Dhjetëra punonjës të uzinës së përpunimit të naftës në Fier kanë protestuar para Prefekturës së Qarkut, duke kërkuar ndërhyrje nga qeveria për të zgjidhur problemin e pagave të prapambetura. Naftëtarët thonë se nuk u janë paguar prej me shumë se një vit, as kontributet shoqërore. Punonjës të Uzinës së Përpunimit të Naftës në Fier i zhvendosën protestat për mosmarrjen e pagave të prapambetura dhe mospagesën e kontributeve shoqërore, para Prefekturës. Naftëtarët thonë se rinisën protestat, pasi mbaroi pa asgjë konkrete afati 10-ditor i lënë nga drejtues të kompanisë për pagat e prapambetura dhe sigurimet shoqërore. Naftëtarët e Fierit, kanë bërë disa protesta prej fillimit të vitit, me pretendimin se nuk janë paguar nga kompania që ka marrë në dorë uzinën, pas falimentimit të ARMO-s.
Kosova me prefiksin +383, operatorët kursejnë miliona euro
Nga 2 shkurti nis zbatimi i kodit të ri telefonik për Republikën e Kosovës. Prefiksi i ri +383 është prezantuar sot në një konferencë për mediat nga Drejtori i Telekomit, Agron Mustafa. “Ne sot kemi marrë vendimin për të lëshuar kodin shtetëror, i cili do të përdoret në shërbimet fikse dhe mobile. Prej sot krijohet mundësia që hap pas hapi t’i zëvendësojmë. Të gjitha thirrjet telefonike mund të realizohen me +383”, u shpreh Mustafa.
Sipas tij, implementimi i kodit do të shuajë nga tregu të gjithë operatorët ilegalë. Deri në fund të vitit, kodi me të cilin ka funksionuar aktualisht Kosova, +381, nuk do të funksionojë më. Ndërsa kostot që do të kursejë Telekomi i Kosovës dhe operatorët e tjerë janë të konsiderueshme. Sipas Mustafës, Telekomi i Kosovës ka paguar atë të Monakos 194 milionë euro deri në vitin 2016, për shfrytëzimin e prefiksit +377. Gjatë konferencës është bërë edhe telefonata e parë me kodin e ri, ndërsa u është bërë apel edhe diasporës të shfrytëzojnë sa më parë prefiksin +383.
Çmimet e prodhimit në Eurozonë rriten sipër pritshmërive
Çmimet e prodhimit në Eurozonë u rritën sipër pritshmërive në muajin dhjetor kryesisht prej energjisë më të shtrenjtë, megjithatë, duke e përjashtuar këtë komponent të luhatshëm, rritja ishte modeste. Zyra e Statistikave e Bashkimit Europian, Eurostat, tregoi se çmimet prodhimit u rritën me 0.7% në dhjetor, nga muaji i kaluar, dhe me 1.6% me bazë vjetore. Të dhënat vjetore për dhjetorin treguan normën më të lartë në 4 vite. Projeksionet qëndronin për një rritje me 0.4 dhe 1.3% në mënyrë respektive. Nxitësi kryesor për rritjen ishin çmimet e energjisë, që u rritën me 2.1% me bazë mujore dhe 3.9% nga dhjetori 2015. Pa komponentin e energjisë, çmimet u rritën me 0.3% nga muaji nëntor dhe me 0.9% nga viti i kaluar. Çmimet më të larta të energjisë kanë rritur edhe çmimet e konsumit në Eurozonë në muajin janar, ku Eurostat deklaroi se inflacioni arriti 1.8% për muajin janar. Banka Qendrore Europiane, që ka injektuar sasi gjigante të parasë në ekonomi për të nxitur inflacionin, ka bërë të ditur se nuk do të ndalojë programin e blerjes në treg të hapur deri sa inflacioni bazë të fillojë rritjen e qëndrueshme. Ndërsa treguesi që përfshin çmimet e energjisë arriti 1.8% për janarin, inflacioni bazë u rrit me vetëm 0.9%.
Nis revolta popullore në Rumani, populli del në shesh
Më shumë se 200 mijë persona kanë dalë përsëri dje në mbrëmje në Bukuresht, si dhe në qytete të tjerë të Rumanisë, për të protestuar kundër qeverisë së Sorin Grindeanu, i akuzuar se është duke miratuar masa që zbusin luftën kundër korrupsionit të përhapur në vend. Vetëm në kryeqytetin e Rumanisë, Bukuresht, kanë zbritur në shesh më shumë se njëqind mijë vetë dhe vëzhguesit flasin për manifestime popullore, më masive se ato të dhjetorit 1989, që sollën regjimin komunist të Nikolae Çausheskut. Në Bukuresht, sipas mediave vendase, janë regjistruar përplasje sporadike mes demonstruesve dhe policisë, me një bilanc prej të paktën pesë të plagosurve dhe gjashtëdhjetë arrestimeve.
Politikanët e korruptuar, “festë” për veten e tyre
Udhëheqësit e rinj të Rumanisë kanë gjetur një mënyrë për të zgjidhur problemin e mbipopullimit të burgjeve, shkruante Horia Blidaru në “Adevarul”. Të ndërtojnë më shumë burgje? Jo. Thjesht do të falin të gjithë politikanët e korruptuar! Qeveria e udhëhequr nga socialdemokratët, që mori detyrën në dhjetor, ka shpallur qëllimin e saj për të falur disa të dënuar nëse dënimi ka qenë më pak se pesë vite, si dhe për të dekriminalizuar abuzimet me pushtetin që shkaktojnë më pak se 50 mijë dollarë dëme për buxhetin. Dënimi maksimal për abuzim me detyrën do të reduktohet nga shtatë vite në tre. Nga gjithë problemet që ka vendi, ky ishte prioriteti kryesor i socialdemokratëve. Po sigurisht, ç’mund të pritet nga një parti që udhëhiqet prej një krimineli? Kryetari i socialdemokratëve, Liviu Dragnea u ndalua të bëhet kryeministër për shkak të një dënimi për mashtrime elektorale, por është ai që vazhdon të drejtojë nga prapa skenës. Dragnea dhe partia e tij nuk hezitojnë që të eliminojnë çdo rregull që i pengon të plaçkisin shtetin. Këta njerëz duhet të ndalen! Rumania, dikur një diktaturë komuniste, që më pas u rrënua prej oligarkëve të pangopur, ka bërë përpjekje të mëdha drejt përmirësimit të gjyqësorit në vitet e fundit. Ne, populli, nuk mund të lejojmë që udhëheqësit tanë të shkelin sundimin e ligjit. Vetëm “angazhimi i drejtpërdrejtë i qytetarëve mund të shpëtojë reformat dhe ndalë këtë axhendë politike thellësisht të dëmshme”.
