Portali “Hashtag.al” thotë se Ambasada e SHBA-ve në Tiranë ka intimiduar të paktën 3 prej gjyqtarëve të zgjedhur si anëtarë të Këshillit të Emërimeve në Drejtësi. Një burim i rezervuar diplomatik ka informuar “Hashtag.al” për një histori të pazakontë të ndodhur të enjten në selinë e ambasadës. Diplomati informon se: Një numër gjyqtarësh janë thirrur me urgjencë në ambasadë më datën 26 janar. Përpara tyre është paraqitur një punonjëse e shërbimeve konsullore të ambasadës, e cila u ka kërkuar pasaportën.
Më pas mbi pasaportë u ka vendosur një vulë ku revokohej viza që ata mbanin dhe u ka thënë që të vazhdonin dhe të dilnin nga ambasada. Kanë anuluar vizën e këtyre gjyqtarëve. Unë nuk e di saktësisht numrin e gjyqtarëve me vizë të anuluar, por di me saktësi se të paktën 3 nga këta gjyqtarë, të nesërmen janë zgjedhur si anëtarë të Këshillit të Emërimeve në Drejtësi. Pra, ambasada e ka kryer veprimin vetëm 24 orë para se të bëheshin zgjedhjet për KED-in.
A ishte ky veprim një metodë shantazhi e aplikuar nga ambasada?
Diplomati i kontaktuar nga “Hashtag.al” shkon dhe më tej dhe thotë se, veprimi i ambasadës mund të jetë i lidhur me procesin e Vettingut që do të zhvillohet në muajt e ardhshëm.
Logjika ta do që ky veprim nuk ishte thjesht një shantazh imediat për shkak të zgjedhjeve në Këshillin e Emërimeve. Por efektet e këtij veprimi mund të shkojnë edhe më tej. Sepse të gjithë gjykatësit do i nënshtrohen procesit të Vettingut dhe kur të merren në pyetje nga komisioni vlerësues anulimi i vizës mund të përdoret si pretekst për t’i goditur ata, shprehet burimi diplomatik.
Por si i përzgjedh ambasada amerikane gjyqtarët dhe zyrtarët, të cilëve u anulon vizat? Mbi ç’bazë? Mbi cilën metodologji apo të dhëna? Kush e informon ambasadën? Kush ja dorëzon listën e “gjyqtarëve të padëshiruar”?
Ambasadori amerikan Donald Lu vitin e fundit ka mbajtur një qëndrim të njëanshëm dhe tërësisht pro ambicieve të Partisë Socialiste në lidhje me reformën në drejtësi.
Ky qëndrim sugjeron mundësinë se lista e gjyqtarëve, të cilëve u është revokuar viza të mund të jetë në fakt dhe një listë e hartuar ose e ndikuar nga synimet politike të Partisë Socialiste.
Ndërsa burimi diplomatik që informoi “Hashtag.al”, ofron një analogji interesante kur shpjegon veprimin e ambasadës:
Këto praktika të ambasadës janë tejet të dyshimta dhe jotransparente. Të sjellin ndërmend ato shenjat që u vendoseshin në trup të burgosurve hebrenj. Ata që kishin shenjën duhej të shkonin në dhomat e gazit. E tillë duket dhe kjo vulë mbi pasaportat e gjyqtarëve dhe me gjasë do të përdoret si shenjë identifikuese gjatë procesit të Vettingut”, shprehet burimi.
“Hashtag.al”

Lista me 9 anëtarët e zgjedhur të KED-it më 27 janar:
1- Vladimir Kristo nga Gjykata Kushtetuese
2- Besnik Imeraj nga Gjykata Kushtetuese
3- Mirela Fana nga Gjykata e Lartë (dha dorëheqjen dje)
4- Rovena Gashi  nga Prokuroria e Përgjithshme
5 -Brikena Ukperaj Lubonja nga Gjykata e Apelit
6- Ervin Metalla nga Gjykata e Apelit
7- Gentian Trenova nga zyrat e Prokurorisë pranë Gjykatave të Apelit
8- Fatjona Mencaj nga zyrat e Prokurorisë pranë Gjykatave të Apelit
9- Kastriot Selita nga Gjykata Administrative e Apelit

