Gabriel Barbosa mendon se minutat që i dhuroi Pioli në ndeshjen e fundit të vitit e kanë ndihmuar që të largojë etiketën e “të dështuarit”. 21-vjeçari nga Brazili dha një intervistë të shkurtër për mediat italiane, ku pranoi se ende nuk kishte shfaqur potencialin e tij të madh.
-Çfarë ke për të thënë për javët e para në Itali?
Jam shumë i lumtur. E di që duhet të bëj durim. Jam stërvitur çdo ditë për t’u përmirësuar, pasi dua që të jem gati sa herë të kenë nevojë për mua. Nëse keni parë ndeshjen që bëra kundër Lacios, do të kuptoni se procesi i përshtatjes po shkon mirë. Plani im është që të qëndroj në Milano për të treguar tek Interi ato që kam bërë edhe te Santosi.
-Kur the se të duhej durim ishte këshillë edhe për kritikët?
Mendoj se shumica e njerëzve që flet për mua thonë gjëra pa kuptim. Futbolli italian ka tjetër stil loje dhe përbëhet prej lojtarësh të mëdhenj. Unë erdha në moshë të re këtu dhe tani më duhet të përballem me lojtarë që kanë shumë eksperiencë. Kam mësuar shumë që prej momentit që mbërrita këtu. Mendoj se ambientimi im është çështje kohe. Asnjë lojtar nuk nis karrierën si titullar. Në Itali ka shumë lloje lojtarësh, por asnjëri nuk ka stilin tim.
-Thonë se do që të rikthehesh në Brazil…
Jo, nuk dua të shkoj në Brazil. Jam i lumtur tek Interi. Jetoj në Milano prej tre muajsh dhe po mësohem me jetesën këtu. Edhe pse dua që të luaj më shumë, jam i lumtur pasi mënyra si rrodhën ngjarjet në ndeshjen e fundit më kanë gëzuar. Tifozët u dëfryen prej meje, shpresoj të qëndroj këtu.
-Ke luajtur shumë pak, por së fundmi duket se trajneri të ka në fokus…
Unë duhet që të luaj gjithmonë, por nga ana tjetër jam me këmbë në tokë dhe them se duhet që të bëj maksimumin për të shfrytëzuar rastet që do të më jepen. Në këtë drejtim duhet që të vë në vështirësi trajnerin, duke bërë gjithmonë paraqitje të mira.
-Edhe menaxheri yt ka thënë se shpeshherë të kanë paragjykuar me pa të drejtë…
Siç e thashë edhe më lart, për mua nuk ka asgjë të re. Në botën e futbollit lejohet gjithçka, edhe pse njerëzit duhet që të tregohen të kujdesshëm. Nuk mund të flasësh për dikë pa e njohur ose pa u bazuar në fakte reale. Për mua kanë thënë se kam qenë jashtë forme, por kjo nuk është e vërtetë.
-Cili është objektivi në këtë pikë të sezonit?
Interi nuk ka treguar vazhdueshmëri gjatë kësaj kohe, prandaj them se sapo të gjejmë rrugën e duhur duhet të nisim një numër të konsiderueshëm fitoresh radhazi. Vendi i tretë më duket i arritshëm. Jam optimist, pasi kemi një ekip të kompletuar.
-Çfarë të jep kaq besim?
Unë jam i bindur se kemi një ekip të mirë, pasi trajneri ka shumë lojtarë në dispozicion. Grupi është i kompletuar dhe për trajnerin duhet vetëm që të bëjë zgjedhjet e duhura. Shikoni çfarë ndodhi kundër Lacios. Na mungonin disa lojtarë, por ata që u futën në fushë bënë që mungesa e atyre të mos ndihej. Interi ka një organikë të plotësuar. Mendoj se mund të jemi ekipi i vetëm që do të rivalizojë fort Juventusin vitet që do të vijnë.
Gabigol: Askush si unë në Itali
Alegri: Milani nuk na mundi në fushë
I zhgënjyer për finalen e humbur, por Masimiliano Alegri nuk e bën dramë dështimin kundër Milanit. Trajneri i Juventusit tha se skuadra e tij bëri gjithçka për të mos e çuar ndeshjen te penalltitë, por nuk ia doli.
“Bëmë gjithçka për të mos shkuar te penalltitë. Ne luajtëm mirë vetëm 20 minutat e para dhe pas golit të shënuar, skuadra filloi të mbrohej. Ishte shumë herët për ta bërë këtë gjë. Ndeshja mund të kishte përfunduar nga një episod, por ai nuk erdhi kurrë. Në fund, gjithçka e vendosën penalltitë. Jemi në një moment të sezonit, në të cilin kemi luajtur 27 ndeshje deri tani dhe sigurisht që do ta humbasim ndonjë rrugës”, tha Alegri.
Ai theksoi se dëmtimet që ka pasur ekipi gjatë kësaj kohe dhe ato që ndodhën gjatë ndeshjes, kushtëzuan gjithçka që ndodhi. “Na kushtuan shtrenjtë futbollistët që dolën nga fusha e lojës të dëmtuar. Bëra zëvendësime të detyruara. Penalltia në minutat e fundit nuk ishte dhe arbitrat bënë një ndeshje korrekte. Ne duhet të ishim më konkretë dhe më të saktë”, ishte analiza e trajnerit të Juventusit.
Alegri u thuri elozhe kuqezinjve për fitoren e arritur, por tha se nuk u mund në fushë, por nga penalltitë. “Sigurisht që Milani meriton komplimente, sepse bëri një ndeshje të mirë. Ata luajtën vetëm në momentin që Suso merrte topat. Kur ai nuk luajti më, edhe Milani s’kishte gjë për të bërë. Megjithatë, ishte një sfidë që u vendos nga 11-metërshat dhe ne nuk e humbëm në fushë. Kemi objektiva të rëndësishëm për të arritur dhe tani nuk duhet ta mbajmë mendjen te kjo humbje”, ka përfunduar trajneri Masimiliano Alegri.
Galliani i prekur!
