Partia Demokratike ka denoncuar dje bilancin e lidhjeve kriminale të Saimir Tahirit. Sekretari i Aksionit Qytetar, Ervin Salianji ishte pranë panairit që ai ka ngritur në qendër të Tiranës, ku Tahiri shfaqet prej disa ditësh, duke sulmuar institucionet.
“Për ditë me radhë Panairi i Policisë që shihni këtu, nuk arriti që të ekspozonte sukseset personale të ministrit Sajmir Tahiri. Nuk u ekspozua gjatë panairit të policisë suksesi i ministrit Tahiri, që është mbulimi i gjithë Shqipërisë nga droga. Nuk u arrit të ekspozohej makina e famshme AA003GB e kushërinjve të ministrit, e cila transportonte drogë e nuk ndalej nga policia.
Nuk u arrit të ekspozohej suksesi i ministrit Tahiri për të nxjerrë jashtë kufijve të Shqipërisë Arben Frrokun, vrasësin e komisar Lamajt, nuk u arrit të ekspozohej mënyra se si ministri Tahiri arriti të nxirrte jashtë shtetit dhe ndihmoi të arratisej Balilin, apo Eskobarin e Ballkanit, baroni i drogës siç njihej për mediat ndërkombëtare. Nuk arriti të ekspozohej as kriminaliteti i lartë në vend, as gjobat dhe represioni që Policia e Shtetit ushtron ndaj qytetarëve”, tha Salianji.
Sekretari i Aksionit politik dënoi sulmet e Tahirit ndaj hetimit që ka nisur për përgjimin dhe mbrojtjen që ai dhe Rama po i bëjnë krimit.
“Për 2 ditë me radhë u arrit që ky panair të kthehej në frengji, nga ku ministri filloi të sulmonte pa asnjë kulturë institucionale, pa asnjë parim të qeverisjes së mirë, gjykatës dhe prokurorë, të cilët e kanë vendosur sot ministrin Tahiri si të akuzuarin kryesor për pajisjen e përgjimit, e cila edhe ajo nuk u ekspozua në këtë panair. Ndaj Edi Rama dhe Saimir Tahiri nuk e duan reformën në drejtësi, sepse në rastin më të parë, në momentin më të parë që u vu në provë për t’i hapur rrugë drejtësisë, për t’i lënë që drejtësia të thotë fjalën e fundit ashtu siç e parashikon Kushtetuta dhe Ligji, Edi Rama dhe ministri i vet i akuzuar sot për përgjimin e ambasadorëve, të mediave, të krerëve më të lartë të shtetit, për një skandal me përmasa të mëdha shtetërore, pengon hetimin, pengon drejtësinë, i bën kërcënime mafioze gjykatësve”, u shpreh Salianji.
PD ironizon panairin e Tahirit
Aeroporti i Rinasit monopol edhe furnizimin e avionëve me karburant, AK nis hetimet
Pavarësisht se duke filluar nga data 01 janar 2015 ka përfunduar ekskluziviteti i tregtimit të karburanteve për avionë në zonën gjeografike të aeroportit ndërkombëtar të Tiranës, ky treg mbetet monopol i shoqërisë Air BP, si i vetmi operator që ofron këtë shërbim në tregun e transportit ajror të pasagjerëve. Nisur nga kjo situatë Shoqata e Hidrokarbure është ankuar pranë Autoritetit të Konkurrencës gjatë muajit prill të këtij viti, në të cilën parashtrohen disa shqetësime mbi pamundësinë e ndërmarrjeve që operojnë në tregun e importit dhe të shitjes së karburanteve për të tregtuar karburante për avionë. Shoqata kërkon ndërhyrjen e Autoritetit të Konkurrencës në lidhje me mundësinë që duhet t’u jepet edhe kompanive të tjera të marrin tokë në përdorim për të ofruar infrastrukturën e duhur për furnizimin e avionëve me karburant edhe kompanitë që mund të bien dakord me kompanitë ajrore të kenë mundësi të fusin autobotet në territorin e aeroportit, mbështetur në kontrata që mund të lidhin me kompanitë ajrore. Shoqata ka kërkuar gjithashtu se nëse kjo arrihet, kriteret dhe kushtet që do t’u ofrojë kompanive të tjera të mos jenë diskriminuese, si dhe koncesionari të mos ketë të drejtë të