8.5 C
Tirana
E enjte, 1 Maj, 2025
type here...

Qyteti Pastërma

Nga Edison Ypi

Roma “Qytet i përjetshëm”, Londra “Qytet i lagur”, Praga “Qytet që këndon”, Mitrovica “Qytet i therur”, Lekoviku “Qytet i vdekur”, e kështu me rradhë ka “Qytet që vallzon”, “Qytet që qan”, “Qytet i plagosur”, “Qytet i vrarë”, etj etj.
Berati nuk ngjan me asnjë. Berati është “Qytet Pastërma”.
Shqotat e Historisë, rrebeshet e kohës, pushtimet, mbijetesa, i nxehti i beharit, i ftohti i dimrit, shirat e vjeshtës, erërat e luginës, ishin zjarri i ngadaltë që Beratit i hoqi tepricat, kërrcet, dejet, dhjamrat, Beratin u tha, Berati mbeti kock e palcë, me Kala guri, shtëpi mbi shkëmb, rrugica me kalldrëm, mish pa dhjamë, qytet i shijshëm, Qytet Pastërma.
Berati ndodhet ku lumi, pasi merr një kthesë të fortë si Wagner i vrënjtur, del në fushë Paganin i krisur.
Te ajo kthesë dhe ai brryl, Eteri apo Ethiri, krijon shtjella, që janë shkaku që në Berat buçet jeta: turbullohen mendjet, çakërdisen interesat, therin njëritjetrin, shkruajnë libra, llafosen sikur kanë ngrënë bythë turtulli, bëjnë karrierë, pasurohen.
Kur nisesh për Berat, sakën se merr buk me vete, libra, vargje përmendësh, plagë të pashëruara, ëndërra të thyera, nostalgjira lotnsjellëse, kujtime të vdekura. I gjen të gjitha në Berat. Ku Zoti nuk i besoi askujt. E bëri çdo gjë vet: Të natyrshëme si mali përballë, si retë në qiell, si lumi që i rrjedh te këmbët e Beratit duke e bërë aq mahnitës sa askënd nuk e lë indiferent.
Cili ishe, cili je, cili do jesh ? Këto nuk i gjen dot vet. Berati do t’i thotë në vesh.
Berati i thatë si pastërma, nuk ka asgjë madhështore, kolosale, ngadhnjimtare, heroike, triumfuese. Berati nuk ka fituar luftra, nuk ka bërë kryengritje, nuk ka kryevepra nëpër mure ekspozitash, nuk ka muzeume me statuja të gdhendura nga mjeshtra, nuk ka ndërtime gjigande, autostrada, ura tunele. Banorët e Beratit nuk kanë qënë shkencëtarë me famë, shpikësa të dëgjuar, artistë me nam. Berati të tillë s’ka, të tillë nuk i duhen. Beratit i mjafton pastërmaja. Berati ka njerëz që shohin punën e vet, mbajnë shtëpinë e vet, mbarsin gruan e vet. Berati është një mbijetues gjenial.
Kur i afrohesh nga Lushnja, Beratin sapo e sheh, ndjen si të rreh zemra, të merren mentë, të djersitet balli, të vjen rrotull bota. Sapo e prek, ngjitesh në qiell, rrëshket në ekstazë, bie në jerm, mbështillesh me ëndërr.
Sado pak, sado shkurt, edhe vetëm gjatë një rrahje zemre, ose vetëm një mbushje mushkërie, po preke Beratin, ke prekur Historinë. Je sëmurur pashërim me Mangalem, Kala, Goricë, Tomorr, Shpirag, Myzeqe.
Pa teprica, pa dëngla, pa mbeturina, pa dhjamra, pa yndyrna, Berati është vend ideal shërimi për ata që u dhemb koka, nuk i zë gjumi, janë me diabet, nuk u mbushet si duhet mushkria, nuk u pompon si duhet zemra.
Berati është fryt i një mardhënie milenare mes njeriut që i jep gurit jetë, dhe gurit që e bën njeriun kalldrëm.
Duke j’u afruar Beratit, i largohesh banalitetit, hidhesh përtej murit, ndodhesh jashtë të këtushmes dhe të tashmes.
Oratorët që i flasin kallaballëkut në Berat, sidomos në muzg, pas dhjetë minutash u zmadhohen sytë, zverdhen në surrat, bien në delir, ndodh vetëm në Berat.
Në Berat çdo mur është një pergamenë e shkruar me kod, kodin e mori një prift e hodhi në Osum. Çdo gur kalaje është një vrasje pas shpine. Çdo gur kalldrëmi është një dramë. Çdo sokak një çmendinë. Çdo dritare një tragjedi. Çdo djalë një Romeo. Çdo vajzë një Xhulietë.
Berati nuk ka asgjë të re. Në Berat gjithçka është e vjetër, e ndryshkur, e shtrembër, me një këmbë në varr, gati për të vdekur. Diçka e re në Berat është e pamundur si një beb i vjetër i sapolindur.
Vjetërsia është e vetmja gjë që Berati nuk e negocion. Kurrë. Në asnjë rrethanë. Për asnjë çmim. As kur i vërsulen pesqint vampirë ta trembin, dyqind djaj ta rrahin, treqint ujq ta kafshojnë, njëqint kuçedra ta shqyejnë.
Berat nuk është i bukur. Berati është i fundbotshëm. Berati është magji, fantazi, përrallë.
Kala, lumë, ullinj, qershi, beratas që llafosen shumë, janë libri që të përpin, filmi që të marros, magjia që të shëron, pastërmaja që Berati ofron.
Berati është kokrriza e rërës që vuajti miliona vjet brenda guackës, derisa u bë perlë, pastaj pastërma.

