Po çfarë roblemi muskulor në kofshë, rendiment i dobët përpara portës – shumë herë më i ulët sesa pritshmëria, apo qoftë edhe momenti i vështirë me kombëtaren që mund të ketë ndikuar psikologjikisht tek ai…! Me sa duket, ato që po e mbajnë në ankth Gonzalo Higuainin, të paktën siç referon revista prestigjioze italiane “Novella 2000”, janë disa kërcënime të rënda dhe të rrezikshme me jetë, anonime, aq sa ato kanë detyruar lojtarin që të mos grumbullohet për Sevijen, nga gjendja e rënduar emocionale.
Të paktën ky është informacioni që ky burim mediatik ka marrë nga disa miq dhe të afërm të futbollistit për të cilin Juventusi i pagoi Napolit 94 milionë euro këtë verë. Bomberit argjentinas, si rrjedhojë e kësaj situate të frikshme, në dy javët e fundit i është dashur që të dalë nga shtëpia i shoqëruar disa herë nga disa truproja, por në shumicën e rasteve nga policia e “Digos”-it (Divizioni Investigativ dhe i Operacioneve Speciale), e cila e mban nën mbikëqyrje 24 orë në 24.
Pas transferimit të tij nga Napoli këtë verë, protestat e tifozëve të kaltër kanë qenë të panumërta, por edhe shumë të ashpra. Mes ironisë dhe keqdashjes, ata e detyruan Higuainin që të mbyllte adresat e tij në rrjetet sociale për disa orë dhe madje mesazhet që erdhën në drejtim të tij, mes të cilave edhe kërcënime me vdekje, u morën për t’u analizuar edhe nga forcat policore, por me sa duket, këtë herë situata ka degraduar edhe më shumë.
Sipas informacioneve të zbuluara së fundmi, “Pipita” ka marrë kërcënime deri në banesën e tij dhe, për këtë arsye, është kërkuar ndërhyrja e “Digos”-it. Gjithsesi, i kontaktuar nga “Gazzetta dello Sport”, klubi i Juventusit e ka përgënjeshtruar këtë lajm: “Nuk na rezulton që ky lajm të jetë i vërtetë, aq më tepër marrja në mbrojtje e lojtarit tonë nga një eskortë apo truproja”.
Ndërkohë më në fund duket se ka ardhur radha e Arlind Ajetit. Mbrojtësi shqiptar që luan tek torinezët do të ketë mundësinë e tij për të zbritur në fushë qysh nga minuta e parë në ndeshjen që Torino do të luajë në fundjavë ndaj Kievos.
Sipas mediave pranë klubit “granata”, Sinisha Mihajloviç po mendon që të bëjë një rotacion në ekip, duke parë faktin se në javët në vijim do të ketë një kalendar të ngjeshur. Torino do të luajë në transfertë me Sampdorian në “Marassi”, në shtëpi me Juventusin në derbi, në “San Paolo” me Napolin, për ta mbyllur më 22 dhjetor me Xhenoan.

Rrjeti i njohur sportiv ESPN i ka bërë një analizë në faqen e vet të internetit zërave të fundit të merkatos së futbollistëve të ndryshëm në klubet kryesore europiane. Mes tyre spikat padyshim emri i Elseid Hysajt, i cili prej disa javësh qarkullon si një përforcim i mundshëm që në muajin janar për Mançester Junajtid.
Eksperti i ESPN, David Amojal, parashikon se ky transferim ka 30% mundësi që të realizohet, jo që në dritaren e parë të merkatos, por në verë. “Ka një nevojë të dukshme për mbrojtës krahu cilësorë në ‘Old Traford’ dhe 22-vjeçari shqiptar do të ishte lojtari i duhur”, shpjegoi ai. “Pasi është renditur mes mbrojtësve të krahut më të mirë në Serinë A me Napolin në sezonin e kaluar, Hysaj vazhdoi të shkëlqente me Shqipërinë në Europian.
