Enrik Sulejmani, i dorëhequr nga posti i drejtorit të Policisë së Burgjeve më 2013 për shkak të precedentëve penalë është emëruar koordinator i Partisë Socialiste në Kamëz. Ky lajm është bërë i ditur dje nga ish-kryeministri Berisha, i cili përmes një postimi në Facebook ka publikuar denoncimin e një qytetari. “Në Partinë Siçiliste penaliteti është medalje! Qytetari dixhital denoncon: I larguari nga detyra nga LSI, e drejtorit të Përgjithshëm të Burgjeve, Enrik Sulejmani, gradohet në koordinator të Partisë Siçiliste për Kamzën”, shkruan Berisha. “Përshëndetje z.Berisha. Koordinatori elektoral për PS e Kamzës është emëruar Enrik Sulejmani. Një person me precedentë penalë, kjo gjë e pasqyruar dhe nëpër media që më 2013 ku në atë kohë u emërua nga Ilir Meta si drejtori i Përgjithshëm i Policisë së Burgjeve. Ka qëndruar në detyrë vetëm 1 javë dhe pas reagimit tuaj ka dhënë dorëheqjen, mbasi u hodh në rrugë nga Meta, tashmë këtij personi i besohet koordinimi i Kamzës për PS. Një person me të kaluar kriminale”, thuhet në denoncimin e postuar nga Berisha. Enrik Sulejmani u dorëhoq nga posti i drejtorit të Policisë së Burgjeve më tetor të 2013, pas akuzave të opozitës dhe medias për implikimin e tij në trafikun e klandestinëve në Rinas. Sulejmani u vendos në këtë post në tetor të 2013, ndërsa PD e akuzoi atë për probleme që lidheshin me drejtësinë.
Rusia ndërhyn në Maqedoni
Ashtu siç pritej edhe Rusia ka reaguar për ngërçin që ka mbërthyer politikën në vendin tonë fqinj në Maqedoni ku nuk po formohet dot qeveria pa zgjedhjeve të fundit. Ministria e Jashtme e Federatës ruse ka dalë me një deklaratë të posaçme mbi zhvillimet në këtë vend duke paralajmëruar përkeqësim të situatës jo vetëm në këtë vend, por në gjithë rajonin tonë. Sipas kësaj ministrie konstatohet një përkeqësim i situatës në Maqedoni, ndërkohë që duket se zgjedhjet e parakohshme të muajit dhjetor, të imponuara nga “bombat e Zaevit” nuk kanë dhënë zgjidhjen e premtuar. Në këtë kuadër Kremlini paralajmëron se ndërhyrja e huaj mund të çojë në shpërthimin e situatës në Maqedoni, por edhe në gjithë Ballkanin.
“Duket se forcat politike në Maqedoni i janë nënshtruar ndikimeve të vrazhda të huaja nën slogane pseudodemokratike. Qëllimi i këtyre aktiviteteve është likuidimi i politikanëve maqedonas që nuk i përshtaten Perëndimit dhe riformatimi i qeverisë në kundërshtim me votën e qytetarëve që ishte në favor të koalicionit të udhëhequr nga Nikolla Gruevski dhe Ali Ahmeti. Është veçanërisht alarmuese që politikanë që përfaqësojnë një komunitet etnik kanë fuqinë për të vendosur bazuar në ultimatume të nxitura nga forca të jashtme, çka bllokon përfaqësimin e komuniteteve të tjera etnike në koalicionin e ardhshëm qeverisës në një vend multietnik dhe multifetar. Manipulimet e paturpshme makiavelike të vullnetit të votuesve mund të çojnë në shpërthimin e situatës në Maqedoni dhe në prishjen e stabilitetit të brishtë në të gjithë Ballkanin”, thuhet ndër të tjera në këtë deklaratë të fortë.
Duka: Durrësi si zonë lufte, qyteti nuk është pronë e Dakos
Kryetari i Partisë Agrare Ambientaliste, Agron Duka, ka reaguar për situatën në Durrës. Përmes një reagimi për mediat, Duka duke iu drejtuar kreut të Bashkisë së Durrësit, Vangjush Dako, thotë se “qyteti është bërë si zonë lufte”. Kreu i PAA ndalet tek investimet e nisura në këtë qytet, por për shkak të vonesës së punimeve, e kanë vështirësuar ndjeshëm lëvizjen në rrugë.
“Meqenëse po flas për qytetin e Durrësit, nuk mund të lë pa përmendur një problem shumë shqetësues të kohëve të fundit për qytetarët durrsakë. Është fjala për projektin “Veliera”. Nëse do të shkoni sot në Durrës, në afërsi të Vollgës për shkak të kantierit të këtij projekti, qyteti ka marrë pamjen e një zone lufte, ku zbatimi në terren i këtij projekti është kthyer në një bombë ekologjike për qytetin”, shprehet Duka.
