Hamilton rikthehet frikshëm, duke fituar pole position në Çmimin e Madh të Spanjës. Një rikthim prej kampioni i britanikut, që theu të gjitha rekordet e kësaj fundjave dhe i dha një sinjal shokut të tij të skuadrës Nico Rosberg, se ai është kampioni në fuqi.
Ka qenë një pasdite shumë e luftuar ajo në pistën e Barcelonës, ku Rosberg zbriti si triumfator me 4 gara radhazi të fituara, si edhe 2 pole position në garat e fundit. Dhe ishte pikërisht Rosberg, ai që vendosi kohën më të mirë në sesionin e parë kualifikues, ndërsa që në këtë sesion u kuptua se ndjkësit e Mercedes do të ishin makinat Red Bull. Me Verstappen skuadra austriake arriti të vendoste kohën e tretë më të mirë në sesionin e parë.
Në sesionin e dytë në skenë u ngjit Hamilton. Britaniku e zbriti i pari kohën për këtë fundjavë nën rendin 1.22 dhe i dha një sinjal të fortë shokut të tij të skuadrës se pole position do të jetë shumë i luftuar. Gabimi që bëri në fillimin e sesionit të tretë krijoi iluzionin se Hamilton nuk ishte gati për një kundërpërgjigje, por xhiro e fundit e britanikut e pa kronometrin të ndalen në kohën 1.22.00. duke vendosur rekordin e fundjavës, e njëkohësisht duke marrë edhe pole position, që i mungonte që nga Çmimi i Madh i Bahreinit. Ky ishte pole position i 52 në karrierë për britanikun.
Kohën e dytë më të mirë e vendosi Rosberg, pothuaj 3 të dhjetat më ngadalë se Hamilton. Linja e dytë e nisjes për garën e së dielës është e zënë nga të dyja makinat Red Bull, me Ricciardo që në çastet e fundit vendosi një kohë spektakolare 1.22.680. Verstappen do të niset i katërti. Te Ferrari kohën më të mirë e vendosi Raikkonen që do niset i pesti, ndërsa Vettel duhet të kënaqet me vendin e gjashtë. Çmimi i Madh i Spanjës do të zhvillohet të dielën, duke filluar nga ora 14.00 dhe do të transmtohet direkt në Top Channel.
Piloti britanik ende nuk ka fituar asnjë garë në Botërorin e këtij viti, ndërkohë që nuk i kanë munguar as problemet me besueshmërinë e makinës. Pikërisht kjo e fundit ka bërë që të ngrihen teori konspirative, sipas të cilave, Mercedes këtë vit preferojnë që të shohin Rosberg kampion bote të Formula 1.
Një tjetër teori që flet për një tërheqje të përkohshme të Hamilton ka të bëjë me stilin e jetës së pilotit jashtë pistave. Sipas kësaj teorie, 30-vjeçari duket se është dorëzuar përballë argëtimit dhe nuk duket aq i motivuar për garat e Formula 1. Sikur të mos mjaftonin zërat mediatike, po në lidhje humbjen e përqendrimit të Hamilton në Botërorin e Formula 1, ka folur edhe një prej drejtuesve të skuadrave të këtij kampionati, i cili ka preferuar të mos e tregojë identitetin e tij. Sipas tij, Hamilton duket se nuk e dëshiron më aq shumë suksesin në Formula 1 pas 3 titujve të fituar.

Portieri i Milanit, Kristian Abiati i jep fund futbollit me Milanin. 38-vjeçari ka vendosur që t’i japë fund karrierës si profesionist pas 15 sezonesh te Milani, teksa pritet që Broki t’i besojë një fanellë titullari në dy sfidat e fundit, atë përballë verdhekuqve dhe në finalen e Kupës së Italisë kundër Juventusit.
“Ndeshja ndaj Romës do të jetë shumë e rëndësishme, pasi do vlerësoj futbollistët me kujdes për të kuptuar se kush më ofron më shumë garanci për të luajtur finalen kundër Juventusit”, tha Broki gjatë konferencës së djeshme për shtyp. Tekniku i Milanit ishte i drejtpërdrejtë, teksa foli hapur duke thënë se jo të gjithë kanë dhënë maksimumin e tyre në periudhën e fundit:
“Dua një sinjal të qartë nga ata lojtarë që nuk më kanë treguar akoma 100%-shin e tyre. Pres më shumë nga 4-5 lojtarë. Ata e dinë mirë se kush janë. Dy ndeshjet e fundit të sezonit janë një test shumë i rëndësishëm për të gjithë grupin. Dua që të jem në vështirësi kur të bëj formacionin e finales”.
Broki në fjalën e tij ka dashur të veçojë disa koncepte që lidhen me punën e kryer deri më tani në drejtim të Milanit “Nuk jam servili i Berluskonit, nuk më ka zgjedhur sepse jam simpatik, por mbi bazën e rezultateve që kam arritur gjatë sezoneve të fundit në drejtimin e të rinjve të Milanit. Fakti që renditemi në vendin e gjashtë më trishton, mirëpo unë kam ardhur me ide të qarta. Mund të kisha luajtur që në fillim me modulin 3-5-1-1, por kjo nuk është filozofia e Milanit.
Vlerat dhe historia që mbart ky klub nuk më lejojnë që të prodhoj një futboll defensiv. Jam i bindur se, nëse do të më krijohet mundësia që të drejtoj skuadrën edhe në sezonin e ardhshëm, mund të bëj një ecuri të mirë me Milanin. Saki sponsorizon Xhampaolon?
Në rini e kam ndjekur gjithë epokën e Sakit, të cilin e kam admiruar shumë. Tani shpresoj që të më admirojë ai mua. Saki nuk më ka njohur akoma dhe është normale të sponsorizojë dikë tjetër”. Italiani u ndal edhe te Baloteli: “Nuk ka shënuar akoma, por rendimenti i tij në fushë është shumë pozitiv. Ka dëshirë për të bërë mirë dhe flasim shumë shpesh. Në këto çaste i mungon vetëm goli”. Në fund, Broki u ndal edhe te rokada që pritet të bëjë Interi sot kundër Sasuolos:
“Nuk pres asgjë nga Interi. Nëse do të luajë me të rinjtë ka arsyet e veta. Jam i përqendruar vetëm te dy ndeshjet e fundit të ekipit tim në këtë sezon, të cilat mund të ndryshojnë fatin e Milanit dhe timin në krye të ekipit”.