Paraqitjet e tij i siguruan një kontratë të re me klubin me një klauzolë largimi prej 50 milionë eurosh, e vlefshme vetëm për klubet jashtë Italisë. Një lëvizje në janar do të ishte e parakohshme, por në verën e ardhshme të dy klubet mund të gjejnë një akord, ndërsa transferimi në krahun e kundërt i Mateo Darmian të Mançester Junajtid mund të shërbejë për të ulur vlerën e klauzolës”, shpjegoi eksperti i ESPN për merkaton.
Ndërkohë, Hysaj nuk duket i shqetësuar nga këto zëra, por mendon vetëm për Napolin, i cili barazoi pa gola ndaj Dinamos së Kievit dhe komplikoi kalimin në fazën tjetër të Ligës së Kampioneve. Edhe pse shumëkush e interpretoi si zhgënjyes këtë rezultat, Hysaj mendon se skuadra mund të arrijë të kualifikohet në ndeshjen direkte, që ka pas dy javësh me Benfikën.
“Kemi zhvilluar një ndeshje të mirë, ishte e rëndësishme të mos pësonim gol. Ky barazim na vendos në kushte të mira për të luajtur kualifikimin me Benfikën dhe shkojmë në Lisbonë me forcë dhe besim. Sot, kemi krijuar shumë dhe është edhe pozitive që kemi vuajtur shumë pak në fazën mbrojtëse. Barazimi mund të vlejë shumë në perspektivën e të ardhmes. Personalisht nuk më ka kushtëzuar rezultati në Stamboll. Isha vetëm i përqendruar te ndeshja dhe vetëm në fund pashë klasifikimin e grupit”, deklaroi ai pas sfidës.
Ndërkohë, kolonisë së shqiptarëve në Serinë A së shpejti mund t’i shtohet edhe Emanuele Ndoj. Sipas mediave italiane, për mesfushorin e Breshias ka shfaqur interesim Sasuolo. Klubi i elitës së futbollit në Itali e cilëson 20-vjeçarin si një alternativë për të përforcuar mesfushën në afatin kalimtar të janarit. Shqiptari i lindur në Katania është një produkt i akademisë së Romës, ku u shpall kampion i Italisë me ekipin e të rinjve (Primavera) sezonin e shkuar.
Në merkaton e kësaj vere iu bashkua Breshias në Serinë B, ku ka luajtur shtatë ndeshje këtë sezon, pesë prej të cilave si titullar. Emanuele Ndoj është pjesë e Kombëtares shqiptare U-19, pasi më herët ka veshur fanellën e U-17 kuqezi.

E pritshme, Shqipëria humbet dy vende në klasifikimin botëror të FIFA-s për muajin e fundit, gjatë të cilit u mund 3-0 nga Izraeli në “Elbasan Arena” në sfidën që gjeneroi një lumë polemikash. Organizimi botëror i futbollit ka publikuar së fundmi klasifikimin e përditësuar ku kuqezinjtë renditen në vendin e 49, dy pozicionë më poshtë se një muaj më parë. Ndërkohë e njëjta ndeshje i ka shërbyer për një katapultim fantastik në këtë renditje Izraelit që ka ngjitur plot 25 vende në klasifikimin e FIFA-s, duke rezultuar kështu një ndër skuadrat me rritjen më të madhe për këtë muaj, pasi ka fituar falë fitores ndaj Shqipërisë plot 1163.03 pikë. Për t’u rikthyer te kuqezinjtë, renditja në vendin e 49 shënon edhe pozicionimin më të keq në vitin 2016 që skuadra e De Biasit e nisi në vendin e 38 në renditjen globale.
