Bosi i Bajernit, Karl-Hainc Rumenige, ka përshëndetur ndryshimet taktike dhe të formacionit të trajnerit Karlo Ançeloti. “Viktimë” e këtij ndryshimi ka qenë Tomas Myler. Sulmuesi gjerman qëndroi në stol dhe vendin e tij në formacion e zuri Tiago. Teksa Myler po përjeton një krizë golash dhe nuk po përshtatet siç duhet, Rumenige ka zgjedhur ta kritikojë publikisht, ashtu siç bëri me Boatengun në ndeshjen ndaj Rostovit.
“Në ditët e sotme një klub elitar ka nevojë për 16, 17 ose 18 lojtarë cilësorë. Ne kemi kualitet të lartë në skuadër dhe si pasojë 2-3 prej lojtarëve tanë ambiciozë u duhet ta nisin nga stoli, edhe pse të qenët rezervë nuk i lumturon. Kjo situatë i motivon më shumë lojtarët si Myler që në vitin 2017 të bëjnë disa gjëra më mirë”, nënvizoi Rumenige.
Kujtojmë që sulmuesi 27-vjeçar ka shënuar vetëm një herë në 13 ndeshjet e Bundesligës, ndërsa në Champions ka shënuar 2 gola në 6 pjesëmarrje. Në Europian zhgënjeu pa asnjë gol, ndërsa gjatë kualifikueses së Botërorit 2018, ai ka shënuar 4 gola në 6 takime. Pas kritikave ndaj Mylerit, Rumenige ka mbajtur qëndrim të prerë si për kontratën e Robenit dhe merkaton e dimrit.
“Robeni do të qëndrojë në Mynih. Kam bërë disa biseda me babain e tij dhe jemi në rrugë të mbarë. Arjenit i pëlqen të vazhdojë të jetë pjesë e Bajernit dhe ne e duam këtë gjë. Besoj se në janar do të kemi finalizuar kontratën e re”, tha Rumenige, duke mbyllur merkaton e dimrit, – “Pata një bisedë me trajnerin Ançeloti dhe organika është e plotësuar. Vetëm Boateng është i dëmtuar dhe ai do të rikthehet shumë shpejt”.
Presidenti i Bajernit i kujton Mylerit humbjen e penalltisë vendimtare në gjysmëfinalen e Championsit ndaj Atletiko Madridit. “Myleri po jepte shumë rezultate, por tersi nisi nga humbja e penalltisë ndaj Atletikos. Nga ai moment nuk ka zbritur ende me këmbë në tokë. Megjithatë, unë jam i bindur që, Tomasi do të shënojë rregullisht”, deklaroi Uli Hënes gjatë një interviste për revistën e klubit.

Klubi i PSG u ka dhënë fund të gjithë zërave të merkatos, duke rinovuar me kapitenin Tiago Silva, deri në vitin 2020. Braziliani ishte pranë fundit të kontratës me parisienët dhe prej disa javësh kishin filluar diskutimet për largimin e tij nga kryeqyteti francez me destinacion Italinë. Por dje u bë e ditur nga të dy palët se lojtari kishte zgjatur kontratën dhe nuk do të largohej, duke blinduar praktikisht prapavijën e skuadrës.
Ndërkaq, mediat franceze kanë bërë të ditur se po gjatë ditës së djeshme është arritur akordi për blerjen e gjermanit Julian Draksler. Lojtari u ka kushtuar 36 milionë euro parisienëve, e njëjta shifër që i kushtoi Volfsburgut blerja e kartonit të tij nga Shalke 18 muaj më parë.
Njëkohësisht, është pranë finalizimit shitja e Hese Rodriguez. Spanjolli nuk ka bindur në asnjë moment në Paris dhe është gati të transferohet te Las Palmas, klub i cili do të paguajë 25 milionë euro për ish-sulmuesin e Real Madrid.
