Banorët e Mbrostarit vijojnë betejën për të mos lejuar ndërtimin e impiantit të plehrave në fshatin e tyre. Revolta kundër ndërtimit të fabrikës së vdekjes në Mbrostar të Fierit ka përfshirë të madh dhe të vogël! Qindra fëmijë kanë dalë dje në shesh përkrah prindërve të tyre duke sfiduar terrorin e forcave policore në mbrojtje të jetës. “Lironi prindërit tanë”, “Jo plehrave – Po Jetës”, ishin disa nga parullat që protestuesit mbanin në duar.
Disa fëmijë u kanë kërkuar forcave policore që të lirojnë prindërit e tyre sepse janë arrestuar pa asnjë shkak, vetëm pse kanë dalë për të protestuar kundër plehrave. “Lironi prindërit tanë, ata nuk kanë bërë asnjë faj vetëm se kanë dalë këtu në shesh si gjithë banorët e tjetër për të protestuar kundër plehrave, në mbrojtje të jetës tonë”, janë shprehur disa fëmijë.
Protestuesit bllokuan urën kryesore të Fierit duke mos lejuar asnjë makinë të lëvizte drejt Tiranës dhe anasjelltas. Nga bllokimi i aksit nacional Fier-Lushnjë vargu i automjeteve ka qenë i gjatë. Forca të shumta policie kanë rrethuar protestuesit, por pa ndërhyrë si herët e tjera. Banorët kërkuan tërheqjen e Bashkisë së Fierit nga vendimi për ndërtimin e impiantit të mbetjeve në këtë zonë.
Meqenëse Bashkia ende nuk u ka dhënë një përgjigje lidhur me kërkesat kundër impiantit të mbetjeve në zonën e tyre, banorët thonë nuk kanë ndërmend të ndalin protestat, derisa të marrin një zgjidhje. Ashtu si dhe në protestën e zhvilluar ditën e dielë, ata kanë përdorur goma për të bllokuar rrugën. Banorët kërkojnë gjithashtu lirimin e Zylyftar Delibashit, banor ky që është arrestuar për tubim të paligjshëm. Protesta kundër impiantit të mbetjeve në Mbrostar ka shkaktuar edhe arrestimin e disa banorëve të zonës dhe procedimin e disa të tjerëve për tubim të paligjshëm. Kjo solli zemërimin e protestuesve që prej një jave vijojnë të bllokojnë rrugën nacionale Fier-Lushnjë.

Policia arrestime masive në mesnatë

Terrori policor është ashpërsuar së tepërmi ndaj banorëve të Mbrostarit. Dhjetëra banorë janë arrestuar nga policia në mes të natës në banesat e tyre pse dalin në protestë. Forcat e policisë shkojnë në mes të natës pa asnjë mandat nga gjykata dhe marrin banorët me dhunë dhe i dërgojnë në komisariat. Kryesisht arrestohen ata banorë që kanë qenë më aktivë në protestat e këtyre ditëve. Pasi fotografohen nga policët civilë, policia shkon në banesat e tyre dhe i arreston.
Burime nga Komisariati i Fierit bëjnë të ditur se ndaj protestuesve të arrestuar ushtrohet dhunë dhe presion që të mos dalin në protestë. Ata janë kërcënuar me jetë nëse do të vijojnë të dalin në protesta. Po ashtu, mjaft familjarë janë paralajmëruar se do të pushohen nga puna nëse do të dalin në protestë për të kundërshtuar ndërtimin e impiantit të plehrave. Kërcënime me pushim nga puna janë bërë edhe ndaj mësuesve që lejojnë familjarët të dalin në protestë. Megjithë terrorin shtetëror, banorët e Mbrostarit janë shprehur se nuk do të tërhiqen nga protesta e tyre derisa të anulohet vendimi i ndërtimit të impiantit të mbetjeve.

