26.5 C
Tirana
E hënë, 18 Gusht, 2025
type here...

Është koha që mediat t’ua kthejmë njerëzve

Bledi KASMI

Presidenti i Republikës, Bujar Nishani dekoroi dje gazetën “RD” me titullin “Kalorës i Urdhrit të Skënderbeut”. Kjo është dekorata e parë që institucioni më i lartë i shtetit jep ndaj një medieje. Është më kuptimplota dhe më sinjifikativja që jepet në këto 26 vite për një media për të paktën dy arsye.
Arsyeja e parë është se prej tre vitesh kemi një qeveri që po dekreton kriminelët e diktaturës duke pasur si qëllim të vetëm rehabilitimin e gjenocidit gjysmë shekullor komunist në këtë vend. Ndaj është lajm i mirë që sot kemi një President si Bujar Nishani që i rikthehet vlerave të historisë, lirisë dhe të demokracisë duke ngritur në piedestal një datë si 5 janari ‘91, të cilën shqiptarët prej vitesh e kujtojnë si një monument të lirisë së fjalës.
Arsyeja e dytë ka të bëjë me emrin e medias që Presidenti zgjodhi për t’i dhënë titullin “Kalorës i Urdhrit të Skënderbeut”. Pse duhej të ishte “RD”? Është ndoshta një rast unik historia e kësaj gazete. Ajo vrau frikën e ngritur në sistem, inspiroi shqiptarët për të luftuar për të drejtën e fjalës dhe hapi epokën e lirisë së komunikimit dhe themeloi institucionin e opozitarizmit të mendimeve dhe të ideve.
Rrallë media në historinë botërore të mediave mund të kenë pasur një histori si ajo e “RD”. Edhe librat e Shenjtë nuk janë pritur me aq entuziazëm. Profetëve u është dashur shumë kohë që të bindin pasuesit për fjalët e Zotit që ata përçonin. Me “RD” në vitin ‘91 ndodhi krejt ndryshe. Radhët për ta blerë atë krijonin më pas edhe radhë të tjera për ta lexuar.
Asnjë media nuk mund të ketë bërë atë histori që ka bërë “RD” dhe vendimi i Presidentit meriton respekt, mirënjohje dhe falënderim.
Kjo është një dekoratë mirënjohjeje që i takon të gjithë atyre që e inicuan, e themeluan, e ruajtën dhe e kultivuan frymën e lirisë së fjalës përgjatë këtij çerekshekulli. Kjo dekoratë na përket të gjithëve, po aq sa mua i përket Frrokut, Preçit, Mitros, Filipit, Bashkimit, Mentorit, Napolonit, Lorencit, Lazerit, Astritit dhe të gjithë gazetarëve që besojnë se misioni i tyre nuk është të jenë puthadorë të një pushteti kriminal, por zëdhënës të së vërtetës.
Jam ndjerë shumë i inkurajuaar dje në mëngjes kur kolegë gazetarë, por edhe qytetarë kishin vendosur në profilet e tyre në rrjetet sociale numrin e parë të gazetës “Rilindja Demokratike” të shoqëruar me urimin “Gëzuar!”. Secili kujtonte copëza nga emocionet e orëve të para kur “RD” doli në treg. Nuk është thjesht dhe vetëm nostalgji. Kjo gazetë është kthyer në një pasuri kombëtare.
Ka vetëm një ndryshim mes opozitarizmit të sotëm të “Rilindjes Demokratike” dhe opozitarizmit të 26 viteve më parë. 26 vite më parë opozitarizmi i gazetarëve të “RD” drejtohej ndaj një shteti diktatorial që kryente krime në emër të regjimit, ndërsa sot opozitarizmi i “RD” bëhet ndaj krimit që ka nënshtruar shtetin dhe qeverinë.
As atëherë nuk ka qenë e lehtë dhe as sot nuk është e lehtë sepse opozitarizmi ndaj një regjimi nuk është asnjëherë luks. Në një emision të pak muajve më parë në “Opinion” të kolegut Fevziu askush nga gazetarët dhe analistët nuk kishte pranuar të merrte pjesë në një debat për arrestimin dhe gjobat e Shullazit. Ky është rasti më flagrant për të ilustruar forcën e krimit sot përballë impotencës së medias.
A ndodhte kjo në “RD” 26 vite më parë kur denoncoheshin krimet e diktaturës? Nuk ndodhte as atëherë, as kur botonim dosjet e zeza të rebelimit të vitit ’97. Si është e mundur kjo sot? Unë e kam një shpjegim, por do të huazoj një shprehje të Presidentit të Shteteve të Bashkuara, Donald Trump si përgjigjen më të mirë të mundshme.
“Le të jemi të qartë për diçka, media korporative nuk është më e përfshirë në gazetari, por janë një grup me interes të veçantë ku nuk ndryshojnë aspak nga një lobist, me një kapital ekonomik dhe me një axhendë politike dhe kjo axhendë nuk është për ju, por është për ata vetë dhe kushdo që u del kundra është një abuzues seksual dhe një racist. Ata do të gënjejnë, gënjejnë, gënjejnë dhe përsëri do të bëjnë atë çfarë është e nevojshme për të arritur qëllimin e tyre”.
Është koha që mediat duhet t’ua kthejmë njerëzve.

Rilindja Demokratike!

