Gjykata e Tiranës ka dënuar të riun Andrea Memollari, i cili aksidentoi për vdekje Dhurata Priftin, kohë më parë në kryeqytet. Gjykata e ka dënuar me 9 vite burg 21-vjeçarin. Duke përfituar nga gjykimi i shkurtuar, i riu do të bëjë 6 vite burg. Gjatë leximit të vendimit i pandehuri nuk ka qenë i pranishëm në sallë dhe është përfaqësuar vetëm nga avokati.
Prokuroria ka kërkuar 10 vite heqje lirie për Andrea Memollarin, i cili në korrik të vitit të shkuar përplasi për vdekje me makinë nënën e dy fëmijëve, Dhurata Prifti. Ngjarja e rëndë ndodhi më 13 korrik në rrugën “Asim Vokshi” në kryeqytet. Pasi e përplasi për vdekje 45-vjeçaren, Memollari i kaloi përsipër me makinë dhe u largua nga vendngjarja.
Ai kishte shkelur edhe herë të tjera rregullat e qarkullimit rrugor. Në vitin 2015, ai u dënua nga gjyqtari Martin Deda me 40 orë pune, në interes publik për korrupsion aktiv, pasi tentoi t’i jepte para policëve rrugorë, që e kishin ndaluar për tejkalim të shpejtësisë. I njëjti gjyqtar, në një rast të ngjashëm, për të njëjtën vepër penale, korrupsion aktiv ndaj punonjësit të Policisë Rrugore, ka dhënë dënim me burg 8 muaj.
Shtypi me makinë nënën e dy fëmijëve, 6 vite burg për 21-vjeçarin
Korrupsion nëpërmjet falsifikimit, në pranga 3 zyrtarë dhe një polic në Berat
Tre punonjës të Degës së Kontrollit Teknik të Automjeteve në Berat dhe një punonjës policie kanë rënë në pranga, pasi akuzohen për ‘korrupsion pasiv’, dhe ‘shpërdorim detyre’. Pas një muaj hetimesh, Sektori i Krimit Ekonomiko-Financiar në bashkëpunim me Sektorin e Shërbimit të Çështjeve të Brendshme dhe Ankesave (SH.Ç.K.A), kanë mundësuar arrestimin e 3 punonjësve të kësaj pike gjatë punës në Urë-Vajgurore, ku edhe është Dega e Kontrollit Teknik të Automjeteve.
Bëhet e ditur se në pranga kanë rënë shtetasit me inicialet A.D, 59 vjeç, H.Sh, 62 vjeç dhe D.K, 28 vjeç. Ata akuzohen për “Korrupsion Pasiv në Sektorin Privat” dhe “Falsifikim të vulave, stampave e formularëve”. Arrestimi i tre punonjësve erdhi menjëherë pas vendimit të marrë nga Gjykata e Shkallës së Parë Berat, e cila kishte dhënë për ta masën e sigurisë “arrest me burg” për veprat penale të sipërpërmendura.
Burime zyrtare pohuan se i dyshuar për këtë aferë korruptive akuzohet se është përfshirë dhe Zaçe Kajo, 44 vjeç, me detyrë “punonjës policie” në Komisariatin e Policisë Skrapar, i cili akuzohet për “Shpërdorim Detyre”, “Përkrahje e Autorit të Krimit” dhe “Ushtrim i Ndikimit të Paligjshëm”. Edhe arrestimi i punonjësit të policisë Zaçe Kajo erdhi pas vendimit të marrë në po të njëjtën ditë nga Gjykata e Shkallës së Parë Berat, e cila kishte dhënë për të masën e sigurisë “arrest me burg” për veprat penale të sipërpërmendura.
Votim elektronik ose protesta popullore
Një aksion politik mbarëqytetar sepse në fund të fundit çdo shqiptar duhet t’i bëjë vetes pyetjen: A mund të ndërtojë jetën e tij, të fëmijëve të tij, të fëmijëve të saj, në një vend ku nuk garantohet vota? A ia vlen, të ngrihemi për të garantuar lirinë e votës, dinjitetin dhe lirinë individuale që vjen përmes lirisë së votës?