I prekur dhe njëkohësisht shumë i emocionuar për suksesin e Milanit në Superkupën e Italisë ndaj Juventusit. Adriano Galliani, administratori i deleguar ishte ai që iu gëzua më shumë triumfit të Milanit dhe trofeut të 29-të dhe të fundit të fituar nga klubi kuqezi në epokën Berlusconi. Me largimin e presidentit legjendar sipas të gjitha gjasave Milanit do t’i japë lamtumirën edhe një njeri si Galliani që gjatë këtyre 3 dekadave ka punuar me mish e shpirt për t’i shndërruar kuqezinjtë në një nga klubet më të mëdhenj të botës. “Goli i Pasaliç më preku shumë emocionalisht, është gjithmonë bukur të fitosh, ia dedikojmë presidentit Berlusconi këtë sukses. Kjo është fitorja që do të mbetet gjithmonë në zemrën time, më shumë se gjithë të tjerat”, deklaroi fillimisht Galliani.
Më tej administratori i deleguar i Milanit nënvizoi: “Kemi arritur në kuotën e 29 trofeve, plus 16 vende të dyta, por kjo është një kënaqësi e jashtëzakoshme edhe për faktin se jemi rikthyer të fitojmë pas 5 vjetësh”. Galliani në fund përgëzoi gjithashtu skuadrën për paraqitjen në duelin e fituar pas goditjes së penalltive ndaj Juventusit. “I gjithë ekipi ishte i shkëlqyer, por Suso dhe Abate kanë bërë një ndeshje super. E nisëm pak të ndrojtur takimin, por zhvilluam një lojë fantastike sidomos në gjysmën e parë të pjesës së dytë. Në vitin 2016 kemi luajtur si të barabartë ndaj Juventusit, jemi në barazim 2-2 me ta”, theksoi Adriano Galliani.
Milani fiton Superkupën e 29-të të Italisë. Në Doha të Katarit kuqezinjtë mposhtën Juventusin pas goditjeje të 11-metërshave teksa koha e rregullt u mbyll në barazim 1-1. Vendimtar gabimi i Paulo Dybalasë, që i dha mundësinë talentit Pasaliç të realizonte penalltinë fituese. Juventusi kaloi në avantazh që në minutën e 18 me Giorgio Chellinin, pas një këndoreje të ekzekutuar nga Pjaniç. 20 minuta më vonë kuqezinjtë barazuan me Bonaventurën që goditi saktë me kokë aty ku nuk mund të arrinte Buffon.
Gjatë pjesës dytë, pikërisht në të 57-ën Romagnoli ishte i pafat me topin e goditur prej tij që u ndal nga traversa. Në të 76-ën rast ideal për Paulo Dybala-në, që nuk u beson syve për mundësinë e humbur. Në të 83-ë Buffon nuk i jep kënaqësinë e golit Carlos Baccas me një pritje të jashtëzakonshme. Asgjë nuk ndryshoi në minutat e mbetura, madje as në kohën shtesë, ndaj fituesi i Superkupës së Italisë do të përcaktohej vetëm pas ekzekutimit të 11-metërshave.
Marchisio goditi saktë i pari për bardhezinjtë, ndërsa për Milanin gaboi Lapadula. Mandzukic nuk e shfrytëzoi avantazhin psikologjik, me topin e goditur prej tij që përfundoi në traversë.
Bonaventura kthehu baraspeshën në goditjen pasardhëse, ndërsa në seritë e radhës shënuan Higuain e Khedira për Juventusin, si dhe Kucka e Suso për Milanin. Në serinë e pestë Donaruma bëri mrekullinë përballë Dybala-së, duke i dhënë mundësinë të riut Pasaliç të realizonte penalltinë që do të vlente trofeun e Superkupës. Festë e lotë gëzimi në radhët e kuqezinjve, ndërsa trishtimi dallohej qartë në fytyrat e kampionëve në fuqi të Italisë, që nuk e kishin menduar këtë disfatë përballë një skuadre ndjeshëm më inferiore në cilësi me shumë të rinj në përbërje.
Braziliani Oscar transferohet në Kinë
Tashmë është zyrtare, braziliani Oscar braktis futbollin europian duke u bashkuar me Shanghai SIGP në Kinë. Talenti i Chelsea-t nuk mundi të refuzonte ofertën faraonike të klubit kinez, duke u larguar nga “Blutë e Londrës” në një moment kulminant për skuadrën e Antonio Contes. Braziliani ka fituar një kampionat dhe një Kupë Lige me skuadrën londineze, por me emërimin e Contes, ai po gjente më pak hapësira, duke vendosur të bashkohet me Andre Villas Boas në Kinën e largët.
Sipas mediave britanike, shifrat e marrëveshjes janë vërtet të çmendura. Kinezët do të derdhin në arkën e Bluve plot 61 milionë euro, ndërsa vetë lojtari do të arkëtojë rreth 450 mijë euro në javë. Në këtë mënyrë, Oscar bëhet lojtari më i shtrenjtë i futbollit kinez që gjatë viteve të fundit është pasuruar me shumë emra të njohur të futbollit botëror. Largimi i 25-vjeçarit që gjatë këtij sezoni ishte aktivizuar vetëm në 11 ndeshje, do të hedhë në sulm trajnerin e Chelsea-t, Antonio Conte, i cili ka shënjestruar belgun e Romës, Radja Nainggolan.
Ish-trajneri i Italisë ka shfaqur interes për mesfushorin, por do të jetë shumë e vështirë që ta shkëpusë atë nga verdhekuqtë që në merkaton e janarit. Një tjetër element që i intereson Contes është edhe mbrojtësi Rudiger.
Mavraj kalon vizitat mjekësore, gati firma me Hamburgun
Mërgim Mavraj mund të cilësohet praktikisht futbollist i Hamburgut. Mbrojtësi i kombëtares shqiptare të premten kreu me sukses vizitat mjekësore në klinikën “Athleticum” të qytetit verior dhe me shumë gjasa do të hedhë firmën mbi kontratë.
