Bajern Mynih do të ketë mungesa të rëndësishme në ndeshjen që skuadra e Karlo Ançelotit luan në Ligën e Kampioneve ndaj rusëve të Rostov. Me ekipin nuk do të udhëtojë portieri Manuel Nojer dhe mesfushori Arturo Vidal, të dy të padisponueshëm për arsye dëmtimesh.
Nojer nuk mund të stërvitej gjatë ditës së sotme për shkak të një problemi në pulpë e si rrjedhojë është vendosur që të lihet pushim për t’u riaftësuar, duke qenë nën vëmendjen e stafit mjekësor që do të qëndrojë në Mynih. Ai pritet të jetë plotësisht i gatshëm për duelin e të shtunës ndaj Bajer Leverkusenit, ndërsa në Ligën e Kampioneve do të luajë Sven Ulreih, për të cilin do të jetë ndeshja e katërt si profesionist me Bajern Mynih.
Ndërkaq, për Vidal parashikohet një mungesë më e gjatë, pasi mesfushori kilian vuan nga dëmtimi i pësuar me kombëtaren e tij. Edhe pse ka shpresa që ai të riaftësohet për fundjavën, në stafin e bavarezëve nuk janë të sigurt se ai mund të luajë si titullar. Megjithatë, Ançeloti do të ketë në dispozicion dy futbollistë të tjerë, të cilët kishin shfaqur probleme në ditët e kaluara, Arjen Roben dhe Havi Martinez të cilët janë stërvitur rregullisht me grupin.

Pas disfatës së javës së kaluar ndaj Cean, Nice kthehet te fitorja dhe këtë e bën në transfertën me Saint-Etienne. Skuadra e drejtuar nga Lucien Favre fiton me rezultatin minimal 1-0 falë golit të Valentin Eysseric, të realizuar vetëm në minutën e 63-të të takimit. Me këtë sukses Nice merr kryesimin e Ligue 1, pasi shkon në kuotën e 31 pikëve duke lënë pas në renditje Monacon dhe Paris Saint-Germain me nga 29 pikë.

Derbi i Milanos nuk pati një fitues, sepse Interi nuk mund ta humbiste një ndeshje ku luajti më mirë dhe pikërisht në fund, Perisiç mendoi të çonte topin në rrjetë për një barazim spektakolar 2-2 që të sjell në mendime derbet e dikurshme mes dy skuadrave. Milani në fakt, ishte shumë pranë fitores së dytë radhazi në sfidën ndërqytetase duke dashur të konfirmohet realisht si antiJuventus në Serie A, por pavarësisht se me shumë karakter dhe dëshirë tregoi se kishte kufizime në lojë përballë një Interi që luajti më mirë. Milani megjithatë tregoi se është më pragmatist dhe nga 3 goditje drejt portës në pjesën e parë të tria i pati në kuadrat, madje njërën prej tyre e dërgoi dhe në rrjetë, me Suson, që në të 43-tën ndezi “San Siron”.
Inter që realisht kishte qenë më këmbëngulës nuk e vonoi barazimin dhe në të 53-trën, arbëreshi Candreva shënoi me një goditje fantastike. Nga ky moment në fushë ishte vetëm Inter, ndërsa Milani u kënaq vetëm me Suson, që ishte i mjaftueshëm për t’i dhënë sërish epërsinë Milanit, pas një xhirimi dhe të Mirandës në zonë. Pasi gaboi në të 67-tën një gol të sigurtë, Perisiç nuk fali më në të 92-tën kur shfrytëzoi mjaft mirë një top në zonë për një barazim që ishte rezultati më i drejtë për këtë derbi.