Rumunët protestojnë kështu kundër ndryshimeve në Kodin Penal për korrupsionin. Viktima e parë e protestave është ministri i Ambientit të Biznesit, Florin Jianu. “Unë nuk dua që t’i them fëmijëve të mi një ditë se, isha një burracak dhe pranova diçka në të cilën nuk besoja”, deklaroi ai nëpërmjet një postimi në rrjetet sociale.
Socialdemokratët rumunë në pushtet prej vetëm një muaji, po përballen me protesta të paprecedentë. Qindra mijëra rumunë sfidojnë kështu edhe temperaturat disa gradë nën zero. Kjo është qeveria e tretë në 2 vitet e fundit në vend.
Presidenti i vendit, Klaus Iohannis, pak ditë më parë firmosi një urdhër për lehtësimin e dënimit ndaj zyrtarëve që abuzojnë me postin, duke kërkuar edhe lirimin nga burgu të shumë të tjerëve. Qeveria ndërkohë kërkon të amnistojë të dënuarit me më pak se 5 vite burg, me përjashtim të atyre të dënuar për përdhunim. Vendimi që ka acaruar të gjithë popullin, është ai që kërkon dekriminalizimin e korrupsionit të zyrtarëve për shuma jo më të mëdha se 48 mijë dollarë. Rreth 2 mijë të tjerë, ndërkohë janë në proces gjykimi. Rumunët janë tërësisht kundër këtij vendimi, pasi sjell lirimin e qindra zyrtarëve të dënuar për korrupsion, mes të cilëve edhe liderin e socialdemokratëve. Protestat kanë nxitur dobësimin e levit vendas me të paktën 1% kundrejt euros, që është edhe rënia më e madhe në 2 vite.
Duke i quajtur politikanët “hajdutë” e “tradhtarë”, tubuesit këmbëngulin se dekreti qeveritar përbën një hap gjigant prapa nga reformat e dekadës së fundit. Ata mendojnë se ligji i amnistisë i pastron praktikisht politikanët nga mëkatet e veta e u lejon të mbajnë gjithçka që kanë arritur në mënyrë ilegale. “Jemi këtu për të protestuar kundër metodave imorale dhe të stilit mafioz që përdor kjo qeveri. Votojnë natën si hajdutët një ligj, i cili u jep politikanëve dhe zyrtarëve publikë, që u shërbejnë atyre, të drejtën të vjedhin 44 mijë euro. Jam këtu për të ardhmen e fëmijëve të mi. Dua që kjo qeveri të largohet, dua ta anulojnë dekretin, nuk dua të publikohet fare”, tha një protestues. Disa prokurorë si Laura Codruta Kövesi e shohin lëvizjen e ekzekutivit si “çek të bardhë” për të abuzuar me pushtetin. “Dekreti urgjent do ta dëmtojë shumë luftën kundër korrupsionit”, shprehet ajo. “Nëse projekti miratohet, kjo luftë praktikisht nuk do të ketë më asnjë rëndësi”. Ekzekutivi rumun pretendon se masa për shfajësimin e atyre që kanë shkaktuar më pak se 44 mijë euro dëme synon lehtësimin e mbipopullimit të burgjeve.
Prokurorët kujtojnë se gati 2.000 persona të përfshirë në raste abuzimi me pushtetin kanë shkaktuar një dëm, që përgjatë 3 viteve të fundit mbërrin në total gati një miliard euro. Në hetim janë aktualisht disa politikanë në zë të vendit, përfshirë këtu edhe udhëheqësin e socialdemokratëve në pushtet, Liviu Dragnea. Të majtët i morën frerët e pushtetit në Rumani në muajin dhjetor, me premtimin e rritjes së rrogave dhe pensioneve. Por një muaj më vonë, ata janë arsyeja e protestave më të mëdha në vend që prej 1989-s. Masat e parashikuara në ligj përfshijnë edhe faljen e të dënuarve me më pak se 5 vite burg, për kryerjen e disa krimeve jo të dhunshme.
bota.al
Qeveria bllokon kompensimin për ish-pronarët, jep vetëm 41% të fondit të planifikuar për 2016
Teksa nevojat për kompensimin e ish-pronarëve janë shumë më të larta në krahasim me fondet buxhetore në dispozicion sërish qeveria nuk arrin të alokojë në drejtim të kësaj shtresë edhe sasitë e programuara në buxhetet vjetore. Sipas të dhënave fiskale paraprake të Ministrisë së Financave në vitin 2016 ish-pronarët morën 1.5 miliardë lekë si kompensim nga fondet buxhetore nga 3.6 miliardë të tilla që ishin programuar, duke u realizuar në vetëm 41 për qind të planifikimit. Nga fondet për kompensimin e ish-pronarëve kanë tepruar 2,1 miliardë lekë ose 15 milionë euro, të cilat kanë shkuar për uljen e deficitit buxhetor.