Banorët: Nuk kemi besim as te Prefekti

Pas protestave në zyrën e kryetarit të Bashkisë së Fierit, Armando Subashi, banorët janë takuar dje me prefektin Xhevit Bushaj, por kanë dalë nga zyra e tij pa shumë shpresë. Sipas banorëve, prefekti iu ka premtuar se projekti nuk do të miratohet dhe se do ta kthente vendimin në këshill, por fjalët e tij nuk i kanë bindur banorët, të cilët kanë deklaruar se do të vijojnë protestat.
“Nuk kemi besim se prefekti do t’i mbajë premtimet. Nuk pranoi t’i bënte publike në media”, u shpreh një nga protestuesit që kishte qenë në takim me prefektin. Banorët kanë javë që protestojnë për këtë shqetësim. Ata kanë bllokuar disa herë rrugët, si dhe kanë kërkuar zgjidhje nga institucionet.
Banorët pohojnë se nuk do të tërhiqen nga protestat nëse nuk tërhiqet projekti i fabrikës së plehrave. “Nuk i kemi besën për një arsye. Zylyftarin një nga grevistët këtu e kemi brenda”, u shpreh një qytetar tjetër. “Prefekti na premtoi që ky impiant nuk do të ndërtohej në Mbrostar, por edhe ky na preu në besë”, tha një tjetër.
Para katër ditësh banorët e Mbrostarit protestuan edhe para Bashkisë së Fierit. Një përfaqësi protestuesish janë futur në zyrën e Subashit, por në një kohë kur ata prisnin të gjenin një gjuhë të përbashkët me kryetarin e Bashkisë së Fierit, janë revoltuar në zyrën e të zgjedhurit të tyre. Subashi u është përgjigjur me arrogancë interesit të banorëve për anulimin e vendimit për ndërtimin e impiantit të mbetjeve në këtë zonë. Ai u ka komunikuar protestuesve se, projekti për ndërtimin e impiantit është miratuar me vendim të Këshillit Bashkiak dhe nuk anulohet.
Një muaj më parë, në protesta u përfshinë edhe banorët e Njësisë Administrative Portëz, duke detyruar Bashkinë të tërhiqet nga vendimi i parë për ndërtimin e impiantit në Portëz. Protesta e banorëve të Mbrostarit hyri në ditën e katërt.

PD Fier, thirrje policisë të lirojë protestuesit paqësorë

Partia Demokratike, Dega Fier ka reaguar ndaj policisë për arrestimet e protestuesve paqësorë. Në një deklaratë për mediat, Dega e PD Fier shprehet se, denoncon fort dhe u bën thirrje forcave të rendit të lenë të lirë banorët e Mbrostarit që kanë ndaluar në orët e vona të ditës së dielë. “Ata janë në të drejtën e tyre për të mbrojtur jetën dhe të ardhmen e fëmijëve të tyre. Ne konstatojmë se në ndalimet e bëra janë vetëm anëtarë, simpatizantë dhe drejtues të strukturave të PD Dega Fier, Njësia Q Mbrostar, megjithëse në protestë marrin pjesë banorë që janë anëtarë dhe drejtues të strukturave dhe të forcave të tjera politike. Pse kjo sjellje e padenjë për një shtet ligjor? Pse ky selektim i banorëve nga ana e policisë? Edhe një herë ju bëjmë thirrje, mos bëni gjueti shtrigash, mos bëni diferencime, mos u vini në shërbim të interesave të ngushta të subjekteve politike në pushtet”, thuhet në deklaratën për shtyp. Dega e PD Fier bën të ditur se është në mbështetje të banorëve të Mbrostarit për protestën e drejtë që po zhvillojnë në mbrojtje të jetës së tyre.
Impianti i mbetjeve në Fier është shndërruar në betejë mes banorëve të Mbrostarit dhe Bashkisë së këtij qyteti. Një muaj më parë ishin banorët e fshatrave Plyk, Kraps dhe Portëz ata që kundërshtuan me forcë ngritjen e impiantit nga ana e Bashkisë së Fierit. Pas anulimit për ngritjen e tij në Portëz, një tjetër vendim i Këshillit Bashkiak që kaloi me votat e mazhorancës i hapi rrugën ndërtimit të këtij impianti në zonën e Mbrostarit.

