Tre persona të armatosur dhe me maska i grabitën makinën një qytetari në Tiranë. Ngjarja ka ndodhur rreth orës 03:00 të mëngjesit të djeshëm në periferi të Tiranës. Sipas burimeve, tre persona të armatosur dhe me maska kanë thyer njërin xham të makinës së parkuar poshtë shtëpisë së tenorit Ylber Gjini, në momentin që janë pikasur nga banorët e familjes, i kanë kërcënuar me armë. Maskat kanë grabitur makinën dhe janë larguar me shpejtësi në drejtim të paditur për policinë. Pronari i makinës ka njoftuar menjëherë policinë, por ende nuk është bërë i mundur identifikimi dhe kapja e autorëve.
Tenori Ylber Gjini është shprehur pas ngjarjes së rëndë se është me fat që është gjallë. “Jam me fat që jam gjallë”, u shpreh mes lotësh për “News24” solisti i Teatrit të Operës në Tiranë, tenori Ylber Gjini. I përlotur, Gjini tregon se makinën e blerë me kredi dy muaj më parë e kishte parkuar poshtë ballkonit të banesës së tij në zonën e Yzberishtit, ku 3 autorë të maskuar dhe të armatosur, pasi i thyen njërin xham ia grabitën. I biri kishte ndjerë zhurmat dhe e ka njoftuar. Të dy kanë dalë në ballkon, por autorët i kishin kërcënuar me armë.
“Në orën 2:54 dëgjoj zërin e çunit që po bërtiste në ballkon. Kur dal unë, i fundit që hipi në makinë nga të tre kriminelët me maska, me kobure, me pistoletë në dorë u fut në makinë”, thotë tenori. Menjëherë pas kësaj skene, Ylber Gjini ka njoftuar policinë. Forcat e Komisariatit Nr. 6 që patrullonin në zonë janë vënë në ndjekje, por gjurmët e grabitësve humbën në Mëzez.
Kjo nuk është hera e parë që artisti bie pre e grabitësve. Ai tregon se i kanë grabitur më herët biçikletën, motorin dhe një bar kafe që administron. “Tani i bie që të punoj 10 vjet për ta shlyer makinën se e kam marrë kredinë për 10 vjet. I bie të punoj 10 vjet për hajdutin. Më kanë vjedhur tre herë. I bie që gjithë jeta të punosh për hajdutët, për kriminelët”, thotë Gjini.
Gjini shkruan në rrjetet sociale se ndihet i kërcënuar dhe i pa mbrojtur nga strukturat shtetërore, përgjegjëse për mbrojtjen dhe sigurinë e jetës e pronës, e për këtë do të kërkojë mbrojtje nga trupi diplomatik në Shqipëri. Zona ku ka ndodhur ngjarja është e pa ndriçuar dhe pa kamera sigurie. Kjo i ka favorizuar grabitësit që të largohen pa lënë gjurmë. Në këto kushte, artisti Ylber Gjini i bën apel shtetit që të sigurojë familjen e tij dhe të jetë e pranishme në zonën ku ai jeton.
Grabitjet janë shtuar së tepërmi gjatë kohëve të fundit në të gjithë vendin. Jeta e qytetarëve është në rrezik nga maskat që kontrollojnë akset rrugore të armatosur. Rruga e “Kombit” mbahet në kontrollin e maskave dhe drejtuesit e mjeteve nga Kosova kanë frikë të udhëtojnë natën. Para një jave, maskat grabitën një makinë të një shtetasi nga Kosova, duke terrorizuar të gjithë pjestarët e familjes që ndodheshin në makinë.
Po ashtu, pre e grabitjes nga maskat kanë rënë mjaft biznese dhe pronarë dyqanesh. Të shtunën persona të maskuar dhe të armatosur grabitën një karburant në zonën e Ibës në Tiranë. Maskat kanë arritur të marrin një shumë parash nga pika e karburantit, duke kërcënuar rojen. Autorët mësohet se kanë marrë rreth 250 mijë lekë, disa paketa dhe telefonat e punonjësve dhe më pas janë larguar me një automjet në drejtim të paditur për policinë. Policia ende nuk ka mundur të zbulojë dhe arrestojë autorët.
