Në finalen e festivalit, kryebashkiaku Xhelal Mziu: Inkurajoj të gjithë nxënësit që të bëhen pjesë e vazhdueshme e veprimtarive të ndryshme të Pallatit të Kulturës Është mbyllur dje në festivali i shkollave 9-vjeçare të Kamzës në kuadrin e festave të Nëntorit. Bashkia Kamëz në bashkëpunim me Zyrën Rajonale Arsimore organizuan për disa ditë edicionin e katërt të festivalit të shkollave 9-vjeçare. Kjo veprimtari u zhvillua në skenën e teatrit të Pallatit të Kulturës të qytetit të Kamzës. Festivali zgjati katër ditë.
Stafet arsimore kishin përgatitur programet konkurruese për të paraqitur denjësisht materialet e zgjedhura për këtë konkurrim siç edhe ndodhi. Në këtë aktivitet morën pjesë 22 shkolla 9-vjeçare. Materialet konkurruese ishin të larmishme, ku u përfshinë këngë, valle, interpretime me instrumente popullore, poezi si dhe interpretime të veprave letrare. Në sallë ishin të pranishëm stafet pedagogjike të shkollave, përfaqësues të institucionit të Bashkisë si dhe organizatorët e këtij eventi mjaft të mrekullueshëm. Festat e Nëntorit sollën një atmosferë festive në mjediset e Pallatit të Kulturës, ku nxënësit, mësuesit, prindërit dhe çdo grup tjetër ndoqën shpalosjen e talenteve të reja që sjell ky festival.
Kryebashkiaku Xhelal Mziu ka mbështetur këtë aktivitet ashtu siç i ka mbështetur vazhdimisht jo vetëm veprimtaritë e shkollave, por edhe të çdo institucioni që kontribuon në gjallërimin e jetës kulturore të qytetit. Z. Mziu gjithashtu ka shprehur edhe interesimin e vazhdueshëm që mjediset e Pallatit të Kulturës në Kamëz të mbajnë atmosferën e festave të Nëntorit dhe atyre të fundvitit si dhe dyert të jenë të hapura për veprimtari kulturore-artistike, për të gjitha talentet që mbart qyteti i Kamzës, si dhe për të gjitha bashkëpunimet në këtë fushë.
Dje, kryetari i Bashkisë, z. Xhelal Mziu, ishte i pranishëm në ditën finale të festivalit të shkollave 9-vjeçare të qytetit të Kamzës. Në këtë edicion të katërt të festivalit të shkollave 9-vjeçare, i cili u zhvillua në kuadër të festave të Nëntorit, shkolla “Halit Coka” zuri vendin e parë. Edhe në këtë veprimtari të organizuar nga Bashkia Kamëz, Zyra Arsimore në bashkëpunim me stafet e shkollave 9-vjeçare, spikati niveli i lartë i interpretimit, talentet e reja në të gjitha zhanret artistike, si dhe kostumet e larmishme, të cilat ishin përgatitur me shumë kujdes nga të gjitha shkollat, të denja për festat e këtij muaji. Për të përshëndetur pjesëmarrësit dhe për të ndarë çmimet ishte vetë i pranishëm kryebashkiaku Mziu, i cili ka falënderuar të gjithë për angazhimin e tyre në këtë veprimtari.
“Dua të falënderoj të gjitha shkollat 9-vjeçare të Kamzës, që për katër ditë rresht sollën një entuziazëm të paparë në qytetin e Kamzës, në këtë Pallat Kulture të mrekullueshëm. Dua të falënderoj përzemërsisht të gjithë ata që kontribuuan, pra nxënësit e këtyre shkollave konkurruese dinjitoze; dua të falënderoj të gjithë mësuesit, që punuan për të pasur këtë standard që u pa në këto katër ditë”, u shpreh ndër të tjera Mziu.
Më tej në fjalën e tij ai inkurajoi të gjithë nxënësit e qytetit që të bëhen pjesë e veprimtarive të ndryshme të Pallatit të Kulturës. “Dua të inkurajoj të gjithë nxënësit e këtyre shkollave për të qenë pjesë e Pallatit të Kulturës, që Pallati i Kulturës të mos jetë vetëm pjesë e një festivali, por në mënyrë të vazhdueshme çdo muaj, çdo javë, për të qenë pjesë e aktiviteteve jo vetëm kulturore, por edhe e aktiviteteve të tjera, për të cilat qyteti ynë ka nevojë dhe askush tjetër përveç jush nuk mund të sjellë më shumë se ju në këtë qytet”, ishin fjalët e kreut të Bashkisë, i cili premtoi gjithashtu se dyert e Pallatit të Kulturës do të jenë të hapura për të gjithë.
Mbahet festivali i 22 shkollave 9-vjeçare në Kamëz, shkolla “Halit Coka” fiton çmimin e parë
Varfëria, shqiptarët jetojnë me 500 lekë/dita
Për herë të parë në më shumë se dy dekada, fondi për konsum ushqimor i shqiptarëve ka pësuar rritje në raport me shpenzimet e tjera, bëhet e ditur nga Instituti i Statistikave.
Gjatë vitit 2015, familjet shqiptare shpenzuan 48.7 për qind të parave për të mbuluar konsumin e ushqimeve dhe pijeve joalkoolike, nga 44.3 për qind që patën shpenzuar për të njëjtën kategori në vitin 2014.
Sipas Anketës së Buxhetit të Familjeve që u publikua të enjten nga INSTAT, konsumi i familjeve shqiptare pësoi një rritje nominale prej 1.9 për qind, e barabartë kjo me indeksin e çmimeve të konsumit, duke bërë që konsumi real të mbetej në vendnumëro.