30-vjeçari do të lidhet me Hamburgun deri në qershor 2019 dhe në arkat e Këlnit do të shkojnë 1.8 milionë euro. Vetë mbrojtësi pritet të fusë në xhep rreth 1.2 milionë euro në sezon.
Qendërmbrojtësi kuqezi do t’i bashkohet ekipit të ri më 3 janar, dy ditë para se të udhëtojë me skuadrën drejt Dubait për të kryer përgatitjet dimërore për dhjetë ditë. Hamburgu do të jetë skuadra e katërt në karrierën profesionale të Mavrajt në futbollin gjerman. Deri tani ai ka luajtur 213 ndeshje me Bohumin, Grojter Fyrthin dhe Këlnin.
“Shkoj te Astana për Europën”
Nga Rumania në Itali, për të pushuar disa pranë familjes, përpara se të nisë aventurën e re në janar me Astanën. Azdren Llullaku zgjodhi të vazhdojë karrierën në radhët e kampionëve të Kazakistanit, pavarësisht interesit nga Turqia dhe Polonia. “Sinqerisht jam shumë i kënaqur edhe për zgjedhjen që bëra. E vendosa këtë klub së bashku me familjen. Kishte edhe opsione të tjera, por në fund zgjodhëm këtë sepse luan në Champions dhe Europa League. Jam shumë i lumtur që u finalizua transferimi im te Astana”, u shpreh Azdren Llullaku.
“Kanë qenë disa skuadra në Turqi që shfaqën interes të madh. Ishin edhe Legia e Varshavës dhe Lech Poznan. Por, në fund zgjodha Astanën. Aty ishte edhe menaxheri Shkumbin Qorrmemeti dhe kjo ishte një kënaqësi edhe më e madhe për mua. Ai më ndihmoi dhe jam shumë i kënaqur”, tha Llullaku.
Transferimi te Astana është hapi më i rëndësishëm në karrierën e Llullakut, jo vetëm për nivelin e skuadrës, por edhe sepse nga kontrata 2-vjeçare, kuqeziu do të përfitojë një milion euro. “Sinqerisht këto vite që kam luajtur në Rumani, niveli ekonomik nuk ishte shumë i lartë. Prej kontratës nuk kisha mundësi të ndryshoja ekip, edhe pse e kisha shansin të fitoja disa para më tepër. Në moshën 29-vjeçare duhet të shohësh edhe pak anën ekonomike”, tha ai.
Mesfushori që u largua nga Liga e Parë rumune si golashënuesi më i mirë me 16 rrjeta të realizuara, i ka të qarta objektivat për aventurën e re. “Shpresoj që të vazhdoj të shënoj me po kaq vazhdimësi, pasi kjo është e rëndësishme. Objektivi im është të qëndroj me këmbë në tokë dhe të vazhdoj edhe më mirë. Shpresoj ta ndihmoj ekipin me lojë dhe me gola”, tha Llullaku.
Me transferimin te Astana, Azdren Llullaku ka mundësi të realizojë edhe një ëndërr, jo vetëm të tijën, por të çdo futbollisti. “Ëndrra ime, ashtu si e të gjithë lojtarëve, ka qenë të luaj në aktivitetet më të rëndësishme. Astana ka fituar kampionatin dhe ka shansin të marrë pjesë në Champions. Për këtë do të punoj shumë, për të luajtur titullar dhe të aktivizohem në kupat e Europës”, përfundoi Llullaku.
Koncesioni sekret me 100 milionë euro
Armand MAHO
Ilir Beqaj do të përjashtohej nga Parlamenti në vitin 2011, në mandatin e tij të parë si deputet, pasi kish përfituar rreth 240 milionë lekë nga bashkia e Vangjushit të Durrësit, pak kohë pasi kish marrë mandatin në vitin 2009. Si gjithë të tjerët dhe ky ishte pikasur nga Edi Rama, për t’ju bashkuar Rilindjes. Jo më kot, Rama e kish piketuar si një nga ministrat e një sektori të ndjeshëm siç është shëndetësia ku dhe fondet janë më të mëdha. Rama e dinte mirë që nga rinia e tij e hershme, kur endeshin rrugëve të bllokut dhe luanin basketboll me Dinamon që për të fituar para Ilir Beqaj, ishte gati të bëhej kamikaz. Shëndetësia ishte tamam sektori ku i duhej Beqaj, pasi Rama e ka fantastike nuhatjen për të nxjerrë nga thesi i Rilindjes ata që dinë të vjedhin më shumë dhe në rastin e Beqajt nuk u gabua. Sapo erdhi në pushtet kompania e ministrit do të fitonte 28 tendera në një shifër që i kalon gati 10 milionë eurot. Çdo institucion, Ministria e Financave, OSHEE, Instituti i Sigurimeve, gjendjet civile, ZVRPP-të e të tjera me radhë që kërkonte të përmirësonte apo adaptonte teknologjinë e informacionit duhet të kalonte nga “Intech+”, e cila deri në nëntor të vitit 2013, pra, dy muaj pas formimit të qeverisë ishte në pronësi të vetë ministrit. Të gjitha këto kapnin vlerën e pamendueshme të 10 milionë eurove. Por makutëria e Beqajt nuk do të kishte limit! Ministria që ai drejton u bë simboli i vjedhjeve të fondeve publike me PPV-të të famshme, që s’janë gjë tjetër vetëm se një metodë për të kaluar paratë e taksapaguesve nga buxheti i shtetit tek privati. Një nga më të përfolurit është ai Vilma Nushit, plot 120 milionë euro për 10 vjet apo 12 milionë euro në vit për chek up falas. Koncesioni i hemodializës, ai i sterilizimit e të tjera me radhë. Klientelizmi në tenderimin e barnave çoi deri aty sa pa u mbushur viti i ardhjes së tij në Ministrinë e Shëndetësisë një prej kompanive të mëdha botërore, Glaxo Smith Kline, (më e sakta e gjashtë në botë) në prill të vitit 2014 deklaroi largimin nga Shqipëria. I njohur për makutërinë që ka, natyrisht në shërbim të kryeministrit në korridoret e ministrisë që ai drejton, punonjësit shprehen duke ironizuar se, “është i gatshëm të vjedhë dhe karburantit e makinës për ta shitur”.
