Barcelona tashmë e eliminuar nga Championsi, do të luajë një transfertë të vështirë me Betis Sevillan, ku do të synojë ruajtjen e vendit të parë, që i kërcënohet nga të dyja skuadrat madrilene, Atletico dhe Real. Konferencën e rastit për shtyp, trajneri i blaugranave, Luis Enrique e nisi me një koment rreth zërave se futbollistët e Betisit do të bëjnë gjithçka që titullin të mos e fitojë Barcelona. “Është normale që lojtarë të një ekipi të kenë preferencat e tyre. Edhe futbollistët profesionistë mund të jenë tifozë, por kjo nuk më shqetëson aspak. Betisi nuk ka objektiva? Ndoshta ky fakt e bën një skuadër më të rrezikshme”, u shpreh Enrike.
Pyetjes rreth blerjes së mundshme të Saul Niguez nga Barcelona, Enrique iu përgjigj prerë: “Nuk e kam zakon të flas për lojtarë që nuk kanë të bëjnë fare me aktualitetin e Barcelonës. Në galaksinë e futbollistëve ka shumë lojtarë që mund të na interesojnë”.
Neymar javët e fundit nuk po shfaqet me nivelin e tij të zakonshëm, por Enrique si gjithmonë u del në mbrojtje lojtarëve të tij. “Jam i kënaqur me rendimentin e të gjithë futbollistëve të mi, pa përjashtim. Do të ishte e padrejtë, nëse do të veçoja Neymar. Jemi në këtë pozicion për meritë të të gjithëve. Të jesh futbollist i Barcelonës përbën lajm në çdo moment”, tha ai.
Luiz Suarez mbetet favorit për t’u shpallur golashënuesi më i mirë i La Ligas, por Enrique kujton se synimi kryesor i uruguajanit është titulli kampion, më pas vijnë trofetë individualë.
Përplasjet e fundit mes Totit dhe Spaletit kanë ngritur dyshime, nëse kapiteni do të rinovojë me Romën, apo do të firmosë për një skuadër tjetër. Ditët e fundit shtypi i huaj ka ngritur pikëpyetje për një kalim të mundshëm të tij në Spanjë me skuadrën e Barcelonës.
I fundit që ka folur për këto hipoteza ka qenë trajneri Luis Enrike. “Toti te Barcelona? Nëse mund ta marrim me një çmim të mirë, përse jo?”, ka deklaruar ai sipas shtypit italian para ndeshjes me Betisin në kampionat.
“Si një tifoz i vogël i Romës dhe për atë që ka prezantuar dhe përfaqëson ende sot Françesko, do të më pëlqente që ta mbyllte karrierën te Roma. Ta shoh që të veshë një tjetër fanellë në këtë fazë nuk do të ishte ideale, por fjala e fundit i mbetet atij. Për mua duhet ta mbyllë karrierën te Roma”, ka thënë trajneri i Barcelonës.
Betis, i rrezikshëm!
Pogba: Dua të bëhem më i mirë se Pele e Maradona
Falë magjive të tij Paul Pogba udhëhoqi, Juventusin drejt fitimit të një tjetër titulli kampion në Itali, i 5-ti radhazi për skuadrën bardhezi. Vlera e tij në merkato aktualisht kap shifrën e 100 milionë eurove, por nëse vazhdon me këto ritme me siguri që 23-vjeçari mund të thyejë çdo rekord në tregun e shitblerjes së futbollistëve, nëse vendos të largohet një ditë nga Juventusi. Dëshira ose më saktë objektivi i tij është të shndërrohet në një prej futbollistëve më të mëdhenj të historisë së futbollit, diçka të tillë francezi e la të kuptohet në një intervistë për mediat italiane.
“Dua të bëhem një legjendë e futbollit si Pele e Maradona. Madje më shumë se kaq. 4 tituj kampion radhazi me Juventusin në këto 4 vite që jam pjesë e bardhezinjve nuk më mjaftojmë, dua të jem mesfushori më i mirë i të gjithë historisë së futbollit”, u shpreh Pogba.
Premisat për t’u bërë i tillë i ka, pasi klasi nuk i mungon dhe për momentin ngjason me një mesfushor të kompletuar, por për të arritur atje ku dëshiron Pogba ka ende punë për të bërë. Ai kërkohet nga klubet më të mëdha e Europës si Barcelona, Reali i Madridit, Manchester United, Manchester City e Chelsea, por 23-vjeçari ndihet mirë te Zonja e Vjetër dhe nuk e mendon largimin.
“Kam një kontratë me Juven, dhe nuk mund të zgjohem mëngjesin e ditës tjetër dhe të iki në Angli. Kam një problem me të vërtetë të madh i urrej humbjet. Dua të jem një mesfushor që di t’i bëjë të gjitha në fushë, të gjuaj nga çdo pozicion, të dribloj, të shënoj, dhe të mbroj. Më ka pëlqyer gjithmonë Frank Lampard, por dua të bëhem më i mirë se ai, përfundoi Pogba.