Sipas INSTAT, konsumi mesatar mujor i familjeve shqiptare qe 70,766 lekë për vitin 2015, me një rritje në vlerë nominale prej 1.9 për qind në krahasim me vitin 2014, kur konsumi qe 69,442 lekë për familje në muaj. INSTAT nënvijëzon gjithashtu në raport se indeksi i çmimeve të konsumit gjatë vitit 2015 u rrit me 1.9 për qind.
Por ndërsa konsumi mesatar i familjeve nuk është rritur, struktura e konsumit ka pësuar ndryshime thelbësore. Në krahasim me vitin 2014, shqiptarët rezultojnë të kenë shpenzuar shumë më tepër para për konsum ushqimor vitin e kaluar, ndërsa me rritje të ndjeshme qenë edhe shpenzimet për banesën, ujin dhe energjinë elektrike, shtesë që u mbulua nga rënia e shpenzimeve për grupmallra të tjera, përfshirë mobilimin e shtëpive, arsim, argëtim e kulturë apo komunikim.
“Ndryshimi më i madh është regjistruar në grupin “shpenzime ushqimore dhe pije jo-alkoolike”, i cili ka një rritje prej 4,4 për qind në krahasim me një vit më parë”, shkruhet në njoftimin e INSTAT.
“Grupet që kanë regjistruar uljet më të mëdha në strukturën e shpenzimeve për konsum gjatë kësaj periudhe janë “Arsimi” me 2,1 për qind dhe “Shëndeti” me 1,2 për qind,” shtohet në njoftim.
Shkaku për rritjen e shpenzimeve për ushqime duket se lidhet ngushtësisht me ecurinë e çmimeve. Ndërsa inflacioni mesatar i përgjithshëm i vitit 2015 qe 1.9 për qind, inflacioni i grupit të ushqimeve qe 4 për qind, ndërsa inflacionet e grupimeve të tjera qenë negative.
Shqiptarët shpenzonin deri në 70 për qind të parave të tyre për të mbuluar konsumin ushqimor gjatë viteve 1980, por pas rënies së komunizmit dhe rritjes së ekonomisë, konsumi filloi të anojë nga mallrat dhe shërbimet e tjera. Vrojtimi i vitit 1994 mbi konsumin zbuloi se 69 për qind e parave të shqiptarëve shkonin për ushqime. Në vitin 2006, konsumi i ushqimeve zinte 48 për qind të totalit, ndërsa deri në vitin 2014, konsumi i ushqimeve ra në 44 për qind të totalit.
Përgjatë tetë viteve të fundit, shqiptarët janë detyruar të përballen me të ardhura më të pakta, ose me të ardhura në stanjacion, ndërkohë që çmimet kanë vijuar të rriten, duke detyruar shumë familje të kursejnë nga shpenzimet e tjera për të mbuluar nevojat për ushqime.
Në vendet e zhvilluara, konsumi i ushqimeve zë më pak se 20 për qind të kostos së përgjithshme të jetesës së një familjeje.
Konsumi për frymë
Instituti i Statistikave e kryen anketën e buxhetit të familjeve, duke pyetur rreth 7,300 familje në të gjithë Shqipërinë. Për vitin 2015 llogaritet se në Shqipëri ka 764 mijë familje me madhësi mesatare katër anëtarë për familje. Konsumi mesatar për frymë rezulton 18,600 lekë në muaj, ose më pak se 600 lekë në ditë. Një shqiptar shpenzoi mesatarisht gjatë një muaji të vitit 2015 9,100 lekë për konsum ushqimor dhe 9,500 lekë për konsum joushqimor.
Qarku me konsumin më të lartë rezulton Tirana, ku familjet shpenzuan mesatarisht 81,700 lekë në muaj. Konsumi në Tiranë në terma nominalë ka pësuar një rritje të papërfillshme prej vetëm 0.1 për qind, gjë që do të thotë se në terma realë, banorët e këtij qarku qenë më të varfër se sa në vitin 2014. Për pjesën tjetër të vendit ka pasur disa luhatje të forta, në ulje dhe në rritje. Për vitin 2015, Qarku i Vlorës rezulton qarku më i varfër në Shqipëri, ku familjet konsumuan mesatarisht 51 mijë lekë në muaj, me rënie 6.8 për qind në krahasim me vitin 2014. Qarku i Dibrës rezultoi me rënie konsumi prej 16 për qind, ndërsa Qarku i Kukësit rezultoi me rritje në masën 16 për qind.
