentin mbrojtësi është i përqendruar te Napoli, edhe sepse pak muaj më parë rinovoi me italianët deri në vitin 2021, ndërsa gjatë verës klubet e interesuara duhet të paguajnë klauzolën me vlerë 50 milionë euro për prishjen e kontratës.
Kongresi Amerikan kërkon shkarkimin e ambasadorit të SHBA në Shkup
Gjashtë kongresistë republikanë tashmë kanë nënshkruar një letër, të cilën ia kanë dërguar Sekretarit amerikan të Shtetit, Rex Tillerson, duke i kërkuar shkarkimin e ambasadorit të SHBA-së në Shkup, për shkak të bashkëpunimit me Fondacionin e George Sorosit. Kongresisti udhëheqës republikan amerikan, Kristofer Smit (Christopher Smith), paralajmëroi hetim për politizimin e rolit të Ambasadës amerikane në Maqedoni dhe i bëri thirrje Sekretarit të sapoemëruar të shtetit, Reks Tilerson, që ta shkarkojë ambasadorin Xhes Bejli, njofton MIA. Në krye të grupit nga gjashtë kongresistë republikanë, Smit që nga mesi i janarit ka kërkuar shpjegim nga ambasadori Bejli për akuzat se Ambasada në Shkup punon në dobi të partive politike dhe financon projekte të Fondacionit të Xhorxh Sorosit në Maqedoni. Pasi Bejli nuk i është përgjigjur letrës së kongresistëve, Smit, i cili është anëtar i Komisionit kongresist për punë të jashtme dhe kryeson me Komitetin e Helsinkut për bashkëpunim me OSBE-në, deklaroi se nevojitet hetim i thellë i aktiviteteve të Ambasadës amerikane në Maqedoni dhe shkarkim të ambasadorit.
“Ambasadori amerikan nuk guxon të ketë rol në formimin e qeverisë dhe të marrë anë gjatë formimit të koalicionit. Ai nuk është vend i SHBA-së as i përfaqësuesve amerikanë në Shkup. Ne, si grup i kongresmenëve, parashtruam pyetje konkrete në këtë letër se, nëse ka pasur ose jo bashkëpunim ambasada me partitë majtiste në zgjedhje. Ne nuk guxojmë të kemi rol në këtë. Duhet të jemi për zgjedhje të lira dhe korrekte dhe qasje ndaj mediave, por në asnjë mënyrë nuk guxojmë të mbajmë anë. Ky ambasador ka mbajtur anë dhe duhet të shkarkohet menjëherë. Unë jam në Kongres 37 vite dhe jam anëtari më i vjetër i Komisionit për bashkëpunim me OSBE-në dhe me Komisionin për të drejtat e njeriut. Nuk ka ndodhur që ambasadori ynë në Shkup të mbajë anë në këto zgjedhje ose në cilado qoftë zgjedhje të tjera në të kaluarën ose në të ardhmen. Kjo nuk është punë e tij. Dëshirojmë të zbulojmë gjithçka dhe për këtë arsye kërkojmë nga inspektori i përgjithshëm të dorëzojë raport. Në qoftë se e kanë shkelur ligjin, do të përgjigjen”, deklaroi kongresmeni Smit për Radio Televizionin e Maqedonisë. Smit posaçërisht reagoi ndaj informatave se Ambasada amerikane është financier serioz i aktiviteteve të organizatave joqeveritare të lidhura me fondacionin e Sorosit dhe thotë se në qoftë se SHBA-ja ndan financa për aktivitete të këtilla, kjo duhet të bëhet në mënyrë neutrale dhe pa mbajtur anë politike. Letrën të cilën kongresmenët e kanë dërguar deri te ambasadori Bejli më 17 janar, krahas Smitit, është nënshkruar nga kongresmeni i njohur nga Teksasi Lui Gomert, Robert Aderholt, i cili është mbështetës afatgjatë i Maqedonisë në Kongres, Rendi Haltgrin, Robert Pintenger dhe Xhed Fortenberi. Të gjithë nënshkruesit janë republikanë të afërt me administratën e presidentit Donald Tramp dhe në letër parashtrohen një sërë pyetjesh për aktivitetet e Ambasadës në Shkup, për mbështetjen e saj ndaj partisë LSD, dhe për financimin e aktiviteteve të Sorosit. Letra e kongresmenëve vjen pasi senatori Majk Li, gjithashtu nga Partia Republikane në pushtet, publikisht i bëri thirrje ambasadorit Bejli përmes rrjeteve sociale, që të japë shpjegim për financimin e projekteve të fondacionit të Xhorxh Soros në Maqedoni. “E vlerësojmë shumë bashkëpunimin midis SHBA-së dhe Maqedonisë në 25 vitet e fundit nga pavarësia e saj. Ky bashkëpunim mundësoi që SHBA-ja të kontribuojë ndaj zhvillimit politik dhe ekonomik të Maqedonisë, derisa Maqedonia ka bashkëpunuar me SHBA-në dhe ka kontribuuar ndaj prioriteteve tona të jashtme politike. Konsiderojmë se do të ishte me të vërtetë konstruktive për marrëdhëniet tona të ndërsjella, nëse në Maqedoni zhvillohet ndjenja se SHBA-ja përzihet në çështjet e saja të brendshme politike, në mediat dhe shoqërinë civile, në mënyrën në të cilën një opsion politik ndihmohet kundrejt tjetrës. Shpresojmë se do të marrim informacione të sakta nga ju më së voni dy javë pas dërgimit të kësaj letre. Gjithashtu shpresojmë se do të jeni në dispozicion të takoheni me ne gjatë vizitës tuaj të ardhshme në Uashington”, shkruan në letrën e kongresistëve deri te ambasadori Bejli.