Nga Arian Galdini

Vlora po ziente atë fillimjanari të vitit 1991. Në dt 6 janar do të bëhej në Sheshin e “Flamurit”, mitingu i parë i Partisë Demokratike. Ishte ftohtë, frynte erë si gjithmonë në qytetin bregdetar, por ajri dridhej krejt pashpjegueshmërisht nga një ndjesi e çdo njeriu që gjallonte aty në atë qytet.
Njerëzit shiheshin në sy, por ende nuk guxonin të flisnin ndaj trandnin ajrin me shikimin dhe mendimet e tyre. Ditë e kohë të tilla janë të rralla në historitë e qyteteve dhe kombeve. Të gjithë ndjejnë njëlloj e të gjithë e shkundin ajrin vendit me sy e ndërmendje, pa folur. E folura ishte ose brohoritje e me hov, ose ende sakrilegj. Kur ja, 1 ditë para se të vinte tokmbledhja për brohoritje, Vlora u shpupurit e tëra si një buqetë që bukurinë nuk e kishte më në bashkim, por në rendje. Kishte dalë Rilindja Demokratike. Ishim mësuar me normalitetin e gazetave “Zëri i Popullit”, “Zëri i Rinisë”, “Puna”, “Bashkimi”. Por një gazetë që quhej “Rilindja Demokratike” ishte si të dëgjoje papritmas se në Hënë ishte zbuluar pylli ku banonte gjyshja e Kësulëkuqes.
Vlonjatët nuk u sollën vërdallë tek Kapelja atë 5 janar. As shkuan nëpër rradha për të marrë 80 përqindëshin, nuk vunë gurë në rradhën për vajguri, as u zgjuan në 3 të natës për të provuar fatin mos ia dilnin të blinin ndonjë shishe qumështi. Të gjithë ishin vërsulur për tek 2 pikat e vetme ku shitej gazeta “Rilindja Demokratike”.
Zënka e sherre të ububushme u bënë në përpjekje për të marrë secili kopjen e tij të “Rilindjes Demokratike”. U shamë të gjithë vlonjatçe, por nuk u urryem as u inatosëm. Donim vetëm të ishim ne, ata që e kishim secili të veten kopjen e vet të parë të “RD”. Në gjithë atë katrahurë që ndali jetën e qytetit, nuk ia dola dot mbanë që ta merrja kopjen time. E megjithatë, fill sapo mbaruan çjerrjet e xhaketëkapjet në rradhën për të blerë “RD”, të gjithë e lexuan kopjen e tyre e filluan tua shpërndanin atyre që nuk e kishin blerë dot.
Kush kishte një “RD” të blerë, nuk shkonte në shtëpi për ta lexuar vetëm e në qetësi. Jo asesi. Të gjithë qëndruan aty e ua jepnin të tërëve që ishin aty për ta lexuar. Më erdhi edhe mua mundësia për të prekur me duar e për të lexuar atë “RD” të parë të 5 janarit 1991. Nuk e harroj dot kurrë atë shfletim, atë aromë, atë zemërrahje për çdo emër që lexoja aty e çdo fjalë që përpija. Të nesërmen e dija që do dilja në miting të brohorisja. Ndërsa atë 5 janar, m’u dha shansi të flisja. Po flisja me një gazetë. Po flisja me Kësulëkuqen në shtëpinë e gjyshes së saj në pyllin e zbuluar në hënë.
Kishte ndodhur e pamemdueshmja, e pamundura. E neve që kurrë nuk e kishim besuar se do vinte një ditë kur do të flisnim, me veten, me gazetën a njëri-tjetrin. Ne që kujtonim se e folura ishte vetëm zbrazëti fjalësh në shkreti mendimesh. Ne që të folurën e dinim si informacion politik a zënka nën efektin e kaçurrelit për revistën televizive, të hënën sportive apo festivalin e fundvitit. Ne që të folurën e dinim si sharje të imperializmit amerikan dhe revizionizmit sovjetik.
Neve që të folurën e dinim si ndërkallje për të gjetur se kush e dinte më mirë se cili shofer punonte për vitin 2000, e cila Kooperativë e tipit të lartë e kishte realizuar planin e grurit me 150%. Atë 5 janar mësuam se ka një të folur tjetër. Mësuam se ka një të folur të lirë, me fjalë të peshuara e mendime të plota.
Atë 5 janar mësuam se e folura me veten, me gazetën, me tjetrin, është njohje, zbulesë, ndërtim. Atë ditë zbuluam se e folura nuk është Kësulekuqja në Hënë. Atë 5 janar e takuam të folurën këtu mes nesh, ndër ne, me ne. “Rilindja Demokratike” na e bëri të folurën atë 5 janar, tokësore, të mundshme të prekshme. Prandaj, bëjmë mirë të mos harrojmë e gjithëherë ta kujtojmë njohjen e parë të së folurës.

“RD” një “Kalorëse e Urdhrit të Skënderbeut”

Redin Hafizi

Presidenti Nishani vlerëson gazetën “Rilindja Demokratike” me Titullin “Kalorës i Urdhrit të Skënderbeut”. Në 26-vjetorin e themelimit dhe botimit të numrit të saj të parë si një zë i lirë dhe i pavarur mediatik pas afro pesë dekadash shtypjeje dhe censure të ashpër komuniste, Presidenti i Republikës, Sh. T. Z. Bujar Nishani dekoroi gazetën “Rilindja Demokratike” me Titullin “Kalorës i Urdhrit të Skënderbeut” me motivacionin: “Në vlerësim të kontributit të vyer e të pazëvendësueshëm si gazeta e parë që vrau frikën e diktaturës dhe hapi rrugën për rivendosjen e shtypit të lirë në Shqipëri, duke përhapur e lartësuar vlerat e patjetërsueshme të lirisë dhe të demokracisë”, thuhet në deklaratën për shtyp të Presidencës. Dekoratën e dorëzoi Sekretari i Përgjithshëm i Presidencës, zoti Florian Nuri.
Është era e parë që një pjesë e medias në Shqipëri të dekorohet me një titull kaq të lartë. Gazeta “Rilindja Demokratike” është e para që vlerësohet nga numri një i shtetit shqiptar, pasi ishte e para që thyeu akullin e heshtjes së diktuar nga diktatura komuniste dhjetëravjeçare. Ishte kjo gazetë dhe ata që mundësuan daljen e saj që i dhanë shpresë gjithë atyre që kishin nisur që një vit më parë të thërrisnin “E duam Shqipërinë si e gjithë Europa”. Ishte kjo gazetë që vrau frikën e kujtdo që nga vuajtjet e panumërta nuk shihte dritën në fund të tunelit, ku diktatura e kishte zhytur. Madje ishte kjo gazetë, vetë drita, e cila që në numrin e parë sfidoi me forcë errësirën. Ishte “Rilindja Demokratike”, e para gazetë pas dhjetëra vjetësh që nuk kishte nevojë të shpërndahej me dhunë, pasi njerëzit kishin zënë radhën që në mëngjes për ta blerë, pasi shqiptarët kishin etje për liri dhe patjetër që në fillim kjo gazetë ua shojti këtë etje dhe ishte e para. Plagët e shpirtit të shqiptarëve ende dhimbnin, por ishte kjo gazetë që nisi terapinë e shërimit të tyre.
Vërtet kjo gazetë e meriton patjetër dekoratën dhe nuk mendoj se ka shqiptar që nuk mendon njësoj, por sapo pashë titullin në mendje më erdhi fjala liri. Një gazetë kalorse e urdhërit të heroit tonë kombëtar që tashmë është njëhsuar me lirinë e kombit dhe me dinjitetin e lartë të shqiptarëve në mbarë botën. Kjo është edhe “Rilindja Demokratike” një kalorëse e lirisë dhe patjetër përmes saj shqiptarët i treguan botës se nuk duan të jetojnë më të shtypur dhe se dinë të shprehen lirshëm e me kulturë. Shqiptarët treguan se dinë të shkojnë me dinjitet drejt ëndrrës europiane dhe kjo gazetë ishte dallëndyshja e parë që e shprehu për një kohë të gjatë dhe me gërma të mëdha këtë.
Dalja e numrit të parë të gazetës “Rilindja Demokratike” tregoi se mes shqiptarëve ishte ende gjallë shpirti i Konicës, Nolit e shumë mjeshtrave të tjerë të fjalës së lirë. Kjo është një tjetër lidhje e kësaj gazete me titullin. Një kalorëse që vjen nga shekujt dhe sjell traditën e gazetarisë dhe shprehjes së lirë të shqiptarëve. Ndaj me të drejtë Presidenti i Republikës zgjodhi “Rilindjen Demokratike” si të parën pjesëmarrëse të një grupi tashmë të madh, medias në vendin tonë për ta dekoruar me titullin “Kalorës i Urdhërit të Skënderbeut”. Edhe pse kanë kaluar nga ajo kohë ideja e të qënit të parët, në krye dhe aktiv në shërbim të kombit dhe lirisë vjen një ditë e vlerësohet maksimalisht.

