Raporti vjetor i Bashkimi Europian jep shifra alarmante të kultivimin dhe trafikut të lëndëve narkotike në Shqipëri. Në raportin vjetor të BE thuhet se, të ardhurat ilegale nga kanabis sativa në Shqipëri zënë 2,6% të Prodhimit të Brendshëm Bruto. Këtë shifër alarmante e jep raporti vjetor i Komisionit Europian që vlerëson ecurinë e Shqipërisë për vitin 2016, ndërsa shtete europiane si Franca, Gjermania, Italia dhe Mbretëria e Bashkuar, të ardhura ilegale nga bimët narkotike i kanë të papërfillshme, duke mos kapur 1% të PBB-së.
Shifra alarmante e këtij raporti shoqërohet gjithashtu dhe me vënien në dukje të mungesës së kapacitetit të Policisë së Shtetit për të luftuar këtë fenomen, i cili vitet e fundit është përhapur shumë. Ndërkohë që kërkesa për shtim të luftës kundër trafikut të bimëve narkotike është imediate, aq sa nga zyrtarë të BE-së po e shohin dhe si kusht në çeljen e negociatave, Ministria e Brendshme ka rritjen më të vogël të buxhetit me 17.6 mln lekë ose 0.09%. Në total për 2017, edhe pse ndër sektorët me peshën kryesore të buxhetit të shtetit me 7.47% ose rreth 20 miliardë lekë, Ministria e Brendshme renditet dikasteri i katërt sa i përket ndarjes së fondeve për vitin e ardhshëm.
Raporti i shpenzimeve të institucionit ndaj PBB edhe për këtë ministri ka pasur tendencë rënie në krahasim me vitin 2015. Kështu, nga 1.38% më 2015 ky raport për 2016 është 1.3%. Me vlerën prej 2.6 për qind e prodhimit kombëtar (PBB-së), industria e drogës në Shqipëri xhiron të njëjtën vlerë sa gjithë sektori i arsimit publik dhe privat, ose ai i hotelerisë dhe restoranteve. Raporti vjetor i KE-së vlerëson se ka pasur rënie të sasisë së drogave kokainë dhe heroinë të sekuestruar krahasuar me vitet 2014, 2015, duke nxjerrë në pah dhe mungesën e dënimeve.
“Pavarësisht intensifikimit të luftës kundër kultivimit dhe trafikimit të drogës, numri i dënimeve të formës së prerë mbetet i ulët. Dënimet dhe gjobat nuk janë parandalues efikasë dhe konfiskimi i aseteve kriminale është i kufizuar. Hetimet dhe procedimet nuk arrijnë deri në nivelet më të larta të zinxhirit të drogës dhe nuk shoqërohen sistematikisht me hetime paralele financiare”, thuhet në raportin e botuar më 9 nëntor të këtij viti. Dokumenti prej 117 faqesh i Komisioni Europian që përfshin ecurinë vjetore të Shqipërisë në të gjitha fushat e në plotësimin e kushteve për anëtarësim në BE.