kërkojë fitim mbi karburantin për efekt të monopolit që ka mbi territorin e aeroportit. Komisioni i Konkurrencës nisur nga këto fakte sapo ka mbyllur një hetim paraprak për të gjetur ekzistencën ose jo të kufizimeve, shtrembërimeve apo pengimeve të konkurrencës. Me një vendim të mëparshëm të vitit 2009 Komisioni i Konkurrencës përjashtoi nga ndalimi marrëveshjen midis TIA shpk dhe AIR BP Albania deri kur numri i udhëtareve të kalojë 2 milion pasagjerë në një vit kalendarik. Ky kriter duket se është përmbushur në fund me 2014. Sipas të dhënave mbi importin e karburantit për vitin 2015 (nga DPD) rezulton se tregu i importit të karburantit për avion, i klasifikuar me kodin 27101921 karburant avionësh zë 2% të tregut te karburanteve, ku gjatë këtij viti kanë realizuar importe ndërmarrja AIR BP Albania me 91% te tregut dhe ndërmarrja AFT SHA me 9% të tregut total për karburantin e mjeteve fluturuese, avionë dhe helikopterë. Nisur nga kriteret e parashikuara në nenin 8 të Ligjit “Për mbrojtjen e konkurrencës” ndërmarrja BP zotëron pozitë dominuese në tregun përkatës për shkak të pjesës së tregut që zotëron (91 % për tregun e furnizimit me karburant të avionëve dhe helikopterëve dhe 100 % të tregut të furnizimit me karburant të avionëve) dhe barrierave të hyrjes në tregun përkatës në kushtet kur aktualisht në Shqipëri funksionon vetëm një aeroport që zotëron eksluzivitetin për fluturime ndërkombëtare. Karburanti përbën një zë të rëndësishëm në kostot operacionale të shoqërive ajrore duke ndikur në rritjen e kostove të shërbimeve aeroportale të ofruara nga TIA, të cilat janë më të larta krahasuar me tarifat e ofruara në aeroportet e disa vendeve të rajonit për shoqëritë ajrore dhe për pasojë, ndikojnë në rritjen e çmimit të biletave të pasagjerëve dhe mallrave nga/drejt aeroportit ndërkombëtar të Tiranës. Sa më sipër, në kushtet e eksluzivitetit të furnizimit me karburant të avionëve në aeroportin ndërkombëtar të Tiranës për shkak të monopolit të furnizimit nga ana e Air BP Albania në aeroportin e vetëm që ofron fluturime ndërkombëtare, kjo shoqëri zotëron pozicion dominues sipas nenit 8 të Ligjit, “Për mbrojtjen e konkurrencës”.
Kosovë, fitimi i bankave, rreth 25 milionë euro
Bazuar në raportin e fundit të Bankës Qendrore të Kosovës (BQK) shihet se gjatë katër muajve të parë të këtij viti, fitimi i bankave ka arritur në 24.5 milionë euro, derisa në periudhën e njëjtë të vitit paraprak, të gjitha bankat komerciale në vend kishin arritur një profit prej 28.7 milionë euro, apo 4.2 milionë euro më pak se në periudhën e njëjtë të vitit paraprak.
Më tej në raportin e BQK-së shihet se të hyrat e bankave nga fillimi i vitit e deri në fund të muajit prill kanë arritur në 76.7 milionë euro, ku nga kjo shumë 58.9 milionë euro janë të hyra nga interesi. Ndërkaq, gjatë periudhës së njëjtë kohore shpenzimet e bankave kanë arritur në 52.2 milionë euro, ku 31.4 milionë euro janë shpenzime administrative.
Gjithnjë bazuar në raportin e BQK-së shihet sa gjatë kësaj periudhe kohore në Kosovë ka pasur ngritje të interesit në kredi dhe rënie të normës së interesit në depozita. “Gjatë muajit prill të këtij viti norma mesatare e interesit për kredi ka qenë 7,7 % derisa një muaj më herët ajo ka qenë 7,4 %. Ndërkaq norma mesatare e interesit në depozita gjatë prillit të këtij viti ka qenë 0,8 %, derisa një muaj më herët ajo ka qenë 0,9 %”, thuhet në raportin e fundit të Bankës Qendrore të Kosovës.
