Me urdhër të Prokurorisë, Policia e Gjirokastrës zhvilloi një operacion antikanabis dje në Memaliaj, ku sekuestroi rreth 1.8 ton kanabis, si dhe arrestoi 4 persona, ndërsa shpalli në kërkim tre të tjerë. Burime nga organi i akuzës bëjnë të ditur se, ky operacion ishte urdhëruar të martën nga Prokuroria e Krimeve të Rënda. Burimet thonë se, ka oficerë policie të implikuar në këtë rast dhe për këtë qëllim janë njoftuar trafikantët që të fshehin drogën që të mos sekuestrohej gjatë operacionit të urdhëruar nga Prokuroria.
Në vijim të hetimeve Prokuroria e Krimeve të Rënda ka komunikuar të martën në mbrëmje me Drejtorinë e Përgjithshme të Policisë, duke i kërkuar ndërhyrje për sekuestrimin e drogës dhe arrestimin e personave të implikuar.
Po kështu është vënë në dijeni për operacionin edhe Drejtoria e Policisë Gjirokastër, por burimet nga Krimet e Rënda, bëjnë të ditur se trafikantët janë njoftuar për të lëvizur mallin, pasi do të ketë operacion policor. Dhe kështu ndodhi, trafikantët e kanë transportuar kanabisin në një bazë tjetër, për të cilën sërish Prokuroria e Krimeve të Rënda kishte dijeni të plotë. Gjatë operacionit të djeshëm, organi i akuzës e orientoi policinë në vendndodhjen e re, pikërisht aty ku ishte vendosur lënda narkotike.
Ky është një tjetër rast që tregon implikimin e strukturave policore në mbrojtje të trafikantëve të drogës. Sikundër është raportuar kohë më parë, Shërbimi Informativ Shtetëror i kë dërguar Prokurorisë së Krimeve të Rënda një hartë me zonat konkrete dhe emrat e personave të implikuar në kultivimin dhe trafikun e drogës. Mbi bazën e këtij dokumenti punon organi i akuzës, që shpesh herë është përplasur me Policinë e Shtetit për çështjen e kanabisit.
Dy javë më parë u organizua një tjetër operacion nga Prokuroria e Krimeve të Rënda për bllokimin e një magazine me 7 ton drogë në Rrëshen. Fabrika e drogës që funksiononte 24 orë ndodhej në mes të qytetit të Rrëshenit dhe në të ishin të punësuar rreth 200 punëtorë. Për një gjë të tillë fliste i gjithë qyteti, por policia nuk ndërhynte për shkak se droga ishte grumbulluar aty nga njerëzit e kryetarit të Bashkisë, në bashkëpunim me kreun e policisë. Policia e Rrëshenit nuk ka pranuar të marrë pjesë në operacion dhe ka patur përplasje mes Policisë së Rrëshenit dhe të Lezhës deri në sharje të ndërsjella.
Pronarë të drogës ishin drejtuesit e policisë dhe kreu i Bashkisë dhe për këtë arsye policia nuk ndërhynte për të sekuestruar drogën ndonëse laboratori i përpunimit ndodhej pak metra larg Komisariatit të Policisë dhe Bashkisë. Ndërkohë, pronari i magazinës me 7 tonë drogë në Rrëshen u zbulua se ishte Kastriot Preng Reçi, nipi i Zef Brozit, ish-kryetar i Gjykatës së Lartë. Droga mbrohej nga policia, pasi banda drejtohet nga kryetari i Bashkisë.
Prokuroria dhe SHISH i kanë intensifikuar aksionet në terren, pasi policia është e përfshirë në kultivimin dhe trafikimin e kanabisit. Policia jo vetëm që nuk ka ndërhyrë për të goditur magazinat ku përpunohet kanabisi, por janë vënë në mbrojtje të tyre. Rasti i sekuestrimit të 12 tonë droge në Vlorë, ku policia e kishte deklaruar sipërfaqen “të pastër” është më flagranti. Policia, sipas një burimi ka hezituar të ndërhyjë edhe pas kërkesës së prokurorëve të krimeve të rënda, pasi “zona kontrollohej nga njerëz të lidhur me shefat lart”. Për këtë arsye thirrën FNSH-në e Tiranës dhe Fierit.