Droga financon grupet kriminale në Shqipëri

Nga të ardhurat ilegale të narkotikëve në Shqipëri financohen grupet kriminale. Sipas organeve të specializuara të OKB-së, përfitimet nga tregtia e paligjshme e drogës vazhdojnë të mbeten nxitës të rëndësishëm financiarë për grupet e organizuara kriminale në Shqipëri. Të ardhurat ilegale të narkotikëve përbëjnë një përqindje të rëndësishme të GDP së Shqipërisë. Të ardhurat ilegale nga bimët narkotike llogariten se zënë një pjesë të madhe të PBB-së së Shqipërisë (2.60% krahasuar me 0.07-0.19% për vendet si Franca, Gjermania, Italia dhe Mbretëria e Bashkuar). Shqipëria ka intensifikuar luftën kundër kultivimit të drogës (kryesisht atë të llojit kanabis sativa), që mbetet një sfidë serioze.
Në vitin 2015, policia ka kryer 240 operacione kundër kultivimit dhe trafikimit të drogës, të cilat rezultuan në identifikimin e 4634 parcelave të kultivuara, si dhe arrestimin e 402 kriminelëve dhe shkatërrimin e 797.422 bimëve narkotike, 24.6008 më shumë se në vitin 2014. Prirja pozitive ka vazhduar edhe në vitin 2016, me konfiskime të mëdha të drogës dhe shkatërrimit të bimëve narkotike të llojit kanabis sativa gjatë verës. Prirjet e fundit kanë treguar se kultivimi i kanabisit kryhet edhe në serra. Nevojiten më shumë përpjekje për të përmirësuar asgjësimin e plantacioneve me kanabis. Në fushën e trafikimit të drogës, në vitin 2015 janë sekuestruar 36.9 kg drogë të llojit heroinë, mbi 11 tonë marijuanë dhe 27.1 kg kokainë (kundrejt 73.5 kg heroinë, 97 tonë marijuanë dhe 10.3 kg kokainë të sekuestruara në vitin 2014).
Kjo rënie e sekuestrimit mund të shpjegohet me rizhvendosjen e trafikut të paligjshëm përmes vendeve të tjera, e shoqëruar kjo me mungesën e shërbimeve të përshtatshme sekrete dhe për pasojë me numrin e ulët të kapjeve. Pas miratimit të ligjit të ri për strukturën e organizimit të policisë, hapja e tetë komisariateve të reja duhet të sigurojë një kontroll më të mirë të territorit për qëllime të parandalimit dhe shkatërrimit të kultivimit të drogës. Pavarësisht intensifikimit të luftës kundër kultivimit dhe trafikimit të drogës, numri i dënimeve të formës së prerë mbetet i ulët. Dënimet dhe gjobat nuk janë parandalues efikas dhe konfiskimi i aseteve kriminale është i kufizuar. Hetimet dhe procedimet nuk arrijnë deri në nivelet më të larta të zinxhirit të drogës dhe nuk shoqërohen sistematikisht me hetime paralele financiare.
Në vitin 2015, policia ka dorëzuar në Prokurori 1.008 raste që lidhen me prodhimin dhe trafikimin e drogës (344 më pak se në vitin 2014). Vetëm 359 janë dërguar në gjykatë (nga 372 në vitin 2014). Kapacitetet për të menaxhuar, magazinuar dhe shkatërruar drogat mbeten shumë të dobëta. Duhet përmirësuar procedura e shkatërrimit të bimëve narkotike të sekuestruara. Duhet përgatitur një protokoll që i ngarkon Ministrisë së Mjedisit detyrën e menaxhimit të bimëve narkotike, siç janë monitorimi dhe kampionimi i ajrit dhe dheut. Drogat duhen asgjësuar menjëherë, ose direkt pas sekuestrimit dhe duhen mbajtur vetëm kampionë të vegjël për analiza në institutin shkencor. Përveç kësaj, duhet ngritur një njësi e trajnuar, e cila do të trajtojë çështjen e laboratorëve të paligjshëm për sintezën e drogave të paligjshme.

Policia nuk bashkëpunon me Prokurorinë

Ky raport mbulon periudhën nga tetor 2015 deri në shtator 2016. Ai bazohet në të dhëna të marra nga një larmi burimesh, përfshirë kontributet e qeverisë shqiptare, shtetet anëtare të BE-së, raportet e Parlamentit Evropian dhe informacione nga organizata të ndryshme ndërkombëtare dhe joqeveritare. Në lidhje me luftën kundër krimit të organizuar, dokumenti thekson se vendi ka arritur njëfarë niveli përgatitjeje. “Policia u modernizua dhe u rrit bashkëpunimi ndërkombëtar policor, sidomos me Europol-in. Megjithatë, bashkëpunimi mes policisë dhe Prokurorisë duhet të forcohet më tej për të shpërbërë rrjetet kriminale në mënyrë më efektive. Hetimet financiare në lidhje me grupet e organizuara kriminale nuk janë zhvilluar në mënyrë sistematike dhe efektive. Historiku i ngrirjes dhe konfiskimit të pasurive të fituara në mënyrë të paligjshme mbetet shumë i ulët”, thuhet në raport.
Duhet të forcohet bashkëpunimi mes policisë dhe Prokurorisë në mënyrë që të shpërbëjnë rrjetet kriminale në mënyrë më efikase. Numri i vendimeve të formës së prerë në rastet e krimeve të organizuara mbetet i kufizuar, duke shënuar vetëm një rritje të lehtë gjatë viteve të fundit. Hetimet financiare që shënjestrojnë anëtarë të dyshuar në grupe kriminale nuk janë kryer në mënyrë sistematike dhe efektive. Historiku i të dhënave për ngrirjen dhe konfiskimin e pasurisë së paligjshme mbetet i ulët.
Vitin e ardhshëm, Shqipëria, në veçanti, duhet: të dëshmojë progres në krijimin e një historiku të qëndrueshëm të hetimeve proaktive, ndjekjeve dhe dënimeve penale kundër grupeve kriminale, përfshirë konfiskimin e pasurisë së paligjshme dhe shpërbërjen e rrjeteve kriminale; të përshtatë legjislacionin përkatës me standardet evropiane dhe praktikat më të mira, në veçanti, ligjin Antimafia, Kodin e Procedurave Penale dhe legjislacionin në fushën e përgjimeve dhe mbikëqyrjes, afatet kohore për hetimet dhe pranueshmërinë e provave përpara gjykatës; të decentralizojë forcat e specializuara policore, të alokojë burimet njerëzore të mjaftueshme për të luftuar krimin e organizuar dhe të zbatojë një politikë efektive për burimet njerëzore në Policinë e Shtetit, përfshirë rekrutimin sipas meritës, ngritjen në detyrë dhe transferimin brenda zyrave të policisë dhe Prokurorisë.

