Vicenzo Montella ka bërë për vete Milanin dhe tifozët e tij, ka risjellë fitoret në fushë dhe buzëqeshjen në stadium, padyshim që takimi i radhës në derbin e tij të parë si trajner i Milanit do t’i shtonte diçka më tepër. “Aspekti tekniko-taktik nuk është gjithçka. Kjo ndeshje për ne nuk është decizive, por thelbësore po. Duam t’i japim vazhdimësi momentit dhe të shijojmë të tjera kënaqësi falë edhe mbështetjes së tifozëve tanë të jashtëzakonshëm”, u shpreh Montella.
Derbi është mbi të gjitha edhe pasion, dhe Montella si një tifoz i kuqezinjve e di mirë këtë. “Është e vërtetë, për mua vlen dyfish, pasi kam bërë gjithmonë tifo për Milanin, por kurrë kundër Interit, që të dielën do filloj ta bëj edhe këtë”, tha ai.
Montella deklaroi se do të ishte i lumtur, nëse në stadium do të jetë edhe Berluskoni në atë që pritet të jetë derbi i tij i fundit si pronar i Milanit, me kalimin e aksioneve të klubit te kinezët që është programuar për në mesin e dhjetorit. Si trajner i duhet të bëjë kujdes me skuadrën që do të hedhë në fushë dhe sipas të gjitha gjasave do të duhet të bëjë pa Romagnolin që u dëmtua me kombëtaren. “Kemi pak shanse për ta rikuperuar, nuk mund të rrezikojmë. Pa të pësojmë një mesatare prej dy golash e gjysmë në ndeshje? Atëherë kjo do të thotë që do të shënojmë 3”, tha Montella.
Duket se trajneri ka ende dyshimin se kë duhet të zgjedhë mes Bacca dhe Lapadula në sulm, me kolumbianin që mbetet i favorizuar. “Bacca nuk ka nevojë të tregojë se sa vlen, ashtu si Lapadula që kërkon të luajë. Për mua ky është një problem i ëmbël, pasi të dy do të më japin atë që kam nevojë, pavarësisht nga zgjedhja. Më pyesni nëse Lapadula e ka një shans për të luajtur? Mund të them se ka më shumë se një”, tha trajneri i Milanit.
Montella bëri të ditur se e rëndësishme do të jetë mesfusha, pasi sipas tij ndeshja do të luhet aty, ëndërron triumfin, por nuk ndihet favorit ndaj Interit. “Këtë e thotë klasifikimi dhe mua nuk më bezdis fakti që e përmendin, por unë dhe lojtarët e mi do të gabojmë, nëse mendojmë se jemi favofirtë. Nëse do ta bënim do të humbisnim, pasi te Interi në ndeshjet e mëdha japin maksimumin, dhe Pioli është një trajner shumë i zoti”, përfundoi Montella.

Ndërlikohen planet e trajnerit të Milanit, Vinçenco Montela, në prag të derbit. Alesio Romanjoli nuk është stërvitur në ditën e djeshme, teksa në “Milanello” nuk ka mundur të jetë edhe Gustavo Gomez, i cili nuk ka mbërritur dot në kohë nga grumbullimi i Paraguait. Italiani, i cili u detyrua të dilte në fundin e pjesës së parë të sfidës Itali-Gjermani, iu nënshtrua dje vizitave mjekësore, të cilat konfirmuan një tërheqje modeste muskulore të muskujve të brendshëm të kofshës së djathtë.
Ndërsa vonesa e Gomezit rrezikon që të prishë planet e trajnerit të kuqezinjve lidhur me formacionin. Kundër Interit, në orët e fundit ka fituar terren Kristian Zapata, i cili mund të jetë titullar në fushë. Romanjoli është i dëmtuar dhe Montela nuk ka shumë alternativa në mbrojtje.
Gjithçka është vështirësuar edhe më shumë nga vonesa e Gomezit, i cili ka mbërritur në Milano dje, në orën 16:40, për shkak të një vonese ajrore, teksa avioni që ai po udhëtonte u vonua gjatë tranzitit në Paris. Lojtari është prezantuar 48 orë para derbit dhe kuptohet se lodhja mund ta detyrojë Montelën ta ulë në stol. Ndërsa Zapata është stërvitur rregullisht në dy javët e fundit dhe mund të startojë për të parën herë si titullar me Milanin në këtë sezon.
Për momentin, nga ajo që filtron në shtëpinë kuqezi, duket se janë të pakta shanset që Romanjoli të jetë në fushë. Pavarësisht se dëmtimi nuk duket i rëndë, gjendja e lojtarit do të monitorohet me kujdes deri të dielën paradite, për të kuptuar nëse lojtari do t’ia dalë ose jo.
Prandaj, kaq ka mjaftuar për të vënë në alarm stafin mjekësor të kuqezinjve, por akoma më shumë trajnerin e Milanit, Vinçenco Montela, i cili nuk e kishte llogaritur absolutisht këtë dëmtim, që i prish jo pak plane. Mirëpo, ekziston edhe shpresa që ish-lojtari i Sampdorias të jetë në fushë. Këtë e ka konfirmuar Filipo Gali, i cili ka postuar dje një foto me futbollistin me mbishkrimin: “Po punojmë që Romanjoli të jetë gati për derbin”.