Megjithëse ligji i ri “Për trajtimin e pronës” nuk ka një faturë financiare se sa kushton kompensimi, qeveria në mënyrë indirekte thotë se do të mbyllë procesin e kompensimit në 10 vitet në vijim, me një faturë të përgjithshme të kompensimit që është 50 miliardë lekë. Ligji i ri që hyri në fuqi vitin e kaluar e zhvlerëson faturën e kompensimit me gati 7 herë sipas shembujve tipikë në zonën e Tiranës. Por shoqatat e ish-pronarëve pretendojnë se, duke përllogaritur si kompensim të tokës truall Kadastrën e vitit 1944, fatura e kompensimit zhvlerësohet shumëfish.
Qeveria, nëpërmjet Agjencisë së Trajtimit dhe Kompensimit të Pronës, ka vendosur të kompensojë ish-pronarët me një shumë prej 50 miliardë lekësh, ose 370 milionë euro, deri në vitin 2025. Deri në vitin 2020, shuma vjetore që do të akordohet nga buxheti i shtetit nuk do të jetë 3-45 miliardë lekë në vit, ndërsa pas këtij viti, deri në 2025, fondi vjetor është parashikuar të rritet gradualisht vit pas viti për të arritur në vitin e 10 të kompensimit që i takon 2025 në 7.6 miliardë lekë.
Sipas të dhënave të Shoqatës Pronësi me Drejtësi, Agjencia e Kthimit dhe Kompensimit të Pronës ka njohur për efekte kompensimi mbi 80 mijë hektarë tokë truall. Me ligjin e ri, ku referenca do të jetë sipërfaqja truall në vitin 1944, toka truall për kompensim nuk është më shumë se 5-7 mijë hektarë në të gjithë vendin. Reduktimi me këtë përmasë i kompensimit të tokës truall e redukton faturën në mënyrë drastike. Shtetëzimi i pasurive të paluajtshme nga Reforma Agrare e viteve 1950-1960 nuk qe asgjë para ndarjes për frymë të tokës bujqësore dhe fragmentarizmit në 3 milionë pasuri që bëri qeverisja demokratike në vitin 1991 me Ligjin 7501.
Toka bujqësore e dhënë në përdorim ka krijuar 500 mijë pronarë të rinj në kurriz të pronarëve realë, sot nuk mund të zhbëhet më. Qeveria ka nisur procedurat për të bërë pronarë përdoruesit e 7501, ndërkohë zhvillimi i bujqësisë, turizmit, investimeve private do të mbeten përjetësisht peng i këtij zhvillimi të çorganizuar gati me dashje në ndarjen e pronësisë.
Rilindja shet Shqipërinë për 1 miliard euro
Jorida Tabaku
Çfarë i ka mbetur kësaj mazhorance sot pas gjithçkaje ka ndodhur në këto katër vjet? Çfarë i ka mbetur një qeverie që as e aftë të mbledhë qeverinë në mbledhje nuk është? Çfarë ka mbetur pa tenderuar e cila taksë ka mbetur pa rritur? Cili ka mbetur pa kërcënuar e intimiduar? Në më pak se katër vjet kanë koncesionuar çdo sektor me rëndësi dhe të ardhura të larta nga buxheti i shtetit përmes kontratave abuzuese dhe tërësisht në shërbim të interesave personale të një grushti individësh. Kanë shpenzuar mbi 500 mln euro për t’ua shpërndarë xhepave të bizneseve të tyre në formë koncesioni dhe kanë sjellë në shërbim të publikut zero shërbime. Kanë dhuruar në fushën e shëndetësisë gati 300 mln euro, ndërkohë që kemi parë se familjet shqiptare shpenzojnë 380 mln euro nga xhepat e tyre për ta marrë shërbimin nga privati. Kanë dhuruar në formën e koncesioneve 65 mln euro për Rrugën e Kombit megjithëse për tre vjet me radhë kanë rritur taksën e qarkullimit me justifikimin se do të përmirësonin mirëmbajtjen e rrugës. Kanë dhuruar përmes formës PPP apo koncesionare mbi 10 mln euro tek Crown Agents, ndërkohë që gjobisin pafund dhe pa të drejtë sa e sa biznese, ndërkohë që administrata tatimore dhe doganore vazhdon të ushtrojë presion mbi lustraxhinj e shitës perimesh. Si përfundim: për një mandat katërvjeçar shqiptarët janë ngarkuar me 2,5 mld USD borxhe, bizneset pranë qeverisë kanë përfituar thuajse 1 mld euro koncesione dhe PPP. Rezultati i kësaj politike rilindase është zero shkolla të reja, zero rrugë të reja, zero shërbime të reja, vetëm palma, beton, qendra qytetesh të boshatisura dhe një mal i madh borxhi për t’u shlyer. E pasi kanë shfrytëzuar në maksimum gjithçka të mundur kanë vendosur të prodhojnë një hile të fundit. Kanë vendosur që të ardhmen e shqiptarëve ta lënë peng për hir të ëndrrave të tyre, duke i vendosur çmimin “One bilion”. Oferta më e fundit e qeverisjes është të shiturit e të ardhmes sonë për interes të pasurimit të një grushti njerëzish sot. Dhe kjo vjen sepse në këtë mandat vjedhja jo vetëm ka qenë e madhe, por mbi të gjitha edhe bazat e një ekonomie të dobët u shkërmoqën, duke e çuar vendin në nivelin më të ulët të konsumit dhe inflacionit në 15 vitet e fundit, vetëm 1.3%.
