Në deklaratën e re të pasurisë Rama dhe bashkëshortja e tij Linda Rama kanë shtuar disa dhjetëra milionë lekë, por Rama është treguar i kujdesshëm që të mashtrojë sërish të ardhurat e tij reale. Nga publikimi i të dhënave të reja të pasurisë për vitin e kaluar bie në sy se Rama ka shtuar të ardhurat nga shitja e pikturave me afro 27 milionë lekë, ndërsa ende nuk ka mundur të shlyejë borxhet për ndërtimin e vilës si dhe kreditë që ka marrë në bankë.
Sipas deklaratës Rama ka një borxh ndaj firmës ndërtuese të vilës ku banon në Surrel në vlerën e 120 milionë lekëve (të vjetra). Ndërtuesi i kësaj vile është biznesmeni i njohur Carapuli. Ndërsa Rama nuk i ka likuiduar ende paratë e ndërtimit të vilës, bie në sy se vetëm gjatë vitit të kaluar Carapuli ka fituar tendera në vlerën e 17.8 miliardë lekëve, shumica e të cilave me ofertën më të lartë. Megjithëse në deklaratën e pasurisë nuk përmendet emri i firmës të cilës Rama i detyrohet 120 milionë lekë, ajo është bërë publike dhe i përket firmës së ndërtimit të mikut të afërt të Ramës. Kjo deklaratë hedh dritë mbi marrëdhëniet e privilegjuara të Ramës me përfituesit e tenderave të qeverisë. Ata i bëjnë dhuratë një shtëpi dhe Rama i bën dhuratë tendera në vlerën e dhjetëra miliarda lekëve.
Rama operon me ndërtues të tillë përfitues privilegjesh në dhjetëra miliardë lekë të parave të shqiptarëve në marrëdhënie të hapur ortakërie. Ata ndajnë së bashku tenderat dhe kjo është një mënyrë akoma më e lehtë për Ramën që të fshehë pasurinë e tij përmes transaksioneve të biznesmenëve që më pas operojnë në parajsat fiskale.
Ekspertët e ndërtimt janë të bindur se vila e Ramës në Surrel nuk kushton kurrsesi 120 milionë lekë. Një kosto e tillë është ajo e një apartamenti të thjeshtë, ndërsa për një vilë me një gjatësi lineare ndërtimi prej 55 metrash dhe një gjërësi prej më shumë se 12 metrash është e kuptueshme se kostoja është të paktën 5 herë më e lartë.
Sipas kësaj deklarate, kreu i qeverisë shqiptare fiton më shumë artist sesa si kryeministër dhe ndoshta është nga të vetmit kryeministra që nuk ka në pronësi një automjet.
Të ardhurat e vitit 2015 nga të drejta të autorit janë diçka më shumë sesa nga paga kryeministrore. Të ardhurat nga shitja e veprave artistike gjatë këtij viti ka shënuar edhe djali i madh i kryeministrit, Greg Rama. Ndërkohë që për herë të parë pas kaq vitesh, Rama fiton nga puna më shumë se bashkëshortja e tij Linda. Më poshtë lexoni të plotë deklaratën e tij pasurore.