26-vjetori ndryshe i “RD”

Armand MAHO

Dje ishte 5 janari. 26-vjetori i “RD” ka sjellë një risi. Ndryshe nga një vit më parë dhe ndryshe nga çdo herë tjetër njerëzit postonin dje në faqet e  tyre të profileve të rrjeteve sociale foton e numrit të parë të gazetës “RD”. Përse ky rikthim kaq i dëshiruar tek “RD”? E ka një arsye. Historia e “RD” është një histori opozitarizmi dhe sot shqiptarët janë më shumë se asnjëherë më parë me opozitën. “RD” është sot media opozitare nga të paktat kritike me qeverinë dhe njerëzit duan opozitën. Atë që u flet drejt shqiptarëve, atë që u thotë kriminelit, kriminel, banditit bandit dhe hajdutit hajdut pa e spërdredhur të vërtëtën.
Në redaksinë e “RD” ditën e djeshme telefonat cingërinin më shumë se zakonisht… Dhe hyrje daljet, ishin më të shpeshta dhe ngado ndihej aroma e një entuziazmi… Drejtuesi i saj jo vetëm në telefon, por dhe në rrjetet sociale individë të ndryshëm pro por dhe kundër saj vrapuan për të bërë urimin. Natyrisht, festohet 26-vjetori i ditës kur fjala e lirë, kur rrezja e dritës dhe e shpresës hyri në çdo vatër shqiptare të lodhur e rraskapitur nga diktatura e kobshme… më pesë janar të vitit 1991 mori jetë i pari numër i një gazete opozitare, e cila ja përplasi në fytyrë regjimit aktivitetin e tij kriminal. Ishte ajo, e cila përhapi në eter fjalën që shqiptarët nuk kishin guxuar ta thonin hapur, e cila u bë strehë e të përndjekurve politikë për të treguar vuajtjet e tyre. Ajo që moton “ta bëjmë Shqipërinë si gjithë Evropa” nuk e  gërmëzoi vetëm në letër, por e gdhendi në mendjen e çdo njeriu… Dhe sot të gjithë ndjehen krenarë! Sepse gjithkush ka dhënë kontributin e tij, dhe ai që ka shkruar dhe ai që ka lexuar.

Kujtimet

“Rilindja Demokratike” në udhëtimin e saj 26-vjeçar ka pasur të përpjetat dhe tatëpjetat e saj… Gazetarët e saj janë kërcënuar, janë përndjekur, shumë prej tyre kanë ikur jashtë vendit, por ajo asnjëherë nuk i është shmangur misionit të saj. Në 26 vjet të saj, ajo numëron 7661 numra të përditshëm. Zërin e saj nuk e kanë mundur ta tulatin  dot as bandat e ‘97-ës, as përgjimet e Fatos Klosit dhe as represioni i Edi Ramës kryeministër që prej vitit 2013. “Rilindja Demokratike” ka mbetur dhe sot një ndër zërat e paktë që përditë denoncon regjimin despotik, korrupsionin, trafikun dhe kriminalizimin e shoqërisë, e një sistemi që prodhon çdo ditë e më shumë të varfër, çdo ditë e më shumë vetëvrasje… Ashtu si dikur kur denonconte veprimtarinë kriminale të regjimit të shkuar, sepse ajo u ngjiz nga ëndrra për liri dhe asaj ëndrre i qëndron besnike. Ja si e kujton Mitro Çela një ndër themeluesit e gazetës, numrin e saj të parë dhe efektin që kish ajo dhe artikullshkruesit tek lexuesit, gazeta kalonte dorë më dorë. Faqe më faqe. Të uritur për liri, të befasuar nga kurajua, të hutuar nga frika, njerëzit lexonin me lepurin në bark. Mileti i parafytyronte artikullshkruesit, si ufo të ardhur nga tjetër planet. Ja vlen të tregoj një episod. Kisha një komshi. Ekonomist. Quhej: Bastri Kastrati. Një ditë më ftoi për kafe. Në dorë mbate gazetën. “Mitro! Më ke mik?…Po…Mund të hamë një drekë me gazetarët?…Gjëja më e lehtë, i thashë. Por do një këshillë? Mjaftohu me leximin e gazetës. Po të hash drekë me ata që shkruajnë, do zhgënjehesh. Janë njerëz të thjeshtë? Të zakonshëm…Më thotë Bastriu: Nuk e bën dot? Ti them Sali Berishës?…Qesha. Dy ditë më vonë u ulëm për drekë Frroku, Preçi, Filipi, Shkullaku…Bastriu qëndronte si mbi gjëmba…Ne bisedonim kodra pas bregut. Filipi tregonte barcaleta…Ikën të gjithë. Kafen e pimë të dy. Kishe të drejtë, tha Bastriu. Më mirë të mbetesha tek leximi i gazetës”. Dhe si Bastriu ishin shumë….

