Një aksident i rëndë me dy të vdekur u shënua mbrëmjen e të enjtes në Bulqizë. Në makinën ku udhëtonin tre persona, ka rënë në lumë nga ura që të çon në fshatin Sopot. Njëri prej tre personave që udhëtonin me kamionçinë ka mundur të shpëtojë dhe të lajmërojë Policinë dhe banorët për ndihmë.
Rreth orës 21:35 të 17 nëntorit 2016, në Sallën Operative të Komisariatit të Policisë Bulqizë ka mbërritur telefonata se automjeti kishte rënë në lumë. “Policia ka marrë menjëherë një vinç ku ka bërë të mundur nxjerrjen e personave që ndodheshin në makinë në mes të lumit dhe konkretisht: Në rrugën dytësore Tre Çezmat-Sopot, një kamjonçinë me targa AA 782 DH, që drejtohej nga shtetasi I.Z, ka rënë në lumin e Bulqizës nga ura që të çon në fshatin Sopot .
Si pasojë ka humbur jetën drejtuesi i automejtit shtetasi Indrit Zeneli, 40 vjeç, nga fshati Sopot Bulqizë”, bëri të ditur policia në në njoftimin për shtyp.
Në automjet udhëtonin dhe dy shtetas të tjerë, ku njeri prej tyre shtetasi R.L ka mundur të shpëtojë dhe të lajmërojë Policinë dhe banorët për ndihmë. Ndërsa shtetasi Edion Kola, 35 vjeç, banues në Sopot është transportuar me autoambulancë për në spital në gjendje shumë të rëndë, por ka ndërruar jetë rrugës për në spital. Grupi hetimor në vendngjarja po kryen veprimet për përcaktimin e shkakut të rënies nga ura si dhe zbardhjen e plotë të rrethanave të ngjarjes.
Makina bie nga ura në lumë, dy të vdekur në Bulqizë
Dhunohet një avokat në Vlorë
Një avokat ka rënë pre e një sulmi të dy personave, kushërinj me njëri-tjetrin. Ngjarja ka ndodhur një ditë më parë në qytetin e Vlorës, ky dy personat e identifikuar si Shkëlqim dhe Eqerem S., kanë sulmuar dhe goditur një avokat. Paraditen e djeshme rreth orës 11:20, në lagjen “Isa Boletini” të qytetit të Vlorës, dy personat e shpallur në kërkim, duke bashkëpunuar me njëri-tjetrin, për shkak të detyrës, kanë goditur me sende të forta, hekur, avokatin Vladimir F. Ky i fundit është dërguar në spital, ku ka marrë edhe ndihmën mjekësore dhe ndodhet jashtë rrezikut për jetën. Policia ka nisur kërkimet për të kapur 2 kushërinjtë që sulmuan avokatin Fejzo.
Gjendet e mbytur në lumin Kir
Gjendet trupi i pajetë i një 49-vjeçareje, e cila ishte zhdukur para 10 ditësh. Burime zyrtare nga Policia bënë me dije, se bëhet fjalë për Antonela Progni u gjet në lumin Kir, në afërsi të fshatit Kuç.
Mësohet se bashkëshorti i 49-vjeçares apeloi një javë më parë për të gjetur trupin e pajetë të gruas. Nuk dihen ende detaje në lidhje me zhdukjen e gruas, ndërsa policia vijon hetimet në lidhje me zbardhjen e rrethanave të kësaj ngjarjeje.
DOSJET E KRIMEVE QE HAPEN NGA NESER
Vendimi i Gjykatës i kërkon Shërbimit Informativ hapjen e dosjeve të Sigurimit
Pas një beteje tetëmujore të “BIRN” Albania me SHISH, Gjykata Administrative e Tiranës vendosi që dokumentet mbi numrin e personave të përndjekur nga ish-Sigurimi nuk janë sekret dhe duhet t’i bëhen me dije publikut.
Gjykata Administrative e Tiranës urdhëroi Shërbimin Informativ Shtetëror që të deklasifikojë informacionin mbi numrin e personave që përndiqeshin nga ish-Sigurimi i Shtetit në dekadën e fundit të komunizmit- të dhëna që deri më sot janë konsideruar “sekret” dhe janë mbajtur të kyçura në arkivë.
Vendimi u dha më 17 nëntor nga gjyqtari Gentian Hamiti, duke i dhënë të drejtë një beteje tetëmujore të “BIRN” Albania me Shërbimin Informativ- SHISH, për dokumentet që mbahen ende të klasifikuara, por që i shërbejnë medias dhe opinionit publik për të hedhur dritë mbi metodat famëkeqe të përndjekjes së qytetarëve shqiptarë nga policia sekrete e regjimit komunist.