Niveli i varfërisë, 48% e popullsisë
Duke çuar investimet e huaja në nivelet më të ulëta aq sa vetëm një shtet të ri si Kosova, kemi lënë pas vetes sonë. Duke e çuar nivelin e varfërisë në 48% të popullsisë që jeton me 5$ në ditë! Nën këtë klimë sociale dhe ekonomike, qeveria duket e dorëzuar dhe pa ide. Oferta e saj ndaj bizneseve ngjason më shumë me një tender të radhës për të cilin ajo premton paratë pas 2-3 viteve duke rritur automatikisht borxhin publik të fshehur. Fryma e propozimit 1 mld euro është vetëm imitim i turpshëm i politikave të ndjekura nga qeveritë e Greqisë, Portugalisë dhe Irlandës që jo rastësisht janë sot në listën e vendeve që rrezikojnë falimentimin. Shihni rastin e Greqisë, e cila pësoi një kolaps të tërë ekonomik dhe financiar vetëm si pasojë e këtyre politikave të makutërisë që nuk prodhuan asnjë ekonomi më të shëndoshë dhe asnjë gjendje sociale të mirë. Gjithsesi, mazhoranca pretendon se këtu nuk kemi të bëjmë me një borxh të fshehur, pretendon se kjo do të çlirojë tregun dhe do t’i japë frymë atij përmes parave të injektuara në treg. Ato po ju gënjejnë, njësoj siç gënjyen kur thanë se taksa progresive do t’ju jepte rrogën e 13 apo do të taksonte më pak 97% të shqiptarëve. Po ju gënjejnë njësoj siç gënjejnë kur flitet për rritjen e ekonomisë dhe atë të konsumit. Për ta kuptuar le të marrim një shembull. Qeveria ka dhënë me koncesion analizat e check up dhe është zotuar që t’i paguajë koncesionarit miliona euro vit për vit pa e vrarë mendjen për numrin e atyre që kryejnë vizita. Kësisoj pagesat që qeveria kryen ndaj kompanisë në fjalë janë përherë shpenzime në buxhetin e shtetit, që do të thotë para të taksapaguesve shqiptarë që shkojnë për mbajtjen në këmbë të kësaj kompanie, duke rritur në këtë mënyrë edhe borxhin, i cili do të shfaqet me vonesë. Ka qenë kjo arsyeja se përse kësaj qeverie FMN i kërkoi një informacion të qartë dhe të saktë me investimet që do të kryente përmes PPP-ve, por ndër të tjera ishte edhe kjo një arsye se përse MF iu bë një kërkesë për të paraqitur se deri në ç’pikë janë investimet kapitale në vend. E nga këto informacione ne mësojmë se investimet infrastrukturore të qeverisë në rrugë janë më të ulëtat në këto 20 vitet e fundit.
Shifrat e uljes së investimeve
Për vitin 2016 ishin planifikuar fillimisht 59 mld lekë që ishte një vlerë shumë më e ulët se sa viti 2007, ndërkohë që realizimi i buxhetit për investime ishte 3% më i ulët se sa viti 2015 duke i rrudhur me 60 mln euro. Janë këto tabela që tregojnë dhe dëshmojnë se qeveria nga 11 akse rrugore në ndërtim që gjeti ka marrë përsipër vetëm 2 prej tyre t’i përfundojë deri në vitin 2019 pa na shpjeguar se përse duhet të mos ndërmerrte këto investime në këto akse kur edhe borxhin e çoi nga 62% në 72%? Nisma e kryeministrit për të dhuruar 1 mld euro as nuk do të përmirësojë gjendjen ekonomike të vendit, as do të nxjerrë nga moçali i taksave dhe tarifave të vendosura mbi kokë tek bizneset dhe as nuk do të lehtësojë kredidhënien e bankave, të cilat vazhdojnë të nxjerrin fitimin e tyre jashtë. Në të kundërt, do të përkeqësojë dhe të shtrydhë gjithnjë e më shumë bizneset, të cilët sot vazhdojnë të vuajnë një treg të kapur dhe aspak të lirë. Nëse ndokush ka ende dyshime le të hedhë sytë te Porti i Karpenit që e lançuan si një megainvestim e doli që ishin kompani fantazmë prapa të cilave mund të fshihen vetëm politikanë. Ky është lloji i investimeve e koncesioneve që dini të jepni ju. U përpoqa dje të gjeja disa investitorë të rinj që kanë ardhur në Shqipëri mbas 2013. Arrita të gjeja vetëm dy që ishin kompanitë e inceneratorit të Elbasanit dhe të Fierit që të dyja nuk sjellin asnjë investim në Shqipëri, por njërën e paguani 5 mln euro në vit e tjetrën 28 mln euro e që ishin e njëjta kompani. Unë nuk e di se çka ndodhur me një parti që dikur quhej e majtë, që po rrit varfërinë e pabarazinë, që nuk ofron dot vetë asnjë shërbim, por koncesionon gjithçka! Përndryshe disa kolegë deputetë të kësaj ane të mëngjër, do të ishin ngritur tanimë për të protestuar ndaj kësaj nisme, duke filluar qoftë edhe me z. Vasili, i cili disa muaj më parë erdhi në këtë sallë me një amendament që gjoja frenonte koncesionet pa fre. Po sot z. Vasili a jeni me të njëjtën mendje si përpara një muaji për t’i dhënë fund koncesioneve pa fre dhe nismës “Koncesionohet Shqipëria për 1 mld euro”? Apo sërishmi të gjithë këtu luajnë lojën e strucit për të akuzuar, por pa mbajtur përgjegjësi. Për të bërë opozitën, por nga kolltuku i qeverisë. Për të kritikuar mazhorancën a thua se jeni në opozitë? Koha po troket për këdo që sot mbështet në heshtje apo me tam-tame këtë qeveri, po troket edhe për vetë mazhorancën, e cila si në ditët e mira ashtu dhe në ato të këqija ka mundur t’ia sjellë në majë të hundës shqiptarëve.
