Prokuroria ka zbardhur hetimet në lidhje me një grup të strukturuar kriminal që merrej me trafikun e lëndëve narkotike, operacioni “Quaranta” për të cilën u zhvillua dje duke arrestuar 7 persona. Hetimet e Prokurorisë së Krimeve të Rënda nisën më 4 tetor të vitit 2013, kur në Tiranë u arrestuan shtetasit Arben Mullolli dhe Romeo Mataj. Në atë kohë, në mjetin e tyre u gjetën rreth 85 kg lëndë narkotike, e cila synohej të trafikohej drejt Italisë. Pjesë e grupit sipas Prokurorisë, dyshohet të jetë edhe Odise Verbofshi, banues në Durrës.
Ky shtetas aktualisht ndodhet në burg dhe është dënuar me burgim të përjetshëm për shkak se ka vrarë dhe djegur dy persona pas zënkës për cilësinë e kanabisit. Ai ka vrarë dhe më pas ka djegur në makinë shtetasit Shaban Babasi dhe Albert Kasalla, ngjarje e ndodhur më 21 shkurt të vitit 2014. Verbofshi, konsiderohet nga Prokuroria si një nga personat kyç organizatorë të trafikut të kanabisit që blihej në zonat e Fushë-Krujës.
Në bazë të një hetimi të Prokurorisë për Krime të Rënda, në bashkëpunim dhe me informacionin referues të Policisë së Shtetit, u arrit të zbulohen dhe të arrestohen disa persona, pjesë e një grupi të strukturuar kriminal të përfshirë në trafikun e lëndëve narkotike.
Gjatë këtyre ditëve janë arrestuar, në vijim të hetimit të Prokurorisë për Krime të Rënda, shtetasit nga Delvina dhe Saranda Arben Kanina, 44 vjeç, Petro (Abedin) Kuçi, 44 vjeç, Mirel Ademi, 22 vjeç, Artur Shukulli, 42 vjeç. Këta persona dyshohet se, bashkë me disa të tjerë, në të paktën dy episode të ndryshme, kanë tentuar të trafikojnë në Itali rreth 85 kg lëndë narkotike kanabis, si edhe në Greqi rreth 670 kg lëndë narkotike, në vitin 2014. Në këto ngjarje janë përfshirë një numër i lartë personash, disa prej të cilëve janë arrestuar kohë më parë.
Nga hetimi i Prokurorisë për Krime të Rënda ka rezultuar se, në datë 04.10.2013 janë arrestuar në flagrancë në Tiranë, në vijim të një hetimi të nisur pak kohë para arrestimit të tyre, shtetasit Arben Mullolli dhe Romeo Mataj. Në mjetin në përdorim të tyre u gjet një sasi prej rreth 85 kg lëndë narkotike, të cilën po synonin ta trafikonin në drejtim të Italisë. Këta persona ishin në vëzhgim, në bazë të hetimit të Prokurorisë për Krime të Rënda të nisur ndaj tyre dhe disa personave të tjerë. Pjesë e këtij grupi dyshohet se ka qenë edhe shtetasi Odise Verbofshi, banues në Durrës. Ky shtetas konsiderohej si një prej personave që organizonte banorë nga Fushë-Kruja për mbledhjen e sasive të canabis-it, të cilën më pas synonte ta trafikonte jashtë Shqipërisë.
Në një nga episodet e shkëmbimit të lëndës narkotike në banesën e tij në Durrës, Odise Verbofshi vret dhe djeg në makinë dy persona, Shaban Babasi dhe Albert Kasalla. Sipas hetimit të Prokurorisë së Durrësit për këtë rast, Verbofshi dhe dy viktimat ishin konfliktuar për cilësinë e lëndës narkotike të siguruar në Fushë-Krujë dhe pagesës që duhej të bënte Verbofshi. Për këtë episod, Odise Verbofshi është dënuar me burgim të përjetshëm. Ndërkohë, që ai rezulton të jetë pjesë thelbësore e grupit që është aktualisht në hetim nga Prokuroria për Krime të Rënda.