PD, kallëzim penal për Beqen
Ilir Beqaj do të duhet të përballet në Prokurori me akuzën e shpërdorimit të detyrës, pas shkarkimit me telefon që i bëri vartësit të tij në Tropojë. Kallëzimi penal po përgatitet nga Partia Demokratike, ndërkohë që deputetja Albana Vokshi tha dje në një dalje për mediat, se ky rast tregoi se reforma e Ramës në administratë ka dështuar plotësisht. Sipas deputetes së opozitës, pretendimet e Beqajt për këtë rast nuk qëndrojnë, pasi në rast se drejtori i Fondit të Detyrueshëm të Sigurimeve të Kujdesit Shëndetësor në Tropojë kishte paguar në mënyrë abuzive për tre muaj një person, ai duhet të bënte kallëzim penal për të. “llir Beqaj ka konsumuar veprën penale të shpërdorimit të detyrës me shkarkimin me telefon të drejtorit të Fondit të Detyrueshëm të Sigurimeve të Kujdesit Shëndetësor në Tropojë, me motivin që nuk mori pjesë në një mbledhje partie. Z.Hajdarmataj me shumë gjasa nuk ka marrë pjesë në Mbledhjen e të deleguarit të Partisë, Beqaj, e nuk ka marrë pjesë as në mbledhjen kur ishte Edi Rama. Këtë krim si duket nuk ia fal dot partia. Ilir Beqaj ka shkelur ligjin dhe Partia Demokratike është e vendosur ta ndjekë deri në fund këtë çështje ndaj po përgatit një kallëzim penal. Ky rast tregoi edhe një herë se reforma në administratën e Edi Ramës ka dështuar, se vendet e punës tregtohen sipas interesit politik e partiak, dhe nuk merret parasysh merita e zotësia. Janë më mijëra nëpunësit e administratës që janë emëruar apo pushuar nga puna për arsye vetëm politike. Emërime me zarf nën dorë dhe shpërblime në kohë zgjedhjesh në këmbim të votës së familjarëve. Meritokracia me Edi Ramën s’është më kriter e s’ka vlerë. Pas bërjes publike të skandalit nga emisionin “Stop”, Ilir Beqaj tentoi të mbrohej, duke sajuar një motiv që rezulton i pavërtetë për shkarkimin, gjë që e implikon atë edhe më tepër. Nëse drejtori i Fondit Tropojë z.Hajdarmataj ka paguar për 3 muaj një punonjës në mungesë, siç pretendon Beqaj, atëherë kjo do të përbënte një vepër penale, dhe ai duhet të kishte ngritur padi. Por fakti që nuk e ka bërë padinë për këtë vepër penale, përbën në vetvete një vepër penale, pasi e ka fshehur (apo moskallzuar) krimin. Edi Rama sot ka bërë sërish propagandë, por nuk ka thënë asnjë fjalë për këtë skandal, duke dhënë sërish mbështetjen e tij për paligjshmërinë, për mashtrimin dhe korrupsionin”, tha deputetja e PD-së Albana Vokshi.
30 muaj burg për shoferët e Ministrisë së Jashtme
Një gjykatë e Janinës i shpalli sot fajtorë dhe vendosi të dënojë me burgim tridhjetë muaj secilin nga dy shoferët e Ministrisë së Jashtme shqiptare, Altin Tafa dhe Agim Asllani. Shoferët u ndaluan të dielën në pikën kufitare të Kakavijës, pasi në mjetin që ata drejtonin u gjetën disa tekste në gjuhën shqipe që po dërgosheshin në Ambasadën shqiptare në Athinë për mësimin e gjuhës amtare nga fëmijët e emigrantëve.
Sipas burimeve mediatike greke, Konsulli i Shqipërisë në Janinë, paraqiti dokumentet ku shërbimi po kryhej në përputhje me Konventën e Vjenës, por kjo nuk është pranuar nga Gjykata. Prokurori grek, sipas këtyre burimeve, ka pohuar në seancë se librat e gjetur në pjesën e pasme të automjetit ishin objekt i një misioni jo diplomatik, pasi nuk ishin paketuar sipas proçedurave diplomatike.
Edhe lidhur me përmbajtjen e librave, prokurori tha se, “ky është një material me përmbajtje anti-greke, dhe kjo mund të rrezikojë marrëdhëniet mes dy vendeve”. Sipas palës greke, në tekstet e librave që po transportoheshin kishte harta të së ashtuquajturës Shqipëri e Madhe. Ambasada shqiptare në Athinë nga ana e saj ka shpjeguar, se nuk bëhet fjalë për diçka të tillë, por për një hartë ku tregohen vendet ku ka përqendrim të popullsisë shqiptare, jo vetëm në rajonin e Ballkanit.
Në pretencë prokurori kërkoi gjetjen fajtor të dy shoferëve shqiptarë dhe gjykata greke vendosi tridhjetë muaj burgim me kusht për tre vjet për secilin nga dy shoferët. Gjykata vendosi gjithashtu, që librat dhe materialet e tjera ilustruese që u kapën nga policia greke, do të konfiskohen, së bashku me automjetin. Seanca u ndoq nga përfaqësuesit ligjorë shqiptarë, ndërkohë që ende nuk ka një reagim nga Ministria e Jashtme e Shqipërisë.
Koseni si rikthim i policisë së kriminalizuar
Pirro Guremani
Lajmet se Edmond Koseni ka fituar të gjitha gjyqet dhe që do të ketë përfitime në të ardhmen, janë të fabrikuara për qëllime të mbrapshta që dinë të bëjnë njerëzit e pushtetit të sotëm të kriminalizuar deri në gjithçka. Hamendësitë se ai mund të kthehet edhe në polici, janë njëherazi edhe qëndrimet e mendësive që kanë shoqëruar Policinë e Shtetit të përfshirë në trafiqe dhe kriminalitet.
Bëhet me dije se Gjykata e Tiranës ka nxjerrë një urdhër ekzekutimi për rikthimin në detyrë të Edmond Kosenit, ish-drejtori i Policisë së Elbasanit në vitin 1998, i njohur ndryshe si “Komisari i hekurt”, me të njëjtën gradë që kishte në vitin 2002, kur u pezullua nga detyra. Gjithashtu thuhet se pak ditë më parë, me vendim të Gjykatës së Tiranës, Koseni fitoi të drejtën për të marrë të gjitha pagat që nga koha kur ishte pezulluar nga detyra.
Ndërkohë, vendimi i djeshëm i Gjykatës detyron Ministrinë e Brendshme dhe Policinë e Shtetit ta sistemojë Kosenin në të njëjtin pozicion që kishte përpara pezullimit.
