Ish-kryetari socialist i Bashkisë së Përmetit, Gilberto Jaçe është dënuar me një vit burg për shpërdorim detyre. Ai është dënuar nga Gjykata e Shkallës së Parë të Përmetit, për një objekt 70 metra katrorë që i ishte dhënë me qira një personi nën administrim për 6 muaj. Sipas akuzës, shitja e trojeve brenda vijës kufizuese të qytetit të Përmetit është bërë në kundërshtim të hapur me ligjin. Jaçe në kundërshtim flagrant me ligjin ka nënshkruar shitjen e subjekteve private të pronës shtetërore (truall) ndonëse nga verifikimet e bëra gjatë procesit të auditimit rezultoi se, pala shitëse Bashkia Përmet nuk ka qenë pronare e trojeve, që ajo ka shitur me anë të kontratës noteriale. Jaçe nuk i pranoi akuzat, por në përfundim të procesit trupi gjykues e shpalli fajtor Jaçen me akuzën “shpërdorim detyre”.
Gilberto Jaçe ka qenë kryetar i Bashkisë Përmet në periudhën 2011-2015 nën siglën e PS. Në zgjedhjet e qershorit të vitit që shkoi, ai rikandidoi për të njëjtin post, por nuk arriti dot të fitonte përballë kandidatit të PD, Niko Shupuli.
Gjatë kohës që Bashkia e Përmetit drejtohej nga Jaçe janë konstatuar një sërë shkeljesh edhe me tenderat. Gjithashtu organi i akuzës po ndjek penalisht edhe dy të Bashkisë së Përmetit pasi kanë shpërdoruar detyrën. Bëhet fjalë për ish-zyrtarët socialistë të kësaj njësie vendore, e cila është marrë nën administrim nga i zgjedhuri i PD, vitin e kaluar me fitoren e zgjedhjeve lokale. Vasil Pano dhe Denisa Duro, të cilët janë funksionarë të lartë vendorë të PS në Përmet, ku Kontrolli i Lartë i Shtetit i ka kallëzuar në Prokurori si ish-anëtarë të Komisionit të Vlerësimit të Ofertave në Bashkinë e Përmetit.
Akuza e tyre ka të bëjë me shkeljet e faktuara të barazisë në procedurat e prokurimit dhe favorizimit të operatorëve, duke i shkaktuar shtetit dëm një vlerë prej 11 milionë lekësh të reja. Përfaqësues të KLSH kanë ushtruar kontroll në këtë njësi vendore në fund të vitit të kaluar dhe një javë më parë, përpiluan raportin përfundimtar nga ky auditim i kryer.
Ajo çka vlerësohet interesante është se, dëmi i shkaktuar prej dy personave të lartpërmendur prej 11 milionë lekësh, do të kompensohet nga vetë Bashkia e Përmetit dhe administrata aktuale, e cila nuk ka pasur aspak lidhje me dëmin e shkaktuar nga bashkia e mëparshme, ku drejtohej nga Gilberto Jaçe i PS. Gjithçka ka të bëjë me shkeljen e procedurave të tenderit me vlerësimin e ofertave në rikonstruksionin e trotuareve në bllokun e qendrës në Përmet.
Nga krahasimi i ofertës ekonomike të dy prej operatorëve ekonomikë pjesëmarrës në tender, rezultoi se këta patën paraqitur kontratë furnizimi guri me të njëjtën shoqëri furnizuese, dokumentacionin tekniko-ligjor i të cilës është i njëjtë për të dyja kontratat e lidhura.
Për rrjedhojë, Komisioni i Vlerësimit të Ofertave aplikoi një standard të dyfishtë, duke e vlerësuar këtë kriter si të vlefshëm dhe në pajtueshmëri me kërkesat për operatorin konkurrues me ofertë ekonomike më të lartë dhe në papajtueshmëri për operatorin konkurrues me ofertë ekonomike më të ulët. Vlerësimi që është bërë nga dy ish-zyrtarët e Bashkisë së Përmetit, qëndron në kundërshtim me ligjin për Prokurimin Publik, pasi ka skualifikuar ofertues, të cilët plotësonin kriteret për kualifikim, duke përdorur dy standarde gjatë vlerësimit të ofertave.