PD po nis shqyrtimin e të gjitha opsioneve, të aksionit politik qytetar të protestave, për të arritur përmes një bashkimi të madh qytetar, atë që kjo qeveri e kriminalizuar dhe e korruptuar deri në palcë ka refuzuar ta bëjë tashmë përmes rrugës institucionale
Kryetari i PD, Lulzim Basha deklaroi dje nisjen e protestave popullore në mbarë vendin si mënyrën e vetme në betejën për të garantuar zgjedhje të lira dhe të ndershme në një kohë kur mazhoranca refuzon projektin për votimin elektronik. “Mbledhja e grupit parlamentar më dha rastin të informoj edhe parlamentarët tanë për rezultatet e vizitës time në Uashington, Bruksel dhe Berlin, me theks të veçantë për angazhimin e faktorit ndërkombëtar, partnerëve tanë në Shtetet e Bashkuara të Amerikës dhe në Bashkimin Europian, për zgjedhje të lira dhe të ndershme në Shqipëri. Çështja e zgjedhjeve të lira dhe të ndershme në Shqipëri është e lidhur me problemin e madh të kriminalizimit të politikës, të krimit të organizuar, të drogës. Këto janë probleme që opozita i ka denoncuar prej tre vitesh. Këto janë probleme për të cilat opozita ka luftuar dhe ka arritur të ndryshojë ligjet, siç është ligji për dekriminalizimin. Por, që për fat të keq, nuk po gjen zbatim për shkak të mungesës së vullnetit politik”, u shpreh kreu i PD Basha pas mbledhjes së grupit parlamentar. Kreu i PD paralajmëroi se kapja dhe lidhjet e anëtarëve të qeverisë me krimin kërcënojnë zgjedhjet e ardhshme, të cilat rrezikojnë të vidhen e të prishen. “Vullneti politik mungon sepse Edi Rama dhe koalicioni i tij qeverisës e ka lidhur fatin e tij me krimin, me drogën. Kjo u pa qartësisht edhe nga lëvizjet e fundit politike brenda koalicionit, të cilat kanë asgjësuar ‘de facto’ një koalicion politik dhe kanë shpalosur para shqiptarëve një qeveri, e cila diktohet nga bandat e krimit të organizuar. Nuk ka, në këtë kuptim, asgjë të re nga zhvillimet e fundit politike brenda qeverisë. Por ka diçka të dobishme për çdo shqiptar dhe shqiptare, të djathtë apo të majtë, edhe për partnerët tanë ndërkombëtarë: Dhe kjo është dëshmia jo e një, por e dy anëtarëve të kabinetit dhe anëtarëve të tjerë të mazhorancës, se lidhjet me krimin, me Balilin dhe balilajt, me habilajt dhe bandat e tjera të krimit të organizuar, Edi Rama i ka në funksion të kapjes dhe prishjes së zgjedhjeve të ardhshme parlamentare”, tha kreu i PD, ndërsa shtoi se kjo është arsyeja pse Rama nuk pranon votimin elektronik. “Ndonëse votimi elektronik nuk zgjidh çdo problem, por në masë të madhe skemën kriminale të përdorimit të bandave, të drogës, të policisë tutore të kanabisit, të policisë që sillet si bandë për zgjedhjet. Pa dyshim që votimi elektronik është një masë, e cila jep besim tek votuesit”, u shpreh Basha. I pyetur nga gazetarët në lidhje me aksionin politik të opozitës Basha tha se, PD do t’i prijë betejës për garantimin e zgjedhjeve të lira.
– Mbështetet kjo ide nga ndërkombëtarët z.Basha dhe nga ambasadori i OSBE-së?
Nuk ka fare rëndësi se çfarë mendojnë individët. Zgjidhjet që ne kemi shtruar në tavolinë janë plotësisht të mundshme dhe unë kam patur rastin ta diskutoj edhe sot me bashkëbiseduesit që kanë qenë të pranishëm në Partinë Demokratike. Por mesazhi që kam për shqiptarët sot dhe që ndava edhe me anëtarët e grupit, është se koha për zgjidhje institucionale po mbaron me shpejtësi. Nuk ka vullnet për zgjidhje institucionale. Qeveria po luan me kohën. Çdo ditë që kalon është një alibi për të shteruar opsionet e zgjidhjeve institucionale. Ndaj koha po vjen për një aksion mbarëqytetar, një aksion politik mbarëqytetar.
– E keni fjalën për protesta?
Sigurisht! Një aksion politik mbarëqytetar sepse në fund të fundit çdo shqiptar duhet t’i bëjë vetes pyetjen: A mund të ndërtojë jetën e tij, të fëmijëve të tij, të fëmijëve të saj, në një vend ku nuk garantohet vota? A ia vlen, të ngrihemi për të garantuar lirinë e votës, dinjitetin dhe lirinë individuale që vjen përmes lirisë së votës?
Unë besoj se shumica dërrmuese e shqiptarëve i përgjigjen pozitivisht kësaj pyetjeje, sepse e kundërta do të thotë një Shqipëri pa të ardhshme. Ndaj Partia Demokratike po nis shqyrtimin e të gjitha opsioneve, të aksionit politik qytetar të protestave, për të arritur përmes një bashkimi të madh qytetar, atë që kjo qeveri e kriminalizuar dhe e korruptuar deri në palcë ka refuzuar ta bëjë tashmë përmes rrugës institucionale.
Ju jeni të gjithë dëshmitarë, publiku është dëshmitar që unë si kryetar i opozitës, si kryetar i Partisë Demokratike prej tre vite e gjysmë, jam përpjekur dhe kam luftuar fort për zgjidhje institucionale. Dëshmitë tronditëse që vijnë nga vetë gjiri i qeverisë tregojnë që ky është një gjiriz dhe jo më kornizë institucionale. Ndaj u takon qytetarëve të marrin përsipër fatet e tyre, opozitën dhe Partinë Demokratike do t’i kenë në ballë të kësaj beteje.
Demokracia e rrezikuar, krimi dhe qeveria, duart tek zgjedhjet
Në një nga mjediset e Senatit amerikan u zhvillua dje një forum mbi kërcënimin terrorist dhe rrezikun e sulmeve kibernetike. Në forum morën pjesë anëtarë të parlamenteve të disa vendeve evropiane përfshi Shqipërinë, Kosovën, Austrinë, Bullgarinë, Maqedoninë, Kroacinë dhe Gjermaninë. Ky takim zhvillohet në një kohë kur në Shtetet e Bashkuara po zhvillohet një debat i madh pas urdhrit të presidentit Trump për të ndaluar qytetarë të disa vendeve me shumicë myslimane për të hyrë në Shtetet e Bashkuara, si masë sigurie për të parandaluar sulme si ato që janë parë në Evropë.
