Ish-kryetari i Bashkisë së Leskovikut, Fatmir Guda, ka reaguar menjëherë pas lajmit se është proceduar penalisht nga Policia e Korçës për shitje tokash, duke e cilësuar këtë padi si hakmarrje të pastër politike. Në një prononcim për “News24”, Guda deklaroi se gjithçka vjen pas presionit të bërë gjatë kësaj fushate nga strukturat e Policisë Kriminale të Drejtorisë së Policisë Korçë.
“Njoftimi mediatik për proçedim penal ndaj meje erdhi menjëhere pas fushatës së ashpër elektorale për zgjedhjet e parakohshme vendore të Bashkisë Kolonjë. E gjitha është një hakmarrje e pastër politike, e cila vjen pas presionit të bërë gjatë kësaj fushate nga strukturat e Policisë Kriminale të Drejtorisë së Policisë Korçë, elementë të së cilës duke më kërkuar të rrija rrehat më kanë komunikuar se në lidhje me personin tim ka disa çështje për t’u sqaruar. Gjithashtu, pjesë e këtij presioni ka qenë edhe konfrontimi fizik ndaj meje mesnatën para datës së zgjedhjeve, ku jam kërcënuar me jetë nga persona të paidentifikuar me fytyrë të mbuluar dhe me pistoletë, ngjarje për të cilën kam bërë dhe denoncimin përkatës”, u shpreh Guda.
Guda gjithashtu në reagimin e tij tha se, pret nga drejtësia që të zbardhë çështjen, që është një proces i montuar politikisht. Momenti pas një viti nga lënia e detyrës dhe menjëherë pas zgjedhjeve të parakohshme vendore për Bashkinë Kolonjë, që është bërë ky proçedim penal më japin gjithë arsyet se kjo është një hakmarrje dhe shantazh politik. Duke lënë veten time në dispozicion të drejtësisë për zbardhjen e këtij proçesi të montuar politikisht, garantoj gjithë qytetarët e Leskovikut se asnjë rast nuk i kam tradhtuar, por më i vendosur se kurrë do jem me ta kundër kësaj qeverie armike për vdekje të votës së lirë dhe kundërshtarëve të saj politikë”, deklaroi Guda.
Policia e Korçës bëri të ditur dje nëpërmjet një njoftimi për shtyp se, nisi procedimin penal për ish-kryetarin e Bashkisë së Leskovikut Fatmir Guda, pasi akuzohet për shitjen e tokave të Bashkisë në kohën kur mbante postin e kryetarit. “Specialistët e Seksionit për Krimin Ekonomik-Financiar, në Drejtorinë Vendore të Policisë Korçë, filluan procedimin penal në gjendje të lirë ndaj Gudajt “Procedimi ndaj tij filloi pasi, ky person kur ka qenë me detyrë Kryetar i Bashkisë Leskovik, dyshohet të ketë shitur toka (truall) në pronësi të Bashkisë Leskovik, duke vepruar në kundërshtim me ligjin. Materialet i kaluan Prokurorisë të Rrethit Gjyqësor Korçë, për veprën penale: “Shpërdorim detyre”, thuhet në deklaratën e Policisë së Korçës.
Është për t’u çuditur fakti se Policia e Korçës ka proceduar ish-kryebashkiakun vetëm dy ditë, pasi përfunduan zgjedhjet në Kolonjë, ku Guda ishte për fushatë në Leskovik, ku ka bërë fushatë për kandidatin e opozitës.

Banorët e Mbrostarit protestuan dje para Gjykatës së Fierit në mbështetje të protestuesit të arrestuar Zylyftar Delibashi, i cili doli para togave të zeza për masën e sigurisë. Banorët thanë se po protestojnë për lirimin e të moshuarit, ndërsa të enjten do kërkojnë takim me prefektin për të konfirmuar nëse është firmosur apo jo, vendimi për projektin e impiantit të përpunimit të plehrave. Pas vlerësimit të masës së sigurisë nga Gjykata e Fierit, 65-vjeçari Zylyftar Delibashi është lënë i lirë nga Gjykata e Fierit.
“Të lirohet ta marrim me vete. Ndërsa nesër kemi muhabet vetëm për prefektin. Na ka dhënë një fjalë, do me thënë për tre ditë do t’u vijë një përgjigje pozitive”, u shpreh një banore. Banorët thanë se do të vijojnë protestën kundër ndërtimit të fabrikës së përpunimit të plehrave. “Plehrat në Mbrostar, Jo! Këtë parullë kemi. Nuk është çështje politike, por është jetike”, u shpreh një banore.
Banorët u shprehën se presin një përgjigje nga prefekti për anulimin e vendimit të Bashkisë Fier për ndërtimin e impiantit të plehrave. “Të tepërt nuk jemi, edhe ne njerëz jemi. Kalamajtë tanë na dhimbsen ne, nëse nuk i dhimbsen atij. Nesër ne do shkojmë atje të na kthejë përgjigje”, u shpreh një banore.
Një ditë më parë banorët e Mbrostarit kanë protestuar, duke bllokuar rrugën nacionale. Me parulla në duar “Ndal plehrave”, “Duam jetën”, “Lironi protestuesit”, etj., banorët bllokuan sërish rrugën nacionale, ku si pasojë u krijuan radhë të gjata makinash. Forcat e policisë mbanin të rrethuar protestuesit, por nuk kanë ndërhyrë ndaj tyre.
Edhe pse qeveria me gojën e Prefektit deklaroi zyrtarisht për kthimin e vendimit të ndërtimit të impiantit të plehrave, banorët e Mbrostarit po e vazhdojnë betejën deri sa ta shohin të shkruar dhe të vulosur. Gjatë protestës së djeshme, banorët i kërkuan Prefektit të Fierit të mbajë fjalën e dhënë për anulimin e vendimit të ndërtimit të impiantit në fshatin e tyre.