Cermonia

Ora 18:00 datë 5 janar 2017… Holli i Hotel “Plazës”, nuk kish parë aq shumë përfaqësues të medias, por edhe politikanë, e natyrisht në këtë festë s’mund të mungonte lideri historik i PD-së, Sali Berisha, i cili ka vendin e tij të nderit, si një ndër ideatorët dhe themeluesit kryesorë të  saj. Me energjinë që e karakterizon troket gotat me të gjithë, dhe me ata që kanë qenë jo pak kritikë ndaj tij, dhe të gjithë ndajnë me të urimin “Gëzuar”. Ishin aty të gjithë, themelues ose jo, madje dhe ata gazetarë të rinj që kanë moshën e “Rilindjes Demokratike” ose më të vegjël se vetë gazeta. Të gjithë të barabartë, një të drejtë dhe dimension që gazetarët e këtij vendi e fituan 26 vjet më parë. Në këtë festë s’kish si mos ishte Frrok Çupi, Mitro Çela e Preç Zogaj, themeluesit e saj, apo Astrit Patozi që e drejtoi gjatë vitit të mbrashtë të 1997. Ishin aty dhe ata që kohë pas kohe nuk kanë pasur mendim të njëjtë me Partinë Demokratike, për shumë arsye, por tek e fundit kjo është e bukura e demokracisë, mendimi ndryshe. Ama sërish përsëri bien dakort, 5 janari është data simbol e medias shqiptare, data kur “fjala e parë” u tha lirshëm, pa vargonj. Themelimi i “RD”-së ishte kryefjala e të gjithë të pranishmëve aty. Kujtimet e 26 vjetëve më parë, orët e zgjatura në redaksi… Sot, mungon zukatja e makinave të shkrimit, me të cilat nisi botimin “Rilindja Demokratike”, por zhurma e tyre vazhdon të kujtohet dhe do të kujtohet, sepse ishin ato që derdhën në letër vuajtjet e një populli të tërë. Shtypja e gërmës së parë në ato makina, ishte dhe vula që i hoqi vargonjtë mendimit. Ka kaluar një çerek shekulli, por kujtimet e atyre ditëve nuk mund të harrohen. Çunakët e djeshëm me flokë të gjatë si shenjë rrebelimi ndaj sistemit, janë bërë burra, dhe burrat kanë hyrë drejt moshës së artë. Por gjithsesi, në mendje kanë akoma të freskët dehjen që i jepnin ato ditë të vrullshme të janarit 1991…. Të gjithë ata që vit pas viti e ditë pas dite kanë bërë të mundur nxjerrjen e numrave të parë, që u pasuan nga të tjerë e tjerë për t’u kthyer në uraganin e fjalës së lirë, dje kishin të drejtë të ndiheshin krenarë.

Basha:  Prej të vërtetës do të fitojmë

Fjalën e rastit do e mbante kryetari i Partisë Demokratike Lulzim Basha, i cili përgjatë gjithë mbrëmjes u mundua të ishte prezent në çdo tavolinë gazetarësh. “Prej të vërtetës ekzistojmë, dhe prej të vërtetës do të fitojmë”, tha Basha. “Dua t’i bëj thirrje mediave të vendit përfshirë mediat kritike ndaj opozitës, të bashkohemi sot për zgjedhje të lira dhe të ndershme. Të luftojmë së bashku, për të zhdukur njëherë e mirë blerjen e votës, si një atentat që i bëhet zgjedhjeve të lira e të ndershme. Dua ta pohoj para jush; prej të vërtetës ekzistojmë dhe prej asaj do të fitojmë. Kam qenë dhe jam kurdoherë i hapur me mediat dhe bashkëpunues. Misioni im e përfshin këtë dimension. Refuzimi i kritikës është refuzim i vet idesë së ndryshimit. Kjo është një nga pikat, ku unë dua të bëj ndryshim. Besoj që kjo ditë të shënojë bashkëpunimin e ri të opozitës me median. Gëzuar ditën e shtypit të lirë”, tha Basha. Të pranishmit bënë dhe diferencën e madhe mes atij që duhet të bëjë kryeministrin e vendit dhe kreut të opozitës. I pari, çdo media kritike e quan “media kazani”, ndërsa i dyti i vlerëson dhe i bën thirrje që të bashkëpunojmë për gurin e themelit të çdo sistemi, zgjedhjet e lira. Pas fjalës së Bashës, do të bëhej ceremonia e dorëzimit të medaljes “Titulli Kalorës i Urdhërit të Skëndërbeut” të akorduar nga Presidenti i Republikës, Bujar Nishani, i cili iu dorëzua kryeredaktorit të “RD” Bledi Kasmi nga Florian Nuri, Sekretar i Përgjithshëm i Presidencës. “Dua të bëj dy falënderime të veçanta, një për Presidentin e Republikës për nderin e veçantë që i bëri “Rilindjes Demokratike” me akordimin e këtij titulli, dhe falënderimi i dytë shkon për të gjithë ata themelues dhe drejtues të gazetës ndër vite”, do ishte fjala e kryeredaktorit Kasmi.

5 janari dita simbol e medias

Kështu u mbyll ky 26-vjetor, mes falënderimeve batutave të pjesëmarrësve. Ditëlindja e “RD” është dhe do të mbetet data simbol e medias shqiptare. Eshtë kjo arsyeja se përse, të gjithë ndjehen si në shtëpinë e tyre. Sepse 5 janari nuk është vetëm ditëlindja e “Rilindjes Demokratike”. 5 janari do të hyjë në analet e historisë, kur populli shqiptar “vrau frikën”. Kur fletushka që doli në atë ditë të ftohtë dimri përcëlloi duart gjakatare të diktaturës dhe drodhi nga themelet sistemin komunist. Bibla thotë “e para ishte fjala”, dhe ashtu si në tregimet biblike edhe “RD” foli për të vërtetën dhe do të vazhdojë të flasë. Ashtu si në tregimet biblike, fjala hyri në çdo vatër shqiptari, për t’u kthyer në një uragan që rrëzoi një diktaturë.. Ata që shkruajtën dhe shpërndanë ishin ata që bënë historinë, por rruga është e gjatë…. E para ishte fjala, e para ishte “Rilindja Demokratike”.