I gjithë angazhimi i Prokurorisë në terren ka të bëjë me mosveprimin e policisë. Prokuroria dhe SHISH duket se po prekin pikërisht parcelat e “të paprekshmëve”, në zonat ku policia nuk ndërhyn “me dashje”, ku kultivuesit dyshohet se kanë lidhje me shefat në polici dhe qeveri.
Me konstatimet dhe hetimet në terren, prokurorët jo vetëm po zbulojnë dhjetëra ton drogë, por po ngushtojnë lakun edhe ndaj drejtuesve të policisë që dyshohet se kanë lejuar kultivimin e kanabisit dhe nuk kanë ndërhyrë për të asgjësuar zonat e evidentuara nga raporti i SHISH, për shkak të lidhjeve me narkotrafikantët.

R.POLISI

Banorët e Mbrostarit kanë protestuar dje kundër ndërtimit të impiantit të plehrave. Në ditën e dytë të kësaj proteste, banorët e Mbrostarit që dje ishin më shumë në numër, kanë bllokuar disa herë rrugën nacionale Fier-Tiranë. Vetëm me ndërhyrjen e forcave të policisë është mundur çlirimi i rrugës nga protestuesit.
Protestuesit kanë hedhur thirrje; “Jashtë plehrat nga Mbrostari”, ndërsa kanë kërcënuar se do rimblidhen në këtë shesh dhe rrugë deri kur të tërhiqet ky vendim për ndalimin e ndërtimit të impiantit të plehrave në Mbrostar.
Teksa protestat në qytetin e Fierit vijojnë për të mos lejuar ndërtimin e impiantit të përpunimit të plehrave, Agjencia e Prokurimit Publik (APP) shpalli në buletinin e radhës fituesin e koncesionit me Partneritet Publik–Privat të përpunimit të plehrave në qytetin jugor.
SPV “Integrated Technology Waste Treatment Fier” sh.p.k. u shpall nga APP si fitues të kontratës koncesionare për trajtimin e mbetjeve në Fier. Kjo kontratë do t’i kushtojë buxhetit 3.7 miliardë lekë pa TVSH.
Autoriteti kontraktor për këtë koncesion është Ministria e Mjedisit. Kjo formë investimi për përpunimin e mbetjeve në qytetet e mëdha është përdorur në Elbasan dhe në Tiranë nëpërmjet Eco Tirana.
Kompania që do të trajtojë mbetjet në qytetin e Fierit ka në kontratë me qeverinë ndërtimin dhe administrimin e impiantit të trajtimit të mbetjeve urbane të Qarkut të Fierit dhe prodhim energjie.
Investimi do të jetë privat, por i subvencionuar nga buxheti i shtetit.
Ministria e Mjedisit ka në zbatim dy koncesione me vlerë totale 7.4 miliardë lekë (57 mln euro). Impianti i mbetjeve në Elbasan, për periudhën 2015-2022, me vlerë 3.3 miliardë lekë. Impianti i mbetjeve në Fier, për periudhën 2017-2022, me vlerë 4.1 miliardë lekë.
Aktualisht, janë në fuqi 6 kontrata koncesionare apo Partneriteti Publik-Privat (PPP), të cilat marrin mbështetje buxhetore, si dhe pritet që gjatë vitit 2017 të fillojnë dhe 2 kontrata të reja të lidhura nga Ministria e Mjedisit dhe Ministria e Shëndetësisë. Pagesat nga arka e shtetit për këto kontrata, deri në vitin 2025, janë programuar të jenë 68 miliardë lekë (rreth 500 milionë euro) nga të cilat, vetëm për vitin që vjen, do të paguhen mbi 7.3 miliardë lekë.