Klienti s’ka emër
Shëndetësia ka kaluar thuajse tërësisht në duart e privatit. Edi Rama do e quante Beqajn, reformator të madh dhe në fakt ashtu është. Askush s’mund të jetë aq i zoti sa ai për të gjetur hapësira për përvetësimin e fondeve. Së fundmi në horizont po duket dhe koncesioni i radhës, ai i laboratorëve e vetmja gjë që i kish mbetur sistemit tonë shëndetësor. Më datë 28 nëntor të vitit të kaluar, qeveria vendosi që edhe ky shërbim t’i kalojë privatit. Por, nga një hulumtim në faqen e Kryeministrisë mungon edhe vendimi dhe procedurat që do të ndiqen. Por nuk dihet as kush është klienti i radhës që do të përfitojë këtë koncesion që pritet të lerë pa puna disa qindra laborantë. Dilemën e kësaj të fundit nuk ka mundur ta zgjidhë as deputetja e PD-së, Albana Vokshi, e cila në një intervistë për “Ora News” do të deklaronte: “Kam kërkuar të më vihet në dispozicion një kopje e studimit, është përfunduar në dhjetor 2015 dhe është mbajtur i fshehtë. Ministri ka refuzuar të më vërë në dispozicion këtë studim, e ka sjellë vetëm ditën që është bërë seanca me të dhëna konfidenciale. Beqaj e do informacionin për vete për të bërë pazarin e radhës si me tre koncesionet e tjera. Eksperiencat në vende të tjera thonë se nuk kanë pasur sukses. Më shumë ka pasur hije sesa dritë në këto koncesione. Ky koncesion po eksperimentohet për herë të parë, nuk ka përfshirë MASH. Kjo është afera e radhës. Qeveria tani harxhon 1 mln euro për laboratorët në vit, këta planifikojnë 8 mln euro”. Pra, për të njëjtin shërbim, shifra rritet me 7 milionë euro pa llogaritur fitimin që do të marrë koncesionari. Thuhet se pas kësaj afere qëndron një firmë serbe dhe nuk përjashtohet të jetë një dorovitje për pritjet e përzemërta që i bënte Aleksandër Vuçiç kryeministrit tonë. Natyrisht fitimi ndahet!
Milioner brenda natës
Por çfarë do të ndodhë me këto laboratore? Është një vjedhje e pastër, ku klienti i radhës nuk do të shpenzojë asgjë. Për ta bërë më të kuptueshme nga të gjithë ajo që do të ndodhë është pak a shumë kjo. Klienti shkon me duar në xhepa dhe merr një copë letër ku e shpall fitues. Më pas, për vitin 2017 i akordohen rreth 8 milionë euro nga buxheti i shtetit, pas një kredie të marrë për këtë qëllim nga Banka Botërore, prej 65 milionë eurosh. Sipas marrëveshjes në pronësi të tij kalojnë të gjitha ndërtesat e laboratorëve, kryesisht në Tiranë, por edhe në rrethe. Marrëveshja parashikon që me nisjen e punës, fitimi ndahet në 45 për qind të klientit, 20 për qind të shtetit dhe 35 për qind që mbetet për investime. Për çdokënd që ka njohuritë më minimale në ekonomi kjo do të thotë që këtë punë mund ta bëjë dhe qytetari më i thjeshtë i këtij vendi. Ndërtesat janë, paratë janë marrë me kredi, klientela e garantuar dhe 45 për qind të fitimit janë të pastra në xhep. Po t’i shtosh këtu dhe 35 për qind të tjera, që me demek janë për investime shkon në 80 për qind. Pra, një person fizik që ka një numër NIPT-i që hapet me 200 lekë të vjetra në QKR. Është si të thuash të ngrysesh fukara dhe gdhihesh milioner, pa pasur asnjë qindrakë në xhep. Ose më qartë, pronari dhe investitori që në këtë rast është shteti të mjaftohet me 20 për qind të fitimit, ndërsa “hyzmetqari” që është koncesionari të marrë pjesën tjetër prej 80%. Kjo lloj teorie ekonomike nuk mund të ndodhë në asnjë sistem, qoftë në ekonomi tregu apo të centralizuar. Janë vetëm teori ekonomike që mendja e një rilindasi mund ta pjellë dhe në rast se do të shpërndahej ndonjë çmim për vjedhjen e parave të taksapaguesve natyrisht do të fitonte “Teoria Beqaj”… Kemi të bëjmë me një vendimi skandaloz korrupsioni, i cili do të rrjepë hallexhinjtë e këtij vendi nga të gjitha anët. Jo vetëm do të paguajmë kredinë e marrë nga Banka Botërore për këtë shërbim, por do të duhet të paguajmë dhe tarifat që do të miratohen nga klienti i qeverisë. Një tjetër situatë është ajo e pranimit të analizave. Spitali publik dhe jo vetëm, por edhe poliklinikat shëndetësore shtetërore nuk do të pranojnë asnjë fletë analize tjetër të kryer në laboratorë të tjerë të licencuar, por vetëm në ato që janë kryer në laboratorët e klientit koncesionar të qeverisë. Një tjetër pasojë e këtij vendimi absurd dhe korruptiv është dhe frika e shprehur e punonjësve. Aktualisht në këtë shërbim punojnë rreth 520 laborantë dhe 210 punëtorë të tjerë të ndihmës, të cilët do të kalojnë në varësi të koncesionarit duke u shkëputur nga struktura e Ministrisë së Shëndetësisë.