Gjatë hetimit të këtij grupi nga Tirana, në fillim të vitit 2014, Prokuroria për Krime të Rënda konstaton se ata bashkëpunonin me disa persona të tjerë, kryesisht nga Delvina dhe Lazarati. Hetimi është zhvilluar para ndërhyrjes së forcave të policisë në fshatin e Lazaratit. Pjesëtarët e grupit nga Tirana kishin porositur një sasi lënde narkotike, të cilën dyshohet se do ta trafikonin për në Greqi. Ky plan u zbulua gjatë hetimit të Prokurorisë për Krime të Rënda dhe grupi i personave u mbajt nën mbikëqyrje.
Nga vëzhgimi, disa persona po tentonin të trafikonin nëpërmjet kufirit malor me Greqinë një sasi të konsiderueshme lënde narkotike me anën e mushkave. Por ky plan nuk u rezultoi i suksesshëm, për faktin se grupi i personave me kafshë po ndiqej nga policët që i kishin nën vëzhgim.
Mesnatën e datës 27.04.2014, policia ndërhyri, por mundi të arrestonte në flagrancë vetëm shtetasin Artur Balilo, i cili gjendej në një mjet me 3 persona të tjerë, të cilët po koordinonin trafikimin e lëndës narkotike me kafshë. Gjatë arrestimit të Balilos u gjet edhe një armë automatike, ndërkohë që personat e tjerë u larguan me shpejtësi në errësirë. Po ashtu, nuk u bë e mundur kapja e lëndës narkotike në atë moment, pasi terreni ishte i thyer dhe errësirë, gjë që vështirësonte planin operacional policor. Kjo lëndë narkotike u zbulua dy ditë më pas, më datë 29.04.2014, në një automjet në fshatin Varfaj, në vijim të operacionit policor, të koordinuar nga Prokuroria për Krime të Rënda.
Në vijim të hetimeve, ditët e fundit Prokuroria për Krime të Rënda konkludoi mbi personat e dyshuar për këtë rast trafikimi dhe kërkoi nga Gjykata për Krime të Rënda caktimin e masës së sigurisë “arrest në burg”. Pas vendimit të gjykatës, u bë i mundur arrestimi i personave të përfshirë, të cilët dyshohen për veprën penale të “Trafikimit të lëndëve narkotike”.

Një zyrtare shqiptare e Ministrisë së Mjedisit, e cila u kap duke vjedhur në supermarket nuk ka më të drejtë të hyjë në vendet e Shengenit. Gjykata e Gjenevës i ka dhënë asaj ndalimin jo vetëm për Zvicrën, por edhe për vendet e tjera europiane. Lajmin e ka bërë të ditur gazeta zvicerane “20 minutes”, e cila për arsye etike nuk përmend emrin e zyrtares, por vetëm thekson se ka qenë një konsulente e Ministrisë së Mjedisit.
Gjykata Administrative Federale (TAF) konfirmoi dëbimin nga territori i Zvicrës. Zyrtarja, një vajzë e re e diplomuar për inxhinieri, ndodhej në Gjenevë për një konferencë ndërkombëtare në maj të vitit 2015 dhe u kap në një supermarket në qendër të qytetit. “Malli që ajo kishte futur në çantë, arrinte në një shumë prej 1667 frangash”, shkruan gazeta.
Zyrtarja është denoncuar dhe pastaj dënuar nga drejtësia e Gjenevës me 30 gjoba në ditë me nga tridhjetë franga, një vendim që ajo nuk e ka kontestuar. Por zyrtarja shqiptare ka apeluar kundër vendimit të Sekretariatit Shtetëror për Migrantët (SEM), i cili vendosi një ndalim të hyrjes për një periudhë prej tre vjetësh, jo vetëm për Zvicrën, por për të gjithë zonën Shengen.
Në apelim ka theksuar rëndësinë e madhe që ka për të mundësia për të marrë pjesë në konferenca ndërkombëtare, sepse dënimi mund të rrezikojë karrierën e saj. Por gjykata nuk ka toleruar. Në vendimin e lëshuar të enjten, gjykatësi vuri në dukje se qëndrimi i këshilltares nuk është i përputhshëm me pritshmëritë prej një zyrtari të lartë që viziton një vend të huaj.

