Selta Vigo arriti të eliminojë Realin e Madridit në Kupën e Mbretit, duke dhuruar një nga befasitë e këtij edicioni. Por në ndeshjen e së dielës, sërish kundër skuadrës së Zidanit, tekniku Eduardo Berico ka marrë një vendim të çuditshëm, për të futur rezervat.
“E di që ne duhet të kërkojmë maksimumin në çdo takim, por mua nuk më intereson ajo kundër Realit në kampionat. Është më e rëndësishme ndeshja tjetër për Kupën e Mbretit ndaj Alaveshit, mesjavën e ardhshme. Për këtë arsye do të bëj rrotacion me titullarët, duke futur ata që nuk kanë pasur shumë hapësira deri tani, pasi kryesorët më nevojiten në formë të mirë fizike të mërkurën”, deklaroi Berixo. Selta do të presë në shtëpi Realin të dielën në mbrëmje, por ka njoftime se ndeshja është shtyrë për shkak të motit të keq.

Eliminimi nga Lazio në Kupën e Italisë nuk ka lënë asnjë pasojë në kampin zikaltër. Të paktën kështu pretendon trajneri i Interit, Stefano Pioli, në prag të derbit numër 168 të Italisë kundër Juventusit. “Shuplaka” e marrë nga bardhekaltërit, sipas 51-vjeçarit, do të shërbejë si motiv për të shumëfishuar energjitë në 16 javët e mbetura të Serisë A.
“Morëm një mësim të mirë nga Lazio dhe tani e dimë se çfarë duhet të bëjmë. Duhet të jemi një skuadër e bashkuar, të luajmë me intensitet, ritëm dhe shpejtësi. Pavarësisht eliminimit kemi treguar se dimë të luajmë me zemër. Kjo është ajo që na duhet të dielën”, u shpreh Pioli.
Në 10 javët e fundit të Serisë A, as Juventusi nuk e ka patur ecurinë e Interit, por Piolit i duhet të thyejë një tabu të karrierës së tij. “Nëse nuk e kam mundur kurrë në karrierën time Juventusin, kjo ka ndodhur, sepse nuk kam qenë trajner i Interit më parë. Juvja është e fortë dhe këtë e thonë statistikat, mentaliteti, lojtarët dhe trajneri i tyre. Ata janë më të fortët e Italisë, por ne mund t’i vëmë në vështirësi”, tha ai.
Sfida e “Juventus Stadium”, sipas Piolit vlen më shumë se tri pikë, por nuk është vendimtare. “Vlen më shumë se tri pikë, sepse jo më kot quhet derbi i Italisë. Çdo fitore na jep besim, ndërsa humbja na largon nga objektivat. Nuk besoj se është sfidë vendimtare si për ne ashtu edhe për Juventusin”, përfundoi Pioli.

Cristiano Ronaldo mbush 32 vjeç të dielën, por duket se vitet po ndikojnë në ecurinë e sulmuesit portugez. Statistikat e këtij sezoni janë ndjeshëm më të ulëta se ato që jemi mësuar ta shikojmë dhe këtu nuk përfshihet vetëm sasia e golave të shënuar, por edhe elementët që kanë qenë arma e tij e fortë, si duelet në ajër, driblimet dhe goditjet në drejtim të portës kundërshtare.
Lideri i Realit ka një mesatare prej vetëm 0.61 golash të realizuar për ndeshje, duke i hequr ata të shënuar me penallti. Ndërkohë, në 25 ndeshje të zhvilluara në të gjitha kompeticionet, numëron 20 gola, 13 prej të cilëve në kampionat. Gjithashtu, ai ka një rënie të ndjeshme të triumfit në duelet ajrore. Vetëm një vit më parë ishte dominues ndaj kundërshtarëve, me 56.5% të dyluftimeve në favorin e tij, por sivjet ka pasur një zbritje në 44.8%.
E mbani mend Cristianon që kur kishte topin në zotërim, dukej i pakapshëm për shkak të shpejtësisë dhe aftësisë për të kaluar kundërshtarët? Tashmë, janë shumë të tjerë që paraqiten më mirë se ai në këtë aspekt. Saktësisht, në kampionatin spanjoll, plot 99 lojtarë kanë të dhëna shumë më të larta sa u përket driblimeve të suksesshme. Ka qenë forma në rënie e CR7-s që ka ndryshuar deri diku edhe stilin e tij të lojës, i cili nuk përshtatet më me aksionet individuale.
Një tjetër element është edhe saktësia e gjuajtjeve në kuadrat, që arrijnë të konkretizohen në gol. Në vitin e tij të parë në Madrid, ai kishte nivelin më të dobët, kur arriti të shënonte 10.68% të gjuajtjeve në portën kundërshtare. Që prej asaj kohe, kjo statistikë pati një rritje me të vërtetë të ndjeshme, deri në 20%. Por, sivjet është rikthyer të zbresë në norma të ulëta, pasi ka dërguar në rrjetë vetëm 11.39% të tentativave.
Në fakt, pavarësisht se ai nuk është më i nivelit të dikurshëm, kjo nuk e ka penguar Realin që të ketë një ecuri pozitive në kampionat dhe në Ligën e Kampioneve.