Guardia nxjerr bllof Tahirin për kapjen e 510 kg drogë në Leçe

Guardia di Finanza ka kapur përsëri gjysëm ton drogë nga Shqipëria në Leçe, vetëm pak orë pas kapjes së gati 1 ton natën e 1 janarit. Mediat italiane bënë të ditur se, gjatë operacionit të Guardia di Finanza ra në pranga drejtuesi shqiptar i skafit. Sasia e konsiderueshme e lëndës narkotike kishte një vlerë tregu prej 5 milionë eurosh. Policia italiane bëri të ditur se, në prangat e policisë ra 29-vjeçari shqiptar me inicialet A.M, drejtues i skafit 5.5 metra të gjatë, në të cilin u gjetën 510 kg lëndë narkotike.
Policia shqiptare bëri të ditur dje nëpërmjet një deklarate për shtyp se, “finalizohet një operacion tjetër i përbashkët mes Policisë së Shtetit dhe policisë italiane, GDF sekuestrohen rreth 510 kg marijuanë”. Por kjo deklaratë është rrëzuar nga Guardia Di Finanza. Guardia di Finanza deklaron për “ANSA”, agjensia zyrtare e lajmeve në Itali, si dhe për “Leccenews24” se, operacioni në fjalë, ka nisur pas “interceptinit të skafit të drogës nga helikopteri patrullë” për t’u përmbyllur me sukses në bregdet. Asnjë fjalë për “operacion të përbashkët” me policinë shqiptare, siç pretendon sërish policia shqiptare me deklaratë zyrtare!
Droga u sekuestrua në brigjet e Leçes në zonën e San Kataldos. Mediat italiane bëjnë të ditur se forcat e Guardia di Finanza-s ishin vënë në ndjekje të skafit pas sinjalizimeve nga helikopteri patrullë. Disa milje larg bregut, skafisti shqiptar kishte arritur të çante rrethimin e forcave detare italiane, të cilat menjëherë më pas sinjalizuan qendrën. Në ndihmë të tyre erdhi një helikopter i Guardia di Finanza-s që e ndoqi deri në brigjet e Leçes.
Pavarësisht detit të trazuar për shkak të motit të keq, shqiptari shkarkoi drogën dhe më pas tentoi të arratisej. Por policia italiane e zbuloi pak metra larg vendit të zbarkimit për shkak të veshjeve të tij të lagura dhe e vuri në pranga rreth orës 21:00 të së mërkurës. Prokuroria e Leçes ka nisur hetimet për gjetjen e pritësve të drogës në Itali dhe bashkëpunëtorëve të mundshëm të shqiptarit.
Tre ditë më parë, policia italiane sekuestroi 760 kg kanabis në Itali. Mediat italiane bënë të ditur se një gomone me 760 kg kanabis e nisur nga bregdeti shqiptar është sekuestruar të hënën në Leçe. “La Repubblica” shkruan se mjeti lundrues është gjetur në brigjet e Leçes dhe afër tij u zbuluan 760 kilogramë marijuanë. Bima narkotike nëse do të përfundonte në treg përllogaritet që të kapë vlerën e 7 milionë eurove. Ndërsa drejtuesit e gomones janë arratisur, pasi kanë shpuar me thikë mjetin lundrues pas arritjes në breg.

Trafiku i drogës Shqipëri-Greqi-Gjermani

Dy ditë më parë policia greke në bashkëpunim me DEA-n amerikane dhe me autoritetet gjermane shkatërruan një organizatë droge që trafikonte kanabis nga Shqipëria në Greqi dhe më pas në Gjermani. Në portin e Igumenicës u sekuestrua 266 kg kanabis të fshehura në brendësi të dy kamionëve që do të imbarkoheshin në traget me destinacion Gjermaninë. Katër grekë u arrestuan gjatë operacionit të zhvilluar njëkohësisht në dy shtete, 3 në Greqi dhe një në Gjermani.
Operacioni filloi, pasi autoritetet greke të portit të Igumenicës zbuluan një sasi të madhe droge në një furgon frigorifer që do të udhëtonte me tragetin e linjës për në Itali. Rreth 213 kg kanabis, të fshehura mes një ngarkese me mobilje dhe djathë, u zbuluan gjatë kalimit të furgonit nga skaneri. Dy drejtuesit grekë të furgonit u arrestuan. Përveç tyre, në Greqi janë arrestuar edhe 4 shtetas shqiptarë, ndërsa një pjesëtar i rrjetit është arrestuar në Gjermani.
Rrjeti dyshohet se sillte drogë nga Shqipëria në Greqi, dhe prej andej trafikohej për në shtete të tjera europiane. Sasi e kanabisit e kapur në Igumenicë mendohet se përfaqëson një pjesë fare të vogël të drogës që ka trafikuar grupi në fjalë, për të cilin ende nuk janë dhënë detaje. Pritet që autoritetet greke të bëjnë njoftimet zyrtare, kur operacioni të finalizohet.
Nga hetimet e deritanishme është zbuluar se droga trafikohej nga Shqipëria në Greqi. Në shtetin fqinj aty paketohej dhe më pas trafikohej për në Gjermani dhe shtete të tjera të Evropës Perëndimore. Deri tani, policia greke nuk raporton për shqiptarë të arrestuar. Sasi e drogës së kapur vlerësohet rreth 265 mijë euro, ndërsa në kamion u sekuestruan edhe 2800 euro dhe 4 celularë.

Reagon Berisha: Mashtrim i paskrupullt i Saje qorrit!

Ish-Kryeministri Berisha ka reaguar ndaj mashtrimit të policisë shqiptare, e cila deklaroi se, kishte bashkëpunuar me policinë italianë për bllokimin e skafit me 510 kg drogë në Leçe, të nisur nga Shqipëria. Në një postim në rrjetin social Facebook, Berisha shkruan se, mashtrimi i paskrupullt i Saje qorrit është përgënjeshtruar nga autoritetet italiane. “Një mashtrim i neveritshëm dhe i paskrupull i Saje qorrit që përgënjeshtrohet nga autoritetet italiane, Guardia di Finanza!”, shkruan Berisha në Facebook, duke publikuar edhe faksimilet e mediave italiane për zhvillimin e operacionit nga Guardia Di Finanza.
“Të dashur miq, në lumin e drogës që vërshon çdo ditë drejt Italisë nga Shqipëria, sot autoritetet italiane të Lecces kapën 510 kg. Lidhur me këtë, Saje qorri mashtron shqiptarët me një komunikatë, në të cilën thuhet se: “Finalizohet një operacion tjetër i përbashkët mes Policisë së Shtetit dhe policisë italiane, GDF sekuestrohen rreth 510 kg marijuanë”.
Ndërkohë lajmet zyrtare italiane nuk i referohen në asnjë fjalë policisë shqiptare, përkundrazi thonë se skafi me drogë u diktua në det nga helikopteri i patrullës së policisë italiane. Ky është mashtrimi i radhës i Saje qorrit që nuk skuqet as nuk zverdhet nga turpet e tij”, përfundon Berisha.