Stefano Piolit i rezervoi fati një debutim “bombë”. Statistikat e trajnerit të ri të Interit “qajnë” në duelet derbi (i ka përjetuar në Romë si trajner i Lacios) dhe ato kundër “Djallit”. Por ngjyrat zikaltër i kanë dhënë një tjetër dimension teknikut, i cili po bën gjithçka që t’u prezantohet tifozëve të tij të ri me një fitore kundër “kushërinjve” të urryer.
Ai ka dashur që të motivojë edhe më shumë të tijtë, duke dhënë një prononcim të shkurtër për klubin. Më pas, ky i fundit publikoi gjithçka nëpërmjet një “cicërime” në Twitter. “Në këto momente po na përshkojnë emocione të forta, por ne duhet që të bëjmë të mundur që të tilla ndjesi të na lejojnë që të shkojmë në formë në këtë takim të madh. Duhet të jemi të përqendruar dhe të mos humbim durimin, sepse pikësynimi ynë është që të marrim fitoren”, ishte prononcimi i shkurtër i trajnerit.
Sa i përket skemës dhe formacionit, deri në seancën e fundit stërvitore nuk mund të thuhet asgjë me bindje të plotë. Pioli do të ngatërrojë mirë letrat përpara se të prezantohet përballë “Djallit” të Montelës. Pioli e di fare mirë se çfarë nuk funksionin tek Interi dhe gjithashtu ka pasur shansin që të shikojë përmirësimin e Milanit nën drejtimin e Montelës. Tani për tani, i sigurt është vetëm moduli. Mendohet se Pioli do të rreshtojë të tijtë me skemën 4-3-3.
Frenk de Bur ankohej shpesh për rendimentin e dobët në aspektin fizik të zikaltërve. Holandezi ankohej, pasi shikonte se Ikardi “braktisej” i vetëm në zonat kundërshtare dhe askush nuk shkonte në ndihmë. Për të zgjidhur këtë problem, Pioli ka menduar që të avancojë Kandrevën, i cili është rekomanduar që të luajë pranë argjentinasit.
Në të djathtë do të spostohet Brozoviç, i cili kryen më së miri këtë rol te Kroacia. Kjo lëvizje nuk do të jetë risia e vetme në lidhje me formacionin. Pioli ka preferuar Brozoviçin përballë Banegës, ndërkohë që përpara mbrojtjes do të aktivizohet Zhoao Mario, i cili do të mbrohet prej Xhorfi Kondogbias.
Ashtu si Roberto Mançini dy sezone më parë edhe Stefano Pioli e nis me derbin ndaj Milanit aventurën e tij në krye të stolit të Interit. Një start i ndërlikuar për ish-trajnerin e Lazios, të cilit i është besuar detyra e vështirë për të rikthyer skuadrën zikaltër në rrugën e duhur pas një fillimi aspak pozitiv të sezonit. Megjithatë Pioli është gati dhe nuk ka frikë, madje 51-vjeçari beson se të dielën në mbrëmje në “San Siro”, do të jetë skuadra e tij që do të triumfojë në derbin e Milanos. Pioli e nisi me një grup të cunguar futbollistësh punën e tij te Interi për shkak të ndeshjeve të kombëtareve, megjithatë prej pak ditësh ai ka në dispozicion edhe elementë të tillë si Kandreva, Eder, Brozoviç, Perisiç, Jovetiç e Zhoao Mario.
Në pritje të amerikanojugorëve, trajneri italian mesa duket e ka përcaktuar formacionin me të cilin do të zbresë në fushë Interi ndaj kuqezinjve të Vinçenco Montelës. Por për trajnerin e ri të Interit pak rëndësi ka se kush do të luajë, e rëndësishme është që ata futbollistë që do të zbresin në fushë të shfaqin më të mirën e tyre dhe të ndihmojnë skuadrën për të marrë fitoren. Me një lider si Ikardi në fushë, i cili do të kërkojë të zhbllokohet sepse nuk i ka shënuar asnjëherë Milanit, Pioli ka besim se Interi i tij do të marrë tre pikët në derbi.

Xhani de Biazi ndalet sërish te rasti i humbur për t’u bërë trajner i Italisë. Madje kësaj here, tekniku kuqezi ka shkuar edhe më tej duke thënë se e di personin që ndërhyri në vendimin e Federatës italiane për të zgjedhur Xhampiero Venturën si pasues të Antonio Kontes pas Kampionatit Europian. “Isha një hap larg emërimit si trajner i Italisë. E di kush ishte ai që më vuri shkopinj në rrota. Është një person i vetëm”, deklaroi 60-vjeçari për “Radio TMW”, megjithatë duke mos e zbuluar emrin e personit në fjalë.
Më tej De Biazi foli edhe për humbjen 3-0 ndaj Izraelit të shtunën e shkuar: “Jam ende i tronditur, shpresoj ta rimarrim veten shpejt. Në fillim të kualifikueseve e dinim se do ta kishim tepër të vështirë, sepse Italia dhe Spanja janë ekipe cilësore. Ventura po punon me një skuadër të re, e cila mund të bëjë mirë në të ardhmen. Kundër Italisë do të kem një stimul më shumë për të bërë mirë. Shumica e shqiptarëve bëjnë tifo për Italinë si skuadër të dytë. Shpresoj të bëjmë më mirë se herën e fundit”.
De Biazi nuk i kurseu as këtë herë fjalët e ëmbla për mbrojtësin e Napolit, Elseid Hysaj: “Ka qenë përherë shumë i zoti taktikisht. Mund të mbrojë e të sulmojë, është vetëm 22 vjeç dhe mendoj se mund të përmirësohet më tepër”.

