Trajneri i Peskarës, Masimo Odo, ka vendosur që të falë Rei Manajn dhe e ka kthyer përsëri në skuadër për ndeshjen kundër Atalantës në Kupën e Italisë. Sulmuesi ishte përjashtuar pak ditë më parë për ndeshjen ndaj Romës për shkak të një zënke me portierin në stërvitje dhe Odo kishte bërë të qartë se ai nuk duhej ta cilësonte veten një yll.
“Është 19 vjeç, nuk është Toti e as Kanavaro”, ishin fjalët e lëshuara nga Odo, duke lënë të kuptonte se sulmuesi rrezikonte vendin e tij me atë që kishte bërë. Por duket se situata është zbutur dhe futbollisti rezulton mes të grumbulluarve për duelin e mesjavës në Kupën e Italisë.
Odo ka shpjeguar se nuk ekzistonte asnjë “çështje Manaj” në klubin e tij, por ka dhënë një mesazh paralajmërimi për djaloshin shqiptar në konferencën e sotme për shtyp.
“Manaj? Cilësojeni si një lojtar të të rinjve që stërvitet me të rriturit. Ai duhet të hajë bar dhe nesër do të vijë me ne në Bergamo. Nuk ekziston asnjë çështje Manaj”, ishin fjalët e trajnerit, duke lënë të kuptohet se futbollisti nuk duhej të kishte shumë pretendime, por duhej të ulte kokën e të punonte për të fituar një vend në formacion.

Sokol Cikalleshi rikthehet në protagonist. Sulmuesi shqiptar ishte lojtari që vulosi fitoren 1-0 të Istanbul Basaksehir, në fushë e Yeni Amasyaspor në Kupën e Turqisë. 26-vjeçari që u aktivizua në formacionin titullar të ekipit nga Stambolli për herë të parë prej muajit gusht, realizoi rrjetën e vetme të sfidës në minutën e 73-të.
Kontroll i shkëlqyer i topit në zonë dhe më pas qetësia e një bomberi, që për muaj me radhë ka pritur me qetësi rastin e tij për ta dërguar topin në rrjetë. Pas festës së golit, sulmuesi shqiptar u zëvendësua në minutën e 81-të të ndeshjes së Grupit F, në turin e dytë të Kupës së Turqisë. Ky ishte goli i parë sezonal për Cikalleshin, me kuqeziun që në këtë sezon ka vuajtur mungesën e hapësirave te Istanbul Başakşehir, me vetëm 64 minuta të luajtura në kampionat.
Kavajasi u aktivizua si titullar në javën e parë të Superligës turke më 21 gusht në suksesin 1-0 përballë Fenerbahçe-s. Në kampionat sulmuesi luajti si zëvendësues edhe pak minuta në barazimin 2-2 përballë Osmanlıspor-it më 24 shtator. Prej aty që anashkalim i gjatë nga trajneri Abdullah Avcı, që në javët e fundit e kishte dërguar edhe në tribunë.
Por, me aktivizimin në Kupë dhe golin e parë të shënuar në Turqi prej majit të kaluar, në fitoren 2-1 në fushën e Eskişehirspor, Sokol Cikalleshi tregoi që mbetet aty. Gati për të konfirmuar cilësitë e tij sa herë t’i jepet rasti dhe pse jo për të ndihmuar Başakşehir-in kryesues në Superligë, drejt ëndrrës për të fituar titullin kampion.