Franca do të jetë në Europian jo vetëm pa Benzemanë, por edhe pa Valbuenan. I pari për shkak të skandalit, ndërsa i dyti për çështje të formës fizike. Trajneri i Kombëtares së Francës, Didier Deshamp, publikoi listën prej 23 lojtarësh, të cilët do të jenë pjesë e skuadrës në finalet e Europianit që do të nisë më 10 qershor. Në këtë listë nuk ka vend për yllin e Lionit, Matiw Valbuena, jo për arsye skandali me Benzemanë, por për shkak të dëmtimeve.
Ndërsa, mesfushori i Mançester Junajtid, Morgan Shneiderlin, është në listën rezervë. “Konkurrenca është shumë e fortë. Gjithashtu, Valbuena është i dëmtuar dhe për këtë ai nuk mund të jetë pjesë e kësaj liste”, ka deklaruar Deshamp. Benzema, sulmuesi i Realit të Madridit u shpall i pafajshëm nga gjykata në Francë, por trajneri dhe presidenti i Federatës Franceze të Futbollit kanë vendosur përpara disa javësh që Benzema të mos jetë në Europian. Kjo për hir të atmosferës në grupin e futbollistëve, prania e mundshme e të cilit mund të ndikonte negativisht.

Fenerbahçe dhe CSKA e Moskës janë dy skuadrat finaliste të këtij edicioni të Euroligës. Një sukses historik për turqit që arrijnë për herë të parë kaq pranë trofeut më të rëndësishëm të bashketbollit europian për klube. Euroliga njeh dy skuadrat finaliste. Fenerbahçe dhe CSKA e Moskës do të diskutojnë mes tyre trofeun më të rëndësishëm të basketbollit europian për klube.
Dy skuadrat triumfuan në gjysmëfinalet e luajtura në Berlin, ku padyshim historik është suksesi i Fenerbahçes.
Turqit luajnë për herë të parë në finalen e këtij kompeticioni, pasi mundën me rezultatin 88-77 spanjollët e Laboral në një sfidë me të vërtetë shumë emocionuese. Gjithçka e ekuilibruar në të gjitha periodat, ndërsa koha e rregullt e ndeshjes do të mbyllej në barazim 72-72. Në shtesë basketbollistët e Fenerbahçes u treguan më të saktë në lojën e tyre, falë edhe paraqitjes së shkëlqyer të Datome.
Italiani shënoi 15 pikë, por ishte i pakalueshëm në lojën mbrojtëse të skuadrës së tij. Një arritje historike kjo për Fenerbahçen që në finalen e Euroligës do të përballet me CSKA të Moskës.
Kjo e fundit fitoi derbin rus kundër Lokomotiv Kuban. Gjithçka e lehtë për skuadrën moskovite, që dominoi në të katër periodat e ndeshjes. Edhe një herë protagonist ishte De Kolo, që shënoi 30 pikë në suksesin e CSKA të Moskës. Kjo e fundit shihet dhe si favorite në finale, pasi ndryshe nga rivalët e Fenerbahçes e ka fituar më parë gjashtë herë Euroligën.

Barcelona ka mundur 3-0 Granada, falë një triplete të Luis Suares, duke fituar kështu për të 24-ën herë titullin kampione e Spanjës, këtë herë me Luis Enrique në pankinë. Katalanasit kanë lënë pas vetëm me 1 pikë rivalët historikë të Real Madrid, që kanë arritur një fitore të padobishme në fushën e La Coruna, 2-0 kundër Deportivo. Të dielën në Spanjë luhen të ashtuquajturat “ndeshjet e shpëtimit”, ku janë të përfshira skuadrat Getafe, Rayo dhe Gijon, vetëm njëra prej të cilave do të mund të qëndrojë në La Liga.