Para pak ditësh, një tjetër grabitje ndodhi në Korçë ku persona të armatosur u futën në banesën e një biznesmeni dhe arritën të marrin nën kërcënimin e armëve rreth 8 milionë lekë. Edhe në këtë rast autorët janë ende të lirë.

R.POLISI

Prokuroria e Fierit ka nisur hetimet ndaj kompanisë “Bankers Petroleum”, për shkatërrimin e banesave nga lëkundjet e tokës në komunën e Zharrzës dhe pjesëve të tjera të zonës së Fierit. Burimet nga organi i akuzës bënë të ditur se ky hetim ka nisur, pasi Policia e Shtetit ka referuar një material shpjegues, referuar edhe në disa dëshmi të banorëve, të cilët pretendojnë se lëkundjet e tokës vijnë si pasojë e shpërthimeve nëntokësore që kryejnë kompania e nxjerrjes së naftës në atë zonë.
Në kallëzimin e policisë, që Prokuroria e ka regjistruar si procedim, thuhet se kërkohet të hetohet nëse lëkundjet e tokës në komunën e Zharrzës dhe zona të ndryshme të Fierit janë tërmet apo shkaktohen nga shpërthimet nëntokësore të kompanisë “Bankers Petroleum”. Ky hetim, thuhet nga burimet e Prokurorisë, ka nisur pikërisht në kohën kur disa banorë të zonës së Zharrzës hynë në grevë urie, të cilët pretendojnë se po i shkatërrohen shtëpitë si pasojë e shpërthimeve nëntokësore nga kompania e nxjerrjes së naftës.
Për të provuar nëse lëkundjet janë tërmet apo vijnë nga shpërthimet nëntokësore, mësohet se Prokuroria ka vendosur të caktojë një grup ekspertësh të institucioneve të ndryshëm për të bërë verifikimin në terren. Veç kësaj, mësohet nga Prokuroria se pas kallëzimit të policisë, janë marrë edhe dëshmitë e disa banorëve të zonës, të cilët vazhdojnë të këmbëngulin se lëkundjet e tokës vijnë si pasojë e shpërthimeve nëntokësore të kompanisë “Bankers Petroleum”. Nga ana tjetër, Prokuroria rreth 1 vit më parë, ka pushuar hetimet për kompaninë “Bankers Petroilium” në lidhje me shpërthimet në zonën e komunës së Zharrzës, ku u dëmtuan disa banesa.

Banorët në grevë urie prej 4 ditësh, qeveria hesht

Banorët e fshatit Zharrëz në Fier kanë hyrë në ditën e katërt të grevës së urisë, ndërsa gjendja e tyre po përkeqësohet. Ata kërkojnë përmbushjen e premtimeve të qeverisë në fund të muajit dhjetor 2016, kur ndërprenë në mes një tjetër grevë urie. Ndonëse iu premtua dëmshpërblim për dëmet e shkaktuara nga kompania “Bankers Petroleum”, deri më tani ata s’kanë marrë asgjë. Kjo i shtyu të rifuten sërish në grevë.
Ndryshe nga greva e disa javëve më parë që u mbështet nga të gjithë, greva e fundit po injorohet nga autoritetet vendore. Banorët thonë se, Komisioni i Verifikimit nuk po kryen detyrën dhe ata nuk po dëmshpërblehen. Lëkundjet e tokës si pasojë e aktivitetit naftënxjerrës në fushën Patos Marinëz kanë shkaktuar dëme në banesa dhe mjedis. Kjo situatë është shoqëruar me protesta të banorëve të zonës.
Qeveria premtoi se do të gjente zgjidhje deri më 31 janar, dhe nuk e mbajti fjalën. Të zhgënjyer dhe të braktisur nga qeveria, kryefamiljarët e fshatit Zharrës së Patosit, kanë rinisur grevën e urisë prej 4 ditësh. Banesat e tyre janë pothuaj të pabanueshme dhe në rrezik për t’u shembur për shkak të shpërthimeve në zonën afër me fushat naftëmbajtëse. Atyre iu premtua një proces vlerësues për dëmet materiale dhe dëmshpërblim deri në datën 31 janar, por asgjë nuk ndodhi.
