Sekretari i Përgjithshëm i NATO-s, Stoltenberg qendroi (03.02) në Kosovë, ku takoi përfaqësuesit më të lartë politikë të vendit ata shqiptarë dhe serb si dhe komandantin e KFOR-it e përfaqësuesit e pranisë ndërkombëtare.
Sekretari i Përgjithshëm i NATO-s, Jens Stoltenberg, tha në Prishtinë, se stabiliteti i Ballkanit është i rëndësishëm për NATO-n, ndërsa KFOR-i do të vazhdojë misionin e vet në Kosovë, për aq kohë sa të jetë e nevojshme. Ai siguroi qytetarët e Kosovës se forcat paqeruajtëse garantojnë paqen në Kosovë dhe do të mbeten të përkushtuara për një mjedis të sigurtë. Këto komente Sekretari i Përgjithshëm i NATO-s, Jens Stoltenberg, i bëri gjatë një vizite që realizoi në Prishtinë, ku takoi përfaqësuesit më të lartë politik të Kosovës, si ata shqiptarë dhe serb, komandantin e KFOR-it dhe përfaqësuesit e pranisë ndërkombëtare. “NATO është në Kosovë dhe ka forcën e saj KFOR këtu, që garanton paqen dhe sigurinë në këtë rajon, si pjesë e angazhimit për ruajtjen e paqes në Evropë. KFOR-i me mbi 4.500 ushtarë do të jetë i pranishëm në Kosovë për aq kohë sa do të jetë e nevojshme. Por, tani është koha për dialog. Prishtina dhe Beogradi duhet të vazhdojnë dialogun e ndërmjetësuar nga Bashkimi Evropian”, tha Jens Stoltenberg, gjatë një konference të përbashkët për media me kryeministrin e Kosovës, Isa Mustafa.

“Është jetësore që marrëveshjet e arritura të zbatohen”
Sekretari i Përgjithshëm i NATO-s tha, se marrëveshjet e arritura me Serbinë në kuadër të dialogut duhet të zbatohen, sepse kjo është e vetmja zgjidhje në procesin e normalizimit ndërmjet dy vendeve. “Është jetësore që marrëveshjet e arritura të zbatohen. Duhet të vazhdojmë me procesin e normalizimit, sepse kjo është e vetmja zgjidhje. NATO e ka forcën e KFOR-it për ta ruajtur paqen këtu. Policia është forca e parë, pastaj EULEX-i dhe pastaj KFOR-i, që të ruajnë sigurinë e vendit dhe ne do të veprojmë gjithmonë aq sa është e domosdoshme për të ruajtur paqen”, tha Stoltenberg, duke shtuar se “NATO i jep mbështetje të plotë dialogut të sponsorizuar nga Bashkimi Evropian. Stoltenberg nuk pranoi të flasë, nëse Rusia e ka shtrirë ndikimin në Ballkan, por konfirmoi, siç tha se, “kjo pjesë e Evropës mbetet zonë strategjike e rëndësishme për NATO-n”.
Autoritetet e Prishtinës ka kohë që dëshirojnë që Forcën e Sigurisë së Kosovës, FSK, ta shndërrojnë në ushtri të Kosovës, mirëpo për ta arritur këtë duhet ndryshim i Kushtetutës me miratimin edhe të përfaqësuesve të serbëve në Parlamentin e Kosovës. E përfaqësuesit e serbëve, në këtë fazë, nuk janë të gatshëm ta mbështesin krijimin e ushtrisë së Kosovës.
Lidhur me krijimin e ushtrisë së Kosovës, Sekretari i Përgjithshëm i NATO-s tha, se “NATO mbështet zhvillimin e kapaciteteve aktuale të Forcës së Sigurisë së Kosovës, ndërsa transformimi mbetet çështje ligjore që duhet ta zgjidhin institucionet e Kosovës”.
Kryeministri i Kosovës, Isa Mustafa, nga ana e tij tha, se i gjithë spektri politik në Kosovë ka qëndrim unik sa i përket procesit të integrimit në Bashkimin Evropian dhe në NATO, duke rikonfirmuar se Kosova mbetet e angazhuar për dialog me Serbinë, në mënyrë që të tejkalohen tensionet aktuale.
“Dialogu me Serbinë është orientim strategjik i politikave tona për normalizimin e marrëdhënieve, mirëpo përkundër kësaj qasjeje në kohët e fundit kemi pasur disa provokime sistematike nga Beogradi, për të cilat jemi marrë vesh në Bruksel që t’i tejkalojmë me paqe”, tha kryeministri Isa Mustafa.
Ndërsa, sa i përket transformimit të Forcës së Sigurisë së Kosovës në ushtri të Kosovës, kryeministri Mustafa tha se, “ky transformim po mbahet peng nga ana e Serbisë, përmes ndikimit që ka tek deputetët serb në Parlamentin e Kosovës”.
Edhe Presidenti i Kosovës Hashim Thaçi, në takimin me Sekretarin e Përgjithshëm të NATO-s, e vlerësoi lart punën e KFOR-it në Kosovë duke thënë, se “me përkushtimin e tyre forca paqeruajtëse KFOR ka arritur që të jetë institucioni më i besueshëm për qytetarët tanë”.
“Kosova e vlerëson shumë rolin tuaj dhe gatishmërinë e shprehur për të krijuar një bazë për rritjen e bashkëpunimit tonë. Shteti ynë mbetet i përkushtuar për avancimin e marrëdhënieve me NATO-n, si në rrafshin politik, ashtu edhe praktik”, i tha Presidenti Thaçi, shefit të NATO-s.