Pasuri të paluajtshme

1) pronar me 100% i apartament banimi Tiranë, tip parafabrikat me sip. 59 m2, fituar me privatizim, sipas rivlerësimit të 2012 vlera 5 422 100 lekë.
2) pronar me 100% të studio artisti Tiranë, sip. 65 m2, me trashëgimi nga babai, me vlerë të raportuar 2 500 000 lekë.
3) bashkëpronar me 50% e ku 50% të tjera pjesë e regjimit martesor me bashkëshorten Lindita RAMA, shtëpi banimi me sipërfaqe të padeklaruar, përcaktuar një kat, me vlerë ndërtimi 39 607 741 lekë, vendndodhja e shtëpisë në fshat Surrel, Komuna Dajt, pasuri që justifikohet me dokument leje ndërtimi, momenti i deklarimit pa titull pronësie.
4) bashkëshortja Lindita Rama si e pavarur nga regjimi martesor është pronare me 100% e apartament sip. 146.15 m2 + verandë 68 m2 + garazh 17 m2, vendndodhja Tiranë, blerë me pjesë në 2015 dhe 2009.
5) bashkëshortja Lindita Rama e pavarur nga regjimi martesor është pronare e tokës arë me sip. 4 483.5 m2 Surrel, Dajt, blerë në vitet 2005 dhe 2009, me titull pronësie për tokë arë.
Likuiditete (Depozita, Cash, Llogari rrjedhëse, Debi-Kredi, Karta krediti/debiti)
1) gjendje e datës 10. 09. 2013 në llogari bankare personale në vlerë 2 007 789,3 lekë, burim të ardhurash paga e mëhershme dhe shitja e librit “Kurban”.
2) kesh (cash) në vlerën 988 700 lekë, burim i të ardhurave kursime personale.
3) kredi në bankë të nivelit të dytë me vlerë detyrimi financiar të pashlyer – 336 383 lekë, e marrë në datën 12. 05. 2000 me principal 2.5 milionë lekë, afat shlyerje 15 vjet, interes bazë 3%.
4) detyrim i papaguar subjektit ndërtues të “shtëpisë së banimit në Surrel” me vlerë – 12 056 241 lekë, detyrim si pjesë e regjimit martesor 50 me 50 me bashkëshorten.
5) detyrim i papaguar i qira vjetore apartament banimi sipas kushtit për pagim një herë në vit, vlera e detyrimit -573 280 lekë detyrim si pjesë e regjimit martesor 50 me 50 me bashkëshorten.
6) Zonja Lindita Rama në cilësinë e bashkëshortes dhe me të drejta të pavarura nga regjimi martesor, zotëron vlerën e dhënë si hua të tretëve prej 70 000 euro, hua pa interes, e papërcaktuar data e huadhënies.
7) bashkëshortja Lindita Rama zotëron gjendje llogari bankare më 10. 09. 2013 në vlerën 6 206 644.3 lekë, deklarohet 100% pjesëtare.
Sende me vlerë
1) posedues i një koleksion me krijimtari artistike të babait, koleksion i trashëguar.
Të ardhura nga Paga dhe Shpërblimet
Të ardhura nga Paga për vitin 2015 vlera neto pas pagimit të detyrimeve tatimore 2 037 188 (dy milionë e tridhjetë e shtatëmijë e njëqind e tetëdhjetë e tetë) lekë.

Të ardhura nga Publikimet dhe e Drejta e Autorit

Të ardhura nga krijimtaria artistike: shitje libri Kurban, shitje punë artistike vlera neto me detyrime tatimore të zbritura 2 694 009 (dy milionë e gjashtëqind e nëntëdhjetë e katër mijë e nëntë) lekë.

Të ardhura të personave pjesë e Çertifikatës Familjare

1) Zonja Lindita Rama, Shtuar në llogarinë personale në bankë gjatë vitit 2015 vlera 3 044 470 lekë.
2) Zonja Lindita Rama shtuar Gjendja Cash shtuar me 115 000 lekë.
3) Zonja Linda të ardhura nga paga dhe puna si eksperte në vlerë neto pas pagimit të detyrimeve tatimore 1 929 676 (një milion e nëntëqind e njëzet e nëntë mijë e gjashtëqind e shtatëdhjetë e gjashtë) lekë.
4) Zonja Linda Rama të ardhura nga qira apartamenti në vlerë neto pas pagesës së detyrimeve tatimore 1 939 237 (një milion e nëntëqind e tridhjetë e nëntë mijë e dyqind e tridhjetë e shtatë) lekë.
5) Zonja Linda Rama të ardhura nga interesa bankare vlera neto pas zbritjes së detyrimit tatimor 4 294 (katërmijë e dyqind e nëntëdhjetë e katër) lekë.
6) Zoti Gregor Rama fituar nga shitja e veprave të artit 3 400 euro.
7) Gregor Rama pakësuar një llogari bankare me minus 197 629 lekë.
8) Llogari bankare pa ndryshime.
9) Llogari bankare në EU shtuar me plus 50.

Grup pune në ILDKP për të fshehur pasuritë e qeveritarëve

Nga burime zyrtare mësohet se pranë ILDKP prej ditësh është ngritur një grup pune me një qëllim të dyshimtë. Burimet saktësojnë se qëllimi i këtij grupi është fshehja e pasurive të zyrtarëve të lartë të qeverisë përmes korrektimit të të dhënave. Punonjësit që janë pjesë e këtij grupi po thirren të punojnë edhe gjatë ditëve të fundjavës që janë pushim.
Zyrtarët e lartë kanë përfunduar dorëzimin e deklaratave të pasurisë dhe tani është ILDKP, e cila po merret me këto deklarata.