Ja laboratorët që do të privatizohen
Tiranë
Laborator Spitali nr. 1
Laborator Spitali nr. 2
Laborator Pediatria
Laborator Onkologjiku
Laborator Infektivi
Laborator Sanatoriumi
Laborator Materniteti 1
Laborator Materniteti 2
Laborator Poliklinika 1
Laborator Poliklinika 2
Laborator Poliklinika 3
Laborator Poliklinika 4
Laborator Poliklinika 5
Laborator Poliklinika 6
Laborator Poliklinika 7
Laborator Poliklinika 8
Laborator Poliklinika 9
Laborator Spitali i Traumës
Laborator Urgjenca Qendrore
Laborator Poliklinika Qendrore
Tiranë Laborator Dispanceria Tiranë
Në rrethe
Gjirokastër: 7 laboratorë klinikë-biokimikë
Shkodër: 9 laboratorët klinikë-biokimikë
Elbasan: 10 laboratorët klinikë-biokimikë
Fier: 10 laboratorët klinikë-biokimikë
Lezhë: 5 laboratorët klinikë-biokimikë
Kukës: 7 laboratorët klinikë-biokimikë
Dibër: 4 laboratorët klinikë-biokimikë
Korçë: 9 laboratorët klinikë-biokimikë
Vlorë: 8 laboratorët klinikë-biokimikë
Berat: 5 laboratorët klinikë-biokimikë
Durrës: 10 laboratorët klinikë-biokimikë
Port apo resort në Karpen, si po grabiten 1700 hektarë?
Armand MAHO
Rreth Karpenit kishte kohë që shtrihej hija e korrupsionit… Në mendjen e tij Kavaja dhe bregdeti i saj ishte ngjizur fort që pa u bërë kryeministër. Jo më kot në krye të saj kandidoi një njeri të hurit e të litarit, por mjaft besnik ndaj urdhrave të tij. Me ardhjen në pushtet të Edi Ramës, një grup pune i ngritur me urdhër të tij do të identifikonte tokat e lira, kryesisht në zonat bregdetare. Tregu i agjencive imobiliare ndërkombëtare e sidomos atyre të oligarkëve rusë që i përdor për të pastruar paratë e krimit është i etur për to. Investimet miliona euroshe në ndërtimin e resorteve turistike shërbejnë jo vetëm për pastrimin e parave, por shndërrohen në makineri parash. Deri më 2015, fshati Karpen përfshihej në territorin e Bashkisë Golem dhe duket se kjo ka qenë një pengesë për Edi Ramën, që kish menduar diçka tjetër për tokat e pafundme në mesin e vijës bregdetare të Shqipërisë, ku përfshihet dhe Qerreti. Karpeni, ndodhet pak kilometra larg Kavajës dhe deri më tani aty është ruajtur një natyrë e virgjër. Për shkak të mungesës së infrastrukturës ndërtimet janë të pakta, kjo ka bërë që dhe çmimi mos i kalojë 25 euro për metër katrorë. Popullsia është varfër dhe merret kryesisht me bujqësi dhe peshkim. Disa e kanë trashëguar tokën, të tjerët e kanë përfituar me Ligjin 7501. Koha rrjedh e qetë dhe përqark nuk ndodh asgjë, as në dimër e as në verë. Natyra është treguar zemërgjerë, duke i falur një bregdet të rrafshtë, ku diku tutje drejt jugut ngrejnë kokë disa kodra të buta.
Shpjegimi absurd
Në korrik të këtij viti, ministrja e Ekonomisë, Milva Ekonomi do të prezantonte në Kuvendin e Shqipërisë një projekt ku në zonën e Karpenit do të ndërtohej një port i madh, i cili do të zinte një sipërfaqe prej rreth 1700 hektarë tokë. Vlera e këtij porti cilësohet në më shumë se 8 miliardë dollarë, një investim që sipas Ekonomit do të kryhej nga një kompani angleze me emrin “Star Bridge Port Developments Limited”. Vetë ministrja nuk diti të shpjegonte se përse duhej ky investim kaq i madh në Karpen të Kavajës, por dha një shpjegim absurd në Komisionin e Veprimtarive Prodhuese: “Ata kanë sjellë propozimin për të ndërtuar një port në Karpen, sepse e shikojnë si një pozicion strategjik, një pozicion që mund ta lidhë me Roterdamin, që mund ta lidhë me Kanalin e Suezit dhe për këtë kanë bërë hartat dhe i kanë propozuar në projektin e parafizibilitetit”. Por dhe vetë deputetët e majtë si Namik Dokle asokohe u shfaqën skeptikë. Dhe me të drejtë. Kur mjaftonte një zgjerim i Portit të Durrësit me infrastrukturë të ngritur, që lidhet me rrugë dhe me hekurudhë përse duhet që të ngrihet nga fillimi një port i tillë?! Përse Porti i Durrësit, vetëm disa kilometra më tej nuk qenka pikë strategjike për të lidhur Suezin me Roterdamin siç thotë ministrja? Gjërat do të fillonin të qartësoheshin më vonë. Kompania në fjalë u denoncua fillimisht nga portali “Hashtag”, e cila hulumtoi në qendrën e lincencimit të Anglisë dhe rezultonte se kjo kompani me qendër në Taiwan kishte vetëm 1000 paund në bankë. Më tej, Ekonomi u mundua ta justifikonte se kompania ka marrë viston e investimit dhe nga ndërmarrje të tjera të mëdha, për realizimin e projektit “Morgan”.