Pasi që kongresistët nuk morën përgjigje, ata paralajmëruan fillim të hetimit dhe bëjnë thirrje në shkarkimin e ambasadorit Bejli. “Porosia jonë është se, nëse qeveria amerikane ka marrë një anë politike, ajo ka bërë gabim të madh dhe ata të cilët e kanë bërë këtë duhet të kërkojnë falje dhe të ndalojnë menjëherë”, thotë Smith në deklaratën për RTVM. Në letrën e dërguar deri te ambasadori Bejli, thuhet se deri te Kongresi kanë arritur paralajmërime serioze për partizim të punës së Ambasadës amerikane në Shkup. Në pyetjet e drejtpërdrejta të drejtuara deri te ambasadori Bejli, kongresistët e pyesin për përzierjen e ambasadës në ngjarjet politike në Maqedoni.
Kongresistët e pyesin ambasadorin Bejli, nëse është e vërtetë se ambasada amerikane e ka zgjedhur Fondacionin “Shoqëri e hapur Maqedoni”, më mirë të njohur si Fondacioni i Xhorxh Soros, të zbatojë projekte të mëdha të financuara nga ana e organizatës amerikane për zhvillim USAID. Në lidhje me mbështetjen amerikane për mediat në Maqedoni, shtrohet pyetja nëse paratë shtetërore amerikane i janë dhënë Fondacionit të Soros-it që përmes tij të financohen mediat e orientuara majtiste. Kongresistët kërkojnë nga Bejli t’i informojë sa nga mediat që i ka financuar Ambasada ose misioni i USAID-it janë majtiste, e sa djathtiste të orientuara dhe pyesin edhe nëse ambasada amerikane ka ndikuar që të miratohen ligje me të cilat është kufizuar bashkëpunimi i shprehjes së mediave dhe gazetarëve, që ndodhi në periudhën parazgjedhore.
Në mënyrë shtesë, sa i përket financimit të organizatave joqeveritare, kongresistët pyesin “Sa nga organizatat joqeveritare, të cilat marrin mjete amerikane, duke përfshirë edhe përmes FHSHC, janë përcaktuar politikisht gjatë zgjedhjeve ose gjatë formimit të qeverisë së ardhshme të Maqedonisë? Dhe cilën anë e kanë zgjedhur këto organizata?”./MIA/
Shkatërrimi i RTSH, Gëllçi largon në mënyrë arbitrare 3 kompozitorët e shquar
Drejtori i Përgjithshëm i Radio Televizionit Shqiptar, Thoma Gëllci ka shkarkuar në mënyrë të paprecedent tre nga figurat më të shquara të artit shqiptar, tre kompozitorët e shquar Shpëtim Saraçi, Edmond Zhulali dhe Alfred Kaçinari. Kreu i Departamentit të Kulturës në PD, Arben Skënderi, përmes një deklarate për shtyp dënoi dje aktin arbitrar të drejtorit të Ramës, ndërsa tha se shkarkimi i tri figurave të shquara të RTSH është në kundërshtim flagrant me ligjin.