R.POLISI

Vrasjet janë kthyer tashmë në një ritual të përditshëm në të gjithë vendin, ndërsa policia është e paaftë për të siguruar rendin dhe qetësinë. Të dielën u vra me 30 plumba një 34-vjeçar në qytetin e Fierit. 34-vjeçari Nelgert Pata, nga Tepelena, është vrarë me armë brenda në makinën e tij tip “Volkswagen”. Bëhet e ditur se kjo vrasje ishte e paralajmëruar, pasi viktimës i ishte bërë një atentat tre ditë para vrasjes në Tiranë, ndërsa policia jo vetëm që nuk e publikoi lajmin, por nuk kreu asnjë hetim për të zbuluar autorët e atentatit të dështuar që çoi më pas në ekzekutimin e 34-vjeçarit në Fier, ku ai ishte strehuar në një hotel për t’i shpëtuar vrasësve që ishin vënë në ndjekje.
Burime nga grupi hetimor bëjnë të ditur se, tre ditë përpara se të ekzekutohej me 30 plumba, Nelgert Pata i kishte shpëtuar një tjetër atentati, në Tiranë. Për këtë arsye, ai kishte ikur nga kryeqyteti për t’u fshehur në Fier. Më 17 nëntor, ai kishte parë disa persona të dyshimtë, teksa po qëndronte në një lokal në rrugën e “Kavajës”, pikërisht në vendin ku u plagos më 21 gusht të këtij viti. Ka bërë një telefonatë në polici, por më pas është zhdukur, duke lënë në mjegull gjithçka. Forcat e rendit kanë verifikuar telefonatën, por nuk kanë gjetur asgjë të dyshimtë.
Kjo ishte tentativa e tretë për ta eliminuar atë. Burimet konfirmuan se një tjetër tentativë ka ndodhur disa javë më parë në Fier. Sipas të njëjtave burime, ai është ndjekur nga disa persona, por ndaj tij nuk është qëlluar. Edhe për këtë rast, ai ka vënë në dijeni Policinë e Fierit. Por ai nuk është paraqitur asnjëherë vetë në polici për të kërkuar mbrojtje. Tentativa e parë për ta vrarë atë ishte ajo e 21 gushtit, pranë Parkut të Autobusëve, ku mbeti i plagosur.
Një detaj tjetër është se, makina me të cilën udhëtonte viktima nuk është e tij. Në çantën e Patës, ku mbante sende personale policia ka gjetur çelësat e një automjeti, i cili është gjetur më pas në parkimin e hotelit.
Në sitë hetuesit do të kalojnë dhe komunikimet telefonike të viktimës, për të verifikuar se me kë ka komunikuar para se të dilte nga dhoma e hotelit. Duke patur parasysh armiqësitë e tij, Pata lëvizte gjithmonë me makinë të blinduar, por ditën e dielë, ai udhëtonte me një makinë normale. Nga të dhënat rezulton se, mjeti që është gjetur në parkim në pronësi të Patës rezulton me targa false.
Gjithashtu edhe mjeti i autorëve që u gjet i djegur pas krimit në afërsi të fshatit Zhupan kishte targa false italiane. Nga mënyra e djegies së mjetit, lënia e armëve në makinën e djegur grupi hetimor dyshon se autorët janë vrasës me pagesë.
Autorët janë kujdesur deri në detaje për të mos lënë asnjë gjurmë pas. I plagosuri Ari Haliani, që drejtonte makinën ku gjendej Nelgert Pata, ka deklaruar se nuk ka mundur t’i shohë në fytyrë dy vrasësit. Policia ka marrë në pyetje disa persona në Fier e Tiranë, por deri tani nuk ka asnjë të ndaluar.
Vendi ku u vra Nelgert Pata është ende një skenë krimi për policinë. Agjentë janë rikthyer përsëri aty për të mbledhur dëshmi dhe prova. Burime nga grupi hetimor thonë se Nelgert Pata dyshohet se, prej të paktën tre ditësh ndiqej nga autorët. Prej të premtes 34-vjeçari qëndronte në një hotel vetëm 100 metra larg vendin ku ndodhi krimi.
Gjatë kësaj kohë, atentatorët kanë studiuar lëvizjet që kryente Pata, për të organizuar më pas vrasjen dhe mënyrën si do ta kryenin atë. Dyshohet se dy vrasësit kanë patur edhe një bashkëpunëtor që ka qëndruar përballë hotelit. Sapo ka dalë, vrasësit që qëndronin në një makinë të vjedhur tip “Mercedes”, janë sinjalizuar se Pata hipi në makinën e tij “Volkswagen” dhe po shkonte drejt tyre. Dy breshëri kallashnikovi janë zbrazur 100 metër larg hotelit. 30 gëzhoja u gjetën në vendin e ngjarjes. Hetuesit ende e kanë të paqartë arsyen përse 34-vjeçari po qëndronte në këtë hotel.
Grupi hetimor ka sekuestruar kamerat e sigurisë së hoteli për të parë hyrje – daljet e tij, personat më të cilët shoqërohej si dhe individë të tjerë për të cilët mund të lindin dyshime. Hetuesit kanë dyshime të arsyeshme se Nelgert Pata mund të jetë nxjerrë në pritë, pasi autorët kishin bërë planin për mënyrën e eliminimit të tij.