Inflacioni me metodologjinë e Eurostat: Çmimet e ushqimeve dhe shërbimeve arsimore me rritjen më të lartë në qershor

Matja e inflacionit sipas metodologjisë së Eurostat nga indeksi i Harmonizuar i Çmimeve të Konsumit në muajin Qershor 2024 ishte 2,5%. Ky rezultat ishte më i lartë se matjet kombëtare, të cilat për të njëjtin muaj rezultuan 2.1%.

Sipas Eurostat, rritja më e madhe e çmimeve prej 3,8% vërehet në grupin “Shërbimi arsimor”, pasuar nga grupet “Ushqime dhe pije joalkoolike” me 3,7%, “Veshje dhe këpucë” me 3,0%, “Pije alkoolike dhe duhan” me 2,9%, “Mobilim, pajisje shtëpie dhe mirëmbajtje” me 2,6%, “Mallra dhe shërbime të ndryshme” me 2,5%, “Shëndeti” me 2,4%, “Hotele, kafene dhe restorante” me 2,3%, “Qira, ujë, lëndë djegëse dhe energji” me 1,6%, “Argëtim dhe kulturë” me 0,7%, “Transporti” dhe “Komunikimi” me 0,2% secili.

Në muajin Qershor 2024, ndryshimi mujor i matur nga indeksi i Harmonizuar i Çmimeve të Konsumit është -0,2%. Ky ndryshim është ndikuar kryesisht nga ulja e çmimeve të grupit “Ushqime dhe pije joalkoolike” me 0,5%, pasuar nga “Argëtim dhe kulturë” me 0,4%, “Transporti” me 0,2%, “Qira, ujë, lëndë djegëse dhe energji” dhe “Shërbimi arsimor” me 0,1% secili.

Nga ana tjetër, çmimet e grupit “Veshje dhe këpucë” u rritën me 0,3%, pasuar nga grupet “Pije alkoolike dhe duhan” dhe “Mobilim, pajisje shtëpie dhe mirëmbajtje” me 0,2 % secili, “Mallra dhe shërbime të ndryshme” me 0,1%.

Në BE inflacioni mesatar ishte 2.6% në qershor. Nivelin më të lartë të rritjes së çmimeve e kishte Belgjika, Rumania dhe Islanda me mbi 5% dhe nga ana tjetër rritja ishte më ulët në Finlandë, Itali dhe Lituani me më pak se 1%.

Për të ndihmuar hartimin e politikave dhe për të realizuar një krahasueshmëri sa më të mirë me vendet e tjera, në bashkërendim me Eurostat, INSTAT ndërmori hapa në drejtim të krijimit të një baze të përbashkët metodologjike të shteteve anëtare për ndërtimin dhe përdorimin e IHÇK-së, sipas Rregullores së Këshillit Europian (KE), nr. 2494/95, të datës 23 tetor 1995.

Inflacioni i Eurozonës matet mbi bazën e treguesit të IHÇK-së. Termi “i harmonizuar” nënvizon faktin që të gjitha vendet e BE-së zbatojnë të njëjtën metodologji në matjen e treguesit përkatës.

Ndryshimet e kontributit nga një tregues në tjetrin lidhen me faktin se kompozimi i peshave të mallrave brenda grupit “Ushqime dhe pije joalkoolike” është i ndryshëm nga një tregues në tjetrin.