“Në media është denoncuar vazhdimisht batërdia që po i bëhet mjedisit nga ky kantier ndërtimi, i cili është ngritur jashtë çdo parametri teknik dhe mjedisor, duke shkaktuar një ndotje të jashtëzakonshme pothuaj gjatë gjithë ditës.
Firma që po kryen punimet pa u shqetësuar aspak, vazhdon në mënyrë flagrante të depozitojë në det qindra ton inerte. Kjo është një arrogancë e pashoq që vazhdon prej muajsh nën hundën e Bashkisë Durrës dhe të qeverisë shqiptare.
Prandaj unë nuk mund të jem indiferent ndaj këtij fenomeni, i cili nëse do të vazhdojë kështu, do të ketë pasoja të parikuperueshme për ekuilibrin natyror të krijuar me qindra vite. Unë shpresoj që Kryeministri do t’i tërheqë vëmendjen, vartësit të tij në krye të Bashkisë Durrës, arroganca e të cilit po e trajton Durrësin si pronën e tij…….
Por përveç masakrës ekologjike që zbatimi i projektit “Veliera” po i bën Durrësit, ky investim vlerësohet i dëmshëm për qytetin edhe në aspektin e ruajtjes së vlerave të trashëgimisë kulturore. Që në ditën e prezantimit të tij si projekt, artitektë dhe arkeologë të shumtë e kanë kundërshtuar hapur, duke evidentuar dëmtimet që ai i sjell zonës arkeologjike të Durrësit dhe në mënyrë të veçantë sfumimit që i bën Torrës Veneciane.
Fadromat që punojnë për këtë projekt po varrosin monumente kulturore, po shkatërrojnë murin antik të qytetit. Unë nuk jam kundër projekteve të tilla pavarësisht kostos, por nuk mund të hesht kur konstatohet se zbatimi i tyre bëhet në shkelje të ligjit dhe jashtë çdo parametri teknik e mjedisor.
Nuk dua ta besoj, që Kryeministri është në dijeni që kompania e cila zbaton këtë projekt, nuk është pajisur me leje mjedisore.
-Si mund të nisen punimet pa marrë leje mjedisore?
-Kush e toleron këtë praktikë antiligjore?
Natyrisht, që kjo bëhet me bekimin e Kryebashkiakut të Durrësit, ndonëse është gjobitur me 10 milionë lekë të vjetra për mungesë të lejes mjedisore, firma ndërtuese dhe Bashkia Durrës vazhdojnë punimet gjithë arrogancë dhe indiferentizëm ndaj zbatimit të ligjit.
I bëj thirrje Shoqërisë Civile dhe qytetarëve durrsak të reagojnë me zë të lartë kundër kësaj masakre që po i bëhet qytetit antik. Nuk mund të rrinë kaq qetë kur bëhet fjalë për qytetin ku ata vetë jetojnë, ku do të jetojnë në të ardhmen, fëmijët e trashëgimtarët e tyre.
Ka një vendim të Këshillit të Ministrave të vitit 2011, ku përcaktohet qartë se si duhet të bëhet ndërhyrja dhe administrimi i zonës arkeologjike. Është e shkruar e zeza mbi të bardhë se gërmimet në këtë zonë duhet të mbikëqyren nga arkeologë. Këta të fundit duhet të jenë prezent non-stop dhe gjatë kryerjes së punimeve, por për fat të keq kjo nuk ka ndodhur.
Përgjegjësia për shkeljen e ligjit në këtë aspekt dhe shmangien e arkeologëve, është përgjegjësi direkt e Ministrisë së Kulturës, e Agjensisë së Shërbimit Arkeologjik dhe e Drejtorisë Rajonale të Monumenteve të Kulturës Kombëtare në Durrës. Këto institucione duhet të mbajnë përgjegjësi për veprimet dhe mosveprimet e tyre gjatë gjithë kësaj kohe.
Në emër të Partisë Agrare Ambientaliste i bëj thirrje Kryeministrit dhe Kryebashkiakut të Durrësit, të ndalin punimet në këtë kantier derisa të vendoset në vend ligjshmëria në zbatimin e këtij projekti. Nga ana tjetër organet ligjzbatuese, të hetojnë krimin mjedisor që po i bëhet Durrësit dhe dëmtimet e Monumenteve të Kulturës.
Jo çdo shkelje e rregullave dhe e ligjeve amnistohet me shprehjen arrogante dhe megallomane, se unë jam i zoti për zgjedhje dhe këtë do jua tregoj në zgjedhjet e radhës, sepse si po bëhen zgjedhjet në Durrës dhe në gjithë Shqipërinë këtë po e shohim të gjithë jo vetëm ne të opozitës”, thekson Duka.