Insulina, konkurrenca heton monopolin: Një kompani po abuzon me pozitën dominuese
Farmacitë në Shqipëri po hasin në problem me furnizimin me insulinë për pacientët e tyre, teksa Kompania Fufarma, që ka monopolin e tregtimit të insulinës kushtëzon shitjen e saj te farmacitë së basku me disa barna të tjera që nuk ecin. Konkurrenca nis hetimin. Mira, një farmaciste në Tiranë prej disa kohësh nuk furnizohet me insulinë për shkak se, kompania që e ka te drejtën e shpërndarjes së furnizimit e kushtëzon dhënien e saj me furnizimin e ilaçeve të tjera. Ajo ka shumë pacient të rregullt që furnizohem me ketë medikament dhe po has në vështirësi për ofruar ilaçin ndaj tyre.
Nisur nga ankesa të ngjashme, Autoriteti i Konkurrencës ka lajmëruar një hetim paraprak që do të zgjasë deri në shtator në lidhje me ankesat për abuzim me pozitën dominuese nga kompania Fufarma. Autoriteti lajmëroi se është depozituar një ankesë me objekt vendosjen e kushteve dhe detyrimeve në tregun farmaceutik. Nëpërmjet kësaj ankese pretendohet se ndërmarrja “Fufarma Sh.a” me objekt të aktivitetit të saj: tregtim, import, shitje me shumicë dhe pakicë të medikamenteve dhe pajisjeve mjekësore, abuzon me pozitën e saj dominuese në tregun e produktit “Lantus” (insulinë). Sipas ankuesit ndërmarrja “Fufarma Sh.a” zotëron të drejtat e vetme të tregtimit të medikamentit “Lantus” (insulina), i cili është një produkt i domosdoshëm për të sëmurët diabetik dhe njëkohësisht është një medikament i rimbursueshëm nga fondi i sigurimeve shëndetësore. Sipas ankeses: “Duke patur të drejtën e tregtimit e vetme të medikamentit “Lantus”, ndërmarrja “Fufarma Sh.a” vendos kushte shtesë duke detyruar çdo farmaci të blejë në të njëjtën transaksion edhe 10 paketa Enterogermin (një tjetër produkt)”.
Nisur nga kjo ankesë Sekretariati i Autoritetit të Konkurrencës në ndjekje të procedurave ligjore për vlerësimin e ankesës, më datën 28 prill 2016 realizoi një monitorim pranë farmacive, lidhur me problematikën e ngritur nga ana e ankimuesit si më sipër. Nga monitorimi në terren rezulton se: problematika e ngritur lidhur me sjelljen e ndërmarrjes “Fufarma Sh.a” në vendosjen e kushteve për të blerë medikamente shtesë gjatë blerjes së produktit “Lantus”, është prezentë në farmacitë me kontratë me ISKSH-në. Farmacistët pranojnë se ky problem ka ardhur duke u shtuar gjatë tre javëve të fundit, ku edhe sasia e mallrave shtesë që u kërkohet të blihen bashkë me “Lantus” nga ana e ndërmarrjes “Fufarma Sh.a” është shtuar. Gjatë monitorimit u pranua nga ana e farmacistëve se kushtet e vendosura nga ana e Fufarma gjatë blerjes së “Lantus” kanë qenë prezentë edhe gjatë vitit të kaluar, por sasia shtesë e mallrave që kërkohej të blihej ishte më e vogël.
Nga faturat e blerjes së “Lantus”, të mara në disa farmaci, rezulton se përveçse “Lantus” ato përmbajnë edhe produkte të tjerë shtesë, gjë e cila lë dyshime për një sjellje që vendos kushte dhe detyrime nga ana e ndërmarrjes “Fufarma Sh.a”. Për sa mësipër, nga të dhënat e mbledhura gjatë monitorimit, rezulton se ndërmarrja “Fufarma Sha”, me aktivitet import, shitje me shumicë dhe pakicë të medikamenteve dhe pajisjeve mjekësore, zotëron pozitë dominuese në tregun e importit dhe shitjes me shumicë të produktit mjekësor “Lantus” (Insulinë).