Presidenti Bujar Nishani do të mbledhë Këshillin e Sigurisë Kombëtare ditën e premte, më datë 3 shkurt 2017, ora 12.00. Lajmin e dha Presidenca nëpërmjet një njoftimi për shtyp. Vendimi u mor dje dhe kjo mbledhje vjen pas kërkesës së kreut të Kuvendit, Ilir Meta. Këshilli i Sigurisë Kombëtare do të mblidhet për të diskutuar për mosarrestimin e Klement Balilit dhe për situatën e krimit në vend. Thirrja e Këshillit të Sigurisë Kombëtare për çështjen “Balili” u shndërrua në shkëmbim replikash mes Presidencës, ministrit të Brendshëm Tahiri dhe Petrit Vasilit të LSI-së.
Presidenca pranoi kërkesën e kreut të Kuvendit, Ilir Meta, për mbledhjen e Këshillit të Sigurisë për çështjen “Balili”. Ajo thotë se ekziston shqetësimi i partnerëve amerikanë dhe të tjerë ndërkombëtarë, të cilët paraqesin rezerva në drejtim të punës së organeve përgjegjëse për shkak të mosndalimit të tij në kohë dhe zbatimit të detyrave të përcaktuara në akte ndërkombëtare dhe legjislacionin vendas. “Si dhe rrezikut që ekziston tashmë nga mosveprimi i agjencive ligjzbatuese të vendit tonë, në drejtim të goditjes ndaj krimit të organizuar, trafiqeve të paligjshme apo edhe bazave të tyre, që mund të kontrollohen nga njerëz të politikës dhe shtetit”, tha Ols Lafe, drejtor i Kabinetit të Presidentit.
Kryetari i Kuvendit të Shqipërisë, Ilir Meta, në cilësinë e anëtarit të Këshillit të Sigurimit Kombëtar (KSK) i është drejtuar Presidentit të Republikës, Bujar Nishani për thirrjen në një kohë sa më të shpejtë të mbledhjes së Këshillit të Sigurimit Kombëtar, për çështjen “Balili”. Kjo kërkesë vlerësohet serioze, pasi ajo paraqitet nga kryetari i Kuvendit të Shqipërisë, si dhe për shkak të problematikave që parashtrohen, të cilat kanë të bëjnë me:
– Rrezikshmërinë e lartë shoqërore të shtetasit Klemend Balili, përcjellë nga organet kompetente shqiptare apo ndërkombëtare.
– Shqetësimin e partnerëve tanë të SHBA dhe të tjerë ndërkombëtarë, të cilët paraqesin rezerva në drejtim të punës së organeve tona përgjegjëse për shkak të mosndalimit të tij në kohë dhe zbatimit të detyrimeve të përcaktuara në akte ndërkombëtare dhe legjislacioni vendas.
– Si dhe rrezikut që ekziston, tashmë, nga mosveprimi i agjencive ligjzbatuese të vendit tonë, në drejtim të goditjes ndaj krimit të organizuar, trafiqeve të paligjshme apo dhe bazave të tyre që mund të kontrollohen nga njerëz të politikës dhe shtetit. Për këto arsye Presidenti i Republikës në cilësinë e kryetarit të Këshillit të Sigurimit Kombëtar ka vendosur të thërrasë mbledhjen e Këshillit me qëllim dëgjimin e të gjitha argumenteve të parashtruara në kërkesë, si dhe duke i analizuar dhe duke këshilluar me të gjithë anëtarët e Këshillit.

Deputetja demokrate, Jorida Tabaku e cilësoi dje raportin e FMN si konfirmim të shqetësimeve të ngritura prej kohësh nga opozita. “Raporti FMN për investimet e huaja rikonfirmon atë çfarë opozita ka kohë që e shpreh me shqetësim. Kemi më pak investime të huaja, jemi të parafundit në rajon, qeveria nuk ka asnjë politikë stimuluese fiskale apo ekonomike. U mungon vizioni sepse fuqitë i kanë harxhuar për tendera e koncesione. Ironikisht, sot kryeministri dhe ministri i Financave kanë shpallur nismën djallëzore të Rilindjes ‘Blej Shqipërinë përmes koncesionit’. Duan të shesin një vend, të cilin e kanë nxjerrë në koncesion, duan të shesin të ardhmen e qytetarëve pasi dështuan në çdo politikë ekonomike. Duan t’ia shesin bizneseve pranë tyre. Mbasi për 4 vite nuk ndërtuan asnjë shkollë të re, mbasi nuk hapën asnjë aks të ri rrugor, mbasi të ardhurat i ulen në nivele historike (vetëm vitin e fundit patën një mosrealizim prej 100 mln USD), filluan të riciklojnë premtimet e vjetra”, tha Tabaku. “Shifrat janë kokëforta, fatkeqësisht kjo mungesë vizioni, ky klientelizëm e kjo rritje kaotike taksash këto efekte ka. Kësaj mënyre qeverisje i duhet thënë jo! Taksa e sheshtë prej 9% e bën Shqipërinë përsëri konkurruese në rajon, kthen besimin e investitorëve e i jep frymë ekonomisë e biznesit! Shqipëria duhet të luftojë për çdo vend pune që krijohen në rajon! Shqipëria duhet të jetë përsëri konkurruese”, u shpreh deputetja e PD.