Sipas tabelës së Ministrisë së Financave, nga 68 miliardë lekë që do paguhen deri në vitin 2025, Shëndetësia do të marrë pjesën e luanit, me 40 miliardë lekë (rreth 290 milionë euro), apo rreth 60% të totalit, për katër koncesione.
Sikur të mos mjaftonte ndotja  e shkaktuar nga plehrat dhe ujrat e zeza që prej vitesh kan marr rrugët e fshatit  për 3 mijë banorët e njësisë administrative Mbrostar, bashkia Fier, kjo e fundit  ka vendosur që në tokat  në hyrje të Mbrostarit të ndërtojë impiantin e pëprunimit të plehrave, atë impiant që e kundërshtuan banorët e Mbyetit dhe Plykut.
Impianti do të ndërtohet në hyrje të Mbrostarit ku nga ndërtimi preken banorë të 5 fshatrave, të Mbrostarit, Vajkanit, Verrisë, Kallmit të Vogël e Kallmit të Madh.
Banorët e Mbrostarit janë vënë në dieni të vendimit të këshillit bashkiak nga media por janë kundër ndërtimit të tij. Nuk mjaftonë fekalet që prej vitesh kanë marrë rrugët e fshatit dhe janë bërë shkak për epidemi por tani duan edhe grumbullimin e pëprunimin e plehrave këtu në fshatin tonë, jemi kundër, pohuan ata.
Prej vitesh edhe pse janë ankuar banorët e Mbrostarit për fekalet në rrugë e sipërfaqe drejtues nuk ka vënë dorë  si në ish komunën ashtu edhe sot njësi administrative. Banorët ankohen por asnjëherë zëri i tyre nuk është marrë parasysh.

Detaje spektakolare kanë rrjedhur dhe sa vijnë e po dalin gjithnjë e më shumë nga fronti i bandave shqiptare të trafikut të drogës, të cilët prej janarit duken si të zëna në çark. Por e gjitha kjo ka lidhje me ardhjen e një dedektivi kyç në Tiranë, që e njeh mafien shqiptare si xhepat e tij.
Bëhet fjalë për dedektivin belg, Steven Van Deneste, i cili dëshmoi dy ditë më parë në gjyqin e ish-deputetit të mazhorancës, Mark Frrokut, të cilin e njeh rrezik më shumë se e ëma dhe ia numëroi të gjitha të pabërat. Për gati 5 orë dëshmi në Gjykatë, oficeri belg, Stiven Van Deneste, mësohet se u ka qëndruar bensik veprimeve dhe konkluzioneve të tij, sipas të cilave, Mark Frroku është i njëjti person që në Belgjikë njihej edhe me emrat Besnik Morina, Dritan Frroku dhe Piro Soprani dhe që është i implikuar në këtë dosje për vrasjen e Aleksandër Kurtit.
Sa i takon motivit, mësohet se oficerët belgë i kanë qëndruar versionit që i ndjeri Aleksandër Kurti kishte rënë në dashuri me një vajzë shqiptare që shfrytëzohej nga Frroku dhe të tjerë shqiptarë për prostitucion. Pikërisht kjo lidhje dashurie dhe kërkesa për ta tërhequr vajzën nga prostituimi, kanë qenë shkak i konfliktit me pasojë vrasjen e Kurtit.
Por ajo që ka sjellë Van Deneste përbën një element shumë të rëndësishëm në hetimin jo vetëm të këtij grupi kriminal. Në kontaktet që ka pasur me oficerët antitrafik shqiptarë, dedektivi belg ka bërë të ditur se, Arben Frroku ka shfaqur dëshirën të pendohet dhe t’i hapet drejtësisë; t’i tregoj gjithçka, trafiqet lidhjet, por ajo që është më e rëndësishme, të gjitha segmentet e politikës shqiptare me mafian e drogës në Europë.