Hileja e frikshme e PPP-ve. Skenari grek që e çon borxhin 80% të PBB-së
Programi i lajmëruar nga qeveria për të konçesionuar tek privatët 1 miliard euro investime në projekte publike është një rritje e fshehtë e borxhit. Të gjitha investimet e privatëve do të shlyhen nga buxheti, për një periudhë e cila varion nga 10 deri në 15 vjet. Sipas skemës, qytetarët nuk do të paguajnë vetëm investimin fillestar, por edhe interesin e bankave si dhe fitimin e biznesit privat, që do të financojë projektin. Kjo do të thotë se, në fund të 15 viteve, qytetarët nuk do të paguajnë mbrapsh 1 miliard euro, por shumë më tepër. Përmes kësaj manovre qeveria e rrit borxhin publik të vendit minimalisht me 10 pikë përqindje të tjera. Edhe pse në librat e shtetit shifra zyrtare e borxhit është 70 për qind e Prodhimit Kombëtar, me programin e koncesioneve borxhi real i vendit është 80 për qind e Prodhimit Kombëtar. Shifra prej 1 miliard euro plus fitimet dhe interesat është një detyrim kontigjent, i cili do të paguhet në të ardhmen. Pra, qeveria po merr borxh nga e ardhmja për të shpenzuar tani.
Fatura për qytetarët
Aktualisht, taksapaguesit shqiptarë paguajnë 7.3 miliardë lekë ose rreth 58 milionë dollarë në vit për koncesionet e dhëna nga qeveria, kryesisht në fushën e shëndetësisë. Por me programin e ri 1 miliard euro të PPP-ve, kjo faturë do të rritet me shpejtësi. Qeveria pretendon se ka hapësirë ligjore që të shpenzojë deri në 5 për qind të të ardhurave tatimore në vit për të paguar konçesionarët privatë dhe është shprehur e vendosur për ta shfrytëzuar plotësisht këtë hapësirë. Aktualisht, të ardhurat tatimore janë rreth 360 miliardë lekë dhe brenda dy apo tre viteve pritet të shkojnë në 400 miliardë lekë. Kjo do të thotë se, duke filluar nga 2018-ta buxheti do të paguajë rreth 20 miliardë lekë ose 170 milionë dollarë në vit për të paguar bizneset private të koncesioneve. Kjo faturë marramendëse do të kufizojë hapësirën për investime publike dhe shpenzime sociale për shtresat në nevojë.
Borxhi vetëm rritet
Në vitin 2013 kur erdhi në pushtet qeveria e gjeti borxhin publik 62 për qind të Prodhimit Kombëtar. Tashmë që po përfundon mandati katërvjeçar, borxhi është rritur në 72 për qind e PBB-së. Pas rritjes së frikshme të treguesit zyrtar, përmes projektit të koncesioneve, qeveria është duke rritur sërish borxhin, por këtë herë në mënyrë të fshehtë dhe në kurriz të së ardhmes. Ky është një skenar i ngjashëm me atë të qeverisë greke, e cila kontraktoi borxh të fshehtë nga biznesi përmes skemave të ngjashme me ato që po vë në jetë qeveria shqiptare. Në Greqi, kriza shpërtheu kur qeveria nuk kishte më para të shlyente borxhet ndaj biznesit. Shqipëria po shkon në të njëjtën rrugë, teksa një pjesë e rëndësishme e buxhetit po kalçifikohet vetëm për të shlyer koncesionet shpesh të dyshuara për korrupsion. Nuk është rastësi që projekti i koncesioneve u lajmërua vetëm, pasi qeveria largoi Fondin Monetar Ndërkombëtar, i cili një skemë të tillë e kundërshtoi fuqishëm për sa kohë ishte në Shqipëri.
SYRI.net
Nishani: Shkarkimi i Manjanit për kanabisin, shenjë alarmi
-Kryeministri i vendit ka shkarkuar ministrin e Drejtësisë, cili është gjykimi i presidentit për këtë akt?
Unë mendoj se e kam mirëkuptimin tuaj, të medias në përgjithësi dhe të gjithë shoqërisë për sa kohë mbart mbi vete imazhin e institucionit të Republikës, dua të respektoj në mënyrë strikte përcaktimet kushtetuese ligjore, por dhe kodin që duhet të udhëheqë Presidenti shqiptar për të qenë jashtë përfshirjes qoftë edhe përmes analizave gjykimeve, por dhe vendimeve që ju takojnë partive politike, apo qeverisë që është produkt i partive politike në kontekstin formal. Përbërja e qeverisë është një e drejtë ekskluzive e kryeministrit, i cili ka marrë mandatin përfaqësimit nga mazhoranca që ka krijuar qeverinë, por nga ana tjetër padyshim kjo nuk do të thotë që përjashtohet nga dimensioni i të drejtës i çdo ministri, i çdo njeriu që është në përbërje të qeverisë për të shprehur mendimet për politika të caktuara apo për angazhime të caktuara. Ky është dimensioni minimal dhe fillestar i së drejtës, por gjithsesi kjo është një çështje që mbetet brenda në qeveri, është një çështje që duhet ta zgjidhin në dy grupimet që kanë krijuar qeverinë shqiptare. Ndaj për sa kohë mbart këtë përgjegjësi nuk do të përfshihem në analiza dhe gjykime. Por sidoqoftë në aspektin njerëzor unë kam gjykimet e mia, analizat e mia, por unë ngul këmbë në dy gjëra, së pari, në të drejtën formale të mandat marrësit që është kryeministri, së dyti nga ruajtja dhe respektimi i së drejtës së çdo njeriu pavarësisht pozicionit shtetëror apo publik që ka.
-Ylli Manjani ishte ministër Drejtësie, por dhe anëtar i KLD-së, ku Presidenti i Republikës është kryetar i KLD-së. Zoti President a keni gjykim për punën e Manjanit si ministër?
