I kanë vënë kyçin depozitës kryesore të ujësjellësit. Në shtëpitë e tyre, uji të pijshëm nuk ka prej gjashtë muajsh. Banorët e fshatit Tërbaç në Gracen të Elbasanit po kalojnë kohë të vështira.
Por si të mos mjaftonte thatësira, atyre u vijnë faturat me 4200 lekë të vjetra. Asnjë nga fshatarët nuk ka lidhur kontratë dhe dyshojnë që ato mund të jenë falso Kjo i ka zemëruar banorët, të cilët prej 16 vitesh kanë investuar vetë për ujësjellësin, duke blerë pompa uji, tuba, kabllo elektrikë dhe duke paguar vetë energjinë.
Banorët i kanë kërkuar pushtetit vendor të ndërhyjë në ujësjellës. Të rregullojnë depozitat, të vendosin matësat dhe ata garantojnë se do ta paguajnë rregullisht ujin. Po kështu, të sigurohet edhe dezinfektimi dhe cilësia e tij. Për situatën ka reaguar edhe shefi i Zyrës së Informacionit në Bashki, Besim Dybeli. Megjithatë banorët kërkojnë që ky problem të zgjidhet përfundimisht dhe jo vetëm me vendosjen e një pompe.
Ata akuzojnë Bashkinë se ka bllokuar depozitat, duke mos lejuar qarkullimin e ujit, ndërsa shtojnë se faturat vijnë me shumën fikse 4200 lekë të vjetra. Të revoltuar banorët thonë se, ata vetë kanë investuar për tubacionet e ujësjellësit, ndërkohë që uji është i ndotur dhe nuk përdoret për të pirë. “Morën ca pa pare. Puseta është kalbur me të gjitha. Ne i kemi blerë të gjitha vetë.
I kemi sajuar të gjitha vetë. Uji nuk kontrollohet asnjëherë. Na vijnë ca fatura false”, u shpreh një banore.
Bashkia e Elbasanit në reagimin e saj thotë se, bëhet fjalë për 57 familje dhe se Bashkia ka investuar për riparime, ndërsa faturat janë të ligjshme dhe me anë të tyre mirëmbahet ujësjellësi dhe punonjësi që kujdeset. Megjithatë, banorët kërkojnë që ky problem të zgjidhet përfundimisht dhe jo vetëm me vendosjen e një pompe.
Banorët e Tërbaç, 6 muaj pa ujë të pijshëm, faturat i paguajnë rregullisht
Revolta në prag, rrëzim qeverisë nga 18 shkurti
Shqiptarët po i përgjigjen masivisht protestës së opozitës më datë 18 shkurt, duke paralajmëruar revoltë të fuqishme popullore deri në rrëzimin e qeverisë. Të mposhtur nga varfëria, pasiguria dhe arbitrariteti i qeverisjes, shqiptarët nga Veriu në Jug të vendit po shprehin çdo ditë e më shumë nevojën për ndryshim, duke kërkuar mbështetjen e kreut të PD, Basha për zgjidhjen e problemeve të tyre dhe dhënien fund të kësaj qeverie.
Një reagim i fortë u shpreh dje nga banorët e Kamzës, të cilët u takuan dje me kreun e PD, Lulzim Basha. Të gjunjëzuar nga mungesa e ndihmës ekonomike, banorët shprehën se situata në familjet e tyre për shkak të varfërisë është mbytëse dhe dëshpëruese.
Në pamundësi për të paguar mbifaturimet e energjisë, të pamundur për të paguar ilaçet, për të shkolluar e ushqyer fëmijët, pa punë dhe pa të ardhura, banorët u shprehën se kjo qeveri nuk ofron gjë tjetër veçse mjerim për familjet e tyre.
Kryetari i Partisë Demokratike, Lulzim Basha, u takua mëngjesin e djeshëm me qytetarë të Kamzës dhe vizitoi disa familje në nevojë. Ai bisedoi me ta për gjendjen e vështirësitë e mëdha ekonomike dhe jetësore që kalon shumica e zonës së Kamzës për shkak të papunësisë dhe të braktisjes së tyre nga shteti.
Basha takoi familjen e Shyqyri Durishtit, i arrestuar nga policia pasi tentoi të sillte dritë në shtëpi për familjen e tij, të pallogaritur nga ndihma ekonomike shtetërore, pavarësisht gjendjes të banesës dhe kushteve të jetesës.
“Të ngrihemi të gjithë bashkë në këtë lëvizje, të frymëzuar edhe nga zmbrapsja e qeverive të korruptuara në vendet europiane, e arritur vetëm përmes forcës së njerëzve dhe zërit të qytetarëve”, tha Lulzim Basha. Pas vizitës në shtëpinë e disa familjeve të pamundura ekonomikisht për të përballuar jetesën, kryetari demokrat Lulzim Basha ndaloi për të diskutuar me banorët mundësinë e një zgjidhje, që do të nisë më 18 shkurt për t’u shtrirë më pas në gjithë Shqipërinë.
Në një postim në Facebook, në lidhje me takimet e zhvilluara dje me banorët e Kamzës, kreu i PD, Basha thekson se ka ardhur koha që shqiptarët të ngrenë zërin kundër padrejtësive ndaj tyre.