Dëmtimet te Reali, akuza mjekëve
Reali i Madridit po kalon një moment të shkëlqyer këtë sezon, duke qenë një pikë larg kryesuesve në kampionat dhe pjesëmarrës në gjysmëfinalet e Ligës së Kampioneve. Por duket se, pikërisht në momentet më kulminante të edicionit do të vuajë mungesa të rëndësishme në formacion. Në takimin e parë ndaj Mançester Sitit, trajneri Zidan nuk pati në dispozicion Kristiano Ronaldon, ndërsa Karim Benzema luajti vetëm 45 minuta.
Të dy kishin probleme muskulore. Duke ditur kalendarin e ngjeshur, mungesat e lojtarëve nuk janë aq të papritura. Por në Madrid i kanë të paralajmëruara dhe mbi të gjitha, kanë qenë shkak për të krijuar tension. Futbollistët kanë dalë hapur në kundërshtim me stafin mjekësor dhe me drejtuesin e tyre, Hesus Olmo.
Në sezonin e shkuar, Hesus Olmo pati një debat të ashpër me Karlo Ançelotin. Tekniku italian ishte i pakënaqur nga puna e stafit mjekësor dhe mbi të gjitha, që kishin ndërhyrë në përgatitjet atletike të lojtarëve, duke ndikuar negativisht.
Për këtë arsye, ndërhyri edhe presidenti Florentino Perez, që mbajti anën e stafit mjekësor. Pas largimit të teknikut italian, Olmo pati më tepër ndikim në përgatitjet e futbollistëve dhe në fakt, lista e të dëmtuarve për probleme muskulore është shtuar ndjeshëm, duke e çuar numrin në plot 26.
Duke iu referuar probleme të shpeshta që kanë pasur, lojtarët kanë refuzuar që të ndiqen nga mjekët e Realit. Diçka e paprecedentë, por që futbollistët e kanë sfiduar klubin, pikërisht, sepse drejtuesit nuk kanë reaguar ndaj bilanceve negative me dëmtimet apo pakënaqësive në trajtim.
Në një letër që ata mendohet se i kanë dërguar presidentit Perez janë përmendur edhe rasti i Hames Rodrigezit, që mungoi 53 ditë për një dëmtim që u premtua se do të riaftësohej për 4 javë. Rasti i Pepes që u premtua se do të riaftësohej maksimalisht për 21 ditë, por që mungoi për 36-të.
Rasti i Benzemasë, që u parashikua se do të ishte i gatshëm brenda 2 apo 3 javësh, ndërkohë që nuk ia dolën për plot 43 ditë. Tregues të qartë që nuk janë në nivelin e një klubi të madh si Reali i Madridit, duke bërë edhe që futbollistët të kërkojnë mjekë privatë, për të zgjidhur problemet e tyre.
Portugezi nuk ka pranuar që të ndiqet për problemet fizike në klinikën “Santias-La Moraleja”, e cila është kontraktuar nga Reali i Madridit dhe bashkëpunon me Hesus Olmon. Ai është parë gjatë këtyre ditëve, duke kryer vizita në klinikën “Rubier”, duke treguar qartë se është i gatshëm të paguajë individualisht diku tjetër, vetëm për të shpresuar një riaftësim më të shpejtë dhe një trajtim më profesional.
Media spanjolle ka bërë edhe lidhjen që e bën të paprekshëm shefin e stafit mjekësor të Realit, Hesus Olmo. Ai është i besuari i Pako Morates, i cili është anëtar i kryesisë së klubit madrilen dhe njëkohësisht kardiologu personal i Florentino Perezit. Për këtë shkak, kreu i merenguesve nuk ka marrë asnjë masë, pavarësisht se lojtarët janë rebeluar në mënyrë të hapur.
Dorëzohet deputeti i PDK, Azem Syla
Deputeti i Parlamentit të Kosovës, Azem Syla, u kthye të premten në Kosovë, dy ditë pasi që autoritetet thanë se kanë lëshuar një urdhër për shoqërimin e tij në polici, nën dyshimet për drejtimin e një grupi të përfshirë në veprat penale, krim i organizuar, pastrim parash dhe keqpërdorim i pozitës zyrtare.
Gjashtë persona u arrestuan të mërkurën në një operacion të Policisë se Kosovës dhe asaj të Misionit të Bashkimit Evropian për sundimin e ligjit.
Operacioni i së mërkurës që ishte ndër më të mëdhenjtë në Kosovën e pasluftës ishte drejtuar kundër 40 personave, që sipas Prokurorisë janë pjesë e një grupi kriminal që drejtohet nga Azem Syla.
Ai u dorëzua të premten tek autoritetet, ndërsa më parë kishte njoftuar se heq dorë nga mandati i deputetit për t’u lënë hapësirë autoriteteve që të kryejnë hetimet.