Si erdhi Koseni në krye të Drejtorisë së Policisë së Elbasnait?
Burime të besueshme nga Elbasani bëjnë të ditur se, Edmond Koseni ka ardhur në krye të kësaj detyre në Elbasan pas një përplasjeje si shef Komisariati në Lushnjë, ku u vu në shënjestër nga bandat e asaj kohe që lëvrinin në Shqipëri. Me ndihmën dhe kërkesë të Neritan Cekës, asokohe ministër i Brendshëm dhe pas një përplasjeje të ish-drejtorit të Policisë së Elbasanit në atë kohë, Agron Nano, me shefat e Policisë në Tiranë, më 13 mars 1998, emërohet Edmond Koseni.
Qytetin e Elbasanit në atë kohë e sundonin bandat dhe detyra e Kosenit ishte të godiste këto banda. Me një farë mënyre pati një efekt veprimi i tij në muajt e parë të detyrës së tij. Por ajo që ka qenë e rëndësishme në veprimtarinë e tij në krye të Policisë së Elbasanit duhet thënë se si tipar kryesor ka qenë dhuna policore me një grup policësh që ai i mbante si të fortët e policisë dhe që rrihnin këdo që i tekej kryepolicit nga Peqini. Kjo dhunë e Kosenit ka qenë e paprecedent ndaj kujtdo, të rinj dhe të vjetër, meshkuj dhe femra, biznesmenë dhe politikanë, vetëm e vetëm që në Elbasan të sundonte terrori dhe nga ana tjetër rruga që kalonte nga doganat e Qafë Thanës dhe Kapshticës ishin edhe portat hyrëse të trafiqeve të drogës dhe hekurit kryesisht.
Dhunën e kryepolicit të Elbasanit në atë kohë e kanë provuar edhe emra të njohur si Irakli Koçollari dhe Taulant Dedja, e kanë provuar kryetari i PD Elbasan, Pava Jorgaqi dhe veçanërisht gazetarë e gazetare, si dhe çdo njeri që për një pakujdesi të vogël mund të përfundonte i dhunuar nga policia deri në gjymtim. Kështu ndodhi me një 19-vjeçar nga fshati Vashaj i Peqinit, Kastriot Salliu që vdiq nga dhuna policore. Po ashtu edhe vdekja e shoferit të Ujësjellësit Elbasan, Kujtim Çopja 55 vjeç i ndaluar për një keqkuptim, ndërroi jetë sapo doli nga policia nga dhuna e përdorur nga ai.
Por ajo që e damkosi dhe që e çoi drejt fundit në krye të detyrës është dhunimi keqas i një qytetari elbasanas, Naim Pulaku, që bashkë me vëllezërit e tij e kërkoi deri në fund që solli edhe largimin e Kosenit në fund të dhjetorit 2002 dhe që më pas iu nënshtrua kallzimeve penale me drejtësinë.
Por pjesa më e dobët e këtij kryepolici që u bë edhe “Qytetar Nderi” nga Këshilli Bashkiak i asaj kohe i drejtuar nga socialisti Kozma Biba, ishte një mburojë që i bëhej zullumeve të pafundme të këtij kryepolici, që ka mbushur të gjitha kupat e keqtrajtimeve që u janë bërë biznesmenëve dhe anëtarëve të PD si të ndjerit Ferdinant Cankja apo edhe Themistokli Bebi, i njohur si Toka Bebi, por edhe ndaj çdo njeriu që thoshte një të vërtetë në lidhje me policinë. Kanë qenë edhe oficerë policie si Gazmend Noga që kanë pësuar dhunën e policisë dhe personalisht të Kosenit që e ka qëlluar atë në rreshtimin e mëngjesit të policisë. U larguan nga policia të gjithë specialistët që ai i etiketonte me fjalët më të ndyra dhe shfaqjet e bëra nga ky kryepolic me derdhjen e drogës publikisht në lumin Shkumbin në vitin 2002, pak muaj se ta largonin nga radhët e policisë.
Incidentet e këtij ish-kryepolici kanë qenë të shpeshta edhe me prokurorin e rrethit të Elbasanit në atë kohë Luan Kaloçi, të cilit i bënte presion për të dënuar çdo njeri që dhunohej nga ai ose të mos hapte procese hetimi për vetë Kosenin nga denoncimet e qytetarëve.
Një incident i njohur ka qenë edhe me një zyrtar të lartë të policisë në atë kohë Pjerin Ndreu, në ambjentet e Ministrisë së Brendshme. Të gjitha këto bëheshin si shprehje e abuzimit të këtij kryepolici që përdorte forcën e policisë edhe me ndihmën e kunatit të tij të njohur Xhafë Elezi, që edhe pse ishte i dënuar në Itali për krime, ai e kishte strehuar në polici dhe që ishte bashkëpunëtori në zullume i Edmond Kosenit.
Por më keq e ka pësuar biznesi sa çdo biznesmen i Elbasanit ka nga një histori me Edmond Kosenin, që i ka vjedhur dhe i ka rrahur pse i kërkonin paratë e mallrave që ai merrte për ndërtimin e shtëpisë së tij dhe të kunatit të tij dhe të tjerë banditë me uniformë policie. Veçanërisht, gazetarët kanë qenë në fokusin e dhunës së policisë, sa gazetarë si ai i “RD” Hyqmet Zane dhe i “Koha Jonë” Aleko Likaj, por edhe Sulejman Haxhihasani i RTVSH janë vënë në shënjestër të dhunës pse publikonin realitetin në media.