Më 6 mars 2016, gazetari Gjergj Erebara i “BIRN” Albania i kërkoi SHISH përmes një kërkese për të drejtë informimi analizën vjetore të Sigurimit për vitet 1980-1989 dhe numrin e personave të ndjekur për figura të ndryshme armiqësore, referuar dosjeve të kategorisë 2A për të njëjtën periudhë.
SHISH refuzoi të japë informacionin e kërkuar, duke pretenduar se Ligji 8043 i vitit 1995 “Për kontrollin e figurës së zyrtarëve dhe personave të tjerë që lidhen me mbrojtjen e shtetit demokratik” e ndalon atë që të japë dokumente nga arkiva e ish-Sigurimit të Shtetit.
Përgjigjja negative u ankimua fillimisht te komisioneri për të Drejtën e Informimit dhe pas u dërgua në gjykatë, pasi SHISH refuzoi në vazhdimësi të jepte informacionet e kërkuara.
Pasi shqyrtoi aktpadinë e “BIRN”, gjyqtari Hamiti doli në konkluzionin “se pretendimet e SHISH për klasifikimin e këtyre dokumenteve si sekret nuk qëndrojnë”. Gjykata e detyroi SHISH të deklasifikojë informacionet dhe t’i vërë në dispozicion të “BIRN” Albania.
Vendimi i Gjykatës Administrative të Tiranës, i pari i këtij lloji në Shqipëri, i hap rrugën detyrimit të Shërbimit Informativ Shtetëror që të ndërmarrë procese serioze deklasifikimi dhe publikimi të dokumenteve të periudhës së komunizmit, por edhe të atyre që mund t’i përkasin historikut 25-vjeçar të SHISH si institucion më vete.
Darian Pavli, ekspert i ligjit për të drejtë informimi e cilësoi këtë vendim si tepër të rëndësishëm për shqyrtimin e historisë dhe rolit të Sigurimit të Shtetit në shoqërinë shqiptare, bazuar në dokumente origjinale dhe të besueshme.
“Siguria kombëtare nuk mund të përdoret si një mbulesë për të mbajtur larg syve të publikut çdo lloj dokumenti të prodhuar nga institucionet e sigurisë kombëtare”, tha Pavli pas vendimit të gjykatës.
“Ka ardhur koha që këto të fundit t’i hapin rrugën studimeve historike mbi të kaluarën dhe përgjegjshmërisë mbi të tashmen”, shtoi ai.
Duke u bazuar në ligjin për të drejtën e informimit, “BIRN” i kërkoi të dhënat e mësipërme për të analizuar rolin e ish-Sigurimit dhe metodat e tij përndjekëse në dekadën e fundit të komunizmit.
Raportet vjetore të policisë sekrete të regjimit komunist në Shqipëri mendohet se mbajnë të dhëna mbi aktivitetin e kësaj strukture famëkeqe. Dosjet 2/A janë kodi i dosjeve të personave për të cilët Sigurimi besonte se kishte informacion mbi aktivitet armiqësor dhe për këtë arsye, mbaheshin në vrojtim të vazhdueshëm me synimin e krijimit të provave për këtë aktivitet dhe rrjedhimisht, ndëshkimin e tyre.
SHISH pretendoi se nuk ishte institucion trashëgimtar i Sigurimit të Shtetit dhe se nuk kishte të drejtë të deklasifikonte informacionet që qëndrojnë në arkivë. Ai pretendoi gjithashtu se ligji i vitit 1995 për “pastërtinë e figurës” e ndalonte SHISH që ta hapte arkivën e dosjeve deri në vitin 2026.
Argumenti i tretë i refuzimit të SHISH lidhej me ligjin e ri për hapjen e dosjeve të ish-Sigurimit. “Kërkuesi duhet të presë krijimin e institucionit që do të menaxhojë dosjet”, pretendoi SHISH.
Në prill 2015, Shqipëria miratoi me bujë ligjin që premton hapjen e dosjeve të Sigurimit dhe përballjen e vendit me të shkuarën e vet të errët gjatë regjimit komunist. Megjithatë, përzgjedhja e anëtarëve të Autoritetit që do të kryejë këtë proces u vonua për një vit e gjysmë. Parlamenti votoi më 17 nëntor pesë anëtarët, ndërkohë që nuk dihet ende se kur do të fillojë puna për hapjen e dosjeve.
Në Gjykatën Administrative të Tiranës, avokati Adriatik Lapaj i Fondacionit Shoqëria e Hapur për Shqipërinë, Soros që asistoi “BIRN” argumentoi se refuzimi nga ana e SHISH bie ndesh jo vetëm me ligjin për të drejtën e informimit, por edhe me disa vendime për çështje identike të marra nga Gjykata Europiane për të Drejtat e Njeriut.