KLSH, duke i konsideruar veprimet e kryera nga Pano dhe Duro në cilësinë e anëtarëve të Komisionit të Vlerësimit të Ofertave në procedurën e prokurimit të rikonstruksionit të trotuareve në bllokun e qendrës së Përmetit, si veprime me pasoja të rënda për interesat e ligjshme të shtetit dhe të dënueshme sipas ligjit. Duro dhe Pano janë kallëzuar pak ditë më parë në Prokurorinë lokale për shkelje të barazisë në vlerësimin e ofertave gjatë tenderit, duke i shkaktuar buxhetit të shtetit dëm ekonomik në vlerën 110 milionë lekë.

R.POLISI

Kryetari i Bashkisë së Tepelenës, Tërmet Peçi, jo vetëm që ka qenë vetë i dënuar nga gjykata, por ka mbledhur rreth vetes në Bashki edhe shokët e tij të dënuar. Njëri ndër ta është edhe zëdhënësi i Bashkisë së Tepelenës, Aleksandër Toti, i cili ndonëse i dënuar nga gjykata me vendim të formës së prerë për vjedhje është punësuar nga Tërmeti në Bashki. Bëhet e ditur se Aleksandër Toti është krahu i djathtë i kryetarit të Bashkisë së Tepelenës dhe mban pozicionin e zëdhënësit.
Gjykata e Tepelenës e ka dënuar zëdhënësin e Tërmetit me 4 muaj burg për vjedhje. Në vendimin e gjykatës të datës 7 korrik 2014 thuhet se, shpall deklarimin fajtor të pandehurin Aleksandër Toti për veprën penale “Vjedhje” dhe bazuar në nenin 134/1, germa “ç” të Kodit Penal e dënon me 4 (katër) muaj burgim. Bazuar në nenin 406 të Kodit të Pr. Penale e ul masën e dënimit të dhënë duke e dënuar përfundimisht të pandehurin Aleksandër Toti me 2 (dy) muaj e 20 ditë burgim.
Vuajtja e dënimit për të pandehurin Aleksandër Toti fillon nga data e arrestimit 15.05.2014 dhe të kryhet në burg të sigurisë së zakonshme.
Megjithëse Toti ka qenë i dënuar nga gjykata për vjedhje, ai është punësuar në Bashki nga Tërmeti në kundërshtim me ligjin e dekriminalizimit. Ky nuk është rasti i vetëm, pasi bëhet e ditur se Tërmeti ka punësuar edhe persona të tjerë me të dyshuar të errët në Bashki.
Vetë Tërmet Peçi ka qenë i dënuar nga gjykata me vendim të formës së prerë. Sipas një vendimi gjyqësor të vitit 2004, Tërmet Peçi figuron i dënuar nga Gjykata e Tepelenës për akuzën “Përdorim i dokumenteve të falsifikuara”. Ai është dënuar me 150 mijë lekë gjobë nga Gjykata e Shkallës së Parë. Ndërsa vendimi përfundimtar ka qenë dënimi me 100 mijë lekë gjobë, të cilat Peçi duhej t’i paguante në 2 këste.
Vendimi ka marrë formë të prerë më 7 prill 2004, pasi Peçi nuk e ka ankimuar në Apel. Por ndërkohë në formularin e vetëdeklarimit në kuadër të ligjit për dekriminalizimin, Tërmet Peçi nuk e ka përmendur këtë dënim. Edhe pse është i dënuar në vitin 2004, kryebashkiaku i Tepelenës nuk e ka deklaruar atë në formularin e dekriminalizimit.