Prokuroria e shtetit tha se, anëtarët e grupit të drejtuar nga Azem Syla, kanë bashkëpunuar, për të privuar Kosovën nga pronat shoqërore në një vlerë përafërsisht prej 30 milionë eurosh. Sipas autoriteteve, pronat me të cilat besohet se grupi ka vepruar, para luftës në Kosovë ishin prona të Kombinatit Bujqësor Industrial, Kosova Export, të cilat ishin bartur tek kompania shtetërore pas Luftës së Dytë Botërore nëpërmjet shpronësimit. Pronat shtriheshin kryesisht në fshatra përreth Prishtinës kryesisht të banuar me pjesëtarë të komunitetit serb.
Grupi, thuhet në dokumentet e Prokurorisë, me vendime gjyqësore të paligjshme dhe me dokumente të falsifikuara, ka kaluar tokat në emër të të shpronësuarve, të cilët nuk kanë pasur njohuri për këtë zhvillim. Më pas, tokat u janë shitur pronarëve të rinj.
Të dhënat e mbledhura gjatë hetimeve tregojnë se në këto keqpërdorime ishin përfshirë edhe persona që tashmë ndodhen në burg, qelitë e të cilëve janë bastisur po ashtu gjatë operacionit të së mërkurës.
Pjesë e këtij grupi janë edhe ish-gjyqtarë, avokatë, zyrtarë komunal dhe afaristë.
Eurovizion nuk lejon përdorimin e flamurit të Kosovës
Organizatorët e Eurovizionit kanë konfirmuar për Radion “Evropa e Lirë” se, ndalesa për përdorimin e flamurit të Kosovës gjatë netëve finale të Eurosong-ut, nuk është kundër shtetit të Kosovës apo një territori të caktuar, por ka të bëjë me rregullat e përgjithshme.
Për Radion “Evropa e Lirë”, menaxheri për komunikim me media nga Eurovizioni, Paul Jordan, ka thënë se një rregull i tillë vlen edhe për flamurin e Skocisë.
Flamuri i Kosovës nuk do të mund të jetë në duart e të pranishmëve, audiencës gjatë dy netëve finale që do të mbahen në Stokholm të Suedisë.
“Për fat të keq, Kosova nuk është as pjesëmarrëse dhe as vend anëtar i Kombeve të Bashkuara. Është për keqardhje, që ky dokument është publikuar ngase ai ishte vetëm për nevoja të përdorimit të brendshëm dhe në listën e tij ishin vetëm si shembuj flamujt e Kosovës dhe Baskisë. Ne nuk duam që në asnjë mënyrë këtë ta ndërlidhim me ISIS-in dhe na vjen keq nëse radhitja e flamujve në dokument dikë e ka lënduar”, ka thënë Paul Jordan.
Sipas rregullores së re, flamujt që do të mund të përdoren në garën e Eurovizionit janë vetëm ato të shteteve anëtare të Kombeve të Bashkuara, pastaj flamujt e shteteve pjesëmarrëse në Eurovizion apo atyre që kanë marrë pjesë më herët, si Turqia, Portugalia e Rumania.
“Politika rreth flamujve nuk është e orientuar kundër çfarëdo organizate apo territori. Nëse flamujt e publikuar në dokumente e kanë lënduar dikë, ne ndjejmë keqardhje”, ka thënë Jordan.
Po ashtu, nuk do të lejohet përdorimi as i flamujve lokal, rajonal apo provincial, si edhe i atyre që propagandojnë përmbajtje komerciale apo edhe të urrejtjes dhe diskriminimit.
Sidoqoftë, në Prishtinë vendimi për ndalimin e flamurit të Kosovës në Eurovizion është pritur me zhgënjim dhe keqardhje të thellë.
Televizioni Publik i Kosovës si pjesë e Unionit të Transmetuesve Evropian, EBU është shprehur thellësisht i shqetësuar me fyerjen e rëndë që i është bërë Kosovës nga Grupi i Referencës për Këngën e Eurovizionit, të cilët e ndalojnë flamurin e Kosovës të valëvitet në këtë festival.
“Dëshirojmë t’ua bëjmë me dije edhe Grupit të Referencës së Këngës së Eurovizionit, por edhe EBU se Republika e Kosovës është e njohur nga rreth 120 shtete të botës. Populli i Kosovës është i dëshmuar si popull paqësor dhe Republika e Kosova asnjëherë nuk ka paraqitur rrezik për askënd, madje ka qenë e hapur ndaj të gjithëve”, thuhet në reagimin e menaxhmentit të RTK-së.
Edhe deputetja në Kuvendin e Kosovës nga radhët e Lidhjes Demokratike, Alma Lama, ka thënë se rregullorja e Eurovizionit e ka vënë Kosovën me disa rajone apo shtete që nuk lejohet përdorimi i flamujve të tyre.