Dy plane zhvillimi
Toka do të jepet për 99 vjet me koncesion, me çmimin 1 euro për hektar. Pra, 1700 hektarë tokë do të merren nga koncesionari për 1700 euro aq sa është dhe qiraja e një dyqani 100 metra katrorë në Tiranë. Vetëm se këtu bëhet fjalë për 17 milionë metra katrorë, një sipërfaqe e pafundme. Por ka dhe një problem. Për këtë zonë ekziston dhe një plan zhvillimi turistik, i kryer nga Fondi Shqiptar i Zhvillimit i miratuar që në vitin 2002 dhe bën pjesë në zonat me përparësi turizmi. Projekti përfshin zonat Spille, Karpen, Rreth Greth etj. Madje dhe në lajmërimet që bëjnë fshatarët për shitje tokash në vijën bregdetare në këtë zonë, thuhet pikërisht se toka është e përshtatshme për fshatra turistikë dhe vila dhe me plan urbanistik të miratuar për këtë qëllim. Ja se çfarë thotë një njoftim pikërisht në zonën që do të ngrihet porti: “Shiten 33 dynymë tokë në Kavajë, në plazhin e Karpenit. Toka kufizohet me zonën ranore të bregdetit. Sipas planit urbanistik zona është me projekt dhe ndërtim vila dhe hotele turistike. Toka është e lidhur me rrugë automobilistike. Sipërfaqja 33 000 metra katrorë”. Pra, personi në fjalë shet 3 hektarë tokë, për ndërtim vilash e resortesh pikërisht në vendin e planifikuar për ndërtim porti?! Pra, dhe kjo duhet sqaruar se në këtë rast kemi të bëjmë me dy projekte, i pari që ka të bëjë me ndërtimin e një porti që do të zerë thuajse tërë sipërfaqen e Karpenit dhe tjetri që ka të bëjë me ndërtimin e resorteve turistike në të njëjtin vend?!
Pastrimi i parave
Faktet tregojnë se s’kemi të bëjmë me asnjë ndërtim porti. Rama mund ta ketë projektuar këtë zonë për projektet e veta, ndoshta dhe për t’i bërë dhuratë ndonjë lideri lindor për të cilin ka shprehur afeksion kohët e fundit, por kurrsesi për të ndërtuar një port në këtë vend. Ndoshta po përgatitet dhe një “risistemim” i pronarëve të tokës në këtë vend, pasi siç tha dhe ministrja Ekonomi: “Alternativa e parë është që të negociohet me banorët e zonës dhe ata të sistemohen në godina më të mira sesa ato që kanë aktualisht”. Në rast se Edi Rama kish ndërmend që të ndërtonte port e para duhej të zhbënte planin e parë turistik për zonën, gjë e cila deri më tani nuk ka ndodhur, por e vetmja gjë që diskutohet ka qenë sistemimi i banorëve në banesa të tjera, pra të lenë shtëpi e katandi dhe të zhvendosen atje ku u thotë kryeministri. Por dhe në rast se ta zemë ka vendosur të mbajë të dy projektet, kush do të ishte ai njeri që do të pranonte të bënte plazh ose ndërtonte vilën e tij turistike ose fshatin turistik, ose hotelin po të doni në një plazh ngjitur me portin, hekurudhën, depozitat e naftës e gazit siç thotë ministrja se do e bëjë?! Pra, ajo që po ndodh në Karpen, s’është gjë tjetër vetëm se një skemë e denjë për skenarët e mafies ku qeveri të korruptuara, liderë të korruptuar shfrytëzohen nga këto qarqe për të pastruar paratë, ku dy janë mënyrat kryesore. E para, ka të bëjë me importin e plehrave dhe e dyta, investimi në resorte turistike ku trojet u rrëmbehen njerëzve për hiçgjë, si në rastin e Karpenit.
Rama-Roshi, 3 milionë euro për zhvillimin turistik
Aferës korruptive për Karpenin, Edi Rama i parapriu me një fond prej 3 milionë eurosh që do i jepte Elvis Rroshit, (po respektojmë etikën, pasi ky është emri zyrtar që mban si kryetar) në maj të këtij viti, i cili sipas tij do e shndërronte lumin e Leshniqes që kalon mes përmes Karpenit, në një lumë të lundrueshëm turistik. Ky përrua derdhet pikërisht atje ku do të ndërtohet porti. Por duke lënë pas aferën korruptive dhe shumën stratosferike për një përrua fshati, lind pyetja përse Edi Rama kërkon ta shndërrojë në lumë të lundrueshëm këtë përrua, kur ka ndërmend të ndërtojë port?! Kujt kërkon t’i bëjë përshtypje! Ndoshta përgjigjen e keni mes rreshtave të arsyetimit të “historianit” Elvis Rroshi, kur fliste se përse duhej zgjeruar kanali i Leshniqes. “Ndryshe Kavaja, ku në dy përrenj ndodh i gjithë drenazhimi i qytetit. Dhe pikërisht nga ky fakt fiziko-gjeografik në vitet e para të shtetit shqiptar Kavaja radhitej si një nga pretendentet për kryeqytetin e vendit, në mos kryeqytetin brilant të Shqipërisë. Pozita qendrore, afërsia me detin, kushtet klimatike ideale dhe drenazhimi i përronjve të tij, janë vlera të pakundërshtueshme dhe të evidentuara historikisht. Në këto territore kemi të bëjmë me disa fakte historike të një rëndësie të veçantë botërore. Beteja e Durrachium ku kulmin e saj e ka pikërisht në afërsi të përroit. Rrallë herë në historinë e botës gjigantë të ndodhen njëkohësisht në të njëjtin vend për disa muaj. Gaio Jul Qezari, Pompeu i madh, Mark Antonio etj., këtu në Kavajë për të ndarë fatet e botës. Po bëj një paralelizëm me Francën, ku beteja e Jul Qezarit me Galet në Alesio është shumë e ngjashme me betejën e Durrachium. Këtë e vërteton vetë interesimi i Napoleon Bonapartit të tretë, i cili emëron të njëjtin historian (Herzog) për Durrësin dhe për Alesia dhe ku betejën e Alesias e vendosi si fillimi i historisë franceze. Ndërtimi i Fushë Museut të Alesias i realizuar më 2012 nga arkitekti i famshëm Bernard Tchumi, sot është i vizituar më shumë se 200 mijë turistë në vit. Këtu buzë Leshniqes në periudhën e madhe të koncentrimit të turistëve, të pretendojmë me të drejtë një fushë muze ose CASTRUM QERRET për avenimentet historiko-shkencore dhe për atraksion real të turistëve në pikun e tyre 8, 9, 10 korrik të çdo viti”, e mbyll relacionin e tij historiani i Bashkisë Kavajë.