EULEX: Nuk ka informata lidhur me armët në Veri
Ditë më parë në një intervistë për DW, Presidenti i Kosovës, Hashim Thaçi tha, se “Serbia po armatos serbët në Veri të Kosovës”, me qëllim destabilizimin e asaj pjese. Nga ana tjetër, kryeministri i Serbisë, Aleksandër Vuçiq tha, se Prishtina zyrtare “po dërgon forcat speciale të policisë në Veri me qëllim të frikësimit të serbëve”. Por zyrtarë të misionit të BE-së për policinë dhe drejtësi EULEX, i thanë DW-së në Prishtinë, se ata nuk kanë informacione që në Veri të Kosovës po hyjnë armë nga Serbia për civilët serbë. “EULEX-i nuk ka informata të tilla në lidhje me armët në Veri. Ne inkurajojmë të gjithë ata që kanë ndonjë dëshmi në lidhje me trafikimin e armëve në Veri të Kosovës të informojnë Policinë e Kosovës. EULEX-i mbetet i angazhuar në veri të Kosovës në rolin e përgjegjësit të dytë për çështjet e sigurisë”, tha Besa Domi zëdhënëse e misionit EULEX.
Beogradi dhe Prishtina edhe pas dy raundeve të dialogut në nivel të lartë politik që u zhvillua në Bruksel me datën 24 janar dhe 1 shkurt, vazhduan me deklarata “nxitëse”, ndonëse para shefes së diplomacisë evropiane që i ftoi në takime, ata ishin zotuar që do të kontribuojnë për uljen e tensioneve. Maja Koçijançiç, zëdhënëse e Federika Mogherinit, tha se BE-ja shpreh keqardhje për “kumtesat nxitëse të përsëritura”.
“Në mbledhjen në kuadër të dialogut në nivel të lartë të presidentëve dhe kryeministrave të Serbisë dhe Kosovës, është arritur marrëveshja për përmbajtje nga mesazhet dhe kumtesat nxitëse. Shprehim keqardhje të madhe për kumtesat ndezëse të përsëritura”, tha Maja Koçijançiç, duke ftuar palët që t’i qetësojnë mesazhet dhe të vazhdojnë me përpjekjet për uljen e tensionit.