Mes tjerash, ajo ka shprehur pakënaqësi me faktin që në kuadër të flamujve të ndaluar hyn në një rang edhe ai i të ashtuquajturit Shteti Islamik (IS).
“Klasifikimi i shtetit të Kosovës në një rang me atë të një shteti terrorist është fyerje e ndjenjave të miliona shqiptarëve kudo në botë dhe do të duhej të ishte fyerje e ndjenjave të të gjithë evropianëve. Kjo i kalon të gjitha nivelet e gafave politike”, ka thënë Lama.
SHBA, 610 miliardë dollarë buxhet për mbrojtjen e ushtrinë
Një komision i Kongresit të Shteteve të Bashkuara ka mbështetur rritjen e konsiderueshme të shpenzimeve të mbrojtjes, për të siguruar aleatët evropianë, të cilët janë të shqetësuar me manovrat e ushtrisë ruse.
Ligjvënësit në Komisionin e Shërbimeve të Armatosura po ashtu kanë votuar për ndarjen e 150 milionë dollarëve, për të ndihmuar në trajnimin dhe pajisjen e forcave të qeverisë së Ukrainës në luftën e tyre kundër separatistëve pro-rusë në lindje të vendit.
Ligji, megjithatë, nuk i plotëson kërkesat e vazhdueshme të Kievit për armë të tjera pos atyre që i ka ofruar Uashingtoni deri më sot. Në vlerë prej 610 miliardë dollarësh, legjislacioni është një nga buxhetet më të mëdha për mbulimin e politikave të mbrojtjes të SHBA-së.
Paketa autorizon më shumë para për avionë të avancuar luftarakë, për anije të reja detare, për betejën kundër sulmeve kibernetike, si dhe për gjëra më të zakonshme, si pagat e shërbyesve dhe shpenzimet e kujdesit shëndetësor për ta.
Ligji po ashtu reflekton prioritetet e politikës së jashtme amerikane dha alarmin që shumë ligjvënës dhe zyrtarë kanë shprehur në lidhje me veprimet e përshkallëzuara ushtarake të Rusisë në Ukrainë, në Siri dhe gjetkë.
Ligjvënësit kanë mbështetur edhe një propozim të adiminstratës, të quajtur iniciativa për Sigurimin e Evropës, e që kërkon 3.4 miliardë dollarë për të rritur praninë e ushtrisë amerikane në Evropën Lindore. Pentagoni planifikon të rrisë numrin e brigadave luftarake në Evropë, ashtu si dhe armatimin e stacionuar atje.
Anëtarët e komisionit janë pajtuar edhe për një traktat, që autorizon vendet të kryejnë fluturime mbikëqyrëse mbi territorin e një vendi tjetër, për të monitoruar forcat ushtarake. Traktati për Qiej të Hapur është përdorur edhe nga Shtetet e Bashkuara, edhe nga Rusia për të mbledhur informacione.
Ligjvënësit e komisionit kanë debatuar edhe për kufizimin e përdorimit të motorëve rusë për lëshimin e satelitëve ushtarakë të SHBA-së. Prejse SHBA ka vendosur sanksione kundër Rusisë, për shkak të aneksimit të paligjshëm të Krimesë nga Moska në vitin 2014, zyrtarët amerikanë kanë propozuar kufizimin e përdorimit të motorëve RD-180, të cilët prodhohen nga një korporatë shtetërore ruse.
“Nuk ka arsye të mbushim xhepat e (Presidentit rus) Putinit tani. Kini parasysh kur të votojmë me po se jo. Nëse votojmë me po, ne i kontribuojmë drejtpërdrejt modernizimit të ushtrisë ruse”, ka thënë anëtari i komisionit, Duncan Hunter, republikan nga Kalofornia.
Por, zyrtarë të Forcës Ajrore të SHBA-së kanë thënë se nuk do të ketë alternativë të mirë amerikane për motorët rusë edhe për disa vite.
Një tjetër ndryshim thelbësor i politikës ka përfshirë kërkesën që gratë amerikane të rekrutohen me detyrim në ushtri. Sipas ligjit ekzistues në SHBA, të gjithë burrat midis 18 dhe 25 vjeç janë të detyruar me ligj të regjistrohen në qeverinë federale dhe potencialisht të rekrutohen në rast lufte.
Edhe pse mund të shërbejnë në të gjitha degët e forcave të armatosura të SHBA-së, gratë, për kohë të gjatë, janë ndaluar nga pozicionet luftarake.
Projektligji për mbrojtjen do të kalojë për miratim në Dhomën e Përfaqësuesve muajin e ardhshëm.
Lufta ndaj bandave, 120 të arrestuar në New Jork
Autoritetet amerikane kanë kapur 120 vetë në Nju Jork nën dyshimet për përfshirje në banda kriminale. Operacioni është cilësuar si goditja më e madhe kundër aktivitetit kriminal në historinë e qytetit. Arrestimet u bënë gjatë të mërkurës në një seri bastisjesh.