“SHISH po cenon të drejtën themelore të palës së paditur për njohje me burime dokumentare të rëndësishme për kërkimet historike dhe debatin publik në lidhje me praktikat represive të ish-Sigurimit të Shtetit në Shqipëri”, tha Lapaj.
Vendimi i Gjykatës Administrative të Tiranës vendos një precedent të ri për trajtimin e arkivës së ish-Sigurimit të Shtetit, e cila është mbajtur e gjitha e mbyllur për publikun shqiptar më shumë se dy dekada pas rënies së regjimit komunist.
Votimi i Parlamentit
Kuvendi ka votuar në seancën e së enjtes për anëtarët e Autoritetit që do të jetë përgjegjës për hapjen e dosjeve. Opozita braktisi votimin. Kuvendi miratoi kandidaturën e LSI-së, Altin Hoxha, me 76 vota pro, 1 kundër dhe 3 abstenim; kandidaturën e PS-së, Mariglen Kasmi me 77 vota pro dhe 3 kundër; kandidaturën e ish-të përndjekurve politikë, Daut Gumenin, me 76 vota pro. Ndërsa kandidatura e propozuar nga Shoqata e të Drejtave të Njeriut, Simon Mirakaj, mori 75 vota.
U rrëzua kandidatura e PD-së, Selami Zalli, me 67 vota kundër, 9 pro dhe 4 abstenim. Më parë, deputeti Ben Blushi kishte shprehur bindjen se Autoriteti që do të krijohet për këtë qëllim nuk do të ofrojë transparencë për qytetarët.
Ligji gjerman i hapjes së dosjeve përfshin atë që është më thelbësore për dënimin e krimeve të komunizmit, përfshin lustracionin, që e bën të pamundur përfshirjen në administratën shtetërore apo kudo gjetkë, spiunët dhe bashkëpunëtorët e ish-Sigurimit komunist. Ky ligj që ka hartuar me kokëfortësi Partia Socialiste me Edvin Ramën, i ka vënë “një kapak floriri” krimeve të komunizmit, që bie në kundërshtim me Rezolutat e Asamblesë parlamentare të vitit 2005 “për dënimin e krimeve të komunizmit”. Ky veprim antikombëtar është një atentat i turpshëm kundër demokracisë. Është një përpjekje për të mbuluar me natë krimet e baballarëve të tyre kundër popullit shqiptar.
“Dosjet nuk do të hapen dhe ai proces që do të bëhet do të jetë selektiv dhe i politizuar”, tha Blushi. Ai e ka cilësuar një farsë votimin që do të bëhet vetëm falë numrave që gëzon mazhoranca. “Ju mund të kaloni një ligj për dosjet dhe të votoni Autoritetin që do të bëjë hapjen e dosjeve, por ai do të jetë i pabesueshëm”, ka theksuar Blushi.
Ish-Gjermania Perëndimore e Kancelarit Helmut Kol në vitin 1989 më rënien e Murit të Berlinit nuk pranoi të bashkohej, pa hapur dosjet e STASS-it të ish-Sigurimit komunist të Gjermanisë Lindore. Gjermania hapi dosjet, duke u përballur guximshëm me të shkuarën e diktaturës komuniste.
Nesër në RD dosjet e para të pushtetit të lidhur me krimet e diktaturës.
Basha-Szijjarto: Negociata dhe plotësim i kushtit për zgjedhjet
Kryetari i opozitës dhe ministri i Jashtëm i Hungarisë kanë kërkuar dje së bashku hapjen e negociatave me Bashkimin Europiann dhe në të njëjtën kohë plotësimin e kushteve të vendosura nga Brukseli për zgjedhje të lira.
Kryetari i Partisë Demokratike, Lulzim Basha priti dje në një takim ministrin e Jashtëm të Hungarisë, Péter Szijjártó.
Basha vlerësoi mbështetjen e Hungarisë në rrugën e Shqipërisë drejt Bashkimit Europian dhe e siguroi ministrin Szijjártó, se Partia Demokratike siç ka qenë e përkushtuar në qeverisje, edhe sot në opozitë mbështet fuqimisht procesin e integrimit europian të vendit.
Ministri i Jashtëm hungarez, Peter Szijjarto tregoi edhe arsyet se përse ai është takuar me kryetarin e opozitës, Basha. Szijjarto tha se e konsideronte PD një parti simotër të partisë së tij të djathtë në pushtet në Hungari dhe se i uronte PD fitore në zgjedhjet e vitit të ardhshëm.