“Sot takova qindra banorë të Kamzës. Jeta e tyre, si e shumicës së njerëzve, është plot vështirësi e vuajtje. Varfëria, papunësia, shëndetësia që kërkon para nën dorë, shkollat e ftohta dhe pa kushte, mbifaturimet e energjisë elektrike, këto janë vetëm disa nga problemet e shumicës së familjeve të Kamzës. Qeveria harxhon më shumë për propagandë dhe fasada luksoze, se sa për shëndetin dhe arsimimin e njerëzve. Kundër kësaj gjendjeje dhe shpërfilljeje duhet të ngremë zërin dhe të #NgrihemiBashkë më#18Shkurt”.
Në ftesën e tij drejtuar qytetarëve, Basha thotë se, vetëm me kurajo dhe vendosmëri pushteti i grabitur në këto vite do të rikthehet sërish tek njerëzit. “I ftoj të gjithë bashkëqytetarët në një manifestim kundër qeverisë më 18 shkurt, në Tiranë. Të protestojmë bashkë kundër padrejtësive dhe varfërisë, kundër shëndetësisë që lëngon dhe arsimit të shkatërruar, kundër arrogancës dhe shtypjes qeveritare, kundër drogës, krimit dhe kriminelëve në politikë. Të mbrojmë lirinë për të zgjedhur dhe të tregojmë vendosmërinë për të ruajtur votën. Vetëm me kurajo dhe vendosmëri mund ta kthejmë pushtetin tek njerëzit”, shprehet Basha në ftesën drejtuar shqiptarëve.
A.Shahini
Dosja në Bruksel, një ministër drejt arrestimit
Kryeprokurori ka dorëzuar dje në Bruksel një dosje të rëndësishme të aferave korruptive të shpërdorimit të fondeve të Bashkimit Europian për Shqipërinë. Dosja është pjesë e një hetimi disamujor të Prokurorisë dhe në të përfshihen zyrtarë të lartë. Arsyeja se përse dosja ka shkuar deri në Bruksel lidhet me një bashkërendim të punës së kryeprokurorit me Zyrën kundër Mashtrimit të Komisionit Europian. Po cila është kjo zyrë?
Zyra europiane kundër Mashtrimit (OLAF) është organi i vetëm i BE-së i mandatuar për të zbuluar, hetuar dhe ndaluar mashtrimin me fondet e Bashkimit Europian. Kjo zyrë ka një status të pavarur në funksionimin e saj dhe është pjesë e Komisionit Europian.
Prokurori i Përgjithshëm, Adriatik Llalla zhvilloi dje një vizitë në Bruksel ku është takuar me drejtorin e Përgjithshëm të zyrës Antimashtrim të Bashkimit Europian, Giovanni Kessler.
Llalla-Kesssler biseduan për forcimin e bashkëpunimit në luftën kundër korrupsionit. Kreu i Prokurorisë shqiptare informoi gjithashtu lidhur me përpjekjet e autoriteteve shqiptare në luftën kundër korrupsionit, si edhe me masat e reja legjislative për forcimin e sistemit të drejtësisë në vendin tonë.
Për prokurorin e Përgjithshëm, lufta kundër korrupsionit është një prej prioriteteve madhore të Shqipërisë për integrimin në Bashkimin Europian. Për këtë arsye, theksoi Llalla, përvoja e autoriteteve të Brukselit në këtë drejtim do të shërbejë për forcimin e mekanizmave hetimorë.
Por përveç hetimeve për fondet e BE të vjedhura në Shqipëri me anë të zyrtarëve të Brukselit dhe atyre që rrinë në Tiranë e ku priten surpriza të mëdha për miliona e miliona fonde të përvetësuara, ka informacione se po pritet firmosja e fletarrestit nga prokurori i Përgjithshëm, Adriatik Lllalla për një ministër fuqiplotë të qeverisë Rama.
Ka një dosje hetimore prej muajsh, e cila po hetohet në Prokurori dhe tashmë është vendosur për arrestime. Informacionet tregojnë se arrestohet dhe një zyrtare që ka qenë zv/ministre e që më pas ka kaluar me rritje në detyrë, si dhe një numër zyrtarësh që kanë firmosur për tenderime disa milionë euro.
Gjatë javëve të fundit janë intensifikuar hetimet në lidhje me shpërdorimet e bëra me fondet e Bashkimit Europian. Pak ditë më parë në qendër të këtyre hetimeve ishte edhe ambasadorja e BE, Vlahutin për vilën 1.6 milionë euro. Megjithatë deri tani kjo blerje është justifikuar publikisht nga zëdhënësja e Komisionit Europian si oferta më e mirë.
Edhe më parë Brukseli ka hetuar në lidhje me shpërdorimin e fondeve në Shqipëri. Dy zyrtarë të lartë të saj përfunduan në burg në lidhje me një tjetër aferë të blerjes së zyrave të Misionit të Bashkimit Europian në Shqipëri disa vite më parë.