Gjushi, korrupsion me ndërtimet në zonën arkeologjike në Durrës
Plot dy muaj pasi projekti “Veliera” në Durrës ka nisur nga zbatimi, Bashkia e Durrësit nënshkroi një kontratë për monitorimin e punimeve nga Instituti i Arkeologjisë dhe Agjencinë e Shpëtimit Arkeologjik, por ndërkohë shumica e punimeve nëntokësore për projektin e kushtueshëm kanë përfunduar.
Bashkia e Durrësit nënshkroi së fundmi një kontratë për monitorimin e punimeve me dy institucionet përgjegjëse për ruajtjen e vlerave arkeologjike të vendit, Instituti i Arkeologjisë dhe Agjencia e Shpëtimit Arkeologjik, në bazë të së cilës këto dy institucione do të monitorojnë punimet për projektin e njohur si “Veliera”, për të cilin qeveria po shpenzon 6 milionë euro për zbukurimin e një zone pranë Portit të Durrësit.
Problemi është se kontrata e monitorimit u miratua vetëm dy muaj pas nisjes së punimeve, në një kohë që pjesa më e madhe e gërmimeve në një zonë me probabilitet të lartë mbetjesh arkeologjike, janë kryer.
Ndërkaq, përfaqësues të disa shoqatave dhe forcave politike denoncuan betonimin e fragmentit të murit mesjetar, pjesë të të cilit shihen prej vitesh në afërsi të Torrës veneciane dhe pranë kompleksit “Fly”. Ata deklaruan se kanë paraqitur dy padi penale dhe civile për kryebashkiakun Vangjush Dako, që sipas tyre është fajtor për shkatërrimin e vlerave arkeologjike.
Sot paradite, një grup qytetarësh durrsakë të mbështetur nga shoqatat mjedisore të kryeqytetit kanë protestuar pranë Torrës Mesjetare, pikërisht aty ku prej disa javësh vazhdojnë punimet për sistemin nëntokësor të kanalizimeve.
Arkeologu Edi Shehi, tha për BIRN se, sheshi është vëzhguar deri tani nga specialistët durrsakë të kësaj fushe nisur nga meraku i profesionit.
Tani, specialistët e të dy institucioneve të arkeologjisë, së bashku me Drejtorinë Rajonale të Kulturës Kombëtare do të ndjekin nga afër ecurinë e punimeve, që bashkë me kanalizimet dhe infrastrukturën rrugore do të përfshijnë edhe nënkalimin e automjeteve drejt Shëtitores “Taulantia”. Vëzhgimi do të përqendrohet në pjesën pranë Torrës dhe Bulevardit “Epidamn”, që bëjnë pjesë në hartën e riskut arkeologjik.
Ministria e Kulturës ka kërkuar që fragmenti i murit mesjetar me gjatësi rreth 100 metra të evidentohet në shëtitoren e ardhshme. Aktualisht trakti fortifikues që i përket periudhës bizantine është mbuluar në pritje të vendimit të ardhshëm.
Sheshi i ri “Veliera” do të ketë një sipërfaqe prej 12 mijë metra katrore dhe vela mbi të do të jetë 2 mijë metra katror. Vlera e të gjithë këtij projekti do të jetë rreth 6 milionë dollarë.
Mungesa e sondazheve arkeologjike apo shmangia e tyre është vërejtur edhe gjatë realizimit të projekteve të tjera madhore në Durrës, siç ka qenë rasti i Sheshit “Liria” në qendër të qytetit antik.
Qytetarët durrsakë të mbeshtetur nga Shoqëria Civile protestuan dje para Kullës Veneciane, në vendin ku po zbatohet projekti për ndërtimin e Velieres. Protestuesit thonë se ky ndërtim po shkatërron rrënojat arkeologjike të qytetit, pasi muri rrethues i qytetit antik, ndërtim i shekullit të V para erës sonë, kalon pikërisht në vendin ku po zhvillohen punimet. “Prej ditësh, këtu janë bërë gërmime ku ka dalë edhe arkeologjia në shesh, por kryetari i Bashkisë e ka betonizuar. Muri i kalasë po betonizohet”, u shpreh një nga përfaqësuesit e protestës.
Ambjentalisti Sazan Guri, u tha protestuesve se po shkatërrohet historia e një qyteti. “Këtu bëhet një gërmim për të ngritur një objekt, për të lënë shenjë, sepse nuk është e domosdoshme që ky objekt të rrijë si hije nën këtë Tore që është me vlera”, u shpreh Sazan Guri.