Synimi i forumeve të tilla është pikërisht shkëmbimi i ideve dhe përvojave për të parandaluar sulme terroriste nga Shteti Islamik dhe për të parë rrugët e bashkëpunimit mes vendeve për të ulur rrezikun pas kthimit në vendet e origjinës të luftëtarëve që kanë qenë pjesë e luftimeve të këtij grupi në Irak dhe Siri.
Ky forum mblodhi dje anëtarë të parlamenteve të disa vendeve të Ballkanit dhe Evropës, të cilët shkëmbyen shqetësimet e tyre për situatën e sigurisë dhe kërcënimin e sulmeve terroriste sidomos pas krizës së refugjatëve në Evropë që ka lejuar hyrjen pa kontroll të një numri të madh njerëzish nga vendet e Lindjes së Mesme. Takimi është një nismë e senatorit republikan nga Oklahoma, Jim Inhofe dhe ish-ministrit shqiptar të Mbrojtjes, Fatmir Mediu. Në takim foli edhe ish-kryeministri i Shqipërisë, Pandeli Majko, i cili shpjegoi situatën e sigurisë në vend dhe nevojën për një ndërgjegjësim më të madh mbi kërcënimin terrorist.
Takimi ishte me dyer të mbyllura dhe kamera e “Zërit të Amerikës” u lejua vetëm për pak kohë, në mënyrë që pjesëmarrësit të ishin sa më të hapur në shprehjen e mendimeve të tyre. “Zëri i Amerikës” bisedoi pas takimit me ish-ministrin e Mbrojtjes, Fatmir Mediu.
– Zoti Mediu, sa real është ky kërcënim për Shqipërinë?
Asnjë vend në botë nuk është i imunizuar nga sulmet terroriste apo probleme të tjera që kanë të bëjnë me shqetësimet e sigurisë, përfshi këtu edhe çështjen tjetër që u shtrua, kërcënimet e sulmeve kibernetike. Është e rëndësishme që faktorët politikë të çdo vendi ta vlerësojnë atë maksimalisht dhe të gjejnë mënyrat e koordinimit për të parandaluar veprimet. Një nga shqetësimet që ka sot Ballkani është masa e madhe e njerëzve apo atyre që njihen si foreign fighters, të cilët kanë luftuar në Siri, por edhe kthimi i tyre, për më tepër tani stategjia e ISIS është më tepër sesa për të rekrutuar, më shumë sesa për të krijuar vatra të tilla, të cilat mund të strukturohen dhe të godasin sigurinë e vendit tonë dhe jo vetëm të vendit tonë, por edhe pjesët e tjera të Ballkanit edhe të Evropës dhe Shtetet e Bashkuara të Amerikës.
– Çfarë masash ka marrë qeveria juaj për të parandaluar sulme të mundshme terroriste sidomos pas rrezikut që shfaqet nga kthimi i luftëtarëve që kanë marrë pjesë në luftimet në Siri?
Kuvendi i Shqipërisë mori disa nisma ligjore përsa i përket rekrutimit, domethënë konsiderimin e tyre si vepër penale. Mendoj se ka nevojë për një diskutim më të gjerë për këtë çështje sepse nuk është çështje mendoj vetëm e qeverisë, por e gjithë klasës politike shqiptare dhe aktorëve të tjerë, sidomos e atyre që merren me predikimin apo me pjesën fetare. Është shumë e rëndësishme për të parë sesi mund të risocializohet kjo pjesë e atyre që kanë vajtur duke qenë viktima të kësaj lufte, por njëkohësisht për të parë se si mund të kontrollojmë të gjithë atë kthim të njerëzve që vijnë me synime të tjera terroriste duke ardhur në një mënyrë edhe më të organizuar dhe me një qëndrim shumë më të ashpër sesa kur u nisën për në Siri. Padyshim që ka struktura të shtetit duke nisur nga ato të inteligjencës dhe të sigurisë, të cilat merren me këto çështje, por besoj se ka nevojë për një strategji më të koordinuar të Shqipërisë edhe në këndvështrimin global, por edhe sidomos në këndvështrimin rajonal sepse flasim për një siguri që cenon nga pikëpamja rajonale dhe si vende ne kemi nevojë për shkëmbim inteligjence, por edhe koordinim të veprimeve tona konkrete.
– Ju keni qenë këto ditë këtu në Shtetet e Bashkuara dhe jam e sigurtë që keni parë protestat e organizuara nga amerikanët që kundërshtojnë urdhrin ekzekutiv të presidentit Trump për të ndalur hyrjen në vend të imigrantëve dhe refugjatëve nga shtatë vende kryesisht myslimane. Cili është mendimi juaj për këtë urdhër?