Në njoftimin e saj, policia bën të ditur se janë arrestuar 120 pjesëtarë bandash që operonin në lagjen Bronx të Nju Jorkut dhe ndaj tyre rëndojnë akuza për vrasje me paramendim, plaçkitje dhe trafik droge.
“Sot njoftojmë një operacion që besojmë se është goditja më e madhe kundër aktivitetit kriminal në Nju Jork. Kemi akuzuar 120 të dyshuar në dy banda rivale në Bronx për vepra penale si kanosje për zhvatje parash, armëmbajtje të paligjshme dhe trafik droge. Disa akuzohen edhe për vrasje me paramendim, tentativë për vrasje, lëndim me armë të ftohtë dhe dhunë fizike në kuadër të aktivitetit të paligjshëm”, tha Prokurori i Distriktit të Nju Jorkut, Preet Bharara.
Sipas prokurorit të distriktit të Nju Jorkut, të akuzuarit dyshohen se kanë mbajtur stoqe me armë pa leje për t’i përdorur në aktivitetin e tyre kriminal. Dy bandat, sipas prokurorit, kanë përdorur rëndom median sociale për të reklamuar aktivitetin e tyre, si dhe për të mbrojtur territorin ku operonin dhe për të tërhequr rekrutë të rinj.
“E kam thënë shpesh se nuk zgjidhen problemet vetëm me arreste. Por në këtë rast prangat janë zgjidhja e duhur. Ka pjesëtarë të shoqërisë sonë që nuk duan ta kuptojnë. Ata veprojnë me vullnet të lirë pa dashur t’ia dinë se shkatërrojnë jetë të pafajshme. Këta individë nuk kanë vend në lagjet tona”, tha Komisioneri i Policisë së Nju Jorkut, William Bratton.
Ndër viktimat që mendohet se ka shkaktuar dhuna e këtyre dy bandave është për shembull një 92-vjeçare që u vra nga një plumb qorr që goditi shtëpinë e saj në Bronx në tetor 2009.
Sipas policisë, bandat operonin në komplekse banimi të lagjes Bronx, të ndërtuara nga shteti për të strehuar persona dhe familje me të ardhura të ulëta.
Mbi 700 policë të Nju Jorkut dhe agjentë federalë ishin dje në zonë për të kryer bastisjet dhe arrestimet gjatë orëve të para të ditës. Pjesëtarët e të dyja bandave, me një moshë mesatare rreth 24 vjeç, operonin në kënde lojërash, magazina dhe apartamente të braktisura ku kishin depozituar armë dhe drogë. Ata gjithashtu akuzohen se kishin hedhur në qarkullim kartmonedha të falsifikuara për të shtuar të ardhurat e tyre. Pritet që në ditët e ardhshme, me zgjerimin e procesit hetimor, të ngrihen edhe akuza të tjera.
16 mijë biznese falimentuan në tre mujorin e 2016, po i’u sekuestrohen asetet
Shoqata për Mbrojtjen e Tregtarëve dhe Tregut të Shqipërisë ka ngritur shqetësimin se biznesi po përballet me një situatë të rëndë. Në një konferencë për shtyp kreu i kësaj shoqate Nikollaq Neranxi tha se: “Rreth 16 mijë biznese kanë falimentuar vetëm brenda tremujorit të parë të këtij viti dhe po iu sekuestrohen asetet, sepse nuk arritën të shlyejnë detyrimet në shtet. Kjo ka ardhur në radhë të parë për shkak të rënies së fuqisë blerëse, i cili tashmë është një fakt që dihet, preket dhe e vuajnë shumica. Bizneset kanë pohuar në një anketim për Bankën e Shqipërisë se kërkesa për mallra dhe shërbime ka pësuar rënie të fortë në tremujorin e parë të 2016, një rënie pikiatë e paparë prej shumë vitesh. Dhe arsyeja e dytë janë të gjitha politikat qeverisëse, qendrore dhe vendore, të cilat janë paralajmëruar nga shoqata jonë kohë më parë, se do të çonin sipërmarrjen e lirë në falimentim. Kjo qeveri, e cila erdhi në pushtet me premtimin e taksave të ulta, në fakt bëri të kundërtën. Në zyrën e Kryetarit të Bashkisë së Tiranës Erion Veliaj, në prezencën e shumë prej jush këtu, kur i thashë kryetarit se me këto taksa, një biznes sado të punojë, është i destinuar të falimentojë, përgjigja e tij ishte; Le të falimentojë! Kjo është përgjigja e një njeriu, i cili nuk bën gjë tjetër veçse tradhton besimin e zgjedhësve të tij.
