Komuniteti Shqiptar në Greqi ka shpërndarë në profilin e tij në facebook takimin me drejtuesin politik të Koalicionit Euroatlantik, Lulzim Bashën, i cili ka qenë i shoqëruar nga kandidati për deputet Fatmir Gjoci dhe kandidatët e tjerë Neli Demi dhe Endri Hasa. Ky takim u zhvillua në kuadër të bashkëbisedimeve me diasporën shqiptare për të diskutuar mbi problematikat e tyre dhe për të prezantuar projektet politike të këtij koalicioni.
Gjatë takimit, z. Basha u njoh nga afër me sfidat dhe vështirësitë që përballin shqiptarët që jetojnë dhe punojnë në Greqi. Përfaqësuesit e Komunitetit Shqiptar në Greqi, mes tyre kryetarja Rovena Xhori dhe anëtarët e kryesisë Emanuel Neti, Pjerin Lleshi dhe Skerdilajd Agalliu, i prezantuan kryetarit të Koalicionit Euroatlantik mënyrën e organizimit dhe funksionimit të komunitetit, si dhe shqetësimet kryesore me të cilat ata përballen çdo ditë.
Një tjetër pikë e rëndësishme e diskutimit ishte përfshirja e Fatmir Gjocit, kandidatit të ardhur nga komuniteti shqiptar në Greqi, në listat e Koalicionit Euroatlantik. Përfaqësuesit e komunitetit u njohën gjithashtu me objektivat dhe programin politik të kësaj force të re në skenën shqiptare, si dhe me angazhimin e saj për të përfaqësuar më mirë interesat e shqiptarëve jashtë vendit.
Komuniteti Shqiptar në Greqi theksoi edhe njëherë se mbetet i hapur për të bashkëpunuar me të gjitha forcat politike që shprehin interes për të dëgjuar dhe adresuar nevojat e shqiptarëve në diasporë. Ata ritheksuan rëndësinë e përfshirjes së emigrantëve në jetën politike dhe shoqërore të vendit amë, duke kërkuar më shumë vëmendje dhe mbështetje për të drejtat dhe integrimin e tyre në vendin ku jetojnë dhe punojnë.
Postimi i plotë i Komunitetit Shqiptar në Greqi:
“Përfaqësi e Kryesisë së Komunitetit Shqiptar në Greqi, priti në zyrat e saj kreun e Koalicionit Euroatlantik Lulzim Basha, shoqëruar nga kandidati për deputet për zgjedhjet e ardhshme Fatmir Gjoci, si dhe kandidatët e tjerë Neli Demi dhe Endri Hasa.
Gjatë takimit z. Basha u njoh me problematikat e komunitetit shqiptar në Greqi, si dhe mënyrën e organizimit dhe funksionimit të KShG.
Nga ana e KShG Rovena Xhori – Kryetare dhe anëtarët e kryesisë: Emanuel Neti, Pjerin Lleshi & Skerdilajd Agalliu, u njohën me pjesë të programit të Koalicionit Euroatlantik, me veprimtarinë e kandidatit të ardhur nga komuniteti shqiptar në Greqi Fatmir Gjoci, si dhe punën e anëtarëve të degës përkatëse në Athinë.
Komuniteti Shqiptar në Greqi mirëpret dhe bashkëpunon me të gjitha palët politike, të cilat dëshirojnë të njihen me problemet e shqiptarëve në Greqi e të ofrojnë ndihmesën e tyre.”