Ky portret i Edmond Kosenit është turpi i policisë që ka pasur në dorë qeverisja e majtë socialiste dhe që tashmë aludohet të rikthehet për të vazhduar zullumet e tij të pista si pjesë e dhunës dhe kriminalizimit të Policisë së Shtetit tanimë në këtë pragzgjedhje parlamentare pas 7 muajsh.
Në vitin 1998 Koseni ka patur përplasje me shefin e SHKB, Krenar Kazi për punën e drogës. Koseni kërkonte që ta mbante vetë drogën e bllokuar nga policia nën kontroll dhe jo ta mbante SHKB, sipas ligjit. Për këtë problem, ka patur edhe një përplasje të ashpër deri sa nxorrën edhe armët. Për këtë ngjarje kanë shkruajtur edhe gazetat në atë kohë.
Ndërsa në vitin 2000, Koseni pati përpklasje me shefin tjetër të SHKB, Albert Pojani, se ky i mori vesh dhe ndaloi një krim që Koseni i kërkonte një oficeri krimesh dhe për këtë shkak pse ky shefi i SHKB, e degjeneroi këtë oficerin e SHKB që sot ndodhet jashtë shtetit, pasi iku për shkak të presioneve të mëdha deri në sharje dhe rrahje.
Revolta ndaj plehrave, pushtohet Bashkia Fier
Protesta e banorëve të Mbrostrarit është zhvendosur dje para Bashkisë së Fierit, ku ka patur mjaft tension mes banorëve dhe policisë. Prej katër ditësh, banorët janë ngritur në protestë, duke kundërshtuar me forcë ndërtimin e fabrikës së përpunimit të plehrave. Ndërsa ditën e djeshme, qindra protestues kanë rrethuar Bashkinë e Fierit, duke bllokuar për diasa orë qarkullimin e mjeteve në qytet. Banorët dolën në protestë që në orët e para të mëngjesit në Mbrostar dhe i kërkuan kryetarit të Bashkisë së Fierit, Armando Subashi, të vinte në takim me ta, por Subashi ka kërkuar që një përfaqësi nga protestuesit të shkonte në takim në zyrën e tij në Bashki, pasi druhej se turma dilte nga kontrolli dhe krijoheshin tensione.
Qindra banorë janë nisur nga Mbrostari me pankarta në duar “Stop kancerit” dhe i janë drejtuar Bashkisë dhe kanë kërkuar takim me kryetarin. Një përfaqësi protestuesish janë futur në zyrën e Subashit, por në një kohë kur ata prisnin të gjenin një gjuhë të përbashkët me kryetarin e Bashkisë së Fierit, janë revoltuar në zyrën e të zgjedhurit të tyre. Bëhet e ditur se, Subashi u është përgjigjur me arrogancë interesit të banorëve për anulimin e vendimit për ndërtimin e impiantit të mbetjeve në këtë zonë. Mësohet se kreu i Bashkisë, Subashi, iu ka komunikuar protestuesve se, projekti për ndërtimin e impiantit është miratuar me vendim të Këshillit Bashkiak.
“Impianti do të ndërtohet se s’bën, por unë dua t’iu spjegoj arsyet dhe të mirat që sjell ndërtimi i këtij impianti, për ju dhe për të gjithë qytetin e Fierit”, është shprehur Subashi. Banorët e revoltuar filluan thirrjet; “Nuk e duam”! Pas kësaj, ata nisën t’i kërkojnë kryetarit të Bashkisë që të largohej dhe kanë tentuar ta nxjerrin me forcë nga zyra. Menjëherë kanë ndërhyrë forcat e shumta të Policisë së Rendit dhe ato Bashkiake, duke marrë në mbrojtje Subashin, ndërsa protestuesit kanë dalë nga takimi që zgjati vetëm pak minuta, duke vijuar protestën jashtë deri në orët e vona të mbrëmjes. Pas takimit me kryebashkiakun, banorët u shprehën se kuptuan edhe më shumë se, pushteti është në dorë të arrogancës së karriges, dhe jo në shërbim të qytetarëve. “Megjithëse i erdhëm në derën e shtëpisë, kryetari i bashkisë na preu në pabesi duke e bërë fakt të kryer ndërtimin e impiantit”, u shpreh një protestues. Ndërkohë, tensione ka pasur edhe në mbledhjen e Këshillit Bashkiak.
Bllokohet rruga Fier-Tiranë
Që në orët e para të mëngjesit të djeshëm, protesta e banorëve të Mbrostrarit ka shkaktuar tension dhe bllokim të rrugës nacionale në dalje të autostradës Lushnjë-Fier, duke mos lejuar kalimin e makinave drejt Tiranës dhe anasjelltas. Trafiku në të dy anët e rrugës u ndal, duke shkaktuar kaos dhe radhë të gjata automjetesh. Fillimisht pati tensione mes forcave të policisë dhe protestuesve, por ishin këta të fundit, që mbizotëruan situatën, duke vazhduar protestën në mes të rrugës. Banorët kërkuan tërheqjen e Bashkisë së Fierit nga vendimi për ndërtimin e impiantit të mbetjeve në këtë zonë, ndërsa projekti është tenderuar dhe pritet të nisë nga puna.
Një muaj më parë, në protesta u përfshinë edhe banorët e Njësisë Administrative Portëz, duke detyruar Bashkinë të tërhiqet nga vendimi i parë për ndërtimin e impiantit në Portëz. Protesta e banorëve të Mbrostarit hyri në ditën e katërt.