BBC: Në Shqipëri prodhohet kanabis në vend të domateve

Radio “BBC4” ka transmetuar dje një reportazh për kanabisin në Shqipëri. Gazetarja britanike, Linda Pressly ka udhëtuar drejt jugut të Shqipërisë ku me prezencën e Policisë përcjell për valët e radios një mision antikanabis për të parë e më pas për të shkatërruar 4 tonë lëndë narkotike që po thahej për t’u përgatitur për trafikim.
Gazetarja thekson se fshatarët e këtyre zonave më përpara kultivonin vetëm domate apo prodhime të tjera të fshatit, por me grupet e organizuara që u ofrojnë shumë para, ata kanë rënë pre e këtij kompromisi. Kanabisi shqiptar, thekson gazetarja transportohet nëpërmjet Italisë për të arritur më pas në tregjet e Europës.

Kapet 1 ton kanabis, goditet grupi që blinte drogën në Shqipëri

Policia italiane ka sekuestruar së fundmi një sasi droge të vlerësuar 3 milionë euro dhe ka arrestuar 6 persona të akuzuar për trafik droge në sasi të mëdha, në bashkëpunim me njëri-tjetrin. Dëshmia e Salvatore Cristaudo, i cili ka bashkëpunuar me drejtësinë italiane, ka sjellë dy rezultate: Sekuestrimin e një ton marijuane, gati për t’u shpërndarë në sheshet e Catanias, si dhe identifikimin e një grupi trafikantësh në gjendje për të blerë në Shqipëri sasi të mëdha droge, që ruhej në lagjen “Picanello” të Catania-s.
Hetimet, e koordinuara nga Antimafia e Catanias, kanë zbuluar se në vend do të vinte një sasi e  konsiderueshme droge. Gjatë operacionit të kryer në 25 nëntor, të drejtuar nga Policia e Catanias dhe skuadra Antimafia, janë gjetur dhe sekuestruar në një kamion 1.000 kg marijuanë. Droga ishte e ndarë në 33 paketime.

19 milionë euro drogë nga Shqipëria, goditet banda në Greqi

Policia greke në Athinë ka shkatërruar një grup të madh kriminal, që merrej me trafikimin e lëndëve narkotike. Në një njoftim për shtyp nga policia greke theksohet se, organizata kriminale përbëhej nga 146 anëtarë, 97 prej të cilëve janë arrestuar. Ata trafikonin kanabis, heroinë dhe kokainë nga Shqipëria në qendër të Athinës. Të arrestuarit janë: Afrikanë, grek, shqiptarë, bullgarë dhe rumunë.
Organizata kriminale ishte e ndarë në 7 nëngrupe dhe drejtohej nga një shqiptar, i cili jeton në Shqipëri. Poshtë tij ishin 4 shqiptarë të tjerë që drejtojnë degët e grupit kriminal.
7 të arrestuar të tjerë, nga këta 3 shqiptarë dhe 4 greke merreshin me kultivimin e kanabisit. 3 ishin përgjegjës për trafikimin e kanabisit në kufirin greko-shqiptar. 20 persona nga të cilat 17 shtetas shqiptarë merreshin me magazinimin. Mes të arrestuarve janë dhe 6 shqiptarë korrierë.
Nga kontrolli i 45 banesave, policia ka sekuestruar: 433 kg kanabis, 100 gr heroinë, si dhe shumë rrënjë kanabis në plantacione.
Gjithashtu janë sekuestruar 10 makina, një kamion dhe 2 motoçikleta. Policia greke thotë se, kjo organizatë ka futur në shtetin helen 1 ton e 235 kg kanabis, 1 kg dhe 600 gram kokainë dhe një gjysmë kilogram heroinë.

