Thomas Tuchel nuk është më trajneri i Borussias së Dortmundit. Verdhezinjtë kanë shkarkuar nga detyra 43-vjeçarin bavarez për shkak të problemeve që kishte me drejtuesit e klubit dhe sidomos me drejtorin ekzekutiv, Jans Joachim Watzke. Lajmi u bë zyrtar nga vetë klubi i Dortmundit. Sipas asaj që zbulon e përditshmja gjermane “Bild”, Tuchel i cili kishte kontratë me Borussian deri më 2018-tën do të përfitojë si dëmshpërblim një shumë prej 2,9 milionë eurosh.
Ish-trajneri i Mainz 05, largohet kështu nga Dortmundi pasi fitoi Kupën e Gjermanisë vetëm pak ditë më parë me verdhezinjtë që mundën në finalen e Berlinit, Eintrachtin e Frankfurtit. Në fakt drejtuesit e klubit nga “Signal Iduna Park” kishin programuar një takim me trajnerin Tuchel në përfundim të sezonit dhe pas këtij takimi dolën në vendimin për të shkarkuar nga detyra 43-vjeçarin për shkak të problematikave të shumta që kishte me Hans Joachim Watzke-n. Vetë Tuchel e kishte të qartë që do të largohet nga posti i trajnerit të Dortmundit që më herët, por ky i fundit vazhdoi aventurën e tij me verdhezinjtë duke fituar një tjetër trofe. Tashmë mbetet për t’u parë se cili do të jetë trajneri i ri i Borussias së Dortmundit.

Surprizon Arsenali. Drejtuesit e klubit anglez kanë arritur marrëveshjen me Arsene Wenger për t’i rinovuar edhe me 2 vite të tjera kontratën trajnerit francez. Mungon ende zyrtarizmi, por lajmi publikohet nga “BBC” në seksionin e saj të sportit dhe tashmë është i sigurtë qëndrimi i Wenger te Topçinjtë, me 67-vjeçarin, që në orët e ardhshme do të firmosë zyrtarisht kontratën e re, për të zgjatur edhe me 2 sezone të tjera qëndrimin e tij 21-vjeçar te Arsenali.
Edhe pse e mbylli sezonin në vendin e 5-të duke mos arritur të sigurojë kualifikimin në Champions League pas 20 vitesh, Wenger do të vazhdojë aventurën e tij te Arsenali, pasi drejtuesit besojnë shumë te aftësitë e francezit duke dalë edhe kundra tifozëve, të cilët kanë kërkuar largimin e Wenger. Suksesi 2-1 ndaj Chelsea-it, në finalen e FA Cup rriti kuotat e 67-vjeçarit për të qëndruar te Topçinjtë e Londrës. Arsenali nuk e fiton kampionatin anglez që prej vitit 2004, por kjo nuk e ka penguar pronarin Stan Kroenke t’i ofrojë rinovimin trajnerit Wenger. Në këto 21 vite karrierë me klubin londinez, 67-vjeçari francez e ka udhëhequr Arsenalin drejt fitimit të 16 trofeve, mes tyre edhe 3 titujve të Premier Leagues.