Për sa i përket kundërshtarëve të tjerë në grup, qëndron në status-quo Spanja që pavarësisht fitores 4-0 në nëntor ndaj Maqedonisë mbyll dhjetëshen e parë të skuadrave më të mira në botë, ndërsa kundërshtari ynë i radhës Italia, edhe pse mposhti me të njëjtin rezultat 4-0, skuadrën e fundit të grupit Lihtenshtejnin ka zbritur 3 pozicione, duke u renditur në vendin e 16. Maqedonia ka zbritur 7 shkallë, duke u pozicionuar e 162 në botë, ndërsa Lihtenshtejni gjendet në vendin e 189-të. Për sa i përket Kosovës, përfaqësuesja më e re e kontinentit ka humbur një vend në renditje pas humbjes që pësoi në “Antalya Arena” të Turqisë, duke u klasifikuar e 165 në botë në klasifikimin e FIFA-s.

Të gjithë në radhë për të bërë një foto me Etrit Berishën. Portieri i ka mahnitur të gjithë me paraqitjet që ka bërë gjatë kësaj periudhe teksa falë edhe pritjeve të tij, Atalanta po fluturon në Serinë A, duke regjistruar 7 fitore dhe 1 barazim në 8 ndeshjet e fundit. Është një ecuri më e mirë edhe se e Juventusit ajo e skuadrës bergamaske në këto 8 javë, me Atalantën që ka gjetur te Berisha njeriun e duhur për t’i vënë kyçin portës. Vetëm 3 gola ka pësuar 27-vjeçari nga Prishtina në 8 ndeshjet e fundit. Ai është padiskutim njeriu i momentit te Atalanta dhe një nga futbollistët më të pëlqyer nga tifozët e skuadrës zikaltër. I ftuar në dyqanin zyrtar të Atalantës, Berisha kaloi 1 orë kohë në praninë e fansave bergamaskë, me këta të fundit që kishin mundësinë të takoheshin nga afër me portierin kuqezi, duke shkrepur foto të shumta dhe duke marrë autografe nga 27-vjeçari. Menjëherë më pas Berisha u intervistua nga kanali zyrtar i klubit bergamask. 8 pikë më pak se Juventusi që kryeson ka aktualisht Atalanta, por kuqeziu mendon vetëm për dy sfidat e ardhshme, duke mos preferuar të bëjë krahasime.
“Ne Leicester i Serisë A? Është një krahasim normal, duke parë ecurinë e shkëlqyer që kemi patur gjatë kësaj periudhe, por është shumë shpejt. Nuk i vendosim vetes limite, por dy sfidat e radhës ndaj Bolognas dhe Juventusit janë dy teste shumë decizive”.
Nga objektivat e Atalantës në këtë sezon te entuziazmi i tifozëve, në intervistën e tij Berisha u ndal edhe te këto dy tema:
“Eshtë herët për të thënë se cili do të jetë objektivi ynë në këtë sezon. Personalisht prisja të zhvilloja një kampionat të mirë. Megjithatë mendoj se, kemi nevojë për të tjera teste për të treguar se jemi ajo skuadër e fortë që u pa në fushë ndaj Romës. Bergamo është një qytet i bukur dhe entuziazmi i tifozëve në këto momente është i ligjshëm. Por në harkun e një apo 2 javëve gjithçka mund të ndryshojë”.

Pakkush e kishte imagjinuar që pas 13 javësh kampionat, Atalanta do të ishte në vendin e 5 në renditjen e Serisë A dhe vetëm 15 pikë larg asaj që për një ekip të tillë cilësohet si kuota e mbijetesës, 40 pikë. Në këtë ecuri mbresëlënëse ka lënë gjurmë edhe portieri i përfaqësueses shqiptare, Etrit Berisha, i cili me pritjet e tij shpeshherë ka ndihmuar Atalantën të arrijë rezultate të rëndësishme.
Tifozët kanë filluar të bëjnë që tani krahasim me ecurinë e Leisterit të një viti më parë, por gardiani shqiptar mendon se ka ende kohë para se të flitet për objektiva të tillë.
“Leister? Mund të cilësohet një krahasim normal, duke parë edhe periudhën që po kalojmë, por është ende herët. Nuk i vendosim vetes limite, por Bolonja dhe Juventus janë dy teste vendimtare për ne”, tha Berisha, i pranishëm sot në dyqanin zyrtar të klubit ky firmosi me dhjetëra autografe për tifozët e shumtë që kishin ardhur ta takonin.