Kështu, brenda këtij grupi, nëngrupi “Fruta – Perime”, ka një peshë më të madhe te shporta e IHÇK-së (12.84% e shportës totale) sesa tek ajo e iÇK-së (8.44% e totalit).

Për shkak të këtij ndryshimi, kontributi i këtij grupi mallrash te totali është i barabartë me 2.5 pikë përqindje në rastin e treguesit IHÇK dhe me 1.2 pikë përqindje në rastin e iÇK-së. Ndryshime të vogla në kontribute vihen re edhe në disa grupe të tjera, por jo në madhësinë e ndryshimit të rastit të mësipërm.

Në përfundim, nëngrupi “Fruta-Perime”, ka krijuar 1.3 pikë përqindje ose më shumë se 80% të diferencës së inflacionit të matur sipas dy treguesve (3.84% kundrejt 2.38%).

Zërat e shportave përkatëse në rastin e Shqipërisë IÇK-ja përmban 332 zëra; IHÇK-ja përmban 331 zëra (qiraja e imputuar nuk është element i shportës).

IÇK-ja mbulon vetëm shpenzimet familjare private shqiptare të kryera, brenda territorit të vendit. Burimi kryesor i të dhënave për shpenzimet (“peshat”) është Anketa e Buxhetit të Familjeve (ABF); IHÇK-ja mbulon të gjitha shpenzimet e kryera brenda territorit të vendit nga familjet shqiptare, si dhe shpenzimet e vizitorëve rezidentë dhe jorezidentë.

Burimi kryesor i të dhënave për shpenzimet (“peshat”) janë Llogaritë Kombëtare “Shpenzimet Monetare të Konsumit Final të Familjeve (HFMCE)”.

 

Për faqezinjtë në Jug dhe qeverinë, që faqen e ka bërë shollë me kohë

Nga Klodian Tomorri

Në fillim të këtij viti, autoritetet gjyqësore në Bangladesh dënuan me 6 muaj burg nobelistin Muhammad Yunus. I pagëzuar si bankieri i të varfërve, Yunus është ndoshta një nga personalitetet me kontributin më të madh në botë për uljen e varfërisë. Kompanitë e tij të mikrokreditit social kanë nxjerrë me miliona njerëz nga varfëria në planet. E megjithatë arsyeja zyrtare që e çoi në burg ishin kushtet e vështira të punonjësve në kompanitë e drejtuara prej tij.

Pak ditë më parë, një gjykatë në Milano vendosi kompaninë e famshme të modës Christian Dior nën vëzhgim gjyqësor. Arsyeja e vendimit ishin sërish kushtet e punonjësve nga vendet e treta, të cilët flinin në fabrika dhe punonin me tre turne.

Shpërblimet e punonjësve, përfitimet dhe kushtet e punës caktohen në marrëdhënie kontraktuale dy palëshe mes tyre dhe punëdhënësve. Por kur fuqia negociuese është e zhvendosur më shumë në njërin nga krahët, atëherë pala tjetër e pëson. Ky është rasti kur nevojitet veprimi qeveritar.

Në Shqipëri, aktualisht një nga frontet më të mëdha të punësimit është industria e turizmit. Për shkak se kjo industri është punë intensive, në pamundësi për ta plotësuar kërkesën me banorët lokalë, shpesh bizneset marrin punonjës nga zona të tjera.

Në Jug të Shqipërisë sot pjesa më e madhe e kamarierëve, banakierëve, apo punonjësve të tjerë të shërbimeve turistike vijnë nga zona të tjera të vendit. Kjo ka krijuar një problem të mprehtë. Kushtet çnjerëzore të punës.

Një pjesë e madhe e punëtorëve migratorë flenë në trailera, barraka dhe kontenierë, të cilët nuk kanë as kushtet më minimale higjenike. Fenomeni është masiv dhe mund të dëshmohet lehtësisht nga kushdo. Përveçse qeverisë.

Ministrja e turizmit, e cila është bërë si baresha që numëron çdo ditë delet kur hyjnë në vathë- kjo numëron numrin e turistëve, paradite, pasdite dhe në mbremje- nuk ka sy të shohë fenomenin e turpshëm.

Gjobaxhinjtë e inspektoriatit të punës, po ashtu me sa duket nuk i shohin barrakat dhe kontenierët e mbushur me njerëz, që detyrohen të shkojnë aty nga pamundësia e tyre ekonomike dhe babëzia e pronarëve të tyre. Këta të fundit i kanë paratë, sepse po fitojnë tani më shumë se kurrë, por nuk duan të ndajnë hisen me të tjerë. Pastaj ankohen se nuk gjejnë dot punonjës.