Bandat egërsohen, vrasjet nën hundën e policisë

Hakmarrja mes dy bandave duket se s’do të ketë një fund. Madje çdo ditë e më shumë ajo po egërsohet, duke arritur të vrasin kokat kryesore të bandave përkatëse. Zanafilla e historisë kriminale ka nisur vite më parë, kur Jani Aliaj qëlloi me thikë shokun e ngushtë të Elton Çiços. Vrasja detyroi Çiçon të betohej për hakmarrje. Ngjarja ndodhi në vitin 2000.
Dy të rinjtë nga Tepelena, emigrojnë në Greqi ku merren me aktivitete kriminale. 3 vite më vonë ata arrestohen dhe si për ironi të fatit vuajnë dënimin në të njëjtin burg. Konflikti nuk mungon as këtu. Elton Çiço qëllon me thikë Jani Aliajn ku ky i fundit mbetet i plagosur.
Pasi dalin nga burgu, të dy kthehen në Shqipëri, më të revoltuar me njëri-tjetrin, më të fuqizuar dhe filluan të rekrutonin të rinj, duke i bërë pjesë të bandave të tyre. Ndërsa vijonin aktivitetin kriminal, kryesisht në fushën e trafikimit të narkotrafikut, aq më shumë rritej dhe etja për hakmarrje, pasi veç plagosjes së shokut të Çiços nga Aliaj në vitin 2000, tani mes tyre kishte edhe një tjetër konflikt të hapur, atë të prishjes së pazareve të drogës.
Hakmarrja vazhdoi në Shqipëri. Në mars të vitit 2015, Çiços i dhunojnë prindërit brenda në banesën e tyre në Tepelenë. Mesazhi ishte i qartë për Çiçon. Ai nuk vonoi, dhe nisi menjëherë identifikimin e autorëve që i dhunuan prindërit.
3 muaj më vonë, ekzekutohet personi që dyshohej si një prej autorëve ndaj dhunës të të moshuarve të Çiços. Robert Rama ekzekutohet në 10 qershor në zonën e njohur si “Ish-Këneta” në Durrës.
Një muaj më pas, më 4 maj 2015, autorit të dytë të grabitjes, atij që dyshohej të kishte bërë transportin deri në shtëpinë e prindërve të Çiços, Elvis Imerit, i vihet një sasi eksplozivi në makinën e marrë me qira.
Por atentatet ndaj tij vazhduan dhe në 9 dhjetor të 2015 i vihet eksploziv vëllait të tij Elton Imerit, ish-ushtarak, i cili për shkak të shpërthimit humbi njërën këmbë, por fatmirësisht i shpëtoi vdekjes.
Hakmarrja mes bandave vazhdon edhe në vitin 2016. Më 10 janar, Elton Çiço qëllon ndaj Jani Aliaj, por këtë të fundin nuk e kap asnjë plumb.
Ndaj Jani Aliajt bëhet një tjetër atentat në prill të 2016-ës në Gjirokastër, ku mbeti i plagosur lehtë në dorë. Ai nuk e denoncoi në polici këtë atentat, duke thënë se nuk kishte konflikt me asnjë. Por një javë më vonë, më 1 maj, ai vret me pistoletë Elton Çiçon. Për ngjarjen policia shpalli si autorë Jani Aliajn dhe Renato Milloshin.
4 muaj më vonë më 1 shtator, i bëhet atentat Nelger Patës në Tiranë ku plagoset lehtë në vesh. Ky i fundit ishte kundërshtar me Çiçon. E dy muaj më pas, në tetor, i bëhet atentat shokut të ngushtë të Elton Çiços, Andi Mustafaraj. Një vrasës me pagesë e qëllon 4 herë në bark, por fatmirësisht Mustafaraj i shpëton këtij atentati.
Nuk vonoi shumë, dhe pak javë më pas, qëllohet me breshëri kallashnikovi Nelgert Pata, mik i Jani Aliajt dhe armik i Elton Çiços. Kjo është hakmarrja e radhës, por nuk dihet në është e fundit…