Deklarata e Szijjarto
“Para së gjithash ishte e qartë që unë vizitova Partinë Demokratike, sepse nuk flas vetëm në pozicionin e diplomatit, por edhe atë të politikanit, që kur kam qenë i përfshirë në partinë politike hungareze të qendrës së djathtës FIDESZ, prej shumë kohësh, është e kuptueshme për mua që të vizitoja partinë simotër gjithashtu. Jam shumë i lumtur me çka dëgjova këtu. Partia Demokratike është e përkushtuar në rrugën e integrimit europian të Shqipërisë, të cilën ne e kemi mbështetur. Hungaria ka qenë gjithnjë një mike e vërtetë e Shqipërisë dhe Hungaria është një promovuese e përkushtuar e integrimit euro-atlantik të Shqipërisë. Më duhet t’u them që në këto vite ne kemi punuar së bashku me Partinë Demokratike të Shqipërisë, si në opozitë ashtu edhe në qeverisje, në lidhje me këto çështje. Jemi shumë të lumtur që këto çështje bashkojnë vendin, ku si qeveria ashtu edhe opozita janë në mbështetje të integrimit euro-atlantik. Për ne si fqinj është e qartë se, rruga më e mirë është sigurimi i stabilitetit të qëndrueshëm, paqes dhe rritjes së qëndrueshme ekonomike në rrugën e integrimit për Ballkanin Perëndimor. Sigurisht që unë uroj sa më shumë suksese për partinë tonë simotër në zgjedhjet e ardhshme parlamentare vitin e ardhshëm”.
Deklarata e Bashës
“Me ministrin e Jashtëm hungarez z.Peter Szijjarto ndava vlerësimin maksimal për rolin e Hungarisë dhe mbështetjen e madhe nga kryeministri Orban për integrimin europian dhe euroatlantik të Shqipërisë. I kërkova në emër të opozitës shqiptare, ministrit të Jashtëm hungarez, por edhe në emër të PD-partisë tonë simotër FIDESZ në Hungari, të vazhdojë të mbështesë me të gjitha format dhe mënyrat integrimin europian të Shqipërisë, e në veçanti procesin e hapjes së negociatave.
Padyshim diskutuam për sfidat dramatike me të cilat përballet Shqipëria dhe nga ana e tij m’u kërkua që opozita dhe së bashku shqiptarët të bëjnë gjithçka për të luftuar për përmbushjen e kritereve, jo vetëm pesë kritereve të Komisionit Europian, por edhe kritereve të Kopenhages, në veçanti sa i përket zgjedhjeve të lira dhe të ndershme dhe luftës ndaj krimit të organizuar.
E sigurova se Partia Demokratike dhe opozita do të vazhdojnë me të gjitha format dhe mënyrat betejën për zgjedhje të lira dhe të ndershme, dhe kundër krimit në politikë, ndarjen e politikës nga krimi, luftën kundër drogës dhe zbatimin e pesë kritereve, jo vetëm për të përshpejtuar integrimin europian të Shqipërisë, por edhe si interesi esencial për Shqipërinë dhe shqiptarët”, tha Basha.
Hungaria: Rama ka fyer popullin hungarez
Pas ofendimeve ndaj Presidentit të zgjedhur të SHBA, Donald Trump nga Lideri global i Surrelit, një tjetër notë proteste ka ardhur dje nga ministri i Jashtëm i Hungarisë, Peter Szijjarto. Hungaria ka reaguar ndaj deklaratave të papërgjegjshme të Ramës ndaj Kryeministrit hungarez, të cilin e cilësoi si “autoritar”. Dhe të imagjinosh që Rama akuzon kreun e qeverisë hungareze si autoritarist. Reagimi i ministrit të Jashtëm hungarez ka qenë pa dorashka dhe i drejtpërdrejtë ndaj Ramës. “Çdo fyerje e tillë për qeverinë është një sulm ndaj popullit hungarez. Qeveria aktuale nuk e fitoi pushtetin me lotari, por me zgjedhje të lira e të ndershme”, tha dje ministri Szijjarto.