Ernesto Valverde emërohet trajneri i ri i Barcelonës. Konfirmimi vjen nga ana e presidentit të klubit blaugrana Josep Maria Bartomeu, i cili ka bërë publik emrin e teknikut që do të ulet në krye të stolit katalanas duke nisur që nga sezoni i ardhshëm i La Liga-s. Sipas asaj që bëjnë me dije mediat spanjolle, Valverde do të firmosë një kontratë dyvjeçare, që mund të zgjatet edhe me një vit në rast të arritjes së rezultateve pozitive. Prezantimi i ish-trajnerit të Athletic Bilbao do të bëhet ditën e enjte në ambientet e klubit të Barcelonës. Vendimi u mor pas mbledhjes së komisionit sportiv dhe këshillit administrues të katalanasve.
Ernesto Valverde në të kaluarën e tij ka drejtuar skuadrën greke të Olympiakos, Valencia, Villareal dhe Espanyol dhe në dy vitet e fundit atë të Atletic Bilbaos. Emri i teknikut 53-vjeçar është përmendur shpesh në ambientet e Barcelonës përgjatë dy viteve të fundit dhe tashmë ka ardhur momenti i tij. Valverde do të zëvendësojë të larguarin Luis Enrique, i cili drejtoi për tri sezone klubin blaugrana, por mungesa e rezultateve bëri që bashkëpunimi mes palëve të ndërpritet.
E përditshmja spanjolle “Marca” ka bërë një analizë, rreth asaj se çfarë duhet të ndryshojë ose të bëjë Valverde në Barcelonë. Spanjollin e presin punë shumë të vështira që në fillim, pasi i duhet të ndryshojë shtatë gjëra, të cilat do ta mbanin Barcelonën në vijë me skuadrat më të mëdha.
Shtatë gjërat që duhet të bëjë Valverde janë:
1. Ta rikthejë Barcelonën në krye të futbollit botëror – Barcelona e kohëve të fundit ka humbur vendin e parë në renditjen e UEFA-s dhe FIFA-s, pavarësisht se është në mesin e më të mirave.
2. Të vazhdojë me Iniestan – Mesfushori katalunas ende nuk ka vendosur rreth kontratës së re, por Valverde do të tentojë ta bindë Iniestan se ai është një lojtar i rëndësishëm në ekipin e tij.
3. Të zvogëlojë rëndësinë e MSN – Kur treshja e Barcelonës është në formë, ata fitojnë pa problem, por kur kjo treshe ka probleme, atëherë Barcelona vuan shumë dhe kjo i ka kushtuar këtë edicion.
4. T’i besojë akademisë – Barcelona kohëve të fundit shumë pak i ka besuar lojtarëve që kanë dalë nga akademia, pasi më shumë janë mbështetur në blerjet e mëdha.
5. Të menaxhojë Messin – Argjentinasi shumë shpejt do t’i bëjë 30 vjet dhe Valverdes i duhet të ketë kujdes me të dhe të reduktojë minutazhin e tij.
6. Të ofrojë një fytyrë miqësore – Barcelona ka vuajtur shumë me trajnerin Luis Enrique, i cili nuk ishte aspak miqësor me mediat, madje shpesh kishte krijuar edhe skandale.
7. Të përmirësojë mbrojtjen – Një nga problemet më të mëdha të kësaj Barcelone është mbrojtja. Këtë e tregon edhe fakti se gjatë këtij edicioni mori katër gola ndaj PSG dhe tri gola ndaj Juventusit.

Casillas shpreson që Buffon do ta fitojë Ligën e Kampionëve, megjithëse mbështet Real Madridin në finale. Në një intervistë për “Gazzetta dello Sport”, legjenda e Real Madridit, Iker Casillas, ka thënë se kapiteni i Juventusit, Gianluigi Buffon, meriton ta fitojë Ligën e Kampionëve.
“Buffoni e meriton Ligën e Kampionëve edhe pse unë përkrah Real Madridin”, tha fillimisht Casillas. “Karriera e Buffonit nuk mund të përfundojë pa e fituar Ligën e Kampionëve”, shtoi legjenda e Los Blancos. “Jam i lumtur për Higuain, ai është lojtar i madh dhe e ka merituar këtë finale”, shtoi Casillas.
“Juventusi dhe Real Madridi janë në të njëjtin nivel, por mendoj se italianët kanë mbrojtje më të mirë. Tani janë të mirë edhe ofensivë, me Dybala, Higuain dhe Mandzukiç. Kanë sulm të frikshëm”, përfundoi Casillas.
Juventusi dhe Real Madridi do të përballen më 3 qershor në Cardiff. “Zonja e Vjetër” kërkon ta fitojë këtë trofe për herë të parë pas vitit 1996, derisa Real Madridi dëshiron të shkruajë histori duke triumfuar dy herë me radhë në këtë garë.