Vincenzo Montela nuk sheh shenja krize te Milani i tij. Trajneri kuqezi e pranon se renditja aktuale reflekton atë që skuadra ka merituar në fushën e blertë, por nga ana tjetër këmbëngul se grupi që drejton është rritur në shumë aspekte. “Sigurisht që duhet të përmirësohemi sa u përket rezultateve, sepse në futboll është aspekti që vlen më shumë. Megjithatë unë shoh që skuadra është përmirësuar në shumë drejtime: jemi më të rrezikshëm, e kontrollojmë më shumë topin, e godasim më shpesh portën kundërshtare dhe jemi më kompaktë. Në futboll jo gjithmonë fiton skuadra më e fortë”, u shpreh Montela.
Trajneri kuqezi vlerëson Sampdorian si një nga skuadrat që luan futboll të bukur dhe vë në vështirësi çdo kundërshtar në Serinë A. “Sampdoria është një skuadër shumë e organizuar dhe gjithmonë luan për të fituar. Kjo është meritë e trajnerit, që ka ndërtuar një grup të fortë. Do të jetë një ndeshje shumë e vështirë. Duhet të luajmë me shpejtësi dhe qetësi”, tha ai.
Montela flet me keqardhje për mungesën e Bonaventurës, ndërsa për Deulofeun dhe Ocampos, dy afrimet e janarit, dha këtë koment. “Janë dy lojtarë që kur ishin 18-vjeçarë konsideroheshin lojtarë me shumë perspektivë. Duhet të kuptojmë pse nuk kanë shpërthyer. Detyra ime është t’i ndihmoj që të tregojnë më të mirën e tyre. Duhet të përmirësohen në finalizim”, tha Montela.
Ndërkohë për Milanin vijnë lajme shumë të mira nga investitorët kinezë, të cilët do të derdhin 500 milionë euro në arkat e kuqezinjve, ku 100 milionë do të shpenzohen gjatë merkatos së verës. Brenda 10 ditësh në këshillin admistrativ do të përfshihen përfaqësuesit kinezë, ndërsa mbyllja përfundimtare e marrëveshjes është fiksuar për datën 3 mars.
Ndërkohë, ish-mbrojtësi i Juventusit, Martin Kaceres, gjendet në Itali ku pritet të nënshkruajë me Milanin. Por mbrojtësi duhet të kalojë më parë një sërë testesh fizike të stërzgjatura me kuqezinjtë, të cilët kanë dyshim për aftësitë e tij fizike. Futbollisti nuk luan prej një viti, pasi më 3 shkurt 2016 dëmtoi tendinën dhe që atëherë mbeti jashtë fushave të lojës me skuadrën e Juventusit, nga e cila u shkëput në fund të sezonit.
Kaceres nuk u aktivizua me asnjë klub në pjesën e parë të sezonit, ndaj për të parashikohet që testet mjekësore para firmës në kontratën me kuqezinjtë do të jenë shumë më të hollësishme se ato që kryejnë normalisht futbollistët e tjerë. Përveç vizitave rutinë, lojtarit do t’i bëhet një kontroll i detajuar i strukturës fizike, për të shmangur mundësinë që të nënshkruajnë me një futbollist, i cili ka tendencë të dëmtohet. Sipas mediave italiane, akordi me Kaceres do të jetë deri në fund të sezonit, periudhë për të cilën mbrojtësi do të paguhet 400 mijë euro.