Siç mësohet vetë Arben Frroku i ka bërë të ditur hetuesve holandezë se, familja dhe të afërmit e tij rrezikohen të vriten dhe të “kallen të gjallë” 7 breza. Ai ka kërkuar që edhe Mark Frroku ta kryejë dënimin në Belgjikë dhe jo në Shqipëri.
Në këmbim të disa kërkesave ai ka bërë të ditur se do të tregojë sekrete që do të “tundin” gjithçka në Shqipëri, pasi bëhet fjalë për bosët e vërtetë të drogës në këtë vend, të cilët janë shumë lart dhe në majat e politikës dhe ounturage-s së saj.

Si u arratis dhe si u arrestua Arben Frroku në Holandë

Arben Frroku, i dënuar me burg përjetë për vrasjen e Kryekomisar Dritan Lamaj u arrestua në Holandë në mesin e muajit mars të këtij viti. Arrestimi i tij u mbajt i fshehtë nga autoritetet shqiptare, ndërsa lajmi u publikua fillimisht nga ish-Kryeministri Berisha dhe më pas autoritetet holandeze konfirmuan ndalimin e Frrokut në Aeroportin “Shiphol” të Amsterdamit. Zyrtarët e Tiranës jo vetëm që e mbajtën të fshehtë arrestimin në Holandë, por Tahiri nuk po dërgonte dosjen e plotë të të dhënave të Frrokut në mënyrë që të pengohej mbajtja e tij në burg, pasi ai ishte ndaluar me dokumenta greke, me identitetin e shtetasit Renato Xhepa. Duket se mosdërgimi i të dhënvae nga Ministria e Brendshme për Frrokun ka qenë i qëllimshëm.
Pas deklaratës së ish-Kryeministrit Berisha për arrestimin e Frrokut në Holandë, është kërkuar informacion nga Zyra Qendrore Interpolit dhe Europolit për këtë çështje. Fillimisht Zyra e Interpolit ka sjellë një përgjigje negative, ndërsa më pas zyrtarisht është dhënë informacion për ndalimin e shtetasit Renato Xhepa, i dyshuar se është Arben Frroku. Tashmë Frroku ndodhet në burg në Holandë dhe mesa duket ka kërkuar t’i hapet drejtësisë, duke treguar lidhjet e drogës me zyrtarë të lartë shqiptarë.
Frroku u shpall i pafajshëm nga Gjykata e Krimeve të Rënda për vrasjen e Kryekomisar Dritan Lamaj në shkurt të vitit 2013, por Prokuroria apeloi vendimin. Pak ditë para se Apeli i Krimeve të Rënda të jepte vendimin me burg përjetë për Frrokun, ai u largua jashtë vendit. Arben Frroku u dënua me burgim të përjetshëm të formës së prerë nga Gjykata e Apelit.
Arben Frroku u arratis nga Shqipëria më datën 20 qershor të vitit të kaluar, dy ditë para zgjedhjeve lokale, pasi e kreu misionin e tij për t’i dhënë fitoren PS-së në Pukë. Prokuroria zbuloi se, Frroku nuk ishte regjistruar në sistemin TIMS, kur kaloi në pikën kufitare. Frroku u ndalua nga Policia e Malit të Zi në kufi me Kroacinë, ku u mbajt për rreth pesë orë për verifikim, pasi ka rezultuar person i shpallur në kërkim. Autoritetet e Malit të Zi e kanë mbajtur të izoluar Frrokun, duke i kërkuar Ministrisë së Brendshme shqiptare të dhëna ndaj tij, por Tahiri u konfirmoi autoriteteve malazeze se ndaj Frrokut nuk ka asnjë urdhër arresti. Pas konfirmimit nga Ministria e Brendshme shqiptare autoritetet malazeze e lanë të lirë Frrokun për të udhëtuar drejt Kroacisë.