“IMSI Catcher” nuk është pajisja e vetme e përgjimit e futur në territorin e Shqipërisë këto dy vitet e fundit.
Mediat kanë mundur të zbardhin një pjesë të dëshmisë dhënë nga një zyrtar i lartë i Policisë së Shtetit, për çështjen e përgjimeve.
Ky zyrtar ka sqaruar para grupit hetimor se, policia italiane, më 2015 ka ofruar ndihmë për ngjarjen e vendosjes së eksplozivit në farmacinë dhe makinën e babait të ministrit të Brendshëm, Saimir Tahiri.
Ai pranon se në atë kohë ka parë një pajisje dhe ajo ndryshonte në formë nga pajisja “IMSI Catcher”, që kishte ardhur për trajnim, në mars të këtij viti.
Ajo pajisje, vazhdon zyrtari i lartë i policisë në dëshmi, ishte nga prodhues tjetër, por nuk ndryshonte në funksione.
Kjo është një nga dëshmitë më të forta që ka Prokuroria për të konfirmuar dyshimet e saj se, “IMSI Catcher” është përdorur në përgjim.
Nuk bëhet i ditur identiteti i oficerit të lartë të bluve, por sqarohet se ai ka dhënë detaje të vlefshme për hetimin.
Ndërkohë hetuesit janë në pritje të një përgjigjeje nga misioni italian policor “Interforce”, të cilës i është kërkuar që të vihet në dispozicion të hetimit pajisja dhe mjeti me të cilin ajo lëvizte.
Për këtë çështje, Prokuroria kërkoi arrestimin e dy oficerëve të lartë të policisë Artion Duka dhe Entiol Xhelilaj. Ata u lanë në arrest shtëpie nga gjykata.
Drejtori i Përgjithshëm i Policisë, Haki Çako u pezullua nga detyra dhe në datën 16 qershor, ai do të jetë në Gjykatën e Apelit, ku do të kërkojë rikthimin në detyrë.

Personat që u morën me pajisjen nuk kishin çertifikatë sigurie

Prokuroria ka konstatuar se personat që janë marrë me pajisjen e përgjimit të ardhur nga Italia nuk kanë qenë të pajisur me çertifikatë sigurie. Sipas ligjit, çertifikata jepet nga Drejtoria e Informacionit të Klasifikuar në Kryeministri, por duket se kjo zyrë nuk ishte informuar fare për ardhjen e pajisjes në vendin tonë. Referuar ligjeve në fuqi, Prokuroria thotë se, “Policia e Shtetit duhej të ishte konsultuar paraprakisht për përdorimin e kësaj pajisjeje me prokurorin e Përgjithshëm si autoriteti qendror dhe i vetëm i përgjimit dhe me Drejtorinë e Sigurimit të Informacionit të Klasifikuar, në mënyrë që qëndrimi i kësaj pajisjeje në territorin e Republikës së Shqipërisë të kishte përkufizim ligjor dhe transparent për qëllimet e përdorimit dhe mundësitë teknike të saj”. Sipas Prokurorisë, kreu i policisë, Haki Çako, pretendon në formë konsekuente se aparatura nuk është përdorur në asnjë moment nga shtetas shqiptar, por nga këqyrja e librit të hyrje-¬daljeve në FPO dhe nga pyetja e specialistëve të mbajtjes së librit, rezulton se të paktën në dy raste automjeti ka qenë në posedim të shtetasit shqiptar Entiol Xhelilaj i vetëm. Sipas Prokurorisë, Artion Duka, në cilësinë e drejtorit të Forcave Operacionale, nuk ka marrë masa për administrimin e pajisjes, si edhe për të siguruar që ajo nuk do të përdorej për qëllime të tjera, përveçse trajnimit. Fakti që mjeti, së bashku me pajisjen “IMSI Catcher” ka lëvizur në të paktën dy herë nga një specialist shqiptar, është një prej arsyeve që e ngarkon me përgjegjësi titullarin e Forcës. Po ashtu, ky shtetas ka deklaruar se pajisja, në përfundim të çdo seance trajnimi, lëvizte së bashku me ekspertët italianë. Ky deklarim rezulton i rremë, pasi, siç shkruhet