Arben SHAHINI
Dokumenti, Balili tonelata kokaine në BE dhe New York
Klement Balili, i njohur si “Eskobari i Ballkanit” ka trafikuar tonelata droge nga Shqipëria dhe Ekuadori drejt vendeve të Bashkimit Europian gjatë dy viteve që ishte drejtor i Transportit Rrugor të Sarandës. Gazetarja Klodiana Lala u shpreh gjatë emisionit “Opinion” mbrëmjen e të hënës se fakti që Balili u vu në shënjestër të DEA-s amerikane ishte trafiku i tonelatave heroinë nga Ekuadori në drejtim të Evropës. Kjo ka bërë që Balili të vihet në gjurmim dhe të ketë një dosje prej 10 mijë faqesh nga agjencitë ndërkombëtare ligjzbatuese.
Prokuroria i kërkoi policisë që të arrestonte Klement Balilin që më 17 maj të vitit të kaluar, menjëherë pas kërkesës së Interpolit, por policia nuk veproi. Ky fakt u bë i ditur të hënën në emisionin “Opinion”, ku ishte i ftuar edhe drejtori i Përgjithshëm i Hetimit të Krimit të Organizuar, Ardian Çipa. Ky i fundit pranoi se kishte patur një kërkesë nga Prokuroria për arrestimin e Balilit, por nuk dha asnjë spjegim pse policia nuk kishte ndërhyrë.
Gazetari Flamur Vezaj ka shpjeguar në “Opinion” edhe momentet e para kur Klement Balili u vu në survejimin e DEA, që përkon me datën 13 mars të vitit 2016. “Do vinte një kamion nga Bullgaria me portokalle për në Shqipëri që më pas do t’u ngarkonte me kanabis. Informacioni i parë ka qenë më 4 mars. Është bërë procedimi. Rasti i Balilit ka vazhduar me përgjimet e disa numrave të telefonit. Më 13 maj është bërë kontrolli i parë dhe më pas, ai është zhdukur për të mos u gjendur më”, u shpreh Vezaj.
Gazetari Flamur Vezaj ka lexuar në “Opinion” për herë të parë edhe një pjesë të përgjimeve që i janë bërë Balilit, ku shfaqet lidhja e tij me trafikun e narkotikëve. Në një video të publikuar gjatë emisionit shfaqen përgjimet se si Balili instrukton trafikantët në doganë. Janë faksimile ekskluzive, të cilat publikohen për herë të parë.
I pyetur lidhur mbi informacionet që kanë ardhur pas shpërblimit që ka vendosur Policia për “kokën” e Balilit, drejtori i Përgjithshëm i Hetimit të Krimit të Organizuar ka pranuar se janë shumë njoftime që vijnë mbi praninë e Balilit në vende të ndryshme, por ende nuk ka asgjë konkrete. Çipa u shpreh se arrestimi i Balilit është i vështirë, sepse ka shumë para. “Është i vështirë edhe për shkak të sigurisë financiare që ka individi. Nuk mund të japë informacion nëse aksionet janë dekonspiruar, pasi kjo është detyrë e një strukture tjetër”, tha Çipa.
Gazetari Blendi Fevziu ka lexuar një mesazh telefonik në emision, të ardhur nga një gazetar, sipas të cilit Balili u ndalua në muajin gusht, por polici që kreu ndalimin u transferua menjëherë. Nuk dihet se sa i vërtetë është ky informacion, ndërkohë që i mbetet organeve ligjzbatuese për ta verifikuar si mesazh.
Përgjimet/Ja si ra Balili në grackën e policisë greke
Trafikantët grek e shqiptarë flisnin me njëri-tjetrit në telefon, teksa policia greke i kishte nën përgjim. Deri më 11 mars 2016, policia greke dinte se ishte një trafikant shqiptar me emrin Keli, por nuk dinte identitetin e tij të plotë. Ka qenë një gafë e Klement Balilit që ka çuar në identifikimin e tij. Opinion.al disponon disa dokumente që janë biseda telefonike të përgjuara nga Prokuroria greke dhe që i janë vënë në dispozicion drejtësisë shqiptare për ta arrestuar Balilin.
Siç shihet edhe në dokumentet e mëposhtme, Balili komunikonte vazhdimisht me skafistin që transportonte drogën drejt Greqisë Petro Dalanaj, të cilin e orientonte për rrugën që do të ndiqte deri në ishujt grek ku do të linte ngarkesën. Ky person është tashmë i arrestuar. Gjithashtu, Balili komunikonte me biznesmenin grek Alyfantis Georgis, i cili ishte pritësi i lëndës narkotike, shkruan opinion.al.
Si ra Balili në grackë?
Në numrin e Alyfantis Georgis (që ishte në përgjim), Klement Balili dërgon numrin e tij të pasaportës, pasi grekut i duhej leje për të përdorur skafin. Në këtë moment, policia greke ka identifikuar se kush ishte boss-i që niste tonelata me drogë nga Shqipëria. Pra, afro 1 vit më parë (mars 2016) policia greke ka identifikuar Balilin. Ndërsa urdhër arresti për të nga Prokuroria shqiptare doli 10 muaj më pas (dhjetor 2016).
Bisedat e përgjuara të Klement Balilit me skafistin shqiptar dhe grekun që priste drogën
Dokument I: Komunikimi i Klement Balilit (Keli) me skafistin Petro Dalanaj
Dalanaj: Hajde vlla
Keli: Kalove çdo gjë? Kalove shumë?