Policia nis gjuetinë e shtrigave
Policia e Fierit ka nisur gjuetinë e shtrigave ndaj protestuesve të Mbrostarit. Ditën e djeshme janë ndaluar 6 protestues, ndërsa policia ka paralajmëruar se do të ketë arrestime të tjera. Dy protestues janë marrë në mes të natës nga policia dhe janë dërguar në komisariat. Edhe gjatë protestës së djeshme, policia ka ushtruar dhunë ndaj protestuesve dhe i ka kërcënuar me burg, nëse do të dalin sërish në protesta.
Nga ana tjetër në sulm janë hedhur edhe instancat shtetërore. Mjaft familjarë janë paralajmëruar se do të pushohen nga puna nëse do të dalin në protestë për të kundërshtuar ndërtimin e impiantit të plehrave. Kërcënime me pushim nga puna janë bërë edhe ndaj mësuesve që lejojnë familjarët të dalin në protestë. Megjithë terrorin shtetëror, banorët e Mbrostarit janë shprehur se nuk do të tërhiqen nga protesta e tyre derisa të anulohet vendimi i ndërtimit të impiantit të mbetjeve.
R.POLISI
Rama nxjerr me dhunë mësues e nxënës në miting
Edi Rama ka urdhëruar mbylljen e shkollave dje në qarkun e Kolonjës, me qëllim nxjerrjen e mësuesve dhe nxënësve në mitingun përmbyllës elektoral që mbajti në qytetin e Ersekës, në mbështetje të kandidatit të tij Ilia Selfo. Konkretisht, fakti është denoncuar nga Sekretari i Marrëdhënieve me Jashtë në Partinë Agrare, Marko Bello, dhe anëtari tjetër i kësaj partie Thoma Miço. Në videot e përgatitura për këtë qëllim tregohet zbrazja e shkollave me urdhër të Ramës, megjithëse në propagandën e tij elektorale shprehej ndryshe. “Ndodh tani. Ndërkohë që Rama deklaron në mitingun e fushatës në Kolonjë se mësuesit nuk janë në mitingun e tij, shkolla e Leskovikut u mbyll qysh në orën 9:30 se do iknin mësuesit në miting!!! Çfarë premtimi i tij mund të jetë i vërtetë pas këtij mashtrimi publik? Ja ku i lanë çantat fëmijët, të cilët e bën pushim se mësuesit e Leskovikut urdhëruan se duhet të jenë në shërbim të partisë shtet”, shkruan Miço. Në fakt, kryeministri nuk është hera e parë që përdor resurset e administratës për fushatat e tij elektorale. Kjo gjë u vu re dhe në zgjedhjet lokale të vitit 2015, por edhe në zgjedhjet e fundit në Dibër, shqetësime të ngritura këto dhe në raportet e OSBE. Rasti flagrant i denoncuar në Dibër ishte përdorimi i makinave të doganës dhe personelit të saj në mbështetje të Muharrem Ramës të PS-së, duke shkelur me të dyja këmbët ligjin e zgjedhjeve që e ka të ndaluar kategorikisht përfshirjen në fushatë të administratës.
Rekrutimet
Ndërkohë e njëjta situtatë po vihet re dhe në institucionet e shtetit në qendër. Shefat politikë kanë porositur specialistët e ministrive të bëhen gati pas janarit për t’u përfshirë në fushatën elektorale. Kjo gjë po ndodh kryesisht në Ministrinë e Shëndetësisë të Arsimit, Energjetikës dhe Finanacave etj. Rama ka kërkuar mobilizimin e çdo resursi në administratë me qëllim fitimin e zgjedhjeve me çdo kusht. Burime qeveritare thanë për “RD”, se dhe kontigjenti i fundit i makinave të ardhura nga Japonia, do vihen në funksion kryesisht për këtë qëllim. Por jo vetëm kaq, por janë porositur strukturat e PS-së në bazë të identifikojnë elementët me të kaluar kriminale, për t’i përdorur në fushatën e vitit të ardhshëm. Skema do të përdoret gjerësisht në bastionet e opozitës, por resurse kriminale janë përfshirë dhe në Qarkun e Kukësit dhe Rrethinat e Shkodrës. Njerëz krysisht të dënuar brenda dhe jashtë vendit, për vjedhje dhe trafik, u janë premtuar benefice në rast fitoreje të PS-së në zgjedhjet e ardhshme. Janë të deleguarit e PS në rrethe që po hartojnë listat dhe po përgatisin skuadrat, të cilat më pas dhe me ndihmën e Policisë së Shtetit të tentojnë manipulimin e zgjedhjeve të ardhshme. Burime të besueshme brenda PS-së, shprehen se, rekrutimi bëhet duke premtuar benefite dhe mbështetje të pushtetit, por ndër premtimet kryesore janë lehtësirat që do i bëhen, duke i përfshirë në administratë apo lejimin e trafiqeve të ndryshme.
Ekzekutohet me 3 plumba pronari i hotelit në Tiranë
Vritet me tre plumba pronari i një hoteli në Tiranë. Sipas burimeve të policisë, pronari i një hoteli që ndodhet në autostradën Tiranë-Durrës, u gjet i vetëvrarë mëngjesin e djeshëm nga disa kalimtarë në Kodër-Kashar, pranë rezervave të ujësjellësit të fshatit. Të njëjtat burime bënë të ditur se, Eduard Lleshi, 48 vjeç banues në Kashar ishte qëlluar nga një automatik kallashnikov, nga i cili ishin shkrehur tri predha me breshëri.