Gjatë vizitës në Tiranë, ministri i Jashtëm hungarez shprehu mbështetjen e plotë e të pakushtëzuar të vendit të tij për çeljen e negociatave të Shqipërisë me Bashkimin Europian në 15 dhjetor. Një dritë jeshile që sipas kreut të diplamacisë hungareze nuk ka munguar asnjëherë për Shqipërinë. “Hungaria ka qenë mbështetëse e fortë dhe e përkushtuar e përpjekjeve të Shqipërisë për integrimin europian. Tani që ju keni marrë rekomandimin, ne duam t’ju sigurojmë dhe t’ju tregojmë angazhimin tonë që në dhjetor Shqipëria të marrë një mesazh pozitiv”, tha Peter Szijjarto, ministër i Jashtëm i Hungarisë. Ndryshe nga sa ndodhi në Hungari, ku Reforma në Drejtësi ishte një proces i kritikuar fuqishëm nga Bashkimi Europian, në Shqipëri, kontestimet më të mëdha kanë ardhur nga opozita. Pas takimit me kreun e demokratëve, kryediplamati Peter Zijarto, shpreh mbështetjen për këtë reformë, për të cilën tha se, gjeti gjithashtu mbështetjen e zotit Basha. “Reforma në Drejtësi kërkohet nga Bashkimi Europian, është e qartë që ne e mbështesim. Pata një takim me kreun e opozitës dhe në thelb edhe ai e mbështeste, çka është një lajm i mirë për mua. Pata ndjesinë se gjetëm konsensus në nevojën e integrimit europian të Shqipërisë pa marrë parasysh se kush është në qeveri apo opozitë. Sepse Bashkimi i Europian e sheh realizimin e Reformës në Drejtësi si kusht për hapjen e negociatave dhe ne e mbështesim këtë, në mënyrë që ky proces të mbyllet sa më parë”, tha Szijjarto. Ai komenton edhe deklaratat e disa kohëve më parë të Kryeministrit Edi Rama, që cilësoi qeverisjen e Viktor Orban si autoritariste. “Asnjëherë nuk jam adhurues i madh i këtyre lloj deklaratave, sepse ajo që duhet të bëjmë është të respektojmë njëri-tjetrin. Njerëzit dy herë vendosën në mazhorancë të votonin zotin Orban dhe familjen politike që përfaqëson. Çdo fyerje e tillë për qeverinë është një sulm ndaj popullit hungarez. Qeveria aktuale nuk e fitoi pushtetin me lotari, por me zgjedhje të lira e të ndershme. Ky ishte vullneti i njerëzve dhe jo një aksident. Duhet t’i respektojmë më shumë vendimet e popullit. Ju s’do të më dëgjoni ndonjëherë mua të kritikoj vendimet e shqiptarëve, sepse janë ata që vendosin kush duhet t’i qeverisë ose jo”, tha ministri hungarez. Zgjedhja e Donald Trum si presidenti i ri i Shteteve të Bashkuara dhe angazhimi i tij për një erë të re marrëdhëniesh me Rusinë dhe Putin nuk përkthehen në shqetësim për kreun e diplomacisë hungareze. “Ka gjithmonë një debat të vazhdueshëm, nëse duhet të frikësohemi ose jo ndaj Rusisë. Ne si Hungari nuk e shohim Rusinë si kërcënim. Por në të njëjtën kohë e respektoj dhe nuk e gjykoj e as komentoj pozicionin e atyre që e konsiderojnë Rusinë si kërcënim. E respektojmë Poloninë apo vendet baltike që e shohin Rusinë si kërcënim për vendet e tyre. Ne nuk e shohim”.
Kritiku i Obamës këshilltar i Trump
Presidenti i zgjedhur amerikan, Donald Trump, i ka ofruar ish-shefit të inteligjencës ushtarake, Michael Flynn, postin e këshilltarit për siguri kombëtare, kanë raportuar mbrëmë mediat amerikane.
Derisa nuk ka pasur njoftime se, a e ka pranuar Flynn këtë ofertë, agjencia “Reuters” e ka cituar një zyrtar të lartë të zotit Trump që ka thënë se, “kur Presidenti i Shteteve të Bashkuara kërkon nga ju që të shërbeni, ekziston vetëm një përgjigje”.
Zoti Flynn ka shërbyer në dy vite të trazuara si drejtor i Agjencisë së Inteligjencës Ushtarake në administratën Barack Obama, para se të largohej në vitin 2014 dhe të shndërrohej në kritik udhëheqës të politikave të jashtme të Obamës.
Zoti Flynn është veçanërisht kritik ndaj qasjes së Obamës për luftën kundër grupit ekstremist Shteti Islamik, duke argumentuar se Shtetet e Bashkuara janë më pak të sigurta nga terrorizmi sot, seç ishin para sulmeve terroriste të 11 shtatorit të vitit 2001.
Ai ka mbajtur një fjalim tejet energjik në Konventën Kombëtare Republikane, duke e paraqitur pikëpamjen e tij se kërcënimi nga Shteti Islamik kërkon qasje më agresive të ushtrisë së Shteteve të Bashkuara dhe e ka shprehur besimin e tij se Uashingtoni duhet të punojë më për së afërti me Rusinë.
Këto tema, zoti Trump i ka pranuar dhe i ka përsëritur shpeshherë gjatë fushatës zgjedhore presidenciale.