Fenomeni Liepzig po mahnit futbollin gjerman. Skuadra e themeluar në vitin 2009, ngjitet e vetme në krye të Bundesligës pasi mposhti 2-3 me përmbysje Bayer Leverkusenin brenda në “Bay Arena”. “Aspirinat” kaluan dy herë në avantazh, por miqtë jo vetëm që arritën të barazonin, por shënuan edhe golin e fitores që i shkëput me tri pikë nga Bayerni, i cili ka një transfertë të vështirë me Dortmundin në “Signal Iduna Park”.
Fillimi ishte vërtet i vrullshëm për Leverkusenin që shënoi me Kampl pa u mbushur një minutë lojë. Vetëm tri minuta më pas një autogol i Baumgartlinger ktheu shumë shpejt baraspeshën.
Në minutat shtesë të pjesës së parë Brandt i asistuar nga Calhanoglu riktheu entiziazmin në “Bay Arena”. “Aspirinat” mund ta kishin mbyllur ndeshjen në të 54-ën, por Calhanglu gaboi nga pika e bardhë e penalltisë. Ky ishte momenti i kthesës pasi Liepzigut përmbysi rezultatit me golin e Forsberg në të 67-ën dhe finalizimin e Orban në minutën e 81-të me rezultatin që nuk ndryshoi më deri në vërshëllimën e fundit të gjyqtarit.

Samir Ujkani heq dorashkat dhe flet hapur për Shqipërinë dhe Kosovën në një intervistë të dhënë për mediat franceze. Portieri ka shpjeguar se si është larguar nga Shqipëria drejt Kosovës dhe për këtë pikë, nuk ka kursyer edhe thumbimet ndaj trajnerit Xhani de Biazi, i cili kishte qenë shumë pak i kuptueshëm në momentin kur Ujkani kishte zgjedhur t’i jepte lamtumirën Shqipërisë.
“Si mund të mos e kuptosh kur dikush i lindur në një vend dhe ka përjetuar luftën, zgjedh menjëherë ngjyrat e këtij vendi sapo i jepen mundësitë? Një trajner mund të bëhet pengesë në këtë çështje. Megjithatë, presidenti i Federatës bëri gjithçka që ishte e mundur që të realizohej dhe e falënderoj. Mendoj se De Biazi ishte i frikësuar sidomos se mos të tjerët do të ndiqnin hapat e mi”, ishin fjalët e Ujkanit.
I pyetur nëse një gjë e tillë kishte ndodhur në të vërtetë, Ujkani minimizoi gjithçka. “Jo, unë isha i vetmi. Pak më vonë, edhe dy të tjerë bënë të njëjtën rrugë, por ata nuk kishin luajtur ndeshje zyrtare me Shqipërinë, thjesht kishin disa grumbullime. Unë i kam marrë zakonisht komentet e tij si sulme personale”, vijoi portieri, i cili duket se nuk ka peng faktin se zgjedhja e tij e la jashtë Europianit.
“Unë humba Europianin dhe respektin e shumë njerëzve në Shqipëri, por sot jam një njeri i lumtur. Askush nuk mund të ma marrë këtë”, theksoi Ujkani, i cili zbuloi se ia kishte premtuar babait të tij që në momentin e parë se do t’i bashkohej Kosovës sapo ajo të krijohej si kombëtare.
Në intervistën e tij, Ujkani ka thënë gjithashtu se mirëkupton zgjedhjen e emrave si Behrami, Shaqiri e Xhaka. Ndërkaq, ai pranoi se ekipi përballej me sfida shumë të veçanta.
“Në skuadër ka lojtarë, të cilët nuk e flasin mirë gjuhën tonë. Para ndeshjes dëgjojmë këngë popullore me fjalë që flasin për familjen, bashkimin dhe vuajtjen. Të gjithë kanë humbur të paktën një pjesëtar familjeje në këtë luftë, nuk mund ta harrojmë kurrë”, tha ai, duke zbuluar më pas se objektivi që lojtarët kosovarë i kishin vënë vetes ishin të ngjitnin përfaqësuesen mes 100 më të mirave në botë brenda vitit të ardhshëm.
Në fund, edhe një pyetje për një duel të mundshëm Serbi-Kosovë. “Të flasim pas 20 viteve për këtë, se përndryshe do të duhej të luhej pa tifozë”, janë fjalët kuptimplota të Ujkanit.