Protestë në Shkodër për shpronësimet te “Loro Boriçi”
Banorët e shtëpive dhe bizneseve përreth stadiumit “Loro Boriçi” të Shkodrës dolën sërish dje në protestë, sepse qeveria kërkon t’i shpronësojë falas ose me vlerë qesharake. Banorët thonë se nuk pranojnë asnjë lloj shpronësimi dhe se nuk do i lëshojmë pronat. “Kam frikë se dikush do me e përvetësu për vete këtë truall këtu dhe nuk e dimë arsyen. Nuk është e logjikshme që të prishen shtëpitë për një parkim. 6 mijë -7 mijë metër katror as në Barcelonë nuk ekziston”, u shpreh një nga protestuesit. Çështja ka dy vite që debatohet dhe sipas banorëve ka dyshime se në këtë zonë ka njerëz të interesuar për ndërtime. “Zotnia kërkon me e marr përkohësisht që nesër-pasnesër me një VKM tjetër të ngrihet një 15-katësh këtu”, tha një banor protestues.
Janë rreth 4 biznese dhe 6 vila në një sipërfaqe prej 7000 metër katrorë që kërkohet të prishet për shkak të ndërtimit të parkimit të stadiumit. Banorët e këtyre zonave e kanë kundërshtuar këtë vendim. Dhe se sipas tyre nuk do të pranojnë asnjë lloj zgjidhje tjetër veçse ruajtjen e shtëpive dhe bizneseve të tyre.
Nga ana e saj, Bashkia e Shkodrës kundërshton shembjen e 8 objekteve që preken nga ndërtimi i parkingut të stadiumit “Loro Boriçi”. Përmes një shkrese zyrtare dërguar para disa kohësh ministres Gjermeni, Bashkia e Shkodrës kërkon të rishikohet projekti dhe hapësira e parkimit. Sipas shkresës që Bashkia i ka dërguar ministres Gjermeni, shpronësimet nuk kompensojnë dëmet dhe kostot e banorëve të shtëpive që parashikohen të shemben. “Nuk është marrë mendimi i banorëve. Shpronësimet nuk kompensojnë dëmet dhe kostot. Në projektin e 2015, s’kishte hapësira shtesë. Vendet e parkimit janë përcaktuar sipas projektit. Të rishikohet projekti dhe hapësira e parkimit”, thuhet në shkresën e Bashkisë.
214 kg drogë nga Shqipëria sekuestrohen në Greqi
Kapen 214 kg marijuanë që po transportoheshin me dy makina në kufirin greko-shqiptar, arrestohen 2 shqiptarë. Operacioni është zhvilluar në fshatin Vasiliko, Igumenicë, pranë rrugës “Egnatia”. Furgoni që transportonte drogën shoqërohej edhe nga një makinë, e cila presupozohej të kontrollonte rrugën. Dy shqiptarët e arrestuar janë të moshës 38 dhe 49 vjeç, ndërsa emrat e tyre nuk bëhen të ditur. Policia po kërkon dhe dy shqiptarë të tjerë, si bashkëpunëtorë të të arrestuarve.
Po ashtu, një 30-vjeçar shqiptar u arrestua një ditë më parë me 14 kg kanabis të tharë dhe të paketuar. Arrestimi i tij u krye në autostradën “Antirriou” të Janinës. Lënda narkotike ishte e ndarë në 12 pako të fshehura në bagazhin e makinës. Përveç sasisë së drogës, policia i ka sekuestruar edhe një shumë prej 430 euro dhe telefoni celular i shqiptarit, me të cilin ka komunikuar për transportin e drogës.
Policia greke ka konfiskuar edhe automjetin, me të cilën është trafikuar droga. Shqiptari është arrestuar edhe më herët nën akuza të njëjta si pjesë e një organizate që merrej me trafikun ndërkombëtar të drogës. Shqiptari është dërguar pranë prokurorit publik në Agrinio.
Makina copëtohet gjatë rënies në kanal, vdes shoferi
Pas atij në Kolonjë, një tjetër aksident i rëndë është regjistruar mesditën e sotme në aksin rrugor Fier¬-Lushnjë, duke i marrë jetën drejtuesit të mjetit. Bëhet fjalë për shtetasin Q.Sh, rreth 55 vjeç, i cili ka humbur kontrollin e mjetit tip “Volkswagen” me targa AA 831 CM, duke fluturuar në një kanal. Sipas burimeve, aksidenti ka qenë shumë i rëndë, pasi makina gati është copëtuar nga rënia në kanal. Sipas Policisë, aksidenti ndodhi rreth orës 13:36, në aksin rrugor Fier¬-Lushnjë, në vendin e quajtur “Rotondua e Kolonjës”, e për pasojë drejtuesi i mjetit ka gjetur vdekjen e menjëhershme. Në vendngjarje ndodhet ende grupi hetimor dhe po kryen veprimet për zbardhjen e shkaqeve të këtij aksidenti.