Kreu i Departamentit te Mjedisit në PD, Jamarbër Malltezi, denoncoi nga Korça një projekt të qeverisë për ndërtimin e një TEC-i në fushën e Maliqit, për të cilin tha se nuk janë pyetur qytetarët. Malltezi tha se, qeveria e ka çuar projektligjin në Kuvend për shqyrtim, ndërkohë që nuk ka një impiant të përpunimit të mbetjeve të rrezikshme që do çlirohen nga TEC-it. Ai renditi disa pika që sipas tij do të shkatërronin të mbjellat bujqësore.
“Së pari, humbja e tokës së bukës, së dyti, emetimi i gazrave të rrezikshëm ndotës, së treti, rreziku i produkteve bujqësore të të gjithë zonës së fushës së Korçës, që është fusha më e begatë. Janë të paktën 50 mln tonë hi që është gjithashtu mbetje e rrezikshme, që duhet trajtuar, ndërkohë Shqipëria nuk ka impiant për përpunimin e mbetjeve të rrezikshme”, u shpreh Malltezi.
Jamarbër Malltezi ishte në Korçë në një takim me intelektualë të Shoqërisë Civile për çështjen e TEC-it të Maliqit që sipas drejtuesit të departamentit për çështje të mjedisit në PD, do të ndërtohet në një sipërfaqe prej 288 hektarësh. Malltezi tha se projekti nuk është konsultuar me qytetarët. Sipas tij, ndërtimi i TEC-it në fushën e Maliqit përkthehet në shkatërrim mjedisor për zonën, humbjen e dhjetëra ha tokë bujqësore, dhe emetim të tonelatave mbetje të rrezikshme.

Makina në të cilën u qëllua Nelgert Pata ka nxjerrë zbuluar dëshminë e Ari Alinanit, që ditën e atentatit gjendej në drejtimin e saj. 38-vjeçari nga Delvina ka deklaruar para hetuesve se Patën e njihte vetëm prej 3 ditësh, në kohën kur ai ishte zhvendosur nga Tirana në Fier. Por hetimet zbuluan se makinën tip “Volkswagen”, Alinanit ia kishte dhuruar 34-vjeçari nga Memaliaj. Ai e kishte blerë atë disa kohë më parë dhe ia kishte dhënë mikut të tij. Kjo nuk është prova e vetme e njohjes mes tyre. Edhe tabulatet telefonike kanë vërtetuar komunikimin e vazhdueshëm mes tyre.
Hetuesit dyshojnë se Ari Alinani ka informacione mbi konfliktet e Patës dhe se mund të ketë të dhëna të vlefshme edhe për autorët e atenatit, apo porositësit e tij.
Prokurorët duken të bindur se ai ka dijeni edhe për arsyet pse viktima po qëndronte në Fier ditët e fundit të jetës së tij. Megjithatë, Alinani nuk ka pranuar të flasë. Por nisur nga këto prova, ai është arrestuar për kryerjen e veprimeve që pengojnë zbardhjen e të vërtetës.
Nelgert Pata, ishte zhvendosur prej mbrëmjes së të enjtes në Fier. Në Tiranë, të enjten ai kishte parë disa njerëz të dyshimtë pranë lokalit ku po qëndronte, në zonën e ish-Parkut të Autobusëve. Ky fakt e ka bërë atë që të largohet për t’u strehuar në Fier. Por sipas Prokurorise, personat që e eliminuan, e kanë ndjekur atë edhe gjatë spostimit për në Fier, ku kanë organizuar edhe atentatin.
Policia ka marrë në pyetje disa persona. Pista kryesore e hetimeve është ajo e konflikteve me grupin e Elton Çiçës, të vrarë më 1 maj të këtij viti në një lokal në zonën e ish-Bllokut. Disa të afërm të tij mësohet se janë pyetur gjithashtu.
Nelgert Pata dyshohet se kishte marrë pjesë në organizimin e vrasjes së Çiçës. Në makinën e tij të parkuar në hotelin ku qëndroi ditët e fundit të jetës në Fier, u gjetën dy kallashnikovë dhe një bidon me benzinë, çka i ka bërë hetuesit të dyshojnë se ai po përgatiste një tjetër atentat.