“Është shumë shpejt të thuash, se cili mund të jetë objektivi ynë. Personalisht prisja të bëja një kampionat të mirë. Por kemi nevojë për teste të tjera që të tregojmë se jemi ekipi i fortë që u pa kundër Romës”, theksoi ai.
Berisha është kthyer menjëherë në një idhull për tifozët e Atalantës, por gardiani është i ndërgjegjshëm se situata mund të ndryshojë shumë shpejt nëse ekipi nuk vazhdon të shfaqet në të njëjtin nivel.
“Bergamo është një qytet i bukur dhe tifozët po na kalojnë një entuziazëm të pabesueshëm. Por brenda një apo dy javësh mund të ndryshojë gjithçka. Sportielo? Zgjedhjet i bën trajneri dhe ne duhet t’i respektojmë”, ishin fjalët e portierit të përfaqësueses shqiptare rreth rivalit të tij.

Barcelona, Bayern Munchen, Atletico Madrid, PSG dhe Arsenal sigurojnë biletën për në fazën tjetër të Champions League. Katalanasit siguruan një sukses të lehtë 2-0 në transfertën skoceze të Celtic me gola të Lionel Messit. Argjentinasi realizoi nga një gol në çdo pjesë për të siguruar suksesin katalanas në transfertën e Glasgow. Pas këtij suksesi, skuadra e Luis Enriques zyrtarizoi edhe vendin e parë në Grupin C, ku Borussia Mounchengladbach e Manchester City u ndalën në barazim 1-1 dhe e lënë të hapur çështjen e kualifikimit për në ndeshjen e fundit.
Në Grupin D, Bayern Munchen mori një goditje të papritur në Rostov ku u mund 3-2 dhe humbi përfundimisht shpresat për vendin e parë. Skuadra e Ançelotit e mbylli pjesën e parë në barazim 1-1, por gjatë fraksionit të dytë u thye në stadiumin e Rostovit duke ia dorëzua kreun e grupit Atleticos së Madridit që kaloi 2-0 PSV Eindhoven. Spanjollët kryesojnë me pikë të plota pas 5 ndeshjeve dhe do ta luajnë transfertën gjermane në ndeshjen e fundit thjesht sa për statistikë. Ndërkohë, në Grupin A, Arsenal dhe Paris Saint Germain u mjaftuan me një barazim 2-2 për të hipotekuar kualifikimin në fazën tjetër. Parisienët mbajnë momentalisht vendin e parë të ndjekur nga londinezët, ndërsa sfida Ludogorets-Basel u mbyll me rrjeta të paprekura. Të dyja skuadrat mbyllin klasifikimin me nga dy pikë dhe biletën për në Europa League do ta kërkojnë në sfidat e fundit. Francezët kaluan të parët në avantazh me anë të Kavanit në minutën e 19, por Zhirud barazoi në të 45-tën falë një penalltie, e cila njëkohësisht ishte gjuajtja e parë e Arsenalit në këtë ndeshje. Në pjesën e dytë Verrati në të 60-n dhe Ajuobi në të 77-n realizuan nga një autogol, duke vulosur rezultatin përfundimtar në barazim 2-2. Një statistikë e çuditshme nga ky takim është se u regjistruan më shumë gola sesa gjuajtje në portë.
Situata mbetet delikate në Grupin B ku Besiktas-Benfica e Napoli-Dynamo Kiev ndanë nga një pikë. Në Stamboll, turqit kthyen një ndeshje të çmendur pas tri golave të pësuar, ndërsa Napoli nuk arriti të kalonte në “San Paolo” ukrainasit duke u ndalur në barazim pa gola. Pas këtij raundi, të kaltërit kryesojnë me 8 pikë, po aq sa Benfica, ndërsa Besiktas mbetet në vendin e tretë me një pikë më pak.