Ndërkohë, një tjetër aksident ka ndodhur në autostradën Tiranë-Durrës. Një kamion është aksidentuar paraditen e djeshme në autostradën Tiranë-Durrës, duke bllokuar kështu për disa orë qarkullimin e mjeteve në njërën korsi. Ngjarja ka ndodhur në Maminas rreth mesditës, ndërsa fatmirësisht nuk ka patur persona të lënduar. Kamioni është përmbysur, duke zënë të gjithë korsinë. Qytetarët u shprehen se qëndruan të bllokuar për disa orë në autostradë. Nga hetimet paraprake, dyshohet se shkak i aksidentit ka qenë lagështia në rrugë.
Si u vra me disa plumba në kokë gruaja shqiptare në Athinë
Publikohen detaje re reja ngjarja horror në Athinë, persona ende të paidentifikuar qëlluan me armë zjarri një çift shqiptar, ku gruaja humbi jetën, ndërsa burri lufton me vdekjen. Krimi që tronditi kryeqytetin helen dhe jo vetëm, ndodhi rreth orën 02:00 në rrugën ‘Olympou’.
Mediat greke raportojnë se kanë qenë 2 persona të maskuar ata që kanë hapur zjarr në fillim ndaj gruas 50 vjeçe, duke e qëlluar disa herë me pistoletë në kokë dhe më pas ndaj burrit të saj. Po ashtu, pavarësisht pistës së grabitjes, nuk përjashtohet edhe fakti se mund të ketë qenë një larje hesapesh, pasi agresorët kanë hyrë direkt në dhomën e gjumit dhe kanë hapur zjarr.
Sapo kanë dëgjuar zhurma, djali i çiftit, 28 vjeç ka tentuar të hyjë në dhomë, ndërsa është goditur me qytën e armës në fytyrë, duke i shkaktuar dëmtime. Ndërkohë, në banesë gjendej dhe vajza e shqiptarëve, 18 vjeçe, e cila ka parë skenën makabre. Sipas ekspertëve të çështjes, fakti që vrasësit nuk qëlluan ndaj dy fëmijëve, lë vend për dyshime se bëhet fjalë për larje hesapesh. Sakaq, vijojnë hetimet për zbardhjen e plotë të kësaj ngjarjeje.
Ekzekutimi për borxhin, 5 të arrestuar në Itali, mes tyre 2 shqiptarë
Policia e Astit në Itali arrestoi 5 persona, të cilët akuzohen për një vrasje, mes tyre 2 shqiptarë. Vrasja e Françesko Indino ndodhi në 25 qershor të 2015-ës në Asti. Trupi i 52-vjeçarit u gjet pranë kamionit të tij, ndërsa dyshohet se u vra nga dikush me armë zjarri pas shpine.
Mediat italiane raportojnë se nga hetimet e policisë, rezulton se krimi i rëndë ka qenë i paramenduar. Në vrasje u përfshinë 3 italianë, njëri prej tyre pronar i viktimës, si dhe dy shqiptarë, të gjithë me precedentë të mëparshëm penale.
Hetimet e kryera nga policia bënë të mundur, pas përgjimeve të personave në fjalë, të rindërtohej skena e krimit dhe u provua se kush ishte urdhëruesi i vrasjes. Po ashtu u bë e ditur se vrasja kishte ndodhur, pasi viktima nuk i kishte paguar një borxh punëdhënësit të tij. Tashmë 5 të arrestuarit, identiteti i të cilëve nuk dihet, akuzohen për veprën penale ‘Vrasje’.
