Steven Gerrard i jep fund aventurës në MLS me Los Angeles Galaxy. Mesfushorit anglez i ka përfunduar kontrata me kalifornianët, me të cilët luajti gjatë 18 muajve të fundit duke shënuar 5 gola, dhënë 14 asiste në 34 ndeshje gjithsej. Takimi i tij i fundit ishte gjysmëfinalja e konferencës së perëndimit në MLS ndaj Colorado Rapids, ku sulmuesi shqiptar Shkëlzen Gashi realizoi një gol spektakolar.
Në një qëndrim zyrtar Gerrad shpjegoi se kur u largua nga Liverpuli iu bashkua Los Angeles Galaxy që të fitonte një tjetër trofe në MLS, por ka mbetur i zhgënjyer që nuk mundi ta arrinte këtë objektiv. Gjithsesi theksoi 35-vjeçari ndihej krenar për atë që kishte dhënë në fushën e blertë për Galaxy. Ai shtoi më tej, se duhet të kalojë më shumë kohë me familjen, për të marrë më pas një vendim për të ardhmen e tij. Gerrard është i mirëpritur në “Anfield”, aty ku u formua dhe pati kulmin e karrierës si futbollist, por edhe trajneri i Celitc, Brendan Rodgers e ka ftuar t’i bashkohet skuadrës skoceze.

Milani është gati të bëjë çmenduri për të siguruar firmën e tij sapo të mbushë 18 vjeç, por Xhixhio Donaruma mund t’i japë lamtumirën kuqezinjve në fund të këtij sezoni. Çdo zë merkatoje rreth futbollistit thuajse është konfirmuar nga menaxheri i tij, Mino Raiola, i cili ka refuzuar të garantojë se ai do të vazhdojë të jetë pjesë e kuqezinjve edhe në sezonin e ardhshëm.
“Nuk përjashtoj asgjë rreth të ardhmes së tij, as faktin që mund të shkojë diku tjetër. Për portën ai është si Maradona dhe Pele së bashku, ndërsa për të ka merkato universale”, deklaroi menaxheri për “Corriere Della Sera”.
Fjalë që kanë krijuar panik te tifozët, të cilët janë të ndërgjegjshëm se menaxherit nuk i intereson të kthejë futbollistët në “flamuj” por t’i dërgojë aty ku fitohet më shumë. Në këtë aspekt, plani i Milanit për t’i caktuar Donarumës një rrogë prej 4,5 milionë eurosh në vit mund të mos mjaftojë. Klubet angleze janë të gatshme ta paguajnë më shumë, ndërsa nuk mund të harrohet interesimi i Juventusit që ka një marrëdhënie shumë të mirë me Raiolën dhe ka kaluar 27 milionë euro në llogarinë e tij pas transferimit të Pogba.

Në momentin më delikat të sezonit, Reali i Madridit humbet shërbimet e Alvaro Moratës. Pas një dëmtimi të pësuar në kofshë në ndeshjen miqësore mes Anglisë dhe Spanjës, talenti i Los Blancos duhet të qëndrojë për rreth 1 muaj jashtë fushave të futbollit. Një lajm shumë i keq ky për trajnerin Zidane, i cili gjatë kësaj periudhe nuk do të ketë as shërbimet e mesfushorit Toni Kroos.
Duke parë edhe formën jo të mirë që kalon bomberi francez, Karim Benzema dëmtimi i Moratës vjen në momentin më të papërshtatshëm për Realin e Madridit. Ish-sulmuesi i Juventusit do të humbasë në këtë mënyrë të gjitha sfidat e rëndësishme që do të zhvillojnë merengues-it. Nga derbi i kësaj fundjave ndaj Atleticos së Madridit e deri tek dueli ndaj Borussias së Dortmundit në Champions. Në mes është edhe superpërballja me Barcelonën me Moratën, që nuk do të jetë në dispozicion të trajnerit Zidane as në El Clasico. Trajneri francez kishte gjetur te Morata një alternativë shumë të mirë për treshen e famshme BBC. 24-vjeçari është aktivizuar në 17 takime me Los Blancos në të gjitha kompeticionet gjatë këtij sezoni, duke realizuar dhe 8 gola.