Frroku ka mundur të largohet nga vendi pak ditë, pasi jepej vendimi i Apelit, duke mos hasur në asnjë pengesë as për faktin që ishte ende i dyshuari kryesor për vrasjen e komisarit Dritan Lamaj dhe pse sipas Prokurorisë të gjitha provat dhe dëshmitë faktonin se ishte ai autori që qëlloi mbi komisarin.

Dedektivi Steven Van Deneste, hetuesi dosjes “Frroku”

Dedektivi Steven Van Deneste ka qenë një nga hetuesit kryesorë për vrasjen e Aleksandër Kurtit në vitin 1999 në Belgjikë. Sipas dosjes së Prokurorisë belge, Aleksandër Kurti ra në kurthin e “Lumes”, një prostitute shqiptare me inicialet L.A. Ai kishte njohur prostitutën shqiptare me emrin “Jeta”. Kishte shkuar me të një ditë në hotel. Një ditë tjetër i shkon në vendin e punës dhe sheh bashkë me të Lumen, të cilën ai e kishte njohur që në Shqipëri, pasi ishin nga e njëjta zonë. Aleksandër Kurti i thotë Lumes se, “do t’u tregojë familjarëve të saj se ç’punë bënte ajo në Bruksel”. Ky fakt e tremb Lumen. Por situata bëhet më e rëndë, kur ai i gjen numrin e telefonit përmes Jetës dhe i përsërit të njëjtin kërcënim.
Lumja njofton për këtë Nardin, Leonard Frrokun, vëllanë e Mark Frrokut. Ndërsa Nardi njofton Lek Bib Djafën Aleksandër Vukën dhe Hilë Morinën. Këta të tre njoftojnë Alfred Kolën që ka njohje me Aleksandër Kurtin. Por në kurth do ta fuste Lumja. Ajo i telefonon dhe i lë takim në stacionin e trenit. Problemin që kishte shkaktuar Aleksandër Kurti me kërcënimin se do të njoftonte familjarët e Lumes e merr vesh edhe vëllai i tij, Nikolas Kurti. Tre ditë para vrasjes, ai i ka telefonuar motrës së tij dhe i ka kërkuar që “kunati i saj të takojë Benin, Arben Frrokun, pasi në rast të kundërt dikush do të vritej brenda 24 orëve”.
Aleksandër Kurti që mbante dokumente kosovare me emrin Azem Shkreli, në raportin e Prokurorisë thuhet se ka ndërruar jetë ekzaktësisht në orën 18:05. Me vete kishte një biletë treni për në Londër të blerë në orën 17:05. Nisja e trenit bëhej në orën 17:56, ndërsa mendohet se ai e ka ndjerë rrezikun se do ndiqej nga grupi i tutorëve. Më tej nga rrëfimi i vëllait të tij mësohet se viktima kishte konflikte edhe me Arben Frrokun, vëllanë e Markut. Policia e gjeti në agoni në orën 17:45, në stacionin e trenit “Gare de Midi”.

Deputetja e PD, Albina Deda denoncoi dje mungesën e infrastrukturës në Mirditë dhe akuzoi kryeministrin Rama se po bën propagandë me fasadat në një kur fshatra dhe Mirdita nuk kanë rrugë dhe energji.
“Në kohën kur fshatra dhe komunitete në Mirditë janë të izoluara, me rrugë të prishura dhe pa energji, në varfëri e skamje, Edi Rama bën propagandë me fasada dhe jep 1.7 milionë euro për qendrën e qytetit”, citohet në njoftimin e PD-së. “Nuk është aspak normale që të investohen për Qendrën e qytetit të Rrëshenit 1.7 milion euro në një kohë që të gjitha Njësitë Administrative të Mirditës janë të izoluara për shkak të rrugëve të shkatërruara”. Ky ishte reagimi i deputetes së Partisë Demokratike Albina Deda një ditë pas vizitës së Kryeministrit Rama në Mirditë.