Viktimën e atentatit e kërkonte policia prej 3 muajsh, por e gjeti banda

Partia Demokratike ka reaguar pas vrasjes së ndodhur në Fier, ku u ekzekutua me një breshëri kallashnikovi, Nelgert Pata. Me një deklaratë për median, kreu i Departamentit të Rendit dhe Sigurisë në PD, Enkelejd Alibeaj tha se, policia po e kërkonte prej 3 muajsh, por e gjeti banda. “Viktima e atentatit mafioz dje në Fier, Nelgert Pata, ishte prej 21 gushtit të këtij viti në kërkim nga policia, pasi iu bë një atentat në Tiranë, dhe ai nuk u paraqit në polici, nuk dha dëshmi, nuk bashkëpunoi, nuk denoncoi. Në kërkim, sipas një emërtimi burokratik, pasi viktima jo vetëm nuk kërkohej nga policia, por krerët e saj, të përfshirë në një histori kriminale me të paktën 4 të vrarë deri tani, ofronin mbrojtje ose lehtësi sipas rastit. Pra, policia e shpall zyrtarisht në kërkim prej 3 muajsh dhe nuk e gjen personin edhe pse ai lëviz lirshëm në Tiranë e në qytetet kryesore të vendit, por e gjen banda dhe e ekzekuton. Ky është shteti i Edi Ramës”, u shpreh Alibeaj.
Sipas Alibeajt, kjo është një dëshmi e freskët dhe dramatike se si krerët e policisë të përfshirë në trafiqe e të ndarë sipas bandave, nuk zbatojnë ligjin, por u shërbejnë interesave kriminale. “Nuk ka rend e siguri me këtë qeveri, me këtë ministër të Brendshëm. Qytetarët kanë nevojë për sundim të ligjit dhe jo të bandave”, përfundoi Alibeaj.