Ky është një turp që duhet të marrë fund. Shqiptarët nuk mund të jetojnë në vendin e tyre pa dinjitet dhe në kushte që janë të tmerrshme edhe për vendet e botës së tretë. E kanë bërë dikur, kur detyroheshin të merrnin rrugët e kurbetit dhe të flinin në kanikët e Greqisë. Por jo në vendin e tyre.

Dhe ky duhet të jetë shqetësimi kryesor i bareshës që hedh valle poshtë e përpjetë nëpër Shqipëri dhe shefit të saj që numëron çdo orë makinat në tunelin e Llogarasë dhe pasagjerët në Aeroportin e Rinasit./Kapital.al

Drejtoi për 16 vjet Gjermaninë/ DW: Angela Merkel, figurë simbol për Evropën! Çfarë dihet sot në 70-vjetorin e saj

Kur Angela Merkel, kancelarja e parë dhe deri tani e vetme e Gjermanisë, u zgjodh për herë të parë në këtë post, askush nuk besonte ajo do të drejtonte për 16 vjet me radhë fatet e vendit. Merkel mbush tani 70 vjeç.

Kur Angela Merkelu zgjodh në vitin 2005 si kancelarja e parë e Republikës Federale të Gjermanisë, nuk ishin të paktë zërat që dyshonin, nëse ajo e kishte vërtet vullnetin për postin e kancelares. Askush nuk besonte në atë kohë se pikërisht Merkel do të ishte për 16 vjet me radhë kancelare e Gjermanisë. Para saj këtë e kishin arritur vetëm dy kancelarë: Konrad Adenauer i CDU-së (në vitet 1949-1963) dhe Helmut Kohl po i CDU-së, (1982-1998).

Por Merkeli nuk u bë rastësisht e “ashtu si për të thënë” kancelare e Gjermanisë. Dëshirën e saj për pushtet, ajo e ka treguar që herët. Në mes të skandalit së donacioneve të Partisë Kristiandemokrate, CDU, ajo e kritikoi hapur në një artikull gazete mentorin e saj politik, Helmut Kohlin. Pak kohë pas artikullit ajo u zgjodh kryetare e partisë CDU. Më parë ajo kishte mbledhur përvojë si ministre në kabinetin e Kohlit.

Merkeli dhe CDU-ja

Politika ka nevojë për pushtet. Këtë ajo e dinte mirë dhe prandaj ndryshoi edhe shumë elementë programatikë të partisë CDU duke e orientuar atë më afër qendrës së spektrit politik. Temat si shërbimi i detyruar ushtarak, energjia bërthamore dhe modeli i një familjeje klasike, që ishin dikur bërthama e bindjeve kristiandemokrate, Merkeli i ndryshoi. Në vitin 2011 ajo shpalli edhe heqjen dorë graduale të Gjermanisë nga energjia bërthamore.

Kritikët thonë se ajo e ka sfumuar profilin e partisë, e ka bërë CDU-në më shumë social-demokrate. Disa anëtarë të CDU-së madje krijuan një parti të re, “Alternativa për Gjermaninë”. Por tek të rinjtë kursi i Merkelit duket se gëzonte simpati.

Figurë simbol për Evropën

Instinkti i saj për pushtet, mjeshtëria e saj taktiko-strategjike dhe aftësia për t’u përshtatur, e bënë Merkelin edhe një nga politikanet më të rëndësishme të Europës dhe të Gjermanisë.

Si në samitet e G7-s apo në samitet e BE-së Merkeli ishte mbrojtëse e fortë e interesave gjermane në arenën ndërkombëtare. Gjatë krizës ekonomike dhe financiare të Europës Merkeli u kthye në një figurë simbolike të shpëtimit të euros.

Angela Merkel dhe refugjatët

Në tetor 2022 Komisariati i OKB-së për refugjatët UNHCR i dha ish-kancelares Angela Merkel çmimin e njohur Nansen për politikën e saj ndaj refugjatëve.

Për qëndrimin ndaj refugjatëve, hapjen e kufijve në vitet 2015 dhe 2016 dhe veçanërisht për sloganin e saj “Ne do t’ia dalim” Merkel u kritikua shumë në Gjermani.

Në kulmin e luftë së Sirisë Gjermania pranoi më shumë se 1,2 milionë refugjatë dhe azilkërkues.

Jetë në dy shtete gjermane

Merkel është lindur më 17 korrik 1954 në Hamburg, në ish-Gjermaninë Perëndimore. Merkel është me prejardhje gjermane dhe polake. Pas lindjes së saj i ati që ishte prift protestant u emërua në një kishë në landin e Brandenburgut, që asokohe ishte në ish-Gjermaninë Lindore.