“Në valën e shkatërrimit të Radio Televizionit Shqiptar, tre kompozitorët e shquar Shpëtim Saraçi, Edmond Zhulali dhe Alfred Kaçinari, të cilët kanë bërë histori në krijimtarinë tonë, pa asnjë lajmërim, në kundërshtim të hapur me ligjin, si dhe në shkelje flagrante të integritetit të tyre profesional, pushohen nga puna pa asnjë mundësi reagimi apo alternativë për të vazhduar kontributin e tyre artistik. Drejtori i Përgjithshem i Radio Televizionit Shqiptar, Gëllci, shkatërron kështu gjithçka që është ndërtuar me aq mund, duke shkrirë totalisht redaksinë e muzikës, e vetmja strukturë tejet e nevojshme për institucionin që mund të përballonte denjësisht kërkesat e produksioneve, si dhe e vetmja strukturë artistike që ende vazhdonte të mbikëqyrte kualitetin e krijimtarisë”, u shpreh Skënderi.
Duke denoncuar këtë akt arbitrar, Skënderi u bëri thirrje qytetarëve se kjo është një arsye më shumë për t’iu bashkuar protestës së 18 shkurtit. “Denoncojmë fort veprimet e kësaj natyre, të cilat pa asnjë konsultim, dëmtojnë rëndë punën e institucionit, si dhe dinjitetin e tri kompozitorëve të shquar, të cilët janë pjesë e historisë së këtij institucioni kombëtar e publik. Kjo është një padrejtësi me të cilën komuniteti i artistëve dhe opinioni publik nuk mund të pajtohen. Kjo është një arsye më shumë për të rezistuar përballë klikës që ka zaptuar çdo pushtet dhe një motiv për këdo që mbron vlerat, të bashkohet me protestën e madhe të 18 shkurtit”, u shpreh kreu i Departamentit të Kulturës në PD.
Investimi 1-miliardësh, aventurë korruptive
Partia Demokratike e cilësoi projektin e qeverisë për të kontraktuar 1 miliard euro investime publike nga privatët një skemë të madhe korrupsioni. Një skemë, “ku qeveria do të zgjedhë të preferuarit e vet ashtu siç ka zgjedhur deri dje 14-15 kompani, që u ka dhënë çdo tender dhe çdo koncesion, dhe do të vendosë që t’u japë para taksapaguesve shqiptarë, të cilat do t’i angazhojë dhe do të na i lërë barrë edhe neve nesër që do të jemi në qeveri”, deklaron deputetja Jorida Tabaku. Tabaku tha se përmes këtyre koncesioneve qeveria synon të mbulojë dështimin me investimet publike dhe politikën e saj fiskale. “Qeveria në fakt, këto katër vite ka pasur një bilanc shumë negativ përsa i përket investimeve publike. Të gjitha këto që po premton, e gjithë lista e projekteve që ka premtuar që do të jepen me koncesion, si shkolla, rrugë, etj., janë të gjitha të supozuara që do të ishin ndërtuar këto katër vite. Ndërkohë, kjo nuk ka ndodhur dhe paratë janë shpenzuar për diçka tjetër”, nënvizon Tabaku. Por sipas Tabakut, kjo është një aventurë e rrezikshme për financat e shtetit. “Ky është një borxh i fshehur që presupozon që të gjithë bllokun e investimeve për 15 vitet e ardhshme qeveria do ta bllokojë me këto investime që po jep me koncesion”, shton Tabaku. Qeveria ka lajmëruar se në tre vitet e ardhshme do të kontraktojë 1 miliard euro investime publike nga biznesi privat, të cilat do të shlyhen me këste nga buxheti për 15 vjet.
Sërish në protestë, naftëtarët e Fierit tek Prefektura: Të sqarohet pse nuk paguhemi!
Dhjetëra punonjës të uzinës së përpunimit të naftës në Fier kanë protestuar para Prefekturës së Qarkut, duke kërkuar ndërhyrje nga qeveria për të zgjidhur problemin e pagave të prapambetura. Naftëtarët thonë se nuk u janë paguar prej me shumë se një vit, as kontributet shoqërore. Punonjës të Uzinës së Përpunimit të Naftës në Fier i zhvendosën protestat për mosmarrjen e pagave të prapambetura dhe mospagesën e kontributeve shoqërore, para Prefekturës. Naftëtarët thonë se rinisën protestat, pasi mbaroi pa asgjë konkrete afati 10-ditor i lënë nga drejtues të kompanisë për pagat e prapambetura dhe sigurimet shoqërore. Naftëtarët e Fierit, kanë bërë disa protesta prej fillimit të vitit, me pretendimin se nuk janë paguar nga kompania që ka marrë në dorë uzinën, pas falimentimit të ARMO-s.