Në këto rrethana, vendosja e kushteve dhe detyrimeve shtesë për të blerë edhe medikamente të tjera mjekësore bashkë me produktin “Lantus” (insulinë) nga ana e ndërmarrjes “Fufarma Sha”, mund të përbëjë shkelje të nenit 9 të Ligjit nr. 9121, datë 27.03.2003 “Për mbrojtjen e konkurrencës”, të ndryshuar. Për këto arsye Komisioni i Konkurrencës, në zbatim të nenit 9, nenit 24 dhe nenit 42, pika 1, të Ligjit Për mbrojtjen e konkurrencës”, i ndryshuar vendosi hapjen e procedurës së hetimit paraprak në tregun e importit dhe shitjes me shumicë dhe pakicë të produktit mjekësor “Lantus” (Insulinë), për të parë nëse ka, ose jo, shenja të kufizimit të konkurrencës. Hetimi paraprak të përfshijë periudhën kohore Shtator 2015- Prill 2016. III. Ngarkohet Sekretari i Përgjithshëm për ndjekjen e procedurave hetimore të parashikuara në Ligjin nr. 9121 dhe në aktet nënligjore përkatëse, si dhe 2 përgatitjen e raportit të hetimit paraprak jo më vonë se 2 muaj nga marrja e këtij vendimi. Ky vendim hyn në fuqi menjëherë.
KOMISIONI I KONKURRENCËS VENDIM nr.415, datë 4.05.2016 “Për hapjen e procedurës së hetimit paraprak në tregun e importit dhe shitjes me shumicë dhe pakicë të produktit mjekësor “Lantus” (Insulinë)” Komisioni i Konkurrencës, me përbërje si vijon: § Lindita MILO (LATI) Kryetare § Servete GRUDA Zv/Kryetare § Koço BROKA Anëtar § Iva ZAJMI Anëtare § Eduard YPI Anëtar Në mbledhjen e tij, të datës 4.05.2016, me pjesëmarrjen e znj. Lindita Milo (Lati), znj. Servete Gruda, Z. Koço Broka dhe Z. Eduard Ypi, trajtoi çështjen me: Objekt: Shqyrtimi i raportit të monitorimit në tregun farmaceutik për produktin “Lantus” (insulin) Baze ligjore: Neni 24 (shkronja d), neni 26 dhe 42, (pika 1) të Ligjit nr. 9121, datë 28.7.2003 “Për mbrojtjen e konkurrencës”, i ndryshuar, si dhe neni 12 i Rregullores “Për funksionimin e Autoritetit të Konkurrencës” dhe neni 4 i Rregullores “Për procedurat hetimore të Autoritetit të Konkurrencës”.
Francë-Rumani, “Gjelat” e nisin si favorite
Në ndeshjen hapëse të Europianit, Franca si organizatore e turneut do të presë Rumaninë në orën 21:00 në “Stade de France”, në një sfidë ku “Gjelat” shkojnë si favoritë. Në fakt formacioni i Didier Deschamps është edhe një ndër favoritët për ta ngritur lart trofeun për herë të tretë në histori, për të barazuar rekordin e Spanjës dhe Gjermanisë. Vendasit synojnë të bëhen i vetmi vend organizator që triumfon në Europian që pas turneut të vitit 1984, që u fitua pikërisht nga Franca e Michel Platini, Giresse, Tigana etj. Mirëpo është fakt që në edicionet e fundit, Blutë nuk kanë mundur të shkojnë më shumë se çerekfinalet, ndërsa në 2008-ën është eliminuar që në fazën e grupeve.