Prokuroria zbardh funksionin e Balilit në trafikun e drogës

Zbardhen detaje të reja të dosjes së Klemend Balilit, të njohur si Eskobari i Ballkanit. “ABC News” ka siguruar materialet ku identifikohen emrat e personave të përfshirë në rrjetin e narkotrafikut si dhe detajet e momentit të arrestimit të pothuajse gjithë grupit kriminal. Në dosje figuron edhe emri i Klemend Balilit si drejtuesi kryesor i trafikut të drogës nga Shqipëria drejt vendeve të Bashkimit Europian.
Klemend Balili u identifikua si drejtuesi i grupit kriminal që transportonte drogë drejt Europës nga një telefonatë. Prokuroria greke me ndihmën e DEA-s kishin vënë në përgjim disa biznesmenë grekë që merreshin me trafik droge. Deri në atë kohë, Klemend Balili njihej vetëm si “Kelly” dhe kishte në përdorim dy numra telefoni.
Por në fillim të muajit mars, biznesmeni i arrestuar në Greqi, Georgios Alifandis, i kërkon personit me të cilin komunikonte vazhdimisht për ngarkesat e drogës, t’i dërgonte me mesazh numrin e pasaportës së tij.
Pas kësaj kërkese, Kelly i dërgon me mesazh nr. e pasaportës së tij. Më pas, hetuesit grekë kanë futur në sistem numrin e pasaportës dhe kanë parë se  dokumenti i përkiste Klemend Balilit. Me identifikimin e numrave të telefonit, Prokuroria greke ka siguruar qindra biseda telefonike mes Balilit e skafistëve që angazhonte ai për transportin e drogës dhe biznesmenët grekë, të cilët ishin pritësit e mallit.
Ndonëse është shpallur në kërkim ndërkombëtar, Balili nuk arrestohet nga policia shqiptare. Në dosjen greke thuhet se, ka dyshime se, Balili ka ndryshuar identitet. Sipas hetuesve grekë, ai fshihet në zonën e Sarandës, duke pasur edhe mbrojtjen e policisë lokale. Për ta forcuar këtë akuzë, prokurorët grekë kanë shkruar në dosje se, të dielën e 16 tetorit 2016, Balili kishte kaluar drejt shtetit maqedonas nëpërmjet pikës kufitare të Tushemishtit, me kartë identiteti të ndryshuar, ndërkohë që ishte kthyer po atë ditë në mbrëmje në vendlindje.
Transporti i trafikantit të drogës ishte bërë me autobusin e linjës, duke mos tërhequr edhe vëmendjen e autoriteteve kufitare. Përveç kërkesës për arrestim ndaj Balilit, në fillim të muajit nëntor mbërritën në Tiranë edhe 2 prokurorë grekë, të cilët kanë kërkuar intensifikimin e hetimeve pasurore për familjarët e 46-vjeçarit që jetojnë në disa vende të BE, si Itali e Gjermani.

Raporti i Antimafias/Droga, armët dhe tritoli nga Shqipëria pushtojnë Italinë

“Vite më parë ishin vetëm cigaret, ndërsa sot është kanabisi, emigrantët, armët dhe tritoli. Të gjitha këto kalojnë nëpërmjet rajonit të Pulias në 80 kilometra vijë bregdetare, e cila është zgjedhur nga krimi shqiptar për trafiqet e paligjshme”. Kështu shkruante dje gazeta e madhe italiane “La Repubblica”, e cila thotë se shqiptarët zotërojnë rrugën ballkanike të trafikut të drogës, armëve dhe emigrantëve drejt vendit fqinj.
Gazeta e ka bazuar shkrimin e saj mbi raportin e fundit të Antimafias, i cili është dorëzuar në Parlamentin italian. Sipas raportit në kanalin e “Otranto”-s nuk lëviz asgjë pa pëlqimin e grupeve kriminale shqiptare. Ata janë të fokusuar në trafikun e drogës dhe armëve, i cili është më i thjeshtë për t’u menaxhuar sesa ai i emigrantëve, të cilin jua kanë mafies turke.
Për të transportuar drogën, armët dhe eksplozivin, shqiptarët përdorin gomone dhe avionë të vegjël. Në shkrim thuhet se, thuajse e gjithë marijuana që mbillet në Shqipëri është e destinuar për t’u trafikuar në Itali, e cila dikur mbillej vetëm në Lazarat, ndërsa vitet e fundit në të gjithë vendin-vazhdon raportimin gazeta e njohur italiane.
Sipas “La Repubblica” edhe mëngjesin e datën 1 janar të këtij viti në plazhin e Pulias janë gjetur 41 kilogramë tritol i ndarë në disa pako. Ky lloj trafiku është një risi, pasi asnjëherë më parë nuk ishin sekuestruar ngarkesa të tilla eksplozivi kaq të mëdha. Autoritet italiane ende nuk e kanë përcaktuar se nga ka mbërritur lënda eksplozive dhe përse do të përdorej.
Megjithatë, hetuesit nuk kanë dyshime se bëhet fjalë për eksploziv ushtarak dhe origjina mund të jetë nga Evropa Lindore, posaçërisht Shqipëria. Bregdeti i Pulias është zgjedhur jo rastësisht nga trafikantët shqiptarë. Plazhet me rërë bëjnë që gomonet dhe avionët ta kenë më të lehtë ankorimin dhe mbulimin.
Në këtë rajon ka mjaft shtëpi të pabanuara për të fshehur mallin. Ndërsa pyjet e dendura janë vendet më të mira për të fshehur makinat, të cilat ngarkohen për ta dërguar drogën drejt Veriut të Italisë, vazhdon raportimin gazeta, duke ju referuar raportit më të fundit të antimafies italiane të dorëzuar së fundmi në Parlament.