Marco Verrati është një ndër futbollistët më të kërkuar në merkato. Mesfushori i Kombëtares italiane në muajt e fundit është përfolur për një transferim të mundshëm te disa prej klubeve më të mëdha të Europës, duke nisur që nga Juve e deri te Bajerni, nga Reali te Barcelona, por ish- futbollisti i Peskarës me një intervistë të fundit qetëson tifozët e skuadrës së tij aktuale, PSG. “Jam mirë në Paris, nuk shikoj asnjë arsye se përse duhet të largohem. Unë punoj për të fituar sa më shumë që të jetë e mundur, ëndrra ime është ajo që të fitoj këtu për momentin”, u shpreh Verrati.
Momenti i PSG në kampionat nuk është dhe aq i mirë, pasi parizienët po bëjnë më keq se vitet e fundit, duke qëndruar pas Nisë në klasifikimin e Ligue 1. “Jemi ende në garë për të gjithë objektivat. Në futboll duhet të mendosh gjithmonë për të atshmen, kur të rikthehemi në fushë do të mendojmë ndeshje pas ndeshjeje dhe do të përpiqemi të  bëjmë maksimumin”, tha ai.
Verrati bëri një bilanc të shkurtër edhe për 2016 në aspektin personal, një vit i kushtëzuar nga dëmtimet. “Ishte një vit i vështirë për mua, por janë pikërisht vështirësitë ato që të mundësinë të rritesh si njeri. Kam qenë jashtë fushe për shumë kohë dhe futbolli për mua është gjithçka. Nuk ishte një vit shumë i bukur në aspektin personal, por si skuadër bëmë mirë, pasi fituam 4 titull”, përfundoi Verrati.

Mançester Junajtid nuk po bën një sezon shumë të mirë, por drejtuesit janë gati të mendojnë për të ardhmen dhe të hartojnë plane afatgjata. Mediat angleze janë të sigurta se Zhoze Murinjo mund të jetë Fergusoni i ri i Junajtid, pasi është gati të firmosë një kontratë 10-vjeçare me “djajtë”.
Drejtuesit janë bindur nga plani i portugezit dhe mënyra se si po luan Junajtid, pavarësisht se nuk ka shumë rezultate pozitive dhe duan të bëjnë këtë lëvizje për t’i treguar trajnerit mbështetjen dhe besimin e plotë që kanë. Në të ardhmen do të kuptohet më mirë nëse Murinjo ka dëshirën për të firmosur për 10 vite të tjera, sepse ai njihet si një trajner që ka dëshirë të eksperimentojë dhe të provojë kampionate të ndryshme.
Për ta bindur Murinjon të pranojë diçka të tillë, drejtuesit e Junajtid kanë gati edhe dhuratat për merkaton. Emri më i nxehtë që qarkullon në mediat angleze, por edhe ato italiane është ai i sulmuesit të Atletikos, Antuan Grizman. Junajtid është gati të ofrojë 70 milionë euro drejt klubit të Simeones për ta transferuar francezin në Angli. Pogba do të ketë një rol të rëndësishëm për ta bindur shokun e tij të kombëtares franceze.
Një tjetër lëvizje në sulm është ajo e Ibrahimoviçit. Agjenti i suedezit ka thënë se futbollisti do të qëndrojë në Angli edhe sezonin e ardhshëm duke larguar të gjitha zërat e merkatos. “Ibra nuk është lojtar i mbaruar akoma, që të shkojë të luajë në Kinë. Ai ka dëshirë të qëndrojë edhe një vit tjetër te Junajtid. Do të vazhdojë të japë kontributin e tij në këtë skuadër dhe ta ndihmojë për të arritur rezultate pozitive”, ka thënë Mino Raiola.