Basha me investitorët italianë: Do kemi taksat më të ulëta në 26 vite
Programi ekonomik i Partisë Demokratike do të nxjerrë përfundimisht ekonominë shqiptare nga kriza dhe apatia duke e futur atë në rrugën e një zhvillimi të përshpejtuar. Kryetari i Partisë Demokratike, Lulzim Basha organizoi dje një tryezë me investitorë italianë që gjenden në Shqipëri dhe të tjerë që erdhën enkas për këtë takim, ku të pranishëm ishin dhe dy senatorët Paolo Romani dhe Mario Mauro. Basha u bëri të ditur rreth 100 investitorëve italianë, nga çdo sektor i ekonomisë, se qeverisja e Partisë Demokratike do të krijojë të gjitha kushtet për rritjen e prezencës së tyre në vendin tonë, do të krijojë kushtet për përfitime të dyanshme, të investitorëve dhe shqiptarëve, me krijimin e vendeve të reja të punës. “Është një takim i jashtëzakonshëm sepse ndodh në kushtet kur nga Shqipëria janë larguar jo vetëm investime, por edhe qytetarë. Mbi 100 mijë shqiptarë kanë lënë vendin vitin e kaluar. 200 mijë të tjerë kanë kërkuar të largohen për shkak të situatës mbytëse ekonomike, për shkak të gjendjes së krijuar nga keqqeverisja. E pikërisht në këto kushte në vend të denoncimit dhe vetëm denoncimit të së keqes, ne sot japim një mesazh pozitiviteti së bashku, jo më për të djeshmen, por për të nesërmen e Shqipërisë, e këtij vendi të bekuar me mundësi të jashtëzakonshme. Ju shpreh falënderimet e mia më të sinqerta në emër të çdo shqiptari për sakrificën, punën e jashtëzakonshme me të cilën 26 vite keni krijuar këtu në Shqipëri qindra mijëra ndërmarrje punëdhënëse, por edhe keni transferuar tek bashkatdhetarët e mi një përvojë të jashtëzakonshme të ndërtimit të kapitalizimit në liri, të sipëmarrjes së lirë në liri, të transferimit të teknologjive, kulturës së punës në çdo fushë, që nga kuzhina e deri tek teknologjia e informacionit. Mirënjohje të madhe kam për ju investitorë italianë që megjithë problemet, padrejtësitë që u janë bërë, besoni te Shqipëria, mundësitë e saj të mëdha dhe të pashfrytëzuara për investime. Jam këtu sot për t’ju garantuar se unë dhe qeveria ime do të jemi në krahun tuaj, në mbështetjen tuaj dhe së bashku do të ndërtojmë një histori win-win. Sot, siç dëshmojnë të gjitha anketat e biznesit të Dhomës amerikane të Tregtisë në Shqipëri dhe anketat e biznesit gjerman, sipërmarrja vuan nga liria, nga institucionet burokratike, nga një treg i deformuar dhe nga një qeveri klienteliste dhe e korruptuar. 4 vjet më parë qeveria rriti taksat, të cilat rritën kostot fiskale veçanërisht në ndërmarrjet e vogla dhe të mesme. Fatkeqësisht, shumica e taksave shkuan në koncesione monopoliste, të cilat asfiksuan më shumë mundësitë e ekonomisë për t’u rritur dhe për të krijuar vende pune. Me pretekstin për të bërë shtet, inspektorët tatimorë në shërbim të vetes ju kanë krijuar vështirësi të paimagjinueshme investitorëve vendas dhe të huaj. Përgjigjja unanime e pyetjes, se cila është pengesa kryesore e të bërit biznes në Shqipëri, nga të gjitha këto ambiente dhe mund ta verifikoni, përgjigjja është qeveria”, tha Basha.
Reformë fiskale
Një sistem fiskal të thjeshtë, të qëndrueshëm dhe të parashikueshëm. Ky është objektivi i parë i PD. “Biznesit do i ofrohet çdo mundësi për të qenë në gjendje të konkurrojë.
Në themel të sistemit janë taksat e ulëta dhe të sheshta: 9 për qind për të ardhurat personale, 9 për qind për fitimin e kompanive. TVSH do të ulet në 15 për qind. Tatimi mbi dividentin do të bëhet zero.
Kjo është e vetmja mënyrë për t’u bërë konkurrues me fqinjët tanë në rajon dhe për ta bërë ekonominë tonë të aftë të thithë investime të brendshme dhe të huaja, për të ndryshuar situatën aktuale ku sipas vetë Bankës Botërore investitorët e huaj e shohin Shqipërinë zgjedhjen e fundit në Ballkan”, tha Basha.
Transparencë të shpenzimeve publike
Mjeti i vetëm që ekziston për të ulur korrupsionin, klientelizmin dhe abuzivizmin është transparenca dhe kufizimi i pushtetit. “Këtu ne do të zbatojmë një program të thellë transparence të shpenzimeve, prokurimit dhe kontraktimit publik.
S’mund të pranoj kurrë dhe nuk mund të pranoj kurrë si kryeministër që në një kohë që papunësia shtohet, që më të mirët, më të zotët, më të aftët në tregun e punës lëshojnë Shqipërinë, emigrojnë drejt vendeve europiane, këtu qeveria mbitakson sipërmarrësit dhe me taksat e mbledhura shpenzon 600 euro për një palmë nga ato që i keni parë nga aeroporti drejt Tiranës.
600 euro shumë e barabartë me ndihmën ekonomike për 1 vit për një familje apo shpenzon në vitin 2016, 130 miliardë lekë për zyra, makina, perde për veten e saj, për luksin e saj.