Formulari i Peçit është i pastër në seksionin ku shkruhet “nëse është dënuar ndonjëherë apo jo”. Struktura e posaçme në Prokurorinë e Përgjithshme që merret me zbatimin e ligjit të dekriminalizimit duhet të nisë menjëherë hetimet. Kryebashkiakut të Tepelenës jo vetëm që duhet t’i hiqet mandati, por rrezikon dënimin me burg për mashtrim.
Në vendimin e Gjykatës së Tepelenës thuhet se, Prokuroria pranë Gjykatës së Shkallës së Parë Tepelenë ka parashtruar për gjykim procedimin penal nr. 31, datë 24.03.2004 në ngarkim të të pandehurit Tërmet Peçi akuzuar për veprën penale të “përdorimit të dokumenteve të falsifikuara”, parashikuar nga neni 186/1 të Kodit Penal (i pandryshuar).
Gjykata në bazë të neneve 379 e vijues 390 të Kodit të Procedurës Civile vendosi: Deklarimin fajtor të të pandehurit Tërmet Peçi për veprën penale “përdorim i dokumenteve të falsifikuara” dhe në bazë të nenit 186/1 (i pandryshuar) 48/ç të Kodit Penal dënimin e tij me 150 000 lekë gjobë.
Tërmeti i Tepelenës është njëri nga dhjetëra të zgjedhurit e PS që drejtojnë sot bashkitë e vendit. Mjaft kryebashkiakë socialistë në vetëdeklarimet e tyre që vjen në bazë të ligjit për dekriminalizimin kanë mashtruar mbi veprat penale për të cilat janë akuzuar apo vuajtur dënimin në vitet e kaluara.

Një person ka mbetur i plagosur pas një breshërie me automatik mbrëmjen e djeshme në Kamëz. Mësohet se ngjarja ka ndodhur rreth orës 21:55 pranë një marketi, ku një person i armatosur ka qëlluar me automatik pas një tentative grabitjeje. Sipas policisë, ka mbetur e plagosur një femër, kalimtare e rastësishme, e cila është dërguar në spital dhe është jashtë rrezikut për jetën, pasi ka marrë plagë në këmbë.
Ngjarja ka terrorizuar banorët që ishin të shumtë të në numër. Dëshmitarë në vendgjarje bënë të ditur se mjaft qytetarë kanë vrapuar sapo kanë dëgjuar krismat për t’i shpëtuar plumbave. Po ashtu të terrorizuar kanë mbetur edhe klientët në supermarket. Grabitësi është larguar nga vendi i ngjarjes në drejtim të paditur për policinë.
Policia ka shkuar në vendgjarje pasi është njoftuar por nuk ka mundur të zbulojë autorin. Bëhet e ditur se në vendngjarje kanë shkuar shërbimet e Komisariatit të Policisë Nr. 5 dhe shërbimet “Shqiponja”, të cilat kanë kryer veprimet hetimore. Policia bëri të ditur se po punohet për sqarimin e plotë të ngjarjes, ndërsa policia është vënë në ndjekje të autorit.

Tetë zyrtarë lokalë në Mallakastër janë kallëzuar në Prokurori nga KLSH-ja për shkelje të barazisë në procedurat e prokurimit dhe favorizimin e operatorëve ekonomikë privatë. Konkretisht, 5 anëtarë të Komisionit të Ofertave në Bashkinë Mallakastër dhe 3 anëtarë të komisionit në ish-Komunën Fratar. Kontrolli i Lartë të Shtetit doli në këtë vendim pasi përfundoi auditimin në Bashkinë Mallakastër për vitet 2013- 2015. Njëherësh, i ka rekomanduar Bashkisë Mallakastër masa me karakter organizativ dhe shpërblimin e dëmit të shkaktuar në vlerën totale 48,730,994 lekë.