Tregu kinez i futbollit po tërheq emra të rëndësishëm lojtarësh dhe trajnerësh, pasi shifrat që ofrohen janë stratosferike. Nuk u ka shpëtuar zërave për një transferim të mundshëm në kampionatin kinez as Zhoze Murinjo, por është vetë trajneri i Mançester Junajtid, i cili sqaron se për të është ende herët t’i japë fund karrierës futbollistike në nivelet më të larta.
“Paratë që vijnë nga Kina po i joshin të gjithë, por unë e dashuroj futbollin e nivelit më të lartë. Në moshën 53-vjeçare, jam shumë i ri për t’iu bashkuar futbollit kinez. Dua të fitoj akoma dhe këtë dëshiroj ta bëj në kampionatin më të vështirë. Këtu jam në vendin e duhur”, u shpreh Murinjo.
Kontrata aktuale që e lidh portugezin me Mançester Junajtid përfundon pas tre vitesh, po tabloidët anglezë shkruajnë për një propozim shumë të rëndësishëm të drejtuesve të “Djajve të Kuq”. Zgjatje të kontratës për 10 vite të tjera. Gjithsesi, 53-vjeçari nuk rrëmbehet nga entuziazmi. “Nuk më kanë ofruar asgjë. Më kanë mbështetur shumë dhe gjithmonë kam menduar se tre vjet janë pak për mua në këtë klub të madh. Unë e dashuroj punën te Mançester Junajtid, këtu e dinë se nëse më ofrojnë një kontratë të re, e firmos menjëherë”, tha ai.

“Steaua pa emër”, ishte titulli i një programi muzikor rumun në periudhën e diktaturës së Çausheskut, por që duket se po gjen vend edhe në ditët e sotme. Është një histori që ka të bëjë pikërisht me Steauan e Bukureshtit, që tashmë nuk do të ekzistojë më, të paktën jo me këtë emër. Presidenti i skuadrës më të rëndësishme rumune, Gigi Becali ishte përfshirë në një proces gjyqësor me Ministrinë e Mbrojtjes së vendit ballkanik, me këtë të fundit që rezultoi e fituar në këtë betejë ligjore. Gjykata vendosi që të mos e lejojë më Becalin, që kjo skuadër të vazhdojë të mbajë emrin e Steauas, një vendim që gjithsesi ai ka të drejtë ta apelojë.
Skenaret e mundshme të bëjnë të mendohet se klubi do të kthehet tek emri “FCSB” dhe se rilindja e këtij klubi do të nisë nga divizioni i katërt i kampionatit rumun. Është pikërisht Ministria e Mbrojtjes, ajo që ka bërë të ditur zyrtarisht se Steaua do t’i nënshtrohet ndryshimeve të mëdha, duke nisur që nga sezoni i ardhshëm. Por jo vetm kaq, Ministria e Mbrojtjes i ka kërkuar Becalit edhe një dëmshpërblim prej 37 milionë eurosh, për shkak se përdori emrin e Steauas në 13 vitet e fundit, pa e pasur të drejtën për një gjë të tillë.
Pavarësisht gjithçkaje, tifozët e Steauas duket se nuk kanë ndërmend ta lënë skuadrën e tyre. 45% e tyre kanë bërë të ditur se do të vazhdojnë ta ndjekin Steauan, që do të drejtohet nga Marius Lacatus, ish-sulmuesi i Fiorentinës. Steaua është skuadra me më shumë trofe në Rumani, me 26 tituj kampionë, 22 Kupa të Rumanisë dhe 6 Superkupa. Ky klub ka në palmaresin e tij edhe 1 Kupë Kampionesh, atë të fituar më 1986-n me penallti në finalen kundër Barcelonës.