Juventus dhe Real Madrid do të takohen në finalen e këtij sezoni në Ligën e Kampionëve, e cila do të zhvillohet më 3 qershor në Cardiff. E përditshmja italiane, “Tuttosport” ka bërë një anketë me 50 gazetarë, të cilët janë nga 33 shtete të ndryshme dhe tri kontinente.
Shumica e këtyre gazetarëve besojnë se Juventus do të mposhtë në finale Real Madridin dhe do të jetë kampion i ri i Evropës. Në anën tjetër, vetëm 17 prej tyre besojnë se Reali do të shkruajë histori, duke u bërë skuadra e parë që e fiton dy herë radhazi këtë garë, që kur mori këtë emërtim në sezonin 1992-93.
Në këtë listë të gazetarëve ishte edhe gazetari shqiptar Fatmir Meneri, i cili parasheh fitore 2:1 të Juventusit, me golat e Dybala-së dhe Bonuccit, ndërsa për Realin do të shënojë Ronaldo. Fitoren më të thellë e parasheh gazetari i Argjentinës, Pablo Lejder, i cili beson se Juventus do të fitoi 4:2.
Ndërkohë, ish-portieri i Los Blancos, Iker Casillas ka dhënë opinionin e tij në lidhje me finalen Real Madrid-Juventus. Në njërin krah është ish-skuadra e tij, në krahun tjetër një rival në fushë, por një mik i mirë jashtë saj, Gianluiggi Buffon. E ka të vështirë të japë një parashkim, pasi sipas 36-vjeçarit shanset janë 50-50, por pavarësisht kësaj Casillas sheh Juventusin si favorit.
“Do të jetë një ndeshje e ekuilibruar. Juventusi gjithmonë ka qenë një skuadër e fortë në mbrojtje, tani është edhe në sulm. Higuain, Dybala dhe Mandzukiç janë një treshe shumë e frikshme, që mund të ndëshkojnë në çdo çast. E njëjta gjë vlen edhe për Realin që ka një futbollist të jashtëzakonshëm si Cristiano Ronaldo. Personalisht shoh Juventusin si një skuadër më kompakte”, tha ai. Përsa i përket garës për fitimin e “Topit të Artë” Casillas është i mendimit se Buffon e meriton plotësisht.

Në Madrid janë vënë në ndjekje të “Duodecima”, Champions League numër 12. Në rrugën e kampionëve të Spanjës, përveç Juventus-it, janë disa tabu që duhen thyer. E përditshmja spanjolle “Marca” ka zbuluar 6 të tillë: ushqim për dhëmbët e tifozëve apo lojtarëve që janë supersticiozë.
Dy radhazi- Tabuja e parë dihet nga të gjithë tashmë: në epokën e Champions League, asnjë skuadër nuk e ka fituar trofeun për dy vite radhazi. Milan, Ajax, Juventus dhe Manchester United kanë shkuar në finale një vit pasi ishin shpallur kampionë të Europës, por nuk kanë arritur ta mbrojnë titullin.
Kampionë të botës – Nga 2000-shi, viti kur u krijuar Botërori për Klube, asnjë skuadër kampione e botës nuk e ka fituar Champions League. Vetëm United, më 2009-ën, i ka shkuar afër.
Vit tek – Në epokën moderne, Real Madrid nuk ka fituar kurrë një Champions në një vit me numër tek: triumfet e fundit kanë ardhur më 1998, 2000, 2002, 2014 dhe 2016.
Ish-lojtarët – Higuain dhe Khedira paraqesin një rrezik. Po, sepse ish-lojtarët kanë tendencën të shënojnë kur përballen me Real Madrid. Morata e ka bërë në gjysmëfinalet e 2015-ës, Morientes ka eliminuar “Los Blancos” në kohën kur luante me Monaco.
Shtatë  – Çdo shtatë vite, një klub italian ulet në fronin e Europës. Milan më 1989, Juventus më 1996, Milan më 2003, Inter më 2010…
Ngjyra e fanellës – Fanella me ngjyrë vjollcë nuk është shumë fatsjellëse për Zidane. Dy nga 5 humbjet e pësuara në sezon (Valencia dhe Sevilla) kanë ardhur kur madrilenët kanë luajtur me uniformën vjollcë.

Wolfsburg siguroi qëndrimin në Bundesligë pasi fitoi dhe takimin e dytë të play out me Braunschweig. Një gol i Vierinhas në pjesën e dytë i dha suksesin dhe në sfidën e kthimit, po me të njëjtin rezultat si në përballjen e parë skuadrës së Jonker që menaxhoi mjaft mirë lojën duke mos lejuar vendasit që të vendosnin në vështirësi Casteles. Në pjesën e parë Eintracht i shtyrë dhe nga publiku krijoi dy raste të mira, por nuk arriti dot të finalizojë, ndërsa në pjesën e dytë ishte një këmbëngulje e Mallit që lejoi Vierinhën të realizonte golin e parë në një ndeshje Bundeslige që prej nëntorit të 2015-tës. Në epërsi skuadra mike e pati të thjeshtë menaxhimin e rezultatit duke qëndruar në Bundesligë për të 29-tin sezon radhazi falë rezultatit të përgjithshëm 2-0 në të dyja ndeshjet.