Franca vjen në këtë Europian në një formë të shkëlqyer, teksa ka mundur të triumfojë në 9 nga 10 ndeshjet e fundit. Didier Deschamp ka dilema për sa i përket formacionit në fazën sulmuese. Pa Karim Benzema, i mbetur jashtë listës për shkak të çështjes Valbuena, i vetmi që duket se e ka vendin të sigurt është Antoine Griezmann, ndërsa dy sulmuesit e tjerë do të zgjidhen mes Kingsley Coman, Andre-Pierre Gignac, Olivier Giroud, Anthony Martial dhe Dimitri Payet. Pas dëmtimit të Lassana Diarra, Ngolo N’Kante mund të plotësojë treshen e mesfushës përkrah Blaise Matuidi dhe Paul Pogba, ndërsa Adil Rami besohet se do të vendoset në qendër të mbrojtjes përkrah Laurent Koscielny.
Franca konsiderohet skuadra për t’u mundur dhe ndoshta pritshmëritë janë që të arrijë një fitore të lehtë ndaj Rumanisë, por është fakt që përfaqësuesja bllkanase gjatë eliminatoreve ka pësuar vetëm dy gola në 10 ndeshje. Franca vërtet është e pamposhtur në 10 përballjet me Rumaninë, por 4 nga 5 përplasjet e fundit mes tyre kanë përfunduar në barazim. Të dyja skuadrat janë ndeshur në vetëm dy raste gjatë finaleve të Europianit, me “Gjelat, që kanë fituar 1-0 në Angli 1996, ndërsa në 2008-ën në Austri dhe Zvicër gjithçka u mbyll në barazim pa gola. Rumania nuk ka emra të mëdhenj në përbërje, por mbetet skuadra e dytë me moshë mesatare më të vogël, pikërisht 22.4 vjeç.
Arma e fortë, grupi
Ergys Kaçe la gjurmë në miqësoren e fundit përpara Europianit, atë ndaj Ukrainës, duke zhvilluar një lojë të mirë. Mesfushori i PAOK-ut ka marrë vlerësime edhe nga mediat e huaja, sidomos pas atij supergoli të realizuar në miqësoren ndaj Francës në “Elbasan Arena” më 13 qershorin e vitit të shkuar. 23-vjeçari konfirmon se është në formën e tij optimale dhe në pritje të vendimeve të trajnerit. “Jam shumë mirë, nuk kam probleme dhe jam gati, pasi ndjehem shumë mirë fizikisht. Trajneri është ai që vendos, ne duhet të ndihmojmë skuadrën edhe kur nuk luajmë, si në fushë dhe në stol”, u shpreh Kaçe.
Europiani është një eveniment madhështor, ndaj dhe emocionet janë të mëdha ashtu si dëshira për të luajtur. 23 futbollistët e grumbulluar nga trajneri Gianni de Biasi vlojnë nga dëshira për të luajtur, por vetëm 11 do të jenë zgjedhjet titullare. Për Shqipërinë, pjesëmarrja në fazën finale të këtij kompeticioni është një lumturi e madhe, gjë që duket edhe tek futbollistët. Gjithashtu turneu i Francës shihet edhe si një vitrinë për një hap përpara në karrierën e çdo lojtari. “Jam me fat që Shqipëria hyri në Europian dhe jemi të lumtur të gjithë si grup që jemi këtu. Europiani është gjë e madhe për të gjithë jo vetëm për mua. Nuk e di nëse do jem te PAOK apo jo, por të shohim me kalimin e kohës”, tha ai.
Në grup, Shqipëria ka kundërshtarë me të cilët është ndeshur së fundmi. Me Francën vendin organizator kujtimet janë të mira, pasi në dy ndeshje janë marrë një fitore dhe një barazim. Me Zvicrën bilanci nuk është pozitiv, e njëjta gjë edhe me Rumaninë. Megjithatë Ergys Kaçe është i bindur tek forca e grupit, karakteristikë që çoi kuqezinjtë në Europian. “Të tria janë skuadra të mira, por ne kemi një ekip të mirë dhe e kemi treguar. Nëse luajmë si më parë s’do të kemi probleme. Në futboll nuk fiton gjithmonë skuadra më e madhe, por kur luan si grup je fitues”, përfundoi Kaçe.