Dalanaj: Po ika
Keli: Ike shumë milje nga ishulli
Dalanaj: 5, 67 milje. Kam vajt në një ishull tjetër, është një tjetër nga pas.
Keli: Mirë hajde. Hapu çik dhe ik avash
Dalanaj: Mirë hajde
Kely: Hajt shëndet
Biseda 2: Keli dhe Petro Dalanaj
Dalanaj: Hë re vlla
Keli, hajde avash avash. Ec
Dalanaj: Po vij
Keli: Do dalësh nga maja dhe do futesh në gjirin e madh
Dalanaj: E di ore e di. Atje në anë ku zbresin makinat?
Keli: E siç futesh në plazh
Dalanaj: Siç është rruga
Keli: Eee nga ana e brendshme që është, jo nga ana tjetër
Dalanaj: Erdha, erdha
Dokument II: Në dokumentet e Prokurorisë thuhet se në datat 5.5. 2016 dhe deri më 8.6.2016 kur është bërë sekuestrimi i lëndës narkotike ky shtetas ka mbajtur kontakte me shtetasin Alyfantis Georgis, i cili ishte pritësi dhe organizuesi i pritjes së lëndës narkotike kanabis sativa që vinte nga Shqipëria me varkën e drejtuar nga Petro Dalanaj.
Konkretisht identifikimi i është bërë me sms e mëposhtme “CD 211 numri i bisedës 161”. Deri në atë moment, Balili ishte i panjohur për policinë greke siç shënohet edhe në dokument (person i panjohur shqiptar) data e bisedës 11.3.2016 ora 12:42 mesazh dalës nga numri i telefonit të biznesmenit grek: “Vëllai im, dërgo numrin e pasaportës tënde”.
Balili i dërgon numrin e pasaportës BF2613552 që rezultoi të ishte Klement Balili i lindur më 20.3.1972 në Shqipëri dhe banor në Sarandë.
Në bisedat e përgjuara të cilat janë të shumta, Klement Balili koordinon veprimet mes Petro Dalanaj dhe Alyfantis Gerogios. Ky i fundit organizon pritjen në ishullin e Zakintos, duke organizuar paraprakisht strehimin ditën e mëparshme në një ishull të vogël të pabanuar, afër zonës Agio Sostit në Zakintos.
Balili, biseda me telefon me trafikantët vetëm pas orës 23:00 të natës
Klement Balili përdorte telefonin celular vetëm pas orës 23:00 të natës, për të komunikuar me bashkëpunëtorët e trafikut të drogës në Greqi. Janë zbardhur disa nga bisedat e përgjuara të dy numrave të telefonit që kishte në përdorim Balili. Nga zbardhja e këtyre bisedave, duket qartë që Balili ka pasur komunikime me trafikantët gjatë periudhës 4 deri 7 maj të 2016, biseda që kryeshin vetëm pas orës 23:00 të natës. Thuajse të gjitha bisedat e bëra me bashkëpunëtorët e tij në Greqi, janë pas mesnate, sidomos për organizimin dhe nisjen e skafit të mbushur me rreth 679 kg hashash drejt Greqisë mesnatën e 6 majit 2016, thuhet në dosjen e Prokurorisë. Në bisedat me dy skafistët shqiptarë Petro Dalanaj dhe Kleanthi Palaj tashmë të arrestuar në Greqi, Balili i instruktonte për rrugën që do të ndiqnin në det për t’u ankoruar në brigjet e Sarandës për t’u ngarkuar me hashash.
Biseda e parë, rezulton e kryer rreth orës 23:00 të darkës, kur edhe e njofton për kohën e ankorimit në njërin nga gjiret e Sarandës ku e pret mjeti me hashashin. Pas ngarkesës, Balili rezulton se e kontakton rreth orës 02:00 pas mesnatës përsëri Petro Dalanaj, duke porositur që të ketë kujdes me zhurmën dhe ndriçimin në skaf kur të largohet nga bregu për t’u nisur drejt vendeve ku nuk mund të pikaset nga Policia Kufitare. Bisedat janë të shpeshta pas kësaj ore, deri në momentin që rreth orës 04 të mëngjesit të datës 5 maj, skafistët shqiptarë e sigurojnë shefin e tyre në Sarandë, Klement Balilin se skafi është fshehur në vendin e përcaktuar. Më pas, ditën e neserme, pikërisht më datën 6 maj 2016 pas mesnate, Balili përsëri rezulton se komunikon me skafistët e tij, duke i porositur për rrugën që do të ndiqnin drejt ishullit të pabanuar grek, ku e prisnin bashkëshpunëtorët e tij të rrjetit të trafikut të drogës.
Sipas këtyre materialeve, bisedat mes tyre janë të shpeshta deri në mëngjesin e hershëm të datës 7 maj ku skafistët dorëzojnë mallin te pala greke, ku prisnin 4 punonjësit e biznesmenit grek, Georgios Alyfantis. Një ditë më pas, ndërhyjnë policia duke arrestuar të gjithë grupin në Greqi dhe shpall në kërkim biznesmenin sarandiot Klement Balili. Ky i fundit, sipas autoriteteve greke, që në momentin e arrestimit të bashkëpunëtorëve në Greqi, nuk i ka hapur aparatet celular dhe numrat me të cilët bisedonte me shtetasit grekë dhe skafistët e tij tashmë të arrestuar.