Lleshi dyshohet të jetë vrarë rreth orës 6:00 të mëngjesin e të enjtes, kur edhe banorët kanë dëgjuar të shtënat, por se kanë menduar se mund të ishte ndonjë gjahtar në zonë. Ndërkaq një kalimtar i rastit këtë mëngjes ka vënë re trupin të shtrirë, i cili qëndronte me pamje nga qielli dhe aty pranë ishte edhe një automatik “Kallashnikov”. Dëshmitari rrëfeu se menjëherë, pasi kishte vënë re biznesmenin e vdekur kishte njoftuar policinë në telefon. Ekspertët e policisë thanë se, viktima ishte gjetur me armën pranë, ndërsa sipas tyre, ai mund të kishte kryer vetëvrasje.
Policia e Tiranës me anë të një njoftimi zyrtar bën me dije se është njoftuar se, “në numrin e emergjencave 112, se në Kashar tek ish-reparti ushtarak afër Xhamisë, ndodhet një person i seksit mashkull i shtrirë, i cili dyshohet i vdekur. Menjëherë janë nisur Shërbimet e Komisariatit të Policisë Nr. 6, të cilët në vendin e ngjarjes kanë gjetur një person të pajetë të seksit mashkull si dhe në krahë të tij një armë zjarri automatike. Grupi hetimor në vendin e ngjarjes ka bërë të mundur identifikimin e viktimës, shtetasi E. Ll., i cili është dërguar në ambientet e Mjeksisë Ligjore. Nga hetimet paraprake dyshohet të jetë vetëvrasje. Nga të dhënat paraprake të familjarëve, është konfirmuar se ky person është konstatuar se kishte probleme të shëndetit mendor dhe kurohej rregullisht. Vazhdojnë hetimet në lidhje me këtë ngjarje.
Rritja e numrit të vrasjeve gjatë kohëve të fundit, sidomos për drogën ka tronditur opinionin publik, ndërsa policia për t’u justifikuar deklaron se kemi të bëjmë me “vetëvrasje, sepse vuante nga depresioni. Si mund të jetë vetëvrarë biznesmeni në Kashar kur nga ekspertiza u zbulua se mbi të ishin derdhur tre plumba kallashnikovi? Gjithsesi policia thotë se, po vlerëson edhe pistat e tjera të mundshme në lidhje me ngjarjen.
48-vjeçari së bashku me të vëllain kishin menaxhuar një hotel në zonën e autostradës. Ndërkaq policia tha se, po heton si pistë kryesore vetëvrasjen, për shkak të depresionit. Dyshohet se pronari i hotelit mund të jetë eliminuar për drogën.
Pak ditë më parë u vra për drogën një 32-vjeçar në Tepelenë. Grupi hetimor në Policinë e Tepelenës konfirmoi dje se, Festim Kanushaj është vetëvrarë me armë zjarri. Sipas tyre, vetëvrasja ka ndodhur për arsye se viktima kishte shpenzuar 10 mijë euro për kultivimin e kanabisit në zonën e Luftinjës, e cila njihet si një ndër lokacionet me më tepër kultivime në rrethin e Tepelenës e rrjedhimisht edhe të Qarkut të Gjirokastrës.
Përfundimi ka ardhur pas 24 orësh bazuar mbi provat në terren dhe analizat balistike në armën e zjarrit dhe në trupin e kufomës. Mendohet se, qitja në trupin e tij është bërë në mënyrë të vullnetshme, pasi Kanushaj ka drejtuar pushkën në drejtim të kraharorit dhe distanca mes tytës së armës e trupit ka qenë jo më shumë se 1 centimetër. Kjo është vërtetuar falë ekspertizës mjekoligjore që është kryer në trupin e 32-vjeçarit Kanushaj me kërkesë të grupit hetimor. Familjarët e të ndjerit, një ditë më parë, patën deklaruar se njeriun e tyre e kishin gjetur të mbytur në gjak, pasi kanë dëgjuar një të shtënë të vetme që ka ardhur nga pjesa e prapme e shtëpisë në fshatin Zhapokikë. Menjëherë ata kanë shkuar të shikonin se çfarë kishte ndodhur dhe kanë parë familjarin e tyre të shtrirë përtokë të goditur me armë zjarri.
Ata janë pyetur nga oficerët e Policisë Gjyqësore në Policinë e Gjirokastrës ku kanë dhënë dëshminë e tyre rreth ngjarjes në fjalë. Një prej pistave që po heton organi i akuzës në Gjirokastër është se vetëvrasja ka ndodhur për drogën.
Mafia e pronave, KLSH padit 12 zyrtarë në Devoll
Kontrolli i Lartë i Shtetit ka kallëzuar në Prokurori 12 zyrtarë dhe ish-zyrtarë të Regjistrimit të Pronave në Devoll. Me anë të një njoftimi, KLSH bën me dije se regjistruesi, 5 ish-regjistrues dhe 6 specialistë të Zyrës së Regjistrimit të Pronave kanë regjistruar një sipërfaqe prej 652 ha pyll në mungesë të dokumentacionit, në 8 raste kanë bërë regjistrimin e një sipërfaqe prej 71186 m2 në mungesë të akteve administrativë që shërbejnë për të fituar Titullin e Pronësisë, në 2 raste për regjistrim pasurie janë bazuar në vendime gjyqësore me objekt “Vërtetim fakti”, kanë regjistruar sipërfaqen prej 3000 m2, e pakthyer nga KKKP.
Auditi është kryer nga periudha 1 janar 2012 deri më 31 dhjetor 2015. Zyrtarët e kallëzuar janë: E.M. me detyrë Regjistrues i Zyrës Vendore të Regjistrimit të Pasurive të Paluajtshme, I.Rr., B.K., S.D. Y.B. dhe J.S., me detyrë ish-regjistrues, N.B. me detyrë jurist, V.B me detyrë Përgjegjëse e Sektorit Hartografik/Hartograf, D.B. me detyrë Jurist, Xh.K. me detyrë Jurist, M.L me detyrë juriste dhe R. K. me detyrë jurist, të cilët në mospërmbushje të detyrës së tyre funksionale dhe në shkelje të dispozitave ligjore, kanë konsumuar elementët e veprës penale të “Shpërdorimit të detyrës”.