R.POLISI

Gjendet i vrarë në makinë taksisti i zhdukur në Durrës

Një taksist i zhdukur në Durrës që prej mbrëmjes së mërkurë është gjetur i vdekur brenda makinës së tij në Kavajë. Ishin familjarët e tij, ata që bënë kallëzim në Polici për zhdukjen e 53- vjeçarit Faik Fezgaj dhe pas kërkimeve të shumta, ai u gjet i vdekur në makinë. Banorë të zonës njoftuan dje policinë se, kishin parë një makinë të përmbysur në një kanal mes Kavajës dhe Rrogozhinës, në Komunën Gosë.
Makina është nxjerrë nga kanali 4 metër i thellë, ndërsa brenda saj u gjet trupi i pajetë i Faik Fezgajt që ishte në timon. Burime nga policia konfirmuan se, bëhet fjalë për taksistin e zhdukur. Nga hetimet paraprake dyshohet se bëhet fjalë për një ngjarje kriminale.
Burimet e policisë bënë të ditur se fillimisht u gjet mes Kavajës dhe Rrogozhinës mjeti i përmbysur në një kanal, dhe më vonë u gjet edhe trupi i pajetë i shoferit. Policia bëri të ditur se, në vijim priten të tjera detaje për të sqaruar nëse është vrasje apo aksident me pasojë vdekjen.
Në një njoftim për mediat, Policia e Durrësit bëri të ditur se, po punohet për zbardhjen e rrethanave të kësaj ngjarjeje. “Rreth orës 09:44, në fshatin Vil Bashtovë, nga shërbimet e Policisë Rrogozhinë, është vënë re një mjet në brendësi të një kanali me ujë. Menjëherë është bërë sigurimi i vendit të ngjarjes dhe nxjerrja e automjetit nga uji, ku në brendësi të mjetit në vendin e drejtuesit, ndodhet trupi i pajetë i një mashkulli. Grupi hetimor në vendin e ngjarjes ka bërë të mundur identifikimin e drejtuesit të automjetit, shtetasi F. F., 53 vjeç dhe automjetit tip “Mercedes Benz”, me targë DR 443 A, të raportuar të zhdukur nga D.V.P. Durrës. Po punohet për zbardhjen e rrethanave të kësaj ngjarjeje”, thuhet në njoftimin e policisë.

Alarmi i familjes

Familjarët e 53-vjeçarit Faik Fezgaj kanë bërë kallëzim të mërkurën në mbrëmje rreth orës 21:30 në Komisariatin e Policisë Durrës. 53-vjeçari, i cili gjithë jetën kishte punuar taksist dhe ishte i licencuar kishte dalë në punë normalisht si çdo ditë. Rreth orës 18:45 kishte folur me vajzën e tij në telefon dhe i kishte thënë se po kthehej në shtëpi. Por, pavarësisht se familja ka pritur gjatë, ai nuk ka shkuar dhe madje nuk është përgjigjur më në telefon. Pas kësaj gruaja, dy vajzat dhe dhëndri i tij kanë shkuar në polici, ku kanë bërë denoncimin.
Mësohet se taksisti që punonte me një automjet tip “Benz” ngjyrë blu me targa DR 443 A ka pasur me vete lekët e mbledhura nga puna e ditës së mërkurë. “Kemi bërë denoncimin dhe dy vajzat dhe gruaja janë në gjendje shumë të keqe. Kemi frikë mos e kanë rrëmbyer”, tha dhëndri i 53-vjeçarit.

Dëshmitë

Policia ka marrë në pyetje kolegët e taksistit që u gjet i vdekur për të mësuar më shumë rreth orëve të fundit të tij në punë. Taksitët e marrë në pyetje kanë deklaruar se, ka qenë errësirë dhe nuk e kanë parë klientin që ka hipur në taksinë e 53-vjeçarit Faik Fezgaj për herë të fundit.
Kolegët e tij taksistë shprehen se, Fezgajt kishte rënë më parë dy herë pre e grabitjeve. Ata pohojnë se kanë frikë për fatin e shokut të tyre, pasi nuk e kanë parë që prej mbrëmjes së djeshme. Nga dëshmitë e familjarëve të 53-vjeçarit, ai kishte dalë si gjithmonë për punë dhe nuk ishte kthyer më në shtëpi.
Ky rast është ende nën hetimin e policisë, pasi nuk dihet nëse ngjarja është aksidentale apo kriminale. Ndërkohë, një ngjarje e rëndë ndodhi në muajin dhjetor në Kavajë, ku një taksist u mor peng e më pas u vra nga një përdorues lëndësh narkotike.

R.POLISI

Dy të vdekur, 3 të plagosur në dy aksidente në Tiranë

Dy persona kanë humbur jetën gjatë ditës së djeshme në dy aksidente që ndodhën në Tiranë. Aksidenti i parë me pasojë një të vdekur dhe tre të plagosur ka ndodhur gjatë natës në Tiranë. Sipas policisë ngjarja ka ndodhur në kryqëzimin e Laprakës, ndërsa janë përplasur dy automjete. Mësohet se viktima është një vajzë, e cila ishte pasagjere në njërin prej mjeteve që u përplasën, ndërsa të plagosurit janë drejtuesit e mjeteve dhe një vajzë tjetër, e cila ishte pasagjere.
Sipas dëshmitarëve në vendngjarje, njëra prej automjeteve të përplasura ka qenë me shpejtësi të madhe dhe ka kaluar në semafor të kuq. Në automjetin që ishte me shpejtësi, raportohet se shofer ishte një mashkull dhe bashkë me të udhëtonin edhe dy vajza të tjetra.
“Njëra nga vajzat ka dalë nga xhami. Tjetra është e masakruar në fytyrë”, janë shprehur dëshmitarët në vendngjarje. Të plagosurit janë dërguar në spital për ndihmë mjekësore, ndërsa policia ka nisur hetimet.
Policia e Tiranës ka dhënë detaje për aksidentin e ndodhur në kryqëzimin e Laprakës. Sipas policisë, është arrestuar në flagrancë shoferi Ervin Bixhi, 26 vjeç, pasi drejtonte mjetin nën ndikimin e alkoolit. Dy mjetet janë përplasur në rrugën “Dritan Hoxha”, ndërsa drejtuesi i mjetit tjetër të përfshirë në aksident është me detyrë oficer policie. Viktimë ka mbetur Xh. T, 28 vjeçe, banuese në Tiranë, e cila ishte pasagjere së bashku me vajzën tjetër, F. F, 25 vjeçe në mjetin e Ervin Bixhit.
Ndërkohë një tjetër aksident me pasojë vdekjen ka ndodhur në segmentin rrugor Tiranë-Fushë Krujë. Ngjarja ka ndodhur rreth orës 19:00 ku drejtuesi i automjetit tip “Mercedes Benz”, me inicialet Gj. Gj., ka aksidentuar një këmbësor të seksit mashkull, rreth 40 vjeç, i cili ka gjetur vdekjen e menjëhershme si pasojë e plagëve të marra. Grupi hetimor po punon për zbardhjen e plotë të rrethanave të aksidentit dhe identifikimit të viktimës së këtij aksidenti. Drejtuesi i automjetit është shoqëruar nga Shërbimet e Policisë Rrugore për veprime të mëtejshme.