Kriza e tregut të reklamave në media
Ornela Liperi
Shikuesit e lexuesit sa vijnë e po bëhen më kërkues dhe përzgjedhës. Media online e ka bërë shumë të lehtë përhapjen e informacionit brenda pak sekondash, duke konkurruar fort shtypin e shkruar, por edhe televizionet informative. Teknologjia ka shtuar alternativat edhe për shikuesit, që përveçse kanë mundësi të ndryshojnë kanalin, mund të zhvendosin vëmendjen në internet, YouTube, kanalet dixhitale, Netflix dhe të shohin filmat e fundit e zgjedhje të tjera pa fund.
Në këtë evolucion të shpejtë, televizionet e gazetat gjenden përballë kufizimeve për të reaguar e për t’u përshtatur. Tregu i reklamave, burimi kryesor i të ardhurave të tyre, vijon të mbetet i frenuar prej disa vitesh radhazi. Shumë kompani po shkurtojnë buxhetet e marketingut, të parat që preken në kohë krize. Shpresat e televizioneve kanë mbetur te kompanitë e telekomunikacionit dhe bankat, që kanë dhe buxhetet më të mëdha në dispozicion për marketing e reklama, ndërsa reklamuesit e rinj numërohen me pikatore.
Gjithsesi, televizionet e mëdha po arrijnë të rezistojnë dhe të marrin pjesën kryesore të tortës së buxheteve të reklamuesve.
Për vitin 2015, xhiro e tre televizioneve kryesore në vend (“Top Channel”, “Klan”, “Vizion Plus”) u rrit me 8.1%, pas tkurrjes po me 8% një vit më parë, sipas të dhënave nga bilancet e tyre. Në 2015-ën u zhvilluan zgjedhjet lokale dhe gjithmonë në periudha elektorale, të ardhurat e televizioneve kanë tendencë rritjeje. Por, ndonëse kanë ruajtur të ardhurat, televizionet kanë sakrifikuar fitimet. Këto të fundit ranë me gati 30% për tre televizionet në fjalë.
Për vitin 2016, të dhënat parapake nga monitorimet e kohës së reklamave për 11-mujorin, nga Idra Media, tregojnë për një rritje të lehtë të kohës së reklamimit për 8 televizionet kryesore në vend. Frenimi i buxheteve të marketingut të bizneseve duket se ka prekur dhe televizionet informative, që ishin në lulëzim deri pak kohë më parë.
Krizën po e vuan më së shumti media e shkruar, ku pjesa më e madhe e gazetave kanë parë rënie të të ardhurave dhe fitimeve në 2015-ën, ndërsa të dhënat e monitorimeve të 11-mujorit 2016 tregojnë rënie drastike të sipërfaqes së reklamave.
Reklamat jashtë dyerve (outdoor) kanë vijuar për të dytin vit radhazi me rënie, të thellë për disa, duke u prekur më shumë nga shkurtimi i buxheteve të marketingut të kompanive.
Pas një rritjeje në 2014-ën, edhe radiot kryesore kanë parë një reduktim të të ardhurave në vitin 2015.
Në ndjekje të një tendence globale, i vetmi segment që po kalon ditë të mira është ai i reklamave online, që po i gëzohet rritjes së numrit të përdoruesve online dhe po përfiton, duke joshur klientët – reklamuesit, që janë të dëshpëruar të maksimizojnë koston e arritjes së një klienti potencial – me tarifat që ende mbeten të ulëta. Të dhënat e monitorimeve nga Idra Research flasin për një rritje me 40% të sipërfaqes së reklamuar në mediat online dhe 70% në vlerë për 11-mujorin 2016.
Tregu i reklamave rritet lehtë me 3%
Në total, tregu i reklamave në vend në vitin 2015 vlerësohet të ketë arritur në rreth 38 milionë euro, nga rreth 37 milionë euro që ishte vitin e mëparshëm, me rritje të lehtë me rreth 3%, i udhëhequr nga përmirësimi i të ardhurave të televizioneve dhe rritjes së fortë të online, ndonëse nga nivele të ulëta.
“Monitor” e ka bërë vlerësimin e tregut të reklamave për 2015, duke u nisur nga tregues direkt të matur nga disa drejtime:
-të ardhurat e kategorive kryesore të tij, televizioneve, shtypit të shkruar, outdoor dhe online, të matura në pjesën kryesore nga xhiro që aktorët kryesorë kanë deklaruar në bilancet e tyre të dorëzuara në Qendrën Kombëtare të Biznesit (QKB).
-shpenzimet e kompanive kryesore për marketing, kryesisht telekomunikacione, banka, produktet që lëvizin shpejt nga rafti (FMCG), sipas raportimeve të detajuara në bilancet përkatëse.
-monitorimet në bazë të numrit të spoteve të transmetuara në mediat televizive dhe reklamave në shtypin e shkruar, sipas të dhënave të siguruara nga kompania monitoruese Idra Media, kanë shërbyer për të vlerësuar tendencën për vitin 2016.
Televizioni
-Nga të ardhurat e deklaruara në bilanc nga televizionet kryesore në vend, vlerësohet se të ardhurat e televizioneve ishin 29-30 milionë euro, në vitin 2015, me një rritje prej rreth 7% me bazë vjetore, duke e marrë veten pas tkurrjes së një viti më parë. Ky përmirësim erdhi dhe nga fakti që 2015-ta ishte një vit me zgjedhje lokale, i shoqëruar me shpenzime të bashkive për spote publicitare. Edhe kompanitë më të mëdha të telekomunikacionit rritën buxhetet e marketingut në 2015-ën, duke u dhënë një dorë televizioneve. Shikueshmëria e lartë e telenovelave turke ka qenë një tjetër magnet për reklamuesit që kapim një audiencë të ndjeshme me një kosto relativisht të ulët. “Vizion Plus” dhe “Klan” i kanë dhënë hapësira dhe orare në ‘prime time’ në programacion këtyre telenevoleva, ndërsa “Top Channel” vijon t’i rezistojë, duke u përqendruar te prodhimet e veta.