“Tek disa grevistë kanë filluar shenjat e dehidratimit dhe njëri prej tyre është paraqitur në emergjencë, ku ka marrë mjekimin e duhur. Një tjetër nga grevistët është edhe me hipertension, por nuk pranon të shkojë në urgjencë për trajtim. Ata nuk pranojnë të dalin nga greva dhe si mjek kërkoj që të ndërhyet sa më shpejt për shkak të gjendjes së tyre shëndetësore”, u shpreh Albert Pesha, mjeku që po ndjek situatën e grevistëve.
Grevistët e urisë u vizituan dje nga sekretari për Aksionin Qytetar, Ervin Salianji. Salianji shprehu mbështetjen për grevistët dhe kërkesën e tyre të drejtë për t’u dëmshpërblyer ose për të lëvizur diku tjetër me ndihmën e qeverisë. Ai e cilësoi të papranueshëm që pasuritë natyrore po shfrytëzohen, ndërsa banorët që po dëmtohen nga ky shfrytëzim po neglizohen. “Mezi e kam ndërtuar këtë shtëpi dhe kam rritur fëmijët këtu me vështirësi të shumta. Presim nga Edi Rama. Atë e kemi zgjedhur, por nëse ai ka shitur Shqipërinë, e di ai. Ai duhet të interesohet edhe për familjet tona”, tha një prej banorëve. Salianji ftoi të gjithë banorët dhe qytetarët për të protestuar së bashku në datën 18 shkurt përpara Kryeministrisë.

R.POLISI

Një vrasës është emëruar nga Rama drejtor i OSHEE. Skandali është denoncuar publikisht nga ish-kryeministri Berisha, i cili ka publikuar mesazhin e një qytetari në Facebook. “Kriminelë të të gjitha llojeve bashkohuni rreth Edvinit! Qytetari dixhital denoncon: Ersi Sylejmanin, drejtor në OSSHE si vrasës që ka therur me thikë një njeri”, shkruan Berisha duke publikuar mesazhin e qytetarit.
“Përshëndetje Doktor Sali Berisha. Po ju dërgoj këtë lajm që askush nuk po e nxjerr në gazetë apo nuk po marrin masa administrative kundrejt këtij personi. Ersi Sujlemani është person me precedent penal, person i inkriminuar që nuk e di se kush po e mbron atë person. Ai dhe një kushëri i vet ka therur me thikë një person në mes të Kamzës vite më parë dhe tani është drejtor i OSHEE. Si ka mundësi që mbrohet ky kriminel”, përfundon mesazhi i qytetarit.
Po ashtu, ish-Kryeministri Berisha ka denoncuar ish-kryetarin e Bashkisë së Kavajës, Elvis Roshi për shitje droge pranë një gjimnazi. “Stazhieri dixhital denoncon: Shitjen haptas të drogës nga Elvis Rroshi tek gjimnazistët e gjimnazit “Aleksandër Moisiu”. Bashkëpunimin në këtë krim të drejtoreshës së gjimnazit!”, shkruan Berisha, duke publikuar mesazhin e qytetarit nga Kavaja.
“Përshëndetje doktor. Aktualisht bëj stazhin në gjimnazin e Kavajës “Aleksandër Moisiu”. Në këtë gjimnaz, Elvis Rroshi shet pa ju trembur syri hashash tek të rijtë. Drejtoresha pjesë e LSI është në dijeni të kësaj, po është palë se merr pjesën e vet. Ju lutem denoncojeni këtë fakt meqë jeni në seance plenare”, shkruan qytetari.

Policia greke sekuestroi dje rreth 223 kg drogë të futur nga Shqipëria dhe vuri në pranga 4 shtetas shqiptarë. Droga është sekuestruar në dy operacione të policisë greke. 121 kg marijuanë është kapur në pyllin e Vatohorit në zonën e Follorinës. Shqiptarët kishin kaluar kufirin në këmbë të ngarkuar me 7 çanta që përmbanin 100 pako me 121 kg 88 gram. Shqiptarët e arrestuar janë të moshës, 21, 26, 31 dhe 46 vjeç.
Po dje, në Portin e Igumenicës u kapën 102 kg marijuanë. Droga ishte në një kamion italian me drejtues një shtetas italian 51 vjeç. Lënda narkotike ishte ndarë në 92 pako, ndërsa destinacion kishte Italinë. Bëhet e ditur se droga u zbulua nga qeni antidrogë “Lesi” i skuadrës K9 të policisë greke.