Ne, heronjtë e këtij vendi me kaq shumë probleme, kemi një çerek shekulli që investojmë me mish e me shpirt në një aktivitet privat dhe të vijë një forcë politike dhe ta hedhë në erë, sepse është e papërgjegjëshme, këtë ne nuk do ta lejojmë. Nëse nuk do të dimë të kërkojmë të drejtat tona, do mblidhemi pas tre muajsh përsëri, që të numërojmë të tjera biznese që falimentojnë dhe që iu bllokohen llogaritë bankare e iu merren me forcë aseset apo dhe shtëpitë e banimit.
Dua të ngre një problem shumë serioz, i cili është ai i përfaqësimit. Kush na përfaqëson ne? Kush negocion me shtetin për interesat tona dhe si po e bën këtë punë? Që kur ne u ngritëm në protesta për supegjobat dhe më pas për taksat e larta, në rrugë private, me anë të mesazheve, politikanë të ndryshëm më kanë shkruar: “Por çfarë faji kemi ne o Neranx, Dhoma e Tregtisë dhe Biznes Albania kanë hedhur firmën, gjë që tregonte se ju të gjithë jeni dakord!” Po të kemi parasysh vetëm ligjin e supergjobave, të cilin e hodhi poshtë Gjykata Kushtetuese, i bie që këto dy institucione që përmenda më sipër, kanë firmosur në emrin tim dhe tuajin, për ligje antikushtetuese, të cilat na dënojnë të gjithëve me falimentim. Firmat e tyre kanë bërë të njëjtin faj, madje krim mund ta quaj, edhe me taksat vendore, paketë të cilën ne e kemi çuar gjithashtu në Gjykatë. Pra ne po na përfaqësojnë individë, të cilët po hedhin firmat e tyre, duke dënuar me falimentim sipërmarrjen e lirë, në këmbim të favoreve të tyre personale”, tha zoti Neranxi.
Shoqata renditi si të nevojshme marrjen e këtyre masave:
1. I kërkojmë qeverisë të mblidhet urgjentisht dhe të gjejë mekanizmat e duhur ligjore për lënien në fuqi të taksave të vitit 2014 se po falimentojnë të gjitha bizneset dhe vendi do të shkojë drejt destabilizimit.
2. Të shkrihet Dhoma e Tregtisë dhe e Industrisë, tek e cila ne kemi paguar miliona dhe nuk na bën asnjë punë, veçse na ka prishur punë. Edhe pse momentalisht ne nuk e kemi anëtarësimin me detyrim, gjithsesi jemi të detyruar të paguajmë, sepse pa disa dokumenta që ata lëshojnë, ne nuk punojmë dot. Të lihen sipërmarrësit të lirë, të anëtarësohen në Dhomat dhe Shoqatat që ata dëshirojnë dhe tek ata që i përfaqësojnë më mirë.
3. Në hartimet e çdo ligji që ka të bëjë me biznesin dhe në diskutimet e tyre në Komisionet Parlamentare, të ketë një konsultim të gjerë me shumë përfaqësues të biznesit. Të miratohet një projektligj, pasi aty të jenë hedhur shumë firma dhe pasi të jetë bindur biznesi që ligjet janë në të mirën e tyre.
4. Duhet që shteti me mekanizmat e tij të ndërhyjë urgjentisht që të mos lejojë biznese të tjera të falimentojnë. Si fillim sugjerojmë që të hiqet fasha e biznesit të vogël dhe të mos kërcënohen me tatime të larta, se na është bërë shteti si gogol. Në këtë mënyrë luftohet edhe informaliteti, sepse tregtari i vogël nuk do të shkojë tek ai që sjell mall kontrabandë, që ta marrë pa faturë tatimore që të mos kalojë fashon që i keni vënë. Ja pra një mënyrë e sinqertë për të luftuar edhe informalitetin.
Shqipëria taksat më të larta në gjithë Rajonin
Shqipëria bashkë me Serbinë shihet të ketë nivelin e TVSH më të lartë në Rajon në nivelin e 20% teksa vendet e tjera e kanë këtë tatim nga 17-19%. Shqipëria, së bashku me Serbinë renditen ndër vendet që kanë nivelin më të lartë të kontributeve të sigurimeve shoqërore të paguara nga punëdhënësi në 15% dhe 17.9% përkatësisht
Nga një matricë krahasuese e Këshillit të Investimeve për “Politikat incentivuese për nxitjen e investimeve: Shqipëria kundrejt vendeve” shihet se Shqipëria është vendi që ofron barrën më të lartë fiskale për investitorët dhe ka incentivat fiskale më të ulta në raport me Maqedoninë, Serbinë, Malin e Zi, Kosova dhe Bosnja. Matrica është përgatitur në mbledhjen e 5 të Këshillit të investimeve, që u zhvillua dy ditë më parë dhe këtë herë kishte në fokus investimet e huaja. Nga matrica rezulton se, në renditjen rajonale, Shqipëria ka barrën më të lartë fiskale për tatim fitimin 15%, gati 50% më të lartë se norma rajonale për këtë tatim që nuk është më shumë se 10%. Edhe Serbia e ka tatim fitimin 15%. Me nivelin maksimal të përshkallëzimit të tatimit mbi pagën prej 23%, Shqipëria e ka tatimin mbi të ardhurat personale më të lartin në rajon. Maqedonia e ka tatimin mbi të ardhurat personale të sheshtë 10%, në Serbi varion nga 10 në 20%, në Mal të Zi nga 9-11%, në Kosovë është progresive nga 0 në 10% dhe në Bosnjë e sheshtë 10%.