Kosova me prefiksin +383, operatorët kursejnë miliona euro
Nga 2 shkurti nis zbatimi i kodit të ri telefonik për Republikën e Kosovës. Prefiksi i ri +383 është prezantuar sot në një konferencë për mediat nga Drejtori i Telekomit, Agron Mustafa. “Ne sot kemi marrë vendimin për të lëshuar kodin shtetëror, i cili do të përdoret në shërbimet fikse dhe mobile. Prej sot krijohet mundësia që hap pas hapi t’i zëvendësojmë. Të gjitha thirrjet telefonike mund të realizohen me +383”, u shpreh Mustafa.
Sipas tij, implementimi i kodit do të shuajë nga tregu të gjithë operatorët ilegalë. Deri në fund të vitit, kodi me të cilin ka funksionuar aktualisht Kosova, +381, nuk do të funksionojë më. Ndërsa kostot që do të kursejë Telekomi i Kosovës dhe operatorët e tjerë janë të konsiderueshme. Sipas Mustafës, Telekomi i Kosovës ka paguar atë të Monakos 194 milionë euro deri në vitin 2016, për shfrytëzimin e prefiksit +377. Gjatë konferencës është bërë edhe telefonata e parë me kodin e ri, ndërsa u është bërë apel edhe diasporës të shfrytëzojnë sa më parë prefiksin +383.
Çmimet e prodhimit në Eurozonë rriten sipër pritshmërive
Çmimet e prodhimit në Eurozonë u rritën sipër pritshmërive në muajin dhjetor kryesisht prej energjisë më të shtrenjtë, megjithatë, duke e përjashtuar këtë komponent të luhatshëm, rritja ishte modeste. Zyra e Statistikave e Bashkimit Europian, Eurostat, tregoi se çmimet prodhimit u rritën me 0.7% në dhjetor, nga muaji i kaluar, dhe me 1.6% me bazë vjetore. Të dhënat vjetore për dhjetorin treguan normën më të lartë në 4 vite. Projeksionet qëndronin për një rritje me 0.4 dhe 1.3% në mënyrë respektive. Nxitësi kryesor për rritjen ishin çmimet e energjisë, që u rritën me 2.1% me bazë mujore dhe 3.9% nga dhjetori 2015. Pa komponentin e energjisë, çmimet u rritën me 0.3% nga muaji nëntor dhe me 0.9% nga viti i kaluar. Çmimet më të larta të energjisë kanë rritur edhe çmimet e konsumit në Eurozonë në muajin janar, ku Eurostat deklaroi se inflacioni arriti 1.8% për muajin janar. Banka Qendrore Europiane, që ka injektuar sasi gjigante të parasë në ekonomi për të nxitur inflacionin, ka bërë të ditur se nuk do të ndalojë programin e blerjes në treg të hapur deri sa inflacioni bazë të fillojë rritjen e qëndrueshme. Ndërsa treguesi që përfshin çmimet e energjisë arriti 1.8% për janarin, inflacioni bazë u rrit me vetëm 0.9%.
Nis revolta popullore në Rumani, populli del në shesh
Më shumë se 200 mijë persona kanë dalë përsëri dje në mbrëmje në Bukuresht, si dhe në qytete të tjerë të Rumanisë, për të protestuar kundër qeverisë së Sorin Grindeanu, i akuzuar se është duke miratuar masa që zbusin luftën kundër korrupsionit të përhapur në vend. Vetëm në kryeqytetin e Rumanisë, Bukuresht, kanë zbritur në shesh më shumë se njëqind mijë vetë dhe vëzhguesit flasin për manifestime popullore, më masive se ato të dhjetorit 1989, që sollën regjimin komunist të Nikolae Çausheskut. Në Bukuresht, sipas mediave vendase, janë regjistruar përplasje sporadike mes demonstruesve dhe policisë, me një bilanc prej të paktën pesë të plagosurve dhe gjashtëdhjetë arrestimeve.