Policia greke sekuestroi të dielën një sasi droge në bregdetin e Katakolos. Mësohet se janë gjetur 5 pako me drogë në det, pranë Ilia-s në shtetin helen. Bëhet e ditur se pakot përmbanin 28 kg marijuanë, ndërsa policia greke dyshon se droga mund të jetë pjesë e sasisë së hedhur nga gomonia që u ndoq të shtunën.  Por nga ana tjetër nuk përjashtohet mundësia që kjo sasi të jetë e drogës së sekuestruar në 22 janar në bregun e Zakynthos, ku deri tani më tani janë gjetur edhe 60 kg të tjera, në 22 janar dhe 2 shkurt.
Trafiku i drogës nga Shqipëria drejt Greqisë vijon për çdo ditë. Të hënën u sekuestruan rreth 120 kg kanabis nga policia greke dhe u vunë në pranga dy transportuesit, ndërsa javën që shkoi u sekuestruan sasira të mëdha droge në tre operacione të policisë greke.

Në seancën e djeshme gjyqësore ndaj deputetit të PS, Armando Prenga, Gjykata mori dëshminë e mjekut Artan Distafa, i cili ka qenë mjek roje natën e ngjarjes. “Dy persona ishin të plagosur me armë zjarri në këmbë, emrat s’i mbaj mend”, ka deklaruar mjeku.
Në seancën e djeshme ishin thirrur për të dëshmuar edhe tre anëtarë e familjes Cali, por ata nuk janë paraqitur për të dëshmuar kundër deputetit Prenga. Gjol, Julian e Dorian Cali ishin parashikuar të dëshmonin seancën e djeshme, por në kushtet e mosparaqitjes së tyre Gjykata kërkoi të shoqërohen me forcë nga policia seancën e radhës.
Armando Prenga akuzohet për plagosje të rëndë, kanosje dhe armëmbajtje pa leje në lidhje me konfliktin për lagunën e Patokut. Sipas Prokurorisë, Prenga është gjetur fajtor për armëmbajtje pa leje, plagosje dhe kanosje të kryera ndaj vëllezërve Tom e Gjok Cali, vepra penale për të cilat ai rrezikon 23 vite burg.
Shkak për këtë konflikt sipas akuzës ishte pronësia mbi Lagunën e Patokut dhe e drejta e shfrytëzimit për peshkim në këtë lagunë. Për herë të parë, në akuzat ndaj deputetit Prenga, Prokuroria flet dhe për një armë automatik të përdorur në përleshjen mes Prengës e Calëve pranë Komisariatit të Kurbinit, por ky automatik nuk është gjetur dhe nuk është identifikuar se cili person e përdori atë natë.
Ndërsa, referuar pistoletës me të cilën u plagos Tom Cali, Prokuroria thotë se ajo është përdorur nga Prenga dhe nuk është pistoleta me leje siç pretendon deputeti, por një armë pa leje.
Nga hetimet rezulton se, më datë 04 shtator 2015, rreth orës 22:30, personi nën hetim Armando Prenga, ka shkuar tek lokali i shtetasit Gjok Cali, ndodhur në Lagunën e Patokut, dhe tek ura e lokalit ka kontaktuar me djalin e tij Dorian Cali dhe nipin Julian Cali, me të cilët ka debatuar. Shtetasi Dorian Cali ka njoftuar për këtë ngjarje, nëpërmjet telefonit, babain e tij Gjok Cali. Ky i fundit është nisur menjëherë në drejtim të lokalit me automjetin e tij. Gjatë rrugës, ai është përballur në vendin e quajtur Fushë Kuqe me shtetasin Armando Prenga, i cili po udhëtonte me automjet bashkë me shtetasit Luigj Skura, Gazmir Jushi dhe Gjon Prenga. Në këtë moment, shtetasit Gjok Cali e Armando Prenga kanë ndaluar automjetet dhe shtetasi Gjok Cali i ka kërkuar shpjegime për ngjarjen e ndodhur me të birin pak më parë. Më pas, ata janë konfliktuar mes tyre dhe Prenga ka nxjerrë pistoletën dhe e ka goditur shtetasin Gjok Cali në kokë me qytën e saj, duke i shkaktuar dëmtime.