Në komentet e para për stafin e Departamentit të Shtetit, kryediplomati i ri amerikan, Rex Tillerson, i këshilloi ata dhe punonjësit e tjerë të mos lejojnë që bindjet e tyre personale të bëhen pengesë për të punuar si një ekip i vetëm.
Rex Tillerson i bëri komentet në hollin e Departamentit të Shtetit në ditën e tij të parë në detyrë. Vetëm pak ditë më parë, rreth një mijë zyrtarë të Departamentit të Shtetit, me anë të një memoje shprehën kundërshtimin e tyre ndaj ndalimit të përkohshëm nga ana e Presidentit Donald Trump të hyrjes së njerëzve nga shtatë vende me shumicë myslimane.
Zoti Tillerson u zotua se, personeli i Departamentit të Shtetit do të përdorej në mënyrën më të efektshme të mundur, por shtoi:
“Për këtë mund të duhen disa ndryshime në mënyrën se si punohet tradicionalisht në këtë departament. Ndryshimi për hir të ndryshimit mund të jetë kundërproduktiv dhe kjo nuk do të jetë kurrë mënyra e ime e veprimit”.
Sekretari i ri i Shtetit pranoi ekzistencën e një hendeku të thellë në politikën amerikane, duke u kërkuar atyre, të cilët tani do të punojnë për të, që ta përqendrojnë vëmendjen te misioni i tanishëm:
“Ndershmëria do të jetë bazë e politikës sonë të jashtme, dhe këtë do ta fillojmë me mënyrën sesi ndërveprojmë me njëri-tjetrin”.
Senati amerikan e konfirmoi të mërkurën emërimin e zotit Tillerson, ish-shef ekzekutiv i gjigantit të naftës dhe gazit Exxon Mobil. Vetëm tre demokratë votuan kundër tij.
Ish-ndihmës Sekretari i Shtetit, Thomas Countryman tha se, pavarësisht ndarjeve politike në Uashington, departamenti do të jetë i bashkuar nën zotin Tillerson:
“Ai vjen në një departament, ku ka dhjetëra mijëra profesionistë shumë të kualifikuar, të cilët i dëshirojnë atij sukses dhe do të bëjnë gjithçka që ai të ketë sukses”.
Zoti Tillerson trashëgon disa sfida globale, siç janë lufta civile në Siri dhe aftësitë në rritje të Koresë së Veriut në fushën bërthamore dhe të raketave.
Këtyre u shtohet edhe agresiviteti në rritje i Kinës, sidomos shtimi i pranisë së saj ushtarake në Detin e Kinës Jugore.

Në Paris, një ushtar francez plagosi me armë një burrë të armatosur me hanxhar. Personi kishte dy çanta në shpinë dhe po përpiqej të hynte në Muzeun e Luvrit.
Policia tha se personi iu vërsul patrullës së ushtarëve, duke thirrur në arabisht “Allahu akbar”, pasi i ishte thënë se nuk mund të hynte në zonën e dyqaneve me dy çantat që mbante në shpinë.
Zona e dyqaneve ndodhet nën muzeun e Luvrit.
Policia tha se njëri prej ushtarëve qëlloi pesë herë me armë ndaj personit, duke e plagosur atë, ndërsa njëri prej ushtarëve u plagos prej tij.
Kryetarja e Bashkisë, Anne Hidalgo, lavdëroi ushtarët dhe policët e pranishëm tek objekti.
“Do të doja të vlerësoja efektshmërinë e forcave të policisë dhe ushtrisë që mundën ta neutralizojnë përpara se ai të hynte në Luvër, pasi u ndalua në zonën e kontrollit. Mendimet e mia janë me ushtarin e plagosur dhe dua të shpreh solidaritetin e të gjithë parizienëve, pasi ai ndaloi sot në mëngjes dikë që do të sulmonte shumë njerëz të tjerë”.
Zyrtarët e sigurisë thanë se në çanta nuk u gjetën eksplozivë apo materiale të tjera të rrezikshme.
Fillimisht u njoftua se ishte ndaluar edhe një i dyshuar i dytë, por që më vonë u tha se, nuk kishte patur lidhje me sulmin.
Policia ka lejuar sërish hyrjen e vizitorëve, por vazhdon të ruajë masa të larta sigurie.

