Prej kohësh, duket se produkti i vetëm i opozitës dhe kryesisht Rithemelimit të drejtuar nga ish-kryeministri Sali Berisha, është kaosi në Parlamentin e Shqipërisë.

I ftuar në “Sot Live në Shqipëri’ me Nertil Agalliun në Report Tv, analisti Namir Lapardhaja u shpreh se pamje të tilla janë zhgënjim për qytetarët, të cilët presin që të zgjedhurit e tyre të ngrenë zërin për problematikat që has vendi dhe jo vetëm për interesat personale.

“Është një shfaqje teatrale, të cilën fatkeqësisht shqiptarët po e ndjekin prej disa kohësh, Është një shfaqje që qoftë ai që  e inspiron, qoftë ai që kishte hipur në tavolinën e Parlamentit, atje ku deputetët duhet të flasin, shprehin hallet e tyre që kanë me drejtësinë, hallet e tyre penale.

Qytetarët shqiptarë presin nga politikbërësit e tyre që të përfaqësojnë interesat e tyre. Sot ishte seanca më e rëndësishme e vitit, ishte seanca e kalimit të buxhetit dhe një shfaqje e tillë, një teatër, nuk i shërben as demokratëve, sa qytetarëve shqiptarë, nuk i shërben askujt, nuk i shërben interesit publik”,– është shprehur Lapardhaja.

Lapardhaja shtoi se deklaratat e Berishës së po avancon në përballjen me kryeministrin Edi Rama janë një “vrimë në ujë”, pasi sipas tij demokratët dhe votuesit në përgjithësi, po e braktisin ish-kryeministrin çdo ditë e më shumë.

“Nga njëra anë Berisha thotë se unë po e realizoj revolucionin, nga njëra Berisha thotë që po marshoj drejt përballjes finale me Edi Ramën, por që nuk ka më as njerëz, nuk ka më as qytetarë, nuk ka më as demokratë. Edhe vetë deputetët e Rithemelimit nuk janë më entuziastë dhe nuk e ndjekin siç e kanë ndjekur më para në marrëzinë e tij”,- deklaroi analisti.

Ndër të tjera, Lapardhaja tha se të gjithë parlamentarët që ndjekin Berishën ndihen të frikësuar nga drejtësia, po ashtu si vetë ish-kryeministri.

“Ata qëllimisht kanë devijuar rrugën, kanë devijuar misionin, kanë devijuar aksionin politik, nga atë që duhet të bënin në atë që nuk duan të bënin. Në gjitha lëvizjet e Sali Berishës por edhe të atyre deputetëve që e ndjekin nga mbrapa, ajo që duket në pamje të parë është një gjë, dhe ajo që fshehin pas asaj që bëjnë është diçka tjetër. Deputeti që kishte hipur sot në tryezën e Parlamentit, zoti Salianji, ka një çështje penale, është dënuar në Gjykatën e Shkallës së Parë dhe gjyqi i Apelit mjafton të lërë në fuqi vendimin e shkallës së parë, zoti Salianji e humbet mandatin e deputetit, zoti Salianji vete në burg. Pra nuk është vetëm zoti Salianji, por janë dhe deputetë të tjerë. Të gjithë deputetët që i janë bashkuar Sali Berishës të gjithë kanë nga një hall personal. Sali Berishës i konvergon kjo sepse ai është hallexhiu më i madh në atë grupim”- tha Lapardhaja.

Revista më e madhe gjermane, Spiegel, shkruan se kjo është hera e tretë që politikani shqiptar, Flamur Noka, ndez flakë në parlament. Sipas revistës, kjo protestë vjen për shkak të hetimeve që po bëhen ndaj Sali Berishës. Më poshtë teksti i plotë:

Jo, ky nuk është një stadium futbolli. Përkundrazi, është parlamenti i Shqipërisë, një vend që aspiron të bëhet pjesë e Bashkimit Europian.

Të hënën, politikani opozitar, Flamur Noka, ndezi bomba tymuese, duke ndërprerë seancën plenare. Noka akuzon qeverinë socialiste të Edi Ramës se po përpiqet që të heshtë opozitën.

Por pas kësaj qëndron një përplasje në lidhje me një procedurë penale.

Në fund të tetorit u ngrit akuzë për Sali Berishën, i cili ashtu si Noka, i përket Partisë Demokratike. Gjatë kohës së tij si kryeministër, Berisha thuhet se ka abuzuar me pushtetin e tij për qëllime private për sa i përket një marrëveshje toke. Berisha nga ana e tij akuzon kryeministrin aktual, Rama se po e orkestron prokurorinë- dhe ka bërë thirrje për protestë.

Prandaj veprimi i zjarrtë i Nokës të hënën nuk është aq i pazakontë sa duket në fillim.

Skena të tilla kanë ndodhur vazhdimisht në javët e fundit, edhe më 20 nëntor, kur parlamenti duhej të votonte buxhetin e vitit 2024. Edhe këtu, Flamur Noka ishte pikërisht në ballë.

Tani, dy javë më vonë, ai duket se nuk është tërhequr nga shkëndijat. Pas tymit, Noka i vuri flakën edhe letrave.

Përpjekjet për t’u bërë pjesë e BE-së kanë vazhduar prej kohësh në Shqipëri: në vitin 2009, vendi aplikoi për anëtarësim. Negociatat zyrtare me Brukselin gjithashtu kanë nisur që nga viti i kaluar./Spiegel

Deputeti Dashamir Shehi i ftuar në studion e emisionit “Open” në News24, foli për kaosin e krijuar në Kuvend dhe situatën politike në vend.