Karlo Ançeloti në qendër të kritikave. Trajneri i Bayernit të Mynihut, pas një nisjeje shumë të mirë të kampionatit, duhet të reagojë menjëherë dhe të gjejë zgjidhjet e duhura, pasi ekipi i tij këto javët e fundit lë shumë për të dëshiruar. Kjo jo vetëm për shkak të humbjes kundër Borussia Dortmund, por edhe të mënyrës së lojës. Si pasojë e kësaj ecurie me luhatje, mediat në Gjermani nuk kanë ngurruar ta vendosin italianin në bankën e të akuzuarve. Humbja kundër verdhezinjve dhe parakalimi në tabelën e klasifikimit nga skuadra e Laipzig, ka bërë që të rriten disi pakënaqësitë.
Akuzat shkojnë deri aty sa i cilësojnë bavarezët si një ekip pa identitet. Kampionët e Gjermanisë gjatë këtij sezoni kanë pasur dy takime shumë të rëndësishme ku në të dy rastet ata kanë humbur. Njëra kundër Atletico Madrid në Champions League dhe tjetra ndaj Borussia Dortmund në kampionat. Rreshtimi i trajnerit 4-3-3 duket se nuk i përshtatet Bayernit. Mbrojtja është një repart që fut ujë nga të gjitha anët. Dëmtimet gjithashtu janë një tjetër element që rëndojnë gjendjen e ekipit. Karlo Ançeloti tashmë ka detyrën t’u rikthejë bavarezëve identitetin, shkëlqimin e sigurisht kreun në tabelën e klasifikimit në Bundesligën gjermane.
Tre barazimet dhe dy humbjet e Ançelotit këtë sezon kanë vënë në rrezik edhe pozicionin e tij, të paktën për drejtorin e mediave të Dortmundit, Sasha Flige. Ky i fundit ka shkaktuar polemika gjatë konferencës për shtyp pas ndeshjes duke bërë shaka me trajnerin e Bajernit. Teksa dy trajnerët respektivë po jepnin analizat e tyre gjatë konferencës, strategu italian nxitonte pasi i duhej të kapte edhe avionin në Paderborn. Në fund drejtori i mediave të Borusias ka bërë ironi me Ançelotin.
“Nëse ka pyetje të tjera për trajnerin e Bajernit, ju lutem prisni sa t’i jap dorën. Faleminderit Karlo Ançeloti! Jeni i shkarkuar zyrtarisht. Udhëtim të mbarë dhe ju uroj suksese!”, iu drejtua Flige trajnerit të Bajernit. Me shprehjen e zëdhënësit të klubit verdhezi “Sie sind hiermit offiziell entlassen”, shumë prej përkthyesve të gjuhës gjermane janë keqkuptuar. Shprehja e drejtorit të mediave ka qenë tendencioze dhe përkthehet në formën e shkarkimit, por ai e kishte fjalën që Ançeloti mund të largohej nga podiumi.
Në fakt, drejtori i mediave të Dortmundit pa dashur u ka tejçuar një mesazh indirekt drejtuesve të klubit bavarez. Dhe sa kohë do i duhet Ançelotit për t’i dhënë ekipit imazhin dhe formën e duhur, në mënyrë që të ketë rezultate? Pas tri barazimeve dhe një humbjeje në Bundesligë në 11 ndeshje, stoli i Ançelotit edhe mund të tronditet. Nëse kampionati është i gjatë dhe italiani ka kohë të korrigjohet, fati i tij pritet të varet nga rezultatet në Champions.

Lajme të mira për kombëtaren shqiptare nga Chellenge League në futbollin zviceran. Armando, Sadiku, i cili u mungoi kuqezinjve në dy sfidat e fundit me Spanjën dhe Izraelin, ka lënë pas dëmtimin duke u aktivizuar në pjesën e dytë në fitoren 0-4 të Zyrihut në fushën e Servette. Trajneri i Zyrihut, Ulrich Forte preferoi t’i jepte vetëm disa minuta në këmbë 25-vjeçarit, i cili ende nuk është i gatshëm për të përballuar një 90 minutësh të plotë. Sadiku zëvendësooi në minutën e 77-të Sarr, kur rezultati ishte 0-3.
Zyrihu shënoi një tjetër gol në të 87-ën me sulmuesin kuqezi në fushë. Në fakt Sadiku u përfshi në listën e të grumbulluarve nga De Biasi për ndeshjen e “Elbasan Arenës” me Izraelin, me shpresën se mund të rikuperohej në kohë, por stafi teknik vendosi ta linte në tribunë për të mos rrezikuar me një aktivizim të parakohshëm, që mund të ndikonte edhe më keq në gjendjen fizike të futbollistit. Sadiku iu nënshtrua një ndërhyrjeje kirurgjikale në gju, për shkak të dëmtimit të meniskut, duke qëndruar për rreth dy muaj jashtë fushave të blerta.

Migjen Basha kthehet në protagonist te Bari në Serinë B italiane. Mesfushori kuqezi i hapi rrugën fitores 2-0 përballë Carpit, duke vulosur edhe suksesin e parë për teknikun Colantuono në stol. Një gol i shkëlqyer nga distanca, me të cilin 29-vjeçari fitoi zemrat e tifozëve, ndërsa rimori edhe mesfushën e skuadrës në dorëzim, që me ndryshimin në stafin teknik e riktheu në rolin e tij natyral në qendër.
Përveç rrjetës së realizuar dhe detyrave të zakonshme në mesin e fushës, ish-mesfushori i Torinos ishte mes më aktivëve për bardhekuqtë. Gjithmonë reaktiv, me vizion të admirueshëm loje, duke qenë i pranishëm edhe në fazën sulmuese, shqiptari i lindur në Lozanë të Zvicrës ishte rreziku kryesor i Barit.
Ajo përballë Carpit ishte ndeshja e 290-të si profesionist për kuqeziun, me 10 klube të ndryshme mes të cilave me Atalantën dhe Torinon në Serinë A.
Shifër jubilare e festuar në mënyrën më të mirë të mundshme, për golin që i mungonte prej majit të kaluar, kur mbronte ngjyrat e Como-s. Në pritje të përforcimeve nga merkatoja e janarit, me Migjen Bashën të rikthyer në nivele të larta, Bari e ka gjetur pikën e referimit në fushë.