Gjithashtu, Shqipëria bashkë me Serbinë shihet të ketë nivelin e TVSH më të lartë në Rajon në nivelin e 20% teksa vendet e tjera e kanë këtë tatim nga 17-19%. Shqipëria, së bashku me Serbinë renditen ndër vendet që kanë nivelin më të lartë të kontributeve të sigurimeve shoqërore të paguara nga punëdhënësi në 15% dhe 17.9% përkatësisht. Megjithatë, Serbia po tregohet më agresive se Shqipëria në tërheqjen e investimeve të huaja, duke i “joshur” të huajt me subvencione direkte për punonjësit.
Maqedonia e ka të gjithë barrën të transferuar te punëmarrësi, në nivelin e 27%. Kjo është një nga arsyet kryesore që Maqedonia rezulton me normën më të ulët të taksës ndaj përqindjes së fitimit të bizneseve (12.9%). Edhe Mali i Zi ndjek të njëjtën logjikë, ku kontributet e paguara nga punëdhënësi janë vetëm 5% dhe ato të punëmarrësit 24%. Edhe në Bosnjë, punëdhënësi paguan 10.5% dhe punëmarrësi 31%. Nivelin më të ulët të kontributeve e ka Kosova me 5% punëdhënësi dhe po aq punëmarrësi.
Edhe për incentivat për investimet, Shqipëria është inferiore sidomos në krahasim me Malin e Zi, Maqedoninë dhe Serbinë. Në renditjen e Këshillit të Investimeve janë renditur të paktën 7 lehtësira fiskale dhe infrastrukturore nëpër zonat e lira, por kjo ofertë e Shqipërisë nuk është funksionale përderisa vendi ende nuk i ka zhvilluar zonat e lira. Ndryshe nga Shqipëria vendet e rajonit përveç Kosovës i kanë funksionale zonat e lira ekonomike dhe me incentiva mjaft konkurruese.
Edhe për investimet në fushën e Turizmit dhe të Bujqësisë vendet e rajonit si Serbia dhe Maqedonia konkurrojnë dukshëm me vendet e rajonit. Serbia ofron përjashtim nga tatim fitimi dhe i pagës për 10 vjet në zonat e lira, 0% TVSH për mallrat që lëvizin brenda zonës së lirë. Edhe TVSH për energjinë e gazin është zero. Vendi ka 14 zona të miratuara dhe 12 zona operacionale. Maqedonia ka 3 zona të lira tërësisht funksionale, ka përjashtim nga tatim fitimi dhe të ardhurat deri në 10 vjet, përjashtim nga TVSH të mallrave që lëvizin brenda zonës së lirë.
Sa i përket Malit të Zi, incentivat përfshijnë përjashtim nga taksat për 3 vitet e para, për kompanitë, të cilat janë të angazhuara në prodhimin në zona të pazhvilluara, (por jo e aplikueshme në agrikulturë, transport, ndërtim anijesh dhe peshkim). Ndërsa në fushën e turizmit, në Malin e Zi përjashtohen nga tvsh importi i të mirave dhe shërbimeve për ndërtimin e hoteleve me 5 yje, reduktim të taksës së pronës me 30% për hotelet me 4 yje dhe 70% për ato më 5 yje. Gjithashtu, mbështetje në formë granti për pjesën veriore të Malit të Zi, në rast investimesh në turizëm, grante të cilat janë në shifrën minimale të 500 mijë euro dhe që krijojnë minimalisht 20 vende pune për 3 vjet (në rastin e ndërtimit të hoteleve me më shumë se 3 yje).
Kisha greke është në prag të falimentimit
Apostolos LAKASAS
Kisha Ortodokse e Greqisë është në vështirësi ekonomike për shkak të zvogëlimit të të ardhurave dhe të rritjes së taksave. Për të kuadruar llogaritë, manastire si Petraki dhe Penteli po ngrijnë pagesat.