Një muaj pas ardhjes në qeveri e majta ligj pro korrupsionit
Prej ditësh qindra mijëra vetë protestojnë në Rumani kundër përpjekjes së qeverisë për të zbehur luftën kundër korrupsionit. Vetëm një dorëheqje e kabinetit qeveritar mund ta qetësojë gjendjen, mendon Robert Schwartz.
Një gjysmë milion vetë që protestojnë, kjo nuk ka ndodhur më që pas rrëzimit të diktatorit komunist Çaushesku para 27 vjetësh. Shoqëria civile në Rumani të shtunën arriti një fitore të pjesshme, por sidoqoftë shenjat flasin për një stuhi të mëtejshme.
Kryeministri Sorin Grindeanu dhe kryetari i partisë së tij Liviu Dragnea, presidenti i Parlamentit dhe ai që i komandon fijet në prapaskenë në kabinet, janë të komprometuar në mënyrë të pakthyeshme. Përpjekja, për ta shpëtuar Dragnean të dënuar për mashtrim elektoral dhe ndërkohë në proces për abuzim në detyrë kanë dështuar. Dragnea, kjo tashmë është e qartë, nuk mund të bëhet më kryeministër – pikërisht sepse ai ka rekord penal dhe mbetet i tillë. E megjithatë ai përpiqet bashkë me kolegët e partisë dhe të qeverisë, si edhe me kryetarin e partisë partnere në koalicion pseudoliberalët ALDE, presidentin e senatit Calin Popescu Tariceanu, me të gjitha mjetet që t’i minimizojë demonstratat. Në televizionet “e afërt me të” hamendësohet për komplot ndërkombëtar dhe presidenti Klaus Iohanni bëhet personalisht përgjegjës për protestat.
Presidenti në anën e demonstruesve
Iohannis liberal-konservator iu drejtua Gjykatës Kushtetuese kundër dekretit me procedurë të përshpejtuar duke u pozicionuar kështu përkrah shoqërisë civile. Nga kundërshtarët e tij tani ai – ashtu si edhe në luftën elektorale – demonizohet si “i huaj”, si element “jo rumun”. Ai i përket minoritetit gjerman në Rumani dhe është evangjelist-lutherian, ndryshe nga shumica ortodokse e popullsisë. Mbështetësit e socialdemokratëve, të manipuluar në mënyrë perfekte nga platforma mediale e partisë, e shohin Iohannis tani si tradhtar të kombit, që gjoja dirigjohet nga larg prej Angela Merkelit. Madje po dëgjohen edhe parulla që e krahasojnë atë me Adolf Hitlerin!
Këto komplote ndërkombëtare kundër Rumanisë, sipas kampit qeveritar, financiohen prej miliarderit amerikan George Soros, prejardhja hungarezo-hebreje e të cilit është perfekte për këtë imazh absurd. Tërësisht në mënyrë të papërgjegjshme Dragnea, Tariceanu & Co., bëjnë fjalë për interesa rajonale politike, që synojnë ndarjen e Rumanisë dhe e përmendin këtë në kontekstin e Hungarisë dhe të Republikës së Moldavisë. Ambasadorët nga vendet partnere të BE-së dhe nga SHBA-ja, që e kanë kritikuar qëndrimin e qeverisë, akuzohen se po ndërhyjnë në punët e brendshme. Rumania, ky është lajtmotivi i reagimeve të koalicionit PSD-ALDE, duhet të sensibilizohet për vlerat e veta kombëtare dhe të mos lejojë ta heqin nga hunda BE-ja dhe NATO-ja. Këto tone të qeverisë dhe në radhë të parë indinjata se si i përcjellin ato politikanët drejtues të Rumanisë, po dëgjohen për herë të parë që pas anëtarësimit të vendit në NATO (2004) dhe në BE (2007).
Ajo që po ndodh këto ditë në Bukuresht dhe në të gjithë Rumaninë është rrjedhojë logjike e një politike të gabuar të qeverisë së re. As një muaj në detyrë koalicioni i socialdemokratëve dhe liberalëve e ka humbur tërësisht besimit tek zgjedhësit pas fitores së bujshme në zgjedhje. Tani synohet të minimizohet dëmi, por kjo nuk do të jetë e lehtë. Humbja e besimit ndaj ekipit qeveritar është aq e madhe sa ajo nuk mund të rikuperohet me tërheqjen e dekretit të diskutueshëm, që synonte ta bënte të pamundur luftën kundër korrupsionit dhe abuzimeve me postin. Përkundrazi, deklarimi i ministrit të Drejtësisë se, do të propozojë një tjetër projektligj për ndryshimin e Kodit Penal dhe tërheqja që pasoi e kësaj deklarate nuk janë bërë për të forcuar besimin tek qeveria, por mesa duket për t’u pozicionuar kundër shtetit ligjor.