Të vish nga një vend si Shqipëria që për 45 vjet e ka patur të pamundur që të lëvizësh në pjesë të tjera të botës dhe Amerikën e ka pas ëndërr dhe pas një procesi të vështirë të liberalizimit të vizave, natyrisht që ndjej një sens keqardhje. Por nëse si qytetar shqiptar ndjej këtë sens, padyshim që duhet të kuptoj që edhe presidenti i Shteteve të Bashkuara të Amerikës interesin primar ka sigurinë e Amerikës dhe mbrojtjen e jetës së qytetarëve amerikanë. Ajo që është e rëndësishme është që një proces vettingu në këto kohëra të sotme është i domosdoshëm. Kjo është ngritur prej kohësh. Sistemi duhet patjetër të filtrojë të gjithë ata njerëz që duan të lëvizin dhe njëkohësisht të shmangë ata, të cilët kanë qëllime të këqija, qëllime terroriste.
– Të ndalemi pak tek politika në Shqipëri. Jeni pesë muaj larg zgjedhjeve dhe vetëm tani po intensifikohet retorika për reformën zgjedhore. A mendoni se reforma zgjedhore do të përfundojë në kohë?
Ka kohë që e kemi bërë këtë debat. Për herë të parë mbas 16 vjetësh, Shqipëria nuk kryen reformën zgjedhore. Dhe kjo për mendimin tim në mënyrë të qëllimshme nga ana e mazhorancës për ta prurë reformën në limite të fundit dhe për të bërë ndryshime minimale dhe jo thelbësore që nuk garantojnë votën e qytetarëve. Në muajin maj Partia Demokratike dhe një pjesë e opozitës ka paraqitur rekomandimet e veta si për numërimin elektronik edhe për elementë të tjerë të rëndësishëm. Partia Republikane po ashtu në fund të shtatorit ka paraqitur rekomandimet e saj. Ka paraqitur LSI-ja, një grup partish politike dhe disa propozime të fundit të Partisë Socialiste. Çfarë e ka penguar këtë komision që të arrijë e të veprojë? Thjesht vetëm mungesa e vullnetit politik nga ana e mazhorancës. Bindja ime është që mazhoranca vazhdon në rrugën e saj të idesë për të kontrolluar zgjedhjet jo nëpërmjet një procesi të drejtë ku qytetarët të jenë të lirë të votojnë, por në lidhje të ngushta me krimin, me trafikun e drogës edhe manipulimin e zgjedhjeve, të provuara edhe nga ne si opozitë, por sidomos nga ndërkombëtarët në zgjedhjet e 2015-ës.
– Një problem i mprehtë për Shqipërinë është përhapja e marijuanës, si dhe lufta kundër krimit të organizuar dhe korrupsionit. Duket se vendi juaj po dështon. Si mund të zgjidhet ky problem që ka ekzistuar si në qeverinë e mëparshme ashtu edhe në këtë të sotmen? A është kapur politika nga krimi i organizuar?
Padyshim që fenomeni i trafikut të drogës nuk është një fenomen i ri, por përmasat që ka marrë gjatë kësaj qeverie, qëllimi i kësaj qeverie për të mos e luftuar trafikun e drogës, biles për ta stimuluar atë, sidomos në kultivimin e marijuanës në gjithë territorin e Shqipërisë, në qoftë se kishim raste të shkëputura në Lazarat, tashmë kemi në të gjithë territorin e Shqipërisë, të ardhurat nga trafiku i drogës janë me miliarda dollarë dhe padyshim që interesin e kanë për të riinvestuar në interesin e tyre për t’u futur dhe për t’u lidhur me politikën. Mendoj që vëzhgime të ndryshme edhe nga shtypi ndërkombëtar për lidhje të segmenteve të shtetit me trafikun e drogës përbëjnë një kërcënim real për të ardhmen e demokracisë shqiptare, jo vetëm në procesin zgjedhor, por në tërë procesin tonë të anëtarësimit në Bashkimin Evropian dhe sidomos të funksionimit të një shteti normal, i cili ka synim kryesor sigurimin e jetës së qytetarëve dhe sidomos luftën kundër trafiqeve ilegale.
– Ju do të jeni këtu në Mëngjesin e Lutjeve të enjten. Çfarë prisni nga ky mëngjes këtë radhë?
Unë kam një kohë të gjatë bashkë me një grup kolegësh të majtë dhe të djathtë, domethënë kemi një marrëdhënie prej vitesh, kemi ndërtuar një marrëdhënie të rëndësishme edhe me senatorët dhe kongresmenët dhe përfaqësues të administratës. Padyshim është një marrëdhënie shkëmbimesh normale të njohjes së problematikës dhe një moment ku është si presidenti amerikan dhe autoritetet më të larta ku besoj interesi primar është ndërtimi i komunikimit, i koordinimit të marrëdhënieve si në nivel rajonal edhe në nivel global. Mendoj që është një nga aktivitetet më të jashtëzakonshme të paktën në historinë time 26-vjeçare si politikan. Shumë njerëz e marrin në këndvështrimin religjoz, nuk është aspak i tillë. Janë 176 shtete nga prejardhje fetare nga më të ndryshme nga i gjithë globi ku interesim primar është të shohim sesi të funksionojmë për t’i shërbyer më të mirës.
Steve Bannon: Jemi në luftë me terrorizmin
Jim Edwards
Tani që presidenti Donald Trump ka shtuar Steve Bannon në Këshillin e Sigurisë Kombëtare (pasi ka hequr drejtuesin e Inteligjencës Kombëtare dhe kreun e Shefave të Stafit), duhet të analizojmë edhe një herë mënyrën se si Bannon shikon botën dhe specifikisht si shikon sigurinë kombëtare.