Në kujtimet e saj me titull “Liria – Kujtime 1954 – 2021”, që do të botohet në nëntor, Merkel rrëfen për “jetën e saj në dy shtete gjermane – 35 vjet në ish-Gjermaninë Lindore dhe 35 vjet në Gjermaninë e ribashkuar.

Merkel është gruaja e parë dhe deri tani e vetmja që ka qenë kancelare e Gjermanisë. Megjithatë pas largimit të saj nga politika trashëgimia e Merkelit është përballur me kritika, veçanërisht për qasjen e saj ndaj Moskës si dhe varësisë së Gjermanisë ndaj gazit rus./DW

Parandalohet ngjarja tragjike në Shkodër, 27-vjeçarja tenton të hidhet në lumin Bunë me 4 fëmijë të mitur

Një ngjarje tragjike është parandaluar nga policia në Shkodër, pasi një 27-vjeçare ka tentuar të hidhet në lumin Bunë bashkë me katër fëmijët e saj të mitur.

Policia bën me dije se ngjarja ka ndodhur rreth orës 14:15, kur blutë janë njoftuar se e reja po tentonte të hidhej në lumin Bunë, bashkë me 4 fëmijët e saj, 7, 5, 3 dhe 1 vjeç.

Mësohet se 27-vjeçarja dhe fëmijët e saj u shoqëruan në ambientet e Komisariatit të Policisë Shkodër, ndërsa grupi hetimor vijon punën për sqarimin e rrethanave të rastit.

Njoftimi i policisë

Ndërhyrja e Policisë parandaloi një ngjarje të rëndë.

Tentoi të hidhej në lumin Buna, bashkë me 4 fëmijët e saj të mitur, falë ndërhyrjes së shpejtë nga patrulla e përgjithshme që patrullonte në zonë, pengohet 27-vjeçarja.

Menjëherë pas marrjes së njoftimit, rreth orës 14:15, se një shtetase po tentonte të hidhej në lumin Buna, bashkë me 4 fëmijët e saj, shërbimet e Policisë që patrullonin në zonë, kanë ndërhyrë duke penguar 27-vjeçaren, e cila po tentonte të hidhej në lumë, bashkë me 4 fëmijët e saj 7, 5, 3 dhe 1 vjeç.

27-vjeçarja dhe fëmijët e saj u shoqëruan në ambientet e Komisariatit të Policisë Shkodër.

Grupi hetimor vijon punën për sqarimin e rrethanave të rastit.

Kujtojmë se një ngjarje tragjike ndodhi pak muaj më parë në Shkodër, ku Alma Arrazi ndërmori aktin e rëndë duke u hedhur sipas autoriteteve në lumë bashkë me tre fëmijët e saj të mitur, e duke humbur jetën.

Trupat e pajetë të tyre u gjetën pas disa ditësh kërkime, ndërsa dyshimet për ndërmarrjen e një akti të tillë, lidheshin më problemet që Alma kishte me bashkëshortin e saj.

Basha përkujton poetët Leka e Blloshmi të ekzekutuar nga Komunizmi: Shqipëria nuk mund të jetë më Saharaja, shqiptarët meritojnë një jetë më të mirë

Kryetari i Demokratëve Euroatlantikë, Lulzim Basha, ka përkujtuar dy poetët Genc Leka dhe Vilson Blloshmi, të cilët u ekzekutuan nga regjimi komunist.

Në një postim në facebook, Basha shkruan se ekzekutimi i poetëve martirë është damka e përgjakshme e regjimeve xhahile, është sakrifica sublime e korifenjve të ndryshimit, që kanë forcën shpirtërore dhe morale për t’i qëndruar përballë të keqes, edhe kur ajo duket e pakapërcyeshme, edhe kur ajo të rrëmben rininë dhe jetën.

Ai më tej shkruan se Shqipëria nuk mund të jetë më Saharaja, pasi shqiptarët dinë të ëndërrojnë një jetë më të mirë dhe meritojnë ta kenë.

Postimi i plotë i Bashës:

47 vjet më parë diktatura komuniste vrau mizorisht Genc Lekën dhe Vilson Blloshmin, poetët që rrezatonin në terrin e regjimit, errësira e të cilit nuk toleronte guximin, krijimtarinë dhe lirinë që vepra e tyre përcillte në shkretëtirën e krijuar përmes dhunës së egër dhe frikës.