nga libri i hyrje-daljeve, mjeti me pajisjen ka qëndruar thuajse gjatë të gjithë kohës së trajnimit në ambientet e Forcës Operacionale. Pika e fundit e shkeljeve të dyshuara se janë kryer nga shtetasi Artion Duka është edhe më e rëndësishmja. Ky shtetas merr përsipër me përgjegjësinë e tij, pa kryer asnjë hulumtim të natyrës penale apo administrative, se gjatë veprimtarisë së përdorimit të aparatit “IMSI Catcher” nuk është kryer asnjë veprim i jashtëligjshëm. Ka dyshime të arsyeshme se kjo gjë nuk është e vërtetë. Kështu nga hetimi ka rezultuar se aparati konkret funksionon, duke u klonuar si një antenë e rrjetit telefonik mobil dhe duke marrë rolin e antenës ligjore. Antena e gënjeshtërt emeton një sinjal më të fortë se antena ligjore dhe kësisoj shkakton lidhjen e aparateve fundor nga antena ligjore te antena e gënjeshtërt. Kjo gjë bie ndesh me detyrimet e Ligjit 9918, neni 123/2. Po sipas Prokurorisë, punonjësi i policisë, Ention Xhelilaj me funksion specialist pranë Forcës Operacionale, ka kryer veprime të paautorizuara, siç është përdorimi i mjetit me pajisjen “IMSI Catcher” pa asnjë urdhër me shkrim. Veprimtaria e tij nuk është rregulluar ligjërisht nga eprorët e tij. Ai ka dijeni se në cilën pikë kufitare ka hyrë automjeti, ku qëndronte ai gjatë kohës së trajnimit dhe jashtë kësaj kohe. Ai është në dijeni të parametrave teknikë të automjetit dhe çfarë ushtrimesh janë kryer në bazë. Ky shtetas nuk ka asnjë tagër ligjor që të ishte kaq afër dhe kaq në dijeni të fakteve. Nga këqyrja e librit të hyrje-daljeve të mjeteve dhe personave në FO, del qartë se ai ka hyrë e ka dalë me mjetin, të paktën dy herë, duke qenë në drejtim të tij. Ai ka hipur në automjet edhe ditën kur ka dalë vendimi i sekuestrimit për mjetin dhe pajisjen. Prokuroria e Tiranës po vijon hetimet mbi këtë rast, për të provuar, ndër të tjera, edhe zyrtarë të tjerë të lartë që mund të jenë përfshirë në veprimtarinë e dyshuar si të paligjshme të përgjimeve.

Skema e lëvizjes së pajisjes së përgjimit

Drejtori i Përgjithshëm i Policisë së Shtetit, Haki Çako u pezullua më datën 7 qershor nga detyra për skandalin e përgjimeve me “IMSI Catcher”. Prokuroria zbardhi të gjithë skemën e lëvizjes së pajisjes së përgjimit, si dhe oficerët e policisë që janë përfshirë në këtë lëvizje të pajisjes në mënyrë të paligjshme. Pajisja sipas Prokurorisë është lëvizur nga Drejtoria e Policisë në momentin kur në këtë drejtori ka mbërritur grupi i prokurorëve që kishin shkuar aty për të kërkuar sekuestrimin e pajisjes. Pasi prokurorët kanë pritur me orë drejtorin e Policisë është konstatuar edhe lëvizja e pajisjes së përgjimit nga specialisti i Forcave Operacionale, Xhelili, i cili ndodhet në arrest shtëpie me kërkesë të Prokurorisë dhe vendim të gjykatës.
Pajisja e përgjimit dyshohet se u përdor nga policia në mënyrë të paligjshme, për përgjime. Prokuroria ka siguruar vendimin e gjykatës për pezullimin nga detyra të Haki Çakos, i cili akuzohet për shpërdorim detyre, pasi ka administruar në kundërshtim me ligjin pajisjen e përgjimit. Gjykata ka vendosur masën e sigurimit “Arrest në shtëpi” me mbikëqyrje elektronike për shtetasit Artion Duka, me funksion drejtor i Forcave Operacionale (FO) dhe Entiol Xhelilaj, specialist pranë FO, dy efektivët e policisë që dyshohet se përdorën pajisjen.