Prokuroria për Rrime të Rënda, ka zgjeruar rrethin e personave nën hetim për dosjen e dëshmitarit të mbrojtur Ylvi Beqja dhe ish-hotel “Vollgën” në Durrës. Bëhet e ditur se, veç Emiliano Shullazit dhe të dyshuarve si pjesëtar të bandës së tij, Prokuroria po heton edhe familjarë të Lulzim Berishës, i dënuar si kreu i “bandës” së Durrësit, tashmë i liruar nga burgu. Burimet thonë se, për llogari të këtij hetimi, është sekuestruar kjo deklaratë noteriale, e firmosur në gusht të vitit 2014 nga Ylvi Beqja tashmë me cilësinë e dëshmitarit të mbrojtur dhe motra e Lulzim Berishës.
Sipas dëshmisë së biznesmenit Beqja dhënë në Prokurori, e motra e Lulzim Berishës i ka premtuar kthimin dhe regjistrimin e ish-hotel “Vollgës” në emër të kompanisë arabe, të cilët i përfaqësonte Ylvi Beqja kundrejt shpërblimit prej 500 mijë eurove. Për të justifikuar kalimin e kësaj shume, pas regjistrimit të pronës, Beqja i ka thënë hetuesve, se motra e Lul Berishës i ka kërkuar të firmosë një deklaratë noteriale, duke pretenduar se paratë ia kishte marrë borxh ndër vite. Në dëshmi, biznesmeni Beqja, thotë se është detyruar të firmosë këtë deklaratë, duke pranuar se i kishte marrë para borxh familjes së Lul Berishës fillimisht 300 mijë marka në vitin 1996, një shumë tjetër prej 100 mijë dollarë amerikan në vitin 1998 dhe shumën prej 150 mijë eurove në vitin 2004.
Për kthimin e borxhit me gjithë interesa, Beqja kishte firmosur se do ja kthente deri në fund të muajt tetor të vitit 2014 të gjithë shumën prej 500 mijë eurove. Nëse nuk do ja kthente shumën, e motra e Lul Berishës kishte të drejtë të bllokonte dhe bëhej pronar e të gjitha pronave e aseteve të tjera në vlerën e 500 mijë eurove, që dispnonte Ylvi Beqja. Shumë e cila duhet të paguhej për 2 muaj e gjysëm nga momenti i nënshkrimit të deklaratës. Sipas Prokurorisë, për regjistrimin e ish-hotel “Vollgës” në emër të Ylvi Beqajt, i dyshuari Emiliano Shullazi ka kërkuar dhe marrë 30% të pronës, ndërsa e motra e Lul Berishës ka kërkuar 500 mijë euro për këtë punë. Për këtë fakt, Prokuroria po heton edhe pjesëtarët e familjes së kreut të bandës së Durrësit si bashkëpunëtor në dosjen në ngarkim të Emiliano Shullazit dhe të dyshuarve të tjerë tashmë të arrestuar.
Biznesmeni Ylvi Beqja, ka rrëfyer në Prokurori, kërcënimet e vazhdueshme të bandës së drejtuar prej Shullazit dhe vetë këtij të fundit, që me anë të dhunës i kanë marrë rreth 550 mijë euro para cash. Dosja voluminoze lidhet me ish-hotel “Vollgën” në Durrës, ku Shullazi u bë aksioner pas presioneve dhe kërcënimeve ndaj Ylvi Beqes. Nën kërcënimin e armës, biznesmeni Beqja është detyruar të nënshkruajë para noterit kontratën e dhurimit në vlerën 30 për qind. Gjatë gjithë bisedave të bëra i pranishëm ka qenë edhe personi tjetër në hetim, Gilmando Dani, i cili ka qenë në dijeni të të gjitha bisedave të bëra dhe veprimeve të kryera mes Emiliano Shullazit dhe biznesmenit.
Nga ana tjetër, në të gjitha rastet e zhvillimit të takimeve të biznesmenit me personin në hetim Emiliano Shullazi, ky i fundit ka qenë i shoqëruar me disa persona, të cilët lëviznin të armatosur dhe me disa makina. Edhe në momentin e përpilimit të kontratës së dhurimit, Emiliano Shullazi ka qenë i shoqëruar me shumë persona, të cilët ruanin vendin përreth. Edhe prania e këtyre personave ka ndikuar në krijimin e një situate të posaçme për kërcënim ndaj biznesmenit.