Ndeshja kundër Francës do të zhvillohet në një atmosferë elektrizuese, pasi tifozët shqiptarë kanë ideuar të shpalosin flamurin më të madh të hapur ndonjëherë. Flamuri gjigant pritet të hyjë në rekordin ‘Guinness’, pasi do të jetë 3 herë më i madh se flamuri, i cili u hap në ‘Qemal Stafa’ në vitin 2005 kundër Ukrainës. Ky flamur është më i madh se tribuna e stadiumit dhe për këtë arsye nuk do të shpaloset në stadium, por në një pikë strategjike të Marsejës, shkruan Syri.net. Përmasa e Flamurit do jetë plot 10.500 m2, 150 metra i gjatë dhe 70 metra i gjerë e cila përllogaritet se ka kushtuar rreth 15 mijë euro.
Flamuri gjigant do të hapet në qytetin e Marsejës po në ditën që Kombëtarja Shqiptare do përballet me “gjelat” e Francës, 15 qershor. Lejen për paraqitjen e tij tifozët tashmë e kanë marrë nga shteti francez, ndërsa të angazhuar në shpalosjen e flamurit do të jenë mbi 500 persona. Ideja e Rinor Sllovës nga Dibra e Madhe, ka gjetur mjaft përkrahje nga individë të ndryshëm si dhe nga tifo grupi shqiptar “Tifozat Kuq e Zi” që në mënyrë vullnetare po punojnë në realizimin e projektit.
Basha: Do të kemi sukses nëse shmangim gabimet
Përgatitjeve të kuqezinjve për në finalet e Europianit po u vjen fundi, ndaj trajneri De Biasi dhe futbollistët janë fokusuar totalisht për përballjen e parë me Zvicrën në Lens. Migjen Basha siguron se, atmosfera në Kombëtare është e mrekullueshme, edhe pse lojtarët kanë nisur të ndiejnë stresin e debutim në Europian. “Atmosfera është super, jemi bashkë që nga grumbullimi në Austri, grupi po kalon shumë mirë. Kemi punuar me ritëm të lartë dhe gjithçka ka qenë e veçantë. Tani fillon stresi dhe duhet të kemi kujdes. Kemi zhvilluar mbledhje teknike, kemi parë kundërshtarët tanë. Janë disa gjëra që na ka treguar trajneri, pra se si ta godasim në pikat e dobëta Zvicrën”, u shpreh Basha.
Dhe kur pyetet se cilat janë pikat e dobëta të Zvicrës, Basha e anashkalon përgjigjen, duke theksuar se më parë kuqezinjtë duhet të shmangin gabimet e tyre. “Zvicra ka lojtarë të mirë në çdo repart. S’mund të flasim për problemet e Zvicrës, më parë duhet të shmangim gabimet tona”, tha ai.
Basha si çdo futbollist nga 23 të grumbulluarit e De Biasit shpreson të jetë në fushë ndaj Zvicrës, por shprehet gjithashtu i gatshëm për të kontribuar nga stoli. “Nuk mund të them asgjë për formacionin, mendoj të jem titullar si të gjithë, por vendos trajneri në momentin e fundit. Jam gati të ndihmoj ekipin qoftë edhe nga stoli”, tha Basha.
29-vjeçari është i pari kuqezi që ka luajtur për moshat e Zvicrës, por që më pas zgjodhi të përfaqësojë kombin e tij. Shembullin e Bashës e zgjodhën edhe shumë të tjerë, që sot synojnë ta mposhtin Zvicrën në Europian. “Në momentin që kam luajtur me moshat e Zvicrës kam patur ëndërr të luaj për Shqipërinë. S’duhet të bisedojmë për të kaluarën, unë jam pjesë e Kombëtares dhe kjo ka rëndësi. Kur kam patur probleme me pasaportën s’kam mundur të luaj me Kombëtaren. Kur nisa të luaja unë me Shqipërinë erdhën edhe të tjeret. Është meritë e Federatës, ka bërë punë të mirë”, përfundoi Basha.