Ekzekutimi i poetëve martirë është damka e përgjakshme e regjimeve xhahile, është sakrifica sublime e korifenjve të ndryshimit, që kanë forcën shpirtërore dhe morale për t’i qëndruar përballë të keqes, edhe kur ajo duket e pakapërcyeshme, edhe kur ajo të rrëmben rininë dhe jetën.
Por vjen një moment, që kurrë nuk harron, kur vuajtja kthehet në revoltë, dhe guximi i Gencit dhe Vilsonit frymëzon, siç ka frymëzuar përherë brezat për t’i qëndruar me çdo kusht përballë regjimeve.

Vepra e tyre bëhet e madhe dhe e pavdekshme me kalimin e viteve, sepse siç sfidonte kastën njëngjyrëshe të regjimit komunist, nxit të gjithë ne, e në veçanti të rinjtë, të sfidojmë kastën e kameleonëve të tranzicionit, që ricklon me mjete të reja regjimin e vjetër dhe mbetjet e tij. Shqipëria nuk mund të jetë më Saharaja, shqiptarët dinë të ëndërrojnë një jetë më të mirë. Dhe meritojnë ta kenë.

Mirënjohje përjetë Vilson Blloshmit dhe Genc Lekës! I pavdekshëm qoftë kujtimi i tyre!

Merret vendimi, ndalohet shitja e cigareve elektronike për moshën nën 18 vjeç!

Shitja e produkteve të duhanit, cigareve, cigareve elektronike dhe shishave të nargjileve do të jetë e ndaluar për të gjithë personat nën moshën 18 vjeç. Komisioni Parlamentar i shëndetësisë ka diskutuar dhe miratuar nismën e deputetëve Erion Braçe dhe Etilda Gjonaj, e cila synon mbrojtjen e të miturve nga krijimi i varësisë ndaj duhanit dhe cigareve elektronike. Ndryshimet ligjore të propozuara synojnë gjithashtu të ndalojnë reklamimin e tyre direkt dhe indirekt si dhe tregtimin e tyre me ofertë.

Deputeti Erion Braçe ka theksuar se me qëllim zbatimin e kësaj nisme, përgjegjës për këtë duhet të jenë kompanitë e mëdha të distribucionit të këtyre produkteve si dhe supermarketet e mëdha. Nga ana tjetër theksoi se edhe këto produkte duhet të përfshihen në taksim.

“Duhet te ngarkojmë me përgjegjësi kompanitë e mëdha të distribucionit , ata duhet të ngarkohen me përgjegjësi se ku shitet, supermarketet e mëdha të mbajnë përgjegjësi, sot nuk ka asnjë tabel nëpër supermarkete”.

Ligji parashikon forcim të sanksioneve administrative për shkelësit e ligjit si dhe ndalimin e reklamimeve dhe sponsorizimeve edhe në kanalet mediatike.

“Është dikush që bëhet me një legen…”, si nxirreshin emrat e informatorëve të policisë tek Pëllumb Gjoka

Një pjesë e konsiderueshme e rrjetit sekret informativ në Policinë e Shkodrës, tradhëtohej nga vetë policët e kësaj drejtorie, të cilët informonin Pëllumb Gjokën dhe lidhjet e Behar Bajrit, se kush informonte strukturat e policisë për veprimtarinë e grupit.

“…është dikush që bëhet me një legen që më jep informacion mua, ta s’qaroj kur të takoj. Po ai legeni ngeli duke folë për ty, e ke parasysh të ka bërë padrino…”-i thotë Hasanbegaj, Pëllumb Gjokës.

Mes shumë bisedave që janë zhvilluar në “Sky” mes Gjokës dhe Ardit Hasanbegaj, ky i fundit e informon Pëllumb Gjokën se ka vënë disa numra në përgjim, të cilët mendohen se janë në përdorim nga Ibrahim dhe Muhamed Lici, dy vëllezërit në Shkodër që ishin piketuar për tu vrarë.
“…Ishalla të mbajë këtë numër ai motër q***, edhe mbarojmë punë. Ai tjetri që kemi çuar për përgjim e ka ai i vogli, është konfirmuar. Po flet rrallë, shumë rrallë…”-i thotë Pëllumb Gjokës, Ardit Hasanbegaj.

Ndërkohë në 20 Gusht 2020, Hasanbegaj informon Pëllumb Gjokën se kishte pyetur një Suad Lici nga Velipoja, pasi ai ishte paraqitur në polici për të bërë një kallëzim penal.

Në atë kohë mësohet se Suad Licit, i kishin vendosur një gjobë financiare dhe ai kishte bërë denoncim në polici, për ta ndjekur problemin me shtet.