Familjarët e 17-vjeçarit që humbi jetën në një aksident në Vlorë kthejnë makinën e mortit në vendin ku vdiq djali i tyre. Babai i të ndjerit i ka bërë apel qeverisë dhe Kryeministrit Rama që të verë para drejtësisë autorët, në të kundërt ai deklaroi se do të bëjë vetëgjyqësi. Kristi Panajoti, 17-vjeçari që humbi jetën tragjikisht në një aksident që ndodhi në aksin Vlorë-Uji i Ftohtë është përcjellë të dielën për në banesën e fundit. Rreth orës 13:00 trupi i adoleshentit është nxjerrë nga banesa në drejtim të fshatit Dhërmi ku është dhe origjina e familjes Panajoti.
Gjatë rrugës në Ujë të Ftohtë, kortezhi është ndalur pranë vendit të aksidentit për të hedhur lule, por në një moment prindërit e viktimës për shkak të dhembjes kanë goditur dhe thyer xhamat e një prej mjeteve të firmës. Mes britmave dhe mallkimeve ndaj shtetit dhe Kryeministrit Rama ata kanë hedhur lule në gropën ku ra makina “BMW-X6” që drejtohej nga 21-vjeçari Petraq Beja, i cili mbeti i plagosur.
Në gjendje shoku, të dy prindërit i janë afruar gropës së mbushur me ujë, ndërsa nëna ka tentuar të hyjë brenda. Babai që mbahej nga të tjerë të afërm mes lotësh tha se, “po s’vajtën në burg përgjegjësit, do i varros vetë në atë gropë”.
Biznesmeni Nikollaq Neranxi, i cili është i afërm i viktimës ka apeluar për drejtësi për shkaktarët e kësaj ngjarje të rëndë. Familjarë të viktimës janë shprehur se shkak për aksidentin ka qenë mungesa e sinjalistikës në rrugë, para se të shkohej tek gropa e hapur në kuadër të punimeve për ndërtimin e kanalizimeve pranë Lungomares.
Shoferi i aksidentit: Ishte errësirë, nuk e pashë gropën
Drejtuesi i mjetit të aksidentit në aksin Ujë i ftohtë-Skelë, ku një 17-vjeçar humbi jetën, ka deklaruar se nuk e kishte parë gropën që ishte hapur në mes të rrugës. Petraq Beja, 21 vjeç, ka shpjeguar në spital për Prokurorinë se punimet pa tabela paralajmëruese ishin shkaku i aksidentit vdekjeprurës. “Nuk kishte ndriçim, ishte e vështirë të kuptoje se në mes të rrugës ishte e hapur një gropë e madhe”, ka thënë drejtuesi i automjetit, tashmë nën arrest për shkelje të rregullave të qarkullimit rrugor.
21-vjeçari ka rrëfyer se ka tentuar të devijojë në krahun e djathtë pasi në krahun tjetër ishte një mjet, por ka humbur kontrollin e mjetit duke përfunduar në një kanal. Megjithë dëshminë e shoferit, grupi i hetimit po verifikon nëse firma po i kryen punimet e Lungomares pa siguruar perimetrin me sinjalistikën e duhur.
Në njoftimin zyrtar të Policisë së Vlorës thuhet se nga verifikimet e deritanishme firma fituese e tenderit për rregullimin e rrugës është grekja “Intercak”, ajo që po kryen punimet është firma shqiptare “Xhem”.
Për këtë arsye janë thirrur për t’u marrë në pyetje përfaqësuesit e firmës së nënkontraktuar. Ndërkohë që priten edhe konkluzionet e ekspertëve autoteknikë për shpejtësinë me të cilën po drejtonte mjetin Beja. Kalimtarët shprehen të rezervuar për kushtet e sigurisë në rrugë.
“Kushtet e punës deri diku nuk janë të mira. Ato janë shumë të rëndësishme. Sigurimi teknik duhet. Këto duhet t’i bëjnë ata që janë përgjegjës. Ose t’i bllokojnë ose t’i rregullojnë”, shprehen qytetarët.
Rrugës për në Dhërmi, ku përcollën 17-vjeçarin, të afërm dhe familjarë të të ndjerit Kristo Panajoti ndaluan dhe hodhën lule e më pas edhe gurë ndaj mjeteve të firmës, në vendin e aksidentit.
Ndërkohë, dy punonjës të firmës “Xh & M shpk” janë ndaluar në kuadër të hetimeve që po zhvillohen për aksidentin në Vlorë, ku një makinë “BMW X6” ra në gropën e Lungomares.
Të ndaluarit janë Ilirian Tahmazi, me detyrë përgjegjës i Sigurimit Teknik dhe Tomor Cena, me detyrë inxhinier zbatues i projektit. Nga hetimet e kryera në bashkëpunim me Prokurorinë, policia ka bërë ndalimin e këtyre dy shtetasve, si autorët e dyshuar për kryerjen e veprës penale “Shkelja e rregullave të mbrojtjes në punë”.
Vazhdojnë hetimet për dokumentimin e plotë ligjor të ngjarjes, si dhe për zbulimin e shkaqeve dhe rrethanave të aksidentit. Materialet iu referuan Prokurorisë së Rrethit Gjyqësor Vlorë për veprime të mëtejshme.
Vlonjatët e akuzojnë kryebashkiakun: Nesër do biesh ti te ajo gropë, o plehrë
Qytetarët e Vlorës janë revoltuar me kryebashkiakun Dritan Leli, pas vdekjes së adoleshentit, ngjarje kjo që shkaktoi shumë zemërim. Leli nuk ka bërë asnjë reagim për këtë ngjarje, por ka bërë diçka tjetër akoma më të keqe, ai ka ftuar qytetarët që së bashku me të, të festojnë dje në sheshin e Vlorës ditën e Pavarësisë së Shqipërisë.
Komentet kanë qenë të gjitha negative, qytetarët e revoltuar për këtë ngjarje dhe rrugët e lëna përgjysmë, përmbytjet etj., i kanë kërkuar kryebashkiakut të mbajë përgjegjësi për këtë situatë. Por, ai ka bërë një veprim tjetër të rëndë, u ka fshirë komentet dhe duke e parë “fshesën” që po përdorej, disa prej tyre u bënë edhe “screenshot” komenteve. Nëse shikoni profilin e tij, edhe komentet e ditës së djeshme janë fshirë, një kryetar që nuk dëgjon zërin e atyre që e votuan, por i shkel me këmbë.
Dritan Leli vazhdon të përdorë “fshesën” dhe asnjë reagim deri tani. Nuk dihet nëse do të ketë protestë në Vlorë për këtë ngjarje, apo do mblidhen militantët për t’ju bashkuar festës së Lelit.
U desh të ndodhte një aksident tragjik që kompania, e cila po kryen punimet për ndërtimin e Lungomares në Vlorë të vendosë sinjalistikë orientuese. Në vendin e ngjarjes është vendosur sinjalistika e dallueshme dhe është kryer rrethimi i vendit ku po punohet për shëtitoren bregdetare. Por pavarësisht aksidentit tragjik ku një 17-vjeçar humbi jetën, punimet ende vazhdojnë.
Si shkaktar i aksidentit është konsideruar edhe drejtuesi i mjetit mbi të cilin rëndon akuza e “Shkeljes së rregullave të qarkullimit rrugor”. Petro Beja, drejtuesi 21-vjeçar i automjetit nuk ka dhënë ende versionin e tij mbi ngjarjen, pasi nuk ka qenë në gjendje shëndetësore të përshtatshme për të dëshmuar.
Ai gjendet aktualisht në ambientet e Spitalit Rajonal të Vlorës në mbikëqyrje policore. Nga ana tjetër, burimet nga Drejtoria e Policisë Rrugore sqarojnë se, viktima dhe shoferi kanë qenë duke udhëtuar pa rripin e sigurimit, çka mund t’i kishte shpëtuar jetën Kristi Panajotit. Veprimet e mëtejshme hetimore është duke i ndjekur Prokuroria, e cila do të riinspektojë vendin e ngjarjes për të përcaktuar edhe shpejtësinë e automjetit dhe kushtet teknike të tij.