Në total sipas të dhënave të KLSH-së, vetëm në dy vitet e fundit qeveria ka abuzuar mbi 1 miliard euro, me shpenzime fasadë, me buzëkuq, shpenzime luksi. Imagjinoni sa do të fuqizoheshin politikat tona në nxitje të investimeve të punësimit, nëse këto para në vend që të shkonin për palma, do të shkonin për të nxitur, që një ndërmarrje italiane të zgjidhte Shqipërinë përpara Rumanisë, Maqedonisë, jo duke u lutur, as duke uruar, por duke vepruar.
Nëse në Maqedoni sot u ofrohet dy muaj në vit pagesa të sigurimeve shoqërore nga shteti për këdo që hap një investim me 100 vende pune me garanci 10-vjeçare, kjo mund të aplikohet lehtësisht nga qeveria e Shqipërisë nëse është e përgjegjshme, nëse lekët nuk i çon për palma, për automjete luksi për qeveritarët, por nëse i çon për të ndihmuar biznesin që ndihmon në hapjen e vendeve të punës. Ky është roli i qeverisë moderne, të bëjë gjithçka për të ndihmuar sipërmarrjen që ndihmon në krijimin e vendeve të reja të punës.
2120 procedura ka negociuar pa shpallje vetëm në vitin 2016, 1/3 e prokurimeve publike pa shpallje. Më e keqja është se 2/3 e tjera, që gjoja ka pasur garë, siç mund ta dinë disa prej jush, aty gara është fituar pothuajse gjithmonë nga ofertuesi më i lartë, më afër çmimit limit, që është treguesi më i qartë i korrupsionit. Më dëm të jashtëzakonshëm për buxhetin e shtetit, me dëm edhe më të madh në cenimin e konkurrueshmërisë dhe besimit te prokurimet publike.
Të gjitha kontratat publike do të jenë transparente, të gjitha ofertat e ardhura për shërbime publike do të jenë të aksesueshme nga sipërmarrja dhe qytetarët, përmes një sistemi dixhital, online.
Të gjitha vendimet në lidhje me prokurimet dhe kontraktimet do të bëhen publike, nuk do të lejojmë prokurime me fonde publike me një kandidat, e aq më pak që çdo tender e koncesion ta marrin vetëm 11 klientë të qeverisë, siç ndodh sot”, u shpreh Basha.
Konsolidim dhe finalizim të infrastrukturës përmes investimeve publike
Në lidhje me investimet publike, Basha tha se, “Nuk do të ketë investime fasadë në qeverinë e ardhshme të Shqipërisë. Nuk do të ketë që gjysma e rrugës të mbillet me palma dhe gjysma tjetër të jetë me gropa. Nuk do të ketë investime fasadë, që i mbushin xhepat e qeveritarëve duke zbrazur xhepat e taksapaguesve dhe duke rrënuar konkurrueshmërinë dhe besimin e sipërmarrësve, por vetëm investime që i shërbejnë zhvillimit dhe punësimit.
Prioritet do të jetë përfundimi i veprave të mëdha, që edhe sot e kësaj dite mbeten të papërfunduara siç është Korrridori 8, rruga Tiranë-Elbasan, siç është Rruga e Arbrit, përfshi tunelin, siç është përfundimi i akseve të jugut, Unaza e Madhe e Tiranës dhe miliona e miliona euro investime të domosdoshme për sistemin e ujitjes dhe rrugëve që ndihmojnë aksesin në bujqësi, po kështu ujësjellës-kanalizime.
Rritja e investimeve, si private të brendshme ashtu edhe të huaja dhe investimeve publike, janë çelësi për të krijuar punësimin.
Rritja e mundësive për punësim është mundësia e vetme për eliminimin e varfërisë, është mënyra e vetme për krijimin e mirëqenies.
Programi ynë ekonomik jo vetëm nxjerr përfundimisht ekonominë shqiptare nga kriza dhe apatia, por e fut atë në rrugën e një zhvillimi të përshpejtuar ekonomik, në përputhje me potencialet e jashtëzakonshëm të këtij vendi dhe të këtij tregu pune.
Ky është programi ekonomik me taksat më të ulëta në historinë 26-vjeçare të demokracisë dhe vendos gjithçka në mbështetje të sipërmarrjes së ndershme, gjithçka në mbështetje të sipërmarrjes së ndershme”.