Edinson Kavani nderon Paris Saint Germain-in. Falë një dygolëshi të sulmuesit uruguaian, skuadra e Unai Emery triumfoi në klasiken e futbollit francez pasi mposhti me shifrat 2-1 Olympique Lyonin. Një fitore shumë e rëndësishme kjo për kampionët e Francës, që përfituan edhe nga hapi fals i Nicës për të barazuar Monacon në kuotën e 32 pikëve në vendin e dytë të klasfikimit dhe për ta çuar në vetëm 1 pikë disavantazhin ndaj skuadrës së Lucien Favre që kryeson Ligue 1.
Në Lyon, Edinson Kavani arriti të zhbllokonte shifrat në minutën e 30-të teksa kthehu në gol një 11-metërsh. Me këtë rezultat përfundoi pjesa e parë ndërkohë që fraksioni i dytë nisi me gol për vendasit. Lyoni barazoi shifrat me Mathew Valbuenan duke ia vështirësuar shumë gjërat Parisit. Por atëherë kur dukej se gjithçka po shkonte drejt barazimit, të besuarit e Unai Emery gjetën golin e fitores. Në minutën e 81-të El Matador vrau përfundimisht shpresat e Lyonit për të dalë me një rezultat pozitiv nga kjo sfidë, duke realizuar golin e fitores për miqtë me një goditje me kokë pas një krosimi perfekt të belgut Meunier. Goli i 13-të në Ligue 1 për Kavanin që kryeson i vetëm listën e golashënuesve.

Antoine Griezman ka mësuar shumë shpejt se çfarë do të thotë të jesh një futbollist i Atleticos së Madridit. Francezi, i cili ka shkëlqyer gjatë viteve të fundit me Los Colchoneros është një nga futbollistët më të kërkuar në merkato, por Griezman nëse vendos të largohet një ditë nga “Vicente Calderon”, nuk do të transferohet te Reali i Madridit. Në një intervistë për mediat franceze 25-vjeçari la të kuptohet se për momentin ndihet shumë mirë te Atletico: “Jam i lumtur këtu, kemi një skuadër të fortë dhe të aftë për të fituar trofe, është e qartë që dua të fitoj sa më shumë tituj, por te Reali i Madridit nuk do të shkoja kurrë për shkak të rivalitetit që ekziston mes dy klubeve”, theksoi fillimisht Griezman.
Sulmuesi i përfaqësueses franceze shtoi gjithashtu se ekziston një pakt mes dy skuadrave të kryeqytetit spanjoll për të mos firmosur me futbollistët e njëra-tjetrës. Ky pakt ndërkohë nuk ekziston mes Barcelonës dhe Atleticos, nënvizoi Griezman, duke lënë të hapura dyert për t’u transferuar një ditë në “Camp Nou”. 25-vjeçari në një të ardhme të afërt nuk dëshiron të luajë në Francë edhe pse e përkufizoi, Paris Saint Germain-in si një klub shumë interesant. Për ish-lojtarin e Real Sociedad-it interesohen Manchester United dhe Chelsea dhe vetë Griezman e shikon me sy të mirë një transferim të mundshëm në Premier League edhe pse për momentin preferon të luajë vetëm në La Liga. Në lidhje me Topin e Artë edhe pse është një nga kandidatët për të fituar Griezman theksoi se Cristiano Ronaldo e meriton këtë trofe pasi ka fituar Champions-in me Realin dhe Kampionatin Europian me Portugalinë. Në fund të intervistës së tij Griezman deklaroi se Cristiano do të jetë një legjendë e futbollit pas 10 vitesh.