Shqiptarët janë protagonistë absolutë te Terek Grozni. Skuadra ruse vazhdon fazën përgatitore në Rusi, ndërsa fituan 3-1 në miqësoren e luajtur përballë çekëve të Brno-s. Treshja shqiptare, Berisha, Balaj dhe Roshi u aktivizuan në 45 minutat e dyta të lojës, me trajnerin Rakhimov që si zakonisht përdori dy formacione të ndryshme.
Nëse pjesa e parë u mbyll në barazim 1-1 dhe me një lojë të vakët, për t’i dhënë impuls lojës mendoi pikërisht treshja ofensive BBR, falë të cilëve Tereku dominoi dhe në fund arriti të fitonte.
Bekim Balaj i dha avantazhin skuadrës çeçene në minutën e 53-të të sfidës, duke realizuar me kokë një gol nga një pozicion mjaft i vështirë. Sulmuesi kuqezi realizoi golin e tretë për Terekun dhe të dytin personal pak pasi kishte kaluar një orë lojë, këtë herë i shërbyer nga Bernard Berisha, që me inkursionet në krah ishte një prej lojtarëve më të rrezikshëm për kundërshtarët nga Çekia.
Një paraqitje e mirë kjo e treshes ofensive shqiptare, që cilësohet si një prej pikave më të forta të Terek Groznit për gjysmën e dytë të Premierligës ruse dhe drejt objektivave të skuadrës për një biletë në kupat e Europës.

Mërgim Mavraj gjen fitoren e parë në Bundesligë me fanellën e Hamburgut ku u transferua gjatë merkatos së dimrit. Mbrojtësi shqiptar u aktivizua titullar për të tretën ndeshje rresht duke dhuruar një paraqitje pozitive në suksesin 1-0 që Hamburgu regjistroi ndaj Bayer Leverkusen në ndeshjen e parë të javës së 19 të Bundesligës. Goli i Papadopoulos në minutën e 73 rezultoi vendimtar për të besuarit e Marcus Gisdol.
Ndeshja nuk u ngjit asnjëherë mbi nivelin mesatar me “aspirinat” që vazhdojnë të tregojnë anemi në fazën sulmuese, nërsa Hamburgu cinik arriti të ruante portën të paprekur dhe për më tepër duke gjetur një gol me aromë mbijetese. Kjo fitore e ngjit skuadrën e Mavrajt në vendin e 16 me po kaq pikë, ndërsa Bayer Leverkusen mbetet në vendin e 9 me 24 pikë.

Jahmir Hyka është pjesë e skuadrës së Major League Soccer, San Jose Earthquakes. Lajmin e bën të ditur vetë klubi amerikan në një deklaratë të publikuar në faqen zyrtare ku thekson se kontrata është disavjeçare. “Hyka është një lojtar që i shton elementin surprizë skuadrës tonë në çdo ndeshje që do të luajë. Ai është një lojtar shumë i aftë teknikisht si në mbrojtje ashtu edhe në sulm dhe në situatat një për një nuk jep pika referimi. Kjo do të thotë se sulmuesit tanë do të furnizohen me topa nga një lojtar që di të sulmojë në disa fronte”, deklaron menaxheri i San Jose, Jesse Fioranelli.
Në vijim, faqja zyrtare e klubit amerikan bën një përmbledhje të ecurisë së 28-vjeçarit shqiptar që gjatë këtij sezoni me Luzernën ka shënuar 6 gola dhe ka dhuruar 15 asiste. “Jahmiri është një lojtar krijues që do t’i japë më shumë fuqi fazës tonë ofensive”, thekson trajneri Dominic Kinnear, sipas të cilit, ai mund të luajë në të dyja krahët e mesfushës. Në fund njoftimit, San Jose Earthquakes vë theksin në faktin se Hyka është pjesë e kombëtares shqiptare me të cilën debutoi që në vitin 2007 në moshën 18-vjeçare.