Ish-kreu i Breitbart i ka diskutuar këndvështrimet e tij gjatë një takimi me Institutin e Dinjitetit Kombëtar, një grup konservator fetar që mbajti një konferencë në Vatikan në vitin 2014. Një regjistrim i takimit është përftuar nga “BuzzFeed”. Gjatë këtij takimi, Bannon ka përshkruar një peizazh apokaliptik të historisë moderne. Ai ka thënë se Perëndimi ka dalë vetëm kohët e fundit nga “Epoka e Errësirës” që ishte fillimi i shekullit 20. Edhe pse kapitalizmi ka nxitur një epokë të shkurtër prosperiteti, tha ai, po kërcënohet nga ai që e quan “barbaritet i ri” të terrorizmit islamik, një kërcënim që mund të zhdukë shekuj të tërë zhvillimi.
“Ndodhemi në fazat fillestare të një konflikti brutal dhe të përgjakshëm”, tha ai gjatë konferencës. “Barbariteti i ri që po nis, mund të çrrënjosë plotësisht gjithçka që kemi arritur gjatë 2 mijë, 2,500 viteve të fundit”. “Këto këndvështrime janë veçanërisht interesante për shkak të urdhrit ekzekutiv të firmosur ditën e premte nga presidenti Trump, që ndalon përkohësisht udhëtimin nga shtatë vende të mëdha myslimane dhe frenon përfundimisht praninim e refugjatëve sirianë në SHBA.
Ai e ka quajtur shekullin 20 “Epokën e re të errësirës” të vdekjes dhe shkatërrimit të nxitur nga Lufta e Parë Botërore. “Ajo luftë nxiti një shekull të tërë barbarizmi të paprecedent në historinë e njerëzimit. 180 deri 200 milionë njerëz janë vrarë gjatë shekullit 20 dhe mendoj se sot, qindra vite nga atëherë, ne jemi produkt i asaj kohe. Ne jemi fëmijët e barbaritetit. Kjo mund të shihet si epoka e re e errësirës”.
Epoka e Errësirës, tha ai, ndaloi vetëm pas ngritjes së prosperitetit perëndimor. Por thotë gjithashtu se kapitalizmi po kërcënohet sot nga “barbariteti i ri”. “Ne jemi në fazat fillestare të një konflikti tepër brutal dhe të përgjakshëm. Barbariteti i ri po nis dhe do të shfarrosë gjithçka që kemi arritur”.
Ai thotë se Shteti Islamik do të përhapet në të gjithë Perëndimin po të mos frenohet. “Ne ndodhemi në një luftë të vërtetë kundër fashizmit islamik xhihadist. Unë mendoj se kjo luftë po përhapet si kancer, më shpejt nga sa mund të përballojnë qeveritë. Ndodhemi në fazat fillestare të një konflikti global dhe nëse nuk bashkohemi si partnerë me vendet e tjera, ky konflikt do të na përpijë. Shteti Islamik tashmë ka një profil në Twitter ku flet se si do ta kthejë Amerikën në një “lumë gjaku” nëse do të jetë e nevojshme. Më besoni që kjo ka për të ndodhur në Europë. Kjo do të ndodhë në Europën Qendrore dhe Perëndimore, do të arrijë tek Mbretëria e Bashkuar”.
Ai e përshkruan terrorizmin një “konflikt global”. “Duhet të përballemi me një fakt të pakëndshëm, që po zien një luftë madhore, një luftë që do të jetë globale. Do të zhvillohet në shkallë globale dhe teknologjia, media dhe aksesi i ditëve të sotme në armët e shkatërrimit në masë, do të shkaktojë një konflik global me të cilin do të duhet të përballemi. Çdo ditë që refuzojmë ta shikojmë situatën ashtu siç është, është një ditë për të cilën do të pendohemi thellë”.
Ai thotë se nacionalizmi do të mbrojë Perëndimin. “Sovraniteti individual i një vendi është diçka e mirë dhe e fuqishme. Unë mendoj se vendet e fuqishme dhe lëvizjet e forta nacionaliste i bëjnë fqinjët më të fortë dhe ndërtojnë një Europë Perëndimore dhe Shtete të Bashkuara më të pushtetshme”.
Lufta, sipas tij, do të jetë një pikë kthese disa shekuj më vonë. “Kur njerëzit pas 500 vitesh të mendojnë rreth ditëve të sotme, të mendojnë për veprimet që ne kemi ndërmarrë, çfarë do të thonë për ne? Çfarë do të thonë për mënyrën se si kemi vepruar në fillim të kësaj krize?
Prishtina dhe Beogradi, tre vendimet që presin
Shefja e diplomacisë evropiane, Federica Mogherini ka ftuar kryeministrin e Kosovës dhe atë të Serbisë në Bruksel, për raundin e ri të bisedimeve në kuadër të dialogut ndërmjet dy vendeve.