Xherdan Shaqiri beson tek mrekullia
Xherdan Shaqiri beson tek mrekullia. Sulmuesi i Kombëtares së Zvicrës, shprehet se Greqia kampione e Europës në vitin 2004 dhe Danimarka më 1992, e bën atë të besoj se Helvetët mund të jenë surpriza e këtij europiani. 24-vjeçari deklaron se ai së bashku me shokët e tjerë të skuadrës po kalojnë një moment të mirë dhe janë të bindur tek suksesi në “Euro 2016”
“Ndihem në formë të mirë fizike. Besoj se Zvicra mund të shkojë më larg nga çka mund ta kenë parashikuar njërëzit. Në të kaluarën, dy skuadra jo me shumë emër siç janë Greqia dhe Danimarka, kanë arritur të dalin triumfues nga ky kompeticion, nuk them se ne do të dalim kampion, por jemi një skuadër, e cila nuk duhet nënvlerësuar”, u shpreh Shaqiri.
Më tëj, Shaqiri flet dhe për rivalët e tij në grup. Sulmuesi shmangu komentet për Kombëtaren e Shqipërisë dhe foli vetëm për favoritët e këtij edicioni, Francën. Sipas tij, Gjelat janë favorit për të marrë kryesimin e grupit, por shton se Zvicra do të bëjë maksimumin që të kalojë bashkë me gjelat.
Fanellë gjigante për Armando Sadikun
Nga ai gol i 11 tetorit 2015 në Armeni, që vulosi kualifikimin e Shqipërisë në Kampionatin Europian, e deri te tre golat radhazi në miqësore. Armando Sadiku është njeriu i momentit në Kombëtare, duke entuziazmuar tifozët. Mbi të gjitha mbështetësit në Elbasan, që i kanë dedikuar një fanellë gjigante, të vendosur në qendër të qytetit.
Me përmasa 6 metra e gjatë dhe 2,8 metra e gjëra, fanella kuqezi me numrin 10 u vendos në muret e Kalasë së Elbasanit, për të qenë e dukshme në bulevardin qëndror të qytetit. Një vlerësim për 25-vjeçarin, që është lojtari i vetëm nga Elbasani në ekipin Kombëtar. Pozitat e Armando Sadikut kanë marrë kuotë në sulmin kuqezi, aq sa De Biasi duket se do t’i besojë një fanellë titullari për ndeshjen e parë të grupit, kundër Zvicrës.
Fanella e Armando Sadikut nuk është rasti i vetëm, pasi në Kampionatin Europian, tifozët shqiptarë kanë vendosur të mahnisin kontinentin. Për ndeshjen e 15 qershorit kundër Francës, tifozët kanë përgatitur një flamur gjigant, me sipërfaqe afro 11 mijë metra katrorë, që do të hapet në qytetin e Marsejës dhe ku të angazhuar do të jenë afro 500 persona.
Stërvitja e fundit në “Perros Guirec”
Kombëtarja Shqiptare zhvilloi seancën e fundit stërvitore në “Perros Guirec” në prag të ndeshjes me Zvicrën. Pasditen e kësaj të enjte, trajneri De Biasi kishte rezervuar kryesisht një stërvitje me ngarkesë të ulët fizikët, me shumë ushtrime relaksuese pas disa ditëve të ngarkuara fizike. Ndërkohë, që në pjesën e dytë larg syve të kamerave, trajneri kreu disa ushtrime taktike, duke përdorur dhe disa nga skemat që mund të aplikojë përballë Zvicrës. Gjatë ditës, ndërkohë 10 futbollistë të kombëtares, Balaj, Lila, Veseli, Basha, Sadiku, Gashi, Xhaka, Ajeti, Roshi, dhe Mavraj iu nënshtruan testit të zakonshëm të antidopungut të UEFA-s.
Kjo ishte stërvitja e fundit e kuqezinjve në stadiumin “Iv Lezhano” përpara ndeshjes së datë 11 qershor. Kombëtarja do të lërë hotelin në orën 11:00 të kësaj të premteje, ndërsa do të niset nga aeroporti i Lanion rreth orës 11:30 për në Lille, qytet që gjendet pranë Lens ku do të luhet dhe sfida e debutimit të Shqipërisë në Europian. Stërvitja në stadiumin “Bollaert Delelis” është programuar për në orën 18:30 ndërsa në orën 17:45 përpara mediave në konferencën e zakonshme për shtyp do të dalë trajneri Gianni de Biasi dhe kapiteni Lorik Cana.
Kryesore
Continue to the category