Atentat, plagoset me armë një 42-vjeçar në Shijak

Një atentat me armë ka ndodhur në orët e para të mëngjesit të djeshëm në Shijak. Burime nga policia thanë se, rreth orës 02:20, në lagjen “Ballias” të Shijakut  kanë qëlluar me armë zjarri në rrugë, rreth 30-40 metra 42-vjeçarin me inicialet S. Gj., i cili është plagosur lehtë në pjesën e parakrahut. S. Gj. ka qenë duke u kthyer në banesë me mjetin e tij, tip “Range Rover” me targa AA 580 MS.
I dëmtuari, pasi ka marrë mjekim në Spitalin Rajonal Durrës është larguar për në banesë. Menjëherë në vendngjarje ka shkuar policia, e cila ka nisur hetimet në vendin e ngjarjes, duke mbledhur provat materiale me qëllim identifikimin dhe kapjen e autorëve.
Gjatë këqyrjes së vendit të ngjarjes janë gjetur disa gëzhoja të kalibrit 9 mm. S. Gj., ka qenë i dënuar me 7 vjet burgim për veprën penale”Trafikim të lëndëve narkotike”, i cili është liruar në vitin 2012.
Specialistët e Sektorit për Hetimin e Krimeve të Rënda në Drejtorinë Vendore të Policisë Durrës vijojnë hetimet për zbardhjen dhe dokumentimin e plotë të ngjarjes.

Fshatrat e Kukësit të bllokuar nga bora dhe pa energji elektrike

Kukësi vijon të jetë nën pushtetin e dëborës, reshjet e së cilës janë intensifikuar gjatë mëngjesit të sotëm. Fshatrat Arrën, Kalis, Grykëçajë e Surroj janë të bllokuara, ndërsa një pjesë e fshatrave janë pa energji elektrike, njofton bashkia e këtij qyteti. Në një dalje për mediat, Kryetari i Bashkisë, Bashkim Shehu, kërkon mbështetjen e Drejtorisë së Përgjithshme të Emergjencave për situatën, ndërsa shton se, bashkia ka marrë të gjitha masat për funksionimin e institucioneve jetike si Ujësjellësi si dhe mbajtjen hapur të rrugëve që të çojnë drejt spitalit, maternitetit dhe njësive të shërbimit.
Kryetari i Bashkisë i bën apel qytetarëve që të mos lëvizin pa pasur një arsye të fortë në këto ditë ku priten edhe rënie drastike të temperaturave.
Prej tre ditësh në Veri të vendit kanë nisur reshje të dendura dëbore, duke bërë që shumë akse rrugore të kalohen me vështirësi me ndihmën e zinxhirëve. Edhe pse janë angazhuar 10 borëpastruese, situata në rrugën e “Kombit” paraqitet e vështirë.

Punonjësi i OSHEE ngrin në shtyllë në Kukës

Një punonjës i OSHEE-së ka ngrirë thuajse totalisht në një shtyllë në qytetin e Kukësit, teksa po punonte. Ai është dërguar menjëherë në spital në gjendje të rëndë. Sipas burimeve, temperatura e tij e trupit kishte rënë në 34 gradë. Por me ndërhyrjen e mjekëve, ai tashmë ndodhet jashtë rrezikut për jetën.

Bllokohet Dibra, dëbora arrin në 50 cm

Situata në Dibër është rënduar për shkak të reshjeve të dëborës. Mësohet se në Dibër janë të bllokuara rrugët në të gjitha njësitë administrative për shkak të borës që ka arritur edhe deri në 50 cm. Situata pritet të përkeqësohet gjatë fundjavës, referuar parashikimeve të sinoptikanëve. Edhe në rrugën nacionale Peshkopi-Tiranë, lëvizet vetëm me zinxhirë për shkak të dëborës.

Bllokohen në mes të borës 5 persona në Pukë

Pesë persona kanë mbetur të bllokur brenda një makine në aksin rrugor Fushë Arrëz-Kukës. Mësohet se në ndihmë të të bllokuarve kanë shkuar ekipi i ndihmës. Ky aks paraqet rrezikshmëri të lartë në mot me dëborë. Ndërkohë, që Shtabi i Emergjencës Civile ju bën thirrje të gjithë drejtuesve të mjeteve që të mos lëvizin në këtë aks rrugor, pasi është i pakalueshëm.

Korrupsioni 9.4 milionë euro për by-pass e Fierit, KLSH kallëzon përgjegjësin e ARRSH

Kontrolli i Lartë i Shtetit konstaton abuzime me ndërtimin e by pass-eve të Fierit dhe Vlorës duke i shkaktuar shtetit një dëm ekonomik mbi 9.4 mln euro. Po ashtu KLSH ka konstatuar shpenzime që nuk përputhen me eficencën të 8 mln eurove, pagesa ndaj kontraktorëve privatë të dhëna në kundërshtim me kontratën e punimeve civile dhe keqmenaxhim të fondeve.
Për të gjitha këto shkelje KLSH kallëzoi në prokurori Përgjegjësin e Sektorit të Projekteve të Huaja dhe të Brendshme në ARRSH, shtetasin me incialet E.N me akuzën e shpërdorimit të detyrës.
Ndërsa nuk përjashton nga përgjegjësia edhe persona të tjerë vendimmarrës në këtë institucion.  Gjatë auditimit u konstatuan shkelje të kontratave të konsulencës dhe punimeve si edhe pagesa për punime të parealizuara si dhe ndryshim të projektit e shoqëruar edhe me rritje fiktive të çmimit për zëra të ndryshëm.
ARRSH ka lidhur dy kontrata për ndërtimin e by pass-it të Fierit me vlerë 39,866,012 euro pa TVSH dhe për atë të Vlorës një kontratë me vlerë 35,289,872 euro pa TVSH. Ndërsa KLSH konstatoi në auditim se afati i punimeve nuk është përmbushur për të dyja kontratat.
ARRSH nuk i ka paraqitur deri më sot kompanisë zbatuese asnjë pretendim ‘zyrtar’ në lidhje me penalitetet që kjo shoqëri duhet të paguajë si pasojë e vonesave në kryerjen e punimeve dhe të cilat sipas përllogaritjeve të grupit të auditimit të KLSH-së arrijnë deri në 4,125,346 euro.
Për realizimin e këtyre dy projekteve, qeverisë shqiptare i është ofruar ndihmë ekonomike në formë huaje nga tre donatorë të huaj, Bankat BEI, BERZH, Cooperacione Italiane, si dhe grand nga Komisioni Europian dhe nga fondet IPA 2011.

1...7 4707 4717 472...8 382Faqja 7 471 nga 8 382

Kryesore

Continue to the category
Më shumë
© 2024 Rilindja Demokratike Euroatlantike