Presidenti i Maqedonisë, Gjorge Ivanov, nuk e mandatoi opozitën për krijimin e qeverisë duke deklaruar, se ka vendosur kushte për mandatimin për qeverisje. Kjo deklaratë e tij ka ngjallur mjaft reagime. Presidenti i Maqedonisë, Gjorge Ivanov në deklaratën drejtuar opinionit tha, se mandatin për formimin e qeverisë së re do ta marrë partia ose koalicioni që do të dëshmojë, se ka siguruar 61 mandate. Por i mandatuari, sipas presidentit, duhet të plotësojë paraprakisht dy kushte, në programin e tyre të kenë dy prioritete kryesore: mbrojtjen e interesave shtetërore ç’ka nënkupton ruajtjen e karakterit unitar të shtetit, si dhe reforma sistematike e gjithpërfshirëse pas krizës që kaloi vendi, Maqedonia.

LSDM: Ivanov shkel Kushtetutën
Presidenti Gjorge Ivanov është duke shkelur Kushtetutën dhe ligjet e vendit, ai duhet të japë llogari, thotë zëdhënësi i Lidhjes Socialdemokrate të Maqedonisë Petre Shilegov: “Gjorge Ivanov nuk ka të drejtë ta bëjë këtë diskriminim politik. Ai ia dha mandatin Nikolla Gruevskit, duke mos kërkuar nënshkrim nga 61 deputetë dhe duke mos e kushtëzuar me program. Kështu që nuk ka të drejtë as liderit të LSDM-së, Zoran Zaev t’ia kërkojë këtë. Kjo është një shkelje e patolerueshme e Kushtetutës nga ana e Ivanovit”, shprehet Shilegov.

Partitë shqiptare ende të pavendosura, disa preferojnë Zaevin
Bashkimi Demokratik për Integrim i është rikthyer konsultimeve partiake lidhur me pozicionin e partisë pas takimit me presidentin Ivanov. Nga BDI thonë se të gjitha opsionet janë ende në tryezë. Dy partitë e tjera lëvizja BESA dhe Aleanca për Shqiptarët kanë konfirmuar mbështetjen e tyre për Zaevin. Orhan Murtezani nga BESA thotë, se përkrahja ndaj Zaevit për marrjen e mandatit duke mbledhur 61 nënshkrime nuk nënkupton që ata me automatizëm do të pranojnë të jenë pjesë e qeverisë së ardhshme. Aleanca për Shqiptarët është e gatshme që t’ia japë nënshkrimet atij mandatari, i cili nuk ka qasje refuzuese ndaj deklaratës së përbashkët të partive politike, gjegjësisht ky parim vlen edhe për mandatarin eventual nëse është ai i LSDM-së, Zoran Zaev.
“Ne jemi të gatshëm të përkrahim qeverisjen vetëm me disa kushte, të cilat janë pjesë e deklaratës, por fillimisht do të kërkojmë që të votohet ligji për përdorimin e gjuhës shqipe dhe mandej do të përkrahim qeverisjen”, ka deklaruar Flakron Bexheti nga Aleanca për Shqiptarët. Të heshtur vazhdojnë të mbeten dy deputetët e PDSH-së.