Nga Telnis SKUQI

Juristi i Drejtorisë së Policisë së Qarkut të Gjirokastrës, Juljan Veizi nuk i ka besuar veshëve kur u informua se dy xhaxhallarët e tij janë shpallur në kërkim, pasi policia vendore zbuloi një laborator të kultivimit të hashashit, në lagjen “Zinxhira” në qytetin e Gjirokastrës
Prej 3 vitesh kultivimi i hashashit nuk është më e drejtë e gjithsecilit, por e drejtë e drejtuesve të lartë të Policisë së Shtetit dhe Drejtorisë së Policisë së Gjirokastrës
Juristi i Drejtorisë së Policisë së Qarkut të Gjirokastrës, Juljan Veizi, ka kërcënuar dje nëpërmjet një statusi të tij në Facebook “Me plumb në lule të ballit” ish-Kryeministrin shqiptar, Sali Berisha.
Në statusin e tij me titull “Kriminel, fitove ti!!!”, Juljan Veizi, njeriu i afërt i Ziver Veizit, që humbi jetën nga një plumb gjatë protestës së 21 janarit 2011, shkruan në statusin e tij (ligjëratë e drejtë) se, “Gjykata dhe njëkohësisht edhe Prokuroria e mbaruan lojën e tyre!!!. Si e nisën, e bitisën, por bashkë me ‘21 janarin’ varrosin shpresën që ky vend do të bëhet…”.
Më tej vijon: “Kryekrimineli bën thirrje për armatosje, e bën Presidentin horr, Prokuroren lavire, nuk zbaton urdhrat e Prokurorisë, por në fund në burg futet kush ka rilidhur energjinë që nuk kish paguar…. Kryekrimineli është i plotfuqishëm përballë qeverisë, përballë drejtësisë, edhe përballë lotëve të Anës që ‘vajtuan’ në gjithë Europën… Kryekrimineli për një gjë ka të drejtë, këtu duhet armatosur populli, sepse është e vetmja zgjidhje, sepse ti o Kryekriminel e do fiks aty, në lule të ballit….”.
“Kryekriminel, fitove ti!!!, 1997-ta, Gërdeci, 21 janari janë arritjet e qeverisë tuaj!!!”, shkruan ai.
“Kryekriminel “Na fal!!!”. Të na falësh që na vrave”, përfundon ai.
Disa ditë më parë, ish-Kryeministri Sali Berisha, bëri thirrje nga podiumi i Kuvendit të Shqipërisë “Për armatosje të popullsisë, sipas ligjit amerikan” dhe për këtë arsye, Byroja parlamentare e përjashtoi ish-liderin e PD për 10 ditë.

Juristi Veizi dhe laboratori i drogës

Një muaj më parë, juristi i Drejtorisë së Policisë së Qarkut të Gjirokastrës, Juljan Veizi nuk i ka besuar veshëve kur u informua se dy xhaxhallarët e tij janë shpallur në kërkim, pasi policia vendore zbuloi një laborator të kultivimit të hashashit, në lagjen “Zinxhira” në qytetin e Gjirokastrës. Me ndihmën e drejtuesve të lartë të policisë lokale, lajmi në media u tejkalua “butësisht”, sepse emrat e dy administratorëve u fshinë nën iniciale, gjë që solli dy pamje të pavërteta për opinion publik. Policia e Shtetit u shfaq kokëlartë, sepse zbuloi një laborator që njerëzit e policisë e kishin prodhuar, si dhe shmangur skandalin, sepse autorët realë të këtij biznesi ishin vëllezërit e Ziver Veizit, protestuesi që u vra më 21 janar 2011.
Megjithatë historia nuk përfundon këtu. Një javë më parë, policia vendore e ka mbajtur të fshehtë arrestimin e njërit prej dy xhaxhallarëve të shpallur në kërkim, sepse këtë të drejtë ekskluzive për të bllokuar informacionin e ka juristi i Drejtorisë së Policisë së Qarkut të Gjirokastrës, Juljan Veizi. Të gjitha këto çudira nuk janë thjesht rastësi, por pjesë e lojës së kartelit të drogës në Jug të Shqipërisë, ku pjesëmarrës janë edhe vëllazëria e Ziver Veizit, përkatësisht Hodo dhe Roland Veizi, plus edhe nipi i tyre. Si ka mundësi që Drejtoria e Policisë së Qarkut të Gjirokastrës nuk jep asnjë informacion për këtë laborator që ishte ndërtuar vetëm 3 km larg këtij institucioni? Prej sa vitesh ku aktivitet ishte ndërtuar? Pse pikërisht vëllazëria Veizi e kishte këtë ekskluzivitet në qytetin e Gjirokastrës? Të gjitha këto pyetja kanë një përgjigje. Prej 3 vitesh kultivimi i hashashit nuk është më e drejtë e gjithsecilit, por e drejtë e drejtuesve të lartë të Policisë së Shtetit dhe Drejtorisë së Policisë së Qarkut të Gjirokastrës.