Policia nuk ka arritur të zbulojë ende autorët e shpërthimit me tritol të një banesë dykatëshe në Shkodër. Ngjarja e rëndë ndodhi në Grudën e Re në Shkodër, objekti i sulmit ishte shtëpia e Mark Markut, i cili ndodhej brenda bashkë me gruan e tij dhe një tjetër familjar. Nuk dihen shkaqet e kësaj ngjarjeje, por shpërthimi ka qenë i fuqishëm. I gjithë kati i parë i ndërtesës dykatëshe është dëmtuar nga shpërthimi i fuqishëm. Muret, dyert, dritaret janë rrëzuar në tokë. Fillimisht, autorët kanë shkëputur energjinë elektrike. Më pas kanë realizuar sulmin. Nuk dihet ende se çfarë përbërje ka patur eksplozivi.
Njëra pako që ishte vendosur në kolonën e shtëpisë, rreth 700 gr, shpërtheu dhe shkatërroi plotësisht katin e parë. Dyer e dritare të katit të dytë gjithashtu u dëmtuan. Kur i zoti i shtëpisë doli jashtë, gjeti një tjetër pako me eksploziv që ishte vendosur tek kolona tjetër. Për fat ajo nuk shpërtheu.
Shpërthimi i ka terrorizuar dhe vënë në panik gratë me fëmijën që flinin në katin e sipërm, por fatmirësisht ato nuk pësuan lëndime. Ndërsa kati i parë i ndërtesës është shkatërruar.
Në vendin e ngjarjes ka mbërritur grupi i hetimit, por sipas të dhënave të Policisë, Mark Marku ka deklaruar pasi është marrë në pyetje se nuk e ka idenë se kush janë autorët e kësaj ngjarjeje. Ai ka mohuar të ketë konflikte me persona të tjerë. Ai i ka kërkuar policisë ta zbardhë këtë ngjarje dhe të dijë se kush janë autorët, pasi tani e tutje jeton me frikën se kjo mund të përsëritet. Nga sa mësohet, kanë qenë tre thasë me tritol artizanal të punuar me dorë të vendosura në tri pika të ndryshme, nga të cilët njëri prej tyre fatmirësisht nuk ka shpërthyer.
Familja Marku ka dy banesa në oborr, shtëpinë e vjetër dhe vilën trikatëshe, ku është vendosur lënda eksplozive. Në ditët e zakonshme, familja Marku ka qëndruar te shtëpia e vjetër, sepse ndërtesa e re ishte ende në ndërtim e sipër. Por të shtunën, në shtëpinë e 62-vjeçarit kanë shkuar disa miq, duke bërë që bashkëshortja e tij së bashku me vajzën dhe nipin të dalin për të fjetur te banesa e re. Autorët dyshohet se kanë hyrë pas shtëpisë së re dhe kanë vendosur tre thasët me tritol në tri vende të ndryshme kur të gjithë ishin në gjumë.
Dy prej thasëve kanë qenë të lidhur me një fitil dhe një tjetër me një fitil veçmas. Një nga thasët nuk ka shpërthyer, edhe pse fitili është ndezur, duke bërë që të ketë vetëm dëme materiale dhe të shpëtojnë tre personat që po flinin. Në momentin kur kanë vendosur sasinë e lëndës shpërthyese, në fshat është shkëputur energjia elektrike, duke favorizuar autorët e kësaj ngjarjeje.
Ata kanë prerë telin rrethues në afërsi të banesës dhe janë futur brenda rrethimit. Tre djemtë e Mark Lazër Markut jetojnë në Itali, por sipas babait të tyre as ata dhe as ai vetë nuk kanë konflikte me persona të tjerë. Forcat e Policisë kanë marrë në pyetje disa persona, banorë të asaj zone, por deri më tani nuk kanë arritur që të bien në gjurmët e autorëve të ngjarjes.
Policia tha se, ka dyshime se ky shpërthim mund të ketë ardhur për ndonjë konflikt të mundshëm apo ndonjë histori konflikti të viteve të fundit, edhe pse 62- vjeçari Marku mohon që kjo ngjarje të ketë ndodhur për motive të tilla. Gjithashtu, një pistë tjetër që po hetohet është veprimtaria e djemve të tij në Itali, pasi nuk përjashtohet që ky të ketë qenë një sinjal hakmarrjeje.