Derbi i Madridit është kthyer në qendër të vëmendjes gjatë viteve të fundit dhe kjo për meritë të Atleticos, që ka arritur t’i kundërvihet skuadrës më të suksesshme të qytetit. Gjithsesi, kjo është një sfidë që përherë ka krijuar spektakël, tension dhe gola, sepse bëhet fjalë për dy skuadra që kërkojnë të ndajnë territorin e një qyteti gjigant. Por, cilët janë 10 emrat më influentë të kësaj sfide ndër vite? Në kampin “Los Blancos” i pari në radhë sigurisht, që është ish-kapiteni Raul Gonzalez. Ish-sulmuesi ka arritur të shënojë me një vazhdimësi të frikshme, duke u bërë “macja e zezë” e “Rojiblancos” me 15 gola të shënuar. Spanjolli ndiqet nga Cristiano Ronaldo, i cili në sezonin 2011-2012 realizoi plot 5 gola në dy sfidat sezonale.
Atletico Madrid ka qenë viktimë e preferuar edhe e Ronaldos, që ka shënuar 7 herë në portën e bardhekuqve, por ai do të mbahet mend gjatë për atë gol në sekondën e 14. Në krahun tjetër, ndoshta është më e vështirë të gjesh emra kaq të suksesshëm, por i pari që rreshtohet në radhët e Atleticos mund të konsiderohet Diego Costa. Goli në derbin e kupës së vitit 2013 i dha fund mallkimit të bardhekuqve, që nuk arrinin të siguronin një fitore që prej 14 ndeshjesh. Griezmann është sigurisht njeriu i momentit në derbin e Madridit. Francezi e gjeti rrugën e rrjetës edhe në sfidën e fundit në kampionat. Ndërkohë, një tjetër lojtar vendimtar për Atleticon ka qenë edhe Arda Turan, që në sezonin 2014-2015 shënoi golin e barazimit.

Këtë të shtunë në orën 18:30 luhet klasikja e futbollit gjerman. Në Signal Iduna Park, Borussia e Dortmundit pret Bayern Munich në një duel që gjithmonë ka prodhuar spektakël dhe emocione të shumta. Dortmundi aktualisht numëron 6 pikë më pak se bavarezët e Karlo Ançelotit në tabelën e klasifikimit, por në një sfidë të tillë nuk ka favoritë dhe diçka të tillë e lanë të kuptohet në intervistat e tyre, mbrojtësi brazilian i Bayern-it, Rafinha, por edhe kapiteni Philip Lahm, i cili vlerësoi maksimalisht Dortmundin.  Nëse skuadra e Thomas Tuchel vjen në këtë sfidë pas fitores bindëse me shifrat 5-2 ndaj Hamburgut në transfertë, Bayerni shkon në Westfali pas barazimit zhgënjyes ndaj Hoffenheim-it në shtëpi, hap fals ky që i lejoi debutuesve të Leipzigut t’i bashkoheshin ekipit të Ançelotit në kuotën e 24 pikëve në krye të Bundesligës.
Megjithatë, problemet janë të shumta për Bayernin në vigjilie të klasikes së futbollit gjerman. Përveç Jerome Boateng, trajneri Karlo Ançeloti për arsye dëmtimi nuk mund të ketë në dispozicion tre lojtarë të tjerë me peshë për këtë sfidë. Kështu, Arjen Robben, Arturo Vidal dhe Javi Martinez, janë në dyshim të madh për duelin e kësaj të shtune. Të tre futbollistët nuk u stërvitën me grupin këtë të enjte dhe me shumë gjasa do të mungojnë ndaj Borussias së Dortmundit. Robben dhe Martinez kanë probleme fizike, ndërsa Vidal u largua i dëmtuar nga sfida mes Kilit dhe Uruguay-it. Drejtuesit e Bayern-it i kishin kërkuar federatës kiliane të futbollit të mos e aktivizonte lojtarin në atë sfidë, pasi Vidal kishte probleme, por këta të fundit nuk pranuan dhe tashmë pasojat duhet t’i vuajë Bayerni.