Rama kërkon të kapë sistemin gjyqësor përmes Reformës në Drejtësi për të shpëtuar Shullazin dhe bandën e tij. Deputeti demokrat, Eduard Halimi deklaroi dje në një prononcim për mediat se PD nuk do të lejojë miratimin e një reforme sipas projektit të Ramës, e cila synon t’i bëjë bandat kriminale të lidhura me Ramën të paprekshme.
Halimi tha se nëse drejtësia do të ishte e gjitha nën këmbët e Edi Ramës, sot Emiljano Shullazi do të ishte sërish jashtë duke i vënë pistoletën në kokë biznesmenëve e duke grabitur prona. Ndaj dhe ai theksoi se atë që ka bërë gjatë këtyre tri viteve Edi Rama duke i dhënë prona Emiljano Shullazit dhe bandës së tij, atë gjë vazhdon ta bëjë edhe sot dhe flet për Reformën në Drejtësi. “Kush flet për Reformën në Drejtësi?! Ai që mbolli gjithë Shqipërinë me kanabis, që ka mbjellë çdo kodër nga Jugu në Veri me kanabis. Flet ai që me dorën dhe firmën e vetë futi në Parlament deputetë me rekorde të tmerrshme kriminale, njerëz të dënuar nga drejtësia për trafik droge dhe trafik prostitucioni. Flet ai për sistemin e drejtësisë, ai që kur trafikanti me 400 kg heroinë drogë gjendej në makinën e deputetit të tij, Mark Frroku urdhëroi lirimin. Ai që ngriti traun për vrasësin e komisarit, ai që kaloi makinën e Emiljano Shullazit në doganë, pa asnjë dokument dhe pa kontroll. Ai që hoqi prizën e kamerave të komisariatit kur deputeti i tij qëlloi qytetarët para komisariatit. Ai flet për sistemin e drejtësisë?! Sistemi i drejtësisë duhet të jetë larg Edi Ramës. Dhe kjo është imediate”, tha deputeti demokrat.
“Ju jeni njohur me qëndrimin politik të Grupit parlamentar të Partisë Demokratike, një qëndrim që shpreh papajtueshmërinë e plotë me standardin tërësisht kriminal që ka ndjekur Edi Rama, ku nga njëra anë urdhëron dënimin e denoncuesit të Emiljano Shullazit me përjashtimin 10 ditë të Doktor Berishës nga Parlamenti dhe nga ana tjetër, merr në mbrojtje siç ka bërë gjatë këtyre tri viteve Emiljano Shullazin, siç bëri edhe para disa ditësh në Parlament, ku në vend që të falënderonte Prokurorinë, sulmoi ashpër Prokurorinë duke i dalë sërish në krah bandave dhe lidhjeve me bandat, duke i dalë në krah sërish Emiljano Shullazit duke thënë se me demek policia i kishte kërkuar arrestimin e Emiljano Shullazit, por ishte Prokuroria ajo, e cila e kishte vonuar arrestimin e Emiljano Shullazit. Një deklaratë, që nuk arriti ta artikulonte as avokati de jure i Emiljano Shullazit para kamerave. Kjo është drejtësia që do Edi Rama”, tha Halimi.
Ai theksoi se në vend që si Kryeministër të dilte në mbrojtje të Prokurorisë, të dilte në mbrojtje të dëshmitarëve, të cilët janë kyç në një proces të tillë si ky i Emiljano Shullazit, në vend që të dilte në mbrojtje të biznesmenëve, të cilëve u është vënë gjoba duke u marrë pasurinë e tyre me armë në kokë, doli në mbrojtje dhe bëri avokatin e Emiljano Shullazit. Kjo, tha Halimi, është drejtësia që kërkon Edi Rama dhe nuk mund të jetë kurrë një drejtësi që e duan qytetarët shqiptarë.
Halimi tha se qytetarët duan një sistem drejtësie larg qeverisë, larg Edi Ramës. “Projekti që ka pasur në kokën e vet Edi Rama për sistemin e drejtësisë është rrëzuar, nuk ekziston më. Ai ishte një projekt që u rrëzua nga Venezia. Ky ishte ai që vonoi Reformën në Drejtësi të paktën prej dy vjetësh. Që nga shtatori e deri në dhjetor vonoi Byronë Kombëtare të Hetimit sepse donte patjetër ta kishte nën Emiljano Shullazin, për të mbrojtur Emiljano Shullazin dhe gjithë shullazët që kishte dhe ka. Edhe kur ia rrëzoi Venecia në dhjetor, sërish e shtyu deri në mars dhe kërkon ta mbajë Byronë Kombëtare të Hetimit nën Shullazin. Kjo s’mund të jetë drejtësia që duan shqiptarët”, tha deputeti demokrat.