Policia greke ka sekuestruar dje 2 kg 52 gram kokainë në doganën e Kapshticës, ndërsa në pranga ranë 2 shqiptarë. Burime zyrtare pohuan se shqiptarët, 32 dhe 33 vjeç u kapën në pjesën greke të pikës kufitare, pasi kishin kaluar me këmbë. Mësohet se ata kishin përshtatur një mbajtëse në formë rripi në trup, ndërsa secili mbante nga 1 kg 26 gram. Po ashtu atyre iu sekuestruan 1030 euro dhe 5700 lekë të reja. Ndërkohë, nuk dihet ende identiteti i tyre.
Ndërkohë, në Milano është shkatërruar një grup që transportonte marijuanë nga Shqipëria në Holandë, e cila konvertohej në heroinë dhe trafikohej në Itali. Droga transportohej nga Peruja në Holandë dhe nga Shqipëria për t’u depozituar më pas në një bazë në rrugën “Via Padova” të Milanos. Agjentët e policisë së Milanos kanë lëshuar 45 urdhërarreste në përfundim të hetimeve të nisura 3 vite më parë, në nëntor të 2013-ës, në bazë të së cilit policia italiane ra në gjurmët e një grupi të mirëorganizuar kriminal i përbërë kryesisht nga italianë dhe amerikano-jugorë.
Në bazë të hetimeve rezulton se, ky grup trafikonte kokainë dhe marijuanë. Ndërsa kokaina sigurohej në Peru, marijuana ishte ekskluzivitet i Shqipërisë. Në kuadër të operacionit “Rubens”, policia arrestoi edhe disa shpërndarës të këtij grupi, në disa zona të Milanos, por ende nuk janë publikuar identitetet e tyre. Nuk dihet nëse mes të arrestuarve ka edhe shqiptarë.

Një shqiptar i identifikuar nga policia italiane me emrin Feim Nure, u arrestua në Padova, pasi u zbulua se kishte fshehur nën tokë anës një lumi 20 kilogramë heroinë me vlerë 600 mijë euro. Në banesën e Nures, gjatë kontrollit u gjetën edhe 9500 euro. Hetimet zgjatën disa javë, pas dyshimeve të policisë se 30-vjeçari Nure ishte bërë pikë referimi e shpërndarjes së heroinës në zonë. Droga u gjet me anë të qenit. Nure ishte arrestuar edhe në vitin 2010, në zonën e Udines me 1.5 kg heroinë.
Në një tjetër operacion të antidrogës së Milanos, disa shqiptarë janë vënë në pranga pjesë e një rrjeti që trafikonte drogë nga Peruja në Holandë, Shqipëri e Itali. 45 urdhër arreste me burg u ekzekutuan në përfundim të një hetimi të nisur nga nëntori 2013. U sekuestrua 33 kilogramë kokainë, 580 kilogramë marijuanë, 6 kilogramë hashash dhe 18 mijë euro cash.
Sipas hetuesve italianë, nga Shqipëria importohej marijuanë, një pjesë e së cilës dërgohej në Holandë në këmbim të kokainës. Droga trafikohej kryesisht në rrugë ajrore e fshehur në çanta të ndryshme udhëtimesh.
Siç shkruan ANSA, shqiptari i identifikuar si Feim Nure, 30 vjeç është kapur pas një hetimi të nisur disa javë më parë në lidhje me rrjetin e drogës që vinte në Padova. Ai është kapur pak kilometra larg banesës së tij, ku kishte fshehur heroinën.

Dy aksidente me pasojë vdekje janë shënuar në orët e para të ditës së sotme në Tiranë dhe Kavajë. Rreth orës 10:00, në afërsi të ish-repartit Ushtarak në qytetin e Kavajës, një 5-vjeçar u përplas për vdekje nga një “Mercedes Benz”, që drejtohej nga A. L. Fëmija mësohet se ka gjetur vdekjen e menjëhershme.
Aktualisht, grupi hetimor po punon për identifikimin e viktimës dhe sqarimin e plotë të rrethanave të këtij aksidenti, ndërsa drejtuesi i automjetit është shoqëruar në polici për veprime të mëtejshme.
Në Tiranë, rreth orës 7:30 të mëngjesit një person ka gjetur vdekjen në rrugën e Rinasit. Sipas policisë drejtuesja e një automjeti “Mercedez Benz”, me inicialet E.D, ka aksidentuar për vdekje një person që lëvizte me biçikletë. Viktima është 79-vjeçari Ramiz Balliu. Drejtuesja e automjetit është shoqëruar për në polici.