Përfaqësuesja e lartë e Bashkimit Evropian për Politikë të Jashtme dhe Siguri, Federica Mogherini, sërish ka ftuar në zyrën e saj, udhëheqësit politikë të Prishtinës dhe Beogradit, për të vazhduar dialogun për normalizimin e marrëdhënieve. Në takimin e radhës Prishtinë-Beograd në Bruksel do të marrin pjesë të dy kryeministrat, ai i Kosovës, Isa Mustafa dhe kryeministri i Serbisë, Aleksandër Vuçiç. Mediat në Serbi, shkruajnë se në këtë takim do të marrin pjesë sërish edhe dy presidentët e të dyja vendeve, Kosovës dhe Serbisë, përkatësisht Presidenti Hashim Thaçi dhe presidenti Tomisllav Nikoliç. Mirëpo, në Prishtinë, ende nuk konfirmohet pjesëmarrja e presidentit të Kosovës Thaçi. Ky i fundit dy ditë më parë shkroi në rrjetin social, se ka biseduar në telefon me kryeministrin e Serbisë, Aleksandër Vuçiç.
“Sapo zhvillova një bisedë telefonike me kryeministrin e Serbisë, Aleksandër Vuçiç. U pajtuam që të punojmë bashkërisht që nëpërmjet dialogut t’i zgjidhim të gjitha çështjet me interes reciprok e që ndërlidhen me procesin e normalizimit të marrëdhënieve mes Kosovës dhe Serbisë”, shkruan Thaçi.
Nga ana e saj ministrja e Dialogut në qeverinë e Kosovës, Edita Tahiri, ka thënë për mediat lokale se takimi i një shkurtit në Bruksel, do të jetë në linjën e rikonfirmimit të zbatimit të marrëveshjeve të arritura në të kaluarën, ndërmjet Kosovës dhe Serbisë.
“Janë tri çështje që do të diskutohen dhe të cilat po prolongohen nga Serbia. Është çështja e energjisë elektrike, përkatësisht pavarësimi i Operatorit të Sistemit të Transmisionit dhe Tregut të Energjisë Elektrike të Kosovës i njohur si (KOSTT), që po prolongohet nga ana e Serbisë. Është marrëveshja për drejtësinë dhe po ashtu edhe çështja e asociacionit të komunave me shumicë serbe”, ka thënë Edita Tahiri.
Përfaqësuesit e serbëve të Kosovës nga lista “Srpska”, ka kohë që kanë pezulluar pjesëmarrjen në institucionet e Kosovës për shkak të shkarkimit të një ministri serb nga kryeministri Isa Mustafa dhe për shkak të “mosgatishmërisë së Prishtinës zyrtare për të formuar asociacionin e komunave me shumicë serbe”, argumentojnë ata.
Zëvendëskryeministri serb në qeverinë e Kosovës, Branimir Stojanoviç, thotë se përfaqësuesit e serbëve mund të mendojnë të kthehen në institucione, vetëm nëse ka përparim: “në çështjen e formimit të asociacionit të komunave me shumicë serbe”.
“Nuk e di nëse në takimin e Brukselit do të bisedohet për kthimin e ministrave serbë në institucionet e Prishtinës. Është e rëndësishme për të vazhduar dhe të zbatohet ajo që duhet. Nëse ka një gatishmëri për të zbatuar atë për të cilën kemi dalë nga institucionet, atëherë, ne mund të mendojmë për kthim, e nëse nuk ka angazhim, unë nuk shoh se si”, citojnë mediat lokale serbe zotin Stojanoviç.
Kryeministri Isa Mustafa, nga ana e tij, ka ftuar përfaqësuesit e serbëve që të kthehen në institucionet e Kosovës, sepse vetëm aty mund të kontribuojnë për komunitetin e tyre.
“Unë dëshiroj që edhe një herë të përsëris ftesën për serbët e Kosovës, që ata të kthehen në institucionet e Republikës së Kosovës, në qeveri dhe Kuvend dhe të punojmë bashkërisht për të ardhmen e qytetarëve të Kosovës, pa asnjë dallim. Dëshiroj po ashtu të përsëris se qeveria është e përkushtuar për të implementuar marrëveshjet nga dialogu edhe marrëveshjen për asociacionin e komunave me shumicë serbe. Ne do të fillojmë me implementimin e saj në harmoni me vendimin e Gjykatës Kushtetuese dhe me marrëveshjen e parë, por me pjesëmarrje të serbëve dhe komuniteteve të tjera në këtë proces”, tha kryeministri Isa Mustafa në mbledhjen e fundit të qeverisë. Sipas kryeministrit, ky proces do të jetë i hapur dhe transparent.
Tensionet ndërmjet Prishtinës dhe Beogradit u shkaktuan pas tentimit të Serbisë që ta fusë një tren në Kosovë pa lejen e autoriteteve të Prishtinës dhe pas arrestimit nga policia franceze të ish-kryeministrit të Kosovës, Ramush Haradinaj, bazuar në një fletarresti të Serbisë.
U desh ndërhyrja e faktorit ndërkombëtar, përkatësisht shefes së diplomacisë evropiane Federica Mogherini, që të thërrasë në Buksel nivelin më të lartë politik të Kosovës dhe Serbisë për të ulur tensionet. Takimi i parë i këtij niveli u zhvillua më 24 janar dhe ai u cilësua si mjaft i vështirë nga të dyja palët, por që sipas zyrtarëve në Prishtinë dhe Beograd, u arrit të ulen tensionet e kohëve të fundit.