Zgjedhjet në Kolonjë janë zhvilluar nën presion nga strukturat shtetërore. Kreu i Grupit parlamentar të PD, Edi Paloka u shpreh të dielën se, në zona si Kolonja, Erseka dhe Leskoviku, ku kriminaliteti është në nivelet më të ulta, është bërë presion me polici. Paloka tha se, është e njëjta skemë si ajo në Dibër.
Partia Agrare Ambientaliste ka denoncuar faktin se, eksponentë të mazhorancës të armatosur kanë terrorizuar qytetarët e Leskovikut për të votuar kandidatin e majtë. Sipas PAA, drejtori i TVSH, Thoma Gëllçi prej disa ditësh ndodhet në zonën e Kolonjës duke bërë propagandë për kandidatin e Partisë Socialiste.
Edhe anëtarja e Këshillit Kombëtar të PD, Ledina Alolli ka denoncuar raste të blerjes së votës në Kolonjë. Përmes një postimi në rrjetin social “Facebook”, ajo tha se disa qendra votimi janë “nën presionin e makinerisë shtetërore”. Teksa thotë se po manipulohen votat e qytetarëve, ajo thotë se përfaqësuesit e opozitës janë në terren për të mbledhur çdo provë e denoncim nga qytetarët.
“Blerje masive votash në Kolonjë. Çlirimi, Starja, Barmashi nën presionin e makinerisë shtetërore. Duan të zbatojnë skenarin e radhës.., presionin dhe blerjen, për t’u marrë votën kolonjarëve. Mesa po shihet e kuptohet në dritën e diellit, qeverinë dhe mazhorancën e përfaqësuar nga mëkëmbësi Peleshi e kanë zënë ethet e makthit për një fitore të grabitur. Këtë pushtet vota e lirë e fut në kompleks të thellë dhe në hall të madh.
Makineria qeveritare e korrupsionit po kap zgjedhjet, duke cenuar rëndë standardet e një procesi që duhej të ishte i lirë dhe i ndershëm. Demokratët dhe strukturat e koalicionit opozitar në terren po mbledhin çdo provë e denoncim për t’i çjerrë maskën manipulimit të radhës me votat e shqiptarëve. Me këtë qeveri e kryeministër nuk ka zgjedhje të lira e demokratike”, shkruan Anëtarja e Këshillit Kombëtar të PD.
Një tjetër denoncim u bë të dielën nga ana e përfaqësuesve të opozitës në Kolonjë për blerje votash. Madje, kësaj radhe denoncimi është bërë me zë e figurë. Në një video të publikuar në rrjetet sociale, një qytetare thotë se, i kanë ofruar 25 euro që të votojë për kandidatin e majtë. Në video përmendet dhe emri i zëvendëskryeministrit Niko Peleshi, duke thënë se paratë janë ofruar prej tij. Raste të kësaj natyre janë denoncuar edhe nga zgjedhës të tjerë në rrjetet sociale. Sipas tyre, persona të panjohur ndodheshin disa metra larg qendrave të votimit dhe shpërndanin zarfe me lekë në këmbim të votës për kandidatin e majtë.
Ndërkohë, kreu i Partisë Agrare Ambientaliste, Agron Duka, ka reaguar dje në mbrëmje lidhur me zgjedhjet në Kolonjë, ku sipas tij zgjedhjet u zhvilluan në terror dhe votat u manipuluan. Ai thotë më tej se, fushata u zhvillua nën një klimë presioni, me pjesëmarrje të administratës shtetëtore, stafit të kryeministrit, ministrave etj.
“Më konkretisht, i gjithë stafi i zëvendëskryeministrit me atë në krye, u ul këmbëkryq në Kolonjë për më shumē se një muaj, duke braktisur punët dhe zyrat për të cilat paguhen nga tatimpaguesit, pa futur këtu armatën e drejtorave, nëpunësve etj. Ministrat me në krye, ministrin e Brendshëm u zhvendosën në këtë zonë të varfër të Juglindjes bastion i PS, thuaj se Kolonja ishte përplasja Klinton-Trump, dhe si për t’i vënë qershinë mbi tortë, vetë Kryeministri la të gjitha hallet e popullit të Shqipërisë për të ardhur në Kolonjë ku tha, t’i japim fund 25 vjet keqqeverisje, megjithëse në 3-vjeçarin e fundit ka qenë vetë ai në krye të shtetit”, shprehet Duka.