“…Ore po një Suad Lici, ka në Velipojë? Suadin e kam pyetur…” i shkruan Pëllumbit, zv/drejtori i policisë Shkodër Ardit Hasanbegaj.

Pëllumbi ia kthen “…jo në Velipojë…”.

Ndërkohë Hasanbegaj vijon duke i thënë si më poshtë vijon:

“…Mos është kasap? A ka kështu thertore? Të kuptoj, të sqaroj unë..jo jo qënka një Lici tjetër, ngatëroj emër. Është dikush që bëhet me një legen, që më jep informacion mua. Të s’qaroj unë kur të takoj. Po ai legeni ngeli duke folë për ty. E ke parasysh, të ka bërë padrino. Por pashë që kishte komunikim me një mbiemër Lici dhe thashë ç’ne ky me këta…”.

Kjo dhe shumë biseda të tjera tregojnë se ndikimin që kishte Pëllumb Gjoka, tek administrata e Policisë së Shkodrës, të cilët informonin në mënyrë të rregullt Gjokën jo vetëm për kallëzimet dhe njerëzit që pyeteshin për hetime të ndryshme, por informacionet shkonin dhe deri tek rrjeti i informatorëve të Policisë së Shtetit.

Rihapi hetimet për “21 Janarin”, SPAK thërret bashkëshorten dhe xhaxhain e Aleks Nikës, ja kur do të paraqiten në Prokurorinë e Posaçme

SPAK ka thirrur bashkëshorten dhe xhaxhain e Aleks Nikës pasi rihapi hetimet për çështjen e “21 Janarit”.

 

Rajmonda Nika dhe xhaxhai i bashkëshortit të saj të ndjerë janë thirrur në cilësinë e kallëzueses.

Ata do të paraqiten në ambientet e SPAK të hënën, më 22 Korrik.

Prokuroria e Posaçme regjistroi ditën e djeshme (16 Korrik) procedimin penal për dosjen e 21 janarit, ku gjatë protestës së asaj kohe u vranë 4 qytetarë të pafajshëm.

Procedimi ka nisur për vrasjen e Aleks Nikës si dhe plagosjen e shtetasve Artes Dybeli, Ilia Qesko dhe Ilia Papa.

Me anë të një njoftimi, SPAK thotë se ka regjistruar procedimin penal për “vrasje në rrethana të tjera cilësuese” e kryer në bashkëpunim, “shpërdorim detyre” dhe “Kryerja e veprimeve që pengojnë zbulimin e së vërtetës”.

SPAK thote se ka vendosur “Përcaktimin e kompetencës lëndore për hetimin e procedimit penal nr.285, të vitit 2011, të regjistruar në Prokurorinë pranë Gjykatës së Shkallës së Parë të Juridiksionit të Përgjithshëm, Tiranë, duke caktuar si prokurori kompetente Prokurorinë e Posaçme kundër Korrupsionit dhe Krimit të Organizuar.”

Njoftimi: 

Nisur nga interesimi i vazhduar i medias dhe publikut njofotjmë se, Prokuroria e Posaçme kundër Korrupsionit dhe Krimit të Organizuar në datën 15.07.2024 ka regjistruar procedimin penal nr.138, të vitit 2024, për veprat penale:

  • “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, e parashikuar nga neni 79 gërmat “dh” dhe “ë”, si dhe 25 të Kodit Penal.
  • “Shpërdorim i detyrës”, e kryer në bashkëpunim, parashikuar nga nenet 248 dhe 25 të Kodit Penal;
  • “Kryerja e veprimeve që pengojnë zbulimin e së vërtetës”, e kryer në bashkëpunim, parashikuar nga nenet 301 dhe 25 të Kodit Penal.

Ky procedim penal është regjistruar në lidhje me ngjarjen e datës 21.01.2011, të ndodhur në Bulevardin “Dëshmorët e Kombit”, në Tiranë, ku gjatë një mitingu të organizuar nga opozita politike e asaj kohe përpara Kryeministrisë, është vrarë shtetasi Aleks Nika, si dhe janë plagosur shtetasit Artes Dybeli, Ilia Qesko dhe Ilia Papa.