Bavarezët kanë festuar këtë të shtunë marrjen e titullit, pasi siguruan fitoren në shtëpi në ndeshjen e fundit të sezonit. Fitorja 3-1 ndaj Hannover është pasuar nga festimet për titullin e radhës të Bundesligës, ku Pep Guardiola ka marrë pjesë si triumfant në prag të lamtumirës. Robert Lewandowski u dha kampionëve kryesimin në fillim të ndeshjes, duke u bërë lojtari i parë që arrin kuotën e 30 golave në një sezon në Bundesligë, rekord që mbahej nga Dieter Muller i Koln në sezonin 1976-‘77.
Mario Gotze, për të cilin përflitet gjithmonë e më shumë kalimi tek Liverpool, shënoi dy gola në secilën pjesë të ndeshjes. Guardiola pritet t’i japë fund zyrtarisht aventurës së tij gjermane fundjavën e ardhshme, pas takimit DFB-Pokal kundër Borussia Dotrmund.
Nuk ka shpëtim për Shtutgartin. Skuadra nga Baden Vyrtemberg është mundur nga Volfsburgu në javën e fundit të Bundesligës 1-3 dhe sezonin e ardhshëm do të luajë në Bundesligën 2. Një rënie e hidhur për Shtutgartin që pas shumë sezonesh do të luajë një kategori më poshtë pas një sezoni të dështuar tërësisht.
Një tjetër skuadër e rëndësishme në Bundesligë, Eintrahti i Frankfurtit do të jetë i detyruar të luajë në play-off me vendin e tretë në Bundesligën 2 për të siguruar qëndrimin në Bundesligë. Në ndeshjen direkte për të qëndruar në Bundesligë Verder Bremeni ka mundur Eintrahtin e Frankfurtit 1-0 me gol të shënuar nga Xhiloboxhi një minutë nga fundi i takimit që i ka siguruar mbijetesën në Bundesligë.
Evropa – Bundesliga ka përcaktuar dhe ekipet që sezonin tjetër do të luajë në Ligën e Evropës. Kështu Shalke 04 dhe Mainci do të futen në fazën në grupe në Ligën e Evropës, ndërsa Herta e Berlinit do të luajë në play off në Ligën e Evropës.

Sezoni i jashtëzakonshëm i Leicester pasurohet edhe me një unazë. Dhe nuk bëhet fjalë për një unazë të zakonshme, por një që përbëhet nga një diamant 5 karat i rrethuar nga një kurorë e artë si për të krijuar një lloj seti me Kupën e fituar të Premier League nga skuadra e Dhelprave. Është një unazë vlera e së cilës kap shifrën e 280 mijë eurove.
Ideja për krijimin e kësaj unaze u hodh nga argjendari Lumbers për të festuar në mënyrën më të mirë të mundshme triumfin e Ranierit dhe skuadrës së tij. Numri i unazave të prodhuara do të jetë i limituar në 80, 81 ose 83 ekzemplarë, në varësi të pikëve që do të ketë kjo skuadër në përfundim të kampionatit.
Efekti duket se ka qenë i menjëhershëm, pasi disa prej lojtarëve të Leicester me Jamie Vardy në krye kanë menduar të bëjnë prenotimet për blerjen e kësaj unaze, të cilën duan t’ia bëjnë dhuratë të fejuarave apo bashkëshorteve të tyre. Vetëm se këtë radhë, për ta paguar atë duhet të hapin portofolët e tyre, pasi padroni i klubit Srivadanapra nuk ka ndërmend të bëjë shpenzime në këtë aspekt.

Chelsea i ka ofruar rinovimin kapitenit të skuadrës, John Terry. Sipas zëdhënësit të klubit, Terry, kontrata e të cilit skadon këtë verë, ka në dorë një kontratë të re 1-vjeçare. “Marina Granovskaia dhe Bruce Buck janë takuar gjatë kësaj jave me John dhe agjentin e tij dhe i kanë ofruar një kontratë të re 1-vjeçare. Kjo ofertë vjen në fund të sezonit, prandaj John duhet të marrë një vendim të rëndësishëm. Ai dhe familja e tij janë duke e shqyrtuar”, u shpreh zëdhënësi.
Terry, 35 vjeç, ka bërë 703 ndeshje me fanellën e Chelseat, pasi debutimit në tetor të vitit 1998 dhe gjatë muajve të fundit e kishte bërë të qartë se dëshiron të qëndrojë në “Stamford Bridge” edhe për disa vite të tjera. Tifozët e Chelseat kishin nisur një fushatë javëve të fundit, duke i kërkuar klubit që t’i ofrojnë kontratë të re idhullit të tyre dhe duket se më në fund skuadra ka reaguar.