Senatorët italianë mbështetje platformës Basha
Dy senatorë italianë të pranishëm në tryezën e Partisë Demokratike me investitorë nga Italia, ofruan mbështetje për kryetarin e Partisë Demokratike, Lulzim Basha. Paolo Romani, senator nga Forza Italia, tha se Basha shpreh tri revolucione të mëdha. “Ne jemi një parti simotra, ne jemi nga e njëjta familje, nga PPE dhe me thënë të drejtën ndjeva një zili kur po dëgjoja kryetarin Basha sepse ai u shpreh qenësisht për tri revolucione të mëdha, një revolucion fiskal që do të duhej ta bënim me fleksibilitet dhe në Itali, revolucion kundër burokracisë dhe revolucion tek shpenzimet publike. Këto dy ditë do të kryejmë disa takime për partneritetin italo-shqiptar. Të gjithë kërkojnë më shumë prezencë italiane në këtë vend. Falënderoj krytetarin Basha për këtë takim të jashtëzakonshëm, tani po ju përcjell këtë mesazh; Më 18 qershor, Shqipëria ka zgjedhjet dhe mesazhet që përcolli kryetari më duken si një shenjë e rezultatit të mirë”, tha Romani. Edhe senatori Mario Mauro, nga grupi i Partive Popullore thotë se figura e Lulzim Bashës si kryeministër i ardhshëm ka një rëndësi të veçantë në kontekstin evropian. “Prania jonë këtu zhvillohet brenda vëllazërisë së Partisë Popullore Evropiane, domethënë, familja e partive liberale demokrate, që uron edhe për rezultatin e mirë të një projekti europian, suksesin e udhës së integrimit europian të Shqipërisë. Këtu jemi një parti që është në opozitë, e shoqëruar nga parti që janë në opozitë në vendin e tyre, dhe të shohësh kaq shumë interes të bën të kuptosh atë besueshmëri të madhe që ka jo vetëm Partia Demokratike shqiptare, por sidomos figura e kandidatit të kësaj partie për kryeministër të ardhshëm, Lulzim Basha. Është një figurë që ka një rëndësi të veçantë në kontekstin europian, që ka një rëndësi të veçantë në kontekstin ndërkombëtar, pikërisht sepse është një figurë me besueshmëri të jashtëzakonshme, shumë të madhe dhe mbështetet në ide”, tha Mauro. “Shumë njerëz po ikin, dhe nuk po ikin vetëm ata në nevojë, por po ikin më të mirët”, ishte shqetësimi që ngriti, Carlo Alberto Rossi, sipërmarrës në fushën e turizmit. Lulzim Basha e njeh gjendjen dhe ka një përgjigje. “Pse ikin këta mijëra shqiptarë? Ju e thatë vetë, po ikin më të mirët, nuk po ikin vetëm të varfërit. Pse ikin? Sepse këtu, i miri, i afti, i talentuari nuk çan përpara. Këtu çan përpara trafikanti, nepotisti, klientelisti, krimineli, i korruptuari. Cila shoqëri ka bërë përpara në qoftë se vlerëson, shpërblen krimin, vjedhjen, gënjeshtrën dhe ndëshkon punën e ndershme. E kundërta, qëndron në themel të shoqërive të përparuara. Ndaj ne, do t’i japim mundësinë çdokujt që të punojë e të ecë përpara me punën e ndershme. Puna do të shpërblehet e jo të ndëshkohet. Aftësia, talenti, kreativiteti, inovacioni, kapitali në funksion të kësaj do të shpërblehen në qeverisjen time”, deklaroi Lulzim Basha. Dhoma italiane e Industrisë ka shprehur vazhdimisht shqetësime këto 3 vite për rritjen e taksave dhe arbitraritetin e qeverisë, dhunën e korrupsionin e tatimorëve. Investitorët italianë kërkuan të njohin detaje mbi programin dhe kërkuan garanci për investimet e tyre. “Çfarë detyre mund të ketë qeveria e Shqipërisë, shteti shqiptar më të rëndësishme sesa të bëjë gjithçka që dikush që punëson shqiptarët, të ketë të gatshme infrastrukturën rrugore, energjetike dhe të mos ketë asnjë pengesë burokratike. Çfarë detyre tjetër më të rëndësishme mund të ketë qeveria e Shqipërisë? Për mua kjo është detyra më e rëndësishme. Të mbështesin me të gjitha format dhe mënyrat, përfshirë ato financiare sipërmarrjen që krijon dhe siguron vende pune, pra krijon dhe siguron mirëqenie. Kjo do të thotë jo vetëm me sistemin fiskal më konkurrues në Ballkan, nuk do të gjeni nën qeverisjen time, një vend me taksa më të ulëta sesa Shqipëria, por dhe me një sjellje tërësisht të reformuar në raport me sipërmarrjen, qeverisje më miqësore ndaj sipërmarrjes, jo me fjalë, por me veprime”, siguroi Basha investitorët italianë. Basha e garantoi sipërmarrjen për rend e siguri, për shtypje të krimit pa mëshirë.
Kryesore
Continue to the category