– Z. Halimi, a po kërkon opozita pretekste për të zvarritur Reformën në Drejtësi?
Jua thashë se ai që e ka penguar Reformën në Drejtësi ka qenë Edi Rama që ka patur një projekt të vetin dhe nuk ka pranuar kurrë të jetë një projekt bashkë me opozitën, një projekt që të jetë sipas parimeve të Komisionit të Venecias dhe sipas parimeve europiane. Por ai ka dashur të jetë një projekt i veti. Ju jeni dëshmitarë që është ai që e ka vonuar nga shtatori ku bëri vetë projektin, ku donte që Byronë Kombëtare të Hetimit dhe Prokurorinë speciale ta kishte nën Ministrinë e Brendshme dhe rezistoi sërish edhe kur Venecia në dhjetor ia rrëzoi. Kur ne i thamë në dhjetor hajde ta miratojmë siç do Venecia, vazhdoi dhe e mbajti deri në mars Byronë Kombëtare të Hetimit, nën hyqmin e vet dhe kjo është e paimagjinueshme. Sigurisht që ekspertët e Partisë Demokratike kanë punuar gjatë javës së kaluar dhe kanë treguar bashkë me PD-në se janë për një projekt gjithpërfshirës për Reformën në Drejtësi, një projekt që do të nisë me komponentin antikorrupsion, një projekt që do të bëjë të mundur krijimin e Byrosë Kombëtare të Hetimit dhe Prokurorisë speciale, jo ashtu siç e do Rama nën Shullazin për të mbrojtur Shullazin dhe bandën e tij, por nën Prokurorinë. Një projekt që do të bëjë të mundur largimin e gjyqtarëve dhe prokurorëve të korruptuar, do të bëjë të mundur dërgimin para drejtësisë siç bëri sot me Emiljano Shullazin, por edhe me gjithë shullazët dhe bandat që janë nëpër këmbë në Shqipëri dhe gjithë zyrtarëve, ministrave, deputetëve të korruptuar që marrin fonde publike.