Një 36-vjeçar shqiptar është arrestuar nga policia italiane në Varese pasi në lokalin e tij u gjetën 77 kg marijuanë. Policia ra në gjurmët e shqiptarit, rezident në Castellanza (Varese), pas një kontrolli rutinë në lokalin e blerë së fundmi nga ai. Policia e Castellanza-s zbuloi se shqiptari, i divorcuar nga një italiane, rezultonte i papunë prej kohësh. Kjo krijoi dyshime edhe për origjinën e parave dhe karabinierët nisën të kontrollonin lëvizjet në lokalin e shqiptarit, identiteti i të cilit nuk bëhet i ditur.
Derisa në mbrëmjen e një dite më parë, në lokalin e shqiptarit, policia gjeti rreth 77 kg marijuanë në 4 çanta të mbuluara me mish, (marifet që përdoret për të mos u zbuluar nga qentë e antidrogës). Shqiptari u arrestua për posedim droge, ndërsa në banesën e tij u gjetën edhe tre kg kokainë e pastër dhe mbi 600 gr marijunë, shkruajnë mediat italiane.

Megjithëse po mbushet një javë nga atentati në Elbasan ku mbeti i plagosur Bledar Muça, miku i Florenc Çapjas, policia ende nuk ka asnjë të ndaluar. Ngjarja e rëndë ndodhi mëngjesin e të hënës pranë Prokurorisë së Rrethit Elbasan. Në mes të ditës, në qendër të qytetit, mbi makinën me të cilën ata udhëtonin u zbrazën plumba kallashnikovi, duke u rrezikuar jeta e dhjetëra personave që ndodheshin në qendër të qytetit.
Objektiv i atentatit ishte Bledar Muça, 37 vjeç, ndërsa Matilda Kermezi, 49 vjeç, punonjësja e policisë është plagosur aksidentalisht. Në momentin kur ndodhi ngjarja, ajo ishte duke u kthyer për në banesën e saj, pasi kishte mbaruar shërbimin, por puna e saj ndodhet pikërisht në vendin ku ndodhi ngjarja. Kermezi ka marrë dy plumba, një në krah dhe një në shpatull, dhe tashmë ndodhet në reanimacion në Spitalin e Elbasanit.
Ngjarja ka ndodhur në një orë kur zona ka qenë tejet e populluar me banorë. Krismat e kallashnikovit kanë vënë në panik të madh dhe të vogël. Kalimtarët e rastit janë tmerruar nga breshëritë e plumbave dhe kanë vrapuar për t’i shpëtuar vdekjes. Është qëlluar pa kontroll dhe plumbat kanë prekur deri institucionet aty pranë.
Burimet e policisë bënë të ditur se, dyshohet se atentati ka qenë i mirëmenduar. Policia ka ndërtuar skemën e lëvizjes së autorëve ndaj shënjestrës. Sipas hetimeve paraprake, makinën tip “Golf” ku udhëtonte Bledar Muça dhe Florenc Çapja, e ka ndjekur nga pas një motor. Në momentin e atentatit një makinë i ka prerë rrugën “Golfit” duke e detyruar të ulë shpejtësinë, ndërsa makina tjetër i ka shkuar paralel dhe ka hapur zjarr. Ndërkohë, autorët janë larguar me një automjet të zi në drejtim të paditur për policinë.
Pak minuta pas atentatit në Elbasan, policia arriti të gjejë armën me të cilën u qëllua ndaj Bledar Muçës. Sipas burimeve të policisë, arma është një kallashnikov, me të cilin u plagos Bledar Muça dhe një punonjëse e policisë. Bledar Muça po lëvizte me makinë bashkë me Çapjen kur janë qëlluar me armë. Atentatorët ndoqën më pas edhe ambulancën që po transportonte Bledar Muçën me synimin për ta eliminuar. Kjo gjë ngjall dyshime të forta se Muça ka qenë objektiv i atentatit.