“Ky investim nuk mund të jetë prioritet për Mirditën. Sheshi ishte i investuar edhe më parë nga pushteti lokal. Ishte në një gjendje të mirë, por jo prioritet, duke parë gjendjen e mjerë të rrugëve që lidhin njësitë administrative. Sot të gjitha rrugët janë në një gjendje të mjerueshme, janë në gjendje katastrofë”, deklaroi më tej Deda.
Deputetja e Partisë Demokratike në Mirditë i ka bërë thirrje qeverisë që t’i kthejë sytë nga fshatrat e kësaj zone, pasi banorët janë në mëshirë të fatit nga mungesa e investimeve.

Aksidenti me vdekje që ndodhi ditën e martë në rrugën dytësore Tiranë-Durrës afër Kasharit është shkaktuar nga vëllai i drejtoreshës së QSUT, por ngjarja është fshehur nga policia. Denoncimi është bërë nga një qytetar, i cili i është drejtuar me një mesazh ish-Kryeministrit Berisha. “Qytetari dixhital denoncon: Qendrimin e policisë ndaj aksidentit me prerje koke të viktimës nga vëllai i drejtoreshës së QSUT! Sb”, shkruan Berisha në Facebook, duke publikuar të plotë mesazhin e qytetarit.
“Zoti Berisha përshëndetje, arroganca e rilindjes ka arritur kulmin ku arrin të fshehë dhe lajmin e aksidentit me pasojë këputje koke në QSUT nga vëllai i Ogerta Manastirliut i cili ishte shoferi. Një aksident i rëndë me pasojë vdekjen e një shtetasi, ka ndodhur pasditen e djeshme në rrugën dytësore Tiranë-Durrës.
Dëshmitarë nga vendngjarja bëjnë të ditur se një trup i pajetë është pikasur në mes të rrugës, ndërsa makina që e ka aksidentuar është larguar. Pamjet kanë shokuar kalimtarët e shumtë, ndërsa në redaksinë e TV mbërrijnë fotot dhe videot amatore që tregojnë skenën e rëndë.
Mbërritja e shërbimit mjekësor dhe e forcave të rendit ka qenë e vonuar, raportojnë dëshmitarët.
Njoftimi i Policisë:
Më datë 17.10.2016, rreth orës 19:05, në rrugën dytësore të autostradës Tiranë-Durrës, pranë një qendre tregtare, një automjet me targa AA 730 MP që drejtohej nga shtetasi A. M., ka aksidentuar këmbësorin e seksit mashkull, rreth 60 vjeç, i cili ka ndërruar jetë në moment si pasojë e plagëve të marra. Grupi hetimor po punon për identifikimin e viktimës dhe zbardhjen e rrethanave të aksidentit. Drejtuesi i mjetit është ndaluar në flagrancë dhe është shoqëruar nga shërbimet e Qarkullimit Rrugor Tiranë. Ky është njoftimi i policisë, por dhe sot ai është tek Spitali i Burgut, e jo në spital, turp zoti Berisha”, përfundon mesazhi i qytetarit.

Një tjetër rast vdekje është regjistruar në maternitetin ‘Koço Gliozheni’ në Tiranë, ku ka humbur jetën një 60-vjeçare. Bëhet e ditur se viktima është Zenedi Harunaj nga Vlora, e cila ishte operuar përpara disa ditësh në këtë maternitet dhe pasi ishte larguar për në banesë, kishte shfaqur probleme shëndetësore.
Viktima u dërgua nga familjarët ditën e martë në spital, ku fatkeqësisht ndërroi jetë. Prokuroria ka nisur hetimet për këtë ngjarje për të zbardhur shkaqet dhe për të zbuluar në rast se ka patur pakujdesi në mjekim. Kujtojmë se në muajin shtator të këtij viti, 35-vjeçarja Aida Çajka humbi jetën së bashku me foshnjen e saj.