Ekspertët: Presidenti Ivanov tejkalon kompetencat
VMRO-DPMNE kërkon zgjedhje të reja, përderisa LSDM dhe partitë shqiptare presin që presidenti Ivanov të bëjë atë që i takon sipas Kushtetutës dhe t’i japë mandatin partisë së dytë për ta formuar qeverinë. Njohësit e çështjeve politike vlerësojnë, se partitë e tjera nuk duhet të bien në grackën e VMRO-DPMNE-së për zgjedhje të reja, vetëm pse kjo e fundit dështoi në formimin e qeverisë.
Profesor Bekim Kadriu thotë, se Presidenti Ivanov nuk mundet që të përcaktojë përmbajtjen e programit të qeverisë së ardhshme e asesi të kushtëzojë mandatarin e ri. Ai ka për detyrë vetëm t’ia besojë mandatin atij që do të sigurojë shumicë parlamentare e asgjë më tepër. “Tregon qasje skajshmërisht selektive. Ai i tejkalon kompetencat e tij kushtetuese duke mos e respektuar parimin e qartë të ndarjes së pushtetit. Sipas Kushtetutës Ivanov nuk ka mundësi të parashikojë dhe të imponojë kushte të caktuara për mandatarin e ardhshëm”, thekson Kadriu.
Analisti politik, Petar Arsovski, thotë se Presidenti Ivanov me qëndrimin e tij nuk ofroi dalje nga kriza, po thellim të saj. “E futi Maqedoninë në krizën më të madhe politike. Ai është skajshmërisht joparimor dhe sjell vendime selektive. Mendoj se Presidenti Ivanov duhet të japë dorëheqjen ose atij t’i inicohet impeachment, pra të shkarkohet”, thotë Arsovski.
Politologu Bashkim Bakiu vlerëson se shkuarja në zgjedhje të parakohshme krijon situata të paparashikueshme. “Zgjedhjet e parakohshme janë shpëtim vetëm i VMRO-DPMNE-së, konkretisht kthimi i Gruevskit prandaj ky opsion duhet eliminuar nga axhenda politike shqiptare. Nga ana tjetër kemi LSDM me Zaevin, që përkrah funksionimin e PSP-së dhe mund të inkorporohet platforma shqiptare. Kjo situatë duhet shfrytëzuar”, vlerëson Bashkim Bakiu.
Profesor Lubomir Frçkovski thotë se, Presidenti George Ivanov nuk mund të vlerësojë programe partiake për arsyen se nuk ka kompetenca të tilla kushtetuese.  “Një nga punët më delikate në kushtetutat e shteteve liberale është balancimi i forcave dhe ndarja e pushtetit. Në këtë rast, kjo nuk është punë e presidentit, kjo është punë dhe detyrim i Parlamentit. Ivanov i merr me kokën e vet kompetencat e Parlamentit”, shpjegon profesor Frçkovski.

Vetëm me vullnet politik mund të tejkalohet kriza
Situata politike në Maqedoni ende është e rënduar dhe është i nevojshëm vullneti politik që të dilet nga ajo, ka thënë Christine Altahauser, ambasadore e Gjermanisë në Shkup. “Situata politike në Maqedoni ende është e rëndë, ndërsa vullneti politik është gjithmonë një parakusht për një përparim politik. Në këtë kontekst presim që haptazi presidenti Ivanov t’i pranojë qëndrimet e të gjitha partive politike. Ne do të vazhdojmë t’i përkrahim proceset e reformave në vend për më shumë kushte të mira demokratike”, ka theksuar Altahauser.
Rusia konstaton thellim serioz të krizës politike në Maqedoni dhe ndikim të fuqishëm të jashtëm, thuhet në reagimin e Ministrisë së Punëve të Jashtme të Federatës Ruse lidhur me situatën në Maqedoni. Zgjedhjet e parakohshme parlamentare nuk kontribuan për zgjidhje të situatës.
“Vazhdon ndikimi i thellë i jashtëm ndaj forcave politike në Maqedoni, me qëllim që Perëndimi t’i shmangë politikanët maqedonas, të cilët nuk i pëlqejnë pavarësisht vullnetit të shprehur qartë në zgjedhje nga qytetarët në dobi të koalicionit”, për një Maqedoni më të mirë”. Manipulimi i paturpshëm makiavelist me vullnetin e votuesve mund të shkaktojë përshkallëzim të gjendjes në Maqedoni dhe ta prishë stabilitetin e brishtë në të gjithë rajonin”, thekson Ministria e Jashtme ruse.