Ju falënderoj për pyetjen, sepse më jepet rasti për të shprehur falënderimet madje dhe mirënjohjen mund të them pa e ekzagjeruar të një kontributi profesional që zoti Manjani solli në mbledhjet e KLD-së, i cili e kishte të nevojshme jo vetëm nga pikëpamja e mënyrës se si duhet të funksionojë këshilli, jo vetëm nga mënyra e drejtimit të këshillit, ku ministri përfaqëson ekzekutivin, por dhe për shkak të një lloj racionaliteti të fokusimit profesional dhe ligjor të çështjeve që diskutohen në KLD. Ruaj vlerësimet maksimale, ruaj edhe vlerësimet e mia më të mira institucionale dhe gjej rastin edhe për falënderimet për frymën që solli zoti Manjani në KLD-së, një frymë që ishte në dimension e një profesionisti, por dhe të bashkëpunëtorit, koordinuesit dhe të pajtuesit midis aktorëve që përfaqësonin pushtete të ndryshme, qeverinë, gjyqësorin dhe Parlamentin.
-Zoti Manjani pajtues? Se perceptimi pas asaj që thonë kolegët e tij, zoti Manjani është konfliktual zoti President?
Unë po ju përcjell eksperiencën në KLD, se cilat janë eksperiencat apo perceptime që krijohen nga aktiviteti i zotit Manjani në ekzekutiv në partinë politike apo në Parlament, unë nuk e kam këtë informacion dhe nuk mund të prononcohem për këtë. Flas në mënyrë të sinqertë në mënyrë bindëse për çka unë kam konstatuar dhe përjetuar në funksionimin e KLD-së dhe aktivitetin e ministrit të Drejtësisë, zotit Manjani në funksionin e tij si anëtar i KLD-së?
-Ylli Manjani ishte anëtari i parë i qeverisë, i cili foli për rrezikun që po i kanoset sigurisë kombëtare nga kanabis, madje bëri thirrje edhe për përfshirjen e ushtrisë në këtë aksion për të zhdukur atë, të cilën Shqipëria nuk e kishte përjetuar kurrë më parë në këto nivele. Edhe Presidenti ka pasur këtë shqetësim dhe në mos gaboj ka thirrur dhe Këshillin e Sigurisë për çështjen e kanabisit. Ministrit i kushtoi shkarkimi, gjithsesi ju tashmë keni thirrur Këshillin e Sigurisë tashmë për një çështje tjetër, i kërkuar nga kryetari i Kuvendit për çështjen e Klement Balilit. Zoti President, a keni diskutuar ju me institucionet e ministrit të Brendshëm, Prokurorisë së Përgjithshme me SHISH-in, se pse nuk arrestohet Klement Balili dhe a përbën realisht një kërcënim për sigurinë kombëtare?
Duke ju referuar përmbajtjes së pyetjes tuaj do të thosha se në rast se zoti Manjani është shkarkuar për shkak të angazhimeve dhe prononcimit të tij në lidhje me shqetësimin, tashmë ndërkombëtar që ka marrë kultivimi dhe trafikimi i kanabisit në territorin shqiptar, ky do të ishte një lajm shumë i keq.
-Këta e tha vetë kryeministri, e tha zv/kryeministri, e tha kryetari i Bashkisë Veliaj, u shkarkua sepse foli pa leje, i vetmi motivacion ishte ky. Foli pa leje, këtë e tha vetë dje zv/kryeministri Niko Peleshi?
Po flas si President i Republikës dhe kjo është vërtetë për t’u shqetësuar nëse është shkarkuar se ka folur për çështjen e kanabisit, për kultivimin dhe trafikimin e kanabisit është një shenjë dhe një moment shumë i keq dhe problematik.
-Ju e keni para motivacionin e keni lexuar dhe keni firmosur shkarkimin e tij?
Motivacioni i referohet ecurisë së Reformës në Drejtësi, nuk e di se cilat janë arsyet dhe detajet që kryeministri ka konstatuar se zoti Manjani është një pengesë për çuarjen përpara të Reformës në Drejtësi, kjo është në tagrin kushtetues të kryeministrit, ky ka qenë argumentimi zyrtar që ka ardhur në propozimin e kryeministrit tek Presidenti i Republikës. Për sa i përket angazhimit të Presidentit të Republikës për thirrjen e sigurimit kombëtar, ka pasur një mbledhje para disa kohëve për shkak të dimensionit shumë shqetësues që ka marrë ky problem, i ka tejkaluar kufijtë e Shqipërisë, informacionet e konfirmuara të agjencive inteligjente shqiptare dhe atyre të NATO-s, kanë konstatuar lidhje financiare midis grupeve të krimit të organizuar, posaçërisht të fokusuar tek trafiku i drogës me grupet e terrorizmit ndërkombëtar, që do të thotë se ky është një alarm që ne duhet të na preokupojë në një masë shumë serioze ndaj dhe u përcoll si shqetësim në kërkesën time në mbledhjen e mëparshme të Këshillit të Sigurimit Kombëtar, ku kërkova nga të gjithë aktorët e ngarkuar nga ligji dhe Kushtetuta e vendit kryesisht ato ligj zbatuese, të rrisnin angazhimin, seriozitetin dhe goditjen në parandalimin në radhë të parë të kultivimit, pastaj në goditjen e trafikimit, sepse janë dy momente që kanë përmasa të ndryshme, por rëndësi të njëjtë dhe kërkesa e ardhur nga kryetari i Kuvendit të Shqipërisë, anëtar i Këshillit të Sigurisë Kombëtare me fokus çështje konkrete, personazh konkret i konfirmuar si shqetësim i madh nga agjencitë ndërkombëtare të luftës kundër trafikimit, i bërë publike nga përfaqësuesit e partnerëve tanë më kryesorë për çështjet e sigurisë siç janë SHBA-të, besoj që tregon përmasën përtej kufirit kombëtar, përtej organizimit kombëtar, përtej netëork-ut kombëtar për sa i përket kësaj çështjeje. Prandaj me shumë shpejtësi besoj ju përgjigja këtij shqetësimi, si një shqetësim serioz, si një shqetësim, i cili duhet trajtuar dhe duhet ndarë me të gjithë ata përgjegjës në përmes mandateve që kanë pranuar të marrin dhe të ekzekutojnë në veprimtarinë e institucioneve që drejtojnë duhet jo vetëm të japin llogari, duhet jo vetëm të sqarojnë institucionet e interesuara, duhet të sqarojnë partnerët tanë ndërkombëtarë për çështjet e sigurisë kombëtare, rajonale dhe më tej, por njëkohësisht të na paraqesin në mënyrë të detajuar për mënyrën se si do të veprojë Shqipëria, dhe kur them se si do të veprojë Shqipëria është kompleksiteti i institucioneve që Shqipëria ka, institucioneve ligj zbatuese, pra, kjo është një çështje, e cila kërkon jo vetëm adresim, por edhe ndjekjeje, ky është dhe fokusi i mbledhjes së Këshillit të Sigurisë Kombëtare ditën e premte.