Interi fitoi 4-2 me Fiorentinën në “San Siro” në takimin përmbyllës të javës së 14-të të Serisë A dhe rikuperon plot katër pozicione në renditjen e përgjithshme. Zikaltrit në fakt e zgjidhën ndeshjen që në pjesën e parë, duke shënuar 3 gola për 19 minuta lojë. Borozovic goditi saktë nga një pozicion ballor në hyrje të zonës duke zhbllokuar ndeshjen që në minutën e 3-të.
Vetëm 6 minuta më vonë Antonio Candreva, i ndihmuar edhe nga devijimi i portierit shënoi golin e 2-0. Ndërsa pa u mbushur 20 minuta lojë, Mauro Icardi vallëzoi mes mbrojtjes mike, duke i çuar shifrat në 3-0. Një rreshtim i gabuar i mbrojtjes zikaltër i dha mundësinë kroatit Kalinic të shkurtonte diferencën në 3-1 në minutën e 37-të. Në fund të pjesës së parë Fiorentina mbeti me një lojtar më pak pas ndëshkimit me karton të kuq të Rodriguez. Gjatë pjesës së dytë skuadra e Piolit u ndëshkua nga Ilicic që rihapi ndeshjen në minutën e 62- të. Tifozët vendas u qetësuan vetëm minutën e parë shtesë, kur Icardi vulosi rezultatin në 4-2.
Fitorja e parë si trajner i Interit për Stefano Piolin, i cili në konferencën e djeshme për shtyp analizoi suksesin përballë Fiorentinës: “Nuk dua të flas për vendimet e arbitrit, por për ndeshjen. Kemi treguar shumë gjëra pozitive, sidomos në fillimin e ndeshjes. Ky grup është shumë i vlefshëm dhe jam i bindur që me punë do të përmirësohemi shumë”, tha fillimisht italiani.
Më tej ai shtoi: “Ishte një fitore e rëndësishme për moralin e ekipit. Ekipit i kërkova që të ishte konkret dhe jam i lumtur me sinjalet që mora. Rruga është ende shumë e gjatë, sigurisht duhet të përmirësojmë disa aspekte siç është menaxhimi i rezultatit, por jam i bindur se shumë shpejt do të gjejmë një skuadër më konkrete dhe me ide të qarta”.
Zhgënjen Napoli, që nuk arriti të merrte maksimumin e pikëve ndaj Sassuolos. Në “San Paolo” kjo përballje u mbyll në barazim 1-1, me vendasit që shënuan të parët në fund të pjesës së parë me Lorenzo Inignen, që lëshoi një të djathtë të kalibruar nga jashtë zonës. Atëherë kur sfida po i drejtohej fundit Defrel goditi fluturimthi me topin që përshëndeti rrjetën. Hysaj u aktivizua gjatë gjithë ndeshjen në radhët e napolitanëve, por pa mundur t’i paraprijë goditjes së futbollistit të Sassuolos, i cili iu shmang qendërmbrojtësve vendas.

Alarm në mbrojtjen juventine. Bardhezinjtë po përballen me mjaft probleme në repartin e prapavijës, jo për nga numri i golave të pësuar, por për shkak se shumë futbollistë janë të dëmtuar. Lajmi i keq është konfirmimi nga stafi mjekësor se Leonardo Bonuçi duhet të qëndrojë larg fushave për 2 muaj. Andrea Barzagli, pritet të rikthehet vetëm në janar të 2017-ës, ndërsa një tjetër mungesë tejet e rëndësishme për kampionët e Italisë është ajo e brazilianit Dani Alves, i cili ka pësuar frakturë në këmbën e djathtë. Sipas stafit mjekësor të “Zonjës së Vjetër” 33-vjeçari mund të jetë sërish në dispozicion të trajnerit Masimiliano Allegri vetëm në muajin shkurt. Me mbrojtjen të gjymtuar, për drejtuesin e stolit bardhezi kanë nisur dhembjet e kokës.
Për të qetësuar disi situatën mendon administratori i Përgjithshëm i Juventusit, Beppe Marotta, që në merkaton e dimrit do të ndërhyjë për të transferuar në Torino, një emër i cili do të ofrojë garanci në repartin difensiv. I pari në këtë listë është lojtari i Chelsea-t, Bratislav Ivanoviç. 32-vjeçari nuk po gjen hapësira në formacionin e Antonio Contes dhe cilësohet si një prej emrave që do të preken nga revolucioni në radhët e bluve të Londrës. Transferimi i tij ishte planifikuar gjatë merkatos së verës, por planet ndryshuan. Për të konkretizuar mundësinë e afrimit të Ivanoviç te Juventusi, pritet që së shpejti palët të ulen në bisedime.