Shqipëria e mbyll 2016, vitin e saj më të suksesshëm ku realizoi për herë të parë ëndrrën e pjesëmarrjes në fazën finale të një kompeticioni madhor, Europianin francez, në vendin e 49 në renditjen botërore të FIFA-s. Klasifikimi i kuqezinjve nuk pësoi asnjë ndryshim në përditësimin e fundit për muajin dhjetor, ashtu si shumica absolute e kombëtareve të tjera me Shqipërinë e futbollit që e mbyll vitin e 49-ta, 11 shkallë më poshtë nga sa e nisi. Në janar të 2016 kuqezinjtë renditeshin të 38-ët në klasifikimin botëror ndërsa pozicionimi më i mirë i tyre për 12 muajt që lëmë pas ka qenë në mars me Shqipërinë që klasifikohej në vendin e 35 në botë. Padyshim që ky ishte një vit i veçantë për futbollin e Kosovës që këtë vit realizoi njohjen ndërkombëtare duke u bërë anëtare e UEFA-s dhe FIFA-s.
Kosova mori pjesë kështu për herë të parë në eliminatoret e një kompeticioni madhor, ato të Botërorit 2018, përfaqësuesja e shtetit më të ri të Europës e mbyll vitin në vendin e 165 në renditjen globale, ku u përfshi për herë të parë në muajin gusht duke e nisur nga vendi i 190-të. Rruga e ngritjes në nivelet e larta është e vështirë, por e rëndësishme është se ajo ka nisur dhe Kosova e ka bërë hapin e parë të madh. Për sa i përket kundërshtarëve të Shqipërisë në Grupin G të kualifikueseve të botërorit, më lart nga të gjithë vazhdon të qëndrojë Spanja që mbyll dhjetëshen e parë në botë, Italia vazhdon të qëndrojë në vendin e 16-të, Izraeli ndodhet në shkallën e 55 të klasifikimit, Maqedonia renditet e 162-ta, ndërsa si në grup edhe në renditjen e FIFA-s më poshtë qëndron Lihtenshtejni që ndodhet në vendin e 189. Për sa i përket kryesuesve në rang botëror edhe këtu nuk ka asnjë ndryshim me Argjentinën që e mbyll në krye, e ndjekur nga Brazili dhe Gjermania.

Azdren Llullaku është zyrtarisht një futbollist i Astanës. Sulmuesi i kombëtares shqiptare firmosi këtë të premte një kontratë dyvjeçare me skuadrën kampione të Kazakistanit. Nga detajet e marrëveshjes, mësohet se Llullaku do të përfitojë 500 mijë euro në sezon duke përfituar një pagë më të lartë se ajo prej 35 mijë euro në muaj që ishte bërë fillimisht e ditur. Marrëveshja është mbyllur mes futbollistit, menaxherit të njohur Shkumbin Qormemeti dhe drejtorit ekzekutiv të klubit të Astanës, Bekenov Kaisar Raufovic.
Lojtari do të transferohet që këtë janar te skuadra e tij e re pasi në kontratën e Llullakut me Gaz Metanin ishte e parashikuar që në rast të një oferte prej datës 15 dhjetor 2016 deri më 5 janar 2017 klubi rumun do të ishte i detyruar ta linte të lirë futbollistin, siç edhe ndodhi në fakt me 28-vjeçarin që tashmë është gati të nisë një aventurë të re.
Te Astana, Llullaku do të ketë mundësi të luajë dhe në një kompeticion të rëndësishëm europian, pasi me titullin kampion të fituar kampionia e Kazakistanit luan direkt në fazën play off të Champions dhe në rast se nuk arrin të kualifikohet ka të sigurtë gjithsesi pjesëmarrjen në fazën e grupeve të Europa League, ndaj për sulmuesin kuqezi viti i ardhshëm pritet të sjellë një vitrinë të rëndësishme për të. Nga kontrata e re Lllullaku pritet të përfitojë 15 herë më shumë seç merrte te skuadra e Gaz Metanit, ku ishte jo vetëm kryegolashënues i kampionatit rumun, por gjithashtu dhe pretendent për “Këpucën e Artë” të Europës, ku me 16 gola është mes shënuesve më të mirë në kontinent.