-Mendon seriozisht se Klement Balili përbën kërcënim serioz për Sigurinë Kombëtare zoti President?
Patjetër.
-Është hera e parë që Këshilli i Sigurisë Kombëtare në Shqipëri mblidhet për një emër konkret?
Për herë të parë për një çështje konkrete, nuk është një emër konkret është një çështje konkrete. Për herë të parë një krye trafikant nuk vepron në mënyrë të izoluar për një çështje që thashë dhe jo pa qëllim dhe jo pa fakte ka tejkaluar kufijtë e Shqipërisë një çështje, e cila ka marrë vëmendjen dhe shqetësimin e agjencive më të mëdha ligjzbatuese në nivel global në luftën kundër krimit të organizuar dhe trafikut të drogës. Pra, nuk është një individ është një çështje me përmasa ndërkombëtare dhe nuk është për herë të parë, por është në vijimësi të mbledhjes së parë që bëri KS, për çështjet e trafikimit.
-Rasti Balili është një rast i cili i ka kaluar kufijtë e Shqipërisë, por ky është një pretendim i kryeparlamentarit Meta ku thotë se i është kërkuar nga vizita në Uashington, më konkretisht përse nuk arrestohet Klement Balili. Ai i është ngritur ky shqetësim nga partnerët shqiptarë përpara se këtë gjë ta bënte publike zoti Meta?
Patjetër, përderisa është bërë një deklaratë publike nga ana e ambasadorit të SHBA-ve në Tiranë, është një mesazh i qartë madje shumë i mirëpritur dhe i vlerësuar që ka pas ndjeshmërinë e qeverisë së SHBA-ve, sepse ambasadori amerikan përfaqëson qeverinë e SHBA-ve dhe ky do të thotë se është një shqetësim i SHBA-ve. Pra, jo emri konkret, por çështja dhe fenomeni. Pra përderisa është një deklaratë publike është një adresim që i bëhet Presidentit të Republikës, kryeministrit, qeverisë, policisë, Prokurorisë të gjitha institucioneve dhe shoqërisë shqiptare.
-Zoti President, a i keni kërkuar informacion ministrit të Brendshëm, shefit të Shërbimit Informativ, Prokurorit të Përgjithshëm për rastin Balili?
Patjetër në rastin e mbledhjes së Këshillit të Sigurisë Kombëtare, i është kërkuar një informacion Prokurorisë, i është kërkuar informacion Policisë, i është kërkuar informacion dhe SHISH, sepse kam adresuar informacione të nivelit operacional. Padyshim që informacionet e nivelit operacional janë të limituara, madje dhe për Presidentin e Republikës, madje as për ministrin përkatës, janë strikte të trupës në uniformë që ngarkon ligji siç është rasti i Policisë së Shtetit, por padyshim brenda tagrit kushtetues dhe të drejtës për të marrë informacion i jam adresuar dhe pres të marr informacion përpara mbledhjes së KSK-së.
-Në rast se dorëzohet apo arrestohet Klement Balili para të premtes a do të bëhet mbledhja e Këshillit të Sigurisë Kombëtare? Sepse ministri i Brendshëm ditën që kryetari i Parlamentit i kërkoi Presidentit, pra ju kërkoi juve që të mblidhni KSK-në për këtë çështje, madje i kërkoi Presidentit që mos e mblidhni se shumë shpejt do ta arrestojmë Klement Balilin, a do bëhet mbledhja e KSK-së?
Edhe njëherë unë ju referova jo një emri të caktuar, një njeri i cili akuzohet për veprimtari kriminale padyshim që ka të gjithë pasojat e ligjit që parashikon për veprimtarinë kriminale, unë vlerësova një çështje, një fenomeni, një dosjeje, e cila është shumë e gjerë, dosje e cila duhet hetuar se çfarë ka brenda, përveç Balilit kush është i përfshirë në këtë dosje. A ka mbështetje politike, nëse ka kush ja ka dhënë këtë mbështetje politike, a ka mbështetjen e institucioneve shtetërore, nëse ka kush ja ka dhënë këtë mbështetje shtetërore dhe duke mos u nisur dhe mos gjykuar aspak nga opinione që jep gjithsekush rrugëve të qeverisë, ajo që them është se, kapet apo s’kapet sot, apo nesër a pasnesër, Këshilli i Sigurisë Kombëtare do të mblidhet për të shqyrtuar shqetësimin e kryetarit të Kuvendit, i cili edhe ai lidhet drejtpërsëdrejti me këtë çështje. Pse ky person me informacionet që ka pasur, me aktivitetin që ka pasur është lejuar, a është mbështetur përderisa është lejuar, pse nuk është ndaluar, pse nuk është bashkëpunuar me aktorët ndërkombëtarë, ku i është afruar bashkëpunimi pse nuk janë realizuar dhe përfunduar operacionet e asistuara nga partnerët? Pra janë disa çështje që ka kjo dosje brenda. Kjo është një dosje, e cila shkon përtej çdo emri apo personi të caktuar, i cili patjetër që do të marri atë që i takon dhe që i paracakton ligji, pavarësisht nëse arrestohet sot apo arrestohet nesër.