Ai u shpreh se edhe vetë mazhoranca nuk po bën parlamentarizëm, referuar miratimit të buxhetit të vitit 2024 në vetëm 8 minuta, mes kaosit në Kuvend. Në lidhje me aksionin politik opozitar, Shehi tha se është një rrugë pa krye.

“Unë jam i opozitës dhe me takon të them që opozita ka të drejtë. Ky aksion opozitar mbërriti atë që duhet të bënte. E bëri mediatik problemin. Edhe ndërkombëtarët u kujtuan që s’ka jetë normale parlamentare. Kam dëgjuar që Berisha thotë se kjo është një rrugë pa kthim, kjo është rrugë pa krye. Sikur të ishim futur në sallë, do kishim folur, diskutuar dhe do ia bënim të qartë shqiptarëve se buxheti po ikën. Kjo i humbi opozitës.

E zëmë se opozita nuk dashka të bisedojë për buxhetin se quan këto gjëra si më të rëndësishme, por mazhooranca vetë po të donte të diskutonte për buxhet, por të kishin qasje tjetër do kishin diskutuar ata me njëri-tjetrin. Ata e shfrytëzojnë këtë moment, meqë këta vazhdojnë ndezin fishekzjarrë. Ne mund të jemi të këqijtë e botës, po ata vetë a kanë ndonjë dyshim se punët e buxhetit nuk janë bërë mirë. As ata nuk po bëjnë parlamentarizëm.

Jam plotësisht dakord për hapjen e komisioneve hetimore. Jeta parlamentare në Shqipëri ka kaluar situata më të vështira se kjo. Aksioni i opozitës as nuk e pengon rregulloren. Nuk ndërtohet një rregullore parlamentare për një situatë specifike. Rregullorja është rreshtuar se kush hyn me mjete teknike. Nuk është kjo rruga për të rindërtuar jetën parlamentare.”, u shpreh Shehi.

Kaosi i krijuar në politikën shqiptarë duket se ka bërë bujë përtej Atlantikut, pasi prestigjozja amerikane “The Washington Post” i ka kushtuar një analiza situatës në të cilën ndodhet vendi.

Media nga Ushingtoni raporton për kaosin e shkaktuar në senacat parlamentare si dhe Komisionet nga opozita, që tashmë e ka kthyer në traditë ndezjen e flakadanëve dhe zjarreve brenda sallave të Parlamentit.

Ndërkohë, në artikull theksohet se protestat e opozitës kanë nisur sapo ish-kryeministri Sali Berisha u mor nën hetim nga SPAK në lidhje me aferën e privatizimit të ish-kompleksit sportiv “Partizani.”

Artikulli i plotë i “The Washington Post”:

Për muaj të tërë, partitë opozitare shqiptare kanë përdorur flakë dhe zhurmë për të penguar Parlamentin, në shenjë proteste ndaj asaj që ata e përshkruajnë si sundim autoritar të Partisë Socialiste në pushtet.

Të enjten, ligjvënësit miratuan buxhetin vjetor dhe projektligje të tjera, pavarësisht pretendimeve të opozitës se socialistët e majtë kanë bllokuar ngritjen e komisioneve për të hetuar akuzat për korrupsion në qeveri.

Trazirat filluan në tetor pak përpara se prokurorët të akuzonin Sali Berisha, 79 vjeç, ish-kryeministër dhe president dhe tani kreu kryesor i Partisë Demokratike të qendrës së djathtë, për korrupsion mbi një skemë të blerjes së tokës që është nën hetim ligjor.

Parlamentarët e opozitës grumbullojnë rregullisht karriget, përdorin flakë, ndezin zjarre të vogla dhe madje kapin fizikisht mikrofonat kur homologët e tyre socialistë marrin fjalën. Socialistët në pushtet, të kryesuar nga kryeministri Edi Rama, kanë 74 nga 140 vendet në Parlament, të mjaftueshme për të miratuar buxhetin e 2024-ës me një votim tetë minutash dhe më pas mbylljen e seancës.

Pas 10 vitesh në opozitë, Partia Demokratike e qendrës së djathtë është dobësuar dhe thyer, me grupimin kryesor të kryesuar nga Berisha, politikani më jetëgjatë në Shqipërinë postkomuniste.

Në maj të vitit 2021 Berisha dhe anëtarët e familjes së tij u ndaluan nga Shtetet e Bashkuara të hyjnë në vend, e më vonë edhe në Mbretërinë e Bashkuar, për shkak të përfshirjes së tyre të dyshuar në korrupsion.

Kryeministri Rama thotë se Berisha po shfrytëzon atë që ka mbetur nga Partia Demokratike dikur dominuese për përfitimin e tij personal në betejën ligjore. Ndërsa më parë ai mund të mblidhte mijëra mbështetës në mitingje, Berisha tani është i kufizuar në ndërprerjen e seancave të Parlamentit.

NDONJË ZGJIDHJE NË SHQIPËRI?

Ligjvënësit e opozitës janë zotuar të shtojnë protestat e tyre, pa shpjeguar se si. Berisha ka bërë thirrje për “mosbindje civile”, por deri më tani vetëm Parlamenti është ndërprerë. Thirrjet për mitingje nuk kanë arritur të kthehen në realitet.

Nga ana e tyre, socialistët në pushtet po përpiqen të punojnë normalisht, duke vënë në dukje se Parlamenti ka miratuar buxhetin më të madh ndonjëherë, dy herë më i madh se viti 2013 kur demokratët u larguan nga pushteti.

Të dyja palët po ruajnë qëndrimin e tyre, pa asnjë shenjë për t’u ulur për të gjetur një zgjidhje, e cila në Shqipërinë postkomuniste shpesh ka ardhur vetëm pas ndërhyrjes së ndërmjetësve ndërkombëtarë.