Një kabinet që nuk gëzon besimin e popullit
Vendi nuk mund ta përballojë një krizë afatgjatë politike. Këtë në fakt duhet ta dijë edhe qeveria. Ekipi aktual e ka humbur tërësisht legjitimitetin. Kush e cilëson luftën kundër korrupsionit si “bullshit”, sikurse u shpreh Dragnea në një intervistë për radion zvicerane, nuk ka se çfarë kërkon në krye të një vendi anëtar të BE-së.
Për fat të mirë në radhët e PSD-së ka politikanë të rinj reformatorë, të cilët distancohen nga qëndrimet e shefit të tyre dhe e mbështesin shoqërinë civile. Brenda partisë, kështu thuhet, ka nisur përçarja e madhe. Në njëfarë mënyre protestat masive të kujtojnë kthesën politike në vitin 1989. PSD-ja nëse do ta shpëtojë disi fitoren në zgjedhje duhet të japë dorëheqjen dhe të prazantojë një ekip krejt të ri qeveritar. Për të martën (07.02) presidenti Iohannis do të mbajë një fjalim në Parlament. Në luftën për shtetin ligjor në Rumani ka nisur raundi pasues.
Marine Le Pen nuk do të jetë kurrë presidente
Denis MacShane
Kjo është vetëm një fotografi e shkrepur nga këndi i gabuar. Marine le Pen me krahun e djathtë të shtrirë, dorën e zgjatur në atë që është perceptuar si përshëndetje e denjë për vitet 1930. Nuk ishte faji i saj, ajo nuk është fashiste, vetëm një politikane e së djathtës ekstreme, jeta politike e së cilës e ka shtyrë drejt toneve antiemigracion, antieuropiane dhe antimyslimane.
Por një gjë është e sigurt, ajo nuk do të jetë presidente e Francës dhe nuk është Donald Trump e Francës. Le Pen mund të jetë ndoshta një Hillary Clinton – një politikane femër kompetente që ka një karrierë të gjatë politike, por nuk arrin të tërheqë votuesit përtej besnikëve të partisë së saj.
Marine le Pen tani ndodhet përballë të njëjtit problem me të cilin u përball i ati i saj dhe me të cilin do të përballet edhe mbesa e saj Marion nëse një ditë merr në dorë lidershipin e Frontit Kombëtar në të ardhmen. Ata kanë një elektorat që mund të arrijë deri në 25 për qind të popullsisë franceze, por gjithçka mbyllet me kaq. Votat e saj nuk mund të krahasohen as me elekoratin besnik të Partisë Komuniste franceze 25 vjet pas Luftës së Dytë Botërore.
Në fakt, me rënien e komunizmit, ndonjëherë duket se votuesit e pakënaqur të ish-komunizmit – punëtorë të inatosur, të papunë, rrogtarë të varfër të sektorit publik apo punëtarët e sektorit të bujqësisë dhe një sërë individësh të shtyrë nga ideologjitë e së shkuarës – duket se kanë kaluar nga komunizmi i dikurshëm drejt Frontit Kombëtar.
Partia Komuniste franceze tregohej raciste dhe e egër me punëtorët europianë që vinin në Francë, antibrukselianë të betuar dhe fajësonin kapitalizmin perëndimor të drejtuar nga Shtetet e Bashkuara për të gjitha problemet e vendit, të cilin sot e quajmë globalizim. Kjo parti arriti të fitonte disa deputetë në Asamblenë Kombëtare franceze, njëlloj si Fronti në ditët e sotme, madje edhe disa ministra pas vitit 1945 dhe pak pas vitit 1981, por nuk arriti kurrë as t’i afrohej pushtetit të vërtetë.
Të njëjtin fat do të ketë edhe Le Pen. Ajo ka kërcyer nga njëra çështje në tjetrën sa për ta bërë Jeremy Conrbynin të duket si model qëndrueshmërie. Një herë fliste për vendosjen e dënimit me vdekje, tani është kundër tij. Dikur ishte fuqimisht kundër homoseksualëve, por një nga besnikët e saj të mirë është i tillë, ndaj edhe ky qëndrim është lënë në harresë. Ajo kërkonte rivendosjen e menjëhershme të monedhës së vjetër franceze, por të gjitha sondazhet tregojnë se francezët janë tepër të lidhur me euron pasi e bën biznesin me vendet fqinje shumë më të lehtë, ndaj edhe për këtë çështje ndërroi mendim.
Herë pas here ngrihen dyshime për frymë antisemite brenda Partisë së Frontit Kombëtar. Gazetarët dhe kërkuesit në Francë, të cilët kanë analizuar me thellësi raportet e anëtarësisë së Frontit raportojnë se paragjykimet e dikurshme të frymëzuara nga qëndrimi i babait të Marine le Pen dalin ndonjëherë në sipërfaqe edhe pse ajo është përpjekur ta pastrojë figurën e tij dhe të partisë për ta bërë më të pranueshme përballë votuesve.
Ajo duket se ka një lloj admirimi për Putinin, por Kremlini e di shumë mirë që ajo nuk do të bëhet presidente dhe e ka injoruar plotësisht. Marine le Pen nuk është më kandidate e mundshme në garën presidenciale. E vetmja mënyrë për ta ndryshuar këtë situatë është nëse kandidatët e majtë – Benoit Hamon i Partisë Socialiste dhe kandidati i majtë i pavarur Jean-Luc Melanchon – do të bashkoheshin dhe një prej tyre do të linte garën përpara raundit të parë.