Kanë regjistruar Vendimin e Komisionit të Kthimit të Pronave Korçë për një sipërfaqe prej 652 ha me parregullsi dhe mungesë të dokumentacionit tekniko-ligjor, pa u përcaktuar paraprakisht kufiri i Zonës Kadastrale me rrethin e Ersekës, statusi juridik i sipërfaqes së pa inventarizuar prej 97 ha, dhe pa patur të dhëna nga Drejtoria Shërbimit Pyjor, veprime këto në kundërshtim me përcaktimet e bëra në Ligjin Nr. 33, datë 21.03.2012 “Për regjistrimin e pasurive të paluajtshme”, UKM Nr. 2, datë 12.09.2012 “Për përcaktimin e elementeve të akteve, që verifikohen nga zyra e Regjistrimit të Pasurive të Paluajtshme dhe të procedurës për nxjerrjen e urdhrit të regjistruesit”, Udhëzimin Metodik Nr. 76, datë 13.09.1999 “Për plotësimin e kartelave të pasurive të paluajtshme” dhe me Rregulloren Nr. 184, datë 08.04.1999 “Për punën e zyrës së Regjistrimit të Pasurive të Paluajtshme”.
Në tetë raste janë regjistruar sipërfaqe tokë bujqësore dhe kullotë 71186 m2, me mungesë të dokumentacionit tekniko-ligjor, në kundërshtim me Ligjin Nr. 33, datë 21.03.2012 “Për regjistrimin e pasurive të paluajtshme”, Udhëzimin Nr. 76, datë 08.05.2003, UKM Nr. 2, datë 12.09.2012 “Për përcaktimin e elementëve të akteve, që verifikohen nga zyra e Regjistrimit të Pasurive të Paluajtshme dhe të procedurës për nxjerrjen e urdhrit të regjistruesit” dhe Rregulloren Nr. 184, datë 08.04.1999.
Në 19 raste të shpronësimeve të bëra për ndërtimin e rrugës Bilisht-Kapshticë, sipërfaqja totale e të cilave arrin në 5647 m2, nuk është kryer asnjë veprim për kalimin e pronësisë së kësaj sipërfaqe në favor të Ministrisë së Punëve Publike dhe Transportit.
Në 26 raste janë regjistruar më tepër 63350 m2 tokë bujqësore dhe janë lëshuar çertifikata pronësie, pa veçuar e regjistruar “shtet” sipërfaqet e tepërta, në kundërshtim me Ligjin Nr. 33, datë 21.03.2012, me UKM Nr. 2, datë 13.06.2013 dhe me UKM Nr. 2, datë 13.01.2010.
Në një rast është regjistruar dhe është lëshuar çertifikatë pronësie për një sipërfaqe të llojit pemëtore prej 920 m2 më tepër, duke korrigjuar AMTP-në.
Në tetë raste është regjistruar një sipërfaqe e llojit “tokë bujqësore” prej 18600 m2 më tepër se AMTP dhe janë lëshuar çertifikata pronësie pa marrë masa që këto pasuri të kthehen në pronë shtet.
Në një rast, është regjistruar në kartelat e pasurive të paluajtshme pasuria e llojit arë+zallishte, me sipërfaqe 19575 m2, mbi të cilën janë kryer transaksione dhe është lëshuar çertifikatë pronësie në mungesë të aktit administrativ apo Vendim Gjykate të formës së prerë, që shërben për të fituar Titullin e Pronësisë, në kundërshtim me Ligjin Nr. 7843, datë 01.07.1994 “Për regjistrimin e pasurive të paluajtshme”, i ndryshuar, me Ligjin Nr. 33, datë 21.03.2012 dhe me UKM Nr. 2, datë 12.09.2012.
Në dy raste është regjistruar dhe lëshuar çertifikatë pronësie për pasuri, për të cilat dokumenti mbështetës i paraqitur është vërtetimi gjyqësor i faktit të pronësisë, dokument, i cili nuk përmbush kushtet si dokument pronësie, në kundërshtim me Ligjin Nr. 7850, datë 29.07.1994 “Për Kodin Civil të Republikës së Shqipërisë”.
Për shkeljet e konstatuara, KLSH ka kryer kallëzim penal për E.M. me detyrë Regjistrues i Zyrës Vendore të Regjistrimit të Pasurive të Paluajtshme, I.Rr., B.K., S.D. Y.B. dhe J.S., me detyrë ish-regjistrues në ZVRPP Devoll, N.B. me detyrë jurist, V.B me detyrë Përgjegjëse e Sektorit Hartografik/Hartograf, D.B. me detyrë Jurist, Xh.K. me detyrë Jurist, M.L me detyrë juriste dhe R. K. me detyrë jurist, të cilët në mospërmbushje të detyrës së tyre funksionale dhe në shkelje të dispozitave ligjore, kanë konsumuar elementët e veprës penale të “Shpërdorimit të detyrës”, të parashikuar nga Neni 248 i Kodit Penal, duke i përcjellë Prokurorisë së Rrethit Gjyqësor Korçë të gjitha provat dhe dokumentet përkatëse.Vendimi i Kryetarit të KLSH-së me Nr. 124, datë 30.09.2016, ndodhet i plotë në web-in e Kontrollit të Lartë të Shtetit.
Kryesore
Continue to the category