Prokuroria ka zbuluar skemën e korrupsionit në Departamentin e Historisë në Universitetin “Luigj Gurakuqi” të Shkodrës, duke vënë në pranga përgjegjësin e saj dhe zv/dekanin. Nga hetimi i organit të akuzës, mësohet se nëpërmjet disa personave që kryenin rolin e sekserëve, ata kanë krijuar një skemë korrupsioni në dhënien e provimeve, në vlera monetare që varionin nga 200-700 euro.
Prokuroria ka arritur të zbulojë se, zv/dekani i Fakultetit të Filologjisë dhe Shefi i Katedrës së Historisë, nëpërmjet sekserëve Vehbi Bala dhe Ndoc Deda, kanë marrë para nga studentë të ndryshëm.
Në këmbim, pedagogët u kanë siguruar studentëve nota kaluese në provime të ndryshme ose vlerësime të larta, të cilat më pas do të shërbenin për regjistrimin në master. Në bazë të veprimeve të deritanishme hetimore, Gjykata e Shkodrës pranoi kërkesën e Prokurorisë dhe vendosi masën e sigurisë “arrest në burg” për Rokin Dabërdakun dhe Simon Lufin, të akuzuar për korrupsion pasiv.
Të dyshuar për “Ushtrim ndikimit të paligjshëm” në rolin e sekserit janë Vehbi Bala dhe Ndoc Deda. Ndërsa për “Korrupsion aktiv…” Brunilda dhe Vehbi Allushi, Renato Trushi dhe Arsen Lekaj. Ky skandal vjen pak muaj pas atij të pedagoges së bio – kimisë, Ditika Kopliku, e cila u filmua duke marrë 100 euro për provim, nga një emision investigativ.
Hetimi i Prokurorisë së Shkodrës ka zbuluar se disa shefa departamentesh dhe studentë të Fakultetit Filologjik në Universitetin “Luigj Gurakuqi”, nëpërmjet disa personave që kryenin rolin e sekserëve, kanë krijuar një skemë korrupsioni në dhënien e provimeve, në vlera monetare që varionin nga 200-700 euro.
Në njoftimin e Prokurorisë thuhet se, në vijim të një hetimi disa-mujor, të filluar në bazë të informacionit të Policisë, Prokuroria e Shkodrës ka marrë nga Gjykata lejen për arrestimin e personave të përfshirën në veprimtarinë e paligjshme. Masat e sigurisë janë ekzekutuar gjatë mesditës së hënë (dt. 21.11.2016) nga ana e forcave të Policisë Vendore.
Në kuadër të këtij procesimi penal, Prokuroria e Shkodrës ka zhvilluar hetimin proaktiv, në bazë të të cilit është zbuluar roli i personave, si edhe janë krijuar dyshimet e arsyeshme se ata bashkëpunonin me njëri-tjetrin, për të ndihmuar studentë të ndryshëm, në këmbim të parave, që të merrnin provimet, kryesisht në degën e Historisë.
Prokuroria e Shkodrës ka arritur të zbulojë se zv/dekani i Fakultetit të Filologjisë dhe Shefi i Katedrës së Historisë, nëpërmjet sekserëve Vehbi Bala dhe Ndoc Deda, kanë marrë para nga studentë të ndryshëm. Në këmbim, pedagogët u kanë siguruar studentëve nota kaluese në provime të ndryshme ose vlerësime të larta, të cilat më pas do të shërbenin për regjistrimin në Master.

Gjysma e Tiranë ishte mbrëmë në errësirë të plotë për shkak të mungesës së energjisë elektrike. Aktualisht, zonat pa energji janë “Vasil Shanto”, pranë stadiumit “Dinamo”, lulishte “1 Maji”, Selitë, etj
Qytetarët e revoltuar kanë dalë në rrugë, duke hedhur parulla kundër qeverisë. Ndërsa, OSHEE bëri të ditur se, ka qenë një defekt në fidrin e nënstacionit në Selitë që ka shkaktuar ndërprerje të energjisë elektrike në disa zona të Tiranës. Sipas OSHEE, avaria është ndikuar edhe në kushtet kur nënstacioni Qendër është jashtë pune për shkak të zhvendosjes, proces ky që pritet të mbyllet këtë javë. OSHEE thotë se është duke kryer manovrat në çdo kabinë që prek fidrin dhe po punon për riparimin e defektit brenda një kohe sa më të shkurtër.
Ndërprerja e vazhdueshme e energjisë elektrike në Tiranë, ka sjellë pasoja në familje e biznese të ndryshme. Si pasojë, në ambientet e tyre dhe jo vetëm, janë dëmtuar pajisjet elektroshtëpiake. Shqetësimit të ndërprerjes së energjisë i shtohet edhe ky i dëmtimit të pajisjeve. Banorët ankohen se u janë djegur pajisjet shtëpiake, si pasojë e ndërprerjes së herëpashershme të energjisë, por nuk marrin asnjë zgjidhje nga KESH dhe OSHEE. Ndonëse faturat e energjisë i paguajnë rregullisht, OSHEE nuk përgjigjet në asnjë rast për të bërë dëmshpërblimet ndonëse është përgjegjësi e saj.