Një çështje e rëndësisë madhore jashtë së cilës nuk mund të qëndronte dhe kapiteni i Kombëtares. Ansi Agolli rreshtohet përkrah tifozëve kuqezi për sa i përket trajtimit të pamerituar që ju rezervua nga forcat e rendit gjatë ndeshjes Shqipëri-Izrael. Nëpërmjet një komunikimi në profilin e tij në Facebook, kapiteni e nis me një farë ndjese në lidhje me rezultatin e asaj sfidë, duke pranuar që në skuadër nevojitet reflektim dhe ka nevojë që të gjithë të punojnë për të sjellë paraqitje më të mira në ndeshjet e radhës. Megjithatë, thelbi ka të bëjë me trajtimin ndaj tifozëve kuqezi që së fundmi deklaruan se do të bojkotojnë kombëtaren në ndeshjet brenda si pasojë e terrorit policor, që ju nënshtruan gjatë sfidës me Izraelin.
Agolli shprehet se, masat ekstreme të sigurisë krijuan tension të tepruar e madje me shprehjen se, këto masa “Vështirësuan jetën dhe lojën për të gjithë ne”, le të kuptohet se klima e pazakontë pati ndikimin e saj edhe te futbollistët e kombëtares. Një trajtim i pakuptimtë ky i tifozëve nga forcat e rendit sipas Agollit, që shkon madje edhe më tej kur kujton se siguria në stadium nuk mund të realizohet në shkelje të të drejtave themelore të njeritu, siç është padyshim Lëvizja e Lirë, duke sjellë në vëmendje rastin e ndalimit të Shvercerave që nuk u lejuan nga forcat e rendit të kalojnë kufirin me Shqipërinë për të ndjekur ndeshjen. Në fund kapiteni kuqezi e mbyll komunikatën e tij me urimin, që tifozët kuqezi të rikthehen në stadium, pasi kombëtarja luan për ta.

Tifozët kuqezi nuk do të rikthehen në stadium. Pavarësisht letrës së hapur nga ana e Federatës Shqiptare të Futbollit, zemra e tifozerisë shqiptare kërkon respekt dhe heqjen e masave drastike nga ana e policisë në dëm të tyre. Disa prej drejtuesve të tifogrupit të Kombëtares Shqiptare, bëjnë të qarta pikat ku nuk bien dakort me sjelljen e forcave të rendit. Gerti Peshkopia dhe Gentian Xhengo sqarojnë shkaqet e vendimit drastik të marrë nga “Tifozët kuqezi”.
“Janë marrë masa drastike ndaj nesh. U ushtrua presion shumë i madh. Këto masa nuk janë regjistruar vetëm në ndeshjen e fundit, por po përsëriten në vazhdimësi”, tha Gerti Peshkopia.
“Gjithçka nisi që në ndeshjen me Portugalinë dhe vazhdoi me Serbinë e me radhë. Heqja e simboleve, por edhe ndalimi i bluzave dhe banderolave janë disa nga shkaqet pse e kemi marrë këtë vendim”, tha Gentian Xhengo.
Për Sajmir Çollakun, “Tifozët kuqezi” meritojnë trajtim ndryshe, ashtu siç ndodh në stadiumet jashtë vendit ku ata kanë qenë të pranishëm përherë. “Ne nuk jemi terroristë. Kërkojmë të mbështesim Kombëtaren dhe duam një trajtim sa më normal, ashtu siç ndodh në çdo stadium jashtë”, u shpreh Çollaku.
Për “Tifozët kuqezi”, shkaktari kryesor i kësaj situate është policia dhe bojkoti do të prishet vetëmm nëse forcat e rendit nuk do të veprojnë me dorë të hekurt ndaj tyre.
“Federata ka punën e saj. Ne nuk merremi me federatën. Gjithçka që kërkojmë është që të mos ketë policë në tribuna. Vendimi për largimin nga stadiumi i takon kryesisë, por jam i sigurt se do të jetë në fuqi për Lihtenshtejnin dhe të gjitha ndeshjet miqësore që Shqipëria do të luajë në vendin tonë”, tha Peshkopia.
Në fund, përfaqësuesi i tifogrupit “Tifozët kuqezi” ka një mesazh të qartë, ku kërkon që të gjitha simbolet e lejuara nga UEFA, të mos pengohen nga policia.
Nëse “Tifozët kuqezi” nuk do të bëjnë një hap pas në qëndrimin e tyre, atëherë ata nuk do të jenë të pranishëm në ndeshjen e fundit eliminatore të shtëpisë kundër Lihtenshtejnit, por edhe në miqësoret që do të zhvillohen deri në fund të vitit tjetër.