Shtatë muaj larg kombëtares. Për herë të fundit i grumbulluar në sfidën me Lihtenshtejnin, në tetor të 2016-ës. Ajo që dukej si një krisje e pariparueshme ndërmjet Ergys Kaçes dhe trajnerit Gianni de Biasi tashmë është hedhur pas shpine.
Mesfushori shtatshkurtër kthehet me kombëtaren, prej ndeshjeve të radhës, miqësores së 4 qershorit me Luksemburgun dhe sfidës delikate në kualifikueset e Botërorit 2018, më 11 qershor në fushën e Izraelit. Një ndeshje që mund të vendosë shumë për fatin e edicionit të Shqipërisë dhe ku nevojitet kontributi i të gjithëve. Edhe ai i një lojtari si 23-vjeçari korçar.
Pavarësisht se në këtë sezon ka luajtur më pak se 25 ndeshje mes çekëve të Viktoria Plzen dhe grekëve të PAOK, klasi dhe kualiteti i Kaçes nuk kanë diskutim. Mjafton të kujtosh që në fundin e sezonit rifitoi besimin e skuadrës nga Selaniku, ku u rikthye në protagonist.
Për herë të fundit ka zbritur me Shqipërinë në fushë në miqësoren e 31 gushtit të kaluar, të barazuar me Marokun në Shkodër. De Biasi e ka argumentuar lënien jashtë ekipit në muajt e fundit si zgjedhje teknike, duke theksuar se lojtarët duhet të pranojnë zgjedhjet e trajnerit dhe se futbollistë të mëdhenj janë ata që pranojnë edhe stolin, duke sakrifikuar për të mirën e përbashkët.
Një leksion që Kaçe tashmë duket e ka kuptuar dhe mësuar. Mesfushori është gati të bëjë gjithçka për kombëtaren. Në çdo moment kur të thirret në kauzë. Pse jo të tentojë një tjetër magji në Izrael, si ajo që i dhuroi Shqipërisë fitoren historike me Francën në miqësoren e qershorit 2015. Kaçe rikthehet i gatshëm për kuqezinjtë pikërisht në këtë periudhë të vitit. Ndoshta fati e do që ai të jetë sërish vendimtar…

Alvaro Morata duket gjithnjë e më larg Real Madridit e më afër Milanit. Lajmi është bërë i ditur nga e përditshmja spanjolle “AS”. Sipas AS, delegati i Milanit, Marco Fassone dhe drejtori sportiv, Massimiliano Mirabelli, kanë udhëtuar të hënën në Madrid për të negociuar me Realin. Pasi e përfunduan sezonin në pozitën e gjashtë (Europa League), Milani tashmë ka arritur marrëveshje personale me Moratën, i cili do të përfitojë tetë milionë euro në sezon në “San Siro”.
“AS” shkruan se Milani ka bërë gati 60 milionë euro për sulmuesin spanjoll, i cili është vetëm zgjedhja e dytë për Zinedine Zidane. Trajneri francez preferon Karim Benzema para Moratës dhe për këtë spanjolli nuk dëshiron të ulet në stol edhe sezonin e ardhshëm, që Morata do t’i bashkohet shumë shpejt klubit italian.
Pavarësisht se ka luajtur më pak se Benzema, Morata ka shënuar më shumë gola, 20 dhe është golashënuesi i dytë më i mirë i ekipit, pas Cristiano Ronaldos.
Milani ka zyrtarizuar transferimin e Mateo Musacchios, duke e cekur se 26-vjeçari, i cili u transferua nga Villarreali, është me origjinë shqiptare. Matteo Pablo Musacchio është italiano-argjentinas, por origjina e tij është shqiptare, më saktë arbëreshe. Stërgjyshërit e futbollistit ishin arbëreshë dhe historia na ka mësuar se gjatë pushtimit osman, ata u larguan drejt Italisë.
Ndoshta në pamje të parë mbiemri apo emri i futbollistit nuk të sjellin asgjë ndër mend që mund të lidhet si me arbëreshët si me Shqipërinë, por mbiemri i tij është në një lloj forme i “italianizuar” dhe sipas informacioneve të mbledhura Musacchio, është versioni italian i mbiemrit që ka mbajtur një nga familjet më të famshme dhe me traditë shqiptare, familja e Muzakajve.
“Mateo Pablo Musacchio ka lindur në Rosario, Argjentinë, më 26 gusht 1990. Me origjinë shqiptare, ish-mbrojtësi i Villarrealit ka gjithashtu pasaportë italiane (gjyshërit e tij kanë lindur në Portocannone, qytet afër Campobasso)”, shkruan Milan në sajtin zyrtar. Musacchio, me origjinë shqiptare, ka nënshkruar kontratë katërvjeçare me Milanin, që do ta mbajë në “San Siro” deri në vitin 2021.