Flynn është ideolog edhe i çështjeve të tjera të politikës së jashtme, të cilat Donald Trump i ka theksuar gjatë fushatës së tij, përfshirë negociatat e reja për marrëveshjen atomike me Iranin.
Përvoja ushtarake e zotit Flynn ka bërë që zgjedhja e tij të duket natyrore, që ai ta udhëheqë Pentagonin. Por, pa pajtimin e Kongresit të Shteteve të Bashkuara, ai nuk mund të jetë sekretar i Mbrojtjes, pasi legjislacioni amerikan nuk lejon emërime publike të oficerëve ushtarakë për shtatë vjet, pasi ata të largohen nga shërbimi.
Michael Flynn me gradë është gjenerallejtnant dhe i ka 58 vjet. Ai është pensionuar nga ushtria në vitin 2014. Nëse emërohet në postin e këshilltarit për siguri kombëtare të zotit Trump, ai nuk ka nevojë për konfirmim nga Senati i Shteteve të Bashkuara.
Flynn e ka krijuar reputacionin e tij në ushtri si një profesionist i mprehtë i inteligjencës dhe me shprehje direkte.
Hapat e zotit Trump në fushën e sigurisë kombëtare po ndiqen për së afërti nga aleatët amerikanë dhe po ashtu, nga armiqtë e Shteteve të Bashkuara. Konsiderohet se ai është duke i shqyrtuar një numër të politikanëve për ta udhëhequr Departamentin e Shtetit dhe atë të Mbrojtjes.
Të enjten, presidenti i zgjedhur, Donald Trump, e ka mbajtur takimin e tij të parë ballë për ballë me një lider botëror, prej se fitoi në zgjedhjet presidenciale. Në këtë kuadër, ai privatisht u takua me Kryeministrin e Japonisë, Shinzo Abe.
Besohet se zoti Abe ka kërkuar siguri të re për përkushtimin e Trumpit në mbrojtje të Japonisë, në periudhën kur Koreja Veriore po ndërmerr aktivitete atomike.
Gjatë fushatës, Donald Trump ka thënë se Japonia, si vend i pasur dhe zyrtarisht paqësor, do të duhej ta zhvillonte armatimin e saj atomik dhe ta mbrojë vetveten.
Zoti Trump nuk ka bërë komente pas takimit, por Kryeministri Abe tha se nga takimi me presidentin e zgjedhur ka konkluduar se ai “është lider në të cilin unë mund të besoj shumë”.
Ambasadori i Izraelit në Shtetet e Bashkuara, Ron Dermer, po ashtu e ka vizituar ndërtesën Trump Tower në Manhattan të Nju Jorkut dhe ka vlerësuar se presidenti i zgjedhur, Donald Trump, është “mik i vërtetë i Izraelit”.
“Ne besojmë të punojmë me administratën Trump, me të gjithë anëtarët e kësaj administrate, përfshirë Steve Bannon, duke e bërë aleancën SHBA-Izrael më të fuqishme se kurrë më parë”, tha Dermer.
Steve Bannon është këshilltar i lartë i zotit Trump, i cili është kritikuar ashpër nga demokratët dhe aktivistët, se faqja në Internet, të cilën ai e drejton, “Breitbart News”, është një kanal për pikëpamje raciste dhe antisemite.
Ambasadori izraelit ka refuzuar të bëjë komente direkte lidhur me këto akuza.
Lidhur me çështjet e politikës së jashtme, zoti Trump është konsultuar edhe me ish-sekretarin amerikan të Shtetit, Henry Kissinger, për Kinën, Rusinë dhe Iranin dhe është takuar me guvernatoren e Karolinës Jugore, Nikki Haley, që raportohet se është kandidate për sekretare të Shtetit.
Bashkëpunëtorët kanë thënë se Trump, po ashtu, pritet të takohet me të nominuarin republikan për president amerikan në vitin 2012, Mitt Romney, gjatë fundjavës, për t’i zbutur mospajtimet, pasi Romney gjatë fushatës e kishte kritikuar Trumpin si person “mashtrues” dhe kishte kërkuar nga republikanët që mos votojnë për të.
Zoti Trump ishte përgjigjur në mënyrë të qetë, duke e quajtur “humbës” ish-të nominuarin, Mitt Romney.
Tash, “Reuters” dhe “MSNBC” raportojnë se Romney mund të jetë një tjetër kandidat për sekretar të Shtetit në administratën e ardhshme të Donald Trumpit.