Ministri në detyrë i Drejtësisë, Ylli Manjani, reagoi pas akuzave të deputetit socialist Piro Lutaj gjatë Komisionit të Ligjeve. “Do presim vizitën mjekësore të ministrit të Drejtësisë”, tha Lutaj dje gjatë debatit për shkarkimin e Ylli Manjanit. Ndërsa në reagimin e tij ministri në detyrë shprehet se, ai duhet të kërkojë analizat e veta dhe të kryetarit të tij Edi Rama. “Përshëndetje, Po lexoj në një portal që, një deputet koti i Komisionit të Ligjeve kërkon analizat e mia mjekësore..! I sugjeroj deputetit rilindas të kërkojë analizat e Kryetarit të vet! Nëse nuk ja jep i sugjeroj ta kërkojë në memorien e shtypit shqiptar. Ja ka botuar Gazeta Tema kohë më parë”, shkruan Manjani. Duket se Rama ka urdhëruar një fushatë denigrimi ndaj ish-ministrit Manjani, i cili e akuzoi direkt për kapje të qeverisë nga trafikantët e drogës dhe nga krimi i organizuar. I pari që u hodh në sulm ishte dje deputeti Piro Lutaj, pas një debati me Eduard Halimin, deputetin e Partisë Demokratike. Por duket se Manjani e ka pasur të gatshëm përgjigjen për Lutajn, duke i kujtuar atij akuzat që i ka bërë këshilltari i tij meditiak Mero Baze në gazetën që drejton.

Ish-Kryeministri Berisha publikoi denoncimin e një qytetari, i cili tregon skemën se si Veliaj dhe njerëzit pranë tij po vjedhin përmes projektit për rikonstruksionin e Pazarit të Ri. “Në Banditistan pas çdo vjedhjeje qëndron një pushtetar! Qytetari dixhital denoncon: Ndëshkimin e tij antiligjor nga Veliaj që përdor projektin e rindërtimit të Pazarit të Ri për xhepat e tij, kunatit të Lal plehut dhe deputetit Qefalia! Shkatërrimin antiligjor të biznesit të tij dhe bizneseve të tjera nga Veliaj për të mbushur xhepat e tij, kunatit të Lal plehut dhe deputetit Qefalia! Në Banditistan pas çdo vjedhjeje qëndron një pushtetar! I bëj thirrje Prokurorisë të nisë me përparësi hetimin dhe të vendosë para ligjit hajnat e shtetit!”, shprehet Berisha në postimin e tij. Ai ka postuar gjithashtu të plotë edhe denoncimin e qytetarit dixhital. “Zoti Berisha përshëndetje, jam një pronar biznesi në Pazarin e Ri, më saktë kam një Zgarë Korçare. E kam blerë këtë biznes para 6 muajsh 150000 euro me kredi. Sot na vijnë ushtarët e Erion Veliajt dhe na thonë se duhet ta mbyllim, pasi projekti i rikonstruksionit te Pazari i Ri e parashikon ta bëjë pastiçeri, siç ka qenë në kohën e Enverit. E kuptojmë që këta janë nostalgjikët e Enverit, por si t’ja bëjmë ne që kemi marrë kredi, si do t’i lajmë këto para? Kam 8 punëtorë që do të ngelen pa punë, po ashtu dhe dyqanet e tjera që do të mbyllen që i kap projekti. Ku do të shkojmë, si t’ja bëj unë? Vetëm të vras veten më ka ngel. I gjithë rikonstruksioni i Pazarit të Ri po bëhet vetëm për dy vetë, Erion Veliajn me kunatin e tij dhe Xhemal Qefalinë. Këta janë zotërit e ri të pazarit, pasi i kanë përvetësuar gati të gjithë bizneset në pazar. Ju lutem zoti Berisha ngrijeni si çështje, ju lutem me gjithë zemër. Faleminderit dhe ju uroj shëndet ju dhe familjes tuaj. Ju lutem në qoftë se e publikoni mos më nxirrni me emër se nga këta çfarë nuk pret”, thuhet në denoncimin e qytetarit.

Vjedhja e trojeve në Vuno ka qenë një tjetër denoncim i qytetarëve i publikuar dje nga ish-Kryeministri Sali Berisha. “Qytetari dixhital denoncon: Grabitjen e tokave në Vuno nga famozi Xhillari, Rama, këshilltarët e Ramës. Shtoj këtu që Xhillari ishte fitues i 80% të lejeve të ndërtimit të Bashkisë së Tiranës”, shkruante Berisha në postimin e tij. “Përshëndetje zoti Sali Berisha, në fshatin Vuno, në zonën e bregdetit, Jalë, Kopani, Soleil & Sea Shpk, po përpiqet të legalizojë objektet, ato objekte nuk janë të asaj kompanie dhe toka nuk i përket asaj kompanie. Pas kësaj afere janë Rama dhe këshilltarët e Ramës dhe pronar i kompanisë është Alban Xhillari”, thuhej në denoncimin e qytetarit.