Politikanët e korruptuar, “festë” për veten e tyre
Udhëheqësit e rinj të Rumanisë kanë gjetur një mënyrë për të zgjidhur problemin e mbipopullimit të burgjeve, shkruante Horia Blidaru në “Adevarul”. Të ndërtojnë më shumë burgje? Jo. Thjesht do të falin të gjithë politikanët e korruptuar! Qeveria e udhëhequr nga socialdemokratët, që mori detyrën në dhjetor, ka shpallur qëllimin e saj për të falur disa të dënuar nëse dënimi ka qenë më pak se pesë vite, si dhe për të dekriminalizuar abuzimet me pushtetin që shkaktojnë më pak se 50 mijë dollarë dëme për buxhetin. Dënimi maksimal për abuzim me detyrën do të reduktohet nga shtatë vite në tre. Nga gjithë problemet që ka vendi, ky ishte prioriteti kryesor i socialdemokratëve. Po sigurisht, ç’mund të pritet nga një parti që udhëhiqet prej një krimineli? Kryetari i socialdemokratëve, Liviu Dragnea u ndalua të bëhet kryeministër për shkak të një dënimi për mashtrime elektorale, por është ai që vazhdon të drejtojë nga prapa skenës. Dragnea dhe partia e tij nuk hezitojnë që të eliminojnë çdo rregull që i pengon të plaçkisin shtetin. Këta njerëz duhet të ndalen! Rumania, dikur një diktaturë komuniste, që më pas u rrënua prej oligarkëve të pangopur, ka bërë përpjekje të mëdha drejt përmirësimit të gjyqësorit në vitet e fundit. Ne, populli, nuk mund të lejojmë që udhëheqësit tanë të shkelin sundimin e ligjit. Vetëm “angazhimi i drejtpërdrejtë i qytetarëve mund të shpëtojë reformat dhe ndalë këtë axhendë politike thellësisht të dëmshme”.
Rumunët protestojnë kështu kundër ndryshimeve në Kodin Penal për korrupsionin. Viktima e parë e protestave është ministri i Ambientit të Biznesit, Florin Jianu. “Unë nuk dua që t’i them fëmijëve të mi një ditë se, isha një burracak dhe pranova diçka në të cilën nuk besoja”, deklaroi ai nëpërmjet një postimi në rrjetet sociale.
Socialdemokratët rumunë në pushtet prej vetëm një muaji, po përballen me protesta të paprecedentë. Qindra mijëra rumunë sfidojnë kështu edhe temperaturat disa gradë nën zero. Kjo është qeveria e tretë në 2 vitet e fundit në vend.
Presidenti i vendit, Klaus Iohannis, pak ditë më parë firmosi një urdhër për lehtësimin e dënimit ndaj zyrtarëve që abuzojnë me postin, duke kërkuar edhe lirimin nga burgu të shumë të tjerëve. Qeveria ndërkohë kërkon të amnistojë të dënuarit me më pak se 5 vite burg, me përjashtim të atyre të dënuar për përdhunim. Vendimi që ka acaruar të gjithë popullin, është ai që kërkon dekriminalizimin e korrupsionit të zyrtarëve për shuma jo më të mëdha se 48 mijë dollarë. Rreth 2 mijë të tjerë, ndërkohë janë në proces gjykimi. Rumunët janë tërësisht kundër këtij vendimi, pasi sjell lirimin e qindra zyrtarëve të dënuar për korrupsion, mes të cilëve edhe liderin e socialdemokratëve. Protestat kanë nxitur dobësimin e levit vendas me të paktën 1% kundrejt euros, që është edhe rënia më e madhe në 2 vite.
Duke i quajtur politikanët “hajdutë” e “tradhtarë”, tubuesit këmbëngulin se dekreti qeveritar përbën një hap gjigant prapa nga reformat e dekadës së fundit. Ata mendojnë se ligji i amnistisë i pastron praktikisht politikanët nga mëkatet e veta e u lejon të mbajnë gjithçka që kanë arritur në mënyrë ilegale. “Jemi këtu për të protestuar kundër metodave imorale dhe të stilit mafioz që përdor kjo qeveri. Votojnë natën si hajdutët një ligj, i cili u jep politikanëve dhe zyrtarëve publikë, që u shërbejnë atyre, të drejtën të vjedhin 44 mijë euro. Jam këtu për të ardhmen e fëmijëve të mi. Dua që kjo qeveri të largohet, dua ta anulojnë dekretin, nuk dua të publikohet fare”, tha një protestues. Disa prokurorë si Laura Codruta Kövesi e shohin lëvizjen e ekzekutivit si “çek të bardhë” për të abuzuar me pushtetin. “Dekreti urgjent do ta dëmtojë shumë luftën kundër korrupsionit”, shprehet ajo. “Nëse projekti miratohet, kjo luftë praktikisht nuk do të ketë më asnjë rëndësi”. Ekzekutivi rumun pretendon se masa për shfajësimin e atyre që kanë shkaktuar më pak se 44 mijë euro dëme synon lehtësimin e mbipopullimit të burgjeve.