Nuk ka grindje në ekipin e tranzicionit
Presidenti i zgjedhur, Donald Trump po mohon njoftimet për grindje brenda ekipit të tij të tranzicionit dhe tha përmes Twitterit se, është duke u zhvilluar “një proces shumë i organizuar”, ndërsa ai zgjedh anëtarët e kabinetit të tij. Ai ka zëvendësuar tashmë guvernatorin e Nju Xhersit, Chris Christie me nënpresidentin e zgjedhur, Mike Pence si kreun e ekipit të tranzicionit. Ish-kongresmeni Mike Rogers, një këshilltar i lartë i sigurisë kombëtare tha të martën se po largohet nga ekipi. Trump është kritikuar për zgjedhjen e tij të shefit strategjik të Shtëpisë së Bardhë dhe pyetjet vazhdojnë rreth rolit të tri fëmijëve të tij dhe të dhëndrit në këtë proces. Përveç kësaj, ai përballet me kundërshtime të vazhdueshme mes amerikanëve të zakonshëm që mendojnë se retorika e fushatës së tij ishte fyese dhe përçarëse.
Studentët e Universitetit Yale lanë mësimin të mërkurën në mbështetje të shokëve të tyre pa dokumente. Organizuesit e protestave po kërkojnë që shkollat e tyre të strehojnë njerëz që mund të përballen me deportim. Në qytetin e Nju Jorkut, emri Trump u hoq nga tri godina me qira që ai i kishte dikur në pronësi, pasi 600 banorë nënshkruan një peticion kundër tyre.
“Pasi filloi të fliste me tone përçmuese ndaj grave dhe të bënte deklarata raciste, e dinim se nuk do të ishim të sigurtë me emrin e tij në godinën tonë”.
Kryetari i Bashkisë së Nju Jorkut, Bill de Blasio, i ngriti shqetësimet e qytetarëve gjatë një takimi prej më shumë se një orë me zotin Trump.
“Ai është njujorkez. E di se e do këtë qytet. Por mendova se ishte shumë e nevojshme të dëgjonte atë që ndjejnë qytetarët dhe është shumë e rëndësishme të dëgjonte përvojën tonë”.
De Blasio tha gjithashtu se ai kishte pikëpyetje për zgjedhjen e Steve Bannon-it në postin e këshilltarit të lartë. Bannon ka qenë i lidhur me grupet konservatore të djathta që mbrojnë dhe nxisin nacionalizmin e bardhë dhe si person i medias ka shprehur pikëpamjet e tij që shumë i shohin si raciste dhe kundër grave.
Disa ligjvënës republikanë e kanë kritikuar gjithashtu zotin Trump në të kaluarën, por shfaqën një front të bashkuar të mërkurën.
“Nuk do të komentoja për zgjedhjet e zotit Trump të personelit të Shtëpisë së Bardhë”.
Demokratët kanë filluar përpjekjet për të ripërtërirë partinë pas humbjes së papritur në zgjedhjet presidenciale. Senatori Charles Schumer, udhëheqësi i ri i pakicës në Senat, njoftoi udhëheqësit e rinj të zgjedhur të partisë të mërkurën.
“Mund t’i them amerikanëve këtë: ‘Ne jemi gati të qëndrojmë përkrah republikanëve – duke punuar së shpejti me presidentin e zgjedhur Trump për çështje ku biem dakord. Por ne do të kundërshtojmë presidentin e zgjedhur kurdoherë që vlerat tona dhe përparimi që kemi bërë vihet në rrezik”.
Kongresi i ri do të ketë një shumicë republikane në të dyja dhomat.
Regjistrohuni për të hyrë në zonën Shengen!
Komisioni i BE-së prezantoi në Bruksel sistemin elektronik të emërtuar “ETIAS” për regjistrimin e udhëtarëve. Me këtë sistem do të regjistrohen të gjithë turistët apo ata që udhëtojnë për shërbime, të cilëve nuk u duhet vizë, por vetëm paraqitja e pasaportës në kufijtë e zonës Shengen. Australia e ka prej kohësh këtë sistem, SHBA-ja qysh nga viti 2007, fjala është për një sistem elektronik për udhëtarët, që nuk kanë nevojë për vizë. Këtë sistem do ta aplikojë tani edhe BE-ja, për të kontrolluar më mirë, se kush hyn e del në kufijtë e saj. Në SHBA sistemi i regjistrimit elektronik përmes internetit quhet “ESTA”. Në Europë ai është emërtuar “ETIAS” (European Travel Information and Authorisation System).