Jurgen Klopp fërkon duart. Dëmtimi i Feipe Coutinhos nuk aq i rëndë sa u mendua fillimisht. Sulmuesi brazilian që pësoi një dëmtim në gju gjatë ndeshjes kundër Sunderland, nuk ka nevojë për ndërhyrje kirurgjikale. Lajmet që vijnë nga infermieria limitojnë dëmet pasi lojtari kryesor i sulmit të “The Reds” do të qëndrojë jashtë fushave për rreth 6 javë, çka do të thotë se Coutinho do të jetë gati për të zbritur në fushën e lojës në mesin e muajit janar. Objektivi i Coutinhos është rikthimi për transfertën e “Old Trafford” ndaj Manchester United, por ai do të jetë mungesa e madhe në sfidat derbi kundër Evertonit dhe Manchester City.
“Kontrollet e detajuara treguan se dëmtimi nuk është aq i rëndë sa mendohej, çfarë mund të them? Duhet të mësohemi me idenë që ai nuk do të jetë edhe pse mund të kishte shkuar më keq”, theksoi trajneri gjerman. Mesfushori organizator ishte një nga lojtarët më në formë të skuadrës së drejtuar nga Jurgen Klopp në këtë sezon, duke ndihmuar jo vetëm me asiste, por edhe me golat e tij, pasi ka shënuar deri tani 6 të tillë në kampionat, po aq sa Firmino dhe Mane.
Aktualisht, Liverpool mban vendin e dytë në klasifikimin e Premier League me vetëm një pikë më pak se Chelsea i Antonio Contes që kryeson pas 7 fitoreve rresht.

Tragjedi ajrore në futbollin botëror. Një avion me 81 persona në bord, përfshi dhe skuadrën braziliane të Chapocoenses është rrëzuar dje në orët e para të mëngjesit mbi Kolumbi, afër zonës së Rio Negros teksa po udhëtonte nga aeroporti bolivian i Viru Viru drejt atij të Medelinit, ku do të luante finalen e Copa Sudamericana kundër skuadrës së Atletico Nacional. Pamjet e marra në vendngjarje tregojnë avionin e shkatërruar dhe logon e skuadrës në një prej sendeve të gjetura në vendin e aksidentit. Sipas një komunikate të shpërndarë nga zyrtarët e aviacionit kolumbian, personat e mbijetuar janë pesë, mes të cilëve 3 futbollistë, mbrojtësi Alan Ruschel dhe dy portierët Danilo dhe Jackson Follman.
Nga 81 persona që ishin në bord, nëntë ishin anëtarë të ekuipazhit dhe 72 pasagjerë, ndërkohë që të 76 prej tyre u deklaruan të vdekur. Fillimisht nga trupi i avionit u nxorën të gjallë 6 persona, por njëri prej tyre humbi jetën në spitalin ku u dërguan me urgjencë. Kjo është padyshim tragjedia më e madhe ajrore që përfshin sportin pas asaj të Supergas, së 4 majit 1949 ku humbën jetën të gjithë futbollistët e Torinos së Madh. Imazhi i fundit, që qarkullon për ekipin e Chapocoenses është një video e shpërndarë nga ana e klubit brazilian ku shihen futbollistët teksa po ngjiteshin në avion. Ndërkohë që avioni është zhdukur nga radarët rreth orës lokale 21:33 të mbrëmjes ose 3:33 të mëngjesit me orën e Shqipërisë.
Aktualisht nuk janë bërë ende të ditura shkaqet e rrëzimit, por në atë moment zona ishte përfshirë nga një stuhi e ashpër dhe mendohet se avioni ka humbur menjëherë kuotë si pasojë e turbulencave, ndërsa nuk përjashtohet as mundësia e problemeve eletrike. Avioni charter i përkiste kompanisë boliviane Lamia. Finalja që Chapocoense do të luante me Atletico Nacional në Medelin ishte rezultati më i mirë historik i klubit brazilian, përpara se kjo ngjarje tragjike të merrte përgjithmonë yjet e këtij ekipi. Kësaj tragjedie i shpëtuan dhe tetë futbollistë të tjerë të skuadrës, të cilët nuk ishin grumbulluar nga klubi për transfertën me Atletico Nacionalin.