Gjatë auditimit u konstatuan shkelje dhe parregullsi të dispozitave ligjore në fuqi në fushën e zbatimit të procedurave të prokurimit publik lidhur me kriteret e kualifikimit dhe vlerësimin e ofertave ekonomike në procedurat e prokurimit me objekt: “Sistemimi i rrugëve të brendshme dhe gjelbërimi i blloqeve të banimit në qytetin e Ballshit” (vlera e prokuruar 41,5 milionë lekë dhe “Ndërtim rrjetit shpërndarës i fshatrave të Komunës Fratar”) (vlera e prokuruar 67,7 milionë lekë).
Është konstatuar se në këto procedura operatorët konkurrues kanë paraqitur dokumentacion me mangësi, si operatorët e skualifikuar me të drejtë dhe operatorët e kualifikuar dhe shpallur fitues nga Komisioni i Vlerësimit të Ofertave (KVO).
Në të dy procedurat e prokurimit konstatohet vlerësim fiktiv nga ana e KVO-së, në papajtueshmëri me kërkesat e ligjit, pasi OE nuk plotësojnë kriteret e vendosura nga AK. KVO duke kualifikuar ofertues, të cilët nuk plotësojnë kriteret për kualifikim ka vepruar në kundërshtim me nenet 46, 53 të Ligjit nr. 9643, datë 20.11.2006 “Për Prokurimin Publik” (LPP) dhe Kreu V të VKM nr. 1, datë 10.01.2007 “Për miratimin e rregullave të prokurimit publik”. KVO të tria këto procedura duhet t’i kishte skualifikuar dhe në zbatim të neneve 24/ç dhe 47 të LPP duhet t’i kishte kërkuar titullarit të autoritetit kontraktor anulimin dhe përsëritjen e procedurës së prokurimit.
KLSH, duke i konsideruar veprimet e kryera nga R.SH., J.A., E.N., E.I., dhe J.M., (në cilësinë e anëtarëve të KVO në Bashkinë Mallakastër) në procedurën e prokurimit me objekt: “Sistemimi i rrugëve të brendshme dhe gjelbërimi i blloqeve të banimit në qytetin e Ballshit”, dhe K.A., S.D., dhe H.M., (në cilësinë e anëtarëve të KVO në ish-Komuna Fratar) në procedurat e prokurimit me objekt: “Ndërtim rrjetit shpërndarës i fshatrave të Komunës Fratar” apo dhe personave të tjerë, të cilët mund të rezultojnë si përgjegjës gjatë hetimeve, si veprime me pasoja të rënda për interesat e ligjshme të shtetit dhe të dënueshme.

Gjykata e Rrethit Gjyqësor Vlorë ka reaguar në lidhje me përfshirjen e emrit të të ndjerit, gjyqtarit Skerdilajd Konomi në hetimin e disa pronave në Zvërnec. Me anë të një deklarate drejtuar mediave, togat e zeza kanë inkurajuar Prokurorinë për zbardhjen e këtij rasti hetimi, ndërsa theksohet se kjo çështje nuk ka lidhje me vrasjen e gjyqtarit Konomi. Më datë 14 qershor, Prokuroria e Vlorës sekuestroi 89 hektarë tokë në zonën e Zvërnecit, me vlerë rreth 110 milionë euro sipas çmimeve zyrtare, e dyshuar se është përfituar në mënyrë të paligjshme nga shtetasi Raimond Mezi.
Gjykata e Rrethit Gjyqësor Vlorë bëri të ditur dje nëpërmjet një njoftimi për shtyp se, ka ndjekur me vëmendje zhvillimet e fundit mediatike, në lidhje me ecurinë e hetimeve të filluara nga ana e Prokurorisë së Rrethit Gjyqësor Vlorë, që lidhen me dyshimet e arsyeshme të kryerjes nga ana e personave përgjegjës, të veprave penale të “Shpërdorimit të detyrës”, “Falsifikimit të dokumenteve” dhe “Pastrimit të produkteve të veprës penale”, që kanë të bëjnë me titujt e pronësisë mbi sipërfaqe të caktuara toke, të ndodhura në qytetin e Vlorës.