Kishat dhe manastiret në të gjithë vendin kanë problem për të paguar rrogat dhe po kërkojnë të paguajnë me këste faturat dhe taksat mbi pasuritë e patundshme. Veç kësaj, shesin prona me çmime shumë të ulëta për të arkëtuar para. Kisha e Greqisë numëron kryesisht dy burime të ardhurash: pasuritë e patundshme dhe aksionet e Bankës Kombëtare të Greqisë (një institut kreditimi i madh privat), dhe të dyja janë në rrugën e ezaurimit. Qiratë janë në rënie dhe blerësit janë gjithnjë e më të vështirë për t’u gjetur, ndërsa aksionet e Bankës Kombëtare kanë rënë në kuotën 0.23 euro secili.
At Salonon Antonios, Drejtori i Përgjithshëm i Shërbimit Financiar Qendror Fetar, ka shpjeguar se Kisha ka marrë pjesë dy herë në rritjen e kapitalit të Bankës Kombëtare të Greqisë, përkatësisht në vitet 1996 dhe në 2005. Në 2005 ka blerë aksione të reja me 22 euro secilin. Në vitin 2010 Kisha ka marrë pjesë në një rritje të re të kapitalit, kësaj radhe pas presioni i funksionarëve të lartë shtetërorë dhe të sistemit bankar. Për të realizuar operacionin, Kisha ka marrë hua 27 milionë euro nga Banka Postare Helene dhe ka nxjerrë 27 milionë euro të tjera nga kursimet e saj.
Antonios ka saktësuar se, “Kisha nuk luan bixhoz”, duke lënë të kuptohet se mund të administroheshin më mirë aksionet dhe të shiteshin kur kishin arritur kuotën maksimale. Një gjë e tillë nuk ka ndodhur dhe më pas ka shpërthyer kriza. Në vitin 2008 Banka Kombëtare e Greqisë ka pushuar së paguari dividendët dhe çmimi i aksioneve të saj ka rënë pikiatë.
Në të njëjtën kohë, konjuktura e pafavorshme e tregut të pasurive të patundshme ka bërë të ezaurohet një tjetër burim i rëndësishëm i të ardhurave të Kishës, që ka në aktiv 19000 hektarë terrene të kultivueshme, 700 copa toke, 420 godina dhe 260 banesa. Nga viti 2008 qiratë kanë pësuar një reduktim në masën midis 30 dhe 70 për qind, shumë pasuri të patundshme kanë mbetur pezull dhe mungojnë paratë për mirëmbajtjen e tyre. “Gjatë 8 viteve të fundit të ardhurat janë zvogëluar me 75 për qind. Më parë, bilanci vjetor ishte prej rreth 23 milionë euro, kurse sot është prej 6 milionë eurosh”, ka thënë Antonios.
Kisha i ka kërkuar shtetit që të impenjohet për të tërhequr investitorë dhe për të zgjidhur problemet që po e pengojnë për të shfrytëzuar pronat e saj. Për shembull, ato të një trualli prej 130 hektarësh në afërsi të Varkizës, në anën Juglindore të Athinës: një zonë pothuajse e gjitha e mbuluar me rërë dhe gurë. Autoritetet fetare do të donin të siguronin ndërtueshmërinë për një pjesë të vogël të zonës, në mënyrë që një investitor potencial të mund të ndërtojë në 22.5 hektarë dhe të detyrohet të mbjellë pemë në 107.5 hektarë të tjerë. Por deri më tani qeveria është mjaftuar që të përsërisë se nuk ka marrë ende vendim mbi destinacionin e përdorimit të këtij trualli. Kisha do të donte të shfrytëzonte edhe një truall të madh në Skisto, afër Pireut, ku është në rritje kërkesa për qendra logjistike dhe shërbime të tjera lidhur me portin. Kjo zonë është klasifikuar si zonë pyjore, por Kisha posedon dokumenta që tregojnë se ky përkufizim i takon vitit të largët 1850 dhe nuk është azhornuar kurrë qysh atëherë.
Çdo kishë metropolitane, çdo manastir dhe deri çdo famulli posedon pasuri të patundshme që i menaxhon në autonomi të plotë dhe, ndryshe nga sa besohet rëndom, paguajnë të gjitha taksat mbi pasuritë e patundshme dhe mbi të ardhurat. Kohët e fundit, Manastiri i Petrakit ka bërë kërkesë për të hyrë në një plan që u mundëson kontribuesve me borxhe që t’i paguajnë taksat me 100 këste. Sipas disa burimeve, manastiri posedon vetëm dy pasuri të patundshme në Athinë, të dyja në qendër të saj, por me vlerë të ndryshme.
Së fundi, Antonios ka sqaruar se Shërbimi Financiar Qendror Fetar është përgjegjës për financimin e të gjitha kishave metropolitane. Këto, nga ana e tyre, menaxhojnë programet e asistencës ndaj të varfërve dhe kështu që, në rast se nuk do të gjenden zgjidhje, këto iniciativa rrezikojnë që të anullohen. Efektet do të ishin negative për të gjithë shoqërinë greke, nga momenti që Kisha është një institucion shumë i impenjuar në asistencën e personave më të goditur nga kriza.
Kryesore
Continue to the category