Deklaratat dhe veprimet e Donald Trump që kur ka marrë në dorë drejtimin e Shtëpisë së Bardhë e kanë dëmtuar shumë pozicionin e nacionalistëve të Europës si Marine le Pen. Edhe pse mund të jenë joshëse dhe ekzotike për gazetarët jashtë Francës, hipotezat se kandidatja e Frontit Kombëtar mund t’i afrohet pushtetit nuk janë gjë tjetër veçse aludime tepër naive. Marine le Pen bën mirë ta mbajë krahun dhe dorën e saj të djathtë të ulur kur përshëndet dhe kur të synojë për t’u ngjitur në pushtet, duhet të përgatitet për humbje.
Ballkanizimi i Evropës
Probleme me nacionalizmin, kriza ekonomike, përçarjet. Është njësoj sikur të flisnin për ish-Jugosllavinë e viteve ‘80-të. Por në fakt fjala është për BE-në.
Në një ditë shkurti të vitit 1992, në qytetin e vogël holandez Maastricht, Bashkësia Evropiane ndërrroi emrin në Bashkim Evropian, që është një projekt i suksesshëm. Por ana e errët e problemeve po e rrezikon qëndrueshmërinë e BE-së. Askush mbase nuk ka mundur të kuptojë problemet që fshiheshin në vetë djepin e BE-së. Ndërsa vazhdimi i injorimit të tyre, mund të cenojë vetë ekzistencën e BE-së.
Një prej mëkateve të para të BE-së ka qenë vlerësimi i gabuar i krizës në ish-Jugosllavi. BE nuk ka vepruar sa duhet për evitimin e shpërthimit të konflikteve. Në njërën anë lindi BE-ja, ndërsa në anën tjetër shkatërrohej Jugosllavia. BE nuk ishte konseguente në reagime.
Xhuxhi politik
Gjermania e bashkuar nuk e solli me vete në Maastricht vetëm ekonominë e fuqishme, por edhe dobësitë nga historia. Në kohën e Luftës së Ftohtë, Gjermania ishte një gjigant ekonomik dhe një liliput politik. Kjo veçori ka kaluar më pas edhe tek BE. Në këto 25 vitet e fundit, xhuxhi nuk është rritur fare. Kanë dështuar të gjitha përpjekjet për rritje artificiale. Për shembull, mungon një politikë konseguente ndaj Ballkanit, i cili tani sërish po u kthehet problemeve rrënjësore.
Përçarjet e brendshme
Në planin e brendshëm nuk është arritur uniteti i duhur. Qëndrimi i ngurtë i Gjermanisë në kohën e krizës financiare dhe zemërgjerësia në kohën e krizës së refugjatëve, janë mbase një prodhim i logjikës së tanishme financiare dhe humane gjermane. Por problemi është që këto dy qëndrime kanë ardhur në fund dhe jo në fillim të këtyre problemeve. Për shembull, Greqia është pranuar në Eurozonë edhe pse dihej që në fillim se ka probleme të mëdha. Kjo ka ndodhur edhe me pranimin e Bullgarisë, Rumanisë dhe Kroacisë në BE. Marrëveshja e Dublinit për refugjatët e ka mbrojtur për një kohë të gjatë Gjermaninë nga vërshimi i refugjatëve. Por edhe kjo ndodhi, pasi Mesdheu u shndërrua në një varrezë masive.
Përcaktimi amerikan për përdorimin e dhunës nuk ka qenë gjithmonë në interesin e BE. Kjo logjikë ka shkaktuar jo vetëm shkatërrimin e disa vendeve në fqinjësi, por edhe mungesën e solidaritetit. Duket se solidariteti po merr fund ngadalë dhe kjo ka rezultuar me Brexitin, problemet me Varshavën, Hungarinë… Putini, Erdogani dhe Trumpi ante portas – që nuk e lehtëson fare problemin.
Para shkatërrimit?
Gjendja aktuale në BE të kujton gjithnjë e më shumë ish-Jugosllavinë. Por për fat të keq, 25 vitet e fundit duket se kanë shënuar fillimin dhe jo fundin e një tendence të keqe. Elitat neoliberale duket se e kanë nënvlerësuar në tërësi frikën e njerëzve që të mos mbeten në anën e humbësve. Nacionalizmi tani është shndërruar në një pjesë të rëndësishme të politikëbërjes në disa qendra perëndimore. Në Vjenë për pak nuk u vendos në stolin më të rëndësishëm një fashist. Para nesh kemi zgjedhje me epilog të paqartë në Holandë dhe Francë. Zgjedhje do të ketë në shtator edhe në Gjermani.
Po tani?
Formula e shpëtimit është në fakt shumë e thjeshtë: uniteti i vendeve anëtare jo vetëm brenda, por edhe në paraqitjen e jashtme të BE-së. Më mirë është të investohet në fillim se sa të intervenohet pas krizës. Në shtigje të gjata, shpenzimet me siguri që janë më të ulëta nëse punohet në evitimin e krizave. Solidariteti brenda BE duhet të jetë i vërtetë, gjendja financiare e qëndrueshme, ndërsa vendet anëtare të gatshme të veprojnë. Ndryshe BE do të dështojë. Koha po kalon.