Së pari, Gjykata e Rrethit Gjyqësor Vlorë, shpreh dhe rikonfirmon edhe një herë inkurajimin dhe bashkëpunimin më të ngushtë institucional me organin e Prokurorisë, që jo vetëm në rastet e bëra mediatike, por edhe në eventualitetin e evidentimit të rasteve të tjera analoge, për zhvillimin e një hetimi të plotë, profesional, objektiv dhe të gjithanshëm, në respekt të parimeve kushtetuese të shtetit të së drejtës, ushtrimit të ndjekjes penale sipas parimit të ligjshmërisë, si dhe transparencës dhe të drejtës për informim, me qëllim vënien përpara drejtësisë të çdo personi, pavarësisht statusit apo cilësisë së tij.
“Duke marrë shkas nga disa publikime në median e shkruar dhe atë vizive, në lidhje me rastin më të fundit të zbuluar nga ana e Prokurorisë së Rrethit Gjyqësor Vlorë, të dyshimeve të arsyeshme të krijuara mbi falsifikimin e titujve të pronësisë mbi një sipërfaqe toke, të ndodhur në zonën e Zvërnecit, ku midis të tjerave, ka rezultuar edhe një vendim gjyqësor i Gjykatës së Rrethit Gjyqësor Vlorë, i vitit 2003, i dyshuar se është nënshkruar nga ana e kolegut, të ndjerit z. Skerdilajd Konomi, Gjykata e Rrethit Gjyqësor Vlorë, brenda kornizës kushtetuese dhe ligjore, në respekt të së drejtës themelore kushtetuese për informimin e publikut, etikës profesionale, si dhe në respekt të normave dhe parimeve të përgjithshme të moralit dhe dinjitetit njerëzor, realizon këtë njoftim për median e shkruar dhe atë vizive, duke sqaruar si më poshtë:
Se prezenca e një vendimi gjyqësor, i dyshuar se, është dhënë nga ana e kolegut, të ndjerit Skerdilajd Konomi, në vitin 2003, periudhë kohore në të cilën i ndjeri Skerdilajd Konomi nuk ka ushtruar funksionin kushtetues të gjyqtarit pranë Gjykatës së Rrethit Gjyqësor Vlorë, ka ardhur si rezultat i tërësisë së veprimeve hetimore të kryera nga ana e organit të Prokurorisë, në funksion të procedimit penal të nisur si më sipër, për të cilat organi i Prokurorisë ka tagrin kushtetues të ushtrimit të ndjekjes penale dhe vënies përpara përgjegjësisë ligjore të autorit apo autorëve të këtyre veprimeve të kundraligjshme dhe nuk ka asnjë lidhje me vdekjen tragjike të kolegut z. Skerdilajd Konomi, për të cilën, trupa gjyqësore e Gjykatës së Rrethit Gjyqësor Vlorë, gjen rastin të inkurajojë sërish organet ligjzbatuese, për zbardhjen e plotë të kësaj ngjarjeje të paprecedent në historinë e ekzistencës së shtetit shqiptar. Gjykata e Rrethit Gjyqësor Vlorë kërkon nga media e shkruar dhe ajo e vizive që të ruajnë etikën profesionale dhe vetëpërmbajtjen në raportimin e lajmit, të respektojnë kujtimin e të ndjerit, gjendjen emocionale të rëndë të familjarëve të tij dhe gjithashtu të krijojnë klimën e përshtatshme për zhvillimin dhe mbarëvajtjen e një hetimi të plotë dhe të gjithanshëm për organet e ndjekjes penale. Gjykata vlerëson se, çdo aludim konspirativ dhe subjektiv mbi vrasjen e të ndjerit dhe aktivitetit penal nën hetim krijon premisat dhe cenon çdo vlerë njerëzore dhe shtetërore të sjellë në vëmendje më lart”, thuhet në reagimin e Gjykatës së Vlorës.