– Z. Halimi, ju thatë se z. Rama duhet të mbahet larg nga Reforma në Drejtësi dhe sistemi i drejtësisë. A mbahet jashtë duke mos shkuar opozita në këtë reformë dhe duke ndenjur këtu jashtë me gazetarët?
Thashë që opozita tregoi sot se ka një qëndrim politik për të treguar qartësisht si të papranueshme me një standard tërësisht kriminal që mban Edi Rama. Në vend që të promovojë Prokurorinë dhe denoncuesit, dënon denoncuesit dhe bëhet krah për krah me krimin dhe avokatët e krimit. Kjo nuk mund të jetë drejtësi, të cilën e duan qytetarët. Prandaj Reforma në Drejtësi do të bëhet. Projekti i Reformës në Drejtësi do të miratohet. Jo ai projekt që ka Edi Rama që në kokë, ai që ka pasur para dy vjetësh dhe e mban peng se do të realizojë krijesën e vet, por do të realizohet Reforma në Drejtësi siç e kërkon Komisioni i Venecias, sigurisht që në ditët në vijim mbasi të mbarojë edhe vendimi politik i grupit parlamentar, ndërkohë që edhe gjatë kësaj jave ekspertët e Partisë Demokratike do të vazhdojnë të punojnë me ekspertët ndërkombëtarë për të përpunuar draftin e amendamenteve kushtetuese dhe draftin e ligjeve të tjera, të cilat kanë të bëjnë me komponentin antikorrupsion. Draftin e ligjeve për Byronë Kombëtare të Hetimit, draftin e ligjeve për SPAK-un, draftin e ligjeve për kontrollin e gjithë gjyqtarëve dhe prokurorëve. Në ditët në vijim do të jetë punë e Komisionit të Reformës në Drejtësi që duhet të miratojë një projekt që ta mbajë drejtësinë larg Edi Ramës.

Komisioni Qendror i Zgjedhjeve i bëri thirrje publike deputetëve, ministrave, kryebashkiakëve dhe anëtarëve të këshillave bashkiake që të respektojnë afatin ligjor për vetëdeklarimin e të shkuarës së vet në kuadër të ligjit “Për garantimin e integritetit të personave që zgjidhen, emërohen ose ushtrojnë funksione publike”, i njohur më së shumti si ligji për dekriminalizimin.
Zëdhënësja e KQZ, Drilona Hoxhaj, deklaroi se afati final për plotësimin e formularit është data 4 maj, por deri tani, vetëm 255 nga 1,836 zyrtarët subjekt i ligjit, e kanë plotësuar deklaratën.
“Komisioni Qendror i Zgjedhjeve, në vlerësim të faktit se afati përfundimtar për dorëzimin e formularëve të vetëdeklarimit, është data 4 maj 2016 dhe numri i subjekteve që ende nuk e kanë dorëzuar, është i konsiderueshëm, kërkon mirëkuptimin e tyre për ta dorëzuar sa më parë formularin, duke pasur në vëmendje;
formulari duhet të plotësohet me kompjuter, me përjashtim të emrit e mbiemrit dhe nënshkrimit (në fund të çdo faqeje) që duhet të plotësohen me shkrim dore;
formulari, pasi të jetë plotësuar e printuar, nënshkruar, të depozitohet në KQZ personalisht (dorazi) nga secili funksionar që ka detyrimin për të dorëzuar formularin e vetëdeklarimit.
Formulari i vetëdeklarimit ndodhet në faqen zyrtare të internetit të KQZ-së, www.cec.org.al dhe është i aksesueshëm për të gjithë”, deklaroi Hoxhaj.
Zyrtarët duhet të deklarojnë nëse kanë qenë ndonjëherë të arrestuar brenda apo jashtë Shqipërisë dhe nëse kanë qenë ndonjëherë të dënuar.
Në rast se gënjejnë në vetëdeklarim, zyrtarët mbajnë përgjegjësi penale. Në rast se rezultojnë të dënuar për disa lloje krimesh të rënda, do të duhet të dorëzojnë mandatin.
Në përfundim të vetëdeklarimit, institucionet do të kryejnë verifikimet e vërtetësisë, një proces tjetër delikat.
Debati mbi pastrimin e politikës nga elementë me të shkuar kriminale lindi gjatë vitit 2014, kur Partia Demokratike në opozitë deklaroi se në radhët e mazhorancës, një numër zyrtarësh kanë qenë më parë të dënuar. Njëri nga deputetët e Partisë Socialiste, Arben Ndoka, dha dorëheqjen pasi u ekspozua për një dënim për trafik qeniesh njerëzore në Itali. Ai deklaron se dënimi i tij ka qenë gabim dhe se ai është i pafajshëm. Deputeti i Partisë Kristian Demokrate Mark Frroku dha dorëheqjen, pasi u arrestua për llogari të drejtësisë belge ku po gjykohet i dyshuar për vrasje. Frroku deklarohet i pafajshëm.