Prokurorët kujtojnë se gati 2.000 persona të përfshirë në raste abuzimi me pushtetin kanë shkaktuar një dëm, që përgjatë 3 viteve të fundit mbërrin në total gati një miliard euro. Në hetim janë aktualisht disa politikanë në zë të vendit, përfshirë këtu edhe udhëheqësin e socialdemokratëve në pushtet, Liviu Dragnea. Të majtët i morën frerët e pushtetit në Rumani në muajin dhjetor, me premtimin e rritjes së rrogave dhe pensioneve. Por një muaj më vonë, ata janë arsyeja e protestave më të mëdha në vend që prej 1989-s. Masat e parashikuara në ligj përfshijnë edhe faljen e të dënuarve me më pak se 5 vite burg, për kryerjen e disa krimeve jo të dhunshme.
bota.al
Qeveria bllokon kompensimin për ish-pronarët, jep vetëm 41% të fondit të planifikuar për 2016
Teksa nevojat për kompensimin e ish-pronarëve janë shumë më të larta në krahasim me fondet buxhetore në dispozicion sërish qeveria nuk arrin të alokojë në drejtim të kësaj shtresë edhe sasitë e programuara në buxhetet vjetore. Sipas të dhënave fiskale paraprake të Ministrisë së Financave në vitin 2016 ish-pronarët morën 1.5 miliardë lekë si kompensim nga fondet buxhetore nga 3.6 miliardë të tilla që ishin programuar, duke u realizuar në vetëm 41 për qind të planifikimit. Nga fondet për kompensimin e ish-pronarëve kanë tepruar 2,1 miliardë lekë ose 15 milionë euro, të cilat kanë shkuar për uljen e deficitit buxhetor.
Megjithëse ligji i ri “Për trajtimin e pronës” nuk ka një faturë financiare se sa kushton kompensimi, qeveria në mënyrë indirekte thotë se do të mbyllë procesin e kompensimit në 10 vitet në vijim, me një faturë të përgjithshme të kompensimit që është 50 miliardë lekë. Ligji i ri që hyri në fuqi vitin e kaluar e zhvlerëson faturën e kompensimit me gati 7 herë sipas shembujve tipikë në zonën e Tiranës. Por shoqatat e ish-pronarëve pretendojnë se, duke përllogaritur si kompensim të tokës truall Kadastrën e vitit 1944, fatura e kompensimit zhvlerësohet shumëfish.
Qeveria, nëpërmjet Agjencisë së Trajtimit dhe Kompensimit të Pronës, ka vendosur të kompensojë ish-pronarët me një shumë prej 50 miliardë lekësh, ose 370 milionë euro, deri në vitin 2025. Deri në vitin 2020, shuma vjetore që do të akordohet nga buxheti i shtetit nuk do të jetë 3-45 miliardë lekë në vit, ndërsa pas këtij viti, deri në 2025, fondi vjetor është parashikuar të rritet gradualisht vit pas viti për të arritur në vitin e 10 të kompensimit që i takon 2025 në 7.6 miliardë lekë.
Sipas të dhënave të Shoqatës Pronësi me Drejtësi, Agjencia e Kthimit dhe Kompensimit të Pronës ka njohur për efekte kompensimi mbi 80 mijë hektarë tokë truall. Me ligjin e ri, ku referenca do të jetë sipërfaqja truall në vitin 1944, toka truall për kompensim nuk është më shumë se 5-7 mijë hektarë në të gjithë vendin. Reduktimi me këtë përmasë i kompensimit të tokës truall e redukton faturën në mënyrë drastike. Shtetëzimi i pasurive të paluajtshme nga Reforma Agrare e viteve 1950-1960 nuk qe asgjë para ndarjes për frymë të tokës bujqësore dhe fragmentarizmit në 3 milionë pasuri që bëri qeverisja demokratike në vitin 1991 me Ligjin 7501.
Toka bujqësore e dhënë në përdorim ka krijuar 500 mijë pronarë të rinj në kurriz të pronarëve realë, sot nuk mund të zhbëhet më. Qeveria ka nisur procedurat për të bërë pronarë përdoruesit e 7501, ndërkohë zhvillimi i bujqësisë, turizmit, investimeve private do të mbeten përjetësisht peng i këtij zhvillimi të çorganizuar gati me dashje në ndarjen e pronësisë.
Kryesore
Continue to the category