Shtypi i shkruar
-Të ardhurat e shtypit të shkruar vlerësohen në rreth 2.7 milionë euro në vitin 2015, me një rënie vjetore prej rreth 10%, në bazë të të ardhurave të deklaruara në bilanc nga mediat kryesore në vend dhe monitorimeve nga Idra Media. Përveç Panorama Grup dhe Unipress (Shekulli), gazetat e tjera kanë deklaruar rënie dyshifrore të të ardhurave.
Internet
-Reklamat në faqet kryesore të internetit në vend vlerësohen në rritje të shpejtë, ndonëse mbeten ende të ulëta, duke arritur në 1.7 milionë euro në 2015-ën, sipas të dhënave nga monitorimet e Idra Media. Të dhënat e 11-mujorit 2016 të Idra Medi flasin për një zgjerim të fortë të këtij tregu me rreth 70% në vlerë, duke qenë segmenti me rritjen më të shpejtë.
Kompanitë e telekomunikacioneve (operatorët celularë plus Albtelecom) mbeten reklamuesit më të mëdhenj në vend, me një buxhet total për shpenzime publiciteti prej rreth 20 milionë eurosh në vitin 2015, sipas të dhënave të nxjerra nga bilancet e tyre, me një rritje të lehtë prej 0.6% në krahasim me 2014-ën, si rrjedhojë e zgjerimit të buxhetit të operatorëve të mëdhenj. Buxheti i bankave është rreth 9.4 milionë euro.
Televizionet, rënie e ndjeshme e fitimeve
Pasi panë një rënie të të ardhurave në 2014-ën, televizionet kryesore në vend kanë arritur të rikuperojnë një vit më pas, të ndihmuara nga zgjedhjet lokale, por dhe nga rritja e buxheteve të dy reklamuesve më të mëdhenj në vend, Vodafone dhe Telecom Albania. Edhe vetë televizionet kanë shtuar përpjekjet, duke bërë oferta më tërheqëse për bizneset dhe duke investuar në pasurimin e programacionit.
Por, rritja e të ardhurave nuk i ka ndihmuar aspak televizionet kryesore, që në pjesën më të madhe kanë parë një rënie të ndjeshme të fitimeve për të dytin vit radhazi, duke qenë larg niveleve të vitit të mbarë 2013.
op Channel
“Top Channel” mbetet televizioni më i madh në vend sipas të ardhurave, me një xhiro të deklaruar prej 1.65 miliardë lekësh (gati 12 mln euro), me një rritje të lehtë prej 2% në 2015-ën, që vjen pas tkurrjes prej gati 8% në vitin e mëparshëm. Numri i sekondave reklamë të transmetuara në 2015 shënoi një rritje me 6%, sipas të dhënave nga Idra Media (shih grafikun: Televizionet kryesore, sipas sekondave të reklamave të transmetuara, 2015). Teksa të ardhurat janë rritur lehtë, shpenzimet janë zgjeruar me ritme më të shpejta, duke bërë që fitimi pothuajse të përgjysmohet në 9 milionë nga 14 milionë lekë në 2014ë-n, duke qenë shumë larg niveleve prej rreth 141 milionë lekësh në 2013-ën. Norma e fitimit në 2015-ën ishte minimale, më pak se 1%.
TV Klan
Televizioni i dytë më i madh në vend nga të ardhurat është “TV Klan”, me një qarkullim vjetor prej 997 milionë lekësh në 2015-ën, me një rritje prej 17% në raport me një vit më parë, duke pasur performancën më të mirë nga të gjithë televizionet për tërheqjen e më shumë reklamave. Eptan Lohja, drejtor i marketingut të “Tv Klan” tha se rritja e shikueshmërisë dhe larmishmëria e programacionit kanë ndihmuar në shtimin e të ardhurave nga reklamat, ndërsa tendenca vijon të jetë pozitive.
Të ardhurat u rritën pavarësisht se sekondat e reklamave të transmetuara ranë me 15% për të njëjtën periudhë, sipas të dhënave nga Idra Media.
Edhe “Klan” nuk i ka shpëtuar tendencës së rënies së fitimeve. Në vitin 2014, “TV Klan” rezultoi me një fitim prej 118 milionë lekësh (normë fitimi 12%), nga 175 milionë lekë vitin e mëparshëm. Rritja e shpenzimeve të personelit dhe shpenzimeve të tjera operative janë arsyet kryesore të përkeqësimit të treguesit të përfitueshmërisë. Ndërsa në 2013-ën, ai renditej ndër 100 kompanitë me fitime më të larta, me 303 milionë lekë.
Vizion Plus
I treti televizion më i madh në vend, sipas të ardhurave, është “Vizion Plus”, që ka parë rritje të të ardhurave me 14%, në 472 milionë lekë. Edhe sekondat e reklamave të transmetuara janë zgjeruar me 11.3%, sipas të dhënave të Idra Media.
Ndryshe nga dy televizionet e mëdha, “Vizion Plus” ka shënuar një rritje të fitimeve nga 3.2 në 8.8 milionë lekë në 2015-ën. Megjithatë, ato janë shumë më poshtë nivelit prej rreth 23 milionë lekësh në 2013-ën. Norma e fitimit në 2015-ën ishte vetëm 1.9%.
Jerina Lalaj, drejtoreshë e shitjeve dhe marketingut në “Vizion Plus” e konfirmon tendencën në rritje të reklamave edhe për 2016-n, duke përmendur disa nga arsyet si “riorganizimi i programacionit, spektakli “Tu Si Que Vales” këtë vit ka qenë me pjesëmarrje dhe numra të jashtëzakonshëm. “Al Pazar” vazhdon të jetë spektakël i preferuar i publikut. “Apartamenti 2XL” mbizotëron ndjeshëm të martave me humorin atipik. Janë shtuar 2 telenovela turke në fashën e pasdites me produksione të famshme njëra e zhanrit dramë dhe tjetra e zhanrit komedi”.
Kryesore
Continue to the category