Ndërkohë, Gjykata e Elbasanit ka dhënë masën “arrest me burg” për Florenc Çapjen e Bledar Muçën. Ndërsa Ardian Çapjas do t’i komunikohet masa e sigurisë në spital. Këta persona janë arrestuar më 9 qershor pas një përplasje me armë që kanë bërë ndaj policisë. Dy personat ishin shënjestër e një atentati me armë në Elbasan në këtë fillim qershori.

Banorët e rrethit të Tropojës iu drejtuan Kosovës për të parë ndeshjen e kombëtares tonë me Zvicrën. I gjithë rrethi i Tropojës ka qenë pa energji elektrike ditën e djeshme nga ora 13:00 deri në 19:00 për shkak të remontit të linjës 110 kw të tensionit të lartë. Qytetarët janë shprehur të indinjuar, pasi ndërhyrja e OST-së në linjën e tensionit të lartë përkoi me orarin kur u zhvillua ndeshja Shqipëri-Zvicër.
Qytetarët thonë se një pjesë e mirë e tyre janë detyruar të nisen drejt Kosovës për të parë ndeshjen e kombëtares. “I gjithë rrethi i Tropojës është privuar nga e drejta për të ndjekur ndeshjen e shumëpritur të kombëtares sonë për shkak të ndërprerjes së energjisë. Një pjesë e madhe e popullit po merr rrugën për ta ndjek në Kosovë. Ky është diskriminim që po na bëhet”, deklaron një qytetar i Tropojës.
Për këtë ngjarje skandaloze ka reaguar edhe deputetja e PD e Tropojës, Mimoza Hajdarmataj. Deputetja e Tropojës shprehet në një postim në Facebook se, ndërhyrja në sistemin e shpërndarjes së energjisë ka lënë Tropojën pa energji pikërisht në kohën e transmetimit të ndeshjes Shqipëri-Zvicër.
“Gjithë rrethi i Tropojës është privuar nga e drejta për të ndjekur ndeshjen e shumëpritur të kombëtares tonë për shkak të ndërprerjes së energjisë elektrike nga OST me pretekstin e riparimit të linjës së tensionit të lartë, ndërprerje që do të zgjasë deri në orën 19:00. Shumë sportdashës po marrin rrugën për ta ndjekur ndeshjen në Kosovë. Ky është diskriminim që po na bëhet, shprehen banorët e Tropojës, sot e gjetën?”, shkruan deputetja e Tropojës, Mimoza Hajdarmataj.
Ky është një diskriminim që i bëhet Tropojës. Është e pajustifikueshme që OST të planifikojë remontin e linjës 110 kw të tensionit të lartë pikërisht në ditën dhe në orarin e zhvillimit të ndeshjes së shumëpritur për të gjithë shqiptarët, atë të kombëtares me Zvicrën në Europian. Me të drejtë lind pyetja, pse pikërisht këtë ditë është planifikuar remonti i linjës së tensionit të lartë? A nuk kishte plot ditë të tjera, pse remonti nuk është kryer paradite në mënyrë që edhe banorët e rrethit të Tropojës të shikonin kombëtaren tonë në ndeshjen e parë në Europian.
Kësaj qeverie nuk i mjaftoi heqja e transmetimit të ndeshjeve të Europianit Televizionit Publik Shqiptar, por edhe ndërprerja e energjisë elektrike në orarin e zhvillimit të ndeshjes Shqipëri-Zvicër. Europiani transmetohet nga të gjitha televizionet publike në të gjithë Europën, përfshi edhe Greqinë, ndërsa në Shqipëri Televizioni Publik nuk i transmeton ndeshjet e Kampionatit Europian ndonëse ky televizion mbahet me taksat e shqiptarëve.
Ndeshjet e kampionatit Europian nuk jepen në TVSH për shkak të pazareve të Ramës me drejtorin e televizionit, një njeri i afërt i tij. Ky skandal ka ndezur revoltën tek qytetarët, shumica e të cilëve nuk kanë asnjë mundësi ta ndjekin Europianin për shkak se nuk kanë mundësi për të blerë “Dixhitalb”.