Papa për çështjen e refugjatëve
Ipeshkvët nga Ballkani konsultohen me Papën në Vatikan për problemin e refugjatëve. Ipeshkvë nga vendet e Ballkanit kanë biseduar në Vatikan me Papa Françeskun për gjendjen e migrantëve në vendet e tyre. Veçanërisht në Maqedoni dhe në Serbi gjendja është problematike, njoftojnë përfaqësuesit e Konferencës Ndërkombëtare të Ipeshkëve të Kirilit dhe Metodit të shenjtë, njoftoi radio Vatikani.
Kisha vazhdon të jetë e pranishme në ndihmën për refugjatët, tha Ladislav Nemet, peshkopi serb i Zrenjanit. Mbi bazën e marrëveshjes BE-Turqi numri i migrantëve ka rënë. Nga mijëra në ditë që lëviznin më parë, ndërkohë bëhet fjalë për qindra.
Ipeshkvët nga Kosova, Maqedonia, Mali i Zi dhe Serbia ishin në një të ashtuquajtur Ad-limina-vizitë tek Papa, për t’i raportuar atij lidhur me gjendjen në vendet e tyre. Ata informuan Françeskun edhe për direktivat e miratuara lidhur me qëndrimin ndaj abuzimeve seksuale të përfaqësuesve të kishës.
Tema të tjera ishin marrëdhëniet mes Papatit dhe kishës serbo-ortodokse, si dhe dialogu ndërreligjoz mes katolikëve dhe myslimanëve në Kosovë. Në Mal të Zi dhe në Maqedoni për Kishën Katolike është e vështirë të mbajë marrëdhënie zyrtare me kishën ortodokse, tha ipeshkvi Nemet. “Edhe për arsyen, se atje po krijohen kisha të reja ortodokse me mbështetje të madhe nga shteti”.
Kisha ka shumë punë për të bërë në procesin e pajtimit mes kroatëve dhe serbëve, si dhe mes shqiptarëve dhe serbëve. “Ka shumë probleme dhe ne mund të japim një kontribut pozitiv”, tha Nemet.
Ipeshkvët i propozuan kreut të Kishës Katolike, që ta ndajë konferencën ndërkombëtare ipeshkvnore nga konferencat ipeshkvnore në nivel kombëtar. Sfida më e madhe, sipas ipeshkvit Nemet, është “të ruhet fryma e bashkëpunimit mes katër vendeve”. 90 për qind e katolikëve në konferencën ipeshkvnore të Ballkanit jetojnë në Serbi.
Trump nuk fal, shkarkon Prokuroren e Përgjithshme
Shtëpia e Bardhë njoftoi se ka shkarkuar Prokuroren e Përgjithshme në detyrë Sally Yates, për arsye se refuzoi zbatimin e urdhrit ekzekutiv të Presidentit Donald Trump për emigracionin dhe refugjatët.
Në një deklaratë, Shtëpia e Bardhë tha se zonja Yates “ka refuzuar të zbatojë një urdhër të ligjshëm që synon të mbrojë qytetarët e Shteteve të Bashkuara”.
Të hënën pasdite, zonja Yates u tha juristëve të Departamentit të Drejtësisë të mos nxjerrin argumente ligjore në mbrojtje të urdhrit ekzekutiv të Presidentit Trump. Yates “ka tradhtuar Departamentin e Drejtësisë”, tha Shtëpia e Bardhë.
Ajo njoftoi gjithashtu se Dana Boente, prokuror i Distriktit Lindor të Virxhinias është emëruar Prokuror i Përgjithshëm në detyrë.
Zoti Boente e bëri betimin të hënën mbrëma në orën 21:00 sipas orës së Uashingtonit.
Urdhri ekzekutiv i Presidentit Trump çoi në një përplasje mes Shtëpisë së Bardhë dhe zonjës Yates, e cila ishte emëruar nga ish-Presidenti Barack Obama dhe duhet të shërbente si Prokurore e Përgjithshme deri në konfirmimin e zotit Jeff Sessions, i emëruar në këtë post nga zoti Trump.
Trump mbron urdhrin ekzekutiv
Presidenti Donald Trump ka vazhduar t’i dalë në mbrojtje urdhrit ekzekutiv për të ndaluar futjen e refugjatëve dhe udhëtarëve nga shtatë vende kryesisht myslimane, ndërkohë që grupe për të drejtat e njeriut janë betuar të vazhdojnë padi ligjore dhe kur në qytete të ndryshme mijëra vetë po zhvillojnë protesta. Demokratët po përgatiten të propozojnë projektligje për ta bllokuar zbatimin e urdhrit.
Në një seri komentesh në Twitter të hënën, zoti Trump tha se sekretari i Sigurisë Kombëtare, John Kelly i kishte thënë se “çdo gjë po ecën mirë, vetëm me probleme të vogla”.
Pentagoni po harton një listë me emrat e irakianëve, të cilët kanë mbështetur personelin amerikan dhe të koalicionit për t’i përjashtuar ata nga vendimi i Presidentit Trump.
Zyrtarët thanë të hënën se lista do të përfshijë ata që kanë demonstruar ndjeshëm angazhimin e tyre në mbështetje të forcave amerikane. Ajo do të përfshijë kategori të tilla si përkthyesit, shoferët dhe forcat irakiane që mund të jenë duke u stërvitur në SHBA.
Reagon ish-presidenti Obama
Një zëdhënës i ish-presidentit Barack Obama thotë se zoti Obama “në thelb nuk pajtohet” me diskriminimin që vë në shënjestër njerëzit bazuar në fenë e tyre.