Këshilltarët e djathtë kanë reaguar dje ndaj kreut të Bashkisë së Tiranës për festimet e 28 Nëntorit. Kreu i këshilltarëve të PD, Leonard Olli, bën të ditur në një reagim për mediat se, Veliaj e ka zhbërë këtë ditë për të festuar netët e “bardha”. “Nuk është e thënë që shqiptarët të përjetojnë një ditë në normalitet e për më tepër ditën e madhe të Pavarësisë dhe Lirisë, 28 Nëntorin. Erion Veliaj jo vetëm që vijon të ngrejë flamurin në Tiranë më 28 Nëntor, ndërkohë që zyrtarisht dhe me protokoll ngrihet më 26 Nëntor, jo vetëm që e ka zhbërë këtë ditë për të festuar netët e “bardha”, që kujtojnë në thelb instalimin e diktaturës komuniste, por edhe sot nuk harron të grabisë pa mëshirë tiranasit dhe çdo shqiptar që vendos të festojë këtë ditë në kryeqytetin e Shqipërisë. Me dhjetëra qytetarë denoncojnë këtë fakt sot, por askush nuk dëgjon… Kërkojnë të drejtën kushtetuese, por më kot…”, thuhet në deklaratën e këshilltarëve të djathtë.
Më tej në deklaratë thuhet se, edhe pse vendimi i Këshillit Bashkiak, përcakton se në ditët e pushimit zyrtar apo ditë festash nuk mund të vilen tarifat e parkimit, Veliaj dëshmon me fakte konkrete se, nuk e njeh si ditë feste dhe zyrtare pushimi 28 Nëntorin. “Gjobëvënësit e tij edhe sot jo vetëm që vjedhin qytetarët me tarifën e parkimit, por vendosin dhe gjoba të majme edhe për gjoja shërbimin e karotresit. Veliaj ka dëshmuar me shumë zell se është nga ata rilindasit që duan karrigen më shumë se Atdheun dhe bashkëkombësit, por nuk besohej se do të arrinte deri në këtë pikë!”, përfundon deklarata.