Me çmim më të ulët se në SHBA
Ministrat e Brendshëm të vendeve të BE-së vitin e kaluar e ripërsëritën kërkesën për një sistem elektronik regjistrimi pas sulmeve terroriste në Paris. Ky sistem ishte planifikuar prej kohësh për të mbyllur boshllëqet e konstatuara në sistemin e sigurisë. Tani ai do të aplikohet në praktikë. Ngjashëm si në sistemin amerikan të SHBA-së, udhëtarët, që nuk kanë nevojë për vizë në BE, duhet të regjistrohen në internet. Tarifa e vendosur do të jetë pesë euro dhe leja e hyrjes vlen për pesë vjet. Ndërsa në SHBA tarifa është 14 dollarë për dy vjet.
“Në thelb ETIAS është vëllai i vogël i vizës”, u shpreh një nëpunës i BE-së në Bruksel. Shumë qytetarë për shembull, nga vendet e Ballkanit, që mund të udhëtojnë pa viza në BE, nuk regjistrohen gjatë hyrje-daljeve në kufi. Me aplikimin e sistemit ETIAS këtej e tutje do të kemi një lloj “visa light”, qëllimi kryesor i së cilës është që të mund të ndalohet qëndrimi më tepër se tre muaj.
Hyrje me regjistrim edhe për britanikët
Numri i njerëzve që nuk kanë nevojë për vizë, por megjithatë duhet të paguajnë tarifën e “hyrjes”, vitin e ardhshëm mund të rritet ndjeshëm. Miliona britanikë, që pas Brexit do të vijnë në BE për pushime ose me shërbim pune, duhet të paguajnë për t’u regjistruar në sistemin “ETIAS”. Me daljen e Britanisë së Madhe nga BE-ja praktikisht ky vend konsiderohet si “vend i tretë” e britanikëve nga viti 2020 do t’u duhet të kalojnë përmes një sistemi të ri regjistrimi. Me këtë sistem do të identifikohen udhëtarët nga vende, që mund të udhëtojnë pa viza dhe vetëm duke paraqitur pasaportën në kufijtë e hapësirës Shengen. Po ashtu edhe udhëtarët nga Turqia apo Ukraina, në rast se BE-ja do t’u garantojë atyre qarkullimin pa viza.
Sistem kompleks kontrolli
“ETIAS” është vetëm një komponent i një iniciative në shkallë të gjerë të Komisionit të BE-së, për të siguruar kufijtë e jashtëm pas sulmeve terroriste dhe migracionit të pakontrolluar të vitit të kaluar. Zemra e këtij sistemi të ri për sigurimin e kufijve do të jetë sistemi i regjistrimit të të gjitha hyrje-daljeve të udhëtarëve në BE nga vende jo anëtare. I ashtuquajturi rrjeti “EES” duhet të vendoset deri në fund të vitit. Ndërkohë janë duke u përpunuar detajet teknike.
Nga viti 2020 çdo hyrje-dalje në BE do të regjistrohet në një bankë të dhënash. Njëkohësisht duhet të verifikohet vlefshmëria e pasaportave dhe e vizave. Përveç kësaj do të ketë edhe një pyetësor të rregullt, të ashtuquajturin “Sistem Informacioni i Shengenit” (SIS), në të cilin do të regjistrohen të dhëna për hetimet dhe rreziqet e mundshme terroriste. Të dhënat për hyrje-daljet do të ruhen për pesë vjet. Derisa të vihen në funksion këto sisteme të reja do të duhen të paktën katër vjet që të instalohen scanner-at dhe bankat e të dhënave.
Gjermania dëbon azilkërkuesit nga Ballkani
Numri i dëbimeve të personave pa të drejtë qëndrimi në Gjermani është rritur, në kuotën më të lartë që prej dhjetë vitesh. Listën e personave të dëbuar, e kryesojnë madje me distancë prej grupeve të tjera azilkërkuesit nga vendet e Ballkanit. Vetëm nga Shqipëria, Kosova, Serbia, Maqedonia, Bosnje-Hercegovina dhe Mali i Zi janë dëbuar këtë vit 14.529 vetë, gati tre të katërtat e rasteve. Nga janari deri në shtator të këtij viti janë dëbuar gjithsej nga Gjermania 19.914 të huaj nga Republika Federale, ka bërë të ditur gazeta gjermane “Rheinische Post” duke u bazuar në të dhënat e policisë federale.
Po ashtu është dyfishuar edhe numri i azilkërkuesve të dëbuar nga Siria në 426 vetë, si edhe azilkërkues nga Afganistani. Jo të gjithë kthehen në vendin e tyre. Vetëm 27 afganë për shembull janë riatdhesuar, pjesa tjetër është dërguar në vende të tjera të BE-së apo vende të treta. Madje deri në fund të vitit kjo shifër pritet të rritet deri në 26.500 vetë, kuota më e lartë që nga viti 2003. Vitin e kaluar janë dëbuar 20.888 persona.
Kryesore
Continue to the category