Deklarata nuk e përmend në mënyrë konkrete urdhrin e Presidentit Donald Trump, ndonëse aludon për të.
Shtëpia e Bardhë tha se urdhri në fjalë nuk është ndalim për myslimanët, sepse dhjetëra shtete me shumicë myslimane nuk përfshihen në të.
Zëdhënësi i zotit Obama, Kevin Lewis, thotë se Obama është i inkurajuar nga përmasat e angazhimit që po shihen kudo në vend. Ai i referohej protestave kundër urdhrit të zotit Trump mbi emigracionin dhe refugjatët.
Ndërkohë, një numër në rritje ligjvënësish republikanë kanë shprehur shqetësime në lidhje me urdhrin ekzekutiv të presidentit Trump.
Urdhri, i cili u nënshkrua të premten, përfshin një ndalim 120 ditësh të pranimit të refugjatëve dhe një ndalin 90 ditësh për persona nga Iraku, Irani, Siria, Somalia, Sudani, Libia dhe Jemeni.
Urdhri ekzekutiv dhe aeroportet
Zbatimi i tij është shoqëruar me konfuzion në aeroportet amerikane, ku në disa raste njerëz me statusin e banorët të përhershëm në SHBA janë ndaluar për t’u marrë në pyetje para se t’u lejohej futja në vend.
Sekretari i Sigurisë Kombëtare nxori të dielën një deklaratë ku përpiqet të sqarojë urdhrin, duke thënë se e konsideron “futjen e personave me statusin e banorit të përhershëm si çështje të sigurisë kombëtare”.
Në një deklaratë të veçantë, Departamenti i Sigurisë Kombëtare tha se qeveria ruan të drejtën të anulojë viza në raste të caktuara, nëse është e nevojshme, në të mirë të sigurisë kombëtare.
Këto sqarime pasuan një urdhër nga një gjykatë federale në Nju Jork për të pezulluar përkohësisht deportimin e personave që kishin mbërritur në aeroporte amerikane me viza të vlefshme ose të cilëve u ishte miratuar statusi i refugjatit.
BE kërkon bashkëpunim me SHBA-në për reformat në Ukrainë
Tetë shtete anëtare të Bashkimit Evropian kanë bërë thirrje për më shumë bashkëpunim midis Shteteve të Bashkuara dhe BE-së, për t’i çuar përpara reformat në Ukrainë.
Sipas një dokumenti që ka parë Radio Evropa e Lirë, “Ukraina ka potencial për t’u bërë rast pozitiv për rajonin”, porse “do të duhet angazhim afatgjatë politik dhe mbështetje ndërkombëtare”.
Plani vjen në kohën e shqetësimeve në rritje në Evropë se administrata e presidentit të ri të SHBA-së, Donald Trump, do të rrisë bashkëpunimin me Rusinë, duke reduktuar mbështetjen për Ukrainën dhe duke lënë BE-në me më pak ndikim.
Dokumenti, i cili do të diskutohet nga ministrat e Jashtëm të BE-së më 6 shkurt, është hartuar nga Britania, Danimarka, Estonia, Finlanda, Letonia, Lituania, Polonia dhe Suedia.
Në dokument thuhet se “BE-ja dhe SHBA-ja kanë interes të përbashkët për mbështetjen e reformave të Ukrainës”.
Qeveritë perëndimore dhe analistët thonë se reformat gjithpërfshirëse në Ukrainë do të zvogëlojnë ndikimin e Rusisë, e cila ka aneksuar Gadishullin e Krimesë në vitin 2014 dhe mbështet konfliktin separatist në lindje të Ukrainës.
Turqia i kërkon Trumpit rishqyrtimin e urdhrit
Urdhri i presidentit të Shteteve të Bashkuara, Donald Trump, për ndalimin e hyrjes së refugjatëve në SHBA, është “fyes”, tha zëvendëskryeministri turk, Numan Kurtulmus.
Është ky reagimi i parë i Ankarasë për urdhrin e diskutueshëm.
Kurtulmus i bëri thirrje Trumpit të rishqyrtojë vendimin, i cili, siç tha, është motivuar nga islamofobia, raporton “AFP”.
“Është e pamundur të pranohet kjo. Politika duhet të rishqyrtohet”, tha Kurtulmus, i cili është edhe zëdhënës kryesor i qeverisë turke.
Të premten, Trump ka lëshuar një urdhër ekzekutiv që u ndalon hyrjen në SHBA të gjithë refugjatëve dhe udhëtarëve nga shtatë vende me shumicë myslimane: Irani, Iraku, Libia, Somalia, Sudani, Siria dhe Jemeni.
Urdhri, tash për tash, vlen për 90 ditë.
Trump e ka mbrojtur këtë masë, duke thënë se ajo do ta bëjë SHBA-në të sigurt nga “terroristët radikalë islamikë”.
Kurtulmus tha se është “jashtëzakonisht fyese që një vendim i tillë është marrë në një vend si SHBA-ja, që njihet si komb me fe dhe grupe të ndryshme etnike”.
Turqia strehon 2.7 milionë refugjatë sirianë, që kanë ikur nga lufta gati gjashtëvjeçare në vendin e tyre.
Kryesore
Continue to the category