Regjistrimi i këtij procedimi penal është bërë duke vlerësuar konkluzionet e vendimit Nr. 00-2024-1222 i Vendimit (69), datë 12.03.2024 të Kolegjit Penal të Gjykatës së Lartë (depozituar në sekratarinë e Prokurorisë së Posacme në datën 11.07.2024), si dhe duke qenë para detyrimit ligjor për zbatimin e këtij vendimi, me të cilin Prokuroria e Posaçme kundër Korrupsionit dhe Krimit të Organizuar është urdhëruar për të regjistruar procedimin penal për kallëzimin e datës 16.02.2023, të shtetases Rajmonda Nika, si dhe duke vlerësuar dhe mbajtur parasysh, sipas vendimit të Kolegjit Penal të Gjykatës së Lartë,  prononcimin e Gjykatës Evropiane për të Drejtat e Njeriut (GJEDNJ), (vendimi datë 14 Nëntor 2023 – çështja Nika kundër Shqipërisë), lidhur me rastin konkret, ku GJEDNJ në përfundim të çështjes ka konstatuar – shkelje të nenit 2, të Konventës Evropiane për të Drejtat e Njeriut, si në aspektin material ashtu dhe në atë procedural.

Në rastin konkret hetimi i veprave penale të parashikuara nga nenet 79, gërmat “dh” dhe “ë” e 25, 248 e 25, si dhe 301 e 25 të Kodit Penal, është në kompetencën lëndore të Prokurorisë së Posaçme, në bazë të nenit 75/a, gërma “ç” të Kodit të Procedurës Penale, pasi dyshohet se veprat penale mund të jenë kryer nga ish-funksionarë të lartë shtetërorë, gjatë ushtrimit të detyrës.

Duke vlerësuar informacionet e përftuara dhe të administruara se Prokuroria pranë Gjykatës së Shkallës së Parë të Juridiksionit të Përgjithshëm Tiranë ishte duke kryer veprimet hetimore në lidhje me procedimin penal Nr.285, vitit 2011, (i rifilluar), aktet e të cilit bëjnë fjalë për ngjarjen e ndodhur më datën 21.01.2011,  për vrasjen e shtetasit Aleks Nika dhe plagosjen e shtetasve Artes Dybeli, Ilia Qesko dhe Ilia Papa, si dhe pas njoftimit të datës 15.07.2024 të bërë nga prokurori i çështjes, në mbështetje të neneve 29 pika 3 dhe 75/a, me vendimin e datës 15.07.2024, Drejtuesi i Prokurorisë së Posaçme Kundër Korrupsionit dhe Krimit të Organizuar, ka vendosur ndër të tjera:

  1. Përcaktimin e kompetencës lëndore për hetimin e procedimit penal nr.285, të vitit 2011, të regjistruar në Prokurorinë pranë Gjykatës së Shkallës së Parë të Juridiksionit të Përgjithshëm, Tiranë, duke caktuar si prokurori kompetente Prokurorinë e Posaçme kundër Korrupsionit dhe Krimit të Organizuar.
  2. Kërkimin e akteve të procedimit penal Nr.285, të vitit 2011, nga Prokuroria pranë Gjykatës së Shkallës së Parë të Juridiksionit të Përgjithshëm, Tiranë.
  3. Njoftimin me këtë vendim të Prokurorisë pranë Gjykatës së Shkallës së Parë të Juridiksionit të Përgjithshëm, Tiranë, me qëllim dërgimin prej saj të akteve të procedimit penal Nr.285, të vitit 2011. 

Barcelona dëshiron 22-vjeçarin Nico Williams për të rivalizuar Kylian Mbappe tek Real Madrid, por ja çfarë bëhet pengesë

Barcelona ka një arsye shumë specifike pse dëshiron të bëjë pjesë të skuadrës Nico Williams. Ata e shohin anësorin si një opsion strategjik për të rivalizuar blerjen e Kylian Mbappe nga Real Madrid.

 

Është e rëndësishme të theksohet se ndërsa Barcelona është shumë e interesuar për Nico, Athletic Club e ka bërë të qartë se klauzola e tij për lirimin e tij prej 58 milionë euro duhet të paguhet plotësisht.

Kjo kërkesë financiare vendos një pengesë të lartë për çdo kërkues të mundshëm, përfshirë Barcelonën.

Ndër skuadrat e interesuara për Nico janë gjigantët e Premierligës Arsenal dhe Chelsea. Chelsea, në veçanti, ka treguar një interes afatgjatë për spanjollin.

Ata kanë monitoruar nga afër progresin e tij në Athletic Bilbao dhe paraqitjet e futbollistit e kanë vendosur atë lart në listën e objektivave të transferimit të Chelsea-t, veçanërisht në pozicionet e tyre prioritare.

1...891892893...8 268Faqja 892 nga 8 268

Kryesore

Continue to the category
Më shumë
© 2024 Rilindja Demokratike Euroatlantike