Marrë me shkurtime nga Syri.net
CEZ, Berisha refuzon Ballën: Nuk betohem para një të dënuari për shpifje
Dënimi me dhjetë milionë lekë i Taulant Ballës për shpifje ka bërë që të shtyhet dje seanca e Komisionit Hetimor parlamentar për CEZ. Dëshmitari Shkëlzen Berisha nuk ka pranuar të bëjë betimin para Ballës, duke i kujtuar këtij të fundit se është në konflikt interesi, duke i rikujtuar këtij të fundit dhe vendimin e gjykatës për këtë çështje. Berisha i ka kërkuar Ballës që t’i lirojë vendin një tjetër deputeti dhe më pas ai do t’i bindej të gjitha procedurave që parashikon ligji në këto raste. Por Berisha tha se s’mund të bëjë betimin përpara një njeriu të dënuar nga gjykata për shpifje. “Pavarësisht se ky është një Komision politik që synon mbrojtjen e Edi Ramës për vjedhjen e 432 milionë eurove, këtë nuk e them unë e thotë KLSH, unë përsëri erdha në respekt të ligjit. Personi që e drejton këtë Komision, siç ju e dini shumë mirë është një i dënuar me vendim të formës së prerë nga Gjykata e Apelit të Tiranës për shpifje ndaj personit tim. Jo vetëm është dënuar, por refuzon të zbatojë vendimin e gjykatës. Tani më thoni, nga të gjithë këta deputetë që ka Parlamenti, pse ky Komision duhet të drejtohet nga ai që është në konflikt të hapur interesi dhe është dënuar për shpifje ndaj meje. Unë nuk pranoj të bëj një betim para një njeriu të dënuar për shpifje. Zotëria mund të çohej dhe t’ia lironte vendin një nga kolegëve të tij, nuk deshi, sepse nuk është i interesuar për të vërtetën, por për interesin politik”, u shpreh Shkëlzen Berisha.
-E njihni zotin Nuel Kalaj?
Kam bërë disa deklaratë publike që ezaurojnë përtej çdo dyshimi faktin që unë as me zotin Kalaj as me zotin Ismaili nuk kam asnjë lidhje, as me aktivitetet e tyre dhe as punën e Komisionit. Nëse zotin Kalaj nuk e thërrasin se nuk e gjejnë dot, po zotin Ismailaj pse nuk e thërrasin në Komision, nuk e gjejnë dot se ku është?Kjo është e ezauruar.
-Zoti Berisha, kishte disa emaile ku përmendej emri juaj.
Nuk e di çfarë provash ka administruar ky Komision, asnjë prej jush nuk ka parë nëse këto prova kanë qenë të çertifikuara me origjinalin, kanë ardhur ta apostiluara, janë apo nuk janë prova reale nuk mund ta them dot.Unë kam bërë deklaratën publike, kam theksuar qartë se nuk kam asnjë lidhje as me personin dhe as aktivitetet e tyre dhe asgjë tjetër. Për fat të mirë kjo punë ka dëshmitarë, mund të pyeten të gjithë dhe mund të flasin.
Vendimi që shpalli Ballën shpifës
Edi Rama e vendosi në krye të Komisionit Hetimor për ÇEZ, si njeriun e tij të besuar. Duke pasur besim tek talenti i Taulantit dhe besnikëria e tij, ai u mundua që me anë të këtij Komisioni Hetimor, e vetë Edi Ramës dhe enturazhit të tij, kërkoi që të mbulonte me anë të propagandës së Taulant Ballës një nga megaaferat korruptive që i kanë shkaktuar një dëm shqiptarëve prej 550 milionë euro. Në korrik të vitit 2012, atëherë kur Rilindja ishte ende në opozitë dhe Taulant Balla dilte si vullnetar për të marrë përsipër çdo pisllëk që gatuhej në zyrat e Ramës, do të deklaronte se, “Do të zbardhim të gjitha pazaret, të gjitha parakontratat. I them sot kompanisë “Australin Lottery”, që tender-komedia e Ridvan Bodes, nuk vlen, ndërsa licencën që kanë rënë dakord me Zenin, ne do ta anulojmë dhe do t’ia kthejmë atë shqiptarëve. Nuk mund të lejojmë që shqiptarëve t’ju merret një pronë publike, prej më shumë se 100 milionë eurosh, se kështu ka rënë dakord Zeni në Austri”. Në bazë të kësaj dëshmie u hap një gjyq nga ana e Shkëlzen Berishës, rezultati i të cilit është një vendim i formës së prerë të Gjykatës së Apelit të vitit 2013 që e dënon deputetin e Librazhdit, me 10 milionë lekë gjobë ndaj Shkëlzen Berishës, detyrim që ende sot e kësaj dite nuk e ka shlyer. Por jo vetëm kaq! Pas ardhjes në pushtet të Rilindjes, deklarimet e Ballës jo vetëm që i mori era, por u vërtetua se një vit më vonë, motra e tij, Fjoralba Balla u angazhua në marketingun e kompanisë, dhe ka qenë drejtuese e projekteve sociale të Austrian Lottery, e njëjta kompani të cilën vëllai i saj e sulmonte se ishte nën hetim për korrupsion. Pra, vlen të theksohet, se vetë Balla ka vepruar si një gjobëvënës i rëndomtë, duke treguar gishtin tek të tjerët dhe duke përfituar nga e njëjta kompani.
Kryesore
Continue to the category