Kancelares në fillim iu desh të dëgjojë shumë kritika, se vizita e saj tek Erdogani e forcon atë në moment të papërshtatshëm. Por Michael Lehmann mendon, se fjalët e hapura të Merkelit ishin me vlerë.
“Opozita është komponente e demokracisë”. Kjo ishte fjalia e thjeshtë, por qendrore e Kancelares gjermane të enjten (02.02) në kuadër të vizitës në Ankara. Me shumë gjasë, Presidenti turk Erdogan këtë fjali e injoroi. Por Kancelarja foli hapur, atë që shumë do të kishin dashur t’ia thonin më qartazi në sy Presidentit të pushtetshëm në Turqi: t’i jepet fund shtypjes së lirisë së mendimit! Të ruhet ndarja e pushteteve! Të zbardhen menjëherë dhe me rigorozitet akuzat për tortura!
Ne nuk e dimë, se sa hapur ishin në të vërtetë fjalët, që ka përdorur Kancelarja në bisedën personalisht me Erdogan-in. Por ishte dhe është e rëndësishme, që një sundimtari, i cili prej muajsh vepron me kaq kokëshkretësi, t’i bëhet një kritikë kaq e qartë dhe e hapur nga ana tjetër prej një gruaje të fuqishme që qeveris në mënyrë demokratike – edhe pse në disa pika ato ishin formuluar indirekt.
Po aq i rëndësishëm është edhe takimi me dy partitë e mëdha opozitare turke. “Të dëgjohet dhe të respektohet zëri i atyre që mendojnë ndryshe!” Ky mesazh i Kancelares gjermane vlen jo vetëm për Erdoganin dhe rrethin e tij të ngushtë të përkrahësve, por ai duhet të tërheqë vëmendjen edhe ndaj gjysmës tjetër të Turqisë, që nuk është dakord me kursin aktual të qeverisjes në vend, e që dita-ditës po i hiqet e drejta e fjalës.
Kësisoj, dita e vizitës së Merkelit pavarësisht kohës së kufizuar të qendrimit mund të mbështesë ata, të cilët kryejnë me vështirësi vërtetë punë opozitare, duke rrezikuar jetën. Vizita e Merkelit, pavarësisht se si e paraqesin atë mediet turke, është një sukses – për kancelaren, por edhe për njerëzit në Turqi, të cilët nuk e konsiderojnë pa alternativë Erdogan-in dhe regjimin e tij.

Presidenti i Bjellorusisë, Alyaksandr Lukashenka, e ka kritikuar Rusinë, gjatë një konference të sotme për gazetarë në Minsk, duke e akuzuar se nuk po i respekton marrëveshjet ndërmjet dy vendeve fqinje dhe se e përdor furnizimin me gaz për ta “kap për fyti” Bjellorusinë.
Duke folur para afro 50 gazetarëve vendas dhe të jashtëm, Lukashenka tha se Rusia e kishte “kaluar kufirin” e marrëveshjeve me Bjellorusinë me një “lëvizje të lapsit”.
Ai i është referuar veprimit të Rusisë për të ndërmarrë kontroll të ashpër në kufirin e përbashkët, derisa Bjellorusia përgatitet, që prej 9 shkurtit, ta zbatojë regjimin e lëvizjes pa viza për udhëtime të shkurtëra me afro 80 vende.
Lukashenka ka sugjeruar se, Rusia është përpjekur ta forcojë ndikimin e saj ndaj shteteve të vogla, duke synuar kontroll të gazsjellësve të gazit dhe duke e përdorë gazin dhe naftën si mjet të forcës.
Presidenti i Bjellorusisë tha se, “pavarësia nuk mund të krahasohet me naftë” dhe se vendi i tij, që për një kohë të gjatë ishte i varur nga furnizimet e subvencionuara të energjisë ruse, do të gjejë burime të tjera të naftës dhe gazit, nëse paraqitet e nevojshme.