Tashmë mund të thuhet me plot gojën se Bayerni i Mynihut është në krizë. Humbja ndaj Rostovit në Champions League që erdhi menjëherë pas disfatës ndaj Dortmundit në Bundesligë, i kushtoi vendin e parë në Grupin D skuadrës bavareze me të besuarit e Ançelotit që nuk kanë më asnjë shans për të parakaluar Atleticon e Madridit në renditje. Në këtë kontekst, shorti parashikohet shumë i vështirë për Bayernin që në fazën e 1/8-ave të Champions-it.
Barazimi ndaj Hoffenheimit në shtëpi ishte një sinjal ose më saktë një tregues se Bayerni i këtij sezoni ka probleme. Ky është një nga momentet më delikatë për kampionët e Gjermanisë në këto vitet e fundit dhe pesha më e madhe e përgjegjësisë i takon trajnerit Karlo Ançeloti. Italiani nuk ka arritur t’i përcjellë ende filozofinë e tij fituese skuadrës dhe fjala krizë tashmë mund të përmendet pa frikë.
Rotacioni në transfertën ruse ndaj Rostovit nuk funksionoi dhe fajtori më i madh për atë disfatë është padiskutim trajneri Ançeloti. Për herë të parë nën drejtimin e italianit, Bayerni pësoi 3 gola në një ndeshje, një tregues ky se diçka nuk shkon. Problemet për bavarezët në këto momente janë të shumta, sepse ka edhe pakënaqësi mes futbollistëve. Gazeta prestigjioze gjermane “Bild” ka zbuluar se Jerome Boateng, ka shfryrë ndaj shokëve të skuadrës në përfundim të ndeshjes ndaj Rostovit, duke i kritikuar për paraqitjen, por menjëherë në drejtim të mbrojtësit të kombëtares gjermane ka ardhur kundërpërgjigjja e shefit ekzekutiv, Karl Heinz Rummenigge. Ky i fundit i ka kërkuar Boateng-ut të kthehet me këmbë në tokë dhe të ulë tonet. Bayerni në krizë, kjo mbetet për t’u parë, por për Karlo Ançelotin po vijnë kohë të vështira sepse gishti i akuzës është ngritur tashmë mbi trajnerin italian.
Mbrojtësi Jerome Boateng deklaroi se ekipi ishte i shkatërruar, kurse në krahun tjetër, Filip Lahm i tërhoqi veshin skuadrës. “Jemi Bayerni dhe duhet të fitojmë, pavarësisht temperaturave apo terrenit. Problemi është që jemi tepër të shkujdesur. Nuk mund të them nëse besojmë se s’ka kundërshtar që na del para, por me gabime të tilla të gjen belaja me çdo skuadër. Rostovin e ftuam te porta pasi bëmë shumë gabime. Diçka duhet të ndryshojë sa më shpejt”, deklaroi kapiteni.
Ndërkaq, vetë trajneri italian nuk kërkoi justifikime dhe mori përsipër përgjegjësitë për humbjen. “Si trajner, më duhet të marr përgjegjësi dhe ta rikthej skuadrën në rrugën e duhur sa më shpejt të jetë e mundur”, u shpreh 57-vjeçari. Mirëpo nuk kanë qenë fort dashamirës as tifozët e as mediat. Në rrjetet sociale, mbështetësit bavarezë nuk i kanë kursyer komentet negative ndaj trajnerit. Kurse tabloidi i njohur “Bild” dje ka dalë me titullin “Dimri i ftohtë i Ançelotit” dhe thekson se me vendin e dytë në grup, Bayerni rrezikon të përballet me Barcelonën në fazën tjetër të Ligës së Kampioneve.
Në fundjavë, skuadra nga Mynihu do të presë Leverkusenin në kampionat me misionin jo vetëm për t’u rikthyer te fitorja, por edhe për ta mbajtur portën të paprekur. Këtë gjë Bayerni ka mundur ta bëjë vetëm në një nga shtatë ndeshjet e fundit.