Fillon ndërtimi i zonës së re urbane në veri të Mitrovicës
Në pjesën veriore të Mitrovicës kanë filluar punimet në kuadër të konstruksionit të urës mbi lumin Ibër dhe hapësirës përreth.
Punimet e reja, pasuan rrënimin e murit në këtë pjesë, i cili ishte ndërtuar ilegalisht nga autoritetet lokale të Mitrovicës Veriore. Më pas, sipas një marrëveshjeje ndërmjet Ministrisë së Mjedisit dhe Planifikimit Hapësinor në kuadër të qeverisë së Kosovës dhe kryetarit të komunës veriore të Mitrovicës, Goran Rakiç, ai mur ishte rrënuar.
Konstruksioni i ri përbën një ndërtim betoni prej 53 metra të gjatë, kurse lartësia do të jetë nga 40 deri në 70 centimetra. Ky konstruksion, sipas autoriteteve në Prishtinë, do të shërbejë për mbjelljen e luleve.
“Ashtu siç është arritur marrëveshja më 4 shkurt, sot fillojmë punimet për ndërtimin e konstruksionit të ri”, ka thënë kryetari i komunës veriore të Mitrovicës, Goran Rakiç, i cili ka ndjekur nga afër punimet.
Ai nuk ka mundur ta parashikojë se sa kohë do të zgjasin punimet, por është shprehur i bindur se kësaj radhe do të ecet përpara me projektin për rivitalizimin e urës mbi lumin Ibër.
Në bazë të marrëveshjes së Brukselit, të arritur në dialogun ndërmjet Prishtinës dhe Beogradit, parashihet që në kuadër të rivitalizimit të urës mbi lumin Ibër dhe hapësirës përreth të mënjanohen të gjitha barrikadat dhe të krijohet hapësirë për lëvizje të lirë në drejtim të veriut dhe jugut të Mitrovicës, si për njerëz ashtu edhe makina.
Emërohen 19 gjykatës ndërkombëtarë të Dhomave të Specializuara të Kosovës
Shefja e misionit të EULEX-it në Kosovë, Aleksandra Papadopoulou, ka emëruar të martën, nëntëmbëdhjetë gjykatës ndërkombëtarë të Dhomave të Specializuara të Kosovës, të Gjykatës Speciale.
Në një kumtesë të Dhomave të Specializuara të Kosovës thuhet se, në kuadër të emërimeve janë përfshirë edhe ai i nënkryetarit të dhomave dhe katër gjykatësve të Dhomës së Specializuar të Gjykatës Kushtetuese.
“Gjykatësit e emëruar do të jenë fizikisht të pranishëm në selinë e Dhomave të Specializuara vetëm me kërkesë të kryetarit, për ushtrimin e detyrave që diktojnë praninë e tyre”, thuhet në kumtesë.
Kryetarja e Dhomave të Specializuara, Dr. Ekaterina Trendafilova, citohet të ketë deklaruar se beson në “kontributin e secilit gjykatës të emëruar në realizimin e mandatit të administrimit të drejtësisë në mënyrë të drejtë dhe efikase”.
“Hapi i ardhshëm është seanca e parë plenare, të cilën unë do ta thërras së shpejti dhe gjatë së cilës do të miratohet Rregullorja e Procedurës dhe e Provave e Dhomave të Specializuara që rregullon kryerjen e procedurave gjyqësore para Dhomave të Specializuara”, citohet Trendafilova në një kumtesë të Dhomave të Specializuara të Kosovës.
Sipas kumtesës nënkryetar i Dhomave të Specializuara është emëruar Keith Raynor nga Britania e Madhe, ndërkohë që gjykatësit e emëruar ndërkombëtarë vijnë kryesisht nga Gjermania, Franca, Kanadaja, SHBA-ja, Holanda, Irlanda, Italia e Belgjika.
Presidenti Trump viziton CENTCOM
Presidenti Donald Trump premtoi mbështetje të plotë për ushtrinë amerikane në një fjalim që ai mbajti gjatë vizitës në Komandën Qendrore të Shteteve të Bashkuara, CENTCOM, në bazën ajrore MacDill në Tampa të Floridës.
Në fjalimin e shkurtër që mbajti pas një dreke me personelin e ushtrisë, zoti Trump shprehu mbështetje të fuqishme për NATO-n, por shtoi se “ne kërkojmë që të gjitha vendet anëtare të Aleancës të japin kontribut financiar”.
Presidenti foli kundër grupit Shteti Islamik, për të cilin ai tha se është angazhuar “në një fushatë gjenocidi” në mbarë botën. Pa përmendur urdhrat ekzekutivë që ai ka nënshkruar javën e fundit për kufizimin e imigracionit në Shtetet e Bashkuara, zoti Trump tha është përpjekur dhe do të vazhdojë të përpiqet për ta mbajtur larg vendit terrorin islamik radikal.
Kjo ishte vizita e parë në CENTCOM e Presidentit Trump, pas fillimit të detyrës.
Kryesore
Continue to the category