Verdikti i ardhur dje në pasditen e vonë fut jo pak në telashe Milanin, në pritje të derbit kundër Interit. Alesio Romanjoli, i cili u detyrua të dilte në fundin e pjesës së parë të sfidës Itali-Gjermani, iu nënshtrua dje vizitave mjekësore, të cilat konfirmuan një tërheqje modeste muskulore të muskujve të brendshëm të kofshës së djathtë. Dhe pavarësisht se dëmtimi nuk duket i rëndë, gjendja e lojtarit do të monitorohet me kujdes deri të dielën paradite, për të kuptuar nëse lojtari do t’ia dalë ose jo. Prandaj, kaq ka mjaftuar për të vënë në alarm stafin mjekësor të kuqezinjve, por akoma më shumë trajnerin e Milanit, Vincenzo Montellën, i cili nuk e kishte llogaritur absolutisht këtë dëmtim, që i prish jo pak plane.
Natyrisht që kreu i pankinës do të ishte i lumtur nëse lojtari do të luante edhe duke shtrënguar dhëmbët, sepse Alesio Romanjoli është pa dyshim lideri i repartit defensiv, por nëse ai luan pa u riaftësuar plotësisht, ekziston rreziku që dëmtimi të përkeqësohet dhe diçka e tillë mund të prishte planet e një sezoni të tërë.
Për këtë arsye, gjithçka rreth 21-vjeçarit do të mbahet nën kujdes të plotë, ndonëse pak orë pas daljes së përgjigjes së analizave, nga “Milanelo” vinin lajme se Romanjoli me 60 për qind nuk do të jetë pjesë e derbit të Milanos.
Kjo do të thotë se në nxehje kanë dalë menjëherë jo vetëm paraguaiani Gustavo Gomes, që do të vijë jo pak i lodhur nga Amerika e Jugut dhe minutat e akumuluara me kombëtaren e tij, por edhe kolumbiani Kristian Zapata, i cili ka punuar rregullisht në Milano, duke konfirmuar se tani është riaftësuar plotësisht nga dëmtimi që pësoi në verë.
Nëse Vincenzo Montella do të jetë i detyruar të ndërrojë lojtarë në mbrojtje, për arsye dëmtimi, në sulm ai ka dyshime që lidhen me formën që po kalojnë lojtarët në dispozicion të tij. Pa dyshim që, duke u nisur nga eksperienca e madhe mbi shpatulla, Karlos Baka duket se nuk ia mohon askush një bluzë titullari kundër Interit, por forma e fundit dhe euforia që ka pushtuar Xhanluka Lapadulën, pas golit të fitores me Kievon dhe grumbullimit në kombëtare, vë realisht në dyshime trajnerin.
Në të njëjtën kohë, golashënuesi më i mirë i Serisë B në sezonin e kaluar është një sulmues që di të sakrifikohet dhe të bëjë shumë herë më shumë presion te rivalët kundrejt Bakës, prandaj këto cilësi mund të jenë shumë të rëndësishme për të vendosur një derbi, prandaj këto pikëpyetje do ta tundojnë jo pak Montellan.

Ashtu si Roberto Mançini dy sezone më parë edhe Stefano Pioli e nis me derbin ndaj Milanit aventurën e tij në krye të stolit të Interit. Një start i ndërlikuar për ish-trajnerin e Lazios, të cilit i është besuar detyra e vështirë për të rikthyer skuadrën zikaltër në rrugën e duhur pas një fillimi aspak pozitiv të sezonit. Megjithatë Pioli është gati dhe nuk ka frikë, madje 51-vjeçari beson se të dielën në mbrëmje në “San Siro”, do të jetë skuadra e tij që do të triumfojë në derbin e Milanos. Pioli e nisi me një grup të cunguar futbollistësh punën e tij te Interi për shkak të ndeshjeve të kombëtareve, megjithatë prej pak ditësh ai ka në dispozicion edhe elementë të tillë si Candreva, Eder, Brozovic, Perisic, Jovetic e Joao Mario.