Dy pika karburanti janë grabitur ditën e djeshme nga persona të armatosur dhe me maska në Durrës dhe Lezhë. Bëhet e ditur se, persona të maskuar dhe të armatosur kanë grabitur xhiron ditore në një pikë karburanti në zonën pranë Urës së Dajlanit. Burime nga Policia e Durrësit deklaruan se, vjedhja e karburantit ka ndodhur rreth orës 02:00 të natës, por 4 punonjësit kanë njoftuar policinë vetëm në orën 06:30 të mëngjesit.
Autorët kanë hyrë nga ana e pasme e godinës dhe kanë thyer xhamat. Më pas, ata kanë arritur të hapin kasafortën e karburantit dhe të marrin aty një shumë parash. Burimet nga grupi hetimor bënë të ditur se maskat kanë arritur të marrin rreth 2 milionë lekë dhe disa tollona nafte.
Punonjësit e karburantit kanë thënë për policinë se nuk i kanë parë grabitësit. Një tjetër detaj i çuditshëm ka të bëjë me faktin se, sipas policisë të gjitha kamerat e sigurisë në momentin e grabitjes ishin të fikura. Ndërkohë që, karburanti ku ka ndodhur grabitja është një nga më të mëdhenjtë në Durrës.
Dyshohet se autorët kanë qenë të mirinformuar se ku ndodheshin paratë. Policia ka kryer të gjitha procedurat hetimore në vendin e ngjarjes dhe ka marrë në pyetje punonjësit e karburantit, për të bërë të mundur identifikimin e autorëve të grabitjes.
Po ashtu, maskat kanë grabitur një pikë karburanti në Lezhë, duke plagosur edhe pronarin e pikës së karburantit. Bëhet e ditur se, dy persona të maskuar dhe të armatosur kanë grabitur një pikë karburanti në Dajç, në aksin Lezhë-Shkodër. Për të çuar deri në fund aktin e tyre, personave ende të paidentifikuar iu është dashur të përleshen me rojen e karburantit, i cili edhe është qëlluar me sende të forta nga ta.
Ngjarja ka ndodhur gjatë natës, ndërsa gjatë përleshjes me hajdutët ka mbetur i plagosur punonjësi i karburantit, Lekë Përkeçi, i cili është dërguar me urgjencë në spital. Dy grabitësit e maskuar mësohet se, pasi plagosën rojën kanë grabitur edhe një sasi parash dhe janë larguar me shpejtësi. Policia po punon për identifikimin dhe kapjen e grabitësve.