Mançester Junajtid ka vendosur që të konfirmojë Zlatan Ibrahimoviç dhe do të mbajë sulmuesin suedez edhe në sezonin e ardhshëm. Konfirmimi ka ardhur nga Zhoze Murinjo, i cili në konferencë për shtyp u dha fund të gjitha zërave për një lamtumirë të tij në fund të sezonit, pasi suedezi ishte shprehur i gatshëm të “pushtonte Amerikën”.
“Situata e Zlatan është  thjeshtë. Ai ka një kontratë 1+1 me klubin. Ne jemi të lumtur me të. Ne do të ekzekutojmë të drejtën e nënshkrimit për sezonin e dytë”, tha Murinjo dje para gazetarëve.
“Pas dy vitesh ai mund të bëjë çfarë të dojë pasi do të jetë i lirë. Në 18 muajt e ardhshëm ai është i lumtur, i përkushtuar dhe duke iu gëzuar jetës së tij si futbollist i Junajtid, sfida e fundit e madhe e karrierës së tij. Është perfekte që ai të qëndrojë këtu edhe 18 muaj pastaj të marrë një vendim”, deklaroi trajneri portugez.
Ndërkohë, Stivën Xherrard do të tërhiqet nga futbolli i luajtur. 36-vjeçari ka bërë të ditur dje vendimin e tij për të varur këpucët në gozhdë duke i dhënë fund një karriere të ndritur që zgjati 19 vjet. “Pas spekulimeve të fundit në media rreth të ardhmes sime, konfirmoj tërheqjen nga futbolli i luajtur”, thuhet në një komunikatë të lëshuar dje nga mesfushori. “Pata një karrierë të pabesueshme dhe i jam mirënjohës për çdo moment Liverpulit, kombëtares dhe Los Anxheles Galaksi”, tha ai.

Tjetër episod i telenovelës së futbollistëve që rrezikojnë shumë pasi akuzohen për evazion fiskal. 10 vjet e gjysmë burg dhe 14 milionë euro gjobë. Është kjo kërkesa e akuzës për Samuel Eto’o dhe për ish-menaxherin e tij Josip Maria Mesalles. Lajmi bëhet i ditur nga e përditshmja spanjolle “El Pais”. Ish-ylli i Barcelonës sipas akuzës ka evituar pagimin e taksave për një shumë prej 3.5 milionë eurosh nga viti 2006 deri më 2009, kur luante për klubin blaugrana.
Sipas burimeve që citon e përditshmja iberike, sulmuesi që ishte një ndër protagonistët e triumfit të trefishtë me Interin më 2010, akuzohet për katër vepra penale, mes të cilave menaxhimi gjatë periudhës 2006-2009 i të drejtave të imazhit duke mos derdhur detyrimet në organet tatimore. Sulmuesi merrte nga Puma 1.5 deri në 3 milionë euro në sezon, por evitonte detyrimet ndaj organeve fiskale spanjolle, duke simuluar shitjen e të drejtave për dy shoqëri fiktive të krijuara enkas për këtë rast, spanjolles Bulte 2002 dhe asaj me seli në Hungari Tradesport. Në bazë të ligjeve spanjolle kuota e taksimit që duhet të paguajë një shoqëri është më e vogël se ajo për një individ dhe gjykatësit këmbëngulin se të drejtat e imazhit ishin në pronësi të Eto’o. Vetë futbollisti fajëson menaxherin e tij deri më 2011, Mesalles, të cilin e ka denoncuar prej kohësh.
Kjo është e disata herë që kamerunasi akuzohet për mashtrim fiskal dhe kërkesa e Prokurorisë është shumë më e lartë se në rastet e ngjashme për futbollistë të tjerë, pasi Eto’o nuk ka kthyer asnjë shumë deri më tani, që pas akuzave të para që ju bënë më 2012. Mes lojtarëve të tjerë që kanë luajtur apo luajnë për Barcelonën akuza të tilla janë bërë edhe në ngarkim të Mascheranos, Messit dhe së fundmi Neymar për të cilin u kërkuan dy vjet burgim në lidhje me çështjen e transferimit nga Santos te blaugranat.