Në pritje të amerikanojugorëve, trajneri italian mesa duket e ka përcaktuar formacionin me të cilin do të zbresë në fushë Interi ndaj kuqezinjve të Vincenzo Montellas. Por për trajnerin e ri të Interit pak rëndësi ka se kush do të luajë, e rëndësishme është që ata futbollistë që do të zbresin në fushë të shfaqin më të mirën e tyre dhe të ndihmojnë skuadrën për të marrë fitoren. Me një lider si Icardi në fushë, i cili do të kërkojë të zhbllokohet sepse nuk i ka shënuar asnjëherë Milanit, Pioli ka besim se Interi i tij do të marrë tre pikët në derbi.
Në profilin e tij në Twitter klubi zikaltër ka përcjellë deklaratat e para të trajnerit Stefano Pioli për derbin ndaj Milanit në pritje të konferencës për shtyp, të cilën 51-vjeçari do ta zhvillojë këtë të premte dhe jo të shtunën siç duhet të ishte në program. “Janë emocione të forta, të cilat duhet të na lejojnë të shkojmë në këtë ndeshje në mënyrën më të mirë të mundshme, me shumë përqendrim dhe vendosmëri. Sepse duam që derbi të jetë i yni”. Me këto fjalë Stefano Pioli ndez derbin e Madoninës me shpresën se të dielën, Interi i tij do të zhvillojë një ndeshje të madhe dhe do të marrë një fitore që mbi të gjitha do të rikthente qetësinë në shtëpinë zikaltër.
Edhe ish-presidenti zikaltër, Massimo Moratti beson se derbin do ta fitojë Interi, por gjithsesi parashikon një derbi të ekuilibruar. “Sigurisht mendja më shkon tek Icardi, por Interi ka futbollistë të tjerë që mund t’i japin fitoren. Derbi i Milanos është gjithmonë një sfidë shumë tërheqëse dhe sigurisht e veçantë. Ne nuk shkojmë si të favorizuar, por zakonisht kur situata është e tillë fiton Interi”, u shpreh Moratti.
Tek zikaltrit Moratti veçon Icardin, ndërsa te Milani vlerëson punën e trajnerit të Milanit, por edhe talentin e Donarummas. “Montella po tregon se është një trajner shumë i mirë, me të në krye po bëjnë mirë. Te Milani mund të veçoj Donarummën, ai është pika më e fortë e tyre”, tha ish-presidenti i Interit. Moratti beson se me Piolin Interi mund të arrijë objektivin Champions, edhe pse nuk do të jetë e lehtë. Gjithsesi skuadra dhe trajneri duhet të mos dorëzohen pavarësisht vështirësive.

Bëhen gjithnjë e më të fortë zërat për interesimin e Jose Murinjos për Elseid Hysajn. Pasi u bë i ditur nga mediat italiane, lajmi gjen konfirmim edhe në Angli me të përditshmen “Daily Star”, që jep detaje të tjera interesante të merkatos së United ku del me të njëjtin konkluzion, The Special One ka gati ofertën prej 25 milionë paundsh për Elsied Hysajn. Jose Murinjo ka shënjestruar yllin e Napolit, pasi është gati të përjashtojë nga skuadra dy futbollistë. Bosi në “Old Trafford” ka vendosur se Chris Smalling dhe Darmian nuk bëjnë më pjesë në planet e tij afatgjata dhe është gati t’i nxjerrë në merkato. Për këtë arsye Murinjo kërkon Hysajn, që e ka piketuar futbollistin e kombëtares shqiptare si një specialist në krahun e djathtë të mbrojtjes, por që mund të operojë edhe në qendër të këtij reparti.
Edhe “Daily Star” thekson se pavarësisht se Hysaj u ble për vetëm 5 milionë euro nga Napoli, së fundmi shkodrani ka nënshkruar një kontratë afatgjatë me skuadrën italiane që në asnjë mënyrë nuk do ta shiste atë lirë. Napoli deri më tani e ka konsideruar Hysajn të pashitshëm si të domosdoshëm për planet e trajnerit Sarri, por në futboll e sidomos në merkato kurrë nuk mund të thuhet kurrë dhe përballë një oferte të jashtëzakonshme De Laurentiis mund të tundohet. Nga Franca vijnë ndërkohë sinjale se Napoli është duke u interesuar për mbrojtësin e djathtë të PSG, Serge Aurier çka të bën të mendosh se në klubin italian nuk duan të gjenden të papërgatitur në rast të një largimi të mundshëm të Hysajt, për të cilin parashikohet një merkato e nxehtë në janar.